SELEMAIA
1 Ko e ngaahi lea eni ʻa Selemaia* ko e foha ʻo Hilikaia, ko e taha ʻo e kau taulaʻeiki ʻi ʻAnatoti+ ʻi he fonua ʻo Penisimaní. 2 Naʻe hoko kiate ia ʻa e folofola ʻa Sihová ʻi he ngaahi ʻaho ʻo Siosaia+ ko e foha ʻo ʻĀmone,+ ko e tuʻi ʻo Siutá, ʻi he taʻu hono 13 ʻo ʻene pulé. 3 Naʻe toe hoko mai ia ʻi he ngaahi ʻaho ʻo Sihoiakimi+ ko e foha ʻo Siosaia, ko e tuʻi ʻo Siutá, ʻo aʻu ki he kakato ʻa e taʻu hono 11 ʻo e pule ʻa Setekaia+ ko e foha ʻo Siosaia, ko e tuʻi ʻo Siutá, ʻo aʻu ki hono ʻave fakamālohi ʻo Selusalema ʻi he māhina hono nimá.+
4 Naʻe hoko mai kiate au ʻa e folofola ʻa Sihová, ʻo pehē:
5 “Ki muʻa ke u faʻu koe ʻi manavá naʻá ku ʻosi ʻiloʻi* koe,+
Pea ki muʻa ke fāʻeleʻi koé* naʻá ku ʻosi fakamāʻoniʻoniʻi* koe.+
Naʻá ku ʻai koe ko ha palōfita ki he ngaahi puleʻangá.”
6 Ka naʻá ku pehē: “ʻOiauē, ʻEiki Hau Sihova!
ʻOku ʻikai te u poto ʻi he leá,+ he ko ha tamasiʻi*+ pē au.”
7 Naʻe folofola mai leva ʻa Sihova kiate au:
“ʻOua te ke pehē, ‘Ko ha tamasiʻi pē au.’
He kuo pau ke ke ʻalu ki he faʻahinga kotoa ʻoku ou fekauʻi atu koe ki aí,
Pea te ke leaʻaki ʻa e meʻa kotoa pē ʻoku ou tuʻutuʻuni kiate koé.+
8 ʻOua te ke ilifia koeʻuhí ko honau fōtungá,+
He ‘ʻoku ou ʻiate koe ke fakahaofi koe,’+ ko e fakahaaʻi ia ʻe Sihová.”
9 Naʻe mafao mai leva ʻe Sihova ʻa hono nimá ʻo ne ala ki hoku ngutú.+ Pea naʻe folofola mai ʻa Sihova kiate au: “Kuó u ʻai ʻeku ngaahi leá ki ho ngutú.+ 10 Vakai, ʻoku ou foaki atu kiate koe he ʻahó ni ʻa e mafai ki he ngaahi kakaí pea ki he ngaahi puleʻangá, ke taʻaki pea ke holoki, ke fakaʻauha pea ke laiki, ke langa pea ke tō.”+
11 Naʻe toe hoko mai ʻa e folofola ʻa Sihová kiate au, ʻo pehē: “Ko e hā ʻokú ke sio ki aí, Selemaia?” Ko ia naʻá ku pehē: “ʻOku ou sio ki ha vaʻa ʻalimoni.”*
12 Naʻe folofola mai ʻa Sihova kiate au: “ʻOku tonu hoʻo sió, he ʻoku ou mātuʻaki ʻāʻā ʻi he fekauʻaki mo ʻeku leá ke fakahoko ia.”
13 Naʻe hoko mai ʻa e folofola ʻa Sihová kiate au ko hono tuʻo uá ia, ʻo pehē: “Ko e hā ʻokú ke sio ki aí?” Ko ia naʻá ku pehē: “ʻOku ou sio ki ha kulo* ʻoku lili,* pea ko hono ngutú ʻoku maleʻei mai mei he tokelaú.” 14 Ko ia naʻe folofola mai ʻa Sihova kiate au:
“ʻE haʻu mei he tokelaú ʻa e faingataʻá
Ki he kakai kotoa ʻo e fonuá.+
15 He ʻoku fakahaaʻi ʻe Sihova,+ ‘ʻOku ou ui ʻa e ngaahi fāmili kotoa ʻo e ngaahi puleʻanga ʻo e tokelaú,’
‘Pea te nau omi; ʻe fokotuʻu ʻe he tokotaha taki taha ʻa hono taloni
ʻI he hūʻanga ʻo e ngaahi matapā ʻo Selusalemá,+
Pea te nau ʻohofi ʻa hono ngaahi ʻā takatakaí
Pea ʻohofi ʻa e ngaahi kolo kotoa ʻo Siutá.+
16 Pea te u fakahaaʻi ʻa ʻeku ngaahi fakamaau kiate kinautolu koeʻuhí ko ʻenau fulikivanú kotoa,
Koeʻuhí kuo nau liʻaki au,+
Pea ʻoku nau fai ʻa e feilaulau fakakohu ki he ngaahi ʻotua kehé+
Mo punou ki he ngaahi ngāue ʻa honau nimá.’+
17 Ka ko koe ʻoku totonu ke ke teuteu ke fai ha meʻa,*
Pea kuo pau ke ke tuʻu ʻo tala kiate kinautolu ʻa e meʻa kotoa pē ʻoku ou tuʻutuʻuni atú.
ʻOua naʻá ke ilifia kiate kinautolu,+
Koeʻuhí ke ʻoua naʻá ku ʻai koe ke ke ilifia ʻi honau ʻaó.
18 He kuó u ngaohi koe he ʻahó ni ko ha kolo fakakolotau,
Ko ha pou ukamea, mo ha ʻā kopa ke ke matuʻuaki ai ʻa e fonuá kotoa,+
ʻA e ngaahi tuʻi ʻo Siutá mo hono houʻeikí,
ʻA hono kau taulaʻeikí pea mo e kakai ʻo e fonuá.+
19 Pea ko e moʻoni te nau tauʻi koe,
Ka ʻe ʻikai te nau mālohi ʻiate koe,*
He ʻoku fakahaaʻi ʻe Sihova, ‘ʻOku ou ʻiate koe+ ke fakahaofi koe.’”
2 Naʻe hoko mai kiate au ʻa e folofola ʻa Sihová, ʻo pehē: 2 “ʻAlu ʻo fanongonongo ki he telinga ʻo Selusalemá, ‘Ko e folofola eni ʻa Sihová:
“ʻOku ou manatuʻi lelei ʻa e līʻoa* ʻi hoʻo kei talavoú,+
ʻA e ʻofa naʻá ke fakahāhā ʻi he taimi naʻá ke fakamaʻu ai ke malí,+
ʻA hoʻo muimui kiate au ʻi he toafá,
ʻI ha fonua naʻe ʻikai tūtuuʻi ai ha tenga.+
3 Naʻe māʻoniʻoni ʻa ʻIsileli kia Sihova,+ ko e ʻuluaki fua ʻo ʻene utu-taʻú.”’
‘ʻIlonga ʻa kinautolu te nau keina iá te nau halaia.
ʻE hoko kiate kinautolu ha fakatamaki,’ ko e fakahaaʻi ia ʻe Sihová.”+
4 Fanongo ki he folofola ʻa Sihová, ʻe fale ʻo Sēkope,
Pea mo kimoutolu kotoa ngaahi fāmili ʻo e fale ʻo ʻIsilelí.
5 Ko e folofola eni ʻa Sihová:
“Ko e hā ha fehālaaki naʻe ʻilo ʻiate au ʻe hoʻomou fanga kuí,+
ʻO nau mātuʻaki hē mamaʻo ai meiate aú,
Pea nau muimui ʻi he ngaahi ʻaitoli taʻeʻaonga+ ʻo nau hoko tonu ai ko e koto taʻeʻaongá?+
6 Naʻe ʻikai te nau ʻeke, ‘Ko fē ʻa Sihova,
ʻA e Tokotaha naʻá ne ʻomi kitautolu mei he fonua ko ʻIsipité,+
ʻA ia naʻá ne taki kitautolu ʻi he toafá,
ʻI ha fonua toafa+ mo luoluo,
ʻI ha fonua pakukā+ mo fakapoʻulituʻu,
ʻI ha fonua ʻoku ʻikai ke fononga ai ha tangata
Pea ʻoku ʻikai ke nofo ai ha taha?’
7 Naʻá ku ʻomi leva kimoutolu ki ha fonua ʻo e ngoue fuaʻiʻakau,
Ke kai ʻa hono fuá mo hono ngaahi meʻa leleí.+
Ka naʻa mou hū ki ai ʻo ʻuliʻi ʻa hoku fonuá;
Naʻa mou ngaohi ʻa hoku tofiʻá ko ha meʻa fakalielia.+
8 Naʻe ʻikai ke ʻeke ʻe he kau taulaʻeikí, ‘Ko fē ʻa Sihova?’+
Ko e faʻahinga naʻa nau akoʻi ʻa e Laó naʻe ʻikai te nau ʻiloʻi au,
Ko e kau tauhi-sipí naʻa nau angatuʻu kiate au,+
Ko e kau palōfitá naʻa nau kikite ʻia Pēali,+
Pea naʻa nau muimui ki he faʻahinga naʻe ʻikai lava ke nau ʻomi ha meʻa ʻoku ʻaongá.
9 ‘Ko ia te u toe fāinga mo kimoutolu,’+ ko e fakahaaʻi ia ʻe Sihová,
‘Pea te u fāinga mo e ngaahi foha ʻo homou ngaahi fohá.’
10 ‘Ka mou kolosi atu ki he ngaahi matāfonua* ʻo e kau Kītimí+ ʻo sio.
ʻIo, fai ha fekau ki Keta+ pea mou fakakaukau fakalelei;
Sio angé pe kuo ʻi ai ha meʻa peheni naʻe hoko.
11 Kuo faifai ange pea fetongi ʻe ha puleʻanga ʻa hono ngaahi ʻotuá ʻaki ha faʻahinga ʻoku ʻikai ko ha ngaahi ʻotua?
Ka ko hoku kakaí tonu kuo nau fakafetongi ʻa hoku lāngilangí ʻaki ha meʻa ko e koto taʻeʻaonga.+
12 Mou sio ʻo ofoofo ʻi he meʻá ni, ʻa kimoutolu ngaahi langi;
Mou tete ʻi he mātuʻaki fakalilifuʻia,’ ko e fakahaaʻi ia ʻe Sihová,
13 ‘Koeʻuhí kuo fai ʻe hoku kakaí ʻa e meʻa ʻe ua ʻoku kovi:
Kuo nau liʻaki au, ʻa e matavai ʻo e vai moʻuí,+
Pea nau keli* maʻanautolu ʻa e ngaahi lepa,
Ko e ngaahi lepa maumau, ʻoku ʻikai lava ke ne tānaki ha vai.’
14 ‘Ko ʻIsilelí ko ha sevāniti pe ko ha tamaioʻeiki kuo fanauʻi ʻi he fāmilí?
Ko e hā leva kuo tuku atu ai ia ke ʻave fakamālohí?
15 ʻOku ngungulu kiate ia ʻa e fanga laione muí;+
Kuo nau hiki hake honau leʻó.
Naʻa nau ngaohi ʻa hono fonuá ko ha meʻa ke fai ai ha fakalilifuʻia.
Kuo tutu ʻa hono ngaahi koló, ko ia ʻoku ʻikai ha taha ʻe nofo ai.
16 Ko e kakai ʻo Nofi*+ mo Tapanesá+ ʻoku nau keina ho tumuʻakí.
17 ʻIkai kuó ke ʻomi ʻa e meʻá ni kiate koe
ʻI hoʻo liʻaki ʻa Sihova ko ho ʻOtuá+
Lolotonga ia ʻene tataki koe ʻi he halá?
19 Ko hoʻo fulikivanú ʻoku totonu ke ne fakatonutonuʻi koe,
Pea ko hoʻo taʻefaitōnungá ʻoku totonu ke ne valokiʻi koe.
Ke ke ʻilo peá ke fakatokangaʻi ʻa e kovi mo e kona+
ʻO hono liʻaki ʻa Sihova ko ho ʻOtuá;
Kuo ʻikai ke ke fakahaaʻi ha manavahē kiate au,’+ ko e fakahaaʻi ia ʻe he ʻEiki Haú, ʻa Sihova ʻo e ngaahi kau tau.
20 ‘He ʻi he kuohilí naʻá ku haveki ai hoʻo ʻioké+
Pea taʻaki ho ngaahi haʻí.
