Ekongelo ka Losanganya l’Otshimbedi Layaye

Lo “tena dia wulu” diasɛnaso nɛ, tekɔ l’ohomba wa lomba l’oma le Nzambi dia sho tetemala mbetawɔma le Jehowa. (2 Tim. 3:⁠1) Ekongelo ka losanganya l’otshimbedi l’ɔnɔnyi w’olimu 2005 kayotosha alako wa shikaa ndo ekeketshelo l’ekimanyielo k’ɔtɛ a dui wata ɔnɛ: “Tɔlɔmbwame la ‘Lomba l’oma l’Olongo.’ ”​—⁠Jak. 3:⁠17.

Dako dia ntondo dia tenyi sato, diata ɔnɛ: “Tɔkɛnɛmɔlɛ Lomba l’oma l’Olongo lo Nsɛnɔ Yaso,” diayotokimanyiya dia sho shihodia kɛnɛ kalembetshiya monga pudipudi, monga l’ekanelo k’ɔlɔlɔ ndo monga suke dia kitanyiya. Oma lâsɔ, omendji w’otshimbedi ayokotola yambalo yaso l’akambo akina asato wendana la lomba l’oma le Nzambi. Omendji wa distrikɛ ayokumiya lushi la ntondo lo mɛnya woho wele ekambi w’Akristo, kânga mbɔsamawɔ oma le anto amɔtshi oko “haweyi mukanda, [ndo oko] antu k’antu,” vɔ wambɔlɔngɔswama dia tɛkɛta dikambo dia lomba laki Nzambi.​—⁠Etsha 4:⁠13.

Lushi la hende la losanganya, dako dia tenyi sato diele l’ɔtɛ a dui ɔnɛ: “Towese Akambo Wakeketsha” ayotokimanyiya dia sho mbeya ndo mbewɔ akambo wakoka ndjotɔtɛwɔla lo nyuma. Dako sɔ diayotɛnya nto woho wakokaso keketsha anto akina lo nsanganya ya l’etshumanelo, l’olimu w’esambishelo ndo l’atei wa nkumbo. Sawo dia lo sɛkɛ diayonga l’ɔtɛ a dui ɔnɛ: “Woho Wakondjaso Ɛlɔlɔ oma lo Lomba Laki Nzambi,” ayofudia lowando laso lo ɛlɔlɔ wakondjaso etena kakambaso l’atɔndɔ w’oma le Nzambi lo nsɛnɔ yaso. Dako di’ekomelo diata ɔnɛ: “Kamba la la Lomba l’oma le Nzambi Tokokɛka,” diayokeketsha yɛdikɔ yaso ya nyanga lomba l’oma le Jehowa lo nshi nyɛ y’ekomelo.

Dui dimɔtshi di’ohomba dia lo nsanganya ya weke tshɛ ele batismu k’ambeki w’eyoyo. Kalasa k’Olimu wa Teokrasi ndo wekelo wa Tshoto y’Etangelo wa lomingu lakɔ wayodjama l’ekongelo. Jehowa kombolaka dia sho tshɛ kondja wahɔ oma lo lomba lɔnɛ latoshande. Tayohama efula lo nyuma oma l’alako ndo dikeketshelo diatokongɛ lo losanganya laso l’otshimbedi.​—⁠Tuk. 3:​13-18.