Tosambisha lo bɛtshi dia nkɛtɛ di’amundji w’okanda l’eshikikelo
1. Lande na kahatahombe nshisha elongamelo naka sho mbokaka wɔma dia nsambisha lo bɛtshi dia nkɛtɛ di’amundji w’okanda?
1 Onde sho tokaka wɔma dia nsambisha lo bɛtshi dia nkɛtɛ di’amundji w’okanda? Naka ngasɔ, kete tatoshishake elongamelo nɛ dia kânga Paulo laki la dihonga ndo osambisha waki kombokaka wɔma, akahombe ‘ndjakeketsha’ dia nsambisha. (1 Tes. 2:2) Tânga nsɛdingola ekakatanu ɛmɔ watohomanaka la so lo bɛtshi dia nkɛtɛ di’amundji w’okanda ndo woho wakokaso mbatondoya.
2. Lande na kahatahombe mboka wɔma di’ɔnɛ tayotofukutanya ase olimu?
2 Naka tambohembola ase olimu ɔtɛkɛta onde wayotomalɛ? Amundji w’okanda efula nkambaka l’ase olimu walongola angɛndangɛnda walongamɛwɔ ɔnɛ wayowahembola ɔtɛkɛta. Mbala efula, vɔ wekɔ la loshilambo nɛ dia vɔ nongamɛka ɔnɛ tekɔ lo tatshu dia tosomba diangɔ. Naka sho ndɔta dimɛna ndo monga oko angɛnyi awɔ kete vɔ kokaka tosalɛ akambo la dilɛmiɛlɔ.
3. Ngande wakokaso mbewɔ diaha nyangiya asombi wa diangɔ?
3 Onde dimi pombaka ntatɛ nsambisha waa kidiya ntondo? Naka kokaka, tɔsɔnɛ wonya wele anto bu efula lo makashinyi, ɛnyɛlɔ kam’adiholawɔ. Tokonge polo lam’ayonga owandji kana kapita ndamɛ ko sho ndjôsambisha. Tosale mbɔtwɛlɔ ka tshena pe.
4. Kakɔna kakokaso mbuta etena kasambishaso lo bɛtshi dia nkɛtɛ di’amundji w’okanda?
4 Kakɔna kakokaso mbuta? Tosambisha owandji awɔ naka ase olimu wekɔ efula. Sho mbeyaka mbuta ɔnɛ: “Ekɔ wolo dia tana amundji w’okanda la waa kawɔ, diakɔ diambotoya dia ndjokenda lo dihole diayɛ di’olimu. Sho mbeyaka dia wɛ ekɔ l’olimu, lâsɔ tanga nsawola lo tshena pe.” Tena dimɔtshi, kokaka monga ɔlɔlɔ diaha sho mbuta yɛdikɔ yendana la weshasha, djekoleko naka sho mɛnaka di’anto kokaka ndjotɔsa oko anto wasondja diangɔ. Lo ndjela okanda wanda onto lasambishaso, sho mbeyaka nɔmba owandji dikimɔ dia nsambisha ase olimu lo tshena pe. Tonyomowatɛ mbɔtwɛlɔ kaso. Naka mɛnamaka di’ase olimu wekɔ l’olimu efula tosuse mbɔtwɛlɔ kaso ndo tâtshike traktɛ kɛmɔ. Naka hatokoke nsambisha ase olimu, kete ondo sho mbeyaka mbatshikɛ ekanda la soko lam’ayomuyaka ase olimu kana anto akina lo tshanda mɔtshi kana lo dihole dikina.
5. Ɛkɔkɔ akɔna watotshutshuya dia sho ndjasha l’eshikikelo tshɛ l’esambishelo ka lo bɛtshi dia nkɛtɛ di’amundji w’okanda?
5 Yeso nde la Paulo wakasambishaka anto l’ahole wakawandaka okanda l’eshikikelo, sho lawɔ kokaka nsala ngasɔ. (Mat. 4:18-21; 9:9; Etsha 17:17) Tɔlɔmbɛ Jehowa dia nde tokimanyiya woho wa sho monga la wɔladi wa l’otema ndo la dihonga. (Etsha 4:29) Lo bɛtshi dia nkɛtɛ di’amundji w’okanda anto amɔ hawotanema la waa kawɔ, lâsɔ lande na kahatayasha lo yoho y’esambishelo shɔ yele l’etombelo w’ɛlɔlɔ?