Ka naʻá ke pehē: “Heʻikai te u tauhi kiate koe,”
He ʻi he foʻi māʻolunga kotoa pē pea ʻi he lalo ʻakau tupu ʻāfaʻafa kotoa pē+
Naʻá ke tokoto fakaloloa ai, ʻo faifeʻauaki.+
21 Naʻá ku tō koe ko ha fuʻu kālepi kulokula fungani,+ ko e tenga lelei kotoa;
Ko ia ʻoku anga-fēfē hoʻo hoko ko e ngaahi huli vao ʻo ha fuʻu kālepi kehe ʻi hoku ʻaó?’+
22 ‘Neongo te ke fakamaʻa koe ʻaki ʻa e sota* pea ngāueʻaki ʻa e koa lahi,
Ko hoʻo hiá ʻe kei hoko pē ia ko ha ʻuli ʻi hoku ʻaó,’+ ko e fakahaaʻi ia ʻe he ʻEiki Hau ko Sihová.
23 ʻOku lava fēfē ke ke pehē, ‘Kuo ʻikai te u ʻuliʻi au.
Kuo ʻikai te u muimui ʻi he ngaahi Pēalí’?
Vakai ki ho ʻalunga ʻi he teleʻá.
Fakakaukau ki he meʻa kuó ke faí.
ʻOkú ke hangē ha kiʻi kāmeli fefine veʻe-vavé,
ʻOku lele fefokifokiʻaki noaʻia holo ʻi hono halá,
24 Ko ha ʻasi kaivao kuo anga ki he toafá,
ʻOkú ne fakanamunamu ʻa e matangí ʻi heʻene holí.
Ko hai ʻe lava ke ne taʻotaʻofi ia ʻi he taimi ʻokú ne loto ai ke touʻiá?
ʻE ʻikai ongosia ha taha ʻi he fanga manu ʻoku kumi kiate iá.
Te nau maʻu ia ʻi hono faʻahitaʻú.*
25 Taʻofi koe mei he ʻalu laʻivaʻé
Pea mo ho mongá mei he fieinuá.
Ka naʻá ke pehē, ‘ʻOku ʻikai ha toe felave!+
26 Hangē ko e mā ʻa ha kaihaʻa ʻi hano maʻu iá,
ʻOku pehē ʻa hono fakamaaʻi ʻa e fale ʻo ʻIsilelí,
ʻA kinautolu, mo honau ngaahi tuʻí mo ʻenau kau houʻeikí,
Ko ʻenau kau taulaʻeikí mo ʻenau kau palōfitá.+
27 ʻOku nau pehē ki ha fuʻu ʻakau, ‘Ko koe ʻa ʻeku tamaí,’+
Pea ki ha fuʻu maka, ‘Ko koe naʻá ke fanauʻi aú.’
Ka ʻoku nau sītuʻa kiate au ʻo ʻikai te nau hanga mai.+
Pea ʻi he taimi ʻo ʻenau faingataʻaʻiá te nau pehē,
‘Tuʻu hake ʻo fakahaofi kimautolu!’+
28 Ko eni ko fē ho ngaahi ʻotua naʻá ke ngaohi maʻaú?+
Tuku ke nau tuʻu hake ʻo kapau ʻe lava ke nau fakahaofi koe ʻi he taimi ʻo hoʻo faingataʻaʻiá,
He kuo tokolahi fau ho ngaahi ʻotuá ʻo hangē ko ho ngaahi koló, ʻe Siuta.+
29 ‘Ko e hā ʻoku mou hanganaki tukuakiʻi ai aú?
Ko e hā ʻoku mou angatuʻu kotoa mai ai kiate aú?’+ Ko e fakahaaʻi ia ʻe Sihová.
30 Ko e kulanoa ʻeku taaʻi homou ngaahi fohá.+
Naʻe ʻikai te nau tali ha akonaki;+
Naʻe keina ʻe hoʻomou heletaá ʻa hoʻomou kau palōfitá,+
ʻO hangē ha laione fakaʻauhá.
31 ʻA e toʻutangata, mou fakakaukau ki he folofola ʻa Sihová.
Kuó u hoko koā ʻo hangē ha toafá ki ʻIsileli
Pe ko ha fonua ʻo e fakapoʻuli fakalotomafasia?
Ko e hā kuo pehē ai ʻe he faʻahingá ni, ʻa hoku kakaí, ‘ʻOku mau ʻalu tauʻatāina holo.
ʻE ʻikai te mau toe ʻalu atu kiate koé’?+
32 ʻE lava ke ngalo ʻi ha taʻahine kei nofo anga-maʻa ʻa ʻene meʻa-teuteú,
ʻI ha taʻahine mali ʻa hono leta teuteú?*
Pea neongo ia kuo ngalo au ʻi hoku kakaí ʻi ha ngaahi ʻaho taʻefaʻalaua.+
33 He potopotoʻi ē, ʻe fefine, ko hoʻo fokotuʻu ho ʻalungá ke kumi ki he ʻofá!
Kuó ke akoʻi koe ʻi he ngaahi founga fulikivanu.+
34 Naʻa mo ho ngaahi kofú ʻoku tau ai ʻa e toto ʻo siʻi masiva taʻehalaiá,+
Neongo naʻe ʻikai te u maʻu atu kinautolu ʻoku nau hae fale;
ʻOku tau ia ʻi ho ngaahi kofú kotoa.+
35 Ka ʻokú ke pehē, ‘ʻOku ou tonuhia.
Ko e moʻoni kuo foki ʻene houhaú meiate au.’
Ko eni ʻoku ou ʻomi ha fakamaau kiate koe
Koeʻuhí ʻokú ke pehē, ‘Kuo ʻikai te u fai ha angahala.’
36 Ko e hā ʻokú ke fakamaʻamaʻaʻi ai ho ʻalunga feliuliuakí?
37 Pehē foki, ʻi he ʻuhingá ni te ke ʻalu atu ai mo puke ho ʻulú,+
He kuo siʻaki ʻe Sihova ʻa e faʻahinga ʻokú ke falala ki aí;
ʻE ʻikai te nau ʻai koe ke ke lavameʻa.”
3 ʻOku ʻeke ʻe he kakaí: “Kapau ʻoku tuku ange ʻe ha tangata hono uaifí pea mavahe ʻa e fefiné meiate ia ʻo ne hoko ko e uaifi ʻo ha tangata kehe, ʻe toe foki koā ʻa e tangatá kiate ia?”
ʻIkai kuo mātuʻaki ʻuliʻi ʻa e fonua ko iá?+
“Kuó ke faifeʻauaki mo e ngaahi kaumeʻa tokolahi,+
Pea ko eni te ke toe foki mai koā kiate au?” Ko e fanongonongo ia ʻa Sihová.
2 “Hanga hake ho matá ʻo vakai ki he ngaahi foʻi māʻolunga kuo tekeleí.
Ko fē kuo teʻeki ke tohotohoʻi koe aí?
Naʻá ke tangutu ʻi he ngaahi veʻehalá ʻo tatali kiate kinautolu,
ʻO hangē ha tokotaha hikihiki holo* ʻi he toafá.
ʻOkú ke hanganaki ʻuliʻi ʻa e fonuá
ʻAki hoʻo feʻauakí mo hoʻo tōʻonga fulikivanú.+
3 Ko ia ʻoku taʻofi ai ʻa e ʻuhá,+
Pea ʻoku ʻikai ha ʻuha ʻi he faʻahitaʻu failaú.
4 Ka ko eni ʻokú ke ui mai kiate au,
‘ʻA ʻeku Tamai, ko koe ʻa hoku kaumeʻa ʻi heʻeku kei talavoú!+
5 ʻE hanganaki ʻita ai pē ha taha ʻo taʻengata,
Pe tukulotoʻi maʻu pē ʻa e ʻitá?’
Ko e meʻa eni ʻokú ke leaʻakí,
Ka ʻokú ke hanganaki fai pē ʻa e kovi kotoa ʻokú ke malava ke faí.”+
6 ʻI he ngaahi ʻaho ʻo Tuʻi Siosaiá,+ naʻe folofola mai ai ʻa Sihova kiate au: “‘Kuó ke sio ki he meʻa kuo fai ʻe ʻIsileli taʻefaitōnungá? Kuó ne ʻalu hake ki he moʻunga māʻolunga kotoa pē pea ki he lalo ʻakau tupu ʻāfaʻafa kotoa pē ke faifeʻauaki.+ 7 Naʻa mo e hili ʻene fai ʻa e ngaahi meʻa kotoa ko ení, naʻá ku hanganaki tala ange kiate ia ke ne foki mai kiate au,+ ka naʻe ʻikai te ne foki mai; pea naʻe hanganaki mamata ʻa Siuta ki hono tokoua kākaá.+ 8 ʻI heʻeku sio ki aí, naʻá ku tuku ange ʻa ʻIsileli taʻefaitōnunga fakataha mo ha tohi vete+ koeʻuhi ko ʻene tonó.+ Ka ko hono tokoua kākā ko Siutá naʻe ʻikai te ne ilifia; naʻá ne ʻalu atu foki mo ia ʻo faifeʻauaki.+ 9 Naʻá ne fakamaʻamaʻaʻi ʻa ʻene feʻauakí, pea naʻá ne hanganaki ʻuliʻi ʻa e fonuá ʻo ne fai ʻa e tono ʻaki ʻa e lotu ki he ngaahi maká mo e ʻakaú.+ 10 Neongo ʻa e meʻa kotoa ko ení, naʻe ʻikai ke foki mai ʻa hono tokoua kākā ko Siutá kiate au ʻaki hono lotó kotoa, ko e fakangalingali pē,’ ko e fanongonongo ia ʻa Sihová.”
11 Naʻe folofola mai leva ʻa Sihova kiate au: “Kuo fakahāhā ʻe ʻIsileli taʻefaitōnunga ʻokú ne māʻoniʻoni ange ʻi Siuta kākā.+ 12 ʻAlu ʻo talaki ʻa e ngaahi leá ni ki he tokelaú:+
“‘“Foki mai, ʻe ʻIsileli fakafetau,” ko e fanongonongo ia ʻa Sihová.’+ ‘“ʻE ʻikai te u hanga fakaʻita hifo* kiate kimoutolu,+ he ʻoku ou mateaki,” ko e fanongonongo ia ʻa Sihová.’ ‘“ʻE ʻikai te u ʻita ai pē ʻo taʻengata. 13 Ko e meʻá pē ke ke ʻiloʻi ʻa hoʻo hiá, he kuó ke angatuʻu kia Sihova ko ho ʻOtuá. ʻOkú ke hanganaki mohe* mo e kau solá* ʻi he lalo ʻakau tupu ʻāfaʻafa kotoa pē, ka naʻe ʻikai te mou talangofua ki hoku leʻó,” ko e fanongonongo ia ʻa Sihová.’”
14 “Foki mai, ʻa kimoutolu ngaahi foha fakafetau,” ko e fanongonongo ia ʻa Sihová. “He kuó u hoko ko homou pule moʻoni;* pea te u ʻave kimoutolu, ko e toko taha mei ha kolo mo e toko ua mei ha fāmili, pea te u ʻomi kimoutolu ki Saione.+ 15 Pea te u ʻoatu kiate kimoutolu ʻa e kau tauhi-sipi ʻoku fehoanaki mo hoku lotó,+ pea te nau fafanga kimoutolu ʻaki ʻa e ʻilo mo e vavanga fakaefakakaukau. 16 Te mou hoko ʻo tokolahi mo tupu fakautuutu ʻi he fonuá ʻi he ngaahi ʻaho ko iá,” ko e fanongonongo ia ʻa Sihová.+ “ʻE ʻikai te nau toe pehē, ‘Ko e ʻaʻake ʻo e fuakava ʻa Sihová!’ ʻE ʻikai ake ia ʻi honau lotó, pea ʻe ʻikai te nau manatua ia pe ʻofa ki ai, pea ʻe ʻikai ke toe ngaohi ia. 17 ʻI he taimi ko iá te nau ui ʻa Selusalema ko e taloni ʻo Sihova;+ pea ʻe fakatahatahaʻi mai ʻa e ngaahi puleʻangá kotoa ki he huafa ʻo Sihová ki Selusalema,+ pea ʻe ʻikai te nau kei loto-fefeka ʻo muimui ki honau loto fulikivanú.”
18 “ʻI he ngaahi ʻaho ko iá te nau ō fakataha, ko e fale ʻo Siutá ʻi he tafaʻaki ʻo e fale ʻo ʻIsilelí,+ pea te nau omi fakataha mei he fonua ʻo e tokelaú ki he fonua naʻá ku foaki ko ha tofiʻa+ ki hoʻomou fanga kuí. 19 Pea naʻá ku fakakaukau, ‘Naʻá ku tuku koe ʻi he lotolotonga ʻo e ngaahi fohá pea foaki atu kiate koe ʻa e fonua lelei, ʻa e tofiʻa fakaʻofoʻofa taha ʻi he lotolotonga ʻo e ngaahi puleʻangá!’*+ Naʻá ku toe fakakaukau te mou ui mai kiate au, ‘ʻA ʻeku Tamai,’ pea ʻe ʻikai te mou tafoki mei he muimui kiate aú. 20 ‘Ko e moʻoni hangē ko e liʻaki ʻe ha uaifi kākā ʻa hono husepānití,* ʻoku pehē ʻa kimoutolu, ʻe fale ʻo ʻIsileli, kuo mou faikākā kiate au,’+ ko e fanongonongo ia ʻa Sihová.”
