Losanganya la Distrikɛ l’Ɛmɛnyi wa Jehowa la l’Ɔnɔnyi 2004 Lele l’Ɔtɛ a Dui Ɔnɛ: “Tɔkɛndɛkɛndɛ la Nzambi”
1 Kakɔna ketɛ nsanganya yaso ya distrikɛ y’ɔnɔnyi tshɛ dui dia lânde le yɛ na? Onde asawo wakeketsha ndo dramɛ diakalɔngɔswama dikambo diaso oma le ‘ɔhɔmbɔ wa kɔlamelo ndo wa kɛsɔ’? (Mat. 24:45-47) Onde ekanda w’eyoyo wele la mbo ya ndɛ ya lo nyuma yaya la wonya? Onde anangɛso l’akadiyɛso wɛnya woho wakâkimanyiya Bible dia vɔ tshikitanya nsɛnɔ yawɔ lo yoho ya dimɛna? Onde alapɔlɔ wa woho watahame esambishelo ka Diolelo lo wedja ekina? Onde osanganelo wa l’asekaso ambetawudi w’ɛnɔnyi tshɛ? Lo mɛtɛ, tekɔ lo nongamɛ nsanganya yaso shɔ l’asolo walomɔlomɔ dia awui asɔ ndo dia akina efula!
2 Tonge Nshi Yakɔ Shato: Oma lo tshimbo ya Mɔsɛ, Jehowa akadjanga ate: ‘Kanyotshumanya anto dia vɔ tohokamɛ ndo têtshama.’ (Euh. 31:12) Oma lo tshimbo y’olui w’ɔhɔmbɔ wa kɔlamelo ndo wa kɛsɔ, Jehowa ambɔlɔngɔsɔla ekongelo ka lânde ka wetshelo dikambo diaso lo lushi tshɛ la losanganya laso. Lam’ele nde tetshaka ‘dia wahɔ aso,’ sho nangaka monga lawɔ dia nongola wetshelo akɔ tshɛ. (Is. 48:17) Naka wɛ ekɔ l’ohomba wa dikimɔ oma le owandji ayɛ w’olimu, kete lɔmba Jehowa ndo ewoya owandji ayɛ dikambo diakɔ lo ndjela ɛnyɛlɔ ka dihonga kaki Nehemiya. (Neh. 1:11; 2:4) Ndo nto, ayonga dui dia dimɛna dia wɛ mbewoya ase nkumbo kayɛ wele bu ambetawudi k’amatanema etena dia wɛ ekɔ lo ndjalɔngɔsɔla dia tɔ̂tɔ lo losanganya.
3 Ohangelo: Mbala efula ɔlɔngɔswɛlɔ w’ohangelo lo ngelo kayosalema losanganya mongaka lo mvudu y’anto (mvudu yaki anangɛso), lo Mbalasa ka Diolelo kana le ase nkumbo. Listɛ l’ahole wayosalema nsanganya tshɛ layohanema lo dibaya diahanɛwɔ waewoyelo lo Mbalasa ka Diolelo l’ɔkɔngɔ wa dikatshi di’okotsha nɛ sɛdingɔma lo Losanganya l’Olimu. Nɔmbamaka di’onto tshɛ kana yimba lo dɔmbɛlɔ ndo sɛdingola dihole diahombande tɔ̂tɔ losanganya la l’ɔnɔnyi 2004. Naka wɛ ambolanga dia kondja pango laka ɔnangɛso ɔmɔtshi kana lo Mbalasa ka Diolelo, kete tambɔlɔmba dia sekeletɛlɛ sala listɛ l’apandjudi tshɛ walɔmba pango nshi efula la ntondo ndo litoma lo Departɛma diendana l’Ohangelo lo ngelo kayosalema losanganya. Nde pombaka funda lokombo l’onto, mɛnya dia nde ekɔ pami kana womoto, ɛnɔnyi ande ndo woho wotɔnde l’onto akɔ naka laka owotɔ ande mbayondohanga. Kɛsɔ ayokimanyiya anangɛso wakamba lo Departɛma diendana l’Ohangelo dia kondja etena k’efula ka nyangɛ anto tshɛ pango. Naka wambotosha dihole dia sho panga, kete hatonga dimɛna dia shoamɛ ndjayangɛ dihole dikina dia todjasɛ l’ɔnangɛso kana l’ɔngɛnyi okina. Kɛsɔ ayetɛ awui welo le anangɛso wakamba lo Departɛma Diendana l’Ohangelo. Koko, naka onto ayotodjasɛ nshi ya losanganya nde l’ase nkumbo kande, kete atokimɔke lokombo lo fɔrmilɛrɛ k’anto Walɔmba Pango.
