Nshi ya Eohwelo ekɔ etena ka fudia olimu
1. Shɛngiya yakɔna yaki la “nshi ya waki” le ase Isariyɛlɛ wakokaka Nzambi wɔma?
1 Lo tena diakashikikɛma dia l’ɔnɔnyi, ase Isariyɛlɛ wa lo nshi y’edjedja wakohɔka “nshi ya waki ya [Jehowa].” (Lew. 23:2) Ndjatshungwɛka etena ka kana yimba lo ɛlɔlɔ waki Nzambi akashaka ase Isariyɛlɛ ɔngɛnɔngɛnɔ w’efula ndo akâtshutshuyaka dia monga la ohetoheto lo ɔtɛmwɛlɔ wa pudipudi.—2 Ek. 30:21–31:2.
2, 3. Lande na kele ekɔ dimɛna sho pamia olimu aso wa lo nyuma lo etena ka Eohwelo ndo etena kakɔna kayotosala Eohwelo?
2 Lo nshi yaso nyɛ, olimu aso wa teokrasi w’ɔngɛnɔngɛnɔ mongaka efula ɔnɔnyi tshɛ lo nshi ya Eohwelo. Ɔsɔ ekɔ etena kalekaso kana yimba lo woshasha w’oshinga wolo wakasha Jehowa dia wahɔ aso, mbuta ate Ɔnande ɛtɔi lakandote. (Joa. 3:16; 1 Pet. 1:18, 19) Etena kakanaso yimba lo ngandji kakɛnya Nzambi ndo Ɔnande, sho tshutshuyamaka dia tombola Jehowa ndo ndjaketembola dia sala lolango lande.—2 Kor. 5:14, 15.
3 Ɔnɔnyi ɔnɛ Dambo dia dikɔlɔ dia Nkumadiɔndjɔ diayosalema Lushi la nɛi Ngɔndɔ ka sato 24, l’ɔkɔngɔ wa ɛɔtwɛlɔ ka wonya. Ngande wayotokoka fudia olimu aso w’esambishelo lo Ngɔndɔ ka sato, ka nɛi ndo ka tanu na?
4, 5. a) Kakɔna kakakimanyiya amɔtshi dia sambisha anto efula lokumu l’ɔlɔlɔ? b) Yoho yakɔna y’esambishelo yamboyɛna dia yekɔ la etombelo w’ɔlɔlɔ l’ɛtshi kanyu ka nkɛtɛ?
4 Sambisha anto efula: Yanga toho ta sambisha anto efula etena keyɛ l’olimu w’esambishelo. Onde wɛ kokaka ndjalɔngɔsɔla dia sambisha lo soko la soko etena kele anto efula la ngelo, ɛnyɛlɔ oko la dikɔlɔ kana la dikɔlɔ dia yɔɔ? Naka anto amɔtshi lo olui ayɛ wa wekelo wa dibuku kombolaka dia sambisha la ntondo ka wekelo, kete omendji wa wekelo wa dibuku mbeyaka la nɔngɔsɔla dia sala losanganya l’olimu la lo tshena pe dia kamba lo mbilo yosukanyi.
5 Yoho kina ya tana anto efula ele sambisha lo ahole w’anto tshɛ. Kadiyɛso kɛmɔtshi ka lo wodja wa Japon akalangaka kamba oko ombatshi mboka wa tshanda kânga mbakandakambaka olimu wa l’emunyi wa lo tena tshɛ. Ekumanyi kɛmɔtshi akawotɛ dia lushi tshɛ la ntondo ka nde ntshɔ l’olimu ande wa l’emunyi, nde akakokaka sambisha lo shinga suke la garɛ ka kawolo. L’ɔkɔngɔ wa nde minya ɔsɔnyi waki lande, ndo diɔnyɔ diaki anto wakɔsaka la nde kawolo kâmɛ, nde akayongaka la anto 40 wakandashaka periodikɛ mbala la mbala, mbidja ndo anto wakɔsaka la nde kawolo kâmɛ, wanɛ wakakambaka olimu lo garɛ ndo wanɛ wakasondjaka suke la garɛ. Nde akakahanya yɛdikɔ ya l’atei atei ya periodikɛ 235 lo ngɔndɔ tshɛ. Nde aki l’akoka wa tatɛ mbeka la anto asamalo Bible lo kahanaka la wɔ kanyi mɔtshi ya l’Afundelo minitɛ ngana tsho lushi tshɛ.