21 ʻOku ongona ha leʻo mei he ngaahi foʻi māʻolunga tekeleí,
Ko e tangi mo e kōlenga ʻa e kakai ʻo ʻIsilelí,
He kuo nau mioʻi ʻa honau ʻalungá;
Kuo ngalo ʻiate kinautolu ʻa Sihova ko honau ʻOtuá.+
22 “Foki mai, ʻa kimoutolu ngaahi foha fakafetau.
Te u fakamoʻui homou loto fakafetaú.”+
“Ko kimautolu eni! Kuo mau haʻu kiate koe,
He ko koe, ʻe Sihova, ʻa homau ʻOtuá.+
23 Ko e moʻoni naʻa mau kākaaʻi kimautolu ʻi heʻemau longoaʻatuʻu ʻi he ngaahi foʻi māʻolungá mo e ngaahi moʻungá.+
Ko e moʻoni ʻoku ʻia Sihova ko homau ʻOtuá ʻa e fakamoʻui ʻo ʻIsilelí.+
24 Ka kuo keina ʻe he meʻa fakamaá* ʻa e fakaongosia ʻa ʻemau fanga kuí talu mei heʻemau kei talavou,+
ʻA ʻenau fanga sipí mo ʻenau fanga pulú,
ʻA honau ngaahi fohá mo honau ngaahi ʻofefiné.
25 Tuku ke mau tākoto ʻi heʻemau ongoʻi maá,
Pea tuku ke ʻufiʻufi kimautolu ʻe heʻemau ngalivalé,
He kuo mau faiangahala kia Sihova ko homau ʻOtuá,+
ʻA kimautolu mo ʻemau ngaahi tamaí talu mei heʻemau kei talavoú ʻo aʻu mai ki he ʻahó ni,+
Pea kuo ʻikai te mau talangofua ki he leʻo ʻo Sihova ko homau ʻOtuá.”
4 “Kapau te ke foki mai, ʻe ʻIsileli,” ko e fakahaaʻi ia ʻe Sihová,
“Kapau te ke foki mai kiate au
Pea kapau te ke toʻo hoʻo ngaahi ʻaitoli fakalieliá mei hoku ʻaó,
ʻE ʻikai leva te ke hoko ai ko ha tokotaha ʻoku hē takai holo.+
2 Pea kapau te ke fai ha fakapapau,
‘ʻOku ou fuakava ʻia Sihova ko e ʻOtua moʻuí,’ ʻi he moʻoni, fakamaau totonu, mo e māʻoniʻoni,
ʻE maʻu leva ai ʻe he ngaahi puleʻangá hanau tāpuaki ʻiate ia,
Pea te nau pōlepole ʻiate ia.”+
3 He ko e folofola eni ʻa Sihova ki he kau tangata ʻo Siutá pea ki Selusalema:
“Mou palau maʻamoutolu ha konga kelekele ʻoku feʻunga ki he ngoué,
Pea ʻoua ʻe hanganaki tūtuuʻi ʻi he lotolotonga ʻo e ʻakau talatalá.+
4 Mou kamu kimoutolu kia Sihova,
Pea kamu homou lotó,+
ʻA kimoutolu kau tangata ʻo Siutá mo e kau nofo ʻi Selusalemá,
Koeʻuhí ke ʻoua naʻa kakaha ʻeku ʻitá ʻo hangē ha afí
Pea vela ʻo ʻikai ha taha ke ne tāmateʻi ia,
Koeʻuhí ko hoʻomou ngaahi ngāue koví.”+
5 Fakahaaʻi ʻa e meʻá ni ʻi Siuta, pea fanongonongo ia ʻi Selusalema.
Kaila pea ifi ha meʻaifi ʻi he fonuá kotoa.+
Kaila leʻo-lahi ʻo pehē: “Fakatahataha mai,
Pea ke tau hola ki he ngaahi kolo fakakolotaú.+
6 Fokotuʻu ha fakaʻilonga* ke hanga ki Saione.
Kumi ha toitoiʻanga pea ʻoua ʻe tuʻu maʻu,”
He ʻoku ou ʻomi ha fakatamaki mei he tokelaú,+ ko ha fuʻu haveki.
7 Kuó ne ʻasi mai ʻo hangē ha laione mei he pupunga ʻakau ʻoku ʻi aí;+
Ko e faifakaʻauha ʻo e ngaahi puleʻangá kuó ne ʻalu atu.+
Kuó ne ʻalu atu mei hono feituʻú ke ʻai ho fonuá ko ha meʻa ke fai ai ha fakalilifuʻia.
Ko ho ngaahi koló ʻe holoki ki ha ngaahi fokotuʻunga maumau, ʻo ʻikai ha taha ʻe nofo ai.+
8 Ko ia ai, mou ʻai tauangaʻa,+
Tengihia* mo tangilāulau,
Koeʻuhí ko e houhau kakaha ʻa Sihová kuo ʻikai foki ia meiate kitautolu.
9 “ʻI he ʻaho ko iá,” ko e fakahaaʻi ia ʻe Sihová, “ko e loto ʻo e* tuʻí ʻe vaivai,+
Pehē foki ki he loto ʻo e* kau houʻeikí;
Ko e kau taulaʻeikí te nau fakalilifuʻia, pea ko e kau palōfitá te nau ofoofo.”+
10 Naʻá ku pehē leva ai: “ʻOiauē, ʻe ʻEiki Hau Sihova! Kuó ke mātuʻaki kākaaʻi moʻoni ʻa e kakaí ni+ mo Selusalema, ʻi hoʻo folofola, ‘Te mou maʻu ʻa e melinó,’+ lolotonga ia ʻoku tuʻu ʻa e heletaá ʻi homau mongá.”
11 ʻI he taimi ko iá ʻe leaʻaki ai ki he kakaí ni pea ki Selusalema:
“Ko ha matangi vela mei he ngaahi foʻi māʻolunga tekelei ʻo e toafá
ʻE ʻalu hifo ia ki he ʻofefine* ʻo hoku kakaí;
ʻOku ʻikai ko ʻene haʻú ke fai ha ʻauʻau pe ke fai ha fakamaʻa.
12 Ko e matangi ʻoku puhi ʻi he mālohi tahá ʻoku haʻu ia mei he ngaahi feituʻú ni ʻi heʻeku fekau.
Ko eni te u fanongonongo ʻa e fakamaau kiate kinautolu.
13 Vakai! ʻE haʻu ʻa e filí ʻo hangē ha ngaahi konga ʻao ʻuhá,
Pea ko ʻene ngaahi salioté ʻoku hangē ha matangi mālohí.+
Ko ʻene fanga hōsí ʻoku nau veʻe-vave ange ʻi he fanga ʻīkalé.+
Malaʻia ē ko kitautolu, he kuo tau ʻauha!
14 Fufulu ho lotó ke maʻa mei he fulikivanú, ʻe Selusalema, koeʻuhí ke ke hao.+
Ko e hā hono fuoloa hoʻo tukulotoʻi ʻa e ngaahi fakakaukau fulikivanú?
15 He ʻoku tala ʻe ha leʻo ʻa e ongoongo ʻo e meʻa ʻe hoko ki Taní,+
Pea ʻokú ne fanongonongo ʻa e fakatamaki ki he ngaahi moʻunga ʻo ʻIfalemí.
16 Fakahaaʻi ʻa e meʻa ni, ʻio, ki he ngaahi puleʻangá;
Fanongonongo ia ki Selusalema.”
“ʻOku haʻu ʻa e kau leʻo* mei ha fonua mamaʻo,
Pea te nau hiki hake honau leʻó ki he ngaahi kolo ʻo Siutá.
17 ʻOku nau haʻu kiate ia mei he ngaahi tafaʻakí kotoa ʻo hangē ha kau kaʻate ʻo e manafá,+
Koeʻuhí kuó ne angatuʻu kiate au,”+ ko e fakahaaʻi ia ʻe Sihová.
18 “Ko hoʻo ngaahi foungá mo hoʻo ngaahi tōʻongá ʻe tō ia kiate koe.+
He fakamamahi ē ko e fakatamaki ʻoku hoko kiate koé,
He ʻoku aʻu tonu ia ki ho lotó!”
19 ʻOiauē ʻoku ou mamahi,* ʻoku ou mamahi!
ʻOku ou ongoʻi ʻa e mamahi lahi ʻi hoku mafú tonu.*
ʻOku tatū ʻa hoku mafú ʻi loto ʻiate au.
ʻOku ʻikai lava ke u hanganaki fakalongolongo,
He kuó u fanongo ki he leʻo ʻo e meʻaifi,
20 Kuo fakahaaʻi ʻa e fakatamaki hili ʻa e fakatamaki,
He kuo fakaʻauha ʻa e fonuá kotoa.
Kuo fakaʻauha fakafokifā ʻa hoku ngaahi tēnití,
ʻA hoku ngaahi tupenu tēnití+ ʻi ha mōmeniti.
21 Ko e hā hono fuoloa ʻo ʻeku hanganaki sio ki he fakaʻilongá,*
ʻO hanganaki fanongo ki he leʻo ʻo e meʻaifí?+
22 “He ʻoku fakavalevale ʻa hoku kakaí;+
ʻOku ʻikai te nau ʻiloʻi au.
Ko e ngaahi foha sesele kinautolu, ʻoku ʻikai te nau maʻu ʻa e mahinó.
ʻOku feʻungaʻānoa ʻenau ʻiló* ʻi he taimi ke fai ai ʻa e koví,
Ka ʻoku ʻikai te nau ʻiloʻi ʻa e founga ke fai ai ʻa e meʻa ʻoku leleí.”
23 Naʻá ku sio ki he fonuá, pea vakai, ko e koto ngeʻesi mo lala.+
Naʻá ku hanga hake ki he ngaahi langí, pea naʻe ʻikai ke nau toe maama mai.+
24 Naʻá ku sio ki he ngaahi moʻungá, pea vakai, naʻa nau ngaʻeke,
Pea ko e ngaahi foʻi māʻolungá naʻe ngalulu.+
25 Naʻá ku sio pea vakai, naʻe ʻikai ha tangata,
Pea kuo hola kotoa ʻa e fanga manupuna ʻo e langí.+
26 Naʻá ku sio, pea vakai, kuo hoko ʻa e ngoue fuaʻiʻakaú ko ha toafa,
Pea ko hono ngaahi koló kuo holoki kotoa.+
Ko e tupu ia meia Sihova,
Koeʻuhí ko ʻene houhau kakahá.
27 He ko e folofola eni ʻa Sihová: “Ko e fonuá kotoa ʻe hoko ʻo lala,+
Ka heʻikai te u fakahoko ha fakaʻauha fakaʻaufuli.
28 ʻI he ʻuhinga ko ení ʻe tengihia ai ʻa e fonuá,+
Pea ko e ngaahi langí ʻi ʻolunga ʻe hoko ʻo fakapoʻuli.+
Koeʻuhí kuó u lea, kuó u fakapapauʻi,
Pea ʻe ʻikai ke liliu ʻa ʻeku fakakaukaú,* pea ʻe ʻikai te u tafoki mei ai.+
29 ʻI he ongona ʻa e kau heka hōsí mo e kau fana ngahaú,
ʻOku hola ʻa e koló kotoa.+
ʻOku nau hū ki he pupunga ʻakaú,
Pea ʻoku nau kaka ʻi he ngaahi maká.+
ʻOku liʻaki ʻa e kolo kotoa,
Pea ʻoku ʻikai ke nofo ai ha tangata.”
30 Ko eni kuó ke ʻauha, ko e hā te ke faí?
Naʻá ke faʻa kofu kula ʻahoʻaho,
Mo teuʻi ʻaki koe ʻa e ngaahi meʻa-teuteu koula,
Pea ʻai ke fakaʻofoʻofa ho matá ʻaki ʻa e meʻa-vali* ʻuliʻuli.
Ka ko e koto kulanoa ʻa hoʻo ʻai koe ke ke fakaʻofoʻofá,+
He ko e faʻahinga naʻe holi kiate koé kuo nau siʻaki koe;
ʻOku nau kumi he taimí ni ke toʻo ʻa hoʻo moʻuí.+
31 He kuó u fanongo ki he leʻo ʻo hangē ko e leʻo ʻo e fefine ʻoku hoko ki ai ha langa,
Ko e mamahi ʻo hangē ko e mamahi ʻa ha fefine ʻokú ne fanauʻi ʻa ʻene ʻuluaki tamá,
Ko e leʻo ʻo e ʻofefine ʻo Saioné ʻa ia ʻoku hanganaki fakatau ʻene mānavá.
ʻOkú ne pehē ʻi heʻene folahi atu hono ʻaofinimá:+
“ʻOiauē ka ko au, he ʻoku ou ongosia koeʻuhi ko e kau tāmaté!”
5 ʻAlu takai ʻi he ngaahi hala ʻo Selusalemá.
