Tɔ̂sake Luudu la Nzambi la Nɛmɔ
1 Lo nshi yakafundamaka Bible, Jehowa akadjangɛ anto ande dia vɔ sanganaka tena la tena lo luudu lande. (Lew. 23:2) Sanganya shɔ yakakimanyiyaka ase Isariyɛlɛ di’aha vɔ mbohɛ Dui dia Nzambi ndo yakawashaka diaaso dia vɔ kana lomba, ndjâla kâmɛ ndo sɛdingola Ɛlɛmbɛ wa Jehowa. Ɔsɔku mbakawalodiaka tomba tawɔ la tokanyi ta Nzambi, dui diakawashaka ɛlɔlɔ wa lo nyuma. Sanganya shɔ yaki tena di’ɔngɛnɔngɛnɔ efula. Yɔ yakashaka diaaso dia kâmɛ la ɔtɛmwɛlɔ wa mɛtɛ ndjâla. Ekɔ ohomba efula ɛlɔ kɛnɛ dia sanganaka lo luudu la Nzambi.
2 Woho Akɔna Wayotɛnya ɔnɛ Sho Mbeyaka Ohomba wa Sanganya Na? Lo tshumanelo dimɔtshi, lofulo l’anto waya lo sanganya lekɔ yema tshitshɛ. Mɛtɛ, sho mbeyaka pomba diaaso dia ntshɔ lo losanganya, ko onde sho mbetshaka sanganya tena la tena l’ɔkɔkɔ wa tokambokambo ta totshitshɛ oka? Tena dimɔtshi, anto amɔtshi mɛnaka dimɛna dia tshikala la wakawɔ nɛ dia wekɔ lo mboka yema pâ l’ɔtɛ kana wambɔlɛmba oma l’olimu wakawakambi lushi l’otondo. Akina fɔnyaka dia vɔ pombaka nongola ambutshi wele kema ambetawudi wayoya dia ndjowaenda. Akina mendjolaka sanganya mɔtshi l’ɔtɛ wa akambo amɔtshi watama lo televiziɔ walekawɔ nanga kana tɔkɛnyɔ tɔmɔtshi. Mɛtɛ tekɔ etale la saki kakɛnya ana wa Kɔra l’otema ɔtɔi ɔnɛ: “[Anima ami, NW] latukumbulaka ndjala lu seke di’etemwelo ka [Jehowa, NW] edja ndu dimba diambukita balakata.”—Usam. 84:2.
3 Mɛtɛ, sho kondjaka mbo ya ndɛ ya lo nyuma efula lo sanganya; kânga mbediɔ ɔsɔku, ampokami amɔtshi mbokaka wolo dia pokɛ lotui ɔlɔlɔ. Amɔtshi tekolaka lomba l’awui akina, wayakiyanya l’akambo wa lushi longo, amɔtshi nyingɔnyingɔka ndo djɔ. Efula mɛnaka di’ekɔ ohomba funda towuiwui tɔmɔtshi di’aha vɔ ndala ndo dia vɔ ndjasha lo kɛnɛ katama. Ndo nto, ngasɔ mbayowokoka kimɛ kɛnɛ katama lo yimba. Lo wedi okina, naka sho ndjalɔngɔsɔla dimɛna, kete tayoleka kondja ɛlɔlɔ w’oma lo sanganya ndo tayokoka “nyomoleka mbidja yambalo lo yoho ya lânde” lo kɛnɛ ketshama.—Heb. 2:1, NW.
4 Ana wekɔ l’ohomba wa ndjela wetshelo washama lo sanganya oko epalanga. Naka ambutshi mbashaka diangɔ dia vɔ kɛnyaka ladiɔ kana abuku wele l’asango w’alangi dia vɔ mendaka ndo dia mbaɔladia, kete ana hawoteka ndoko ɛngɔ ka dikayi lo wonya wa sanganya. Tshika ana dia vɔ kɛnyaka, tɛkɛtaka kana salaka awui akina wafutanya ampokami mɛnyamaka dia hanyahokola. Ana hawotoleka tombatomba otsha lo komba kana la tɔnɔ ashi naka vɔ mbeyaka ɔnɛ shɛwɔ kana nyangɛwɔ ayowatshindɛka tena tshɛ.
5 Ohomba wa Komaka la Wonya: Tena la tena, akambo amɔtshi mbeyaka tokomɛ wahatakanyisha ko ndjotokonya l’ɔkɔngɔ lo losanganya. Koko mbekelo ka komaka l’ɔkɔngɔ ndo ka ndjâka l’ɔkɔngɔ w’osambu la dɔmbɛlɔ mɛnyaka dia hatɔlɛmiya ekila ka sanganya ndo hatɔshi anto akina la nɛmɔ. Tohɔke dia osambu la alɔmbɛlɔ wasalema kâmɛ l’anangɛso wekɔ etenyi kɛmɔtshi k’ɔtɛmwɛlɔ aso. Okomelo wa l’ɔkɔngɔ nshi tshɛ ndjaka tena efula oma lo ekongelo ka kɔlɔ. Onto lakoma la wonya mɛnyaka dia nde mbɔsaka sanganya la nɛmɔ ndo mbeyaka ohomba ayɔ.
6 Lam’ayasukana lushi la Jehowa, sho ndekaka monga l’ohomba wa sanganaka. (Heb. 10:24, 25) Tɔ̂shi sanganya la nɛmɔ lo mbɔtɔka tena la tena lɔkɔ, lo ndjalɔngɔsɔlaka, lo komaka esadi lo pokɛka lotui dimɛna, ndo lo kambaka la kɛnɛ kekaso.