Wekelo wa Dibuku Tɛmɔla Nzambi

Dibuku Tɛmɔla Nzambi Ɔtɔi ka Mɛtɛ diakatondjama dia mbekaka kâmɛ l’eyoyo l’ɔkɔngɔ wa vɔ shidiya wekelo wa dibuku Ewo. Woho wayotɔsɛdingola dibuku sɔ lo Wekelo wa Dibuku wa l’Etshumanelo ayotokimanyiya dia sho mbeya kamba la diɔ l’esambishelo ndo ayotokimanyiya dia sho pamia ngandji ndo lowando laso otsha le Jehowa ndo ɔlɔngɔswamelo ande. Ngande wakokaso kondja wahɔ efula oma lo wekelo aso wa dibuku Tɛmɔla Nzambi na?

Woho wa Nɔmbɔla Wekelo: Lam’ele tayɔsɛdingolaka tshapita y’otondo lomingu tshɛ, emendji wa wekelo wa dibuku wayohomba kahanyaka wenya lo yoho ya dimɛna. Vɔ hawotɔsaka wenya efula l’edingɔ wa mbɔtwɛlɔ l’oyango wa vɔ ndjoka epole ɔsɛkɛ l’awui w’ohomba, watanema mbala efula otsha l’ekomelo ka tshapita. Ɔsɛdingwelo wa tshena pe wa kiombo y’ovuswelo ayokimanyiya anto tshɛ woye lo wekelo dia vɔ kimɛ awui woleki ohomba.

Suke la kahende ɔtɔi ka totshapita ta lo dibuku Tɛmɔla Nzambi tekɔ la wembola wa kana lawɔ yimba ndo wa kɛtshanya l’onto. Sho koka tana ɛnyɛlɔ kɛmɔtshi lo lɛkɛ 48-49. Kema ohomba mbadia wembola ɛsɔ wonya watadiema edingɔ. Lam’asɛdingolanyu wembola ɛsɔ l’olui anyu, omendji la dia sala di’avɛsa mbadiema ndo kɛtshanyema naka wonya wekekɔ.

Tɔlɔngɔsɔlake Wekelo la Ntondo: Nɔngɔsɔla wekelo dimɛna halembetshiya tsho mbekɛ eshidi lam’ele ekadimwelo. Kana yimba dimɛna l’avɛsa woshilami ayotokimanyiya dia sho nɔngɔsɔla aha paka kɔmatɛrɛ yaso tsho, koko ndo etema aso. (Ez. 7:10) Sho tshɛ koka keketshana lo mbisha kɔmatɛrɛ yaso ya la ndjakitshakitsha.​—⁠Romo 1:​11, 12.

Wekelo aso wa dibuku Tɛmɔla Nzambi ayotokimanyiya dia sho ndjasukanya le Jehowa ndo ayotɔlɔngɔsɔla dia sho mbeya kimanyiya akanga w’etema w’ɔlɔlɔ dia vɔ sangana la so dia mbɔtɛmɔla. (Osam. 95:6; Jak. 4:⁠8) Nyɛsɔ tokondja wahɔ efula oma lo yɛdikɔ y’ɔlɔlɔ ya lo nyuma shɔ.