Sio takai holo pea fakatokanga meʻa.
Kumi ʻi hono ngaahi malaʻe fakakoló* ke sio
Pe ʻe lava ke mou maʻu ha tangata ʻoku fakamaau totonu,+
Ha taha ʻoku feinga ke faitōnunga,
Pea te u fakamolemoleʻi ʻa e koló ni.
2 Neongo kapau te nau pehē: “ʻOku mau fuakava ʻia Sihova ko e ʻOtua moʻuí!”
Te nau kei fuakava loi pē.+
3 ʻE Sihova, ʻikai ʻoku fakasio ho fofongá ki he faitōnungá?+
Naʻá ke taaʻi ʻa kinautolu, ka naʻe ʻikai haʻane maongo kiate kinautolu.*
Naʻá ke meimei fakaʻauha ʻosi kinautolu, ka naʻa nau fakafisi ke tali ʻa e akonakí.+
4 Ka naʻá ku pehē loto pē: “Kuo pau moʻoni ko e faʻahinga māʻulaló eni.
ʻOku fakavalevale ʻenau tōʻongá, he ʻoku ʻikai te nau ʻilo ʻa e ʻalunga ʻo Sihová,
ʻA e fakamaau ʻa honau ʻOtuá.
5 Te u ʻalu ki he kau tangata tuʻu-ki-muʻá ʻo lea kiate kinautolu,
He kuo pau pē ʻoku nau ʻiloʻi ʻa e ʻalunga ʻo Sihová,
ʻA e fakamaau ʻa honau ʻOtuá.+
Ka ko hono kotoa ʻo kinautolú kuo nau fesiʻi ʻa e ʻioké
Pea maumauʻi ʻa e ngaahi fakangatangatá.”*
6 Ko e ʻuhinga ia ʻoku ʻohofi ai kinautolu ʻe ha laione ʻo e vaotaá,
Ko ha ulofi ʻo e toafa tokaleleí ʻokú ne hanganaki laiki kinautolu,
ʻOku tokoto ʻāʻā ha lēpati ʻi honau ngaahi koló.
Ko e tokotaha kotoa pē ʻe ʻalu atu mei aí ʻe haehae.
He ʻoku lahi ʻenau ngaahi laka halá;
ʻOku lahi fau ʻenau taʻefaitōnungá.+
7 ʻE lava fēfē ke u fakamolemoleʻi koe ʻi he meʻá ni?
Kuo liʻaki au ʻe ho ngaahi fohá,
Pea ʻoku nau fai ha fakapapau ki he tokotaha ʻoku ʻikai ko ha ʻOtua.+
Naʻá ku fakalato ʻenau ngaahi fiemaʻú,
Ka naʻa nau hanganaki fai ʻa e tono,
Pea naʻa nau ʻaukolo ki he fale ʻo ha feʻauaki.
8 ʻOku nau hangē ha fanga hoosi hohaʻa mo holí,
ʻOku nau tangi taki taha ki he uaifi ʻo ha tangata kehe.+
9 “ʻIkai te u kounaʻi kinautolu ke nau fai ha fakamatala ki he ngaahi meʻá ni?” Ko e fakahaaʻi ia ʻe Sihová.
“ʻIkai te u fai ha sāuni ki ha puleʻanga pehē?”+
10 “ʻAlu atu ki heʻene ngoue kālepí ʻo maumauʻi,
Kae ʻoua naʻa mou fakaʻauha ʻosi ia.+
Toʻo ʻa hono ngaahi huli kuo totoló,
He ʻoku ʻikai ʻa Sihova ia.
11 He ko e fale ʻo ʻIsileli mo e fale ʻo Siutá
Kuo nau mātuʻaki faikākā kiate au,” ko e fakahaaʻi ia ʻe Sihová.+
Heʻikai tō ha fakatamaki kiate kitautolu;
Heʻikai te tau sio ʻi ha heletā pe ko ha honge.’+
13 Ko e kau palōfitá ko e koto matangi ʻatā,
Pea ʻoku ʻikai ʻiate kinautolu ʻa e folofolá.*
Tuku ke hoko ʻa e meʻá ni kiate kinautolu!”
14 Ko ia ai, ko e folofola eni ʻa Sihova, ko e ʻOtua ʻo e ngaahi kau tau:
“Koeʻuhi ko e leaʻaki ʻe he kau tangatá ni ʻa e meʻá ni,
Ko eni ʻoku ou ʻai ʻeku ngaahi leá ko ha afi ʻi ho ngutú,+
Pea ko e kakaí ni ʻa e fefié,
Pea ʻe keina ʻe he afí kinautolu.”+
15 “Ko eni ʻoku ou ʻomi kiate kimoutolu ha puleʻanga mei he mamaʻó, ʻe fale ʻo ʻIsileli,”+ ko e fakahaaʻi ia ʻe Sihová.
“Ko ha puleʻanga tuʻuloa.
Ko ha puleʻanga ʻi he kuonga muʻá,
Ko ha puleʻanga ʻoku ʻikai te ke ʻilo ʻa ʻene leá,
Pea ʻoku ʻikai te ke mahinoʻi ʻa e meʻa ʻokú ne leaʻakí.+
16 Ko ʻenau faʻoʻanga ngahaú ʻoku hangē ko ha faʻitoka ʻoku fakamangá;
Ko kinautolú kotoa ko e kau pāteʻi tau.
17 Te nau keina hoʻo utu-taʻú mo hoʻo maá.+
Te nau keina ho ngaahi fohá mo ho ngaahi ʻofefiné.
Te nau keina hoʻo fanga sipí mo hoʻo fanga pulú.
Te nau keina ho ʻulu kālepí mo ho ʻulu fikí.
Te nau fakaʻauha ʻaki ʻa e heletā ho ngaahi kolo fakakolotau ʻa ia ʻokú ke falala ki aí.”
18 “Ka naʻa mo e ngaahi ʻaho ko iá,” ko e fakahaaʻi ia ʻe Sihová, “ʻE ʻikai te u fakaʻauha ʻosi kimoutolu.+ 19 Pea ʻi he taimi te nau ʻeke ai, ‘Ko e hā kuo fai ai ʻe Sihova ko hotau ʻOtuá ʻa e ngaahi meʻá ni kotoa kiate kitautolú?’ Pea te ke tali kiate kinautolu, ‘Hangē pē ko hoʻomou liʻaki au ʻo mou tauhi ki ha ʻotua muli ʻi homou fonuá, ko ia te mou tauhi ki ha kau muli ʻi ha fonua ʻoku ʻikai ʻamoutolu.’”+
20 Talaki ʻa e meʻá ni ʻi he fale ʻo Sēkopé,
Pea fanongonongo ia ʻi Siuta, ʻo pehē:
21 “Fanongo ki he meʻá ni, ʻa kimoutolu kakai vale mo taʻeʻatamai:*+
ʻOku ʻi ai honau mata ka ʻoku ʻikai lava ke nau sio;+
ʻOku ʻi ai honau telinga ka ʻoku ʻikai lava ke nau fanongo.+
22 ‘ʻOku ʻikai koā te mou manavahē kiate au?’ Ko e fakahaaʻi ia ʻe Sihová,
‘ʻE ʻikai koā te mou tetetete ʻi hoku ʻaó?
Ko au ia naʻá ku fokotuʻu ʻa e ʻoneʻoné ko e fakangatangata ki he tahí,
Ko ha tuʻutuʻuni tuʻuloa ʻe ʻikai lava ke fakalaka atu ai.
Neongo ʻa e hou ʻa hono ngaahi peaú, heʻikai lava ke nau ikuna;
Neongo ʻenau ʻuʻulú, ʻe ʻikai pē lava ke nau fakalaka atu ai.+
23 Ka ko e kakaí ni ʻoku nau loto-fefeka mo angatuʻu;
Kuo nau afe ʻo fou ʻi honau hala pē ʻonautolu.+
24 Pea ʻoku ʻikai te nau pehē ʻi honau lotó:
“Tau manavahē he taimí ni kia Sihova ko hotau ʻOtuá,
ʻA e Tokotaha ʻokú ne foaki mai ʻa e ʻuhá ʻi hono faʻahitaʻú,
Fakatouʻosi ʻa e ʻuha ʻi he faʻahitaʻu fakatōlaú mo e ʻuha ʻi he faʻahitaʻu failaú,
ʻA e Tokotaha ʻokú ne tauhi maʻatautolu ʻa e ngaahi uike kuo kotofa ʻo e utu-taʻú.”+
25 Ko hoʻomou ngaahi faihalá kuó ne taʻofi ʻa e ngaahi meʻá ni mei heʻene hoko maí;
Ko hoʻomou ngaahi angahalá tonu kuó ne toʻo meiate kimoutolu ʻa e meʻa ʻoku leleí.+
26 He ʻoku ʻi ai ha kau tangata fulikivanu ʻi he lotolotonga ʻo hoku kakaí.
ʻOku nau hanganaki fakasio, ʻo hangē ko e taimi ʻoku tulolo hifo ai ʻa e kau pō manupuná.
ʻOku nau tau ha tauhele fakatupu mate.
Ko e kakaí ʻoku nau poó.
27 Hangē ha ʻā ʻoku fonu ʻi he fanga manupuná,
ʻOku pehē ʻa e fonu honau ngaahi falé ʻi he ngaahi meʻa ʻoku maʻu ʻi he kākaá.+
Ko e ʻuhinga ia ʻoku nau hoko ai ʻo mālohi mo koloaʻiá.
28 Kuo nau sisino mo hamolemole;
ʻOku nau fonu mahuohua ʻi he koví.
ʻOku ʻikai te nau fai ha fakamaau totonu ki he tamai-maté,+
Koeʻuhí ke nau lavameʻa ai;
Pea ʻoku nau taʻofi ʻa e fakamaau totonú mei he masivá.’”+
29 “ʻIkai te u kounaʻi kinautolu ke nau fai ha fakamatala ki he ngaahi meʻá ni?” Ko e fakahaaʻi ia ʻe Sihová.
“ʻIkai te u fai ha sāuni ki ha puleʻanga pehē?
30 Kuo hoko ha meʻa fakamanavahē mo fakalilifu ʻi he fonuá:
31 ʻOku kikite loi ʻa e kau palōfitá,+
Pea ko e kau taulaʻeikí ʻoku nau pule ʻi he mafai pē ʻo kinautolu.
Pea ʻoku saiʻia ʻa hoku kakaí tonu ʻi he founga ko iá.+
Ka ko e hā ʻa e meʻa te mou faí ʻi he hoko mai ʻa e ngataʻangá?”
6 Mou toi, ʻe ngaahi foha ʻo Penisimani, ʻo mamaʻo mei Selusalema.
He ʻoku maluʻaki mai ha faingataʻa mei he tokelaú, ko ha fuʻu fakatamaki.+
2 Ko e ʻofefine ʻo Saioné ʻoku hangē ha fefine hoihoifua mo fakapelepeleʻí.+
3 Ko e kau tauhi-sipí mo ʻenau ngaahi tākangá te nau haʻu.
Te nau fokotuʻu takatakai ʻiate ia+ ʻa honau ngaahi tēnití,
ʻO taki taha fakakaikai ai ʻa e tākanga ʻokú ne tokangaʻí.+
4 “Teuteu ke* tau mo ia!
Tuʻu hake, pea ke tau ʻohofi ia ʻi he hoʻatā mālié!”
“ʻOiauē ko kitautolu, he ʻoku mei ʻosi ʻa e ʻahó,
He ko e ʻata he efiafí ʻoku ʻalu ke lōloa ange!”
5 “Tuʻu hake, pea ke tau ʻoho ʻi he lolotonga ʻa e poʻulí
ʻO fakaʻauha ʻa hono ngaahi taua fakakolotaú.”+
6 He ko e folofola eni ʻa Sihova ʻo e ngaahi kau taú:
“Tā hifo ʻa e ʻakaú pea fokotuʻu ʻaki ha fakatafunga kelekele ki Selusalema.+
Ko ia ʻa e kolo kuo pau ke ne fai ha fakamatalá;
ʻOku halaʻatā ha meʻa ka ko e fakafeʻātungia pē ʻoku ʻiate iá.+
7 Hangē ko hono tauhi ʻe ha lepa ke mokomoko* ʻa e vai ʻoku ʻi aí,
ʻOku pehē ʻene tauhi ke mokomoko* ʻa ʻene fulikivanú.
ʻOku fanongoa ʻa e fakamālohi mo e fakaʻauha ʻiate ia;+
Ko e puké mo e fakatamakí ʻoku ʻi hoku ʻaó maʻu pē.
8 Ko eni e fakatokangá, ʻe Selusalema, ka ʻikai te u hanga kehe meiate koe ʻi he palakūʻia;+
Te u ʻai koe ke lala, ko ha fonua ʻoku ʻikai ha kau nofo ai.”+
9 Ko e folofola eni ʻa Sihova ʻo e ngaahi kau tau:
“Te nau tufi fakaʻāuliliki ʻa e toenga ʻo ʻIsilelí ʻo hangē ko e toenga kālepi ʻi ha fuʻu kālepí.
