Ekongelo ka losanganya la lânde layaye la lushi ɔtɔi
L’ɔkɔngɔ wa vɔ ndodiama la wolo wa nyuma k’ekila, Akristo wa ntondo wakayaketembola dia sambisha lokumu l’ɔlɔlɔ lo yɛdikɔ y’efula. (Etsha 1:8; Kol. 1:23) Losanganya la lânde la lushi ɔtɔi l’ɔnɔnyi w’olimu 2007 lele la ɔtɛ a dui ɔnɛ: “Toyasha tshɛ l’Ɔtɛkɛta wa Nzambi” layotokimanyiya dia sho mbokoya ɛnyɛlɔ kawɔ ka dimɛna efula.—Etsha 18:5.
Etena kakatɛkɛtaka nkumekanga Davidi dikambo di’Ɔtɛkɛta wa Nzambi, nde akate ate: “Aui wa [Jehowa] weli shikaa, watushaka enginya yimba.” (Osam. 19:7) Losanganya la lânde la l’ɔnɔnyi w’olimu 2007 lakalɔngɔswama dimɛna efula lɔsɔ layɛnya ohomba wele la Afundelo ‘dia mbidja akambo l’ɔnɔngɔ’ ndo layotokeketsha dia sho kamba l’Ɔtɛkɛta wa Nzambi dia sambisha ndo mbetsha la shamanya tshɛ. (2 Tim. 3:16, 17) Losanganya lɔsɔ layotɛnya woho wakokaso mbewɔ tolonga ndo ndjakondjiyɛ wahɔ lo kamba la atɔndɔ wa lo Bible lo lɔsɛnɔ laso la lushi la lushi. Lɔ layotokimanyiya nto dia sho kamba l’Ɔtɛkɛta wa Nzambi dia kimanyiya akɛnda ndo eyoyo dia vɔ pama lo nyuma.
Yashikikɛ dia wɛ ayonga lawɔ etena kayotatɛ losanganya ndo koleke mbidja yimba lɔkɔ. Kɔsake nɔtɛ y’awui wayoyokoka ndjokamba la wɔ. Ɛnya lowando lele layɛ lo wetshelo ndo waohwelo walongolaso, ndo kana yimba lo woho wayoyokamba l’awui wakayeke.
Ekongelo ka losanganya laso la lânde la lushi ɔtɔi ayofudia lowando laso l’Ɔtɛkɛta wa Nzambi, ayotohola dia tetemala sambisha lokumu l’ɔlɔlɔ l’ohetoheto ndo ayotɛnya woho wa kimanyiya anto akina dia vɔ sala ngasɔ. Ɔnkɔnɛ, tɔshi yɛdikɔ yaha pandja ɛlɔmbwɛlɔ ndo wetshelo wa lo nyuma watosha Jehowa lo yoho shɔ!—Is. 30:20b, 21.