Tekɔ L’ohomba W’etshumanelo
1 Ana w’apami waki Kɔra wakɛnya lowando lawɔ lo dikambo di’etshumanelo ka Jehowa l’ɛtɛkɛta ɛnɛ: “Ndjala l’etemwelo kaye lushi otoi, ambuleka ndjala nshi kinunu am’akina ololo.” (Osam. 84:10) Lo tokanyi tawɔ, andja kokoka mbasha ndoko ɛngɔ kakawakoke mbɛdinya la dikambo sɔ. Naka wɛ ekɔ la wɔ kanyi yamɛ, kete wɛ oyohomba mbidja etshumanelo k’Akristo l’atei atei wa lɔsɛnɔ layɛ.
2 Oma k’etatelo katɔ, etshumanelo k’Akristo kondjaka ɛtshɔkɔ wa Nzambi. (Etsha 16:4, 5) Ndoko onto l’atei aso lokoki kiɔ̂nyɔla kana kiɛna paka oko dihole dimɔtshi dia pomanaka. Etshumanelo ekɔ “ɛtɛkɔ kasanganya” Ɛmɛnyi wa Jehowa wa lo etenyi kɛmɔtshi ka nkɛtɛ. Tambotshumana kâmɛ lɔkɔ dia sho mbetshama oma le Jehowa ndo nɔngɔsɔma di’olimu wa Diolelo.—Is. 2:2.
3 Oma l’ekimanyielo k’etshumanelo k’Akristo mbalekaso mbeka mɛtɛ. (1 Tim. 3:15) Ambeki wa Yeso pombaka ‘ndjâla vɔ tshɛ ɔtɔi,’ ndjâla kâmɛ la Nzambi, kâmɛ la Kristo ndo lam’asawɔ vâmɛ. (Joa. 17:20, 21; enda ndo Isaya 54:13.) L’ahole tshɛ l’andja ɔnɛ, anangɛso w’Akristo wetawɔkɔ wetshelo ndo ɛlɛmbɛ w’oma lo Bible ndo wekɔ lo mbɔtɔnganyiya nsɛnɔ yawɔ l’ɛlɛmbɛ akɔ.
4 Tambolowanyema ndo tekɔ la dihomɔ dia sala lotumu laso la mbetɛ anto ambeki. Ngɔndɔ la ngɔndɔ, Tshoto y’Etangelo, Réveillez-vous! la Olimu Aso wa Diolelo toshaka alako w’eshika dia tatɛ sawola l’anto lo Bible. Nsanganya yekɔ l’oweso wa tɛnya woho wa mbishola ndo pɛtshahɛtsha nsaki y’anto. Ohamelo wosalemi l’andja w’otondo mɛnyaka ɔnɛ olimu ɔsɔ kondjaka osukɔ w’oma l’olongo.—Mat. 28:18-20.
5 Oma l’ekimanyielo k’etshumanelo, sho ‘tshutshuyamaka lo ngandji ndo l’etsha w’ɔlɔlɔ’ nshi tshɛ. (Heb. 10:24, 25) Lam’eso nge, mbakikɛso ehemba la kɔlamelo tshɛ. Emendji woludi la ngandji tokimanyiyaka dia sho mbikikɛ ɛhɛnyɔhɛnyɔ ndo ekiyanu. (Und. 4:9-12) Etena kahandaso shishɔ, sho kondjaka alako wasungana. Onde ɔlɔngɔswamelo okina wekɔ washa ekimanyielo koludi la ngandji ka ngasɔ?—1 Tes. 5:14.
6 Jehowa nangaka dia sho tshikalaka suke l’ɔlɔngɔswamelo ande woho wa kâmɛ kaso namema. (Joa. 10:16) Etshumanelo tokimanyiyaka dia sho mbɔtɔnganɛka l’ɔhɔmbɔ wa kɔlamelo, ɛnyɛlɔ oko lo kanɛka emendji w’eteta watotomɛnde dia ndjotokeketsha. Oma lo woho wetawɔso ɛlɔmbwɛlɔ kɛsɔ koludi la ngandji, sho ndjasukanyaka lasaso, ko dikambo sɔ tokimanyiyaka dia tshikala nge lo nyuma.
7 Etshumanelo ekɔ yɛdikɔ y’ohomba dia panda kaso ka lo nyuma. Aha tɔ, tshike tototokoka kambɛ Jehowa dimɛna. Lâsɔ, totshikalake suke la ehomɔ kɛsɔ kakashikikɛ Jehowa. Tokambe kâmɛ l’eyango watawese etshumanelo kakɔ ndo toyelake alako wakondjaso oma lɔkɔ l’otema ɔtɔi. Paka ngasɔ mbayotɛnya lowando laso lo dikambo di’etshumanelo.—Osam. 27:4.