Kamba oko ombatshi mboka

Sho kambaka la wolo aso dimɛna etena kayadjɛso eyango wa lo nyuma. (1Kɔ 9:26) Eyango tokimanyiyaka dia nkamba la wenya aso wambotshikala la ntondo k’ekomelo ka dikongɛ nɛ di’akambo lo yoho yoleki dimɛna. (Ɛf 5:15, 16) L’ɔtɛmwɛlɔ anyu wa lo nkumbo, lande na kahanyayadjɛ eyango l’ɔnɔnyi w’olimu w’oyoyo? Dia nyokimanyiya, dikatshi nɛ diekɔ l’asawo wendana l’eyango efula wakokanyu nkana la wɔ yimba lo dɔmbɛlɔ.​—Jak 1:5.

Ɛnyɛlɔ, la ekimanyielo k’ose nkumbo tshɛ, onde hanyokoke menda kana ɔmɔtshi l’atei anyu koka nkoma ombatshi mboka wa pondjo? Naka wɛ bu l’eshikikelo dia wɛ ayonga l’akoka wa nkotsha wenya walɔmbama, kete sawola l’ambatshi mboka amɔtshi wele l’ekakatanu wele oko wayɛ. (Tok 15:22) Ondo wɛ mbeyaka nkɔnya ombatshi mboka ɔmɔtshi l’ɔtɛmwɛlɔ anyu wa lo nkumbo. Oma laasɔ, naka kokaka, nsala dikongelo diotshikitanyi diakoka nkamba la yɛ. Naka wɛ aki ombatshi mboka lo nshi y’edjedja, sɛdingola awui wele layɛ kana wayokosha diaaso dia wɛ nyomonga ombatshi mboka l’etena kɛnɛ.

Onde anto amɔtshi wa lo nkumbo kayɛ hawokoke nkamba oko ambatshi mboka wa tshanda l’edja ka ngɔndɔ ɔtɔi kana efula? Naka wɛ bu la wolo wa demba, wɛ mbeyaka nkamba oko ombatshi mboka wa tshanda lo mbetshaka wenya yema tshitshɛ lushi tshɛ l’esambishelo. Naka wɛ bu la wenya efula wa tombaka w’esambishelo l’atei wa lomingu l’ɔtɛ w’olimu efula wakambayɛ kana l’ɔtɛ watshɔyɛ la kalasa, ondo wɛ koka nsɔna ngɔndɔ ɔtɔi kele la lushi la fɛtɛ kana kele la wikɛndɛ etanu. Lo alamanaka ayɛ, funda etena kakombolayɛ nkamba oko ombatshi mboka wa tshanda ndo nsala ekongelo.​—Tok 21:5.

NYENDE VIDƐO YELE L’ƆTƐ A DUI ƆNƐ: ONGA LA DIHONGA WƐ . . . OMBATSHI MBOKA NDO OMA LAASƆ, NYOKADIMOLE LO DIMBOLA NƐ:

• Kakɔna katetsha kɛnɛ kakakomɛ kadiyɛso Aamand lo kɛnɛ kendana la woho wakokɛ Jehowa la ngandji tshɛ wanɛ wayahondja dia nkoma ambatshi mboka?