Numɛlɔ ka lânde ka Réveillez-vous ! kayotosha anto lo Ngɔndɔ ka dikumi l’ɔtɔi!
1 Anto efula mbokaka ambola wa l’otema ɔtɔi lo kɛnɛ kendana la nɛmɔ dia Bible. Ngande wakoka Bible mbelamɛ Ɔtɛkɛta wa Nzambi, etena kele anto mbakakifunde? Lande na kahombami mbetawɔ dia Bible nɔmbɔlami? Naka dimi mbetsha wenya ami ndo mbidja welo dia mbadia ndo mbeka Bible, wahɔ akɔna wayomokondja? Naa ekadimwelo ka Bible kahombami kamba latɔ? Ɔsɔ ekɔ ambola amɔtshi wayokadimɔma lo numɛlɔ ka lânde ka Réveillez-vous ! wa Ngɔndɔ ka dikumi l’ɔtɔi kayonga l’ɔtɛ a dui ɔnɛ: “Onde wɛ kokaka mbetawɔ Bible?”
2 Tayokombola mbisha anto numɛlɔ ka lânde ka Réveillez-vous ! kɛsɔ lo yɛdikɔ y’efula lo ɛtshi kaso ka nkɛtɛ. Naka kokaka, kete sha lonya lo esambishelo ka lo luudu la luudu la etshumanelo kanyu lo nshi ya samalo tshɛ ya lo Ngɔndɔ ka dikumi l’ɔtɔi. Sha ewotɔ ayɛ, asukanyi ayɛ, asekayɛ wa l’olimu, embetsha ayɛ, asekayɛ wa la kalasa ndo anto watoyotshɔka dia tosala waendelo w’eyoyo numɛlɔ kakɔ ka Réveillez-vous ! Etena katayatshu lo lobingu kana keyɛ lo lɔkɛndɔ, ntshɔka la kɔpi mɔtshi. Dikumanyi wakalɔmbɛ lofulo lokina la lâdiko dia etshumanelo monga l’ekanda k’ɔlɔlɔ ka numɛlɔ kakɔ.
3 Totate mbeka l’anto Bible: Naka wɛ ambotshikɛ onto periodikɛ, kete la ntondo ka wɛ komiya sawo, wɛ koka tshika dui dimɔtshi diayoyokokimanyiya dia wɛ tatɛ mbeka la nde Bible. Ɛnyɛlɔ, wɛ mbeyaka mbuta ɔnɛ: “Mbala kayaye, dimi nangaka ndjokɛnya okadimwelo washa Bible lo dimbola nɛ, ‘Asangoya Nzambi lo dikambo dia nkɛtɛ?’ ” Oma lâsɔ, lo wendelo w’oyoyo yaka la dibuku Bible etshatɔ ndo ɛnya ompokami lɛkɛ 4-5, kana nyɔsɛdingole odingɔ 1-3 wa tshapita 3. Kana wɛ kokaka mbuta ɔnɛ: “Mbala kayaye, dimi nangaka sho ndjɔsɛdingola prɔfɛsiya kɛmɔtshi ka lo Bible kakotshama nshi nyɛ.” Etena kayoyokalola, ɛnya ompokami tshapita 9 ya dibuku diakɔ ndo nyɔsɛdingole kâmɛ odingɔ 1-3. Kana wɛ mbeyaka tsho mbutɛ ompokami ɔnɛ: “Anto efula mɛnaka di’ekɔ wolo shihodia kɛnɛ kadiawɔ lo Bible. Mbala kayaye, dimi nangaka ndjokɛnya woho wakokayɛ shihodia Bible kayɛ dimɛna.” Lo wendelo w’oyoyo, ɔtshiya dibuku Bible etshatɔ, ndo ɛnyande woho wekaso l’anto Bible.
4 Paka Bible keto mbele la “afundelu w’ekila,” wakoka tokimanyiya dia monga ‘la lomba dia kondja panda.’ (2 Tim. 3:15) Ɔnkɔnɛ, sho tshɛ tayokombola mbisha lonya l’ohetoheto tshɛ lo okahanyelo wa numɛlɔ kɛnɛ ka lânde ka Réveillez-vous ! dia kimanyiya anto dia vɔ mbetawɔ Bible!