“Apandjudi wa Diolelo Wele l’Ohetoheto” Losanganya la Distrikɛ l’Ɛmɛnyi wa Jehowa 2002
1 “Dimi lakangenangena lam’akawamvutela vati: Tutshu utsha lu luudu la [Jehowa]!” (Osam. 122:1) Lam’asɛdingolayɛ ɛtɛkɛta w’omembi w’esambo, enda, (1) woho wakandayaoke lam’akandelamɛ dia sangana l’anto akina dia tɔtɛmɔla Jehowa, (2) angɛnyi w’ɔlɔlɔ waki vɔ lawɔ wakayakiyanyaka di’ɔtɛmwɛlɔ wa mɛtɛ, ndo (3) kɛnɛ kakahombama salema dia nyometa anto akina, dia vɔ sangana kamɛ, ndo tshɔ otsha lo luudu la Nzambi.
2 Kema sho lawɔ mbokaka oko wakoke omembi w’esambo lam’okaso dia tɛdikɔ tambɔsama lo dikambo dia losanganya laso la woke la mbala kayaye? Sho nongamɛka losanganya lɔsɔ l’asolo walomɔlomɔ lam’ohɔso ɔngɛnɔngɛnɔ waki laso lo nsanganya ya weke yakete ndo walongamɛso dia sangana nto lo yoho ya lânde sho l’asekaso woka Jehowa ngandji. Tɛdikɔ tambɔsama dikambo dia Losanganya la Distrikɛ la nshi shato lele l’ɔtɛ a dui ɔnɛ: “Apandjudi wa Diolelo Wele l’Ohetoheto” layosalema l’ɔnɔnyi wa 2002 lo Congo Kinshasa la Congo Brazzaville k’otondo. Etena ka ndjalɔngɔsɔla dia mbɔtɔ ndo kondja wahɔ w’efula lo dambo dia lo nyuma diatokongɛ sɔ tɔ kɛnɛ.
3 ‘Ɔhɔmbɔ wa kɔlamelo ndo wa kɛsɔ’ ambotashilaka tatɛ nɔngɔsɔla mbo ya ndɛ ya lo nyuma yayotolongola lo losanganya la woke lɔsɔ. (Luka 12:42) Etshumanelo tshɛ kayɔtɔ lo losanganya la lɛnɛ akawakilɔmbɛ di’aha anto mɔtana lɔmɔtana. Ladiko dia lâsɔ, anangɛso efula wambotatɛka nɔngɔsɔla wa departɛma yotshikitanyi woho ‘w’akambo tshɛ salema dimɛna ndo aha l’ofukutanu.’ (1 Kor. 14:40) Lam’ele akambo efula wamboshila nɔngɔswama dia wahɔ ndo ɔlɔlɔ wakiso, kakɔna kakokaso sala dia ndjalɔngɔsɔla dikambo dia losanganya lɔsɔ na?
4 Yalɔngɔsɔla oma ko Kakiye dia Mbɔtɔ Nshi Yakɔ Shato: Onde ayonga ohomba wɛ nɔmba owandji ayɛ w’olimu dikimɔ woho wa wɛ mbɔtɔ lo losanganya la woke lɔsɔ? Jehowa mbeyaka dia ewandji ɛmɔtshi w’olimu wekɔ “akanga a ngala.” (1 Pet. 2:18) Koko nsanganya yaso ya weke yekɔ ohomba efula, ndo sho nangaka sala la wolo tshɛ dia ndjiɔtɔ lo tenyi diakɔ tshɛ. Lɔmba Jehowa lo dikambo sɔ, lo nyanga ɛlɔmbwɛlɔ kande dia wɛ kondja etombelo w’amɛna.—Neh. 2:4.
5 Ohangelo: Sho tohangaka esangɔ efula lo mvudu yakana. Sho pombaka monga la lowando le anangɛso wetawɔ todjasha lawakawɔ. Ndo nto, hosungana dia anto walongolawɔ ngasɔ nanya ɔlɔlɔ ɔsɔ ndo tohika ɔnɛ wâhangia nshi efula la ntondo kana l’ɔkɔngɔ wa losanganya. Pango mbishamaka paka lo nshi ya losanganya. Wanɛ washawɔ pango ya ngasɔ pombaka nɛnya diangɔ diaki kanga luudu, aha nanya ndoko ema, aha ntshɔ l’ahole wewɔ hawowaele ndo mbidja yimba dia ndo anawɔ sala ngasɔ. Naka akanga a mvudu wambonga l’okakatanu ɔmɔtshi lo dikambo sɔ, kete vɔ la dia mbewoya wanɛ wakamba olimu wa pangia anto esadi, ko wayonga l’ɔngɛnɔngɛnɔ dia mbâkimanyiya. Ekimanyielo k’onto l’onto kekɔ ohomba di’olimu wa pangia anto kɛndakɛnda dimɛna. (Heb. 13:17) Takalongola alapɔlɔ ɔnɛ anto amɔtshi totshikaka luudu lakawawasha dia panga aha la mbuta ko ntshɔ lo dihole diele ɔngɛnyi awɔ kana onto ɔmɔtshi leyana la wɔ. Dikambo sɔ futanyaka lotumu l’anangɛso wakamba olimu wa pangia anto. Sho nyɔlɔmbaka nyu tshɛ dia mbisha lonya l’olimu ɔsɔ.
