Totakongɛki Akambo la Ntondo!
1 Ɔlɔngɔswamelo wa Jehowa toshaka nshi tshɛ ekongelo k’elimu wa teokrasi dia tokotshiyɛ ehomba aso wa lo nyuma. Lowando laso totshutshuyaka dia sho kondja ɛlɔlɔ lo kiambokambo tshɛ yakalɔngɔswama, ɛnyɛlɔ oko: waembwelo w’omendji weteta, nsanganya ya weke la ya distrikɛ ndo elimu ekina wa lânde wasalema l’etshumanelo l’etshumanelo. (Mat. 5:3) Lonyangu, k’amɔtshi hawokondja wahɔ oma lo efula ka tɛdikɔ tɔsɔ ta lo nyuma l’ɔtɛ w’akambo amɔtshi wambowokongɛka. Kakɔna kakokaso ntsha dia mbewɔ dikambo sɔ na? Tɛdikɔ takɔna tahombaso mbɔsa di’aha elimu wele bu wa teokrasi ndjekamɛ ‘akambo woleki ohomba’ na?—Fil. 1:10.
2 Ekɔ Ohomba Kongɛka Akambo la Lomba: Tukedi 21:5 mbishaka dako nɛ: “Tukanyi ta kanga kolamelu, tatûkundjiyaka diango efula, keli kanga utalutalu atuyalaka la wula.” Dia kondja ‘ɛlɔlɔ’ wa lo nyuma, sho la dia takongɛki akambo dimɛna dimɛna la ntondo, aha la mbohɛ elimu wa teokrasi wambɔlɔngɔswamaka. Sho la dia kongɛ elimu aso hita l’etena kɛmɔtshi kahawakoke ndjotohondja ɛtshɔkɔ wa lo nyuma. Naka tayɔsaka tɛdikɔ esadi esadi dia sala akambo walangaso, aha la sho kanyiya di’akambo amɔtshi wa teokrasi wele la ntondo, kete tayoyodiɛnɛ la “wola” wa lo nyuma.
3 Tatoyahondjake! Onto tshɛ tokongɛka akambo wayondosala lo nshi yayaye, ɛnyɛlɔ: ntshɔ lo vakashi, lo nkɛndɔ y’awui w’okanda, tembola ewotɔ ndo akambo akina. La ntondo ka wɛ mbɔsa yɛdikɔ mɔtshi kana kongɛ dikambo dimɔtshi, tokenda ekongelo k’akambo wa lo nyuma wele la ntondo. Naka wɛ ambɛna di’omendji w’otshimbedi ekɔ lo ndjaye kana ɔnɛ losanganya lɔmɔtshi la woke layosalema l’etena kakayalɔngɔsɔla dia mɛngɔla, kete ntsha tshɛ dia nyomɔlɔngɔsɔla awui ayɛ di’aha wɛ pandja losanganya lakɔ. Vɔ tewoyaka edja efula la ntondo kɛnɛ kayosalema lo nshi yayaye. Dikumanyi dia l’etshumanelo kayɛ kokaka kotɛ tɛdikɔ tambɔsama l’etshumanelo kanyu.
4 Naka sho monga la yêwo ndo takongɛki akambo w’ohomba efula la ntondo, kete ‘tayolodiama l’elowa w’akambo w’ɔlɔlɔ, . . . dia lotombo la diando dia Nzambi.’—Fil. 1:11.