O se Ka wa E Latlha
Go Tshwara Dithuto Tsa Baebele Tse di Gatelang Pele
Mo tsenyeletsong eno, go kokoantswe dintlha tsa konokono tse di tserweng mo ditlhogong tse di fetileng tsa Tirelo ya Rona ya Bogosi tse di buang ka go tshwara dithuto tsa Baebele tse di gatelang pele. Rotlhe re kgothalediwa gore re se ka ra latlha tsenyeletso eno mme re nne re e dirise fa re tshwara dithuto tsa Baebele. Mo godimo ga moo, dintlha tsa tsenyeletso eno di ka nna tsa dirisiwa fa go tshwerwe pokano ya tirelo ya tshimo, e bile balebedi ba tirelo ba ka nna ba di dirisa go baakanyetsa dipuo tse ba di neelang fa ba etetse ditlhopha tsa thuto ya buka.
Karolo 1: Thuto ya Baebele ke Eng?
Fa o tshwara metlotlo ya Baebele le motho ka metlha, le fa e le mekhutshwane, o dirisa Baebele fela kgotsa o e dirisa mmogo le nngwe ya dikgatiso tsa rona tse go akantshiwang gore re di bale le batho, o a bo o tshwere thuto ya Baebele. O ka simolola go bega thuto eo fa e le gore e setse e tshwerwe makgetlo a le mabedi morago ga gore o bontshe motho gore thuto ya Baebele e tshwarwa jang le fa go bonala e tla nna thuto e e tswelelang.—km-TN 7/04 ts. 1.
Dikgatiso Tse go Akantshiwang Gore re di Bale le Batho
◼ Modimo o Batla Gore re Direng?
◼ Kitso E E Isang Botshelong Jo bo Sa Khutleng
◼ Obamela Modimo yo o Esi wa Boammaaruri
◼ O ka Kgona go Nna Tsala ya Modimo! e ka badiwa ke batho ba ba sa rutegang kgotsa ba ba sa kgoneng go bala sentle.
Karolo 2: Go Baakanyetsa go Tshwara Thuto
Re tshwanetse go ruta moithuti tshedimosetso ka tsela e e tla mo amang pelo. Seno se tlhoka gore re baakanyetse sentle re akantse ka motho yono yo re ithutang le ene.—km-TN 8/04 ts. 1.
Kafa re ka Baakanyetsang ka Gone
◼ Sekaseka setlhogo sa kgaolo e lo e ithutang, ditlhogwana le dilo le fa e ka nna dife tsa go ithuta.
◼ Batla dikarabo tsa dipotso tse di gatisitsweng mme o tshwaye fela mafoko le diele tsa konokono.
◼ Sekaseka go bona gore ke ditemana dife tse di umakilweng tse lo ka di balang fa o tshwere thuto. Kwala dintlha tse dikhutshwane fa thoko mo kgatisong e lo e ithutang.
◼ Baakanyetsa go dira poeletso e khutshwane ya dintlha tsa konokono.
Dira gore Thuto e Tshwanele Moithuti yo o Ithutang le Ene
◼ Rapelela moithuti yono o bo o rapele le ka dilo tse a tlhokang go thusiwa ka tsone.
◼ Leka go akanya gore ke dintlha dife tse moithuti a ka nnang a thatafalelwa ke go di tlhaloganya le go di amogela.
◼ Ipotse jaana: Ke dilo dife tse a tshwanetseng go di tlhaloganya kgotsa go tokafatsa mo go tsone gore a kgone go gatela pele semoyeng? Nka fitlhelela jang pelo ya gagwe?
◼ Fa go tlhokega, baakanyetsa setshwantsho se o tla se dirisang, tlhaloso e e rileng kgotsa dipotso di le mmalwa tse di tla thusang moithuti go tlhaloganya ntlha nngwe kgotsa temana.