6 Mɛtɛ Jehowa sukɛka kɛnɛ katshama lo dikambo dia nsanganya ya weke yasalema ɔnɔnyi l’ɔnɔnyi. Lam’ele anangɛso efula wamɔ oma lawakawɔ dia tɔɔtɔ lo losanganya la distrikɛ tongaka l’ohomba wa mvudu ya panga, sho kokaka monga l’eshikikelo ɔnɛ Jehowa ayokotsha ehomba awɔ lo woho wakoka. Oko wele akambo asɔ mendanaka l’ɔtɛmwɛlɔ wa mɛtɛ, sho la dia ndjela alako tshɛ watoshawɔ l’ɔngɛnɔngɛnɔ tshɛ. Tɛnya dia tekɔ la kɔlamelo lo kɛnɛ koleki tshitshɛ; ko tayonga la dikoka dia kondja ɛlɔlɔ efula wakongɛ wanɛ walangema le Jehowa.—Luka 16:10.
7 Toshishime l’Etshumanelo: Naka tambɛna di’ɔnangɛso kana kadiyɛso kɛmɔtshi ekɔ l’ohomba w’ekimanyielo ka lo demba kana wa kɛnɛ kakoka mbokimanyiya dia nde mbɔtɔ lo losanganya, onde sho hatokoke ‘mɛnya’ ngandji kaso ndo mbokimanyiya? (2 Kor. 6:12, 13; Euh. 15:7) Ɔsɔ mbele kanyi yakakeketsha Paulo lo 2 Koreto 8:14. Lande na kahatete anto wa ngasɔ dia sho tshɔ lawɔ kamɛ otsha lo losanganya na? Naka vɔ wekɔ ambatshi mboka, kete vɔ mbeyaka monga l’awui efula w’ɔlɔlɔ wakahomana lawɔ l’esambishelo wa tatɔkɔndɔlɛka lo mboka. Naka vɔ wamboviya l’etshumanelo, kete vɔ mbeyaka monga l’ɛkɔndɔ ɛmɔtshi wa diambo wendana la teokrasi wa tɔkɔndɔlɛ weso tatokaka ndoko lushi. Kema monga kamɛ l’anangɛso ndo l’akadiyɛso asɔ ayonga la shɛngiya ya dimɛna le yɛ ndo le nkumbo kayɛ? Vɔ wayandola lokaho kana ekimanyielo kayɛ ndo Jehowa ayokofuta l’ɔtɛ wa dikambo sɔ.—Tuk. 28:27; Mat. 10:42.
8 Kânga mbele wanɛ wele l’ehomba wa lânde kimanyiyamaka ntondotondo oma le ase nkumbo yawɔ wele Akristo, dikumanyi ndo as’etshumanelo akina weya ehomba awɔ koka ndjalɔngɔsɔla dia mbakimanyiya. (1 Tim. 5:4) Naka Kɔmite k’Olimu ka l’Etshumanelo kambolongola Adɛmandɛ wa Lânde wa Pango, kete vɔ pombaka sɛdingola dɛmandɛ la dɛmandɛ la ntondo ka tomɛ Departɛma Diendana l’Ohangiyelo adɛmandɛ asɔ.
9 Tetawɔ dia Ndjakimɔ la Lolango: Wonya wa losanganya, nkama y’anto ndjashaka la lolango dia kamba l’adepartɛma efula dia losanganya mbeta dimɛna. Anangɛso walongola anto mbashaka ahole wa mbidjasɛ ndo akina namaka akalo, mitutu kana mituka aso wonya wa losanganya. Departɛma Diadja Pudipudi salaka di’aha sho mbɔtɔ mɔnyɔ lo dikambo dia lokumu l’ɔlɔlɔ lele laso lo kɛnɛ kendana la pudipudi, lo tshika dihole diaso di’ɔtɛmwɛlɔ dia lo tshanda mɔtshi tsho pudipudi ndeka woho wakataditane. Onde sho koka kimanyiya adepartɛma asɔ kana akina wakoka monga l’ohomba w’ekimanyielo kaso? Onde wɛ ayoyasha la lolango layɛ dia kamba ‘dihɛka lo dihɛka’ wɛ l’ananyɔ?—Zef. 3:9.
