Wɛ koka mbisha lonya l’ɔngɛnɔngɛnɔ wa lo nkumbo kanyu

Jehowa nangaka dia nkumbo monga l’ɔngɛnɔngɛnɔ (Os 127:3-5; Ond 9:9; 11:9) Koko, sho koka nshisha ɔngɛnɔngɛnɔ aso l’ɔtɛ w’ekiyanu wa l’andja ɔnɛ ndo wa munga y’ase nkumbo kaso. Kakɔna kakoka nsala ose nkumbo tshɛ dia ɔngɛnɔngɛnɔ monga?

Omi pombaka mbisha wadɛnde kɛnɛmɔ. (1Pe 3:7) Nde pombaka mbetshaka wenya kaamɛ lande, nde pombaka monga la wɛdimo l’awui walongamɛnde oma lende ndo mɛnyaka lowando lo kɛnɛ kosalɛnde ndo kasalɛnde nkumbo. (Kɔl 3:15) Nde mbɛnyaka ngandji kande ndo mbotombolaka.​—Tok 31:28, 31.

Wadi nyangaka toho ta nsukɛ omɛnde. (Tok 31:12) Nde ndjakitshakitshaka l’ɛse k’omɛnde ndo kambaka kaamɛ lande. (Kɔl 3:18) Nde sawolaka lande dimɛna ndo tɛkɛtaka dimɛna dikambo diande.​—Tok 31:26.

Ambutshi mbetshaka wenya kaamɛ l’ana. (Eoh 6:6, 7) Vɔ mbitɛka ana awɔ dia vɔ mbalangaka. (Mat 3:17) Etena kawangolawɔ, vɔ mɛnyaka ngandji ndo shɛnɔdi.​—Ɛf 6:4.

Ana nɛmiyaka ndo kitanyiyaka ambutshi awɔ. (Tok 23:22) Vɔ mbitɛka ambtushi awɔ tokanyi tawɔ ndo nsaki yawɔ. Vɔ mbetawɔka wongwelo w’oma le ambutshi awɔ ndo vɔ mbalɛmiyaka.​—Tok 19:20.

NYENDE VIDƐO YELE L’ƆTƐ A DUI ƆNƐ: NYONGE L’ƆNGƐNƆNGƐNƆ LO NKUMBO KANYU, NDO OMA LAASƆ, NYOKADIMOLE LO DIMBOLA NƐ:

Kakɔna kasala ose nkumbo tshɛ dia nkumbo monga l’ɔngɛnɔngɛnɔ?