Tote anto akina dikambo dia ‘osase w’andja’

1. Osase akɔna a woke wakatɛkɛtama l’Ɔtɛkɛta wa Nzambi, ndo diaaso diakɔna diakotola yambalo ya lânde l’osase ɔsɔ?

¹ Jehowa akate lo tshimbo ya ɔprɔfɛta Isaya ate: “Wudja wakakendakendaka l’udjima, wakenyi usasi a wuki. Usasi ambohetela waku wakadjaseka lu kete, lu didjidji dia nyoi.” (Is. 9:⁠2) “Usasi a wuki” ɔsɔ wakɛnama lo olimu waki Ɔna Nzambi, Yeso Kristo. Lam’akinde la nkɛtɛ olimu ande w’esambishelo ndo ɛtshɔkɔ wakatombe oma lo olambo ande akalɔngɔsɔla lonyuma la wanɛ waki lo wodjima wa lo nyuma. Osase wa ngasɔ mbele l’anto ohomba lo tena nɛ dia wodjima. Dambo dia Dikɔlɔ dia Nkumadiɔndjɔ toshaka diaaso dia lânde dia mbutɛ anto akina dikambo dia ‘osase w’andja.’ (Joa. 8:12) Ɔnɔnyi wetshi, miliyɔ y’anto wakɛnya mbetawɔ kawɔ lo sangana kâmɛ laso dia kitanyiya didjango diaki Yeso di’ɔnɛ: “Kanyutshaki okone, dia mbuhomi.” (Luka 22:19) Oko wayasukana lushi la Eohwelo ka ɔnɔnyi ɔnɛ, ngande wakokaso kotola yambalo y’anto otsha l’osase a woke wakangamula Jehowa na?​—⁠Fil. 2:⁠15.

2. Ngande wakokaso fudia lowando l’etema aso lo dikambo dia olambo wa tshungo, ndo dui sɔ diayonga l’etombelo akɔna?

² Tonge la lowando l’oma k’ɛse otema: Nshi ya Eohwelo ekɔ etena ka dimɛna ka kana yimba lo ngandji k’efula kakatɛnya Jehowa ndo Yeso lo kimɔ olambo wa tshungo dikambo di’anto. (Joa. 3:16; 2 Kor. 5:​14, 15) Aha la tâmu okanelo wa yimba wa ngasɔ ayoleka totshutshuya dia ndeka monga la lowando l’etema aso lo dikambo dia diaaso di’ekila sɔ. Ekambi waki Nzambi tshɛ wayolanga ndjatshungwɛ etena ka mbadia ndo kana yimba lo wadielo wa Bible wa lânde wasalema lo nshi ya Eohwelo, oko wɛnyamidiɔ lo Tɔsɛdingolake Afundelo lushi la lushi. Kana yimba lo waonga waki Jehowa woleki tshɛ, waonga ande w’amɛna efula wakakɛnɛmɔma l’olambo wa tshungo wakandakimɔ tokonyaka dia sho ndjafuna oko wende Nzambi kaso. Kana yimba lo kɛnɛ kalembetshiya tshungo le so l’onto ndo l’onto fudiaka ngandji k’oma k’ɛse otema kokaso Nzambi ndo Ɔnande ndo dui sɔ totshutshuyaka dia mbidja welo dia sala lolango la Nzambi.​—⁠Ngal. 2:20.

3. Ngande wakokaso mɛnya lowando laso lo dikambo dia Eohwelo?

³ Naka sho fudia lowando laso lo kɛnɛ kakasale Jehowa dia panda kaso, kete tayosambiya ambeki aso wa Bible, anto watshɔso tenda lo waendelo w’eyoyo, ewotɔ aso, asukanyi aso, asekaso wa la kalasa, asekaso wa l’olimu ndo anto akina wayotelɛ lo diaaso dia lânde sɔ wangasanu wele laso lo dikambo dia Eohwelo. (Luka 6:45) Ɔnkɔnɛ, sala la wolo dia mbelɛ anto asɔ tshɛ, shawɔ dikatshi dia leeta dia Eohwelo dia diɔ monga eohwelo le wɔ. Diaha mbohɛ ndoko onto, anto efula wakɛnyi dimɛna dia nama listɛ l’anto welɛwɔ mbala la mbala lo Eohwelo, lo kotshaka ɔnɔnyi tshɛ anto w’eyoyo. Sala dui sɔ lo yoho yɔlɔngɔswami ndo sala kɛnɛ tshɛ kakokaso sala dia mbelɛ wanɛ wayasha ayonga yoho ya dimɛna ya mɛnya lowando laso le Jehowa Nzambi l’ɔtɛ wa “ushasha andi waheyana mvuta.”​—⁠2 Kor. 9:15.

