Ambola w’oma le ambadi
Etena kakafunde Davidɛ ɛtɛkɛta wele lo Osambo 61:8, nde akate ate nde ayotombolaka lokombo laki Nzambi “pondjo pondjo,” Onde kɛsɔ nembetshiyaka dia Davidɛ akafɔnyaka dia nde havɔki pondjo?
Ndooko. Kɛnɛ kakafunde Davidɛ kaki mɛtɛ ndo shikaa.
Tɔsɛdingole kɛnɛ kakandafunde lo divɛsa sɔ ndo l’avɛsa wa woho akɔ waamɛ ɔnɛ: “Dimi layembɛka lokombo layɛ esambo wa lotombo pondjo pondjo etena kakotshami alɔkɔlɔkɔ ami lushi la lushi.” “Jehowa Nzambi kami le, lambokotombola la otema ami tshɛ, ndo dimi layotombolaka lokombo layɛ pondjo pondjo.” “Dimi layotombolaka lokombo layɛ pondjo pondjo.”—Os. 61:8; 86:12; 145:1, 2.
Etena kakafunde Davidɛ ɛtɛkɛta ɛsɔ, nde kɔfɔnya dia nde havɔki pondjo. Nde akeyaka dia Jehowa akadjanga di’etombelo w’oma lo pɛkato k’anto ayonga nyɔi ndo Davidɛ aketawɔ dia nde aki otshi wa pɛkato. (Eta. 3:3, 17-19; Os. 51:4, 5) Nde akeyaka dia kaanga apami waketawɔmaka le Nzambi, ɛnyɛlɔ Abrahama, Isaka ndo Jakɔbɔ wakavu. Ndo Davidɛ akeyaka dia lushi lɔmɔtshi nde lawɔ ayovɔ. (Os. 37:25; 39:4) Koko ɛtɛkɛta wa Davidɛ watanema l’Osambo 61:8 mɛnyaka nsaki kande ndo woho wakandayashikikɛ dia tombolaka Nzambi pondjo pondjo, mbuta ate edja tshɛ kakinde la lɔsɛnɔ.—2 Sa. 7:12.
Lo ntena dimɔtshi, Davidɛ akafunde akambo wakendanaka la lɔsɛnɔ lande hita, oko wakokaso diɛna l’efundelo wa la diko w’Osambo 18, 51, ndo 52. L’Osambo 23, Davidɛ mbelɛka Jehowa ɔnɛ olami w’ɛkɔkɔ washa ɛlɔmbwɛlɔ, ekeketshelo ndo ekokelo. Davidɛ aki olami w’ɛkɔkɔ wa ngasɔ. Nde akalangaka kambɛ Nzambi ‘nshi tshɛ ya lɔsɛnɔ lande.’—Os. 23:6.
Tatohɛke nto dia Jehowa mbakasambiya Davidɛ awui tshɛ wakandafunde. L’awui wakandafunde mbaki ndo prɔfɛsiya yakayokotshamaka edja efula l’ɔkɔngɔ. Ɛnyɛlɔ, l’Osambo 110, Davidɛ akafunde lo kɛnɛ kendana l’etena kakahombe Nkumɛnde ‘mbidjasɛ lo lonya l’omi laki Nzambi’ l’olongo ndo kakandalongola lowandji l’efula. Dia nsala dui diakɔna? Dia nɛndja atunyi wa Nzambi ndo ‘mbela dilanya le wedja’ lanɛ la nkɛtɛ. Davidɛ aki lɔtshɛtshɛ laki Mɛsiya, ɔnɛ lakahombe mbolɛ oma l’olongo ndo lakahombe monga “ɔlɔmbɛdi pondjo pondjo.” (Os. 110:1-6) Yeso akate dia prɔfɛsiya katanema l’Osambo 110 kakendanaka la nde ndo ɔnɛ tɔ kayokotshama lo nshi yayaye.—Mat. 22:41-45.
Eelo, Davidɛ akasambiyama dia mfunda awui wendana la nshi yande ndo la nshi yayaye, etena kayondolwama ndo kayondonga l’akoka wa tombolaka Jehowa pondjo pondjo. Laasɔ, Osambo 37:10, 11, 29 koka mendana la etena kakawafundama ndo la nshi yayaye. Avɛsa asɔ wakakotshama lo nshi y’edjedja lo wodja w’Isariyɛlɛ ndo wayokotshama lo nshi yayaye etena kayokotsha Nzambi alaka ande.—Enda odingɔ wa 8 wa lo sawo diele l’ɔtɛ a dui ɔnɛ: “Wɛ ayoyala la mi lo Paradiso” dia lo numɛlɔ kɛnɛ.
Osambo 61:8 ndo avɛsa wa woho akɔ waamɛ mɛnyaka dia Davidɛ akalangaka ntombola Jehowa l’Isariyɛlɛ w’edjedja polo lo nyɔi kande. Ndo vɔ wakɛnyaka kɛnɛ kayonga Davidɛ l’akoka wa nsala lo nshi yayaye lam’ayowolola Jehowa.