Wetshelo akɔna wakondja anto akina lo tɔsɛdingola?
1. Wetshelo akɔna wakakondjaka ambeki waki Yeso etena kakawɔsɛdingolaka?
1 Yeso akate ate: “Nyembe lokoho lami, nyeke akambu uma le mi.” (Mat. 11:29) Mbokɛmaka hwe dia nde aketshaka anto akina lo mbasha ɛnyɛlɔ ka dimɛna, koko aha paka oma l’ɛtɛkɛta eto. Tokanyiya yema wetshelo wakakondja ambeki waki Yeso lo mbɔsɛdingola. Nde aki onto ɔlɔlɔ ndo akokanaka ngandji. (Mat. 8:1-3; Mako 6:30-34) Nde aki l’okitshakitsha wa mɛtɛ. (Joa. 13:2-5) Etena kakawatshɔka la Yeso dia tosambisha, ambeki ande wakɛnaka dia nde akakambaka olimu l’etete ndo aketawoyaka anto etena kakandawaetshaka akambo wa mɛtɛ. (Luka 8:1; 21:37, 38) Shɛngiya yakɔna yonga la so otsha le anto akina etena katɔsɛdingolawɔ lam’eso l’esambishelo?
2. Ngande wakoka ɛnamelo kaso ka dimɛna la lɔkɛwɔ laso monga la shɛngiya le ampokami aso etena kasambishaso?
2 Ampokami aso: Ɔlɔtɔ aso wa la wɛdimo, mbekelo yaso y’ɛlɔlɔ ndo woho wayashaso le anto kokaka monga la shɛngiya ya wolo le ampokami aso. (2 Kor. 6:3; Fil. 1:27) Vɔ wayɛna dia sho kambaka la Bible mbala la mbala. Anto akina mambaka lo woho wâhokamɛso la dilɛmiɛlɔ tshɛ etena katɛkɛtawɔ. Tatɔnyɔlake pondjo woho wakoka ɛnyɛlɔ ka dimɛna kashaso l’akambo asɔ nkotola anto oya lo losango la Diolelo.
3. Naa shɛngiya ya dimɛna yakokaso monga la yɔ le anangɛso l’akadiyɛso?
3 Anangɛso l’akadiyɛso: Tokanyiya nto shɛngiya y’ɔlɔlɔ yakoka monga la so le anangɛso l’akadiyɛso. Ohetoheto wele la so l’olimu w’esambishelo sambemɛka. Oko watodjaka lowolo lowolo lokina diɛsa, mbele woho wayalɔngɔsɔlaso dimɛna keketshaka apandjudi akina dia vɔ mpamia diewo diawɔ dia nsambisha. (Tuk. 27:17) Etete kele la so ka mfunda nkombo y’anto wakɛnya nsaki ndo woho wakalolaso esadi eto dia towaenda tshutshuyaka anto akina dia vɔ nsala woho akɔ wâmɛ. Tayonga la shɛngiya y’ɔlɔlɔ le anangɛso l’akadiyɛso naka sho kotshaka olimu aso dimɛna dimɛna.—2 Tim. 4:5.
4. Lande na kahombaso sɛdingolaka ɛnyɛlɔ kashaso?
4 Shi sho kokaka sɛdingolaka kɛnɛ kasalaso ndo kataso ndo shɛngiya yele l’ɛnyɛlɔ kashaso le anto akina? Ɛnyɛlɔ kaso ka dimɛna kayɔngɛnyangɛnya Jehowa ndo kayotokimanyiya dia sho ndjaoka woho wakayaoke ɔpɔstɔlɔ Paulo etena kakandate ate: “Nyumbukuyaki, uku wukuyami Kristu.”—1 Kor. 11:1.