Yɛdikɔ Yakatɔshi ya Ndjela Mboka ka Jehowa
1 Dui dimɔtshi di’ohomba efula diakatama lo Losanganya la “Mboka ka Nzambi ka Lɔsɛnɔ” ele: yɛdikɔ yakatɔshi lo dako dia ndjihelo. Yɔ tatɛka l’ɛtɛkɛta ɛnɛ: “Sho . . . tambetawɔ l’otema ɔtɔi ɔnɛ mboka ka Nzambi mbele mboka koleki dimɛna.” Tênde akambo amɔtshi w’ohomba efula wakatama lo yɛdikɔ yakɔ shɔ wakatetawɔ ɔnɛ: “EELO!”
2 Takɔshi yɛdikɔ dia tshikala pudipudi la ntondo ka Jehowa, aha mbɔtɔ vadi y’oma l’andja ɔnɛ. Tayotetemala la mbetsha lolango la Nzambi la ntondo lo nsɛnɔ yaso. Lam’ayotokambaka la Bible, Dui diande, oko ɔnɔmbɔdi aso, hatotɛtɔla lo lonya l’omi kana la lɔmɔsɔ, lo mɛnya ɔnɛ mboka ka Nzambi ndeka ya l’andja ɔnɛ la fwa.
3 Lo yɛdikɔ y’efula, anto hawoyele mboka ka Nzambi ka lɔsɛnɔ ndo diɔ diakɔ diadiɛnɛwɔ. (Jer. 10:23) Ɔnkɔnɛ, sho la dia tetemala la mbetshama oma le Jehowa, Ombetsha aso wa Woke, lata ate: ‘Mboka tɔ kɛnɛ. Nyɔkɛndɛkɛndɛ lɔkɔ.’ (Isa. 30:21) Mboka ka Jehowa ka lɔsɛnɔ ndeka mboka nkina l’akambo tshɛ oko ɛnyamidiɔ l’Afundelo. Dia ndjela mboka kɛsɔ, ekɔ ohomba efula sho kondja wahɔ wa kɛnɛ tshɛ katetsha Jehowa.
4 Ekongelo ka Jehowa ka Wetshelo Koleki Tshɛ: Jehowa têtshaka oyango wa mɛtɛ wa lɔsɛnɔ ndo woho wa sho sɛna dimɛna efula. Nde têtshaka woho wa ndowanya nsɛnɔ yaso lo yimba, lo lɔkɛwɔ ndo lo nyuma. Nde têtshaka woho wa mbidjasɛ lo wɔladi l’anangɛso, nkumbo kaso ndo anyaso anto. Nde têtshaka tshɛ kɛsɔ lo tshimbo ya Bible la y’ɔlɔngɔswamelo ande.
5 Nsanganya yaso ya l’etshumanelo yekɔ ohomba efula lo dikambo sɔ. Lam’ɔtɔso tena tshɛ lo nsanganya yakɔ tshanu ndo washaso kɔmatɛrɛ lɔkɔ, sho ndowanyemaka dimɛna efula oko ekambi wa lokumu l’ɔlɔlɔ ndo kondjaka wetshelo wakoka lo lɔsɛnɔ l’Okristo. (2 Tim. 3:16, 17) Ombetsha aso wa Woke têtshaka nto lo tshimbo ya nsanganya ya weke. Sho la dia ndjadjɛ oyango w’aha pandja ndoko losanganya ɔtɔi kana etenyi ka losanganya naka demba diekɔ ki ndo ndoko dui diatoshimba ntshɔ.
6 Nyɛsɔ totetemale la ndjela mboka ka Nzambi lo lɔsɛnɔ laso l’ohetoheto nshi tshɛ. Ngasɔ, kayototombola Jehowa ndo kayotokondja ɛlɔlɔ wa pondjo.—Is. 48:17.