Losanganya la Distrikɛ l’Ɛmɛnyi wa Jehowa la l’Ɔnɔnyi 2003 Lele l’Ɔtɛ a Dui Ɔnɛ: “Totombole Nzambi”
1 Oma lo tshimbo y’Isaya, omvutshi ande wa kɔlamelo, Jehowa akatɛ ekambi ande ate: “Nyu antu ami, nyuhukami, nyu wudja ami, nyumbisha lutui.” (Is. 51:4) Lo tena dia wolo diasɛnaso lo nshi y’ekomelo nyɛ, onde sho hatɛnyi di’etena kɛnɛ mamboleka tshɛ ohomba mbidja yimba lo wadjango waki Jehowa? Yoho mɔtshi ‘yashaso lotui’ le Jehowa ele lo kitanyiya didjango diande diatɔlɔmba dia sho tshumanaka dia mbɔtɛmɔla. Tekɔ lo nongamɛ mɛtɛ diaaso dia lânde diayotosha nsanganya yaso ya distrikɛ! Olui-Walɔmbɔla w’Ɛmɛnyi wa Jehowa ambɔlɔngɔsɔla nto dia nsanganya ya distrikɛ efula salema l’ɛtshi kaso ka nkɛtɛ l’ɔnɔnyi 2003.
2 Oko wakadiɛnyama lo Tshoto y’Etangelo ya Ngɔndɔ k’Esambele 1, 2002, nsanganya ya wedja efula yayosalema nto l’esomba wakasɔnama, yayɔtɔ anto wayoya oma l’andja w’otondo. Lam’ele l’esomba ɛmɔtshi eto mbayosalema nsanganya ya wedja efula shɔ, paka tshumanelo dielame mbahomba mbɔtɔ lo nsanganya shɔ. Koko nsanganya tshɛ ya distrikɛ yayonga oko ya wedja efula. Waa misiɔnɛrɛ wayotanema l’ahole efula wayosalema nsanganya shɔ ndo anto wayonga la diɛsɛ dia mpokamɛ akambo amɔtshi wayowɔkɔndɔla. Kakɔna kakokaso sala dia sho kondja wahɔ efula oma l’ɛlɔngɔswɛlɔ wele lo salema wonya ɔnɛ lo kɛnɛ kendana la nsanganya yaso ya weke na?
3 Tonge lo Losanganya Nshi Yakɔ Shato: Dia sho kondja wahɔ efula oma lo wetshelo watɔlɔngɔsɔlɛ olui w’ɔhɔmbɔ wa kɔlamelo ndo wa kɛsɔ, sho pombaka ndjashikikɛ dia ndjela ekongelo ka losanganya k’otondo. (Mat. 24:45) Onde ayonga ohomba wɛ nɔmba owandji ayɛ w’olimu dikimɔ woho wa wɛ mbɔtɔ nshi yakɔ shato ya losanganya? La ntondo ka Nehemiya nɔmba Nkumekanga Aratashasha dikimɔ dia ntshɔ otsha la Jerusalɛma dia nyomotoka mpele di’osomba, nde ‘akalɔmbɛ Nzambi ka l’olongo.’ (Neh. 2:4) Wɛ lawɔ pombaka nɔmba Jehowa dia nde kosha dihonga dia wɛ nɔmba owandji ayɛ w’olimu dikimɔ dia wɛ mbɔtɔ nshi yakɔ shato ya losanganya. Kakɔna kayoyosala naka owandji ayɛ ambotona dia kosha dikimɔ? Ondo nde mbeyaka ndjetawɔ kosha lotshungɔ la mbɔtɔ lo losanganya lɔsɔ naka wɛ mbolembetshiya di’alako watotolongolaka lo nsanganya yaso ya weke tokimanyiyaka dia sho monga as’olimu wele la losembwe, wele l’etete ndo wele bu akadikadi. Ndo nto naka wɛ ekɔ l’ase nkumbo wele kema ambetawudi, kete ayoleka dimɛna wɛ mbaewoya di’ekongelo ka losanganya laso la woke kam’ekende suke.
