Ekongelo ka losanganya layaye la lânde la lushi ɔtɔi

Losangaya la lânde la lushi ɔtɔi layomɛ lo Ngɔndɔ ka Divwa 1999 lekɔ l’ɔtɛ a dui ɔnɛ: “Toyangiayangia Akambo Waki Nzambi Woshami Etale.” (1 Kor. 2:10) Akambo akɔna w’ɛlɔlɔ wayoteka lo losanganya lɔsɔ na?

Le wanɛ watayange dia kondja ewo, efula kawɔ hawotokeketshamaka la kɛnɛ kasholawɔ. Bible toshaka wolo, oko wayotolembetshiya omendji w’otshimbedi lo sawo diande diele l’ɔtɛ a dui w’ɔnɛ: “Sho Keketshamaka lo Nyangiayangia lo Ɔtɛkɛta wa Nzambi.” Ɔtɛkɛtshi w’ɔngɛndangɛnda ayɛnya diɔtɔnganelo diele lam’asa nyangiayangia akambo woshami etale waki Nzambi la esambishelo ka lokumu l’ɔlɔlɔ lo sawo diande diele l’ɔtɛ ɔnɛ “Ngande Wɔsayɛ Esambishelo ka Diolelo?”

Ngande wakoka ambutshi kimanyiya anawɔ dia vɔ tshimolaka etale l’Ɔtɛkɛta wa Nzambi na? Wayokondja alako w’amɛna lo sawo diata ɔnɛ “Kɔkɔmiya Ɔtɛkɛta wa Nzambi l’Etema w’Anayɛ.” Ɛlɔngɔlɔngɔ l’esekaseka w’Akristo sɛngiyamaka dimɛna efula oma lo diɔtɔnganelo diawɔ l’anto wa l’atei w’etshumanelo wambotshunda lo nyuma. L’etenyi kele l’ɔtɛ a dui ɔnɛ “Ɛlɔngɔlɔngɔ l’Esekaseka Kondjaka Wetshelo oma le Dikumanyi,” tayɛna bɛnyɛlɔ diele la shɛngiya y’ɔlɔlɔ le wɔ.

Jehowa ekɔ Ombishodi wa toseke. Bonde kahombaso nyanga la wolo tshɛ ekundji wa lo nyuma woshami l’etena kɛnɛ na? Ɔtɛkɛtshi w’ɔngɛndangɛnda ayolembetshiya akambo wakasholɛ Jehowa anto lo nshi yakete ndo wawasholende lo nshi yaso nyɛ l’ekimanyielo ka sawo diata ɔnɛ “Jehowa Ekɔ lo Mbisholɛ Anto Akambo Woshami Etale Yema Yema.” Dako sɔ diayotokeketsha dia tsho tetemala “nyangiayangia akambo waki Nzambi woshami etale.”

Oma ko kakianɛ, yâlɔngɔsɔla di’aha pandja losanganya lɔsɔ. Wanɛ wakombola ndjâkimɔ le Jehowa lo batizama la dia mbewoya omendji-walɔmbɔla dikambo sɔ aha la tshimbatshimba. Saki kaso k’oma k’ɛse otema ka nyangiayangia lo Ɔtɛkɛta wa Nzambi kayokeketshama lo ndjela akambo wôkaso. Omalɔkɔ, tohandjake lushi lɔsɔ la lânde layotolongola wetshelo wa lo nyuma!