Yɛdikɔ yakɔsama dikambo di’ekambi waki Nzambi
1. Yɛdikɔ yakɔna y’oyoyo yakatatɛ mbɔsama lo 1938 ndo l’oyango akɔna?
1 Lo 1938, okongamelo wa Jehowa akɔshi yɛdikɔ mɔtshi y’oyoyo. Elui wa tshumanelo wakelamɛka dia mbɔtɔ lo nsanganya ya zɔnɛ, yelamɛ ɛlɔ kɛnɛ ɔnɛ nsanganya y’etshimbedi. L’oyango akɔna? Numɛlɔ ka Ngɔndɔ ka ntondo 1939 ka Informateur, (okanda welamɛ ɛlɔ kɛnɛ ɔnɛ Olimu aso wa Diolelo) kadimolaka ɔnɛ: “Nsanganya shɔ yekɔ etenyi kɛmɔtshi k’okongamelo wa teokrasi waki Jehowa kɛnya woho wahomba kambema olimu wa Diolelo. Wetshelo wakashama lo nsanganya shɔ wekɔ ohomba le onto tshɛ dia nde nkamba dimɛna olimu wakawatosha.” Etena kasɛdingolaso ohamelo w’apandjudi wa Diolelo waki paka 58 000 lo 1938 ko nkoma polo lo 7 000 000 lo 2009, sho mɛnaka hwe dia nsanganya y’etshimbedi yekɔ lo nkotsha oyango ayɔ wa nkimanyiya ekambi waki Nzambi dia vɔ “nkamba olimu wakawalongola.”
2. Naa asawo amɔtshi wayoshama lo Losanganya l’otshimbedi l’ɔnɔnyi w’olimu w’oyoyo?
2 Ɔtɛ a dui wa Losanganya l’otshimbedi l’ɔnɔnyi wayaye: Têkɔ lo nongamɛ losanganya lɔsɔ layotatɛ Ngɔndɔ ka divwa ndo awui wakeketsha wayoshama lɔkɔ. Ɔtɛ a dui wata ɔnɛ: ‘Nyu kema wa l’andja ɔnɛ’ mbɔsama oma lo Joani 15:19. Naa asawo amɔtshi wayoshama wayonga mɛtɛ la wâhɔ le ekambi waki Nzambi na? Lushi la samalo, tayoka sawo diayonga l’ɔtɛ a dui ɔnɛ: “Ngande watokokɛ olimu wa lo tena tshɛ?” Tayɔngɛnangɛna nto sawo dia tenyi sato diayonga l’ɔtɛ a dui ɔnɛ: “Tatodjamake mindo oma le . . .” ‘Nyama ka ngala’ ‘Womoto kanga loseka l’efula’ ndo oma le “Ambetshetshi w’ekanda.” Lushi la lomingu, tayoka sawo dia tenyi tenyi diayonga l’ɔtɛ a dui ɔnɛ: ‘Tolange Jehowa, koko aha andja ɔnɛ.’ Asawo akina wayoshama lo losanganya lɔsɔ vɔanɛ: “Totetemale ‘monga oko angɛndangɛnda ndo ambetshi a mboka’” ndo “Nyoyale la dihonga! Nyu kokaka mbidja andja ɔnɛ otshumba.”
3. Naa wahɔ wayotokondja naka sho mbɔtɔ lo Losanganya l’otshimbedi lakongɛso?
3 L’ɔkɔngɔ wa nde mbɔtɔ lo Losanganya l’otshimbedi leke kasalema, kadiyɛso kɛmɔtshi kakashisha ohetoheto ande l’olimu w’esambishelo akafunde dia ekongelo ka losanganya lɔsɔ kakotshutshuya dia nde nyomɔsɛdingola awui wa lo lɔsɛnɔ lande ndo ndjashikikɛ dia “ndjasha tshɛ lo tshɛ l’olimu wa Jehowa ndo ntshika dia mbishaka tɛkɛ nɛndɛ.” Aha la tâmu, ekongelo ka Losanganya l’otshimbedi ka l’ɔnɔnyi w’olimu w’oyoyo kayotokimanyiya sho tshɛ dia mboka Jehowa ngandji, koko aha andja ɔnɛ. (1 Joa. 2:15-17) Toyashikikɛ dia tanema lo losanganya lɔsɔ ndo mpokamɛ la yambalo tshɛ dia sho nkondja wahɔ oma lo yɛdikɔ yoludi la ngandji yakɔsama dikambo di’ekambi waki Nzambi!