Karolo 3: Go Dirisa Dikwalo ka Tsela e e Nang le Matswela
Fa re tshwara dithuto tsa Baebele, boikaelelo jwa rona ke go ‘dira barutwa’ ka go thusa batho go tlhaloganya le go amogela dithuto tsa Lefoko la Modimo ba bo ba di dirisa mo matshelong a bone. (Math. 28:19, 20; 1 Bathes. 2:13) Ka jalo, thuto e tshwanetse go nna e e theilweng mo Dikwalong.—km-TN 11/04 ts. 4.
Dirisa Lefoko la Modimo fa o Ruta
◼ Bontsha moithuti gore a ka bona jang ditemana dingwe tse di rileng mo Baebeleng ya gagwe.
◼ Bala le go tlotla ka ditemana tsa Baebele tse di bontshang gore dilo tse re di dumelang di theilwe mo Dikwalong.
◼ Dirisa dipotso. Go na le gore o tlhalosetse moithuti ditemana tsa Baebele, dira gore e nne ene a di go tlhalosetsang.
◼ Dira gore thuto e nne motlhofo. O se ka wa leka go tlhalosa ntlha nngwe le nngwe ya temana. Akaretsa fela se se tlhokang go tlhalosiwa gore ntlha e go buiwang ka yone e utlwale sentle.
◼ Mmontshe kafa ditemana di ka mo thusang ka gone. Thusa moithuti go bona kafa ditemana tsa Baebele di dirang ka gone mo go ene.
Karolo 4: Go Ruta Baithuti go Baakanyetsa
Moithuti yo o balang go sa le gale se a tlileng go se ithuta, yo o thalelang dikarabo mme a akanya kafa a ka arabang ka mafoko a gagwe ka gone, o gatela pele ka bonako semoyeng. Ka jalo, fa go setse go rulagantswe gore thuto e tshwarwe ka metlha, baakanyetsa thuto e le nngwe le motho yo o ithutang le ene gore a bone kafa a tshwanetseng go baakanyetsa ka gone. Baithuti ba le bantsi ba tla solegelwa molemo thata ke fa o baakanyetsa kgaolo kgotsa thuto yotlhe le bone.—km-TN 12/04 ts. 1.
Go Tshwaya le go Kwala Dintlha
◼ Mo tlhalosetse gore a ka bona jang dikarabo tsa dipotso tse di gatisitsweng.
◼ Bontsha moithuti khopi ya gago ya buka e lo ithutang yone e o thaletseng mafoko kgotsa dipolelwana tsa konokono fela mo go yone.
◼ Thusa moithuti go bona gore temana nngwe le nngwe e e umakilweng fela mo serapeng e sa nopolwa, e tshegetsa ntlha nngwe mo serapeng, mme o mmontshe kafa a ka kwalang dintlha ka gone mo thoko ga serapa mo bukeng ya gagwe.
Go Sekaseka se se Tlileng go Ithutiwa le go Dira Poeletso
◼ Bontsha moithuti gore a ka sekaseka jang kgaolo kgotsa setlhogo se se ithutiwang, ditlhogwana le ditshwantsho pele a simolola go baakanyetsa ka botlalo.
◼ Kgothaletsa moithuti gore a boeletse dintlha tsa konokono fa a feditse go baakanyetsa.
Karolo 5: Go Sekaseka go Bona Gore go ka Akarediwa Dintlha di le Kana Kang
Bontsi jwa dintlha tse di tla akarediwang bo ikaegile ka bokgoni le maemo a yo o tshwereng thuto le yo go ithutiwang le ene.—km-TN 1/05 ts. 1.
Dira Gore a Nne le Tumelo e e Nonofileng
◼ Go botlhokwa go dira gore moithuti a tlhaloganye Lefoko la Modimo sentle go na le go akaretsa fela dintlha di le dintsi.
◼ Dirisa nako e ntsi ka mo go lekaneng go thusa moithuti go tlhaloganya se a se ithutang le go se dumela.