4 Ohangelo: Tɛdikɔ takɔsama di’anto wayotshɔ lo losanganya wele l’ohomba wa pango tohanga lo mvudu y’anto amɔtshi. Sho pombaka monga la lowando le anangɛso wayetawɔ tohangia lawakawɔ. Ndo nto hosungana di’anto walongolawɔ nanya ɔlɔlɔ ɔsɔ ndo tohika ɔnɛ wâhangia nshi efula la ntondo kana l’ɔkɔngɔ wa losanganya. Pango mbishamaka paka lo nshi ya losanganya. Wanɛ washawɔ pango ya ngasɔ pombaka nɛnya diangɔ dia kanga luudu, aha nanya ndoko ema, aha ntshɔ l’ahole wewɔ hawowasha lotshungɔ la koma ndo mbidja yimba dia ndo anawɔ sala ngasɔ. Naka akanga a mvudu wambonga l’okakatanu ɔmɔtshi lo dikambo sɔ, kete vɔ la dia mbewoya wanɛ wakamba olimu wa pangia anto esadi, ko wayonga l’ɔngɛnɔngɛnɔ dia mbâkimanyiya. Ekimanyielo k’onto l’onto kekɔ ohomba di’olimu wa pangia anto kɛndakɛnda dimɛna. Takalongola alapɔlɔ ɔnɛ anto amɔtshi totshikaka luudu lakawawasha dia panga aha la mbuta ko ntshɔ lo dihole diele ɔngɛnyi awɔ kana onto ɔmɔtshi leyana la wɔ. Dikambo sɔ futanyaka olimu w’anangɛso Wahangia Anto. Sho nyɔlɔmbaka nyu tshɛ dia mbisha lonya l’olimu ɔsɔ.
5 Mɛtɛ, Jehowa sukɛka kɛnɛ katshama lo dikambo dia nsanganya ya weke yasalema ɔnɔnyi tshɛ. Lam’ele anangɛso efula wamɔ oma lawakawɔ dia tɔɔtɔ lo losanganya la distrikɛ tongaka l’ohomba wa mvudu ya panga, sho kokaka monga l’eshikikelo ɔnɛ Jehowa ayokotsha ehomba awɔ lo woho wakoka. Oko wele akambo asɔ mendanaka l’ɔtɛmwɛlɔ wa mɛtɛ, sho la dia ndjela alako tshɛ watoshawɔ l’ɔngɛnɔngɛnɔ tshɛ. Nyɛsɔ tɛnya dia tekɔ la kɔlamelo lo kɛnɛ koleki tshitshɛ; ko tayonga la dikoka dia kondja ɛlɔlɔ efula wakongɛ wanɛ walangema le Jehowa.—Luka 16:10.
6 Toshishime l’Etshumanelo: Naka sho mbeyaka di’ɔnangɛso kana kadiyɛso kɛmɔtshi ekɔ l’ohomba w’ekimanyielo kɛmɔtshi dia nde mbɔtɔ lo losanganya, onde sho hatokoke ‘mɛnya’ ngandji kaso ndo mbokimanyiya? (2 Kor. 6:12, 13; Euh. 15:7) Ɔsɔ mbele kanyi yakakeketsha Paulo lo 2 Koreto 8:14. Lande na kahatete anto wa ngasɔ dia sho samba lawɔ mboka otsha lo losanganya na? Naka vɔ wekɔ ambatshi mboka, kete vɔ mbeyaka monga l’awui efula w’ɔlɔlɔ wakahomana lawɔ l’esambishelo wa tatɔkɔndɔlɛka lo mboka. Naka vɔ wamboviya l’etshumanelo, kete vɔ mbeyaka monga l’ɛkɔndɔ ɛmɔtshi wa diambo watɔkɔndɔlɛ wendana la teokrasi weso tatokaka ndoko lushi. Kema monga kamɛ l’anangɛso ndo l’akadiyɛso asɔ ayonga la shɛngiya ya dimɛna le yɛ ndo le nkumbo kayɛ? Vɔ wayandola lokaho kana ekimanyielo kayɛ ndo Jehowa ayokofuta l’ɔtɛ wa dikambo sɔ.—Tuk. 28:27; Mat. 10:42.
7 Kânga mbele wanɛ wele l’ehomba wa lânde kimanyiyamaka ntondotondo oma le ase nkumbo yawɔ wele Akristo, dikumanyi ndo as’etshumanelo akina weya ehomba awɔ koka ndjalɔngɔsɔla dia mbakimanyiya. (1 Tim. 5:4) Naka Kɔmite k’Olimu k’Etshumanelo kambolongola Adɛmandɛ wa Lânde wa Pango, kete vɔ pombaka sɛdingola dɛmandɛ tshɛ la ntondo ka tomɛ Departɛma Diendana l’Ohangiyelo adɛmandɛ asɔ.
