Losanganya la Distrikɛ l’Ɛmɛnyi wa Jehowa la l’Ɔnɔnyi 2005 Lele l’Ɔtɛ a Dui Ɔnɛ: “Okitanyiya Otsha le Nzambi”
1 Oko wende Ombetsha aso wa Woke, Jehowa Nzambi nɔngɔsɔlaka dia sho sangana kâmɛ woho wa sho mbetshama lo mboka yande. (Is. 30:20, 21; 54:13) Nde salaka dui sɔ oma lo tshimbo ya ɔhɔmbɔ wa kɔlamelo ndo wa kɛsɔ, watɔlɔngɔsɔlɛ nsanganya, oko nsanganya yaso ya distrikɛ y’ɔnɔnyi la ɔnɔnyi. (Mat. 24:45-47) Nsaki yaso yekɔ oko y’omembi w’esambo Davidi, lakembe ate: “Dimi layutumbulaka [Jehowa] lu sanganya.” (Osam. 26:12) Davidi akashihodia dimɛna wahɔ waya lo mbetshama oma le Jehowa ndo akayashikikɛ dia monga l’atei w’ekambi Ande lo dihole tshɛ diayowotshumana kâmɛ.
2 Onde wɛ ayoyala l’atei ‘w’olui w’anto’ wayosangana kâmɛ lo Losanganya la Distrikɛ l’ɔnɔnyi ɔnɛ lele l’ɔtɛ a dui ɔnɛ: “Okitanyiya Otsha le Nzambi”? Naka eelo, kete awui wayela anɛ wayokokimanyiya dia wɛ ndjâlɔngɔsɔla woho wa mbɔtɔ lo losanganya lakɔ.
3 Yalɔngɔsɔla oma ko Kakiye dia Mbɔtɔ lo Nshi Yakɔ Tshɛ: “Tukanyi ta kanga kolamelu, tatûkundjiyaka diango efula.” (Tuk. 21:5) Onde ɛtɛkɛta ɛsɔ hawoke epole ɔsɛkɛ l’ohomba wa mbɔsa yɛdikɔ dia tɔɔtɔ lo losanganya aha la tshimbatshimba? Dia ndjashikikɛ ɔnɛ wɛ hatohandja ndoko etenyi ɔtɔi ka losanganya lɔsɔ lasha ekeketshelo ka lo nyuma, la lomba tshɛ tatɛ sala ɛlɔngɔswɛlɔ wele ohomba leyɛ woho wa tɔɔtɔ nshi yakɔ shato oma ko kakianɛ. Naka wɛ pombaka nɔmba owandji ayɛ w’olimu dikimɔ, kete lɔmbande aha la tshimbatshimba. Naka wɛ nangaka kɛtshanya dikambo sɔ l’olonganyi ayɛ waha ombetawudi, kete tokongɛke dia paka lo minitɛ k’ekomelo ko nyu ndjɔkɛtshanya. Oyadi ekakatanu akɔna walɔshanya layɛ, djawɔ lo alɔmbɛlɔ ayɛ otsha le Jehowa, lo monga l’eshikikelo dia oma l’ekimanyielo kande “sangweyu diaye diayushikikala.” (Tuk. 16:3) Lâdiko dia lâsɔ, ayoyala nto ohomba kimanyiya ambeki ayɛ wa Bible l’ɔlɔngɔswɛlɔ wasalawɔ dia vɔ monga lo tenyi tshɛ dia losanganya.
