Tohamia Akoka Aso w’Ekanelo ka Yimba
1 Nshi y’ekomelo ya pâ yasɛnaso nyɛ mbelaka ekambi waki Nzambi ekakatanu ndo ehemba wa weho la weho l’oseka dihole tshɛ diasɛnawɔ. (2 Tim. 3:1-5) Sho tshɛ tekɔ l’ohomba w’ekeketshelo dia tshikala nge lo mbetawɔ. (1 Kor. 16:13) Sho kokaka kondja ekeketshelo kɛsɔ oma l’ekimanyielo ka Jehowa, naka sho tetemala ndjâlesha l’Ɔtɛkɛta ande, nyanga ekimanyielo ka nyuma kande, ndo mamema ɔlɔngɔswamelo ande dimɛna dimɛna.—Osam. 37:28; Romo 8:38, 39; Eny. 2:10.
2 Diɔ diakɔ diele losanganya la lânde la lushi ɔtɔi l’ɔnɔnyi wetshi laki l‘ɔtɛ wa dui ɔnɛ: “Toyale Epalanga lo Akoka wa Eokelo.” Vɔ wakɔsama oma lo 1 Koreto 14:20, lɛnɛ adiaso ɛtɛkɛta w’ɔpɔstɔlɔ Paulo w’ɔnɛ: ‘Anyaso, tanyoyalake oko akɛnda lo akoka wa eokelo, koko nyoyale akɛnda lo kɛnɛ kendana la kɔlɔ. Nyoyale epalanga lo akoka wa eokelo.’ Ngande wakayɛnyi losanganya lɔsɔ na?
3 “Lɔ lakatokeketsha efula!” “Kɛsɔ mbakiso l’ohomba!” Lanɛ tamboshila paka kɔmatɛrɛ hiende tsho yakasha anto lo kɛnɛ kendana la losanganya lɔsɔ. Kânga onto ɔmɔtshi laki komonga Ɔmɛnyi wa Jehowa lakaye dia ndjenda woho wabatizama ɔnande la womoto l’ɛnɔnyi 12 akate dia nde akambe heyama lo kɛnɛ kendana l’ekongelo kɛsɔ ndo nde akakoke mɛna wahɔ wayokondja nkumbo kande oma l’ekongelo kɛsɔ. Onde ngasɔ mbokayɛ ndo wɛ? Nyɛsɔ tohole awui amɔtshi w’ohomba wakatɛkɛtama lo losanganya lɔsɔ.
4 Ewo k’Oshika Kekɔ Ohomba dia Pamia Akoka w’Ekanelo ka Yimba: Lo sawo dia mbɔtwɛlɔ diaki l’ɔtɛ a dui ɔnɛ: “Kakianɛ, Nyohamia Akoka Anyu w’Ekanelo ka Yimba Eokelo,” kakɔna kakatɛtɛ ɔtɛkɛtshi ɔnɛ tɔ kekɔ ohomba dia sho mbeya ndɔshanya l’ekakatanu wa lushi la lushi na? Sho bu l’ohomba wa paka monga la diewo dia mukanda. Sho pombaka pamia ndo keketsha akoka aso wa eokelo ka Bible, di’aha sho nɛndjama l’akambo tshɛ wa kɔlɔ wahomana laso. Eokelo kɛsɔ nɔmbaka paka ɛlɔmbwɛlɔ kaki Nzambi. L’ɛnyɛlɔ k’omembi w’esambo, sho pombaka nɔmbaka Jehowa dia nde tokimanyiya dia sho shihodia ɛlɛmbɛ ndo waohwelo ande woho wa sho mbeya mbokambɛ l’otema ɔtɔi.—Osam. 119:1, 2, 34.
