Wɛ koka nshika tanga la ntondo ka nsaki ya kɔlɔ

1. Naa dui dialɔshana la so sho tshɛ?

ONDE wɛ ambongaka la nsaki ka wolo ka nsala kɛnɛ katona Jehowa? Naka ngasɔ, kete tɔfɔnyake dia wɛ ambohomana l’ohemba wa woke wahatahomanaka l’anto akina. Bible mbutaka ɔnɛ: “Ndooko ohemba wambonyokomɛ wahatakomɛka anto akina.” (1 Kɔr. 10:13) Kɛsɔ nangaka nembetshiya dia oyadi nsaki kakɔna tshɛ ka kɔlɔ kalɔshana la yɛ, anto akina wekɔ lo ndɔshana la tɔ. Wɛ bu wɛmɛ, ndo l’ekimanyielo ka Jehowa, wɛ koka mbidja otshumba.

2. Ehemba akɔna wahomana l’Akristo amɔtshi ndo ambeki wa Bible? (Enda ndo esato.)

² Bible mbutaka nto ɔnɛ: “Onto l’onto pembamaka etena ketawɔnde kotwama ndo kesama la nsaki kande hita.” (Jak. 1:14) Sho pembamaka lo toho totshikitanyi. Ɛnyɛlɔ, Akristo amɔtshi koka pembama dia ndjasha l’awui wa mindo wa dieyanelo wa lam’asa pami la womoto ndo akina koka pembama dia nsala awui wa mindo wa dieyanelo wa lam’asa pami la pami kana womoto la womoto. Wanɛ wakatshike menda esato wɛnyawɔ anto etakataka koka pembama dia kalolɛ mbekelo kakɔ nto. Wanɛ wakatshike nnɔ didjoyadjoya kana wanu koka pembama dia kalolɛ mbekelo yakɔ nto. Ɔsɔ ekɔ ehemba ɛmɔtshi wahomana l’Akristo amɔtshi ndo ambeki wa Bible. L’etena kɛmɔtshi, sho tshɛ takayaoke oko wakayaoke ɔpɔstɔlɔ Pɔɔlɔ lakafunde ate: “Lam’akombolami nsala kɛnɛ kele ɔlɔlɔ, kɛnɛ kele kɔlɔ kekɔ le mi.”—Rɔmɔ 7:21.

3. Shɛngiya yakɔna yakoka monga la nsaki ka kɔlɔ kamboka edio le onto?

³ Naka wɛ ekɔ lo ndɔshana la nsaki ka kɔlɔ kamboka edio, wɛ koka ndjaoka oko wɛ aya bu la wolo ndo hatokoka nshika tanga la ntondo ka nsaki kɛsɔ. Wɛ koka ndjaoka diele oko wɛ hayetawɔma le Jehowa l’ɔtɛ wa nsaki ka kɔlɔ kɛsɔ. Onga l’eshikikelo dia dui sɔ bu mɛtɛ! L’oyango wa nembetshiya mɛtɛ ka dikambo sɔ, sawo nɛ diayokadimola lo ambola ahende anɛ: 1) Kakɔna kakoka nkonya onto dia ndjaoka oko nde aya bu la wolo kana aya bu la elongamelo? 2) Ngande wakokayɛ ndɔshana la nsaki ya kɔlɔ shɔ?

KAKƆNA KALANGA SATANA DIA SHO NKANYIYA?

4. a) Lande na kalanga Satana dia sho ndjaoka oko taya bu la wolo? b) Lande na kahombaso monga l’eshikikelo ɔnɛ sho koka nshika tanga la ntondo ka nsaki ya kɔlɔ?

