Toyale Atshi, Aha Ambuki Ato
1 Lo nshi yaso nyɛ, Akristo wa mɛtɛ mbidjaka yimba lo dako diawatɛ dia vɔ ndjâla atshi wa dui, aha ambuki ato. (Jak. 1:22) Dionga diawɔ tshikitana efula la nɛ dia wanɛ wayata ɔnɛ Akristo mbewɔ, wakambɛ Nzambi paka lâdiko di’ɛlɔmɔ. (Is. 29:13) Yeso akɛnya hwe ɔnɛ paka wanɛ wayosala lolango la Nzambi mbayoka.—Mat. 7:21.
2 Ɔtɛmwɛlɔ wele kema l’etsha wɛnya ɔnɛ vɔ mamemaka Nzambi wekɔ anyanya. (Jak. 2:26) Lâsɔ toyambole ɔnɛ: ‘Onde etsha ami mɛnyaka ɔnɛ mbetawɔ kami kekɔ ka mɛtɛ? Onde lɔsɛnɔ lasɛnami mbɔtɔnɛka la kɛnɛ ketawɔmi? Ngande wokokimi nyomoleka mbokoya Yeso dimɛna? ‘Lam’ayotokadimola l’ɔlɔlɔ tshɛ lo wembola ɛsɔ, tayɛna nganɛ wambotohama lo kɛnɛ k’endana la sala lolango la Nzambi ndo kɛnɛ kambototshikalɛ dia kotsha.
3 Oko weso ambeki wa Yeso, sho pombaka ndjâla l’oyango wa ntondo wele oko wɔnɛ wakate omembi w’esambu ate:“Nzambi mbalangaso tombolaka lushi l’otondo, ndo tayandolaka lokombo layɛ pondjo pondjo.” (Osam. 44:8, NW) Lokristo ekɔ yoho ya lɔsɛnɔ lahomba mɛnamaka lushi la lushi ndo lo kɛnɛ tshɛ kasalaso. Sho kondjaka ɔngɛnɔngɛnɔ wa mamba lam’ɛnyaso saki kaso ka tombola Jehowa l’otema ɔtɔi lo djimulimu tshɛ yasalaso.—Fil. 1:11.
4 Tombola Jehowa Hahembetɛ lo Ndjalaka la Lɔsɛnɔ la Losembwe Loto: Otondoyala lɔkɛwɔ l’ɔlɔlɔ loto mbakatɔlɔmbɛ Nzambi, tshike totoyangaka paka dia nyomoyalowanya tsho. Koko, ɔtɛmwɛlɔ aso mɛnyaka nto ɔnɛ sho pombaka mbewoya etsha wa Jehowa ndo sala wotelo wa lo sɛkɛ lo dikambo dia lokombo lande.—Heb. 13:15; 1 Pet. 2:9.
5 Esambishelo ka lokumu l’ɔlɔlɔ lo sɛkɛ ekɔ olimu ɔmɔtshi wa l’atei a wɛnɛ woleki ohomba wahombaso kotsha. Yeso akayasha tshɛ l’olimu ɔsɔ, nɛ dia nde akeyaka ɔnɛ vɔ mbele lɔsɛnɔ la pondjo le wanɛ wayolonga. (Joa. 17:3) Ɛlɔ kɛnɛ, “ulimu wa diui “ ekɔ ohomba efula; vɔ oto mbele tshɔi yakɔ ya mboka ka panda k’anto. (Etsha 6:4; Romo 10:13) Ɛlɔlɔ woshami lo dikambo sɔ wekɔ paka oko woho wokaso Paulo atolaka dia sho ‘sambisha dui’ ndo dia ‘disala la kɔkɔmiya.’—2 Tim. 4:2.
6 Lotombo la Jehowa pombaka ndjâla lo dihole diakɔna lo lɔsɛnɔ laso? Omembi w’esambu akate ɔnɛ dikambo sɔ diaki lotumu lande la lushi l’otondo. Shi ngasɔ mbokaso ndo sho? Ɔsɔku mbediɔ. Tayɔsaka diotɔnwɛlɔ diasaso l’anto akina oko waaso efula wa tɛkɛta dikambo dia lokombo la Jehowa. Tayoyangaka woho wa sawo diaso tshimbatshimbaka paka l’akambo wa lo nyuma. Tayoyatshutshuyaka nto dia sambishaka kâmɛ l’etshumanelo lo tena ndo lo tena. Wanɛ wele la diaaso kokaka kana yimba l’ɔlɔlɔ tshɛ dia kamba olimu w’ombatshi mboka, dia mɛnyaka ɔnɛ vɔ mbishaka esambishelo nɛmɔ lushi tshɛ la lo lɔsɛnɔ lawɔ. Dui dia Nzambi toshikikɛka ɔnɛ wanɛ wasala lolango la Nzambi l’ɔkɔkɔmalo wekɔ l’ɔngɛnɔngɛnɔ.—Jak. 1:25.