5 L’etenyi kayela, omendji w’otshimbedi akɛnya di’oma lo tshimbo y’Ɔtɛkɛta ndo y’ɔlɔngɔswamelo ande, Jehowa toshaka “Ekimanyielo dia Monga Epalanga lo Kɛnɛ Kendana la Eokelo ka Bible.” Eokelo [kana yimba] akalembetshiyama oko “dikoka diakimanyiya onto dia mɛna l’edia ka dikambo ndo sɛdingola awui wakenga dikambo diakɔ lo shihodia diɔtɔnganelo diele lam’asa awui akɔ la dikambo diakɔ lo tshɛ kadiɔ, woho wa mbeya kitshimudi ya dikambo diakɔ.” Onto akɔna akoka tokimanyiya dia pamia dikoka sɔ na? Jehowa akatosha apami wele oko weshasha dia tokimanyiya dia sho pama lo nyuma. (Ef. 4:11, 12) Ɔlɔngɔswamelo ande wa la nkɛtɛ tokeketshaka dia mbadiaka Ɔtɛkɛta wa Nzambi lushi tshɛ ndo mbɔtɔka mbala la mbala lo nsanganya tshɛ ya l’etshumanelo. (Osam. 1:2) Vɔ tetshaka woho wa kamba la Bible ndo l’ekanda aso w’Akristo lo wekelo aso w’onto ndamɛ, wa lo nkumbo, l’ɔlɔngɔswɛlɔ wa nsanganya ndo l’olimu w’esambishelo. Onde wɛ kondjaka wahɔ oma lo tɛdikɔ kana oma l’ɛlɔngɔswɛlɔ wakɔsama? Onde wɛ mongaka l’ekongelo ka wadielo wa Bible wa lushi la lushi? Dui sɔ diekɔ ohomba naka hatolange ndjɔkɔ l’akambo wa l’andja ɔnɛ, lo waa modɛ, lo filozofi, ndo lo tɔsɛngiya ta kɔlɔ.—Kol. 2:6-8.
6 Akoka Aso w’Ekanelo ka Yimba Pombaka Mbekiyama: Lo sawo diande dia ntondo diaki l’ɔtɛ a dui ɔnɛ: “Tokoke Lonyuma Laso lo Mbekiya Akoka Aso w’Ekanelo ka Yimba,” ɔtɛkɛtshi w’ɔngɛndangɛnda akate di’anto wa l’andja ɔnɛ haweye tshikitanya ɔlɔlɔ la kɔlɔ. (Is. 5:20, 21) Ekɔ ngasɔ nɛ dia vɔ hawolange ndjela ɛlɛmbɛ wa losembwe waki Nzambi. Koko, lo wedi aso, sho wanɛ wambolongola wetshelo wa lo nyuma l’ɔlɔngɔswamelo waki Jehowa, sho mbetawɔka wadjango waki Nzambi walɔmbɔla etsha ndo lɔkɛwɔ laso. Lâsɔ, sho tekɔ l’akoka wa mbeya shikikɛ kɛnɛ kele ɔlɔlɔ ndo ketawɔma lo washo wa Jehowa ndo kɛnɛ kɔtɔnɛ la lolango lande la kokele.—Romo 12:2.
7 Dia sho mbewɔ tokanyi ta kɔlɔ ta l’andja ɔnɛ ndo elowa wa kɔlɔ watondjatɔ, sho pombaka tetemala la mbekiya akoka aso w’ekanelo ka yimba. Woho akɔna wakokaso sala dikambo sɔ na? Lo Heberu 5:12-14, ɔpɔstɔlɔ Paulo mɛnyaka dia sho hatohombe tetemala la ndɛka tsho ‘awɛlɛ’ w’ɔtɛkɛta. Tekɔ l’ohomba wa mbo ya ndɛ ya wolo ya lo nyuma, oko nyɛ yayotolongola oma lo wekelo wa prɔfɛsiya k’Isaya lo Wekelo wa Dibuku wa l’Etshumanelo. Ɔnkɔnɛ, sho pombaka monga suke dia kamba la kɛnɛ kekaso lo nsɛnɔ yaso. Lam’asalaso ɔsɔku, sho shikikɛka dia awui la wadjango waki Jehowa wekɔ mɛtɛ ndo shikaa. Kɛsɔ mbekiyaka akoka aso w’ekanelo ka yimba woho wa sho mbeya tshikitanya ɔlɔlɔ la kɔlɔ dimɛna.
8 Lonyangu ko, anto amɔtshi wakɔlɛ lo nyuma. Lande na? Nɛ dia vɔ kombidja yimba yawɔ lo kɛnɛ kele ɔlɔlɔ ndo kele losembwe lo washo wa Jehowa. Oko etombelo, vɔ wakayoyatshuhaka l’awui watawɔ l’aradiyo kana lo televiziɔ wahɔtɔnɛ l’Afundelo, lo mishiki wa kɔlɔ, kana ndjɔkɔ lo tɔsɛngiya ta kɔlɔ lo monga la losambi l’anto wa kɔlɔ lo Internet. Lo monga la lomba, tayewɔ dia sɛngiyama oma le anto walanga awui wa mindo, wa dinginya ndo wa kɔlɔ.—Tuk. 13:20; Ngal. 5:7; 1 Tim. 6:20, 21.