4. Kakɔna kayotokimanyiya dia sho sambisha efula lo Ngɔndɔ ka sato ndo ka nɛi?

⁴ Tosambisha efula: Onde wɛ koka sambisha efula lo Ngɔndɔ ka sato ndo ka nɛi? Aha la tâmu, Nzambi tshɔkɔlaka woho wayatshutshuyaso dia sambisha anto akina “lukumu l’ololo la lutumbu la Kristu.” Oko wele Jehowa Kiɔkɔ y’osase tshɛ wa lo nyuma, nde akadjanga ate: ‘Osase wahɛtɛ lo wodjima.’ (2 Kor. 4:​4-6) Lo dihole tshɛ diayoyala ohomba, dikumanyi wayɔlɔngɔsɔla nsanganya nkina y’otsha lo esambishelo lo wenya ndo l’ahole wotshikitanyi, ndo vɔ wayosha ɛnyɛlɔ lo sukɛ apandjudi wakombola sambisha efula. Kɛsɔ mbeyaka mbidja ndo esambishelo ka la pindju lo toshinga kana ekongelo ka sambisha l’ahole wandawɔ okanda ndo esambishelo ka lo telefɔnɛ l’ɔkɔngɔ a midi kana la dikɔlɔ. Kɛnɛ kayokokimanyiya dia sambisha efula ele, shikikɛ lofulo la wenya lahombayɛ sambisha, ndo kamba la wolo dia kotsha lofulo lakɔ. Le anto efula, mbisha Jehowa kɛnɛ koleki dimɛna mbidjaka ndo diɛsɛ dia kamba oko ombatshi mboka wa tshanda.​—⁠Kol. 3:​23, 24.

5. Ngande wakondja anto efula wahɔ lo woho wakawakitshakitsha lofulo la wenya l’ambatshi mboka wa tshanda?

⁵ Onde wɛ koka kamba oko ombatshi mboka wa tshanda? Kakianɛ aya ndekana ɛnɔnyi esambele wele lofulo la wenya lalɔmbawɔ ambatshi mboka wa tshanda lakakitakita. Etshikitanu ɛsɔ akakimanyiya dia anto efula kondja ɛtshɔkɔ waya oma l’olimu w’ombatshi mboka wa tshanda. Onde wɛ ambohembaka kamba olimu akɔ? Anto amɔtshi waya la mbekelo ka kambaka olimu ɔsɔ ɔnɔnyi tshɛ. Lo tshumanelo efula apandjudi efula kambaka yoho y’olimu shɔ kâmɛ, ndo dui sɔ komaka etena koleki dimɛna k’olimu wa etshumanelo wa l’ɔnɔnyi. Onde wɛ koka sala ekongelo dia kamba olimu w’ombatshi mboka wa tshanda ngɔndɔ kɛmɔtshi lo nshi ya Eohwelo? Djekoleko Ngɔndɔ ka nɛi ayonga ngɔndɔ koleki dimɛna le amɔtshi, lam’ele tɔ kekɔ la wikɛndɛ etanu.