4 Ohangelo: Mbala efula ɛlɔngɔswɛlɔ w’ohangelo wa lo osomba wayosalema losanganya mongaka lo mvudu y’anto (mvudu yaki anangɛso l’akadiyɛso), lo Mbalasa ya Diolelo kana le ase nkumbo. Listɛ l’ahole tshɛ wayosalema nsanganya layohanema lo dibaya diahanɛwɔ waewoyelo l’etshumanelo l’ɔkɔngɔ wa dikatshi di’okotsha nɛ sɛdingɔma lo Losanganya l’Olimu. Nɔmbamaka di’onto tshɛ kana yimba lo dɔmbɛlɔ ndo sɛdingola dihole diahombande tɔɔtɔ losanganya la l’ɔnɔnyi 2005. Naka wɛ ayolanga tohanga laka ɔnangɛso ɔmɔtshi kana lo Mbalasa ka Diolelo, kete tambɔlɔmba dia sekeletɛlɛ sala listɛ l’apandjudi tshɛ walɔmba pango nshi efula la ntondo ndo litomɛ Departɛma diendana l’Ohangelo lo osomba wayosalema losanganya. Nde pombaka funda lokombo l’onto, mɛnya dia nde ekɔ pami kana womoto, ɛnɔnyi ande ndo woho wotɔnde l’onto akɔ naka laka owotɔ ande mbayondohanga. Kɛsɔ ayokimanyiya anangɛso wakamba lo Departɛma diendana l’Ohangelo dia kondja etena k’efula ka nyangɛ anto tshɛ pango. Kɔmite k’Olimu ka l’Etshumanelo pombaka sɛdingola akoka w’opandjudi tshɛ la ntondo ka vɔ tomɛ Departɛma Diendana l’Ohangelo listɛ. Naka wambotosha dihole dia sho panga, kete hatonga dimɛna dia shoamɛ ndjayangɛ dihole dikina dia todjasɛ l’ɔnangɛso kana l’ɔngɛnyi okina. Kɛsɔ ayetɛ ɔkɛndɛ w’anangɛso wakamba lo Departɛma Diendana l’Ohangelo wotsho. Koko, naka onto ayotodjasɛ nshi ya losanganya nde l’ase nkumbo kande, kete atokimɔke lokombo lo fɔrmilɛrɛ k’anto Walɔmba Pango.
5 Ohangelo wa lo Mbalasa ka Diolelo: Tambolanga nyosha alako amɔtshi wendana la Ohangelo wa lo Mbalasa ka Diolelo. Kɔmite ka Losanganya la Distrikɛ ayodja ekumanyi kɛmɔtshi dia menda dikambo di’ohangelo wa lo Mbalasa ka Diolelo. Nde ayonga l’okimanyedi, ndo ayoleka dimɛna di’okimanyedi ɔsɔ monga ekumanyi kekina kana okambi w’olimu wele la lonyuma la dimɛna ndo w’akoka. Mbalasa la dia kahanyema lo tenyi pende. Etenyi kɛmɔtshi dikambo di’akadiyɛso l’anawɔ kâmɛ ndo ana wa wamato ndo etenyi kekina dikambo di’anangɛso l’ana w’apami. Mbalasa ka Diolelo ayonga paka dikambo dia ndalaka tsho. Lo nshi yayotshɔka anto tshɛ lo losanganya ko ndoko onto layonga lawɔ, pombaka nɔngɔsɔla dia olimu wa djamu salemaka di’aha wovi ndjova diangɔ di’anto. Anangɛso wele la lonyuma la dimɛna mbahomba sala olimu wa djamu ɔsɔ. Okatelo wa diangɔ dia ndɛ l’etei ka Mbalasa ka Diolelo hatetawɔma. Kokaka mbika tshombotombo yakoka ndjohandjɔma lo sɛkɛ dia Mbalasa ka Diolelo woho wa katɛka paka lo nshi yasalema losanganya tsho. L’ekomelo ka losanganya, tshombotombo shɔ pombaka pandjɔma. Ekɔ ohomba dia mbalasa ndo asɛkɛ atɔ mongaka wonya tshɛ pudipudi ndo kɔmba. Pombaka menda ɔlɔlɔ di’aha ndanya ndoko ɛngɔ ɔtɔi ka lɔkɔ. Wanɛ wohangi lo mbalasa wayosala la wolo tshɛ dia monga la lɔkɛwɔ l’ɔlɔlɔ lasungana le Akristo wa mɛtɛ lam’asawɔ ndo otsha le asukanyi.—1 Kor. 10:31.