9 Ɛlɔngɔlɔngɔ Pombaka “Monga oko Ana w’Ashashi lo Kɛnɛ Kendana la Kɔlɔ”: Tenyi dihende dia lo losanganya diakaleke keketsha ɛlɔngɔlɔngɔ l’esekaseka dia vɔ pamia akoka awɔ w’ekanelo ka yimba. Atɛkɛtshi wakɛnya dia monga ‘oko ana w’ashashi lo kɛnɛ kendana la kɔlɔ’ nembetshiyaka monga oko ɔnɛ laheye ndoko dikambo, mbut’ate monga la memakana oko ana w’ashashi lo kɛnɛ kendana l’akambo wele mindo lo washo wa Jehowa. (1 Kor. 14:20) Sho tshɛ takakeketshama dia nsɛna wolo lo yoho yakambaso la wenya aso di’aha sho ndjoyatambiya lo weho tshɛ w’akambo wa kɔlɔ wakoka ndjotodja mindo. (Ef. 5:15-17) Takakeketshama dia mbɛdikaka wenya wetshaso lo mbadiaka ekanda ekina wahatokimanyiya dia eokelo kaso k’akambo wa lo nyuma. Onde wɛ akakitanyiya dako sɔ? Kakɔna kɛnya etombelo ɛsɔ? Lâdiko wa wadielo wa Bible wa lushi la lushi, ɔsa yɛdikɔ ya tetemala la mbadiaka ekanda watondja ɔlɔngɔswamelo waki Jehowa. Naka sho sala ngasɔ, kete dikambo sɔ diayotokimanyiya sho tshɛ, mbidja ndo ɛlɔngɔlɔngɔ, dia ‘kondja eokelo.’—Tuk. 4:7-9.
10 “Wahɔ Waya oma lo Kamba l’Awui wa lo Bible la Eokelo k’Ɔlɔlɔ”: Ɔsɔ mbaki ɔtɛ a dui wa dako di’ekomelo dia losanganya la lânde la lushi ɔtɔi. Ɔtɛkɛtshi w’ɔngɛndangɛnda akalembetshiya dia Jehowa mbele Kiɔkɔ ya eokelo kasha lɔsɛnɔ, eokelo koleki kɛnɛ kele la weho w’anto tshɛ la fwa. Ohokanyiya yema dia monga la diaaso dia kondja yema ya eokelo kaki Jehowa! La lokaho tshɛ nde mbishaka eokelo kɛsɔ le wanɛ tshɛ wɔlɔmbatɔ l’otema ɔtɔi ndo la mbetawɔ. (Tuk. 2:3-5, 9; 28:5) Onde wɛ kondjaka wahɔ lo eokelo katoshande kɛsɔ?
11 Takakeketshama dia mbeka woho wa mbishola atɔndɔ etena kadiaso Bible. (2 Tim. 3:16, 17) Sho pombaka mbeka atɔndɔ akɔ la yambalo tshɛ dia monga la eokelo k’oshika ka kɛnɛ kata Jehowa. Ɔsa etena ka kana yimba l’atɔndɔ akɔ ndo djawɔ lo yimba ndo l’otema. Kɛsɔ mbayohamia akoka ayɛ w’ekanelo ka yimba woho wa wɛ mbeya mbɔsa tɛdikɔ t’amɛna lo lɔsɛnɔ. (Jas. 1:8) Nyɛsɔ tɔsɛdingole awui amɔtshi angana wakomɛ anto ndo tende woho wele kamba l’atɔndɔ wa lo Bible tokimanyiyaka dia mbatondoya.
12 ‘Onde dimi pombaka mbokoya yoho mɔtshi y’ɔlɔtɔ ndo ya wonyelo kana y’ɔlɔngɔswɛlɔ wa divo?’ Yoho ya ndɔta ndo ya minya kana nɔngɔsɔla divo y’ase andja ɔnɛ kɛnɛmɔlaka mbala efula yimba y’ɔtɔmbɔkwɛlɔ. Yimba shɔ tshutshuyaka anto dia ndɔta yoho ya kɔlɔ ndo yahasungana kana yemula nsaki ya dieyanelo. Atɔndɔ akɔna wa lo Bible wayotokimanyiya dia ndɔshana la tɔsɛngiya ta ngasɔ na? Naka sho monga l’akoka w’ekanelo ka yimba wambekiyama, kete tayoyela tɔndɔ diele lo 1 Timote 2:9, 10, lo ndɔta ‘la ndjakitshakitsha ndo la yimba y’ɔlɔlɔ . . . lo yoho yasungana la amato wata ɔnɛ vɔ nɛmiyaka Nzambi.’ Atɔndɔ akina wahombaso kamba lawɔ tanemaka lo 2 Koreto 6:3 ndo lo Kolosai 3:18, 20.
