Onga la mbekelo ka komaka la wonya
1. Naa ɛnyɛlɔ katosha Jehowa lo kɛnɛ kendana la nsala akambo la wonya?
1 Jehowa okosalaka akambo tena tshɛ la wonya. Ɛnyɛlɔ, nde mbishaka ekambi ande ‘ekimanyielo l’etena kahombama.’ (Hɛb. 4:16) Nde toshaka nto “mbo ya ndɛ [ya lo nyuma] l’etena kahombama.” (Mat. 24:45) Diakɔ diele, sho koka monga l’eshikikelo k’ɔnɛ lushi la nkɛlɛ kande “ha[lo]tshimbatshimba.” (Hab. 2:3) Wahɔ akɔna wakondjaso lo woho wasala Jehowa akambo la wonya? (Osam. 70:5) Lam’ele tekɔ anto wele keema kokele ndo tekɔ l’akambo efula wa nsala, nkoma la wonya koka monga tshondo y’okakatanu. Lande na kahombaso monga la mbekelo ka komaka la wonya?
2. Lande na kele komaka la wonya mbishaka Jehowa lotombo?
2 Nkoma la wonya aya tshondo y’okakatanu lo nshi y’ekomelo nyɛ yoyaalanga anto ndo yayawɔ bu la ndjakimɛ. (2 Tim. 3:1-3) Ɔnkɔnɛ, etena kakoma Akristo l’olimu, lo waa randevu, lo nsanganya la wonya, dui sɔ mongaka la shɛngiya le anto akina ndo mbishaka Jehowa lotombo. (1 Pet. 2:12) Onde sho tatɛka elimu wa lo demba mbala efula la wonya, koko komaka l’ɔkɔngɔ lo nsanganya y’Akristo? Komaka la wonya lo nsanganya y’Akristo, kɛdikɛdi tanema l’osambo ndo lo dɔmbɛlɔ dia ndjihwelo, ndo dui sɔ mɛnyaka dia tekɔ la nsaki ka mbokoya Shɛso lele l’olongo lasala akambo aha l’ofukutanu.—1 Kɔr. 14:33, 40.
3. Lande na kele komaka la wonya mɛnyaka dia sho nɛmiyaka anto akina?
3 Komaka la wonya mɛnyaka nto dia sho nɛmiyaka anto akina. (Flpɛ. 2:3, 4) Ɛnyɛlɔ, naka sho komaka la wonya lo nsanganya y’Akristo ndo lo nsanganya y’otsha l’esambishelo, kete hatotofukutanya asekaso atɛmɔdi. Lo wedi okina, naka taya la mbekelo ka komaka l’ɔkɔngɔ, kete dui sɔ diayɛnya anto akina dia sho mbɔsaka wenya aso la nɛmɔ diamboleka ndeka wenya awɔ. Nkoma la wonya mɛnyaka dia tekɔ anto wakokawɔ mbɛkɛ otema, wele l’etete ndo la kɔlamelo, nɛ dia waonga asɔ mandɔmaka oma le anto wotodingi.
4. Naka sho komaka mbala efula l’ɔkɔngɔ, kakɔna kakoka tokimanyiya dia nsala etshikitanu?
4 Naka wɛ komaka mbala efula l’ɔkɔngɔ, kete yanga dia mbeya awui wakokonya lo dui sɔ. Yalɔngɔsɔla dia nsala ekongelo ka dimɛna kayokokimanyiya dia nkotsha ɛkɛndɛ ayɛ la wonya. (Und. 3:1; Flpɛ. 1:10) Lɔmba Jehowa ekimanyielo. (1 Jni. 5:14) Komaka la wonya ekɔ yoho mɔtshi yɛnyaso lowando laso lo ɛlɛmbɛ ehende woleki weke ɛnɛ: Nanga Nzambi ndo nanga wonyaso onto.—Mat. 22:37-39.