Woho Watokimanɛka Ase Nkumbo dia Kamba Olimu wa Nzambi lo Yɛdikɔ y’Efula
1 Onde ekɔ dui dimɔtshi dioleki nsalanganya otema oko mɛna waomi la wadiɛwɔ ndo ambutshi l’anawɔ wakamba olimu w’Akristo kâmɛ, ko tatombolaka lokombo la Jehowa lo sɛkɛ? (Osam. 148:12, 13) Nkumbo tshɛ pombaka monga la mbekelo k’ɔlɔlɔ ka tombaka esangɔ l’esangɔ l’olimu w’esambishelo. Onde lo nkumbo kanyu nyambɔsɔnaka lushi lɔmɔtshi lo lomingu dia tombaka l’esambishelo? Naka eelo, kete onto l’onto mbeyaka shikaa kɛnɛ kahombande ntsha dia ndjasha efula l’olimu akɔ.—Tuk. 21:5a.
2 La ntondo ka lushi lahomba nkumbo kanyu ntomba l’olimu, bonde kahanyayadjɛ oyango wa talɔngɔsɔlaki asawo wayonyotasawolaka l’anto l’esambishelo? Naka nyu tawahembaki la ngelo kete dui sɔ diayonyokimanyiya efula, ndo nyayonga la yimba ya kimanɛ kâmɛ lo nkumbo. Ande ɔlɔ naka nkumbo k’otondo ndjashaka l’olimu w’esambishelo ndo ndjâlɔngɔsɔlaka dimɛna lee!
3 Omendji ɔmɔtshi weteta akatombe la nkumbo kɛmɔtshi l’olimu wa takahanyaka waa periodikɛ. Lam’akandatasambishaka lo luudu la luudu nde la yana ya yimato mɔtshi, yana yakɔ akawombola ate: “Wenya engana wangaso kamba sh’ahe?” Ko yana yakɔ akawotɛ ate: naka tambokumiya kete lambotshɔ tosambisha dimi la papa. Mbokɛmaka hwe dia nde la she mɛtɛ wakangɛnangɛnaka kamba kâmɛ. Ande yimba y’ɔlɔlɔ ya kamba kâmɛ lo nkumbo lee!
4 Nkumbo mɔtshi mbeyaka monga l’akoka wa kamba oko ambatshi mboka wa tshanda kâmɛ ngɔndɔ ɔtɔi l’ɔnɔnyi. Mbeyaka monga nto ko kânga ose nkumbo ɔtɔi tetemala pondjo l’olimu w’ombatshi mboka wa tshanda koyanga kamba oko ombatshi mboka wa pondjo. Naka vɔ ndjâlɔngɔsɔla dimɛna ndo kimanɛ, kete ondo ase nkumbo tshɛ wayokoka fudia ekambelo kawɔ l’esambishelo lo sukɛka ɔnɛ lele ombatshi mboka. Lo mɛtɛ, nkumbo kayokondja ɛtshɔkɔ oma lo etete kawɔ l’olimu ɔsɔ ndo oma l’awui w’ɛlɔlɔ watahomana la wɔ l’olimu akɔ.—Mal. 3:10.
5 Naka nyu ndjasha efula l’olimu wa sambisha evanjiliyɔ, kete nkumbo kanyu k’otondo kayonga kâmɛ, kayonga l’ohetoheto, kayokondjaka elowa w’ɛlɔlɔ ndo kayɔngɛnangɛna l’olimu wa Jehowa!—Enda lo Filipi 2:1, 2.