◼ Dira gore lo nne le nako e e lekaneng ya go bala ditemana tsa konokono tse thuto e lo ithutang yone e theilweng mo go tsone.
Tlhoma Mogopolo Mo go Se se Ithutiwang
◼ Fa e le gore moithuti ke motho yo o buang thata ka dilo tsa botho, o ka nna wa tlhoka go rulaganyetsa gore lo bue ka tsone fa lo sena go ithuta.
◼ O se ka wa akgela thata fa o tshwere thuto. O se ka wa dirisa dintlha di le dintsi tse di kwa thoko le maitemogelo a le mantsi a a ka nnang a dira gore moithuti a se ka a amogela kitso e e boammaaruri ya dithuto tsa motheo tsa Baebele.
Karolo 6: Fa Moithuti a Botsa Potso
Fa thuto ya Baebele e setse e tshwarwa ka metlha, gantsi go botoka gore dithuto tsa Baebele di ithutiwe ka go latelana go na le gore go buiwe ka dilo di le dintsi ka nako e le nngwe. Seno se dira gore moithuti a nne le kitso ya boammaaruri le go gatela pele semoyeng.—km-TN 2/05 ts. 8.
Nna le Temogo
◼ Dipotso tse di amanang le se se ithutiwang gantsi di ka arabiwa ka yone nako eo.
◼ Dipotso tse di sa amaneng le se se ithutiwang kgotsa tse di batlang gore go dirwe patlisiso di ka nna tsa arabiwa ka nako nngwe e sele. Go ka nna molemo gore o kwale dipotso tse di ntseng jalo.
◼ Fa e le gore moithuti o na le bothata jwa go dumela thuto nngwe, tlotla ka dintlha tse dingwe gape tse di tlhalosang thuto eo ka mo go tseneletseng.
◼ Fa e le gore moithuti ga a ise a tlhatswege pelo, tswelelang ka thuto mme lo tlotle ka kgang eo ka nako e nngwe.
Nna Boikokobetso
◼ Fa e le gore ga o itse karabo ya potso nngwe, o se ka wa e araba ka tsela e wena o akanyang ka yone.
◼ Nna o rute moithuti kgato ka kgato kafa a ka dirang patlisiso ka gone.
Karolo 7: Go Simolola le go Konela Thuto ka Thapelo
Gore baithuti ba Baebele ba gatele pele semoyeng, ba tlhoka gore Jehofa a ba segofatse. Ka gone, go a tshwanela go simolola thuto le go e konela ka thapelo.—km-TN 3/05 ts. 4.
E ka Simololwa Leng ka Thapelo
◼ Mo bathong ba ba ratang dilo tsa bodumedi, go ka simololwa ka thapelo go tloga fela kwa tshimologong.
◼ Mme mo go ba bangwe, re tshwanetse go sekaseka ka kelotlhoko gore ke leng re ka simololang thuto ka thapelo.
◼ O ka nna wa dirisa Pesalema 25:4, 5 le 1 Johane 5:14 go tlhalosetsa moithuti gore ke ka ntlha yang fa lo tshwanetse go simolola thuto le go e konela ka thapelo.
◼ O ka nna wa dirisa le Johane 15:16 go bontsha moithuti gore re tshwanetse go rapela Jehofa ka Jesu Keresete.
Dintlha Tse di Ka Tsenyelediwang mo Thapelong
◼ Go a tshwanela go baka Jehofa e re ka e le Ene yo thuto e e ithutiwang e tswang kwa go ene.
◼ Bontsha moithuti yono yo re ithutang le ene gore re a mo rata.
◼ Tlhalosa kafa re anaanelang phuthego ya ga Jehofa ka gone.
◼ Kopa Jehofa gore a segofatse maiteko a moithuti a a dirang a go dirisa se a se ithutang.
