Alako wa shikaa wendana la nsanganya y’otsha l’esambishelo

L’ɛnyɛlɔ ka nsanganya tshɛ ya l’etshumanelo, nsanganya y’otsha l’esambishelo yekɔ woshasha w’oma le Jehowa watokimanyiya dia sho tshutshuyana lo ngandji ndo l’etsha w’ɛlɔlɔ. (Hɛb 10:24, 25) Nsanganya shɔ pombaka salema l’edja ka minitɛ tshanu kana esambele, mbidja ndo nkahanya anto, mbisha anto bɛtshi dia nkɛtɛ ndo dɔmbɛlɔ. (Naka anto waki oma lo losanganya lokina, kete losanganya lɔsɔ pombaka ndeka susama.) Ɔnɔmbɔdi pombaka nɔngɔsɔla dui dimɔtshi shikaa dia nkimanyiya wanɛ watatshu otsha l’esambishelo dia nkamba la diɔ lushi longo. Ɛnyɛlɔ, Lushi la samalo naka apandjudi efula kosambisha lo wikɛndɛ wetshi, kete ondo ayoleka dimɛna kɛtshanya dui diakokaso totɛ ompokami. Naa ɛtɛ w’awui ɛmɔtshi ondo wayonga ohomba nkɛtshanya?

• Ɛnyɛlɔ kɛmɔtshi ka sawo di’oma lo Dikatshi dia losanganya la lɔsɛnɔ ndo olimu aso w’Okristo

• Woho wa nkamba la dui dimɔtshi dieke ka ntomba kana nsango mɔtshi yeke ka mbeta dia ntatshiya sawo

• Woho wa mbisha ekadimwelo lo dui dimɔtshi dialeka mpomana laso

• Woho wa nkadimola onto lata ɔnɛ Nzambi bu, ɔnɛ letawɔ wetshelo w’ohilwelo, onto latɛkɛta ɔtɛkɛta okina kana onto ɔmɔtshi lele l’ɔtɛmwɛlɔ wahaleke mbeyama l’ɛtshi kanyu ka nkɛtɛ

• Woho wa nkamba la diangɔ diele lo sitɛ ka jw.org, diele lo aplikasiɔ wa JW Library^®, kana Bible

• Woho wa nkamba la ehomɔ kɛmɔtshi k’oma lo Dihomɔ dia mbetsha

• Woho wa ndjasha lo yoho y’esambishelo mɔtshi shikaa, ɛnyɛlɔ esambishelo ka lo telefɔnɛ, ka lo mikanda, ka lo sɛkɛ, woho wa nsala waendelo w’eyoyo kana woho wa nɔmbɔla wekelo wa Bible

• Mbohola awui wendana la mbewɔ waale, woho wa ndjaɔtɔnganyiya, woho wa monga la mbekelo y’amɛna, woho wa monga l’ekanelo ka yimba ka dimɛna kana awui wele oko wa ngasɔ

• Wekelo ɔmɔtshi kana vidɛo mɔtshi y’oma lo biukubuku Yasha lo wadielo ndo lo wetshelo

• Woho wa nkeketsha ndo nkimanyiya onto latakotshindɛ l’esambishelo

• Divɛsa dimɔtshi di’ɔtɔnɛ l’esambishelo kana dui dimɔtshi diakeketsha diakahomana la nyu l’esambishelo