Losanganya la Lânde la Lushi Ɔtɔi Layaye

Alako efula wekɔ lo mbishama nshi nyɛ lo kɛnɛ kendana la yoho ya kokɛ yônge yaso ya demba dia monga la lɔsɛnɔ l’ɔngɛnɔngɛnɔ ndo l’otale. Koko kɛnɛ koleki ohomba ele eongelo k’otema aso wa didjidji. Diakɔ diele sunganaka losanganya la lânde la lushi ɔtɔi layomɛ lo Ngɔndɔ ka Divwa 2003 monga l’ɔtɛ a dui ɔnɛ: “Tokambɛke Jehowa Olimu l’Otema Ɔtɔi.” (1 Ek. 28:⁠9) Awui akɔna wakokaso nongamɛ dia teka?

Omendji w’otshimbedi ayɔmbɔla sawo diele l’ɔtɛ a dui ɔnɛ: “Tokimanyiya Anto Akina dia Vɔ Kambɛ Jehowa l’Etema w’Ɔngɛnɔngɛnɔ.” Ɛkɔnya wayoka epole ɔsɛkɛ l’ɛlɔlɔ wakondjaso lo ndjela nsaki kakɛnya onto ndo lo nɔmbɔla wekelo wa Bible l’anto walanga kambɛ Jehowa. Aha la tâmu, ampokami tshɛ wayokondja ekeketshelo oma lo sawo dia ntondo diayosha ɔtɛkɛtshi w’ɔngɛndangɛnda diele l’ɔtɛ a dui ɔnɛ: “Tolamake Etema Aso l’Andja Ɔnɛ w’Ofukutanu.” Etenyi ka la pindju ayokomɛ la dako dia batismu.

L’ɔkɔngɔ a midi, sawo diele l’ɔtɛ a dui ɔnɛ: “Tosha Ekimanyielo Kaso” diayɛnya woho wakokaso kimanyiya anto akina. Kakɔna kakoka ambutshi sala dia kokɛ etema w’anawɔ oma lo tɔsɛngiya ta kɔlɔ ndo mbakimanyiya dia ndjasukanya le Jehowa? Etenyi kele l’ɔtɛ a dui ɔnɛ: “Nyokimanyiyake Ananyu dia Vɔ Ngɛnangɛnaka le Jehowa” ayosha alako w’eshika ndo tɔ kayɛnya woho wakoka dikambo sɔ salema.

Onde tekɔ lo kondja wahɔ lo tɛdikɔ tshɛ tɔsa Jehowa di’otema aso wa didjidji mongaka nshi tshɛ ɔlɔlɔ ndo nge lo nyuma? Sawo dia komelo di’ɔtɛkɛtshi w’ɔngɛndangɛnda diele l’ɔtɛ a dui ɔnɛ: “Totetemale Kambɛ Jehowa l’Otema Ɔtɔi,” diayoka epole ɔsɛkɛ l’awui anɛi w’ohomba wendana l’ekongelo kaso katokimanyiya dia nama lonyuma laso. Wenya engana ndo welo wa ngande wadjaso dia sala alɔmbɛlɔ w’eshika, dia mbeka Ɔtɛkɛta wa Nzambi, dia sambisha l’ohetoheto, ndo dia sanganaka kâmɛ l’Akristo akina? Onde sho kokaka ndjalowanya l’akambo asɔ tshɛ?

Jehowa ekɔ lo mbisha leeta lɔnɛ: “Udjaki utema aye lu wetshelu, ndu atui aye lu aui wa yimba.” (Tuk. 23:12) Toyalɔngɔsɔlɛ oma ko kakianɛ dia ndjokondja wahɔ oma lo wetshelo w’oma l’Afundelo wayoshama lushi lɔsɔ. Naka wɛ sala dikambo sɔ, kete diɔ diayokokimanyiya dia tetemala kambɛ Jehowa l’otema ɔtɔi ndo w’ɔngɛnɔngɛnɔ.