⁴ Satana nangaka dia sho ndjaoka oko taya bu la wolo etena kahomanaso l’ehemba. Yeso aketawɔ mɛtɛ ka dikambo sɔ etena kakandetsha ambeki ande dia nɔmbaka ɔnɛ: “Totokonyake lo ohemba, koko ototshungole oma le kanga kɔlɔ.” (Mat. 6:13) Satana mbutaka di’anto hawototshikala la kɔlamelo le Jehowa etena kahembamawɔ dia nsala kɛnɛ kele kɔlɔ. (Jɔbɔ 2:​4, 5) Lande na kafɔnya Satana ngasɔ? Nɛ dia nde mbele onto la ntondo lakasɛngiyama la nsaki yande ya kɔlɔ ndo laki konanga ntshikala la kɔlamelo le Jehowa. Aha ta taamu, nde mbetawɔka dia tekɔ paka oko nde, mbuta ate tayotshika kambɛ Jehowa etena kayotohembama. Satana akafɔnya dia kaanga Ɔna Nzambi la kokele akakoke ntshika kambɛ Nzambi etena kakinde l’ohemba. (Mat. 4:​8, 9) Ohokanyiya yema: Onde mɛtɛ sho bu la wolo wa nshika tanga dia ndɔshana la nsaki ya kɔlɔ? Tekɔ la wolo! Sho mbetawɔka kɛnɛ kakafunde ɔpɔstɔlɔ Pɔɔlɔ ate: “Lo akambo tshɛ, dimi lekɔ la wolo oma le ɔnɛ lambisha lokalo.”—Flpɛ. 4:13.

5. Ngande weyaso dia Jehowa ekɔ l’eshikikelo ɔnɛ sho koka nshika tanga la ntondo ka nsaki ya kɔlɔ?

⁵ Otshikitanyi la Satana, Jehowa ekɔ l’eshikikelo ɔnɛ sho koka nshika tanga la ntondo ka nsaki ya kɔlɔ. Ngande weyaso dui sɔ? Nɛ dia Jehowa akewoya la ntondo dia olui a woke w’anto wa kɔlamelo wayoka lo mfɔnu ka woke. Ohokana yimba lo kɛnɛ kalembetshiya dui sɔ. Jehowa lahate kashi, mbutaka di’olui a woke w’anto, aha wa tshitshɛ, wayɔtɔ l’andja w’oyoyo wa dimɛna efula ndo vɔ “wakasole ekutu awɔ ndo wakawaɛdia la dikila dia Ɔna Ɔkɔkɔ.” (Ɛny. 7:​9, 13, 14) Lo mɛtɛ, Jehowa hatɔshi oko sho bu la wolo wa nshika tanga la ntondo ka nsaki yaso ya kɔlɔ.

6-7. Lande na kalanga Satana dia sho ndjaoka oko sho bu l’elongamelo etena kalɔshanaso la nsaki ya kɔlɔ?

⁶ Satana nangaka dia sho ndjaoka diele oko sho bu la wolo ndo l’elongamelo wate kana oko Jehowa ayototona l’ɔtɛ weso la nsaki ya kɔlɔ. Lande na kalanga Satana dia sho nkanyiya lo yoho shɔ? Nde ekɔ onto lele bu l’elongamelo nɛ dia nde akalomboshama oma le Jehowa oko onto lahakoke nkondja lɔsɛnɔ la pondjo. (Eta. 3:15; Ɛny. 20:10) Aha la taamu, Satana nangaka dia sho ndjaoka oko sho bu l’elongamelo, djekoleko etena keyande dia nde bu l’elongamelo ka nkondja ɛtshɔkɔ watokongɛɛ la ntondo. Koko, sho bu oko nde. Lo mɛtɛ, Bible toshikikɛka dia Jehowa nangaka tokimanyiya koko aha dia tɛndja onongo. Nde “halange kaanga onto 1 ndanyema, koko nde nangaka dia anto tshɛ nkondja diaaso dia ndjatshumoya.”—2 Pe. 3:9.

⁷ Lo mɛtɛ, naka sho mfɔnya dia tamboshisha wolo kana elongamelo etena kalɔshanaso la nsaki yaso ka kɔlɔ, kete sho mbeyaka ndjokoma lo mɛna akambo woho walanga Satana dia sho mbaɛna. Nshihodia dikambo sɔ ayotokimanyiya dia sho ntetemala ndɔshana la nde.—1 Pe. 5:​8, 9.