6 Ehomba wa Lânde: Ɔpɔstɔlɔ Paulo akate dia anango amɔtshi wakayala ‘ekimanyielo kakeketsha’ le nde. (Kol. 4:7-11) Yoho mɔtshi yakawokimanyiya ele lo mbokambɛ elimu ɛmɔtshi. Ngande wakokayɛ monga ‘ekimanyielo kakeketsha’ le anto akina lo kɛnɛ kendana la losanganya? Apandjudi waya esombe, anto wele la dikɔmɔ, wanɛ wakamba olimu wa lo tena tshɛ, ndo anto akina mbeyaka monga l’ohomba w’ekimanyielo lo kɛnɛ kendana la wɛmbɛlɔ kana ohangelo. Wanɛ wotɔ lawɔ mbele l’ɔkɛndɛ wa ntondo wa kimanyiya weho w’anto asɔ. (1 Tim. 5:4) Koko, naka vɔ hawokoke mbâkimanyiya, kete asekawɔ ambetawudi mbeyaka mbasha ekimanyielo. (Jak. 1:27) Emendji wa wekelo wa dibuku pombaka sɛdingola dia mbeya akɔna l’atei w’anto wa l’elui awɔ ele l’ohomba w’ekimanyielo ka lânde dia vɔ ndjashikikɛ dia anto wamboshila ndjalɔngɔsɔla la ntondo.
7 Wɔtwɛlɔ wa lo Losanganya Lokina: Dia ndjashikikɛ ɔnɛ ahole wa mbidjasɛ, abuku, pango ya tohanga ndo awui akina wayonga lo yɛdikɔ yakoka, apandjudi wambokeketshama dia tɔɔtɔ lo losanganya layɔtɔ etshumanelo kawɔ. Naka akambo wele layɛ kɔlɔmbaka dia wɛ tɔɔtɔ lo losanganya lokina, kete ɛnana la sekeletɛlɛ ka l’etshumanelo kayɛ.
8 Ohomba w’Anto Wayakimɔ la Lolango: Yeso akatotshikɛ ɛnyɛlɔ ka kokele lo kɛnɛ kendana la mbidja yimba l’ehomba w’anto akina. (Luka 9:12-17; Joa. 13:5, 14-16) Wanɛ wayakimɔ la lolango dia kamba lo losanganya la distrikɛ kɛnɛmɔlaka yimba ya woho akɔ wâmɛ. Dia kotsha ehomba wendana la adepartɛma wa lo losanganya, Kɔmite ka Losanganya la Distrikɛ wayelɛ anto akina dia ndjokamba kâmɛ la wɔ. Ekɔ ohomba efula dia dikumanyi mbetawɔ ndjakimɔ la lolango ndo mbetawɔ ɛkɛndɛ. Yimba yawɔ ya la lolango ayosha anto akina wa l’etshumanelo ɛnyɛlɔ ka dimɛna.—1 Pet. 5:2, 3.
9 Kɛnɛ Kɛna Anto Akina: Owandji ɔmɔtshi wa womoto wakamba l’ɔtɛlɛ ɔmɔtshi akate ate: “Sho nyolangaka efula. Nyekɔ la lɔkɛwɔ l’ɔlɔlɔ lo nyɛdika l’elui ekina w’anto. Waa mama yasola mvudu vɔ tshɛ mbutaka woho wawaɔsanyu la nɛmɔ ndo woho wawashanyu tangangɔ l’ɔtɛ w’elimu wanyokambɛwɔ. Lo mɛtɛ, vɔ tshɛ kombolaka kamba wikɛndɛ wenyu lanɛ!” Owandji okina wa l’ɔtɛlɛ akate ate: “Ɛmɛnyi wa Jehowa wekɔ anto w’ɔlɔlɔ wa kamba lawɔ nɛ dia vɔ bu awui wolo kânga yema tshitshɛ.” Ondo lɔkɛwɔ layɛ la dimɛna mbakonya di’anto mbuta awui wa ngasɔ. Ohokanyiya woho woka Jehowa ɔlɔ etena kɛnande etsha wa ngasɔ wawosha lotombo oma le so!—1 Pet. 2:12.