13 ‘Ahombami sala dia nama amama wa l’atei wa nkumbo kami nge?’ Ekɔ ohomba efula di’ase nkumbo sawolaka dimɛna. Jakoba 1:19 totɛka ɔnɛ: “Untu tshe uki esadi, la ati okoke. Tukaki kele esadi.” Ase nkumbo pombaka mpokamɛka asekawɔ ndo mbutanɛka awui nɛ dia sawola l’atei wa nkumbo kɛdikɛdi tɛkɛta ndo mpokamɛ. Oyadi kânga lam’ataso dikambo dia mɛtɛ, diɔ mbeyaka monga l’etombelo wa kɔlɔ efula lo dihole dia diɔ monga l’etombelo w’ɔlɔlɔ, naka tayodita, la lotamanya, ndo aha la kana yimba. Diakɔ diele, oyadi omi kana wadi mbeso, ombutshi kana ɔna, ɛtɛkɛta aso pombaka ‘mongaka tena tshɛ awui wa ngandji ka mamba, wɔsɔhanyemi la lɛhɔ.’—Kol. 4:6.
14 ‘Onde laya la nsaki ka lomombo la l’emunyi?’ Nsaki ka lomombo la l’emunyi ekɔ shɛngiya yakonya lɔsɛnɔ l’onto lo pâ. Tɔ hatokimanyiya onto dia monga l’ɔngɛnɔngɛnɔ. (Und. 5:10; Luka 12:15; 1 Tim. 6:9, 10) Dia tokimanyiya dia mbewɔ djonga ya nsaki ka lomombo, Yeso akatolakanya tɔndɔ di’ohomba nɛ: Monga la sso di’ɔsɛlɛngɛ. Nsɛna lɔsɛnɔ laha kawotake, mbut’ate l’ɔsɛlɛngɛ nembetshiyaka shikikɛ washo aso lo wahɔ wa Diolelo, ndo mbetsha akambo akina tshɛ l’ɔkɔngɔ.—Mat. 6:22, 23, 33.
15 Oyango Akɔna Wahomba Monga Laso?: Tekɔ la Ɔtɛkɛta wa Nzambi wele kiɔkɔ ya mɛtɛ y’atɔndɔ w’ɔlɔlɔ wahomba tokimanyiya dia mbɔsa tɛdikɔ. Sho pombaka mbeka atɔndɔ akɔ, kana la wɔ yimba, ndo shihodia woho wa kamba la wɔ lo nsɛnɔ yaso. Ɔnkɔnɛ, ‘lo mbekiya akoka aso w’ekanelo ka yimba dia tshikitanya ɔlɔlɔ la kɔlɔ,’ tayoyakondjiyɛ wahɔ ndo tayotombola Jehowa.—Heb. 5:14.
[Caption on page 7]
Onde Nyu Mbekaka lo Nkumbo?
1 Owandji wa nkumbo ɔmɔtshi w’Okristo akatɛ ekumanyi kɛmɔtshi ate: “Dimi pembaka dia nɔmbɔla wekelo wa lo nkumbo mbala la mbala, koko dikambo sɔ diekɔ wolo efula. Mbala mɔtshi dimi mbatola wekelo ndo mbeyaka monga ko wadɛmi hɛnya nsaki ka mbeka kana nto ana wekɔ l’akambo akina wa sala. Mingu mbetaka aha la sho sala la wolo dia monga l’ekongelo k’oyoyo ka wekelo wa lo nkumbo wa mbala la mbala. Dimi mbeyaka dia tekɔ l’ohomba ndo tayɔngɛnangɛna dia nongola alako ndo tokanyi tɔmɔtshi.” Onde ɛtɛkɛta ɛsɔ koholaka dikambo dimɔtshi? Ondo ngasɔ, nɛ dia nkumbo efula yekɔ l’ekakatanu akɔ wamɛ dia mbeka Bible lo nkumbo mbala la mbala.
2 Kana yimba lo wembola ɛnɛ: Lande na kele wekelo wa lo nkumbo wa mbala la mbala wekɔ ohomba efula, ndo eyango akɔna wele la wekelo akɔ? Onto akɔna ahomba nɔmbɔla wekelo? Ekanda akɔna wakoka kamba laso? Akokaso sala dia wekelo monga dimɛna efula, djekoleko naka tekɔ l’ana wele l’ɛnɔnyi wotshikitanyi? Lande na kahombaso salaka wekelo akɔ mbala la mbala?
