Tolowanya akoka aso wa nsambisha—Lo nsambisha lo ɛtshi ka nkɛtɛ kandawɔ okanda
Ohomba wa dikoka sɔ: Lam’ele anto efula wekɔ lo nkamba wenya efula, mbala efula yoho ya dimɛna ya mbaasambisha losango la Diolelo ele lo mbaasambisha lo ahole awɔ w’olimu. Nsambisha l’ɛtshi ka nkɛtɛ kandawɔ okanda koka monga dimɛna ndo l’etombelo w’ɛlɔlɔ, nɛ dia lɛkɔ anto wekɔ ndo ase olimu mongaka la loshilambo le anto wɔsawɔ oko waa kiliya y’eshika. Dia nkondja etombelo w’amɛna, apandjudi pombaka monga la ɔkɔmi ndo shɛnɔdi ndo monga ɛnyɛlɔ lo ɔlɔtɔ awɔ ndo ɔlɔngɔswɛlɔ awɔ wa divo. (2 Kɔr. 6:3) Ɔnkɔnɛ, omendji w’olimu pombaka menda dimɛna woho wandama okanda lo bɛtshi dia nkɛtɛ ndo wanɛ wanda okanda akɔ.
Woho wa nsala dui sɔ:
• Lɔngɔsɔla mbɔtwɛlɔ ka lo tshena pe. Naka sho mbɔsɛ ose olimu wenya efula, kete ondo hatotowosha diaaso dia ndjosawola la nde mbala kayaye.
• Sɔna etena ka membola amundji w’okanda etena kele vɔ bu la wesanu efula, ɛnyɛlɔ wonya wekewɔ oma la ndjihola.
• Nsala la wolo dia tasawodi ntondo la owandji w’olimu. Onga l’osalosalo ndo la lɔngɛnyi. Wɛ koka mbuta ɔnɛ: “Tekɔ lo tembola anto lo tshena pe lo ahole awɔ w’olimu nɛ dia ekɔ tshondo y’okakatanu dia mbatana la ngelo yawɔ.” Nsala mbɔtwɛlɔ ka lo tshena pe ndo shande traktɛ, periodikɛ kana ekanda aso ekina. Diaha sho mbɔsama oko anto wasondja diangɔ, ayoleka dimɛna aha ntɛkɛta dikambo dia woshasha, onyake paka onto kotombodi oma lɛnɛ aya falanga yakambema olimu aso.
• Naka owandji w’olimu ekɔ onto ladja anto lo demba, lɔmbande lotshungɔ la nsawola l’ase olimu akina lo tshena pe. Lo ahole amɔtshi wandawɔ okanda, koka monga dimɛna mimbola kana wɛ koka ntshika ekanda aso ɛmɔtshi wa mbadia lɛnɛ alɛ ase olimu kana lɛnɛ akɔkɔlawɔ alemba.
• Onga la ekanelo k’ɔlɔlɔ ndo la yewo. Ɛnyɛlɔ, naka omundji w’okanda ekɔ lo nsawola la kiliya kana ekɔ la wesanu ekina, kongande polo ndo nde amboshidiya dia wɛ nsawola la nde.
Hemba nsala nganɛ lo ngɔndɔ kɛnɛ:
• Lo Ɔtɛmwɛlɔ anyu wa lo nkumbo wa la dikɔlɔ wayela, nsala mbɔtwɛlɔ ka lo tshena pe kakokayɛ nkamba la tɔ naka wɛ ambɔlɔmbama dia tosambisha lo ɛtshi ka nkɛtɛ kandawɔ okanda.