Karolo 8: Go Thusa Moithuti go Kopanela le Phuthego
Boikaelelo jwa rona fa re tshwara dithuto ga se fela gore re rute motho dithuto tsa motheo mme gape ke gore re mo thuse go nna leloko la phuthego ya Bokeresete. Dirisa metsotso e se kae beke le beke go mmolelela ntlha nngwe ka phuthego ya ga Jehofa.—km-TN 4/05 ts. 8.
Dipokano Tsa Phuthego
◼ Tlhalosa pokano nngwe le nngwe ya phuthego. Go tloga fela fa lo simolola go ithuta, mo laletse gore a nne teng kwa go tsone.
◼ Mo tlhalosetse dintlha dingwe tsa konokono tse go neng ga tlotlwa ka tsone kwa dipokanong.
◼ Mo thuse go kgatlhegela dithulaganyo tse di jaaka Segopotso, dikopano le go eta ga molebedi wa potologo.
◼ Dirisa ditshwantsho tse di mo dikgatisong tsa rona go mo thusa go bona se se diregang mo go tsone.
◼ Mo kgothaletse go bala boroutšhara jwa setlhogo se se reng Basupi ba ga Jehofa—Ke Bomang? Ba Dumela Eng?
Dirisa Dibidio go Godisa Kanaanelo ya Bone
◼ Jehovah’s Witnesses—The Organization Behind the Name
◼ Our Whole Association of Brothers
◼ United by Divine Teaching
◼ To the Ends of the Earth
Karolo 9: Go Thusa Baithuti go Neela Bosupi Jo e Seng Jwa ka Tlwaelo
Fa batho ba ba ithutang Baebele ba simolola go dumela dilo tse ba di ithutang, ba patelesega go bolelela ba bangwe ka tsone.—km-TN 5/05 ts. 1.
Ba Kgothaletse go Neela Bosupi
◼ A go na le ditsala dingwe tsa gagwe le bangwe mo lelapeng la gaabo ba a ka nnang a kopa gore ba nne teng fa a rutwa?
◼ A go na le bape ba a berekang le bone, ba a tsenang sekolo le bone kgotsa batho bangwe ba a ba tlwaetseng ba ba bontshitseng kgatlhego?
Ba Thapisetse go Bolelela ba Bangwe ka Tumelo ya Bone
◼ O ka nna wa tla o ntse o kgaotsa fa lo ntse lo ithuta, o botse moithuti dipotso tse di jaaka, “O ka dirisa Baebele jang go tlhalosetsa ba lelapa la gago thuto eno?”
◼ Thusa moithuti go lemoga gore go botlhokwa gore a bontshe tlotlo a bo a nne pelonomi fa a bua le ba bangwe ka Modimo le ka maikaelelo a gagwe.
◼ Baithuti ba ka dirisa boroutšhara jwa setlhogo se se reng Basupi ba ga Jehofa—Ke Bomang? Ba Dumela Eng? go thusa ditsala le ba malapa a bone go tlhaloganya tumelo ya rona e e theilweng mo Baebeleng le ditiro tse re di dirang tse di amanang le yone.
Karolo 10: Go Thapisa Baithuti mo Bodireding Jwa Ntlo le Ntlo
Fa bagolwane ba swetsa ka go re motho yo o ithutang o tshwanelegela go nna mmoledi yo o sa kolobediwang, a ka nna a simolola go tswa le phuthego go ya bodireding jwa phatlalatsa.—km-TN 6/05 ts. 1.
Go Baakanyetsa Mmogo
◼ Bontsha motho yo o ithutang le ene gore a ka bona kae dikakantsho tse a ka di dirisang fa a ya tshimong.
◼ Mo thuse go tlhopha puisano e e motlhofo e e tshwanelang maemo a tshimo ya gaeno.
◼ Mo kgothaletse gore a dirise Baebele mo bodireding.
◼ Ikatiseng mmogo gore lo tlile go bua jang kwa tshimong. Mmontshe gore a ka araba jang ka botlhale dipotso tse batho ba ratang go di botsa mo tshimong ya gaeno.