6. Ngande wakoka ɛlɔngɔlɔngɔ la esekaseka pamia olimu awɔ wa lo nyuma?
6 Waaso wa sambisha: Apandjudi efula wâkɔtɔ kalasa mongaka la nshi ya dikimɔ l’ɔnɔnyi. Ɔsɔ ekɔ tena dia dimɛna dia kamba oko ombatshi mboka wa tshanda. Ndo nto, ɛlɔngɔlɔngɔ la esekaseka w’Akristo kokaka pamia olimu awɔ lo sambisha la kalasa. Wɛ mbeyaka la mamba dia mɛna woho wayonga asekayɛ wa la kalasa la mposa ka mbeya waetawɔ ayɛ. Lande na kahayakambe la tena diatonyɔkɛtshanyaka akambo la kalasa kana dianyɔlɔmbawɔ dia kɔndɔla dikambo dimɔtshi lofunda dia sambisha? Amɔtshi waki l’akoka wa sala dikambo sɔ lo kamba la waa bandɛ vidɛo yaso. Akina wakatatɛ mbeka Bible la asekawɔ wa la kalasa ndo wakâkimanyiya dia pama polo lo vɔ ndjakimɔ ndo batizama. Ɔsɔ ekɔ toho t’amɛna ta ‘tombola lokombo laki Jehowa.’—Osam. 148:12, 13.
7. a) Ngande wakakambe ɔnangɛso ɔmɔtshi la waaso waki lande dia sambisha akina? b) Onde ndo wɛ lawɔ ambohomana la akambo wa woho akɔ wâmɛ?
7 Lo elimu ayɛ wa lushi la lushi yanga toho ta tɛkɛta l’anto dikambo dia Nzambi kaso ka diambo ndo dia alaka ande wa mamba. Ɔnangɛso ɔmɔtshi lakɛngɔlaka lo kawolo kâmɛ lushi tshɛ akasambishaka anto wakɔsaka la nde kawolo kâmɛ etena kakandakokaka sala dikambo sɔ. Ɛnyɛlɔ, etena kakandakongɛka kawolo kekina lo garɛ kɛmɔtshi, nde akasambishaka ɔlɔngɔlɔngɔ ɔmɔtshi minitɛ tshanu lushi tshɛ. Oko etombelo, ɔlɔngɔlɔngɔ ɔsɔ ndo asekande waketawɔ mbeka Bible. Wekelo wa Bible wakasalemaka lo kawolo etena kakawatatshɔka. Yema tshitshɛ l’ɔkɔngɔ diko, osombe ɔmɔtshi wa womoto wakahokamɛka asawo awɔ akasawola la ɔnangɛso ndo akɔlɔmbɛ dia nde mbeka la nde Bible. Nde lawɔ akangɛnangɛnaka efula wekelo ande lo nshi yakandɔsaka kawolo. Lo yoho shɔ, ɔnangɛso akekaka la anto dikumi Bible lo kawolo.
8. Yoho yakɔna y’esambishelo yakoka kimanyiya wanɛ wele bu la akoka wa sambisha efula l’ɔtɛ wa lotshundu kana wa hemɔ dia pamia olimu awɔ w’esambishelo?
8 Ko kayotota naka wɛ bu l’akoka wa sala efula l’ɔtɛ wa lotshundu kana hemɔ? Toho efula takokayɛ pamia lotombo layɛ le Jehowa tekɔ. Onde wɛ ambohembaka esambishelo ka lo telefɔnɛ? Naka wɛ haleke mbeya woho wa sambisha lo telefɔnɛ, kete wɛ mbeyaka la mbutɛ omendji ayɛ wa wekelo wa dibuku. Nde mbeyaka la nɔngɔsɔla dia apandjudi wakamba la yoho shɔ sambisha kâmɛ la yɛ. Etena kasambishayɛ la onto okina, nyu kokaka mbeka oma le onto la onto ndo kimanyiyana ɔmɔmɔ dia sambisha dimɛna. Alako w’eshika wendana l’esambishelo ka lo telefɔnɛ tanemaka lo Olimu aso wa Diolelo wa Ngɔndɔ ka hende 2001, lɛkɛ 5-6.
