Ekongelo ka losanganya l’otshimbedi layaye

Ngande wakokaso tshikala nge la ntondo ka wanɛ walɔsha ɔtɛmwɛlɔ wa mɛtɛ la ngala tshɛ? Ngande wakokaso mbidja wanɛ watɔsɛngiya dia sho kalola l’andja ɔnɛ wa kɔlɔ otshumba? Ekongelo ka losanganya l’otshimbedi la ɔnɔnyi w’olimu 2009 kayosha ekadimwelo w’eshika lo ambola w’ohomba asɔ. Lɔ lekɔ l’ɔtɛ a dui ɔnɛ: ‘Totetemale nɛndja akambo wa kɔlɔ lo tshaka akambo w’ɔlɔlɔ.’ (Romo 12:21) Nyɛsɔ tende asawo amɔtshi wayoshama lo losanganya lɔsɔ.

Omendji wa distrikɛ ayosha asawo anɛ: “Tambokondja wolo wa nɛndja akambo wa kɔlɔ lo tshaka akambo w’ɔlɔlɔ,” “Tewɔ dia ndeka ndjaɛkɛ le so shoamɛ!,” “Akambo wa kɔlɔ tshɛ wayanga komɛ!,” “Tokeketsha mbetawɔ kaso dia mbidja andja ɔnɛ otshumba.” Omendji w’otshimbedi ayosha asawo wayela anɛ: “Ɔnɛ ekɔ etena ka sungukala!” sawo di’ɔsami oma lo Romo 13:11-13, ndo “Tatɔkɔmɔke lo nshi ya pâ,” sawo di’ɔsami oma lo Tukedi 24:10. Tekɔ lo kongɛ nto l’asolo walomɔlomɔ sawo diele l’ɔtɛ a dui ɔnɛ: “Todje yimba lo ehomba wa l’otshimbedi,” diayosha omendji w’otshimbedi. Sawo dikina diayotokeketsha efula ele sawo diele l’ɔtɛ a dui ɔnɛ: “Onde wɛ kokaka ‘ndjasha l’olimu ɔnɛ’ lo kamba oko ombatshi mboka?” Sawo dia ntondo dia lo asawo wa tenyi tenyi diayonga l’ɔtɛ a dui ɔnɛ: “Toshike tanga la ntondo ka totshelo ta mayɛlɛ taki Diabolo.” Diɔ diayotokimanyiya dia sho mbeya ndo ndawɔ totshelo ta mayɛlɛ taki Diabolo lo awui wa tshulatshula, lo tɔkɛnyɔ ndo lo kɛnɛ kendana la kalasa. Sawo dia tenyi tenyi diele l’ɔtɛ a dui ɔnɛ: “Tokondja wolo wa shika tanga lo nshi ya kɔlɔ nyɛ” diayotɛnya woho wakokaso kamba dimɛna dimɛna la dako diakasambiyama diele lo Efeso 6:10-18.

Dia mbidja Satana lele kiɔkɔ y’akambo wa kɔlɔ otshumba, sho pombaka sambishaka losango la Diolelo. (Eny. 12:17) Bu dui dia diambo dia sho mboka dia Satana ekɔ lo tetemala ndɔsha Ɛmɛnyi wa Jehowa la wolo tshɛ! (Is. 43:10, 12) Koko Satana ayokita tatala nɛ dia tamboyashikikɛ dia ‘tetemala nɛndja akambo wa kɔlɔ lo tshaka akambo w’ɔlɔlɔ.’ Kosale tshɛ dia wɛ monga lawɔ ndo ndeka kondja wahɔ oma lo tenyi tshɛ dia losanganya.