WOHO WAKOKA EONGELO KASO K’ANTO WELE KEEMA KOKELE TOKONYA DIA NDJAOKA

8. Laadiko dia nsala kɛnɛ kele kɔlɔ, pɛkato mendanaka nto la na? (Osambo 51:5) (Enda ndo “Elembetshielo wa tɔtɛkɛta.”)

⁸ Ekɔ ɛngɔ kekina katokonya dia ndjaoka oko sho bu la wolo kana tamboshisha elongamelo etena kalɔshanaso la nsaki ya kɔlɔ. Ɛngɔ kakɔna kɛsɔ? Ekɔ eongelo kele keema kokele kakatahowɔ oma le ambutshi aso wa ntondo.a—Jɔbɔ 14:4; Adia Osambo 51:5.

9-10. a) Ngande wakayaoke Adama l’Eva l’ɔkɔngɔ wa vɔ nsala pɛkato? (Enda ndo osato.) b) Etombelo akɔna wele la pɛkato kakatahowɔ kɛsɔ le so?

⁹ Tɔsɛdingole etombelo wakonge la pɛkato le Adama l’Eva. L’ɔkɔngɔ wa vɔ pindolɛ Jehowa, vɔ wakayashɛ ndo wakahembe dia nkomba alemba awɔ. Lo kɛnɛ kendana la dikambo sɔ, dibuku Étude perspicace des Écritures mbutaka ɔnɛ: “Pɛkato kakaakonya dia vɔ ndjaɛndja onongo, monga la lonyangu l’efula, nsɛna aha l’ekokelo ndo monga la nsɔnyi.” Aki wate kana oko Adama l’Eva wamboyadiha lo luudu lele paka la toshambrɛ tɔnɛi. Adama l’Eva waki l’akoka wa mimɔ oma lo shambrɛ mɔtshi otsha lo kina, koko vɔ komonga l’akoka wa ntomba oma lo luudu lɔsɔ. Kɛsɔ kakakoke mɛnya dia takawahombe mbewɔ etombelo w’oma lo pɛkato.

¹⁰ Lo mɛtɛ, sho bu la dikambo diakɔ diaamɛ la nɛ diaki la Adama l’Eva. Oshinga w’etshungwelo wele keema la wahɔ le Adama l’Eva, koka tɛdia oma lo pɛkato ndo tosha nkum’otema ka pudipudi. (1 Kɔr. 6:11) Koko, takahowɔ pɛkato ndo eongelo k’anto wele keema kokele. Kɛsɔ hatambiya dia sho lawɔ koka ndjaɛndja onongo, monga la lonyangu l’efula, nsɛna aha l’ekokelo kana mboka nsɔnyi. Lo mɛtɛ, Bible mbutaka dia pɛkato kekɔ lo ntetemala monga la shɛngiya le ana w’anto. Ndo tɔ kekɔ la shɛngiya “kaanga le wanɛ waki kosala pɛkato woho wakasale Adama kɔlɔ.” (Rɔmɔ 5:14) Kaanga mbediɔ ngasɔ, hatohombe mfɔnya ɔnɛ hatongaki pondjo l’akoka wa nsala kɛnɛ kele ɔlɔlɔ kana monga l’elongamelo ka nsɛna pondjo pondjo. Sho koka ntona tokanyi ta kɔlɔ ta ngasɔ. Lo ngande?

11. Lo ndjela Rɔmɔ 6:​12, kakɔna kongaso l’akoka wa nsala kaanga etena kayaokaso dia sho bu l’akoka wa nshika tanga la ntondo ka nsaki ya kɔlɔ?

¹¹ Tena dimɔtshi, sho koka ndjaoka diele oko sho bu l’akoka wa nshika tanga la ntondo ka nsaki ya kɔlɔ l’ɔtɛ weso keema kokele. Ekɔ oko ɛngɔ kɛmɔtshi kekɔ lo totɛ l’etei k’otema dia hatokokaki ndɔshana la nsaki ya kɔlɔ. Koko, hatotokihokamɛ. Lande na? Nɛ dia Bible tetshaka dia hatohombe ntshika dia pɛkato ‘tahemɛ oko nkumekanga.’ (Adia Rɔmɔ 6:12.) Kɛsɔ nembetshiyaka dia sho koka nsɔna diaha nsala awui lo ndjela nsaki ya kɔlɔ shɔ. (Ngal. 5:16) Jehowa ekɔ l’eshikikelo dia sho koka nshika tanga la ntondo k’ehemba ndo nde hatodjangɛ dia nsala kɛnɛ keso bu l’akoka wa nsala. (Eoh. 30:​11-14; Rɔmɔ 6:6; 1 Tɛs. 4:3) Mbokɛmaka hwe dia sho koka nshika tanga dia ndɔshana la nsaki ya kɔlɔ.

