Ekongelo ka losanganya l’otshimbedi layaye

Ase andja ɔnɛ nangaka tetawoya ɔnɛ dikongɛ nɛ di’akambo diayotshikala pondjo. Koko, Ɔtɛkɛta wa Nzambi hatotɛ ngasɔ. (1 Joa. 2:​15-17) Bible tokimanyiyaka dia sho shihodia ɔnɛ ‘ndjaombɛ diangɔ dia nɛmɔ la nkɛtɛ’ ekɔ anyanya. Dia keketsha ekambi waki Nzambi, ekongelo ka losanganya l’otshimbedi la l’ɔnɔnyi w’olimu 2007 kayɔmbɔla ɔtɛ a dui wata ɔnɛ: ‘Nyoyaombe diangɔ dia nɛmɔ l’olongo.’​—⁠Mat. 6:​19, 20.

Nsaki ka lomombo ekɔ l’atei wa kɛnɛ kata Efeso 2:2 ɔnɛ: “Uwandji a wulu wa lopepe, wa nyuma katukambiaka ana a pami w’uhedia.” Oko wele lɔpɛpɛ lo dihole tshɛ, mbuta ate suke di’onto lihɛnga mbele ndo ‘yimba ya l’andja’ yambokokanɛ lo dikongɛ nɛ. (1 Kor. 2:12) Lam’ele shɛngiya yayɔ yekɔ wolo efula, diakɔ diata Bible ɔnɛ yekɔ “uwandji.” Losanganya l’otshimbedi layaye layotokimanyiya dia mbewɔ nsaki ka lomombo la l’andja ɔnɛ ndo tetemala nama lo yimba kɛnɛ koleki ohomba lo lɔsɛnɔ laso. (Mat. 6:33) Ndo nto, losanganya lɔsɔ layotokimanyiya dia sho ndjaɛkɛ le Jehowa etena kakambaso olimu aso kânga l’atei wa tɔsɛngiya ndo ehemba wahomana laso.

Yashikikɛ dia wɛ ayonga nshi yakɔ hiende ndo dia wɛ ‘ayoleka mbidja yimba’ lo ekongelo kɛsɔ. (Heb. 2:⁠1) Kɔsake nɔtɛ ya tomondo y’awui wayoyokoka ndjokamba la wɔ lo lɔsɛnɔ layɛ ndo lo olimu w’esambishelo. Lo monga lawɔ oma ko etatelo polo l’ekomelo k’ekongelo kɛsɔ ka olelo wa lo nyuma wa dimɛna efula, wɛ ayokeketshama ndo ayokondja wolo wa tetemala ‘ndjaombɛ diangɔ dia nɛmɔ l’olongo!’