Ekongelo ka Losanganya la Lânde la Lushi Ɔtɔi Layaye
Losanganya la lânde la lushi ɔtɔi la l’ɔnɔnyi w’oyoyo w’olimu lekɔ l’ɔtɛ a dui wa dimɛna wɔsami oma l’Afundelo: ‘Nyokitanyiya Nzambi ndo Nyotone Diabolo.’ (Jak. 4:7) Ɔsɔ mɛtɛ ekɔ ɛlɔmbwɛlɔ kasungana lo tena nɛ dia pâ! Woho wakitanyiyaso ɛlɛmbɛ waki Nzambi tokonyaka andɔshi waki Satana. Losanganya lɔsɔ layotolakanya woho wa shika tanga la ntondo k’eyango wele la Diabolo dia ndanya mbetawɔ kaso. Naa diangɔ di’oshinga wolo dia lo nyuma diayotokondja lo losanganya lɔsɔ na?
Omendji w’otshimbedi ayosha sawo diayonga l’ɔtɛ ɔnɛ: “Tonge l’Okitanyiya Otsha le Nzambi lo Nkumbo.” Lɔkɔ nde ayɛnya woho wele dikambo sɔ keketshaka nkumbo dia tɔ shika ntanga la ntondo ka tɔsɛngiya t’andja ɔnɛ ta kɔlɔ. Sawo dia ntondo diaki ɔtɛkɛtshi w’ɔngɛndangɛnda diayonga l’ɔtɛ a dui ɔnɛ: “Tona Diabolo, Alangande Nembetshiya?” Diɔ diayolembetshiya bonde kahombaso mbɔsa yɛdikɔ ya wolo dia shika ntanga la ntondo k’eyango wele la Satana wa ndanya lonyuma laso ndo woho akɔna wakokaso sala dikambo sɔ. Asawo ahende wayendana l’ɛlɔngɔlɔngɔ, wanɛ wahomba vɔ lawɔ sɛna wolo la ntondo k’eyango waki Diabolo. Efula k’Akristo waya epalanga ɛlɔ kɛnɛ wakatone dia ndjela nsaki y’andja ɔnɛ lam’akiwɔ weke ɛlɔngɔlɔngɔ. Tayɔngɛnangɛna dia mpokamɛ awui amɔtshi wakakomɛ.
Anto tshɛ nɔmbamaka dia kitanyiya ewandji. Diakɔ diele, dako dia komelo diaki ɔtɛkɛtshi w’ɔngɛndangɛnda diayoka epole ɔsɛkɛ l’akambo anɛi wahombaso mɛnya okitanyiya aso otsha le Nzambi: (1) le ewandji wa wodja, (2) l’etshumanelo, (3) l’elimu wa l’emunyi, ndo (4) lo nkumbo. Ɔsɔ ekɔ mɛtɛ ekongelo ka dimɛna efula!
Wanɛ wayolanga batizama lo losanganya la lânde la lushi ɔtɔi lɔnɛ pombaka tewoyisha omendji walɔmbɔla kɔlɔ̂mɔ. Sho tshɛ pombaka funda datɛ dia losanganya lɔsɔ l’alamanaka aso ndo ndjalɔngɔsɔla dia mbɔtɔ lo tenyi diakɔ tshɛ. Ɛtshɔkɔ wayotokondja wayonga wa pondjo edja tshɛ kayotokitanyiyaka Jehowa pondjo pondjo.