Tambomamatanyema Kâmɛ
1 Shi wɛ mambaka mbala efula lo menda yoho ya diambo yakakengama demba di’onto? (Osam. 139:14) Etenyi tshɛ ka demba kambaka kâmɛ la tenyi dikina. Ɔtɛkɛta wa Nzambi mbɛdikaka etshumanelo k’Akristo la demba di’onto diele tenyi diadɔ tshɛ kambaka kâmɛ. L’ɛlɔmbwɛlɔ ka Kristo lele Ɔtɛ w’etshumanelo, anto tshɛ wele lɔkɔ ‘mamatanyemaka kâmɛ ndo wekɔ lo kamba kâmɛ oma l’ekimanyielo k’onto tshɛ lasha kɛnɛ kahombama.’ (Ef. 4:16a) Lâsɔ, Jehowa ekɔ l’akoka wa kamba l’ekambi ande wele kâmɛ dia sala akambo wa mamba.
2 Wanɛ waki l’etshumanelo ka lo ntambe ka ntondo ‘wakasangaka lolimi’ lam’akawakimanyiyanaka l’ehomba awɔ wa lo nyuma ndo wa l’emunyi. (Etsha 2:44-47) Oma l’ekimanyielo kaki Jehowa, vɔ tshɛ wakatokomɛ ɔlɔshamelo wakahomana lawɔ ndo wakatondoya ɔlɔshamelo akɔ. (Etsha 4:24-31) Vɔ wakewoya losango la Diolelo l’ahole tshɛ wakawatshu, wakewoya lokumu l’ɔlɔlɔ l’etenyi ka nkɛtɛ tshɛ kakeyamaka l’etena kɛsɔ. (Kol. 1:23) Lo tena diaso nɛ, etshumanelo k’Akristo kekɔ losala akambo akɔ wamɛ lo yɛdikɔ yoleki woke lo kamba lonya lo lonya. Akambo akɔna wâkimanyiya dia monga kâmɛ na?
3 Wetshelo w’oma le Nzambi Tokimanyiyaka dia Monga Kâmɛ: L’andja w’otondo, sho tambosangana kâmɛ diɛsɛ oma l’ɔtɛmwɛlɔ aso. Woho akɔna wakoka salema dikambo sɔ? Sho mbetawɔka ehomɔ kɛnama kakamba la Jehowa dia tosha ‘mbo ya ndɛ ya lo nyuma l’etena kakoka.’ (Mat. 24:45) Sho ngɛnangɛnaka nto ‘apami wele oko weshasha’ wakandatosha oko embetsha l’etshumanelo. Etena ketawɔso la ndjakitshakitsha tshɛ tɛdikɔ tɔsa Jehowa dia tolesha lo nyuma, sho mongaka la eokelo k’efula k’Ɔtɛkɛta wa Nzambi ndo tɔ toshaka sho tshɛ nsaki ka mbokoya Yeso oko weso ambeki ande. Sho pombaka tetemala mbeka Ɔtɛkɛta wa Nzambi ndo ndjatshutshuya l’otema ɔtɔi dia ‘monga kâmɛ lo mbetawɔ.’ (Ef. 4:8, 11-13) Onde wɛ keketshaka kâmɛ kaso ka lo nyuma lo mbadiaka Bible lushi la lushi?
4 Diɔtɔnganelo di’Akristo Tokimanyiyaka dia Monga Kâmɛ: Ngandji tosanganyaka kâmɛ ndo tokimanyiyaka dia monga la diɔtɔnganelo di’ɔlɔlɔ lo nsanganya y’Akristo. Lo nsanganya shɔ, sho ‘kananelaka lam’asaso.’ (Heb. 10:24, 25) Kɛsɔ nɔmbaka diaha sho komɛ paka lo kɛnɛ kɛnaso la washo keto, koko sho pombaka mɛtɛ mbeya anangɛso, lo mbaɔsa oko awaɔsa Jehowa, mbut’ate oko anto wele la nɛmɔ. (Hang. 2:7, nɔtɛ.) Lam’ahokamɛso ɛtɛkɛta awɔ wa mbetawɔ, ngandji kaso otsha le wɔ fulaka ndo kâmɛ kaso keketshamaka. Onde wɛ mbeyamaka oko onto lɔtɔ lo nsanganya ya l’etshumanelo mbala la mbala?
5 Asekaso Ekambi w’Olimu w’Esambishelo: Sambisha lokumu l’ɔlɔlɔ kâmɛ l’ambetawudi w’asekaso tokakatanyaka dia sala lolango la Nzambi. Paulo akangɛnangɛna ‘asekande ekambi w’olimu wa diolelo diaki Nzambi.’ (Kol. 4:11) Mbutanɛ awui wakatokomɛ ndo kimanyiyana wonya weso l’esambishelo tokimanyiyaka dia kotsha olimu aso w’Akristo ndo keketshaka kâmɛ kaso. Kol. 3: 14.
6 Wolo Wele la Nyuma k’Ekila wa Mamatanya Anto Kâmɛ: Oko wayashaso shamɛ dia tshaka lolango lande, Jehowa toshaka nyuma kande. Dikambo sɔ tokimanyiyaka dia kandola ekakatanu ndo monga kâmɛ. (Osam. 133:1) Diɔ totshutshuyaka dia ‘nama kâmɛ ka lo nyuma lo dimama dia ki.’ (Ef. 4:3) Onto tshɛ l’atei aso kokaka mbisha lonya dia sukɛ diokanelo diele lam’asa ekambi waki Nzambi lo kɛnɛmɔla elowa wa nyuma lo akambo wasalanɛso.—Ngal. 5:22, 23.
7 Kamba kâmɛ lo ɛlɔmbwɛlɔ ka Kristo kimanyiyaka dia “mbudia dimba, dia dio mpikama lu ngandji.” (Ef. 4:16b) Ndo nto, dikambo sɔ tombolaka Jehowa, “Nzambi kasha wɔladi.”—Rɔmɔ 16:20, NW.