6. Dikongelo diakɔna di’amɛna diakasalema?

⁶ Onde lo Ngɔndɔ ka sato kana ka nɛi omendji w’otshimbedi ayembola etshumanelo kanyu? Naka eelo, kete nyayonga la diaaso dikina dia lânde. Oko wakadiewoyama, l’ɔnɔnyi w’olimu wa 2006 wanɛ tshɛ wayokamba olimu w’ombatshi mboka wa tshanda lo ngɔndɔ kayembola omendji w’otshimbedi etshumanelo wayɔtɔ lo etenyi ka ntondo ka losanganya la l’ambatshi mboka lasalema lo lomingu la wembwelo. Aha la tâmu, awui wakeketsha wa lo nyuma wayoshama lo losanganya lɔsɔ ayokimanyiya ambatshi mboka wa tshanda efula dia vɔ koma ambatshi mboka wa pondjo. Lâdiko dia lâsɔ, lo Ngɔndɔ ka sato tayonga l’ɔngɛnɔngɛnɔ wa kimanyiya anto dia vɔ ndja l’osase wa lo nyuma l’ekimanyielo ka wekelo wa dibuku di’oyoyo Bible etshatɔ mɛtɛ? Lande na kahayayadjɛ oyango wa tatɛ mbeka l’anto lo dibuku di’oyoyo sɔ?

7, 8. a) Kakɔna kayotokimanyiya dia sho sala ekongelo dia kamba oko ombatshi mboka wa tshanda? b) Ngande wakoka okambelo wa kâmɛ l’atei wa nkumbo kimanyiya, ndo ngande wakondja ase nkumbo tshɛ ɛtshɔkɔ?

⁷ Oko wayoyokana yimba lo dikambo dia wenya 50 walɔmbawɔ ambatshi mboka wa tshanda, enda ekongelo kayokokimanyiya dia wɛ mpɛtsha osase wa akambo wa mɛtɛ lo sambishaka wenya 12 lomingu tshɛ. Kɛtshanya dui sɔ la wanɛ wakakotsha olimu ɔnɛ dimɛna, ndo la anto akina. Kɛsɔ koka mbakimanyiya dia vɔ ndjela lokolo layɛ. Lo sala ekongelo ka dimɛna, apandjudi wambobatizama akɛnda ndo epalanga wakɛnyi dia kema dui dia wolo dia kotsha oyango wa dimɛna efula ɔnɛ. Lɔmba dia dikambo diakɔ. Oma lâsɔ naka kokaka, sala ekongelo kayɛ, ndo kondja wahɔ oma l’olimu w’ombatshi mboka wa tshanda!​—⁠Mal. 3:10.

⁸ Nkumbo efula wakɛnyi dia esukelo k’oma le ase nkumbo akina kimanyiyaka dia kânga ose nkumbo ɔtɔi kotsha oyango ɔsɔ. Nkumbo kɛmɔtshi wakɔshi yɛdikɔ dia apandjudi wambobatizama atanu wa lo nkumbo kakɔ kamba olimu w’ombatshi mboka wa tshanda. Ana akina ahende waki watabatizama wakadje welo dia nyomoleka sambisha. Ngande wakakondja nkumbo kɛsɔ wahɔ lo mbidja welo wa lânde? Vɔ wakafunde ɔnɛ: “Ɔsɔ aki ngɔndɔ ka dimɛna efula, ndo sho takɛnyi dia dimama dia l’asa ase nkumbo diakakeketshama. Sho kaloyaka Jehowa losaka l’ɔtɛ w’ɔtshɔkɔ wa diambo ɔsɔ!”

9. Ngande wakokaso pɛtsha osase aso lo nshi ya Eohwelo nyɛ?

⁹ Onde olimu aso wa lânde wa lo Ngɔndɔ ka sato la ka nɛi wayotokeketsha ndo wayoleka tosukanya la Shɛso lele l’olongo? Otondoyelo aso lo dikambo sɔ nemanɛka la welo wadjaso l’onto ndo l’onto dia pamia ngandji kokaso Nzambi ndo Ɔnande lo nyomoleka sambisha. Eshikikelo kaso konge oko kaki omembi w’esambo, lakembe ate: “Layukaka [Jehowa] lusaka la wuki l’unyo, ee, dimi layûtumbulaka l’atei ului w’antu.” (Osam. 109:30) Jehowa ayɔtshɔkɔla olimu aso w’ohetoheto lo nshi nyɛ ya Eohwelo. Ɔnkɔnɛ, nyɛsɔ tongamule osase a woke dia anto efula mimɔ oma lo wodjima ndo ndja lo “yanyi ya lumu.”​—⁠Joa. 8:⁠12.