Toe ala atu ho nimá ʻo hangē ha taha ʻokú ne tānaki ʻa e kālepi mei he ʻulu kālepí.”
10 “Ko hai ia te u lea ki ai ʻo fai ha fakatokangá?
Ko hai ia ʻe fanongó?
Vakai! ʻOku tāpuni honau telingá,* ko ia ʻoku ʻikai lava ai ke nau tokanga.+
Vakai! Kuo hoko ʻa e folofola ʻa Sihová ko ha meʻa ke nau lumaʻi;+
ʻOku ʻikai te nau leleiʻia ai.
11 Ko ia ʻoku ou fonu ai ʻi he houhau ʻa Sihová,
Pea ʻoku ou foʻi ʻi he feinga ke mapukepuke iá.”+
“Huaʻi atu ia ki he kiʻi tama ʻi he halá,+
Ki he pupunga ʻo e kau talavou ʻoku fakatahatahá.
ʻE puke kotoa kinautolu, ha tangata fakataha mo hono uaifí,
12 ʻE ʻave honau ngaahi falé maʻá e niʻihi kehé,
Fakataha mo ʻenau ngaahi ngoué mo honau ngaahi uaifí.+
He te u mafao atu hoku nimá ki he kakai ʻo e fonuá,” ko e fanongonongo ia ʻa Sihová.
13 “He mei he siʻi tahá ki he lahi tahá, ko e tokotaha taki taha ʻokú ne maʻu ʻa e tupu ʻi he taʻefaitotonu;+
Mei he palōfitá ki he taulaʻeikí, ko e tokotaha taki taha ʻoku faikākā.+
14 Pea ʻoku nau feinga ke fakamoʻui ʻa e kafo* ʻa hoku kakaí ʻi he fakatakākā,* ʻo nau pehē,
‘ʻOku ʻi ai ʻa e melino! ʻOku ʻi ai ʻa e melino!’
Lolotonga iá ʻoku ʻikai ha melino.+
15 ʻOku nau ongoʻi mā ʻi he ngaahi meʻa fakalielia kuo nau faí?
ʻOku ʻikai ʻaupito haʻanau mā!
ʻOku ʻikai ʻaupito pē te nau ʻilo ʻa e ongoʻi maá!+
Ko ia te nau tō ʻi he lotolotonga ʻo e faʻahinga kuo toó.
ʻI heʻeku ʻomi ʻa e tautea kiate kinautolú te nau humu,” ko e folofola ia ʻa Sihová.
16 Ko e folofola eni ʻa Sihová:
“Tuʻu ʻi he ngaahi manga-halá ʻo sio.
ʻEke ʻo fekauʻaki mo e ngaahi ʻaluʻanga motuʻá,
ʻEke pe ko fē ʻa e hala leleí, pea ʻalu ai,+
Pea te mou maʻu ai ha mālōlō.”
Ka ʻoku nau pehē: “ʻE ʻikai te mau ʻalu ai.”+
17 “Pea naʻá ku fakanofo ha kau tangata leʻo+ ʻa ia naʻa nau pehē,
‘Tokanga ki he leʻo ʻo e meʻaifí!’”+
Ka naʻa nau pehē: “Heʻikai te mau tokanga.”+
18 “Ko ia, ʻa e ngaahi puleʻanga, ke mou fanongo!
ʻA e fuʻu fakatahá, ke mou ʻiloʻi,
ʻA e meʻa ʻe hoko kiate kinautolú.
19 Fanongo, ʻa e māmaní!
ʻOku ou ʻomi ha fakatamaki ki he kakaí ni+
Ko e fua ia ʻo ʻenau ngaahi filioʻí,
He naʻe ʻikai te nau tokanga ki heʻeku leá
Pea naʻa nau siʻaki ʻa ʻeku laó.”*
20 “Ko e hā ke u tokanga ai ki hoʻo ʻomi ʻinisēnisi hinehina mei Sipá
Mo e kaho namu-kakala mei ha fonua mamaʻó?
Ko hoʻomou ngaahi feilaulau tutu kakató ʻoku ʻikai te u tali,
Pea ko hoʻomou ngaahi feilaulaú ʻoku ʻikai haʻaku leleiʻia ai.”+
21 Ko ia ai, ko e folofola eni ʻa Sihová:
“Ko au eni ʻoku ou fokotuʻu ha ngaahi tūkiaʻanga ki he kakaí ni,
Pea te nau humu ai,
ʻA e ngaahi tamaí fakataha mo e ngaahi fohá,
Ha kaungāʻapi mo hono kaungāmeʻá,
Pea te nau ʻauha hono kotoa.”+
22 Ko e folofola eni ʻa Sihová:
“Vakai! ʻOku haʻu ha kakai mei he fonua ʻo e tokelaú,
Pea ʻe mālanga hake ha fuʻu puleʻanga mei he ngaahi feituʻu mamaʻo taha ʻo e māmaní.+
23 Te nau puke ʻa e kaufana mo e tao.
ʻOku nau anga-fītaʻa pea ʻikai te nau meesi.
ʻE ʻuʻulu honau leʻó ʻo hangē ko e tahí,
Pea ʻoku nau heka ʻi he fanga hoosi.+
ʻOku nau fakatē tau hangē ha tangata ʻoku faitau mo koé, ʻe ʻofefine ʻo Saione.”
24 Kuo mau fanongo ʻi he ongoongo ʻo fekauʻaki mo iá.
ʻOku lī noa pē ʻa homau nimá;+
Kuo pukenimā kimautolu ʻe he faingataʻá,
Pea mo e mamahi* hangē ko ia ʻoku hoko ki ha fefine ʻoku fāʻelé.+
25 ʻOua ʻe ʻalu atu ki he ngoué,
Pea ʻoua ʻe ʻalu ʻi he halá,
He ko e filí ʻoku ʻi ai ʻene heletā;
ʻOku ʻi ai ha manavahē ʻi he feituʻu kotoa pē.
26 ʻE ʻofefine ʻo hoku kakai,
ʻAi tauangaʻa+ pea teka ʻi he efuefú.
Tengihia ʻo hangē hano tengihia ha foha pē ʻe toko tahá, ʻo mātuʻaki tangilāulau,+
He ʻe hoko fakafokifā mai kiate kitautolu ʻa e tokotaha faifakaʻauhá.+
27 “Kuó u ngaohi koe* ko ha tokotaha sivi mētale ʻi he lotolotonga ʻo hoku kakaí,
Ko e tokotaha ʻokú ne fai ha fakatotolo fakaʻāuliliki;
Kuo pau ke ke tokanga pea vakaiʻi honau halá.
28 Ko kinautolu kotoa ko e kau tangata mātuʻaki loto-fefeka,+
ʻOku nau ʻalu fano holo ko e kau laukovi loi.+
ʻOku nau hangē ha kopa mo ha ukameá;
Ko kinautolu kotoa ʻoku nau kākā.
29 Kuo vela ʻa e meʻa-tapilí.
ʻOku haʻu mei he afí ʻa e mētale ko e pulu.
Ko e sivi ʻoku hanganaki feinga lahi ha taha ke faí ko e koto kulanoa,+
Pea ko kinautolu ʻoku koví kuo ʻikai ke fakamavaheʻi.+
30 Ko e moʻoni ʻe ui kinautolu ʻe he kakaí ko ha siliva liʻaki,
He kuo liʻaki kinautolu ʻe Sihova.”+
7 Ko e folofola eni naʻe hoko mai kia Selemaia meia Sihova, ʻo pehē: 2 “Tuʻu ʻi he matapā ʻo e fale ʻo Sihová pea fanongonongo ʻi ai ʻa e pōpoaki ko ení, ‘Fanongo mai ki he folofola ʻa Sihová, ʻa kimoutolu kakai kotoa ʻo Siuta ʻoku mou hū ʻi he ngaahi matapaá ni ke punou kia Sihová. 3 Ko e folofola eni ʻa Sihova ʻo e ngaahi kau tau, ko e ʻOtua ʻo ʻIsilelí: “Liliu hoʻomou ngaahi foungá mo hoʻomou tōʻongá, pea te u tuku ke mou nofo ai pē ʻi he feituʻú ni.+ 4 ʻOua naʻa mou falala ki he ngaahi lea kākā ʻo mou pehē, ‘Ko eni* ʻa e temipale ʻo Sihová, ʻa e temipale ʻo Sihová, ʻa e temipale ʻo Sihová!’+ 5 He kapau te mou liliu moʻoni ʻa hoʻomou ngaahi foungá mo e tōʻongá; kapau te mou pouaki moʻoni ʻa e fakamaau totonu ʻi he vahaʻa ʻo ha tangata mo hono kaungāʻapí;+ 6 kapau ʻe ʻikai te mou fakafeʻātungiaʻi ʻa e kau mulí, kau paeá,* mo e kau uitoú;+ kapau ʻe ʻikai te mou lilingi ha toto taʻehalaia ʻi he feituʻú ni; pea kapau ʻe ʻikai te mou muimui ʻi he ngaahi ʻotua kehé ke mou kovi ai;+ 7 te u tuku leva ke mou nofo ai pē ʻi he feituʻú ni, ʻi he fonua naʻá ku foaki ʻo taʻengata* ki hoʻomou fanga kuí.”’”
8 “Ka ʻoku tuku hoʻomou falalá ʻi he ngaahi lea kākā+—ʻe ʻikai ʻaupito ke ne ʻomi ha lelei. 9 ʻE lava koā ke mou kaihaʻa,+ fakapō, tono, fuakava loi,+ fai ha ngaahi feilaulau* kia Pēali,+ pea muimui ʻi he ngaahi ʻotua naʻe ʻikai te mou ʻiloʻi, 10 pea mou haʻu leva ʻo tuʻu ʻi hoku ʻaó ʻi he fale ko eni ʻoku uiʻaki hoku hingoá ʻo mou pehē, ‘ʻE fakahaofi kimautolu,’ neongo hoʻomou fai ʻa e ngaahi meʻa fakalielia kotoa ko ení? 11 Kuo hoko koā ʻa e fale ko eni ʻoku uiʻaki ʻa hoku hingoá ko ha ʻana ʻo e kau kaihaʻa ʻi hoʻomou vakaí?+ Ko eni kuó u sio tonu ki ai,” ko e fakahaaʻi ia ʻe Sihová.
