Ekongelo ka losanganya l’otshimbedi layaye

Jehowa mbakoka tombwama. Ngande watombolaso Jehowa? Ekakatanu akɔna wele la anto amɔtshi dia tombola Jehowa? Naa ɛtshɔkɔ wakondja wanɛ watombola Nzambi kakianɛ? Losanganya l’otshimbedi la lo ɔnɔnyi w’olimu 2008 layotosha ekadimwelo w’amɛna efula lo ambola asɔ. Lɔ layonga l’ɔtɛ a dui ɔnɛ: ‘Totshe akambo tshɛ dia lotombo la Nzambi.’ (1 Kor. 10:31) Tɔsɛdingole kɛnɛ kambowotombɛ lo nshi hiende ya wetshelo wa lo nyuma wa dimɛna efula ɔsɔ.

Omendji wa distrikɛ ayosha asawo anɛ: “Lande na kahombaso mbisha Nzambi lotombo?” ndo “Tonge bɛnyɛlɔ di’ɛlɔlɔ lo kotshaka kɛnɛ katɔlɔmba Nzambi.” Nde ayosha sawo dia lo sɛkɛ diata ɔnɛ: “Waa na watombola Nzambi?” ndo sawo dia komelo diayonga l’ɔtɛ a dui ɔnɛ: “Tekɔ lo tombola kâmɛ Nzambi lo andja w’otondo.” Nde ayɔlɔmbɔla nto Kalasa k’olimu wa teokrasi. Omendji w’otshimbedi ayosha asawo anɛ: “Tɔngɛnɛngɛnɛ dia ngamula lotombo laki Nzambi,” “Todje yimba lo ehomba wa l’otshimbedi,” ndo sawo diele l’ɔtɛ a dui ɔnɛ: “ ‘Toshikikale lo akambo wa mɛtɛ,’ ” sawo diɔsami oma lo 2 Petero 1:12. Ndo nto, tayeya woho wele “Olimu w’ombatshi mboka tombolaka Nzambi.” “Totombolake Nzambi lo awui tshɛ wa lo lɔsɛnɔ laso,” ɔsɔ ayonga sawo dia ntondo dia tenyi nɛi diayotshutshuya anto dia vɔ kana yimba, sawo diakɔ diayɛnya dimɛna dimɛna kitshimudi ya ɛtɛkɛta wakasambiyama wele lo 1 Koreto 10:31. Sawo dia tenyi nɛi diele l’ɔtɛ a dui ɔnɛ: “Tokambe olimu w’ekila dia tombola Jehowa” diayendana l’awui wotshikitanyi w’ɔtɛmwɛlɔ aso. Tayɔngɛnangɛna wekelo wa Tshoto y’Etangelo wa lo hiembola ndo ɔkɛtshanyelo wa divɛsa dia lushi la lushi wayosalema Lushi la lomingu. Ayonga nto diaaso di’anto nongola batismu.

Efula k’anto hawetawɔ ɔnɛ Nzambi ekɔ. Efula kawɔ wamboleka ndjasha lo dikongelo di’anto lo dihole dia kana yimba lo woke woke wa Jehowa. (Joa. 5:44) Koko, sho mbeyaka ohomba wa tshungola etena dia sɛdingola woho wa ‘sala awui tshɛ dia lotombo la Nzambi.’ Kosale tshɛ dia wɛ monga lawɔ ndo ndeka kondja wahɔ oma lo tenyi tshɛ dia losanganya.