12. Ngande wakokaso nsala akambo etena kayaokaso dia tamboshisha elongamelo ndo lande na?

¹² Woho akɔ waamɛ mbele, etena kayaokaso diele oko tamboshisha elongamelo, wate kana oko Jehowa ekɔ lo tɛndja onongo l’ɔtɛ weso la nsaki ya kɔlɔ, sho koka mbɔsa dui sɔ oko eongelo kaso k’anto wele keema kokele “katɛkɛta” l’etei k’otema, ndo hatokoke kihokamɛ. Lande na? Nɛ dia Jehowa mbeyaka dia sho tekɔ atshi wa pɛkato. (Os. 103:​13, 14) Nde “mbeyaka akambo tshɛ” wendana la so mbidja ndo woho wasɛngiyamaso oma lo pɛkato kakatahowɔ. (1 Jni. 3:​19, 20) Naka sho ndɔshana la nsaki ka nsala kɛnɛ kele kɔlɔ ndo mbewɔ nsala akambo lo ndjela nsaki kakɔ, kete Jehowa ayotɔsa oko anto wele pudipudi. Lande na kakokaso monga l’eshikikelo kɛsɔ?

13-14. Onde monga tsho la nsaki ya kɔlɔ nembetshiyaka dia tambokita tatala? Lembetshiya.

¹³ Bible mbutaka di’otshikitanu wa woke wekɔ lam’asa nsala awui wa kɔlɔ (wakokaso mbahemɛ) la monga la nsaki ka kɔlɔ (katoyɛ aha la lolango laso). Ɛnyɛlɔ, Akristo amɔtshi l’atei wa wanɛ waki la Kɔrɛtɔ wa lo ntambe ka ntondo wakasalaka awui wa mindo wa dieyanelo dia lam’asa pami la pami kana womoto la womoto. Pɔɔlɔ akafunde ate: “Ngasɔ mbaki amɔtshi wa l’atei anyu.” Onde kɛsɔ nembetshiyaka dia vɔ kokoka monga nto la nsaki ka nsala awui wa mindo wa dieyanelo dia lam’asa pami la pami kana womoto la womoto? Ondo aha ngasɔ, nɛ dia mbala efula mongaka wolo ntshika mbekelo shɔ. Koko, Akristo wakasalaka la wolo dia ndjakimɛ ndo mbewɔ nsala awui lo ndjela nsaki yawɔ waketawɔmaka le Jehowa. Nde akawaɔshi oko ‘wanɛ wakɛdiama.’ (1 Kɔr. 6:​9-11) Kɛsɔ koka monga woho akɔ waamɛ ndo le yɛ.

¹⁴ Oyadi woho akɔna tshɛ wasalayɛ dia ndɔshana la nsaki ya kɔlɔ, wɛ koka monga l’eshikikelo dia wɛ koka nshika tanga la ntondo ka yɔ. Kaanga mbahayakoke ndjinya, wɛ koka nsala la wolo dia ndjakimɛ ndo mbewɔ ‘nkotsha nango ya demba ndo ya tokanyi tayɛ.’ (Ɛf. 2:3) Ngande wakokayɛ nsala dikambo sɔ ndo ntondoya dia mbahemɛ nsaki ka nsala kɛnɛ kele kɔlɔ?

