Yɛdikɔ y’Oyoyo Yendana l’Ovuswelo w’Awui Wakatama lo Nsanganya ya Weke
Oko watatetemala andja waki Satana pama oma lo kɔlɔ otsha lo kɔlɔ koleki, Jehowa tokeketshaka dia sho “ntuna akambu wa dionyo la saki y’akambo wa la kete, dia shu ndjala la nyumu ya ki, y’uluwanyi ndu y’ololo la kete nye.” (Tito 2:12) L’atei wa tɛdikɔ tɔsande oma lo tshimbo y’‘ɔhɔmbɔ wa kɔlamelo ndo wa kɛsɔ’ mbele ndo losanganya l’otshimbedi ndo la lânde yasalema ɔnɔnyi tshɛ. (Mat. 24:45) Nsanganya ya lo nyuma shɔ tokeketsha efula!
Dia tokimanyiya woho wa sho kimɛ ndo kamba la wetshelo wakatalongola, tayokamba la yɛdikɔ y’oyoyo yendana l’ovuswelo w’awui wakatama lo nsanganya shɔ ya weke l’edja k’ɔnɔnyi w’olimu 2005. Lɛkɛ 5-6 la dikatshi di’okotsha nɛ ekɔ la sawo diatosha lokanyi la kɛnɛ kayotetshama lo nsanganya shɔ ndo wembola w’ovuswelo w’etenyi tshɛ ka losanganya la losanganya. Tshumanelo wayɔsɛdingola awui asɔ lo Losanganya l’Olimu yema tshitshɛ la ntondo ndo yema tshitshɛ l’ɔkɔngɔ wa vɔ mbɔtɔ lo nsanganya yawɔ ya weke. Ngande wayɔlɔngɔswama ovuswelo ɔsɔ na?
Lomingu ɔtɔi kana mingu hiende la ntondo k’etshumanelo mbɔtɔ lo losanganya l’otshimbedi, sawo dia minitɛ dikumi diɔsami lo sawo diata ɔnɛ: “Ekongelo ka Losanganya l’Otshimbedi Layaye” diayoshama lo Losanganya l’Olimu dia nomialomia nsaki k’anto dikambo di’ekongelo kɛsɔ. Ɔtɛkɛtshi ayokotola yambalo y’anto lo wembola w’ovuswelo ndo ayokeketsha anto tshɛ dia mbɔsa nɔtɛ woho wa vɔ ndjalɔngɔsɔla di’ovuswelo wayosalema mingu mɔtshi ngana l’ɔkɔngɔ wa losanganya la woke.
Mingu ngana tsho l’ɔkɔngɔ wa losanganya la woke, ovuswelo wa minitɛ 15 w’awui wakatama lushi la ntondo la losanganya wayosalema lo Losanganya l’Olimu. Lo lomingu layoyela, ovuswelo wa minitɛ 15 w’awui wakatama lo lushi la hende la losanganya la woke wayosalema. Wembola w’ovuswelo woshami lo dikatshi di’okotsha nɛ wayonyokimanyiya l’ɔkɛtshanyelo ɔsɔ. Ovuswelo pombaka mɛnya anto ohomba w’awui wakatɛkɛtama. Dikumanyi mbeyaka nɔngɔsɔla dia susa kana minya tenyi dikina dia l’ekongelo ka Losanganya l’Olimu dia kimanyiya woho w’ovuswelo salema kana nyomosala ekongelo kekina ka Losanganya l’Olimu.
Ɔlɔngɔswɛlɔ akɔ wâmɛ mbayosalema lo kɛnɛ kendana la losanganya la lânde la lushi ɔtɔi. Otshikitanu wâmɛ wele lanɛ ele nyayokamba la minitɛ 15 dia vusola ekongelo k’otondo ka losanganya lɔsɔ. Sho tshɛ pombaka momba dikatshi di’okotsha nɛ ndo ndjokamba ladiɔ dia kondja wahɔ oma lo wetshelo wa dimɛna watosha Jehowa.—Is. 48:17, 18.