12 “‘Kae kehe, mou ō he taimí ni ki hoku feituʻu toputapu ʻi Sailó,+ ʻa ia naʻá ku muʻaki ʻai ke ʻi ai ʻa hoku hingoá,+ pea sio ki he meʻa naʻá ku fai ki ai koeʻuhí ko e kovi ʻa hoku kakai ʻIsilelí.+ 13 Ka naʻa mou hanganaki fai ʻa e ngaahi meʻa kotoa ko ení,’ ko e fakahaaʻi ia ʻe Sihová, ‘pea neongo naʻá ku toutou lea atu* kiate kimoutolu, naʻe ʻikai te mou fanongo.+ Naʻá ku hanganaki ui kiate kimoutolu, ka naʻe ʻikai te mou fai mai ha tali.+ 14 Ko ia te u fai ki he fale ʻa ia ʻoku uiʻaki hoku hingoá,+ ʻa ia ʻoku mou falala ki aí,+ pea ki he feituʻu ko eni naʻá ku foaki atu kiate kimoutolu mo hoʻomou fanga kuí, ʻo hangē pē ko ia naʻá ku fai ki Sailó.+ 15 Te u siʻaki kimoutolu mei hoku ʻaó, ʻo hangē pē ko ʻeku siʻaki homou fanga tokouá kotoa, ʻa e hako kotoa ʻo ʻIfalemí.’+
16 “Ko e meʻa kiate koé, ʻoua naʻá ke lotu maʻá e kakaí ni. ʻOua naʻá ke tangi hake pe fai ha lotu pe kōlenga mai kiate au koeʻuhi ko kinautolu,+ koeʻuhí ʻe ʻikai te u fanongo atu kiate koe.+ 17 ʻOku ʻikai koā te ke sio ki he meʻa ʻoku nau fai ʻi he ngaahi kolo ʻo Siutá pea ʻi he ngaahi hala ʻo Selusalemá? 18 ʻOku tufi fefie ʻa e ngaahi fohá, ʻoku tafu afi ʻa e ngaahi tamaí, pea ʻoku natu takaonga mahoaʻa ʻa e ngaahi uaifí koeʻuhi ke ngaohiʻaki ha ngaahi mā feilaulau ki he Kuini ʻo Hēvaní,*+ pea ʻoku nau lilingi ʻa e ngaahi feilaulau inu ki he ngaahi ʻotua kehé ke fakaʻitaʻi ai au.+ 19 ‘Ka ko au koā ʻa e tokotaha ʻoku nau fakalotomamahiʻí?’* Ko e fakahaaʻi ia ʻe Sihová. ‘ʻIkai ko kinautolu pē ia, ʻo nau mā ai?’+ 20 Ko ia ko e folofola eni ʻa e ʻEiki Hau ko Sihová, ‘Vakai! ʻE lilingi ʻa ʻeku ʻitá mo ʻeku tuputāmaki kakahá ki he feituʻú ni,+ ki he tangata mo e manu, ki he ʻuluʻakau ʻo e ngoué mo e fua ʻo e kelekelé; ʻe vela ʻa ʻeku ʻitá pea ʻe ʻikai ke tāmateʻi.’+
21 “Ko e folofola eni ʻa Sihova ʻo e ngaahi kau tau, ko e ʻOtua ʻo ʻIsilelí, ‘Mou fai ia, tānaki atu hoʻomou ngaahi feilaulau tutu kakató ki hoʻomou ngaahi feilaulau kehé, pea mou kai ʻa e kakanoʻi-manú.+ 22 He ʻi he ʻaho naʻá ku ʻomi ai hoʻomou fanga kuí mei he fonua ko ʻIsipité, naʻe ʻikai te u lea kiate kinautolu pe fai ha tuʻutuʻuni kiate kinautolu ʻo fekauʻaki mo e ngaahi feilaulau tutu kakató mo e ngaahi feilaulaú.+ 23 Ka naʻá ku ʻoange kiate kinautolu ʻa e fekaú ni: “Talangofua ki hoku leʻó, pea te u hoko ko homou ʻOtua, pea te mou hoko ko hoku kakai.+ Kuo pau ke mou ʻaʻeva ʻi he kotoa ʻo e ngaahi hala ʻoku ou fekau atú, koeʻuhí ʻe lelei ia kiate kimoutolu.”’+ 24 Ka naʻe ʻikai te nau fanongo pe fokotuʻu telinga mai;+ ʻi hono kehé, naʻa nau ʻaʻeva ʻi heʻenau ngaahi filioʻi* pē ʻanautolú, ʻo nau muimui anga-fefeka ʻi honau loto fulikivanú,+ pea nau ʻalu fakaholomui ʻo ʻikai ke nau laka ki muʻa, 25 mei he ʻaho naʻe haʻu ai ʻa hoʻomou fanga kuí mei he fonua ko ʻIsipité ʻo aʻu mai ki he ʻahó ni.+ Ko ia naʻá ku hanganaki fekau atu ʻa e kotoa ʻo ʻeku kau sevāniti ko e kau palōfitá kiate kimoutolu, ʻo u toutou fekauʻi atu kinautolu ʻi he ʻaho taki taha.*+ 26 Ka naʻa nau fakafisi ke fanongo kiate au, pea naʻe ʻikai te nau fokotuʻu telinga mai.+ ʻI hono kehé, naʻa nau loto-fefeka,* pea naʻe kovi ange ʻenau tōʻongá ʻi heʻenau fanga kuí!
27 “Te ke leaʻaki ʻa e ngaahi leá ni kotoa kiate kinautolu,+ ka heʻikai te nau fanongo kiate koe; te ke ui kiate kinautolu ka heʻikai te nau fai ha tali kiate koe. 28 Pea te ke lea kiate kinautolu, ‘Ko e puleʻanga eni naʻe ʻikai te nau talangofua ki he leʻo ʻo Sihova ko honau ʻOtuá pea fakafisi ke tali ʻa ʻene akonakí. Kuo mole ʻa e faitōnungá pea ʻoku ʻikai teitei fai ha lave ki ai ʻi honau lotolotongá.’*+
29 “Kosi ho louʻulu loloá* pea laku ia, pea hiki hake ha taʻanga tangi* ʻi he ngaahi foʻi māʻolunga tekeleí, he kuo siʻaki ʻe Sihova pea te ne liʻaki ʻa e toʻutangata ko eni kuo nau fakahouhauʻi iá. 30 ‘He kuo fai ʻe he kakai ʻo Siutá ʻa e meʻa ʻoku kovi ʻi heʻeku vakaí,’ ko e fakahaaʻi ia ʻe Sihová. ‘Kuo nau fokotuʻu ʻenau ngaahi ʻaitoli fakalieliá ʻi he fale ʻoku uiʻaki hoku hingoá, koeʻuhí ke ʻuliʻi ia.+ 31 Kuo nau langa ʻa e ngaahi potu māʻolunga ʻi Tōfeti, ʻa ia ʻoku ʻi he Teleʻa ʻo e Foha ʻo Hīnomí,*+ koeʻuhí ke tutu ai honau ngaahi fohá mo honau ngaahi ʻofefiné ʻi he afi,+ ko e meʻa naʻe ʻikai te u tuʻutuʻuni pea naʻe ʻikai ʻaupito ke teitei ake ia ʻi hoku lotó.’*+
32 “‘Ko ia ai, vakai, ʻoku hoko mai ʻa e ngaahi ʻaho,’ ko e fakahaaʻi ia ʻe Sihová, ‘ʻa ia ʻe ʻikai ke kei ui ia ko Tōfeti pe ko e Teleʻa ʻo e Foha ʻo Hīnomí* ka ko e Teleʻa ʻo e Tāmate. Te nau tanu ʻa e kau maté ʻi Tōfeti kae ʻoua kuo ʻikai ke kei toe ha feituʻu.+ 33 Pea ko e ngaahi sino kuo mate ʻo e kakaí ni ʻe hoko ia ko e meʻakai ki he fanga manupuna ʻo e langí mo e fanga manu ʻo e fonuá, pea ʻe ʻikai ha taha te ne seʻe kinautolu.+ 34 Te u fakangata ʻa e ongo mai ʻa e fiefiá mo e ongo mai ʻa e mavavá, ʻa e leʻo ʻo e tangata malí mo e leʻo ʻo e taʻahine malí,+ ʻi he ngaahi kolo ʻo Siutá pea ʻi he ngaahi hala ʻo Selusalemá, he ko e fonuá ʻe hoko ko e fokotuʻunga maumau.’”+
8 “ʻI he taimi ko iá,” ko e fakahaaʻi ia ʻe Sihová, “ko e ngaahi hui ʻo e ngaahi tuʻi ʻo Siutá, mo e ngaahi hui ʻo hono kau houʻeikí, mo e ngaahi hui ʻo e kau taulaʻeikí, mo e ngaahi hui ʻo e kau palōfitá, pea mo e ngaahi hui ʻo e kakai ʻo Selusalemá ʻe taʻaki hake mei honau ngaahi faʻitoká. 2 ʻE folahi atu ia ʻi he laʻaá mo e māhiná pea ki he kotoa ʻo e ngaahi kongakau ʻo e langí ʻa ia naʻa nau ʻofa mo tauhi mo muimui mo kumi mo punou ki aí.+ ʻE ʻikai ke fakatahatahaʻi ia pea ʻe ʻikai ke tanu. ʻE hoko ia ʻo hangē ha kinohaʻa ʻi he fukahi kelekelé.”+
3 “Pea ko e toenga ʻo e fāmili kovi ko eni ʻoku kei moʻuí te nau fili ki he maté kae ʻikai ko e moʻuí ʻi he kotoa ʻo e ngaahi feituʻu ʻoku ou fakamovete atu ai kinautolú,” ko e fakahaaʻi ia ʻe Sihova ʻo e ngaahi kau taú.
4 “Pea kuo pau ke ke lea kiate kinautolu, ‘Ko e meʻa eni ʻoku folofolaʻaki ʻe Sihová:
“Te nau tō pea ʻikai toe tuʻu hake?
Kapau ʻe tafoki mai ha tokotaha, ʻikai ʻe toe tafoki mai mo e tokotaha ʻe tahá?
5 Ko e hā kuo pehē ai ʻa e kakaí ni, ʻa Selusalema, ʻo hokohoko taʻefaitōnungá?
ʻOku nau piki maʻu ki he kākaá;
ʻOku nau fakafisi ke tafoki mai.+
6 Naʻá ku tokanga pea hanganaki fanongo, ka ko e founga ʻo ʻenau leá naʻe ʻikai totonu.
Naʻe ʻikai ha tangata ʻe fakatomala mei heʻene anga-fulikivanú pe te ne ʻeke, ‘Ko e hā kuó u faí?’+
Ko e tokotaha taki taha ʻokú ne toutou foki ki he ʻalunga ʻoku manakoá, ʻo hangē ha hoosi ʻoku ʻoho atu ki he taú.
7 Naʻa mo e sitoake ʻi he ʻataá ʻokú ne ʻilo ʻa hono faʻahitaʻú;*
Ko e kulukulú mo e fanga manupuna kehé ʻoku nau tauhi ki he taimi ʻoku nau foki aí.*
Ka ʻoku ʻikai mahino ki hoku kakaí tonu ʻa e fakamaau ʻa Sihová.”’+
8 ‘ʻOku anga-fēfē hoʻomou pehē: “ʻOku mau poto, pea ʻoku mau maʻu ʻa e lao* ʻa Sihová”?
He ko hono moʻoní, ko e peni+ kākā ʻa e kau sikalaipé* kuo ngāueʻaki pē ia ke tohi ʻaki ʻa e loí.
9 Kuo fakamaaʻi ʻa e kau potó.+
Kuo nau hoko ʻo ilifia pea ʻe maʻu kinautolu.
Vakai! Kuo nau siʻaki ʻa e folofola ʻa Sihová,
Pea ko e hā ʻa e poto ʻoku nau maʻú?
10 Ko ia te u foaki honau ngaahi uaifí ki ha kau tangata kehe,
Ko ʻenau ngaahi ngoué ke maʻu ʻe ha kakai kehe;+
He mei he siʻi tahá ki he lahi tahá, ko e tokotaha taki taha ʻokú ne maʻu ʻa e tupu ʻi he taʻefaitotonu;+
Mei he palōfitá ki he taulaʻeikí, ko e tokotaha taki taha ʻoku faikākā.+
11 Pea ʻoku nau feinga ke fakamoʻui ʻa e kafo* ʻa e ʻofefine ʻo hoku kakaí ʻi he fakatakākā,* ʻo nau pehē,
“ʻOku ʻi ai ʻa e melino! ʻOku ʻi ai ʻa e melino!”
Lolotonga iá ʻoku ʻikai ha melino.+
12 ʻOku nau ongoʻi mā ʻi he ngaahi meʻa fakalielia kuo nau faí?
ʻOku ʻikai ʻaupito haʻanau mā!
ʻOku ʻikai ʻaupito pē te nau ʻilo ʻa e ongoʻi maá!+
Ko ia te nau tō ʻi he lotolotonga ʻo e faʻahinga kuo toó.
ʻI heʻeku ʻomi ʻa e tautea kiate kinautolú te nau humu,’+ ko e folofola ia ʻa Sihová.
13 ‘ʻI heʻeku tānaki fakatahatahaʻi kinautolú, te u fakaʻauha kinautolu,’ ko e fakahaaʻi ia ʻe Sihová.
‘Heʻikai ke toe ha kālepi ʻi he fuʻu kālepí, pe ko ha fiki ʻi he fuʻu fikí, pea ʻe mae honau laú.
Pea ko e meʻa naʻá ku foaki kiate kinautolú ʻe mole meiate kinautolu.’”
14 “Ko e hā ʻoku tau tangutu ai ʻi hení?
Tau fakatahataha ʻo hū atu ki he ngaahi kolo fakakolotaú+ pea tau mate ai.
He ʻe fakaʻauha kitautolu ʻe Sihova ko hotau ʻOtuá,
Pea ʻokú ne ʻomi kiate kitautolu ʻa e vai kona ke tau inu,+
Koeʻuhi he kuo tau faiangahala kia Sihova.
15 Naʻe ʻi ai ha ʻamanaki ki ha melino, ka naʻe ʻikai ha meʻa lelei ʻe hoko,
Ki ha taimi ʻo e fakamoʻui, ka ko e manavahē pē!+
16 ʻOku ongo mai mei Tani ʻa e māfulu ʻa e fanga hoosi ʻa e filí.
ʻI he ongo mai ʻa e tangi ʻa ʻene fanga hoosi ki he taú,
ʻOku ngalulu ʻa e fonuá kotoa.
ʻOku haʻu ʻa e filí ʻo keina ʻa e fonuá mo e meʻa kotoa ʻoku ʻi aí,
ʻA e koló mo hono kakaí.”
17 “He ko au eni ʻoku ou tuku atu ha fanga ngata ki homou lotolotongá,
Ko ha fanga ngata kona ʻa ia ʻe ʻikai lava ke fakalalataʻi,
Pea te nau uʻu moʻoni kimoutolu,” ko e fakahaaʻi ia ʻe Sihová.
18 Ko hoku mamahí ʻoku ʻikai lava ke faitoʻo;
ʻOku mahamahaki ʻa hoku lotó.
19 ʻOku ʻi ai ha tangi ki ha tokoni mei ha fonua mamaʻo
Mei he ʻofefine ʻo hoku kakaí:
“ʻOku ʻikai ke ʻi Saione ʻa Sihova?