WOHO WA MBIDJA OTSHUMBA

15. Naka tekɔ lo ndɔshana la nsaki ka nsala kɛnɛ kele kɔlɔ, lande na kahombaso monga la losembwe le so shoamɛ?

¹⁵ Dia mbidja otshumba lo nsaki yaso ya nsala kɛnɛ kele kɔlɔ, sho pombaka monga la losembwe lo kɛnɛ kendana la wɛɔdu aso. Onga la yambalo ndo toyakesake lo monga la “tokanyi ta kashi.” (Jak. 1:22) Ɛnyɛlɔ, wɛ koka nkoma lo mɔnyɔla akambo lo mbuta ɔnɛ: ‘Anto akina nɔka wanu ndekami’ kana lo mɛndja anto akina onongo lo mbuta ɔnɛ: ‘Totomohembama dia menda esato wɛnyawɔ anto etakataka otondongaka wadɛmi mɛnyakami ngandji efula.’ Naka wɛ ntatɛ nkanyiya ngasɔ, kete ayonga wɔdu dia wɛ nkɔ l’ohemba. Ɔnkɔnɛ, toshake tɛkɛnɛndɛ dia nsala kɛnɛ kele kɔlɔ. Wɛmɛ ayɛmba wotsho wa kɛnɛ kasalayɛ.—Ngal. 6:7.

16. Ngande wakokayɛ nkeketsha dietawɔ diayɛ dia nsala kɛnɛ kele ɔlɔlɔ?

¹⁶ Laadiko wa monga la losembwe le yɛ wɛmɛ lo kɛnɛ kendana la wɛɔdu ayɛ, wɛ ayonga l’ohomba wa nkeketsha dietawɔ diayɛ diaha nsala kɛnɛ kele kɔlɔ. (1 Kɔr. 9:​26, 27; 1 Tɛs. 4:4; 1 Pe. 1:​15, 16) Kana yimba lo akambo walekayɛ pembama lɔkɔ ndo l’etena kakɔna kahembamayɛ. Koka monga woho ɔmɔtshi w’ohemba kana lo wonya ɔmɔtshi shikaa wa lo lushi etena kele wɔdu le yɛ dia pembama. Ɛnyɛlɔ, onde mongaka wɔdu le yɛ dia pembama etena kamboyɔlɛmba kana l’asa deke? Yalɔngɔsɔla ndo shikikɛ kɛnɛ kayoyosala. Etena koleki dimɛna kakokayɛ nsala dui sɔ ele la ntondo k’ohemba kokomɛ.—Tok. 22:3.

17. Wetshelo akɔna wakondjaso oma l’ɛnyɛlɔ ka Yɔsɛfu? (Etatelo 39:​7-9) (Enda ndo esato.)

¹⁷ Tɔsɛdingole kɛnɛ kakasale Yɔsɛfu etena kakalange wadi aki Pɔtifara mbɔkɔsha. Yɔsɛfu akatone aha la ntshimbatshimba. (Adia Etatelo 39:​7-9.) Kakɔna katetsha dui sɔ? Yɔsɛfu akeye mɛtɛ woho wakandakoke ndjaoka lo kɛnɛ kendana la mbeyana la wadi akana la ntondo ka wadi aki Pɔtifara ndjohemba dia mbɔkɔsha. Woho akɔ waamɛ mbele, wɛ koka nkeketsha dietawɔ diayɛ dia nsala kɛnɛ kele ɔlɔlɔ la ntondo k’ohemba kokomɛ. Laasɔ etena kayoyohembama, ayonga wɔdu le yɛ dia nsala kɛnɛ kele ɔlɔlɔ nɛ dia wɛ ambɔsaka yɛdikɔ lo kɛnɛ kendana la kɛnɛ kahombayɛ nsala.

