Numɛlɔ ka lânde ka Réveillez-vous! kayokahanyema lo Ngɔndɔ ka divwa
1 Suke la anto tshɛ ngɛnangɛnaka nkembo ya tofudu ndo dimɛna dia ɛɔtwɛlɔ ka wonya. Koko anto efula hawetawɔ dia Shɛso ka ngandji lele l’olongo mbakatonge diangɔ sɔ tshɛ. Tayonga la diaaso dimɔtshi dia lânde dia mbewoya anto akina dia Jehowa kele Otungi lo kahanya numɛlɔ ka lânde ka Réveillez-vous! (Is. 40:28; 43:10) Réveillez-vous! wa Ngɔndɔ ka divwa wayendana paka la sawo diele l’ɔtɛ a dui ɔnɛ: “Y a-t-il un Créateur ?”
2 Lo ɛtshi kaso ka nkɛtɛ: Naka kokaka, toyalɔngɔsɔlɛ dia sambishaka lo luudu la luudu kâmɛ la etshumanelo Lushi la samalo tshɛ. Lo mɛtɛ, sho koka mbisha anto numɛlɔ ka lânde kɛsɔ kânga lo nshi nkina ya lo lomingu. Embetsha ndo anto akina wakamba elimu lo ahole wa kalasa wayoleka ngɛnangɛna Réveillez-vous! ɔsɔ. Omalɔkɔ, tɛdikɔ ta lânde koka mbɔsama dia tembola anto wa ngasɔ wele l’ɛtshi kaso ka nkɛtɛ.
3 Naka onto ambɛnya nsaki, kete tôtshike la dimbola diayotoyokadimola mbala kayela. Ɛnyɛlɔ, sho koka munyiya dimbola dimɔtshi diendana la ɔkɔkɔ watshika Otungi wa ngandji asui efula nganɛ. Lâsɔ lo wendelo w’oyoyo, sho koka ndjɔkɛtshanya la nde tshapita 1 kana 11 ya dibuku Bible etshatɔ. Kana sho koka munyiya dimbola diendana la sangwelo diaki Otungi lo dikambo dia nkɛtɛ, ko sho ndjɔsɛdingola tshapita 3 lo wendelo w’oyoyo.
4 La kalasa: Naka wɛ ekɔ ombeki, lande na kahayasha embetsha ayɛ la asekayɛ ambeki numɛlɔ ka lânde ka Réveillez-vous! ɔnɛ? Naka wɛ kitsha kɔpi kɛmɔtshi l’okala ayɛ, kete dui sɔ koka tshutshuya anto akina dia kôka ambola wendana la dietawɔ diayɛ. Wɛ koka kondja diaaso dia kamba la awui w’oma lɔkɔ dia mamɛ dietawɔ diayɛ lo ɛkɛtshanyelo wa lo kalasa kana etena kanyɔlɔmbawɔ dia nyu kɔndɔla dui dimɔtshi lofunda. Dia kokimanyiya, periodikɛ kakɔ kekɔ la sawo diata ɔnɛ: “Les jeunes s’interrogent. . . ” “Comment défendre ma croyance en la création ?”
5 Jehowa mɛtɛ kokaka tombwama lo menda kɛnɛ kakandatonge. (Eny. 4:11) Sho koka tombola Otungi aso ndo kimanyiya anto akina dia vɔ mbôtombola lo mbisha anto Réveillez-vous! wa Ngɔndɔ ka divwa l’osalosalo tshɛ.