Kalasa k’Olimu wa Teokrasi ka lo 2004

¹ Jehowa ekɔ lo mbisha anto k’anto akoka wa vɔ kamba olimu wele ohomba l’andja w’otondo. Yoho mɔtshi yasalande dikambo sɔ ele oma lo wetshelo watoshande lomingu tshɛ lo Kalasa k’Olimu wa Teokrasi. Onde wɛ ekɔ lo ndjasha lo yɛdikɔ yɛdimi l’akoka ayɛ lo kalasa kɛsɔ? Lo Ngɔndɔ ka Ntondo 2004, yema y’etshikitanu ɛmɔtshi wayosalema dia kimanyiya ambeki dia vɔ ndeka kondja wahɔ oma l’ekongelo kɛsɔ.

² Wengɔnyelo w’Ondaki Okina: Anangɛso washa sawo dia wetshelo ndo akambo w’ohomba w’oma lo wadielo wa Bible wekɔ lo ngɛnangɛna alako wawasha ondaki okina. Lo tshumanelo diele la dikumanyi efula diakoka, ɔkɛndɛ ɔsɔ mbeyaka mengɔnyamaka ɔnɔnyi tshɛ. Lo sala ngasɔ mbayowâmuyanaka wotsho ɔsɔ; ndo kɛnɛ koleki tshɛ ohomba ele, dikumanyi ndo ekambi w’olimu wakoka wayokondjaka wahɔ oma lo diewo diele l’atɛkɛtshi ndo embetsha wotshikitanyi.

³ Ekongelo k’Ovuswelo wa l’Onyɔ: Naka etshumanelo kanyu kekɔ la losanganya l’otshimbedi lomingu lahombanyu sala ovuswelo wa l’onyɔ, kete ovuswelo (kâmɛ ndo ekongelo k’otondo ka kalasa) pombaka ndjosalema lomingu layela, ko ekongelo ka lomingu lakɔ salema lomingu layosalema losanganya l’otshimbedi. Koko, hatongaka ohomba dia mengɔnyaka ekongelo k’otondo ka mingu hiende ka kalasa naka ovuswelo wa l’onyɔ wambohomana la lomingu lembola omendji w’otshimbedi etshumanelo kanyu. Lo dihole dia sala ngasɔ, osambo, dionga di’ɔtɛkɛtshi, ndo akambo w’ohomba w’oma lo wadielo wa Bible pombaka salema lo ndjela ekongelo ka lomingu lakɔ. Sawo dia wetshelo (diashama l’ɔkɔngɔ wa dionga di’ɔtɛkɛtshi) pombaka mbɔsama oma l’ekongelo ka lomingu layela. L’ɔkɔngɔ w’akambo w’ohomba w’oma lo wadielo wa Bible, Losanganya l’Olimu la minitɛ akumi asato layosalema, lɔ layɔlɔngɔswama dia monga l’asawo asato wa minitɛ 10 lo sawo tshɛ, kana asawo ahende wa minitɛ 15 lo sawo la sawo. (Lâsɔ kete waewoyelo wa mbɔtwɛlɔ hawotoshama.) Losanganya l’Olimu layokomɛ l’osambo, oma lâsɔ ko omendji w’otshimbedi ndjosha sawo diele la minitɛ akumi asato. Kalasa k’Olimu wa Teokrasi ka lomingu layela kayomɛ la sawo dia dionga di’ɔtɛkɛtshi ndo akambo w’ohomba w’oma lo wadielo wa Bible, oma lâsɔ ko nyu sala ovuswelo wa l’onyɔ.

⁴ Tokambake dimɛna la diaaso tshɛ diakondjaso dia pama lo nyuma. Lam’akondjayɛ wahɔ lo wetshelo walongolayɛ lo Kalasa k’Olimu wa Teokrasi, wɛ ayokeketshaka etshumanelo kayɛ, ayoshaka lonya dimɛna l’okotshamelo wa prɔfɛsiya ya lo Bible ndo ayotombola ɔnɛ lele Kiɔkɔ ya losango la diambo lahombaso mbewoya.​—⁠Is. 32:​3, 4; Eny. 9:⁠19.