4 Ohangelo wa lo Mbalasa ka Diolelo: Tambonyewoya alako amɔtshi wa woho wa sala Ohangelo wa lo Mbalasa ka Diolelo. Komite ka Losanganya la Distrikɛ ayodja ekumanyi kɛmɔtshi dia nɔmbɔla ekongelo kɛnɛ. Nde ayonga l’okimanyedi. Oyoleka dimɛna di’okimanyidi ɔsɔ monga ekumanyi kekina kana okambi w’olimu wele la lonyuma la dimɛna ndo l’akoka. Mbalasa la dia kahanyema lo tenyi pende. Etenyi kɛmɔtshi dikambo di’akadiyɛso l’anawɔ kâmɛ ndo ana wa wamato ndo etenyi kekina dikambo di’anangɛso l’ana w’apami. Mbalasa ka Diolelo pombaka kambema paka oko dihole dia ndala tsho. Lo nshi yayotshɔka anto tshɛ lo losanganya ko ndoko onto layonga lawɔ, pombaka nɔngɔsɔla dia olimu wa djamu salemaka di’aha wovi ndjova. Anangɛso wele la lonyuma la dimɛna mbahomba sala olimu wa djamu ɔsɔ. Okatelo wa diango dia ndɛ l’etei ka Mbalasa ka Diolelo hatetawɔma. Kokaka mbika tshombotombo yakoka ndjohandjɔma lo sɛkɛ dia Mbalasa ka Diolelo woho wa katɛka paka lo nshi yasalema losanganya tsho. L’ekomelo ka losanganya, tshombotombo shɔ pombaka pandjɔma. Ekɔ ohomba dia mbalasa ndo asɛkɛ atɔ mongaka pudipudi ndo kɔmba. Pombaka menda ɔlɔlɔ di’aha ndanya ndoko ɛngɔ ɔtɔi. Wanɛ wohangi lo mbalasa wayosala la wolo tshɛ dia monga la lɔkɛwɔ l’ɔlɔlɔ lasungana le Akristo wa mɛtɛ lam’asawɔ ndo otsha le asukanyi.—1 Kor. 10:31.
5 Ɔpɔstɔlɔ Paulo akohola etshumanelo ka la Ngalatiya ɔnɛ “tutshelaki antu tshe ololo, ndjekaleka le embetawudi.” (Ngal. 6:10) Mbala mɔtshi anangɛso l’akadiyɛso waya esombe, wanɛ wele la hemɔ, ambutshi wodia ana vɔamɛmɛ, wanɛ wele lo dihombo kana wanɛ wele l’olimu wa lo tena tshɛ hawotokɔlɔmba ekimanyielo, koko tete vɔ wekɔ l’ekakatanu ɛmɔtshi dia mbɔtɔ lo losanganya. Onde wɛ ekɔ l’akoka wa ‘ntsha ɔlɔlɔ’ otsha le anto asɔ ndo mbasha yema y’ekimanyielo? Ewotɔ wele Akristo ndo dikumanyi mbahomba ndeka ndjasha dia mbeya ekakatanu wa weho w’anto asɔ wele l’atei awɔ.
6 Yɛdikɔ shɔ ekɔ paka dia apandjudi wele la lonyuma l’ɔlɔlɔ kâmɛ l’anawɔ wele la lɔkɛwɔ l’ɔlɔlɔ. Naka Departɛma Diendana l’Ohangelo diekɔ la wembola ɛmɔtshi la ntondo ka mbisha pango, kete vɔ mbeyaka mumbola sekeletɛlɛ k’etshumanelo.
7 Lo losanganya lakasale ekambi waki Jehowa ambeta oko ɛnɔnyi 2500, Ɛzɛra nde l’anango w’ase Lɛwi wakadia awui w’oma l’Ɔtɛkɛta wa Nzambi ndo wakasha anto wakatshumana olembetshiyelo. Etombelo akɔna wakonge na? Nehemiya 8:12 totɛka di’ɔnɛ: “Ku antu tshe wakatshu dia . . . ngenangena l’ongenongeno a wuki, ne dia vo wakalimbitela aui wakawawatela ndu wakawalimbitshiya.” Onde sho kema la lowando lam’ɛnaso olui w’akitami w’esɔ wekɔ lo ndjela ɛnyɛlɔ kaki Ɛzɛra l’ase Lɛwi, lo woho wakambawɔ l’Ɔtɛkɛta wa Nzambi, walembetshiyawɔ Ɔtɛkɛta akɔ ndo watɛnyawɔ woho wakamba lawɔ lo nsɛnɔ yaso? Lo sala ngasɔ, ɔhɔmbɔ ɔsɔ mɛnyaka ngandji ka shikaa kaki Jehowa ndo woho wayakiyanyande dikambo di’ekambi Ande tshɛ. Ɔsa yɛdikɔ y’aha shisha ndoko lushi ɔtɔi la Losanganya la Distrikɛ “Tɔkɛndɛkɛndɛ la Nzambi” !
