Tɔtɛkɛtɛ Dikambo Dia Jehowa Lushi Tshɛ
1 Anto nangaka tɛkɛta kɛnɛ kele l’etema awɔ, nɛ dia onyɔ atɔtɛkɛtaka oma l’efula k’akambo wele l’otema. (Luka 6:45b) Ko sho, kakɔna kolekiso nanga l’atei w’otema aso na? Omembi w’esambu akafunde ate: “Lulimi lami layoteketaka dia sambu kaye k’ololo, ndu dia diandu diaye nshi tshe.” (Osam. 35:28) Nde aki la lowando l’efula le Jehowa ndo akɔsaka di’ekɔ oko diɛsɛ dia mamba dia tɛkɛta dikambo dia Nzambi ndo mbândolaka lo tena tshɛ. Nɛ dia nde akeyaka Jehowa dimɛna efula, omembi w’esambu aki l’ɛkɔkɔ efula wa mbôtombola. (Osam. 35:9) Ngande wakokaso mbokoya ɛnyɛlɔ kande k’ɔlɔlɔ na?
2 Tɔtɛkɛtɛ Dikambo dia Jehowa laa Ngelo: Dikambo dia Jehowa mbahomba ase nkumbo sawolaka lushi tshɛ l’asawɔ. Ambutshi woka Jehowa ngandji efula wayɔtɛkɛtaka dikambo diande lam’akambawɔ ntumu yawɔ tshɛ. (Euh. 6:5-7) Lâsɔ mbayɛna ana ɔnɛ shɛwɔ la nyangɛwɔ sɛnaka oma lo mbetawɔ ndo ngɛnangɛnaka ɛlɛmbɛ wa Nzambi. Ɔnkɔnɛ ana wayɔsaka wekelo wa Bible wa lo nkumbo oko yoho y’oshika yɛnya omamemelo w’ambutshi awɔ le Nzambi.—2 Pet. 3:11.
3 Tɔtɛkɛtɛ Dikambo dia Jehowa Sho l’Anangɛso: Elimu wa teokrasi wasalaso lomingu tshɛ toshaka waaso efula wa ndesha yimba yaso l’otema aso mbo ya ndɛ ya lo nyuma. Akambo w’ɛlɔlɔ wakokaso tɛkɛta wekɔ nshi tshɛ. (Luka 6:45a) Onde wɛ akalembetɛ kanyi mɔtshi yakakɔngɛnyangɛnya efula lo wekelo ayɛ w’onto ndamɛ kana lo walelo wa Bible wa lomingu la lomingu? Sawola l’ananyɔ dikambo diakɔ, ko wɛ ayowakimanyiya dia ndo vɔ lawɔ nyomoleka mboka Jehowa ngandji.—Osam. 35:18; Heb. 10:24.
4 Tɔtɛkɛtɛ Dikambo dia Jehowa Lale Anto Wotodingi: Lo asawo wasawolaso nshi tshɛ l’anyaso, oyadi l’olimu, la kalasa, kana l’ase nkumbo kaso wele bu l’ɔtɛmwɛlɔ aso, vɔ pombaka mɛna hwe ɔnɛ dui dia ntondo diayakiyanyaso lo lɔsɛnɔ laso ele dia tɛkɛta dikambo dia Jehowa. Lo dihole dia sho mbɔsa ɔtɛkɛta wa lɔsɛndji wa l’andja ɔnɛ, sho la dia tombola Nzambi oma lo yoho yaso ya tɛkɛta. Lushi tshɛ, lo diaaso tshɛ, tɔtɛkɛtɛ dikambo dia lokumu l’ɔlɔlɔ lakawatosha ɔkɛndɛ wa sambisha.—Etsha 5:42; Kol. 4:6.
5 Oko weso atɛmɔdi wa Jehowa wa mɛtɛ, tayokambaka la waaso wayotokondjaka lushi tshɛ dia tɛkɛta dikambo dia Jehowa, Nzambi kaso koleki tshɛ.—Osam. 106:47.
[Caption on page 1]
Sho La Dia Kalolaka Mbala La Mbala
1 Onde ko mbala ka ntondo kakakotɛ onto dia lokumu l’ɔlɔlɔ mbakayetawɔ? Naka bu, kete wɛ la dia monga la lowando nɛ di’Ɛmɛnyi wa Jehowa wakakalola mbala la mbala edja ndo lam’akayetawɔ mbeka la wɔ Bible. Ekɔ ɔlɔlɔ kanyiyaka dikambo sɔ etena kakambayɛ mbala la mbala lo mbilo kakawakosha.
2 Nsɛnɔ y’anto yekɔ lo tatshikitana tsho. Vɔ pomanaka l’ekakatanu kana akambo akina, vɔ mbokaka akambo wa wɔma watomba l’atshunda w’anto kana l’andja ɔnɛ, wekɔ lo diɛnɛ la wola, kana hemɔ kana lɔnyɔi lo nkumbo. Akambo wa ngasɔ koka mbâsokoya lo vɔ nyanga dia mbeya kɛnɛ kele lo kiɔkɔ ya fɔnu shɔ tshɛ. Sho la dia mbeya awui akɔna wâhedia wɔɔngɔ ko l’ɔkɔngɔ mbâkeketsha la losango l’ɔlɔlɔ.
3 Ɔnɛ Ekɔ Olimu wa Mbitsha Anto: Ohokanyiya wanɛ wakamba olimu wa mbitshaka anto etena katomba mpokoso kɛmɔtshi. Oyadi kânga amɔtshi wayôyangaka lo dihole dimɔtshi diɛnawɔ paka tɔtɔi t’ehandɔ, vɔ hawɔlɛngɔla alemba l’ɔnɛ wanyawɔ wamboshola ehandɔ efula dihole dikina. Olimu aso wa mbitsha anto watashile. Ɔnɔnyi tshɛ, nkama ya nunu di’anto walanga mbika lo ‘fɔnu ka woke’ tanemaka.—Eny. 7:9, 14.
4 “Onto tshɛ latɛndɛ lokombo la Jehowa ayoka.” (Romo 10:13-15, NW ) Lam’okaso ɛtɛkɛta ɛsɔ, onto l’onto l’atei aso la dia mɛna ɔnɛ ekɔ ohomba sho tetemala la sambisha. Tamba lam’akatamɛ sambisha lo mbilo kaso, ana wambôla ndo wambokoka kana lomba dimɛna lo dikambo dia nshi yawɔ yayaye ndo dia oyango wa lɔsɛnɔ lawɔ. Ndoko woho wokokiso mbeya akɔna ayolonga nto. (Und. 11:6) Anto efula wakatonaka wambetawɔ mɛtɛ. Olimu aso kema wa nomboya anto, koko wa tetemala la mbasha diaaso dia vɔ mboka ndo shimbamela oma l’andja ɔnɛ w’omusu. Oko akatshe ambeki wa Yeso wa ntondo, sho la dia ‘tetemala la ntshɔ’ le anto ndo pemba dia kotola yambalo yawɔ oya lo losango la Diolelo.—Mat. 10:6, 7.
5 Lam’ele tekekɔ la diaaso dia sambisha, dui sɔ mɛnyaka kɛtshi ka Jehowa. (2 Pet. 3:9) Oko washaso anto diaaso dia vɔ mboka mbala la mbala, tekɔ lo mbika epole ɔsɛkɛ lo ngandji ka Nzambi, ndo ngasɔ mbôtombolaso.