9. Ngande wakokaso kimanyiya ambeki wa Bible dia monga la akoka wa sambisha la etshumanelo lo esambishelo ka lo sɛkɛ?
9 Mbɔtɔ lo Eohwelo mbeyaka keketsha eyoyo dia vɔ pamia lotombo lawɔ le Jehowa. Wɛ kokaka mbakimanyiya dia vɔ minya wɔma tshɛ wakoka monga lawɔ lo kɛnɛ kendana la sambisha dimɛna lo mbakɔndɔlɛ ɛkɔndɔ w’ɛlɔlɔ w’esambishelo ndo tawaetshaka yema yema dia vɔ nembetshiya wetshelo wa lo Bible ndo dia vɔ mamɛ mbetawɔ kawɔ. (1 Pet. 3:15) Naka ombeki wa Bible ambɛnya nsaki ka tatɛ sambisha lokumu l’ɔlɔlɔ, kete wɛ mbeyaka sawola la omendji walɔmbɔla. Nde ayɔlɔngɔsɔla dia dikumanyi sawola la ombeki la ntondo kayɛ dia nshikikɛ kana nde aya la akoka wa sambisha kâmɛ la etshumanelo lo esambishelo ka lo sɛkɛ. Lo mɛtɛ Jehowa ngɛnangɛnaka dia mɛna eyoyo weta lo wedi ande dia sukɛ lowandji lande la l’andja w’otondo!—Tuk. 27:11.
10. a) Ngande wakoka ekongelo ka dimɛna tokimanyiya dia sho kamba oko ambatshi mboka wa tshanda? b) Onde wɛ aki l’akoka wa kamba oko ombatshi mboka wa tshanda ɔnɔnyi wetshi lo nshi ya Eohwelo? Woho akɔna na?
10 Onde wɛ kokaka kamba oko ombatshi mboka wa tshanda? Paka kana lomba ɔlɔlɔ la wenya 50 walɔmbama le ombatshi mboka wa tshanda. (Mat. 5:37) Dikambo sɔ nembetshiyaka dia wɛ pombaka ndjalɔngɔsɔla dia mbetshaka yɛdikɔ ya wenya 12 l’olimu w’esambishelo lomingu tshɛ. Onde ekongelo kɛmɔtshi k’ombatshi mboka wa tshanda kele lo lɛkɛ 5 mbɔtɔnɛka la awui ayɛ? Naka kema, kete wɛ kokaka sala ekongelo kayokokimanyiya dia wɛ kamba oko ombatshi mboka wa tshanda lo Ngɔndɔ ka sato, ka nɛi kana ka tanu? Lɔmba Jehowa dia nde tshɔkɔla welo ayɛ dia pamia olimu ayɛ w’esambishelo.—Tuk. 16:3.
11. Ngande wakoka dikumanyi ndo ekambi w’olimu sukɛ wanɛ wayokamba oko ambatshi mboka wa tshanda?
11 Dikumanyi ndo ekambi w’olimu wayosukɛ welo wadjayɛ dia mbetɛ nshi ya Eohwelo kɛnɛ yoho mɔtshi ya lânde ya tombola Jehowa. Ondo, efula l’atei awɔ wayokamba oko ambatshi mboka wa tshanda. Dikumanyi wayɔlɔngɔsɔla dia sala nsanganya nkina y’olimu, ɛnyɛlɔ oko la akɔlɔ, la akɔlɔ wa yɔɔ wa nshi ya lo lomingu ndo naka kokaka lo wikɛndɛ. Dia ndjashikikɛ dihole ndo etena kayosalema nsanganya shɔ ndo onto akɔna layokoka ndjilɔmbɔla, dikumanyi mbeyaka sawola la wanɛ wambokongɛ dia kamba oko ambatshi mboka kana wasangoya dia kamba olimu ɔsɔ. Dikumanyi wayosala la wolo dia mbɔsa tɛdikɔ dia apandjudi akina kamba la yɛ lo nshi ndo lo wenya wakayakongɛ dia sambisha. Lo yoho shɔ, sangwelo kokaka shikikɛma dimɛna ndo akambo w’ɔlɔlɔ efula mbeyaka salema.—Tuk. 20:18.
