Woho wa Kamba Kâmɛ lo Nkumbo—Lo Wekelo wa Bible
1 Sɔlɔ kimanyiyaka dia monga la lɔsɛnɔ la nkumbo l’ɔlɔlɔ ndo lele l’oyango, koko etombelo w’ɔlɔlɔ hawoye oyaya kânga tekɔ lo kambɛ Jehowa dimɛna. Pombaka nshi efula ndo mbidja weolo dia mbika nkumbo kele nge lo nyuma. Ekɔ ohomba efula di’ase nkumbo kamba kâmɛ l’oyango ɔsɔ. Sawo nɛ ekɔ sawo dia ntondo l’atei w’asawo asato wayoyelana wayotɛnya woho wakoka nkumbo kamba kâmɛ dia monga la mbekelo y’amɛna ya wekelo.
2 Lo Mbadiaka Bible Lushi la Lushi: Tukedi 24:5 mbutaka ɔnɛ “kanga ewu katukikitshaka wulu andi.” Ewo kakondja onto oma lo walelo wa Dui dia Nzambi lushi la lushi mboshaka wolo wa l’etei wahombama dia kokɛ lonyuma lande l’ehemba wa Satana. (Osam. 1:1, 2) Onde nyu mbadiaka Bible kâmɛ lo nkumbo lushi la lushi? Ekongelo ka Kalasa k’Olimu wa Teokrasi mbishaka “Ekongelo Kekina ka Walelo wa Bible” wa lomingu tshɛ l’ɔnɔnyi w’otondo. Dia kiyela, nkumbo la dia ndjaombɛka kânga taahe dikumi lushi tshɛ. Nyɔsɔnɛ wonya wasungana, oko wonya walɛnyu yangɔ ya pindju, l’ɔkɔngɔ wa mma dia dikɔlɔ, kana la ntondo ka ndala, dia mbadiaka Bible ndo sɛdingolaka divɛsa dia lushi oma lo Tɔsɛdingolake Afundelo. Nyodje dui sɔ l’ɔnɔngɔ w’akambo watshanyu lushi tshɛ lo nkumbo kanyu.
3 Lo Mbekaka Kâmɛ Lomingu la Lomingu: Wekelo wa Bible lo nkumbo pombaka monga dikambo dioleki ohomba dia l’atei a lomingu. Ose nkumbo tshɛ la dia sukɛ wekelo ɔsɔ lo mbishaka kɔmatɛrɛ l’ohetoheto. Owandji wa nkumbo pombaka sɛdingola ehomba wa lo nkumbo etena kasɔnande awui wa mbeka, lushi, wonya ndo edja kayoviya wekelo. Dja wekelo wa nkumbo lo dihole dia ntondo l’ekongelo kanyu ka lomingu la lomingu. Tetawɔke dia akambo wele bu ohomba efula ndjekama l’atei.—Fil. 1:10, 11.
4 Papa kɛmɔtshi kakawelɛka wonya tshɛ lo telefɔnɛ di’akambo w’okanda, akadimaka telefɔnɛ ka lo luudu lande wonya wa wekelo wa lo nkumbo. Etena kakayaka waa kidiya la ngelo, nde akawaelɛka dia vɔ ndjoyela wekelo kana mbatɛ dia vɔ konga edja ndo wekelo amboshila. Papa kɛsɔ akɔshi yɛdikɔ di’aha ndoko ema futanya wekelo wa nkumbo. Dui sɔ diakambiaka anande efula. Koko okanda ande akatadɛka.
5 Ande ɔngɛnɔngɛnɔ lam’akamba ase nkumbo elimu wa lo nyuma kâmɛ lee! Naka sho monga la kɔlamelo lo weolo wadjaso dia mbekaka Bible lo nkumbo, kete tayokondja ɛtshɔkɔ efula oma le Jehowa.—Osam. 1:3.