Go Rera Mmogo
◼ Dira gore moithuti a tseye malebela mo go wena fa o buisana le mong wa ntlo o dirisa puisano e lo e baakanyeditseng mmogo.
◼ Akanyetsa botho le bokgoni jwa moithuti. Ka dinako tse dingwe, go ka nna molemo go mo kopa gore a bue fela bontlhanngwe jwa puisano eo.
◼ Thusa moithuti yo mosha gore a nne le thulaganyo ya ka metlha ya go nna le seabe mo bodireding.
Karolo 11: Go Thusa Baithuti go Dira Maeto a go Boela
Loeto lwa go boela lo baakanyediwa ka nako ya fa motho a le mo loetong lwa ntlha mo bodireding jwa ntlo le ntlo. Kgothaletsa moithuti go bontsha ba a buang le bone gore o a ba kgatlhegela. Mo thapise kgato ka kgato gore a nne le bokgoni jwa go dira gore mong wa ntlo a itlhalose, a reetse dikarabo tsa mong yoo wa ntlo a bo a ele tlhoko gore ke eng se a amegileng ka sone.—km-TN 7/05 ts. 1.
Go Baakanyetsa Loeto Lwa go Boela
◼ Boeletsang dintlha dingwe tse lo neng lwa di tlotla le mong wa ntlo mo loetong lwa ntlha o bo o thuse moithuti go tlhopha puisano nngwe e e tla kgatlhang mong wa ntlo.
◼ Baakanyetsang puisano nngwe e khutshwane e e nang le temana e le nngwe fela ya Baebele le serapa se le sengwe fela mo kgatisong nngwe.
◼ Baakanyetsang potso e lo tlileng go e botsa kwa bokhutlong jwa motlotlo wa lona.
Tlhagafalela go Dira Maeto a go Boela
◼ Kgothaletsa motho yo o ithutang le ene gore a boele ka bonako kwa go botlhe ba ba kgatlhegang.
◼ Thusa moithuti go bona botlhokwa jwa go boela gantsintsi kwa bathong go fitlha o ba fitlhela ba le teng kwa gae.
◼ Bontsha moithuti yo mosha gore a ka beelana nako jang le batho, mme o mo thuse go bona botlhokwa jwa go boela kwa go bone jaaka a solofeditse.
Karolo 12: Go Thusa Baithuti go Simolola le go Tshwara Dithuto Tsa Baebele
Go botlhokwa thata gore o etse sekao sa ga Jesu ka go tlhoma sekao se se molemo fa o le mo bodireding. Fa motho yo o ithutang le ene a ela tlhoko sekao sa gago mo bodireding, seno se tla mo thusa go tlhaloganya gore boikaelelo jwa go dira maeto a go boela ke go simolola dithuto tsa Baebele.—km-TN 8/05 ts. 1.
Go Kopa Mong wa Ntlo Gore o mo Tshwarele Thuto ya Baebele
◼ Tlhalosetsa moithuti gore gantsi ga go tlhokege gore o tlhalose ka boleele gore thuto e tshwarwa jang.
◼ Go ka nna botoka go bontsha mong wa ntlo gore thuto e tshwarwa jang o dirisa serapa se le sengwe fela kgotsa tse pedi mo kgatisong e re ithutang yone le batho.
◼ Boeletsa dipuisano dingwe tsa kafa go ka simololwang dithuto tsa Baebele ka gone o bo o ikatise ka tsone.—km-TN 8/05 ts. 8; km-TN 1/02 ts. 6.
Go Thapisa Baithuti Gore ba Nne Barutisi
◼ Kgothaletsa baithuti gore ba ikwadise mo Sekolong sa Bodiredi sa Puso ya Modimo.
◼ Dira dithulaganyo tsa gore baboledi ba basha ba tsamaye le wena fa o ya kwa dithutong dingwe tsa gago tsa Baebele tse ba tla fitlhang ba kgona go nna le seabe se se rileng sa go ruta mo go tsone.