Toyele ɛnyɛlɔ kakatotshikɛ Yeso
1. Ɛnyɛlɔ kakɔna kakatotshikɛ Yeso?
1 Etena kashaso lonya l’olimu wa mbetɛ anto ambeki, sho pombaka mbohɔka dia ɛnyɛlɔ kaso kokaka monga la shɛngiya ya wolo le wanɛ watenda. Yeso aketshaka oma lo ɛtɛkɛta ndo oma lo etsha. Wanɛ wakawendaka wakakoke mɛna ohetoheto waki lande, woho wakandokaka anto ngandji, nsaki kaki lande ka kidia lokombo laki She, ndo yɛdikɔ yakandɔshi ya sala lolango laki She.—1 Pet. 2:21.
2. Lo toho takɔna takoka ɛnyɛlɔ kaso monga la shɛngiya le wanɛ wasambisha kâmɛ la so?
2 Etena keso l’esambishelo ka lo luudu la luudu: Oko wakidiɔ lo dikambo dia Yeso, ɛnyɛlɔ kaso kekɔ la shɛngiya ya wolo le wanɛ wasambisha kâmɛ la so. Etena kɛna apandjudi w’eyoyo ndo wanɛ wahataleke mpokɔ akambo dia tekɔ lo ndjasha l’olimu w’esambishelo l’ohetoheto tshɛ, dui sɔ diayowakimanyiya dia vɔ kana yimba dikambo dia woho washawɔ lonya l’olimu w’esambishelo. Etena kɛnawɔ ɔngɛnɔngɛnɔ wele la so ndo woho wayashaso le anto akina l’otema ɔtɔi, dui sɔ mbaoholaka ohomba wa kɛnɛmɔla waonga asɔ l’olimu awɔ w’esambishelo. Etena kɛnawɔ etete kele la so lo okambelo wa la Afundelo, lo sala waendelo w’eyoyo, ndo lo nɔmbɔla wekelo wa Bible, vɔ wayotshutshuyama dia sala woho akɔ wâmɛ.
3. Ngande wakoka ɛnyɛlɔ kaso mbetsha ambeki aso, ndo akokawɔ mbeka?
3 Etena kalɔmbɔlaso wekelo wa Bible: Ambeki aso wa Bible sɛdingolaka djekoleko lɔkɛwɔ laso. Ɛnyɛlɔ, kânga mbakokaso mbaɛnya ohomba wa nɔngɔsɔlaka wekelo, mbadiaka avɛsa woshilami, ndo mbekɛka eshidi l’akambo woleki ohomba, vɔ mendaka dia kana sho lawɔ takalɔngɔsɔdi. (Romo 2:21) Naka sho nɛnyaka lushi ndo wonya wakatokana dia mbeka la wɔ, kete vɔ hawotetawɔ dia elimu ekina mbashimba diaha vɔ mbeka. Aha la tâmu, vɔ wayɛna nto woho weso suke dia ndjahombia dikambo dia esambishelo kâmɛ ndo mbetawɔ kaso ka wolo. Diakɔ diele, tena efula anto weka Bible la wanɛ wayela ɛnyɛlɔ kaki Yeso dimɛna dimɛna ndjokomaka esambisha w’ohetoheto ndo wakondja etombelo w’ɛlɔlɔ.
4. Wetshelo akɔna washaso oma lo ɛnyɛlɔ kaso etena kɔtɔso lo nsanganya ya l’etshumanelo?
4 Etena kɔtɔso lo nsanganya ya l’etshumanelo: Anto tshɛ wakenga etshumanelo k’Akristo wekɔ l’ɔkɛndɛ wa mbetsha oma l’ɛnyɛlɔ kawɔ lo nsanganya ya l’etshumanelo. Anto wɛnya nsaki watatɛ mbɔtɔ lo nsanganya kondjaka wahɔ oma lo ɛnyɛlɔ k’ɔlɔlɔ kɛnawɔ l’etshumanelo. Vɔ wayɛna nkumbo kaso k’anto l’ɔnango kahɛtahɛta, kâmɛ k’Akristo, ndo ɔlɔtɔ la ɔlɔngɔswɛlɔ wa divo wa dimɛna. (Osam. 133:1) Vɔ wayɛna nto ɛnyɛlɔ kaso ka woho wɔtɔso lo nsanganya ya l’etshumanelo la kɔlamelo tshɛ ndo woho wasalaso etelo ka lo sɛkɛ ka mbetawɔ kaso lɔkɔ. Onto ɔmɔtshi lakaye lo losanganya laso lɔmɔtshi akɛnyi woho waki yana mɔtshi ya yimato la akoka wa tana divɛsa diakashama esadi eto lo Bible kande ndo woho wakandayelaka wadielo la yambalo tshɛ. Ɛnyɛlɔ kaki yana ya dikɛnda shɔ akôtshutshuya dia nde nɔmba dia onto ɔmɔtshi mbeka la nde Bible.
5. Lande na kahatahombe mɔnyɔla ohomba wele la ɛnyɛlɔ kaso?
5 Afundelo tokeketshaka dia sho mbokoya bɛnyɛlɔ di’ɛlɔlɔ di’asekaso akina. (Fil. 3:17; Heb. 13:7) Ɔnkɔnɛ, sho pombaka mbohɔka dia naka sho ndjela ɛnyɛlɔ kakatotshikɛ Yeso dimɛna dimɛna, kete anto akina wayɛna kɛnɛ kasalaso ndo dikambo sɔ kokaka monga la shɛngiya y’ɔlɔlɔ le wɔ. Oko weyaso dikambo sɔ, nyɛsɔ toyelake ɛtɛkɛta wele lo 1 Timote 4:16 wata ɔnɛ: “Uyalamaki, ulamaki ndu wetshelu aye.”