Ekongelo ka Losanganya la Lânde la Lushi Ɔtɔi Layaye

¹ Etena kele ambewoyishi wa nsango ndo embetsha wa l’andja ɔnɛ wekɔ lo mbisha lomombo la l’emunyi nɛmɔ di’efula, Ɔtɛkɛta wa Nzambi tokeketshaka ɔnɛ: ‘Tonge Ɛngɔnyi l’Elimu w’Ɔlɔlɔ.’ (1 Tim. 6:18) Ɔsɔ mbele ɔtɛ a dui w’ekongelo ka losanganya la lânde la lushi ɔtɔi layotatɛ lo Ngɔndɔ ka Divwa 2002. Naa ekeketshelo kayotokondja lo losanganya lɔsɔ na?

² Omendji w’otshimbedi ayosha sawo diele l’ɔtɛ a dui ɔnɛ: “Tonge Ɛngɔnyi lo Washo wa Nzambi,” dia mɛnya kɛnɛ kalembetshiya dikambo sɔ, nde ayɔkɔnya anto amɔtshi wayasha vamɛ la wolo tshɛ dia monga ɛngɔnyi wa lo nyuma. Lo sawo diande dia ntondo dia lushi lɔsɔ, ɔtɛkɛtshi w’ɔngɛndangɛnda ayɛnya woho wayasha ekambi waki Nzambi l’“Elimu w’Ɔlɔlɔ l’Etena Kɛnɛ ka Dinela.” Onto tshɛ la l’atei aso ayokeketshama dia menda woho wakokaso nyomoleka ndjasha l’olimu wa dinela wakatosha Nzambi wakambema nshi nyɛ.

³ Tekɔ mɛtɛ l’ɔngɛnɔngɛnɔ heyama lo menda woho watawese ɛlɔngɔlɔngɔ l’esekaseka w’Akristo ɛngɔnyi wa lo nyuma! Dikambo sɔ tombolaka Jehowa ndo kimanyiyaka ɛlɔngɔlɔngɔ l’esekaseka dia vɔ ndjeya mɛmba ɛkɛndɛ w’olimu wele lo mbakongɛ lo nshi yayaye. Etenyi kele l’ɔtɛ a dui ɔnɛ: “Nyokeketsha Ɛlɔngɔlɔngɔ l’Esekaseka l’Elimu w’Ɔlɔlɔ Watombola Jehowa” kayotɛnya elimu w’ɔlɔlɔ wakamba ɛlɔngɔlɔngɔ l’esekaseka w’Akristo lo tshumanelo diawɔ.

⁴ Etombelo akɔna wakondjaso lo ndjakimɔ l’elimu w’ɔlɔlɔ? Ɔtɛkɛtshi w’ɔngɛndangɛnda ayolembetshiya dikambo sɔ lo sawo diande di’ekomelo diele l’ɔtɛ a dui ɔnɛ: “Totetemale l’Elimu w’Ɔlɔlɔ ko Tayokondja Ɛtshɔkɔ oma le Jehowa.” Nde ayɛnya l’ahole anɛi wakondjaso ɛtshɔkɔ efula: (1) l’onto ndo l’onto, (2) lo nkumbo, (3) l’etshumanelo, ndo (4) lo ɔlɔngɔswamelo wa l’andja w’otondo.

⁵ Wanɛ wamboyakimɔ le Jehowa wayonga la diɛsɛ dia nongola batismu. Naka wɛ ekɔ suke dia takola nna sɔ, kete totshimbatshimbake dia mbewoya omendji-walɔmbɔla.

⁶ Naka wambewoya datɛ diayosalema losanganya lo ngelo kanyu, kete wɛ pombaka ndjalɔngɔsɔla esadi dia mbɔtɔ lo losanganya lakɔ. Sala la wolo dia koma la wonya dia wɛ memba kamɛ l’anto akina osambo wa ndjihwelo ndo pokamɛ dɔmbɛlɔ dia ndjihwelo. Naka tayonga lo losanganya lɔsɔ ndo tayoyela ekongelo ka losanganya la lânde la lushi ɔtɔi lɔsɔ la yambalo tshɛ, kete tayokeketshama dia tetemala ndjela mboka kayotetɛ ɛngɔnyi lo washo wa Jehowa, Nzambi kaso.