Pe ʻoku ʻikai ke ʻiate ia ʻa hono tuʻí?”
“Ko e hā kuo nau fakalotomamahiʻi ai au ʻaki ʻenau ngaahi ʻīmisi kuo tongí,
ʻAki honau ngaahi ʻotua muli ko e koto taʻeʻaongá?”
20 “Kuo ʻosi atu ʻa e utu-taʻú, kuo ʻosi mo e faʻahitaʻu māfaná,
Ka kuo teʻeki ke fakahaofi kitautolu!”
21 ʻOku ou fakalilifuʻia ʻi he kafo ʻa e ʻofefine ʻo hoku kakaí;+
ʻOku ou mafasia.
Kuo maʻunimā au ʻe he manavaheé.
22 ʻOku ʻikai koā ha paʻame* ʻi Kiliati?+
Pe ʻoku ʻikai koā ha tokotaha faitoʻo* ʻi ai?+
Ko e hā kuo ʻikai ke toe foki ai ʻa e ʻofefine ʻo hoku kakaí ʻo moʻui leleí?+
9 Taumaiā ko ha vai ʻa hoku ʻulú,
Pea ko ha matavai ʻo e loʻimata ʻa hoku ongo matá!+
Ka u tangi ʻi he ʻaho mo e pō
Maʻá e faʻahinga kuo tāmateʻi ʻi hoku kakaí.
2 Taumaiā naʻá ku maʻu ha fale talifononga ʻi he toafá!
Pea te u liʻaki ʻa hoku kakaí peá u mavahe meiate kinautolu,
He ko e kau tono+ kotoa kinautolu,
Ko ha fuʻufuʻunga kakai kākā.
3 ʻOku nau peluki honau ʻeleló ʻo hangē ha kaufaná;
Ko e loí, ʻo ʻikai ko e totonú ʻoku failahia ʻi he fonuá.+
“ʻOku nau fakaʻau mei he kovi ki he kovi,
Pea ʻoku ʻikai te nau tokanga mai kiate au,”+ ko e fakahaaʻi ia ʻe Sihová.
4 “ʻA e tokotaha kotoa, tokanga telia ho kaungāʻapí,
Pea ʻoua te mou falala ʻo tatau ai pē kapau ko homou tokoua.
He ko ha taha pē ko homou tokoua ko ha tokotaha lavaki ia,+
Pea ko e kaungāʻapi kotoa pē ko ha tokotaha laukovi loi.+
5 ʻOku kākaaʻi ʻe he tokotaha taki taha ʻa hono kaungāʻapí,
Pea ʻoku ʻikai ha taha ʻe lea moʻoni.
Kuo nau akoʻi honau ʻeleló ke lea loi.+
ʻOku nau fakaongosiaʻi kinautolu ʻi hono fai ʻa e meʻa ʻoku halá.
6 ʻOkú ke nofo ʻi he lotolotonga ʻo e kākaá.
ʻI heʻenau kākaá naʻa nau fakafisi ai ke ʻiloʻi au,” ko e fakahaaʻi ia ʻe Sihová.
7 Ko ia ai ko e folofola eni ʻa Sihova ʻo e ngaahi kau tau:
“Te u haka pea sivi kinautolu,+
He ko e hā ha toe meʻa ʻe lava ke u fai ki he ʻofefine ʻo hoku kakaí?
8 Ko honau ʻeleló ko ha ngahau fakatupu mate ʻokú ne leaʻaki ʻa e kākā.
ʻOku leaʻaki ʻe ha taha ʻi hono ngutú ʻa e ngaahi lea melino ki hono kaungāʻapí,
Ka ʻi hono lotó ʻokú ne fakatoka mei ai ha malumu.”
9 “ʻIkai te u kounaʻi kinautolu ke nau fai ha fakamatala ki he ngaahi meʻá ni?” Ko e fakahaaʻi ia ʻe Sihová.
“ʻIkai te u fai ha sāuni ki ha puleʻanga pehē?+
10 Te u tangi mo tangilāulau koeʻuhi ko e ngaahi moʻungá
Pea te u hivaʻaki ha taʻanga tangi* koeʻuhi ko e ngaahi kaikaiʻanga ʻo e toafá,
He kuo nau vela ʻo ʻosi ʻo ʻikai ha tangata ʻe fou atu ai,
Pea ʻoku ʻikai ke ongona ʻa e leʻo ʻo e fanga manú.
Ko e fanga manupuna ʻo e langí mo e fanga manú kuo nau hola; kuo nau ʻalu.+
11 Te u ʻai ʻa Selusalema ko ha ngaahi fokotuʻunga maka,+ ko e nofoʻanga ʻo e fanga siakalí,+
Pea te u ʻai ʻa e ngaahi kolo ʻo Siutá ke maomaonganoa, ʻo ʻikai ha taha ʻe nofo ai.+
12 Ko hai ia ʻoku poto feʻunga ke ne mahinoʻi ʻa e meʻá ni?
Ko hai kuo folofola ki ai ʻa Sihová, ke ne fakahaaʻi atu ʻa e meʻá ni?
Ko e hā kuo ʻauha ai ʻa e fonuá?
Ko e hā kuo pakupaku ai ia ʻo hangē ko e toafá,
ʻO ʻikai ha taha ʻe fou atu aí?”
13 Naʻe tali mai ʻe Sihova: “Koeʻuhí ko ʻenau siʻaki ʻa ʻeku laó* ʻa ia naʻá ku fokotuʻu ʻi honau ʻaó, pea koeʻuhi kuo ʻikai te nau muimui ki ai mo talangofua ki hoku leʻó. 14 ʻI hono kehé, naʻa nau muimui anga-fefeka ʻi honau lotó,+ pea nau muimui ki he ngaahi ʻīmisi Pēalí, ʻo hangē ko ia naʻe akoʻi ange ʻe heʻenau ngaahi tamaí ke nau faí.+ 15 Ko ia ai ko e folofola eni ʻa Sihova ʻo e ngaahi kau tau, ko e ʻOtua ʻo ʻIsilelí, ‘Ko eni ʻoku ou ʻai ʻa e kakaí ni ke nau kai ʻa e ʻakau ifo kona, pea te u ʻai kinautolu ke nau inu ʻa e vai ʻoku kona.+ 16 Te u fakamovete atu kinautolu ʻi he lotolotonga ʻo e ngaahi puleʻanga ʻa ia kuo ʻikai te nau ʻiloʻi mo ʻenau ngaahi tamaí,+ pea te u tuku atu ha heletā ke tulimui kiate kinautolu kae ʻoua kuó u fakaʻauha ʻosi kinautolu.’+
17 Ko e folofola eni ʻa Sihova ʻo e ngaahi kau tau,
‘ʻAi ke mou maʻu ʻa e mahinó.
Ui mai ʻa e kau fefine ʻoku nau hivaʻi ʻa e ngaahi taʻanga tangí,*+
Pea fai ha fekau ki he kau fefine taukeí ke nau haʻu,
18 Koeʻuhí ke nau fakavave mai ʻo fai ha tangilāulau maʻatautolu,
Kae tafe hifo ʻa e loʻimatá mei hotau matá
Pea malingi hifo mei hotau laumatá ʻa e vaí.+
19 He kuo ongona mei Saione+ ʻa e leʻo ʻo e tangilāulau:
“Kuo tau ʻauha!
He fakamā lahi ē ka ko kitautolu!
He kuo tau liʻaki ʻa e fonuá, pea kuo nau holoki hotau ngaahi ʻapí.”+
20 ʻA kimoutolu kau fefine, mou fanongo ki he folofola ʻa Sihová.
Fakatauange ke tali ʻe homou telingá ʻa e meʻa ʻokú ne folofola mai ʻakí.
Akoʻi ki hoʻomou fānau fefiné ʻa e tangilāulaú ni,
Pea ke akoʻi ʻe he tokotaha ko ē ki he tokotaha ko ē ʻa e taʻanga tangí ni.*+
21 He kuo hū mai ʻa mate ʻi hotau ngaahi matapā-teké;
Kuo hū mai ia ki hotau ngaahi taua fakakolotaú
Ke ʻave ʻa e fānaú mei he ngaahi halá
22 Lea ʻo pehē: ‘Ko e meʻa eni ʻoku fakahaaʻi ʻe Sihová:
“Ko e ngaahi ʻangaʻanga ʻo e kakaí te nau tō ʻo hangē ha kinohaʻa ʻi he fukahi kelekelé,
ʻO hangē ha ʻotu uite naʻe toki tuʻusi ʻe he tokotaha tuʻusí,
ʻO ʻikai ha taha ke ne tānaki ia.”’”+
23 Ko e folofola eni ʻa Sihová:
“Tuku ke ʻoua naʻa pōlepole ʻa e tangata potó ʻi hono potó;+
Tuku ke ʻoua naʻa pōlepole ʻa e tangata mālohí ʻi hono mālohí;
Pea tuku ke ʻoua naʻa pōlepole ʻa e tangata koloaʻiá ʻi heʻene koloá.”+
24 “Kae tuku ke pōlepole ʻa e tokotaha ʻoku pōlepolé ʻi he meʻá ni:
ʻA ʻene maʻu ʻa e vavanga fakaefakakaukau mo e ʻilo kiate aú,+
ʻA ʻene ʻiloʻi ko au Sihova, ʻa e Tokotaha ʻokú ne fakahaaʻi ʻa e ʻofa mateaki, fakamaau totonu, mo e māʻoniʻoni ʻi he māmaní,+
He ko e ngaahi meʻa eni ʻoku ou leleiʻia aí,”+ ko e fakahaaʻi ia ʻe Sihová.
25 “Vakai! ʻOku haʻu ʻa e ngaahi ʻaho,” ko e fakahaaʻi ia ʻe Sihová, “pea te u kounaʻi ai ʻa e tokotaha kotoa ʻoku kamu pē ʻi he sinó ke ne fai ha fakamatala,+ 26 ʻa ʻIsipite+ mo Siuta+ mo ʻĪtomi+ pea mo e kau ʻĀmoní+ mo Mōape+ pea mo e kotoa ʻo e faʻahinga kuo tele ʻa e fulufulu ʻi honau manifí ʻa ia ʻoku nau nofo ʻi he toafá;+ he ko e kotoa ʻo e ngaahi puleʻangá ʻoku nau taʻekamu, pea ko e kotoa ʻa e fale ʻo ʻIsilelí ʻoku ʻikai ke kamu honau lotó.+
10 Mou fanongo ki he folofola kuo folofolaʻaki ʻe Sihova kiate kimoutolú, ʻe fale ʻo ʻIsileli. 2 Ko e folofola eni ʻa Sihová:
“ʻOua ʻe ako ʻa e founga ʻa e ngaahi puleʻangá,+
Pea ʻoua ʻe manavahē ʻi he ngaahi fakaʻilonga ʻi he langí
Koeʻuhí ʻoku manavahē ai ʻa e ngaahi puleʻangá.+
3 He ko e ngaahi tōʻonga ʻa e ngaahi kakaí ko ha ʻataʻi meʻa* pē.
Ko ha fuʻu ʻakau pē ia ʻo e vaotaá ʻa ia ʻoku tā hifo,
ʻO ngāue ki ai ʻa e nima ʻo e tangata nima-meaʻá mo ʻene meʻangāué.*+
4 ʻOku nau teuteuʻi ia ʻaki ʻa e siliva mo e koula+
Pea fakamaʻu ia ʻaki ʻa e hāmala mo e faʻo ke ʻoua naʻa tō.+
5 Hangē ha fakamanavahē-kalae ʻi ha ngoue kiukamipaá, ʻoku ʻikai lava ke nau lea;+
Kuo pau ke fua kinautolu, he ʻoku ʻikai lava ke nau ʻalu.+
ʻOua ʻe manavahē kiate kinautolu, he ʻoku ʻikai lava ke nau fai ha kovi,
Pea ʻoku ʻikai lava ke nau fai ha meʻa pē ʻoku lelei.”+
6 ʻOku ʻikai ha taha ʻe hangē ko koé, ʻe Sihova.+
ʻOkú ke lahi, pea ʻoku lahi mo mālohi ho huafá.
7 Ko hai ia ʻe ʻikai ke manavahē kiate koe, ʻe Tuʻi ʻo e ngaahi puleʻangá,+ he ʻoku taau ia;
Koeʻuhí ʻi he lotolotonga ʻo e kau poto kotoa ʻo e ngaahi puleʻangá pea ʻi he lotolotonga ʻo honau ngaahi puleʻangá kotoa,
ʻOku ʻikai ʻaupito ha taha ʻe hangē ko koé.+
8 ʻOku nau taʻefakapotopoto kotoa mo vale.+
Ko e fakahinohino mei ha fuʻu ʻakaú ko ha ʻataʻi meʻa*+ pē.
9 ʻOku ʻomai ʻa e ngaahi lauʻisiliva mei Tāsisi+ mo e koula mei ʻŪfasi,
Ko e ngāue ʻa e tangata nima-meaʻa, ʻa e nima ʻo e tokotaha tuki ukameá.