12 Sala tshɛ kakokayɛ sala: Naka akambo wele layɛ hakokimanyiya dia wɛ kamba oko ombatshi mboka wa tshanda, ohɔ dia Jehowa mbetawɔka welo ndo ndjahombia kaso ‘lo ndjela kɛnɛ keso latɔ, koko aha lo ndjela kɛnɛ keso bu latɔ.’ (2 Kor. 8:12) Tekɔ la awui efula wa mbisha Jehowa losaka. Davidi aki la ɔkɔkɔ w’ɔlɔlɔ wa funda ate: “Dimi layutumbulaka [Jehowa] tena tshe. Diandu diandi diayuyalaka l’unyo ami la lushi la lushi.” (Osam. 34:1) Nyɛsɔ toyashikikɛ dia sala ngasɔ lo nshi nyɛ ya Eohwelo.
12. Kakɔna katotshutshuya dia tombola Jehowa tena tshɛ?
[Kiombo ya lo lɛkɛ 3]
Ngande wayoyohamia olimu ayɛ?
◼ Sambisha etena kele anto lawakawɔ
◼ Sambisha lo ahole w’anto tshɛ
◼ Sambisha l’olimu kana la kalasa
◼ Sambisha lo telefɔnɛ
◼ Kamba oko ombatshi mboka wa tshanda
[Tablo ka lo lɛkɛ 5]
Bɛnyɛlɔ dia dikongelo dia kamba oko ombatshi mboka wa tshanda—Toho ta kongɛ dia sambishaka wenya 12 lomingu tshɛ
Pindju—Lushi l’ɔtɔi polo la samalo
Lushi la lomingu wɛ mbeyaka kongɛ wenya woho walangayɛ.
Lushi Etena Wenya
l’ɔtɔi pindju 2
la hende pindju 2
la sato pindju 2
la nɛi pindju 2
la tanu pindju 2
la samalo pindju 2
Wenya tshɛtshɛ: 12
Nshi hiende y’etondo
Nshi hiende yalangayɛ l’atei a lomingu.(Lo ndjela nshi yɔsɔnyiso, ekongelo kɛnɛ mbeyaka monga paka la wenya tshɛtshɛ 48 lo ngɔndɔ.)
Lushi Etena Wenya
la sato lushi l’otondo 6
la samalo lushi l’otondo 6
Wenya tshɛtshɛ: 12
Akɔlɔ ahende la wikɛndɛ
Akɔlɔ ahende walangayɛ l’atei a lomingu.
Lushi Etena Wenya
l’ɔtɔi dikɔlɔ 1 1⁄2
la sato dikɔlɔ 1 1⁄2
la samalo lushi l’otondo 6
la lomingu tshenyi ya lushi 3
Wenya tshɛtshɛ: 12
Nshi shato l’ɔkɔngɔ a midi la Lushi la samalo
Lushi la lomingu wɛ mbeyaka kongɛ wenya woho walangayɛ.
Lushi Etena Wenya
l’ɔtɔi l’ɔkɔngɔ a midi 2
la sato l’ɔkɔngɔ a midi 2
la tanu l’ɔkɔngɔ a midi 2
la samalo lushi l’otondo 6
Wenya tshɛtshɛ: 12
Ekongelo kami k’esambishelo
Nshikikɛ lofulo la wenya wayoyosambishaka etena tshɛ.
Lushi Etena Wenya
l’ɔtɔi
la hende
la sato
la nɛi
la tanu
la samalo
la lomingu
Wenya tshɛtshɛ: 12