3 Ɔkɛndɛ w’Ambutshi: Afundelo tɛkɛtaka hwe lo kɛnɛ kendana l’onto lahomba nɔmbɔla ndo mbodia ana. “Washi, . . . [nyotetemale mbaodia] lu elembe la lu wetshelu wa Khumadiondjo.” (Ef. 6:4, sho mbɛnganyisha alɛta ango.) Ambutshi w’apami pombaka monga suke dia mbetawɔ ɔkɛndɛ ɔsɔ ndo kombola mɛtɛ dia mbisha anawɔ ewo ndo alako asɔ. Naka ombutshi wa pami kema ombetawudi, kete wadi lele Okristo pombaka sala kɛnɛ kele ohomba dia nɔmbɔlaka wekelo wa lo nkumbo ndo mbodia ana. (2 Tim. 1:5) Mbala mɔtshi, tongaka ohomba dia kadiyɛso mɛmba ɛkɛndɛ tshɛ wendana la wetshelo w’ana. (Tuk. 1:8) Koko lo mɛtɛ, ombutshi wa pami, kana ambutshi akɔ ahende, mbele l’ɔkɛndɛ wa mbodia, ndakanya ndo kokɛ anawɔ.—Euh. 6:6, 7; 1 Tim. 3:2, 4.
4 Monga la Yewo ndo Nɛndjalɛndja Akambo: Lo wekelo wa lo nkumbo, nyu mbeyaka mbidja wadielo ndo ɔkɛtshanyelo w’anto tshɛ wa tenyi dimɔtshi dia lo Bible kana mbeka asawo amɔtshi w’oma lo periodikɛ kana oma l’ekanda ekina waki Société. Pombaka sɔna awui wɔtɔnɛ l’ehomba wa nkumbo. Lo wekelo wa lo nkumbo nyu mbeyaka tɛkɛta di’akambo wendana l’akɛnda, ɛnyɛlɔ oko: tɔsɛngiya t’asekawɔ wa la kalasa, wɛnyanyelo wa ngandji wele bu dimɛna, ndjasha l’akambo amɔtshi walɔngɔswama la kalasa, tɔkɛnyɔ, ɔsɔnwɛlɔ wa mishiki, akambo wa modɛ kana tokanyi ta ndjakimɔ l’awui wa mindo. Mbeyaka monga ohomba dia mvusola atɔndɔ amɔtshi wa l’Afundelo kana tokanyi tawɔ, djekoleko dia kimanyiya akɛnda dia vɔ mbeya ndjɔlɔshanya la wâle kana l’ehemba wakoka ndjakomɛ l’ɔkɔngɔ.
5 Kânga mbele wekelo wa lo nkumbo hahombe monga paka oko losanganya lɔmɔtshi la l’etshumanelo, vɔ pombaka mbisha wetshelo. Sala dia vɔ monga etena k’ɔngɛnɔngɛnɔ, koko aha ka pangwanɛ. Keketsha ana dia vɔ kadimola l’ɛtɛkɛta awɔ hita, kɛsɔ ayowakimanyiya dia vɔ pama esadi. Kânga mbele wanɛ woleki akɛnda bu l’akoka wa mboka akambo tshɛ wekama kana mbangɛnangɛna, pombaka mɛnya dia nyekɔ lo ngɛnangɛna dia vɔ monga lo wekelo ndo nyakimanyiya dia vɔ mbishaka kɔmatɛrɛ lo wekelo. Ambutshi wele la tomba wayodjaka yimba l’ehomba w’anawɔ tshɛ, lo dikoka diawɔ dia eokelo, dia ndjasha l’awui wekama, ndo lo dikoka diawɔ dia tɛkɛta. Naka nyayodja welo wa mɛtɛ ndo wa la ngandji, kete nkumbo kayonga kamɛ ndo la lonyuma la dimɛna.
6 Tanyohekɔke! Lande na kele etete ohomba efula lo kɛnɛ kendana la wekelo wa lo nkumbo? Nɛ dia tekɔ l’akambo efula lo lɔsɛnɔ wakoka tekola yimba ndo wakoka fukutanya ekongelo kakatasale ka wekelo. Tatetawɔke di’akambo asɔ fukutanya tɛdikɔ takatɔshi l’atei wa nkumbo lo yoho ya kɔlɔ.
7 Wekelo wa Bible wa mbala la mbala lo nkumbo nɔngɔsɔlaka anaso ndo mbakimanyiyaka dia vɔ ndɔshanya l’ekakatanu wa lo lɔsɛnɔ. Ambutshi le, nyu mbakoka kimanyiya ananyu dimɛna lo kotsha ɛkɛndɛ wakanyosha Nzambi. Jehowa ayonyɔtshɔkɔla mɛtɛ naka nyu sala la wolo anyu tshɛ dia nɔmbɔlaka wekelo wa Bible lo nkumbo mbala la mbala.