8 Olimu wa Ndjakimɔ la Lolango: Ekambi wa kɔlamelo waki Jehowa kɛnɛmɔlaka mbala la mbala yimba ya ndjahombia lo ndjakimɔ vɔamɛmɛ dia sala olimu ɔmɔtshi. Ɛnyɛlɔ, lam’akatanema diaaso dia nde kamba oko omvutshi waki Nzambi, omvutshi Isaya akakadimola aha la tshimbatshimba ate: “Dim’one, untumi.” (Is. 6:8) Nɔngɔsɔla ndo kongɛ losanganya nɔmbaka wenya ndo welo efula. Tshumanelo dia lo ngelo kasalema losanganya wayolanga mɛtɛ dia sala la wolo dia nyanga ekambi wayakimɔ la lolango. Djekoleko dikumanyi la ekambi w’olimu mbayohomba mbisha ɛnyɛlɔ ka dimɛna lo dui sɔ. Ngandji kaso otsha le Jehowa Nzambi, otsha l’ɔtɛmwɛlɔ wa mɛtɛ ndo otsha le anangɛso la dia totshutshuya dia ndjakimɔ shoamɛmɛ la lolango. Diakɔ diatawɔ ɔnɛ: “Olui mbolɛ dihonga.”
9 Tetawɔ dia Ndjakimɔ la Lolango: Wonya wa losanganya, nkama y’anto ndjashaka la lolango dia kamba l’adepartɛma efula dia losanganya mbeta dimɛna. Amɔtshi nongolaka anto ndo mbashaka ahole wa mbidjasɛ ndo akina namaka akalo, mitutu kana mituka aso wonya wa losanganya. Departɛma Diadja Pudipudi salaka di’aha sho mɔnyɔma lo dikambo dia lokumu l’ɔlɔlɔ lele laso lo kɛnɛ kendana la pudipudi, lo tshika dihole diaso di’ɔtɛmwɛlɔ dia lo tshanda mɔtshi tsho pudipudi ndeka woho wakataditane. Onde sho koka kimanyiya adepartɛma asɔ kana akina wakoka monga l’ohomba w’ekimanyielo kaso? Onde wɛ ayoyakimɔ la lolango layɛ dia kamba ‘dihɛka lo dihɛka’ l’ananyɔ?—Zef. 3:9.
10 Lam’ele ‘awui wa l’andja ɔnɛ wekɔ lo tatshikitana’ tekɔ l’ohomba wa nsanganya yaso ya distrikɛ tokimanyiya dia sho tetemala la sɛna lo nyuma. (1 Kor. 7:31) Ndjalɔngɔsɔla dia mbɔtɔ l’oseka lushi tshɛ ayɔlɔmba dia mbidja welo efula, koko welo akɔ sunganaka mɛtɛ. Losanganya la distrikɛ l’ɔnɔnyi ɔnɛ lele l’ɔtɛ a dui ɔnɛ: “Tɔkɛndɛkɛndɛ la Nzambi” akalɔngɔswama dia tokimanyiya woho wa sho tetemala la shika ekolo etena kakongɛso elombwelo kaki Jehowa le andja waki Satana. Tosale tshɛ di’aha mbetawɔ di’ɛngɔ kɛmɔtshi toshimba dia sho nongola wetshelo wambɔlɔngɔla Jehowa ɔsɔ dikambo diaso.—Is. 51:4, 5.
[Kiombo ya lo lɛkɛ 3]
Ekongelo ka Wenya
Lushi la Tanu la Lushi la Samalo
9 h 30 - suke 17 h 10
Lushi la Lomingu
9 h 30 – suke 16 h 05
[Kiombo ya lo lɛkɛ 4]
Tɛdikɔ tɔmɔtshi ta mbɔsa dia mbɔtɔ lo Losanganya la Distrikɛ “Tɔkɛndɛkɛndɛ la Nzambi”
1. Naka wɛ pombaka munda lɔkɛndɔ l’otale dia tɔ̂tɔ lo losanganya, kete tatɛ momba falanga ya lɔkɛndɔ lanyu wɛ la nkumbo kayɛ, ndo y’olelo anyu lɛkɔ.
2. Kanyohɔ ndo dia sukɛ ɔlɔngɔswɛlɔ wa losanganya la weshasha anyu wa la lolango. ‘Tanyɛnamake la ntondo ka Jehowa anya hwe,’ koko ‘nyɔlɛmia Jehowa la diangɔ dianyu di’oshinga wolo.’— Euh. 16:16; Tuk. 3:9.
3. Lo losanganya, tayotombola lokombo la Jehowa lo monga la lɔkɛwɔ l’ɔlɔlɔ kâmɛ l’ɔlɔtɔ wa pudipudi ndo wa kɔmba.—1 Kor. 10:31.
4. Tsha tshɛ dia ndjela kɛnɛ kata anangɛso walongola anto ndo wele l’ɔkɛndɛ wa mbisha anto ahole. Tâmbɛke ahole tshanana onyake paka dikambo di’ase nkumbo kayɛ kana dia wanɛ woye la yɛ.
5. Lo wenya wa mumuya, kôle diangɔ di’osadi woho wa wɛ ndjoyela etenyi ka l’ɔkɔngɔ a midi dimɛna. Nɛ dia mbo ya ndɛ ya wotsho mbishaka djɔ.—Luka 8:18.
6. Pudipudi tombolaka Jehowa. L’ekomelo k’etenyi tshɛ ka losanganya, onto l’onto katshake tshɛ dia tshika dihole dia losanganya pudipudi lo tɔngɔnaka akatshi la diangɔ dikina dia ngasɔ ko dikadja l’ahole wakalɔngɔswama dia mbikadjaka mindo.—1 Pet. 1:15, 16.