10 Oma lo tshimbo “[y’o]lami weli la kolamelu,” Jehowa Nzambi ambɔlɔngɔsɔla di’ekambi ande sangana kâmɛ dia nongola wetshelo wa lo nyuma ɔnɔnyi ɔnɛ. (Luka 12:42) Nɔmbaka dia mbidja welo efula dia ndjalɔngɔsɔla woho wa mbɔtɔ lo nshi yakɔ shato, koko teye dia welo wayotodja dia sala dikambo sɔ hatonga anyanya. Ɔnɔnyi ɔnɛ Losanganya la Distrikɛ lele l’ɔtɛ a dui ɔnɛ: “Godly Obedience” ayokeketsha yɛdikɔ yakatɔshi ya kambɛ Jehowa oma ko kakianɛ ndo pondjo pondjo. Nyɛsɔ toyashikikɛ dia ndjela leeta l’omembi w’esambo lata ɔnɛ: “Nyutumbuli [Jehowa] lu elui w’antu a waki.”—Osam. 68:26.
[Kiombo ya lo lɛkɛ 3]
Ekongelo ka Wenya
Lushi la Tanu la Lushi la Samalo
9:30 la pindju - 17:05 l’ɔkɔngɔ a midi
Lushi la Lomingu
9:30 la pindju - 16:10 l’ɔkɔngɔ a midi
[Kiombo ya lo lɛkɛ 4]
Tɛdikɔ tɔmɔtshi ta mbɔsa dia mbɔtɔ lo Losanganya la Distrikɛ
1. Naka wɛ pombaka munda lɔkɛndɔ l’otale dia tɔɔtɔ lo losanganya, kete tatɛ momba falanga ya lɔkɛndɔ lanyu wɛ la nkumbo kayɛ, ndo y’olelo anyu lɛkɔ.
2. Kanyokanyiya nto dia sukɛ ɔlɔngɔswɛlɔ wa losanganya la weshasha anyu wa la lolango. ‘Tanyɛnamake la ntondo ka Jehowa anya hwe,’ koko ‘nyɔlɛmia Jehowa la diangɔ dianyu di’oshinga wolo.’—Euh. 16:16; Tuk. 3:9.
3. Lo wonya wa losanganya, sho tombolaka lokombo la Jehowa lo monga la lɔkɛwɔ l’ɔlɔlɔ ndo oma l’ɔlɔtɔ aso wa pudipudi ndo wa kɔmba.—1 Kor. 10:31.
4. Tsha tshɛ dia ndjela kɛnɛ kata anangɛso walongola anto ndo wele l’ɔkɛndɛ wa mbisha anto ahole. Tâmbɛke ahole tshanana onyake paka dikambo di’ase nkumbo kayɛ kana dia wanɛ woye la yɛ.
5. Lo wenya wa mumuya, kôle diangɔ di’osadi woho wa wɛ ndjoyela etenyi ka l’ɔkɔngɔ a midi dimɛna. Nɛ dia mbo ya ndɛ ya wotsho mbeyaka ndjokosha djɔ. —Luka 8:18.
6. Pudipudi tombolaka Jehowa. L’ekomelo k’etenyi tshɛ ka losanganya, onto l’onto kasha lonya dia tshika dihole dia losanganya pudipudi lo tɔngɔnaka akatshi la diangɔ dikina dia ngasɔ ko dikadja l’ahole wakalɔngɔswama dia mbikadjaka mindo.—1 Pet. 1:15, 16.