Toyasha Tshɛ l’Olimu wa Dinela
1 Amvutshi waki Jehowa wa lo nshi y’edjedja ndo Yeso Kristo ndamɛ wakatɛkɛta dikambo di’olimu w’otshumanyelo w’anto. (Is. 56:8; Ezek. 34:11; Joa. 10:16) Olimu ɔsɔ wekɔ lo kambema kakianɛ lam’atasambishama lokumu l’ɔlɔlɔ la Diolelo l’andja w’otondo. (Mat. 24:14) Otshikitanu wele lam’asa wanɛ wakambɛ Nzambi la wanɛ wahokambɛ wekɔ lo taleke mɛnama. (Mal. 3:18) Dikambo sɔ alembetshiyadiɔ le so na?
2 Ɔkɛndɛ w’Onto Ndamɛ: Sho koka kondja wetshelo oma l’ɛnyɛlɔ kaki Paulo, ɔnɛ lakayasha tshɛ l’olimu w’Okristo. Nde akokaka dia nde ekɔ l’ɔkɛndɛ wa sambisha woho w’anto tshɛ kondja diaaso dia vɔ mboka lokumu l’ɔlɔlɔ ndo kondja panda. Kɛsɔ mbakotshutshuya dia nde kamba l’etete dia wahɔ wakiwɔ. (Romo 1:14-17) Lo menda woho wele nsɛnɔ y’anto lo wâle ɛlɔ kɛnɛ, onde hatɛnyi dia sho pombaka sambisha anto wa lo lɛtshi laso la nkɛtɛ la shamanya tshɛ?—1 Kor. 9:16.
3 Etena ka Sala Akambo la Shamanya: Olimu w’esambishelo kokaka mbɛdikama l’olimu wa nyanga anto wamboshishɔ kana wa kokɛ anto wele lo wâle. Anto asɔ pombaka tanema ndo kokamɛ kam’ekende suke. Etena bu efula. Nsɛnɔ y’anto yekɔ lo wâle! Diɔ diakɔ diakakɔkɔmiya Yeso ambeki ande ate: “nyolombe Khumadiondjo, kanga dinela, keli ndi atumi ekambi lu dinela diandi.”—Mat. 9:38.
4 Oko weyawɔ ɔnɛ nshi nyɛ ekɔ etena ka sala akambo la shamanya, ekambi efula wa Diolelo wakafudja ekambelo kawɔ k’olimu ɔnɛ washimbɛ nsɛnɔ y’anto. Ɔlɔngɔlɔngɔ Hirohisa laki l’ɛnɔnyi dikumi l’ɛmɔtshi akadjasɛka nde la nyango lakawaodjaka ndamɛ nde l’anango ndo akadiyɛnde. Nde akakimanyiyaka nkumbo kande l’akambo w’ekondjelo lo memɔka l’eshidi esato w’otsho dia nde takahanyaka tojurunalɛ. Kânga mbakandasɛnaka lo yoho shɔ, Hirohisa akalange nyomofudja olimu ande, ɔnkɔnɛ, nde akatatɛ kamba oko ombatshi mboka wa pondjo. Onde ekɔ toho tɔmɔtshi tokokiyɛ nyomoyasha efula l’olimu ɔnɛ wahakambemaki nto pondjo?
5 ‘Etena kambotshikala kaya yema tshitshɛ.’ (1 Kor. 7:29) Lâsɔ, nyɛsɔ tosale kɛnɛ tshɛ kakokaso sala l’olimu ɔnɛ woleki ohomba wakambema lo nkɛtɛ ɛlɔ kɛnɛ, mbut’ate olimu wa sambisha lokumu l’ɔlɔlɔ la Diolelo ndo wa mbetɛ anto ambeki. Yeso akɛdika olimu ɔnɛ la dinela. (Mat. 9:35-38) Lam’ayashaso efula lo dinela, elowa w’oma l’olimu aso mbeyaka monga: kimanyiya onto ɔmɔtshi dia nde monga ɔmɔtshi wa l’atei w’olui a woke w’atɛmɔdi watama lo Enyelo 7:9, 10.