10 Onde Mɛtɛ Anto Mbidjaka Yimba lo Kɛnɛ Kasalaso? Lo losanganya la distrikɛ lɔmɔtshi l’ɔnɔnyi wetshi, pami kɛmɔtshi kakatshike mbeka Bible l’Ɛmɛnyi wa Jehowa ɛnɔnyi 20 w’etondo akakambaka l’ɔtɛlɛ ɔmɔtshi. Nde akatɛ Ɛmɛnyi ɛmɔtshi dia nde nangaka tetemala nto la wekelo ande wa Bible ndo la wɔtwɛlɔ wa lo nsanganya. Lande na? Nɛ dia ngandji kakawɛnya Ɛmɛnyi wa Jehowa lo nshi yakawahange l’ɔtɛlɛ ɔsɔ.
11 Pami kɛmɔtshi kakamba l’ɔtɛlɛ akate dikambo di’anangɛso ate: “Ndoko anto wambotolongola l’ɔtɛlɛ aso ɔnɛ ko mbɛdima l’anto anyu. Vɔ wekɔ la solo dia lotutsha ndo la loshilambo.” Ande ɔlɔ woka Shɛso lele l’olongo lam’atɛnande tayela dako dia Yeso nɛ diata ɔnɛ: “Usasi anyu ahete la ntundu ka antu, dia vo kaweyi etsha anyu w’ololo, kawutumbuli Shenyu le l’ulungu”!—Mat. 5:16.
12 Nyɛsɔ tonge la dionga diaki la Nkumekanga Davidi, lakalomɔlomɔka l’ɔngɛnɔngɛnɔ tshɛ dia tshɔ lo luudu la Jehowa l’ɔtɛmwɛlɔ. Nsanganya yaso ya distrikɛ yekɔ kiɔkɔ ya dimɛna yalongolaso mbo ya ndɛ ya lo nyuma ndo diaaso dioleki tshɛ dia mɛnyanya ngandji kele lam’asaso. Ɔnkɔnɛ, tambokɔlɔmba l’ɔngɛnɔngɛnɔ tshɛ dia wɛ mimɛ ndjalɔngɔsɔla dia mbɔtɔ lo tenyi tshɛ dia nshi yakɔ shato yayosalema Losanganya la Distrikɛ l’ɔnɔnyi ɔnɛ lele l’ɔtɛ a dui ɔnɛ: “Apandjudi wa Diolelo Wele l’Ohetoheto”!
[Caption on page 3]
Ekongelo ka Wenya
Lushi la Tanu la la Samalo
9 h 30 - 17 h 00
Lushi la Lomingu
9 h 30 - 16 h 00
[Caption on page 4]
Tɛdikɔ Tɔmɔtshi ta Mbɔsa dia Mbɔtɔ lo Losanganya la Distrikɛ “Apandjudi wa Diolelo Wele l’Ohetoheto”
1. Naka wɛ pombaka ntsha lɔkɛndɔ l’otale dia tɔɔtɔ lo losanganya, kete tatɛ momba falanga ya lɔkɛndɔ layɛ wɛ la nkumbo kayɛ, ndo y’olelo anyu lɛkɔ.
2. Kanyohɔ dia sukɛ ɔlɔngɔswɛlɔ wa losanganya la weshasha anyu wa la lolango. ‘Tanyɛnamake la ntondo ka Jehowa anya hwe,’ koko ‘nyɔ̂lɛmia la diangɔ dianyu di’oshinga wolo.’—Euh. 16:16; Tuk. 3:9.
3. Tayotombola lokombo la Jehowa nto lo monga la lɔkɛwɔ l’ɔlɔlɔ lo losanganya kamɛ ndo ɔlɔtɔ wa pudipudi ndo wa kɔmba.—1 Kor. 10:31.
4. Ntsha tshɛ dia kamba kâmɛ l’anangɛso wele l’ɔkɛndɛ wa mbisha anto ahole. Tâmbɛke ahole tshanana onyake paka dikambo di’ase nkumbo kayɛ kana dia wanɛ woye la yɛ.
5. Lo wenya wa mumuya, kôle diangɔ di’osadi woho wa wɛ ndjoyela etenyi ka l’ɔkɔngɔ a midi dimɛna nɛ dia mbo ya ndɛ ya wotsho mbishaka djɔ.—Luka 8:18.
6. Pudipudi tombolaka Jehowa. L’ekomelo k’etenyi tshɛ ka losanganya, onto l’onto katshake tshɛ dia tshika dihole dia losanganya pudipudi lo tɔngɔnaka akatshi la diangɔ dikina dia ngasɔ ko dikadja l’ahole wakalɔngɔsɔma dia mbikadjaka mindo.—1 Pet. 1:15, 16.