8 Tetawɔ dia Ndjakimɔ la Lolango: Wonya wa losanganya, nkama y’anto ndjashaka la lolango dia kamba l’adepartɛma efula dia losanganya mbeta dimɛna. Anangɛso walongola anto mbashaka ahole wa mbidjasɛ ndo akina namaka akalo, mitutu kana mituka aso wonya wa losanganya. Departɛma diadja pudipudi salaka di’aha sho mbɔtɔ mɔnyɔ lo dikambo dia lokumu l’ɔlɔlɔ lele laso lo kɛnɛ kendana la pudipudi, lo tshika dihole diaso di’ɔtɛmwɛlɔ dia lo tshanda mɔtshi pudipudi ndeka woho wakataditane. Onde sho koka kimanyiya adepartɛma asɔ kana akina wakoka monga l’ohomba w’ekimanyielo kaso? Onde wɛ ayoyasha la lolango layɛ dia kamba ‘dihɛka lo dihɛka’ wɛ l’ananyɔ?—Zef. 3:9.
9 Lam’ele ‘akambo wa l’andja ɔnɛ wekɔ lo tatshikitana,’ sho kombolaka dia nsanganya yaso ya distrikɛ tokimanyiya dia sho mbika washo aso paka l’akambo wa lo nyuma. (1 Kor. 7:31) Ndjalɔngɔsɔla dia mbɔtɔ nshi yakɔ shato nɔmbaka dia sala la wolo, koko sunganaka mɛtɛ dia sho sala dikambo sɔ. Losanganya laso la Distrikɛ l’ɔnɔnyi ɔnɛ lele l’ɔtɛ a dui ɔnɛ: “Totombole Nzambi” lakalɔngɔswama dia tokimanyiya dia tshikala nge etena keso lo kongɛ lushi layolanya Jehowa andja waki Satana ɔnɛ. Tatetawɔke dia kânga dikambo ɔtɔi toshimba dia sho nongola wetshelo wambotɔlɔngɔswɛla Jehowa.—Is. 51:4, 5.
[Kiombo ya lo lɛkɛ 3]
Ekongelo ka Wenya
Lushi la Tanu la la Samalo
9 h 30 - 17 h 00
Lushi la Lomingu
9 h 30 - 16 h 05
[Kiombo ya lo lɛkɛ 4]
Tɛdikɔ tɔmɔtshi ta mbɔsa dia mbɔtɔ lo Losanganya la Distrikɛ “Totombole Nzambi”
1. Naka wɛ pombaka munda lɔkɛndɔ l’otale dia tɔɔtɔ lo losanganya, kete tatɛ momba falanga ya lɔkɛndɔ lanyu wɛ la nkumbo kayɛ, ndo y’olelo anyu lɛkɔ.
2. Kanyohɔ dia sukɛ ɔlɔngɔswɛlɔ wa losanganya la weshasha anyu wa la lolango. ‘Tanyɛnamake la ntondo ka Jehowa anya hwe,’ koko ‘nyɔlɛmia la diangɔ dianyu di’oshinga wolo.’—Euh. 16:16; Tuk. 3:9.
3. Tayotombola lokombo la Jehowa lo monga la lɔkɛwɔ l’ɔlɔlɔ lo losanganya kamɛ nd’ɔlɔtɔ wa pudipudi ndo wa kɔmba.—1 Kor. 10:31.
4. Ntsha tshɛ dia kamba kâmɛ l’anangɛso wele l’ɔkɛndɛ wa mbisha anto ahole. Tâmbɛke ahole tshanana onyake paka dikambo di’ase nkumbo kayɛ kana dia wanɛ woye la yɛ.
5. Lo wenya wa mumuya, kôle diangɔ di’osadi woho wa wɛ ndjoyela etenyi ka l’ɔkɔngɔ wa midi dimɛna nɛ dia mbo ya ndɛ ya wotsho mbishaka djɔ.—Luka 8:18.
6. Pudipudi tombolaka Jehowa. L’ekomelo k’etenyi tshɛ ka losanganya, onto l’onto katshake tshɛ dia tshika dihole dia losanganya pudipudi lo tɔngɔnaka akatshi la diangɔ dikina dia ngasɔ ko dikadja l’ahole wakalɔngɔswama dia mbikadjaka mindo.—1 Pet. 1:15, 16.