Ekongelo ka lo nkumbo ka esambishelo ka lo nkumbo
1 Jehowa ngɛnangɛnaka mɛna ana w’akɛnda watombola lokombo lande. (Osam. 148:12, 13) Lo nshi ya Yeso, kânga ‘ana w’akɛnda la wa ashashi wakatombolaka’ Nzambi. (Mat. 21:15, 16) Dikambo sɔ mbasalema ndo ɛlɔ kɛnɛ. Ambutshi, ngande wakokanyu kimanyiya ananyu dia vɔ ndjonga wanɛ watombola Jehowa l’ohetoheto l’olimu w’Okristo? Ndo nto, oko wɛnyamidiɔ lo sawo dia ntondo diendana la nsanganya ya l’etshumanelo, dui dia ohomba efula ko ɛnyɛlɔ kayɛ. Lo kɛnɛ kendana la woho wayaoka ambutshi efula, ombutshi ɔmɔtshi akate ate: “Ana hawosale kɛnɛ kawatɛyɛ; koko vɔ salaka kɛnɛ kasalayɛ!”
2 Kadiyɛso kɛmɔtshi kakodiama oma le ambutshi woka Nzambi wɔma ekɔ lo mbohɔ ate: “Ndoko lushi lakatetɔ la pindju ka Lushi la samalo ko sho mumbola dia kana tayotomba l’esambishelo. Takeyaka ɔnɛ tayotshɔ dia tosambisha.” Woho akɔ wâmɛ mbele, wɛ kokaka kɔkɔmiya l’etema w’anayɛ ohomba w’olimu w’esambishelo lo monga la ekongelo ka shikaa ka tombaka l’esambishelo oko nkumbo lomingu la lomingu. Kɛsɔ hakimanyiya tsho anayɛ dia vɔ mbeka lo menda ɛnyɛlɔ kayɛ, koko dikambo sɔ kokimanyiyaka nto dia wɛ sɛdingola dionga diawɔ, woho wasalawɔ akambo ndo woho watawahamia akoka awɔ.
3 Nyowaetshake yema yema: Dia ana ngɛnangɛna esambishelo, vɔ pombaka nɔngɔswama dia vɔ tosambisha dimɛna. Kadiyɛso kakatatɛkɛtshi dikambo diande la diko ekɔ lo kotsha nto ate: “Sho kotshindɛka ambutshi aso l’olimu awɔ w’esambishelo ko takɔmaka anya aha la ntsha ndoko dikambo. Takeyaka ɔnɛ ndo sho lawɔ tekɔ l’olimu wa sala, kânga mbele olimu akɔ aki paka mbuda ngunga ka lo lokuke ko mbisha onto traktɛ kɛmɔtshi. Oma lo woho wakatayalɔngɔsɔlaka dimɛna la ntondo k’elimu wa lo wikɛndɛ tshɛ, sho takeyaka kɛnɛ kakatahombaka mbuta.” Wɛ koka mbisha anayɛ wetshelo wa ngasɔ lo mbɔsaka minitɛ ngana tsho lomingu tshɛ dia mbalɔngɔsɔla dikambo dia olimu w’esambishelo, kânga wonya wa wekelo wa nkumbo kana etena kekina.
4 Sambisha kâmɛ oko nkumbo koshaka diaaso dikina dia kɔkɔmiya akambo wa mɛtɛ l’etema wa anayɛ. Papa kɛmɔtshi k’Okristo akatshɔka la ɔnande la womoto etena kakawakɛndakɛndaka kilɔmɛtɛlɛ 10 dia takahanyaka traktɛ le anto wakadjasɛka l’okidi ɔmɔtshi wakasukana lawɔ. Ɔnɔsɔ ekɔ lo mbuta la lowando tshɛ ate: “Lo tena sɔ diakatatakɛndakɛndaka mbakɔtshiya papa mɛtɛ lo otema ami.” (Euh. 6:7) Wɛ lawɔ ayokondja ɛtshɔkɔ wa ngasɔ, naka wɛ mbidja olimu w’esambishelo lo ekongelo ka nkumbo kayɛ.