Esambo w’eyoyo dikambo di’ɔtɛmwɛlɔ!
1 Atete edja, losanganya la l’ɔnɔnyi la Watch Tower Bible and Tract Society of Pennsylvania lakasalema lo Ngɔndɔ ka dikumi 4, 2014, yɛdikɔ yakɔsama dia mvusola dibuku diaso di’esambo dia nshi nyɛ. Ɔsɔ aki mɛtɛ losango l’ɔngɛnɔngɛnɔ. Wakohola anto tshɛ waki lo losanganya lɔsɔ dihole di’ohomba diele la esambo aso wa Diolelo l’ɔtɛmwɛlɔ aso.—Osam. 96:2.
2 Wɛ koka ndjambola ɔnɛ: ‘Naa ohomba wa mvusola dibuku di’esambo?’ Ekɔ ɛkɔkɔ efula wambokonya dia dui sɔ salema. Ntondotondo, eokelo kaso k’Afundelo kekɔ lo tatetemala ndowanyema ndo dui sɔ koka monga la shɛngiya lo tɔtɛkɛta tele l’esambo aso. (Tuk. 4:18) Ɔkɔkɔ okina wambosalema omvuswelo ele: Tɔtɛkɛta ndo ɛnɔngɔ efula wakakambe la wɔ lo dibuku diaso di’esambo dia nshi nyɛ, wakɔsama oma lo Bible ekadimwelo k’andja w’oyoyo k’edjedja. Tɔtɛkɛta tɔsɔ pombaka tshikitanyema dia tɔ mbɔtɔnɛ la tɔtɛkɛta tele lo Bible ka l’Angɛlɛ kambovuswama. Lam’ele olimu w’efula pombaka kambema dia mbidja tɔtɛkɛta t’eyoyo, yɛdikɔ yakɔsama ya nkotsha esambo ekina w’eyoyo lo dibuku di’esambo.
3 Onde sho pombaka nkonga polo etena kayotondjama dibuku di’esambo di’oyoyo dia sho ndjotatɛ nkamba l’esambo w’eyoyo? Keema. Tekɔ l’ɔngɛngɛnɔ wa nyewoya dia l’ɔkɔngɔ wa ngɔndɔ efula, esambo w’eyoyo efula wayodjama lo sitɛ kaso k’Ɛtɛrnɛtɛ ka jw.org. Etena kayotondjama osambo ɔmɔtshi w’oyoyo, tayofundaka l’ekomelo k’ekongelo ka Losanganya l’olimu ɔnɛ “osambo w’oyoyo.”
4 Woho wa mbeka esambo w’eyoyo: Mbeyaka monga tshondo y’okakatanu dia mbeka osambo w’oyoyo. Koko, l’ɛnyɛlɔ k’omembi w’esambo, sho kombolaka memba etena keso lo nsanganya ya l’etshumanelo ndo “aha ntshikala ki.” (Osam. 30:12) Yela wanya anɛ dia mbeka osambo w’oyoyo.
• Hokamɛ mbala la mbala mishiki w’osambo wakadjama l’eshinga, wakadjama lo sitɛ kaso k’Ɛtɛrnɛtɛ. Etena kayoyotalekaka mpokamɛ mishiki akɔ mbayoyotalekaka mbolembetɛ.
• Eka tɔtɛkɛta ta lɔkɔ ndo nsala la wolo dia tikimɛ.
• Teembaka oma lo dibuku diayɛ kaamɛ la mishiki wakadjama l’eshinga. Sala ngasɔ polo lam’ayoyolembetɛ osambo akɔ.
• Kɔsake yema ya wenya dia mbohola esambo w’eyoyo etena kasalanyu Ɔtɛmwɛlɔ anyu wa lo nkumbo polo lam’ayoweya ase nkumbo kayɛ.
5 Lo ngɔndɔ yayaye naka osambo w’oyoyo wambonga l’ekomelo k’ekongelo ka Losanganya l’olimu, kete ase etshumanelo wayohokamɛ mishiki wakadjama l’eshinga mbala ɔtɔi. Oma laasɔ, ampokami wayemba osambo akɔ lo ndjela mishiki wakadjama l’eshinga oko watotosalaka l’esambo ekina.
6 Etena kakanayɛ yimba lo dikambo sɔ, wɛ shihodiaka dia memba lo nsanganya yaso toshaka ɔngɛnɔngɛnɔ waya lo sanganya awui kaamɛ dia ntombola Jehowa. Diakɔ diele, tatongake la mbekelo ka tombaka otombatomba etena katatɛ osambo membama lo nsanganya y’Akristo.
7 Tekɔ nto la yoho kina yakokaso mɛnya lowando laso lo mishiki aso w’ekila. Lo nsanganya ya weke, vɔ mbidjaka mishiki la ntondo ka ekongelo tshɛ ntatɛ. Mbala hiende l’ɔnɔnyi, anangɛso ndo akadiyɛso w’oma l’atshuku anɛi wa nkɛtɛ wakayakimɔ la lolango, mindaka nkɛndɔ yayafutɛwɔ vɔamɛ falanga otsha la Patterson, New York, l’oyango wa totondja mishiki wa dimɛna efula dia sho kambaka la wɔ l’ɔtɛmwɛlɔ aso. Diakɔ diele, etena katɔlɔmba ɔnɔmbɔdi dia mbidjasɛ ko mpokamɛ mishiki wakalɔngɔswama, sho pombaka nsala dui sɔ. Naka sho nsala ngasɔ, kete dui sɔ diayotokimanyiya dia nɔngɔsɔla etema aso dia mpokamɛ ekongelo kayela.—Ez. 7:10.
8 Tayokomiya losanganya laso l’ɛlɔ la osambo ɔmɔtshi w’oyoyo wele l’ɔtɛ a dui ɔnɛ: “Diolelo diekɔ lo mbolɛ—Diɔ diaye!” Osambo ɔsɔ wakatondjama lo losanganya la l’ɔnɔnyi leke kasalema, wakalɔngɔswama djekoleko dikambo dia ɔnɔnyi wa 100 wambotɔ Diolelo.
9 Esambo w’eyoyo ɛsɔ wekɔ mɛtɛ “akambo w’ɛlɔlɔ” w’oma le Jehowa. (Mat. 12:35a) Ɔnkɔnɛ, nyɛsɔ tɔshi yɛdikɔ ya mbeka esambo w’eyoyo ɛsɔ ndo membaka l’otema ɔtɔi, dia mbisha Nzambi kaso lotombo ndo kɛnɛmɔ kahombama!—Osam. 147:1.