“NYOTETEMALE NDJASƐDINGOLA”

18. Ngande wakokayɛ mbidja otshumba lo kɛnɛ kendana la nsaki ka ndɔshana la kɛnɛ kele kɔlɔ? (2 Kɔrɛtɔ 13:5)

¹⁸ Dia mbidja otshumba lo nsaki ka nsala kɛnɛ kele kɔlɔ, wɛ pombaka ‘ntetemala ndjasɛdingola,’ mbuta ate ntetemala ndjasɛdingolaka mbala la mbala lo menda kɛnɛ kasalayɛ. (Adia 2 Kɔrɛtɔ 13:5.) Tena la tena, sɛdingolaka awui ayɛ la etsha ayɛ ndo sala etshikitanu naka kokaka. Ɛnyɛlɔ, kaanga etena katondoyayɛ ohemba, yambola wate: ‘Wenya engana wakametsha dia mbuta ndooko?’ Naka wɛ amboshihodia dia wɛ akatshimbatshimba dia mbuta ndooko, kete toyaɛndjake onongo. Kanyiya kɛnɛ kakokayɛ nsala lo mbala kayaye. Yambola ambola wele oko wanɛ: ‘Etena kongami la tokanyi ta mindo, onde dimi koka nkitshakitsha etena ketshami dia minya tokanyi takɔ? Onde ɛsɔnwɛlɔ ami lo kɛnɛ kendana la ɔkɔkwɛlɔ wa demba, mbetɛkami akambo wolo lo kɛnɛ kendana la mbikikɛ ehemba? Etena kɛnami esato wa mindo, onde dimi minyaka washo mbala kakɔ ɔtɔi oma lɔkɔ? Onde dimi shihodiaka lande na kele atɔndɔ wa Jehowa wekɔ ohomba le mi kaanga etena kahombami ndjakimɛ?’—Os. 101:3.

19. Ngande wele kaanga tɛdikɔ ta totshitshɛ tahɔsami la lomba koka tokonya di’aha nshika tanga la ntondo ka tɔsɛngiya ta kɔlɔ?

¹⁹ Wɛ pombaka mbewɔ mamɛ etsha wa kɔlɔ. Bible mbutaka ɔnɛ: “Otema ndeka diangɔ dikina tshɛ lokeso ndo vɔ wekɔ kɔlɔ efula.” (Jɛr. 17:9) Yeso akate dia oma l’otema mbatotombaka “tokanyi ta kɔlɔ.” (Mat. 15:19) Ɛnyɛlɔ, onto lakatshike mbekelo ka mendaka esato wɛnyawɔ anto etakataka mbeyaka mfɔnya l’ɔkɔngɔ w’etena kɛmɔtshi dia bu kɔlɔ menda foto y’emula nsaki ya demba nɛ dia foto shɔ hɛnya tshɛ lo tshɛ otakataka w’onto. Kana nde mbeyaka mfɔnya ɔnɛ: ‘Bu kɔlɔ dimi monga la tokanyi ta kɔlɔ lam’ele halokambe la tɔ.’ Lo yoho mɔtshi, onto lakanyiya ngasɔ ekɔ lo ‘ndjakongɛ la ntondo dia nkotsha nsaki ya demba.’ (Rɔmɔ 13:14) Ngande wakokayɛ mbewɔ nsala dikambo sɔ? Onga la yewo ndo ewɔ mbɔsa tɛdikɔ tatotshitshɛ taha la lomba takoka ndjokokonya dia mbɔsa tɛdikɔ ta weke taha la lomba, ɛnyɛlɔ oko tɔnɛ takoka ndjokokonya lo etsha wa kɔlɔ.b Nya “tokanyi ta kɔlɔ” takoka kokonya dia mamɛ lɔkɛwɔ la kɔlɔ.

20. Kakɔna kalongamɛso lo nshi yayaye ndo ekimanyielo kakɔna kele la so kakianɛ?

²⁰ Oko wamboteka, diɛsɛ l’ekimanyielo ka Jehowa, sho koka nshika tanga la ntondo k’ehemba. Ndo diɛsɛ la kɛtshi ka Jehowa, tekɔ l’elongamelo ka nsɛna pondjo pondjo l’andja w’oyoyo. Tayonga l’ɔngɛnɔngɛnɔ w’efula etena kayotonga l’akoka wa kambɛ Jehowa aha la ndɔshana la tokanyi ta kɔlɔ. Polo l’etena kɛsɔ, sho koka monga l’eshikikelo dia tekɔ la wolo ndo l’elongamelo ka nshika tanga la ntondo ka nsaki ya kɔlɔ. Tayotondoya l’ekimanyielo ka Jehowa!