Ko honau kofú ko e ngaohi mei he filo pulū mo e fulufuluʻisipi vāleti.
ʻOku ngaohi kotoa ʻa e ngaahi ʻaitolí ni ʻe he kau ngāue pōtoʻi.
10 Ka ko hono moʻoní ko Sihova ʻa e ʻOtuá.
Ko ia ʻa e ʻOtua moʻuí+ pea mo e Tuʻi taʻengatá.+
Koeʻuhi ko ʻene tuputāmakí ʻe ngalulu ai ʻa e māmaní,+
Pea heʻikai ha ngaahi puleʻanga te nau matuʻuaki ʻa ʻene houhau kakahá.
11* Ko e meʻa eni te mou leaʻaki kiate kinautolú:
“Ko e ngaahi ʻotua ʻa ia naʻe ʻikai te nau ngaohi ʻa e ngaahi langí mo e māmaní
Te nau ʻauha mei he māmaní pea mei he lalo langí ni.”+
12 Ko e Tokotaha-Ngaohi ia ʻo e māmaní ʻaki hono mālohí,
Ko e Tokotaha ia naʻá ne fokotuʻu ʻa e fonua mahú ʻaki hono potó+
Pea naʻá ne falō atu ʻa e ngaahi langí ʻaki ʻene mahinó.+
13 ʻI heʻene ʻai ke ongona ʻa hono leʻó,
ʻOku ʻuʻulu ai ʻa e ngaahi vai ʻi he langí,+
Pea ʻokú ne ʻai ʻa e ngaahi ʻaó* ke ʻalu hake mei he ngaahi ngataʻanga ʻo e māmaní.+
14 ʻOku ngāue ʻa e tangata kotoa pē ʻo ʻikai ʻi he fakapotopoto pea ʻikai ʻi he ʻilo.
ʻE mā ʻa e tokotaha tuki ukamea kotoa pē koeʻuhi ko e ʻīmisi kuó ne tongí;+
He ko ʻene ʻīmisi mētalé* ko e koto loi,
15 Ko ha ʻataʻi meʻa* pē kinautolu, ko ha ngāue ke manukia.+
ʻI he hoko mai ʻa e ʻaho ʻo honau fakamāuʻí, te nau ʻauha ai.
16 Ko e ʻInasi ʻo Sēkopé ʻoku ʻikai ke hangē ia ko e ngaahi ʻaitolí ni,
He ko ia ʻa e Tokotaha naʻá ne faʻu ʻa e meʻa kotoa pē,
Pea ko ʻIsileli ʻa e konga mahuʻinga taha ʻo hono tofiʻá.+
Ko Sihova ʻo e ngaahi kau tau ʻa hono huafá.+
17 Tānaki hake hoʻo ʻū meʻá mei he kelekelé,
ʻE fefine ʻoku nofo ʻākoloʻí.
18 He ko e folofola eni ʻa Sihová:
“Ko eni ʻoku ou lī* ki tuʻa ʻa e kakaí mei he fonuá ʻi he taimí ni,+
Pea te u ʻai ke nau hokosia ʻa e mamahi.”
19 ʻOiauē ka ko au koeʻuhi ko ʻeku kafó!*+
Ko hoku laveá ʻoku ʻikai ala faitoʻo.
Pea naʻá ku pehē: “Ko hono moʻoní ko hoku alangamahakí eni, pea kuo pau ke u kātekina ia.
20 Ko hoku tēnití kuo ʻauha, pea ko e ngaahi afo ʻo hoku tēnití kuo motu hono kotoa.+
Kuo liʻaki au ʻe hoku ngaahi fohá pea kuo ʻikai te nau kei ʻi ai.+
ʻOku ʻikai ha taha ʻe toe ke ne falō atu ʻa hoku tēnití pe fokotuʻu hake ʻa ʻeku ngaahi tupenu tēnití.
Ko e ʻuhinga ia kuo ʻikai te nau ngāue ai ʻi he vavanga fakaefakakaukaú,
Pea ko e kotoa ʻenau ngaahi tākangá kuo movetevete.”+
22 Fanongo! Ko ha ongoongo! ʻOku haʻu ia!
Ko ha fuʻu taupātū mei he fonua ʻo e tokelaú,+
Ke ʻai ʻa e ngaahi kolo ʻo Siutá ke maomaonganoa, ko ha nofoʻanga ʻo e fanga siakalí.+
23 ʻOku ou ʻiloʻi lelei ʻe Sihova, ʻoku ʻikai ʻi he tangatá ʻa hono halá.
ʻOku ʻikai ʻi he tangata ʻoku ʻaʻevá ke ne tataki ʻa ʻene laká.+
24 Fakatonutonu au, ʻe Sihova, ʻaki ʻa e fakamaau,
Kae ʻikai ʻi hoʻo houhaú,+ ke ʻoua naʻá ke fakaʻauha ai au.+
25 Lilingi atu ʻa hoʻo houhaú ki he ngaahi puleʻanga ʻoku nau tukunoaʻi koé+
Pea ki he ngaahi fāmili ʻoku ʻikai te nau ui ki ho huafá.
He kuo nau keina ʻa Sēkope,+
ʻIo, kuo nau keina ia ʻo aʻu ki he ʻosiʻosingamālie,+
Pea kuo nau ʻai ke maomaonganoa ʻa hono fonuá.+
11 Ko e folofola eni naʻe hoko mai kia Selemaia meia Sihova, ʻo pehē: 2 “Fanongo ki he ngaahi lea ʻo e fuakavá ni, ʻa kimoutolu kakai!
“Leaʻaki* ia ki he kau tangata ʻo Siutá pea ki he kau nofo ʻi Selusalemá 3 ʻo pehē kiate kinautolu, ‘Ko e folofola eni ʻa Sihova ko e ʻOtua ʻo ʻIsilelí: “Malaʻia ē ko e tangata ʻoku ʻikai ke talangofua ki he ngaahi lea ʻo e fuakavá ni,+ 4 ʻa ia naʻá ku fekauʻi ki hoʻomou fanga kuí ʻi he ʻaho naʻá ku ʻomi ai kinautolu mei he fonua ko ʻIsipité,+ mei he fōnise hakaʻanga ukameá,+ mo pehē, ‘Talangofua ki hoku leʻó, pea fai ʻa e ngaahi meʻa kotoa ʻoku ou fekauʻi atu kiate kimoutolú; pea te mou hoko ko hoku kakai pea te u hoko ko homou ʻOtua,+ 5 ko ia te u fakahoko ai ʻa e fuakava naʻá ku fuakavaʻaki ki hoʻomou fanga kuí, ke foaki kiate kinautolu ʻa e fonua ʻoku mahutafea ʻi he huʻakau mo e hone,+ ʻo hangē ko ia ʻi he ʻaho ní.’”’”
Pea naʻá ku tali ange: “ʻĒmeni,* ʻe Sihova.”
6 Naʻe folofola mai leva ʻa Sihova kiate au: “Fanongonongo ʻa e ngaahi leá ni kotoa ʻi he ngaahi kolo ʻo Siutá pea ʻi he ngaahi hala ʻo Selusalemá: ‘Fanongo ki he ngaahi lea ʻo e fuakavá ni, pea fakahoko ia. 7 He naʻá ku mātuʻaki enginaki ki hoʻomou fanga kuí ʻi he ʻaho naʻá ku ʻomi ai kinautolu mei he fonua ko ʻIsipité ʻo aʻu mai ki he ʻahó ni, ʻo u toutou enginaki* kiate kinautolu: “Mou talangofua ki hoku leʻó.”+ 8 Ka naʻe ʻikai te nau fanongo pe fokotuʻu telinga mai; ʻi hono kehé, naʻe hanganaki muimui anga-fefeka ʻa e tokotaha taki taha ki hono loto fulikivanú.+ Ko ia naʻá ku ʻomi kiate kinautolu ʻa e ngaahi lea kotoa ʻo e fuakava ko eni naʻá ku fekauʻi ke nau faí pea naʻa nau fakafisi ke fakahokó.’”
9 Naʻe folofola mai leva ʻa Sihova kiate au: “ʻOku ʻi ai ha faʻufaʻufono ʻi he lotolotonga ʻo e kau tangata ʻo Siutá mo e kau nofo ʻi Selusalemá. 10 Kuo nau toe foki ki he ngaahi faihala ʻa ʻenau fanga kui ʻi he kuonga muʻá, ʻa ia naʻa nau fakafisi ke talangofua ki heʻeku ngaahi leá.+ Ko kinautolu foki kuo nau muimui ʻi he ngaahi ʻotua kehé pea tauhi kiate kinautolu.+ Ko e fale ʻo ʻIsilelí mo e fale ʻo Siutá kuo nau maumauʻi ʻa ʻeku fuakava naʻá ku fai mo ʻenau fanga kuí.+ 11 Ko ia ai, ko e folofola eni ʻa Sihová, ‘Ko eni ʻoku ou ʻomi ha faingataʻa+ kiate kinautolu ʻa ia ʻe ʻikai lava ke nau hao mei ai. ʻI heʻenau ui mai kiate au ki ha tokoní, ʻe ʻikai te u fanongo kiate kinautolu.+ 12 Ko e ngaahi kolo leva ʻo Siutá mo e kau nofo ʻi Selusalemá te nau ō ki he ngaahi ʻotua ʻa ia ʻoku nau faifeilaulau* ki aí ʻo ui tokoni ki ai,+ ka ko e ngaahi ʻotuá ni ʻe ʻikai ʻaupito te nau fakahaofi kinautolu ʻi he taimi ʻo ʻenau faingataʻaʻiá. 13 He kuo hoko ho ngaahi ʻotuá ʻo tokolahi hangē ko ho ngaahi koló, ʻe Siuta, pea kuo mou fokotuʻu ʻa e ngaahi ʻōlita lahi ki he meʻa fakamaá* ʻo hangē ko e lahi ʻo e ngaahi hala ʻi Selusalemá, ko e ngaahi ʻōlita ke fai ai ʻa e ngaahi feilaulau kia Pēali.’+
14 “Ko e meʻa kiate koé,* ʻoua naʻá ke lotu maʻá e kakaí ni. ʻOua naʻá ke tangi hake koeʻuhi ko kinautolu pe fai ha lotu maʻanautolu,+ koeʻuhí ʻe ʻikai te u fanongo ʻi he taimi te nau ui mai ai kiate au koeʻuhi ko ʻenau faingataʻaʻiá.
15 Ko e hā ʻa e totonu ʻa hoku ʻofaʻangá ke ne ʻi hoku falé ai
Lolotonga ia kuo fakahoko ʻe he fuʻu tokolahi ʻenau ngaahi faʻufaʻu koví?
Te nau taʻofi koā ʻa e faingataʻá ʻi heʻene hoko mai kiate koé ʻaki ʻa e kakanoʻi-manu toputapú?*
Te ke fiefia koā ʻi he taimi ko iá?
16 Naʻe ui koe ʻe Sihova ki muʻa ko ha fuʻu ʻōlive tupu ʻāfaʻafa,
ʻO fakaʻofoʻofa mo fua lelei.
ʻI ha fuʻu ʻuʻulu longoaʻa, kuó ne tutu ia ʻaki ʻa e afi,
Pea kuo fesi ʻe he ngaahi filí ʻa hono ngaahi vaʻá.
17 “Ko Sihova ʻo e ngaahi kau tau, ʻa e tokotaha naʻá ne tō+ koé, kuó ne fanongonongo ʻe hoko mai kiate koe ha faingataʻa koeʻuhi ko e kovi naʻe fai ʻe he fale ʻo ʻIsilelí mo e fale ʻo Siutá, ʻa ia naʻa nau fakaʻitaʻi au ʻaki hono fai ʻa e ngaahi feilaulau kia Pēalí.”+
18 Naʻe fakahā mai ʻe Sihova kiate au koeʻuhí ke u ʻiloʻi;
ʻI he taimi ko iá naʻá ke ʻai au ke u sio ki he meʻa naʻa nau faí.
19 Naʻá ku hangē ha lami talangofua kuo ʻomi ke tāmateʻí.
Naʻe ʻikai te u ʻiloʻi naʻa nau fai ha faʻufaʻu kiate au:+
“Tau fakaʻauha ʻa e fuʻu ʻakaú fakataha mo hono fuá,
Pea tau tuʻusi ia mei he fonua ʻo e kau moʻuí,
Koeʻuhí ke ʻoua naʻa toe manatua ʻa hono hingoá.”
20 Ka ko Sihova ʻo e ngaahi kau tau ʻoku fakamaau ʻi he māʻoniʻoni;
Tuku ke u sio ki hoʻo faisāuni kiate kinautolú,
He kuó u tuku atu ʻeku meʻá kiate koe ke ke fakamāuʻi.
21 Ko ia ai, ko e folofola eni ʻa Sihova ki he kau tangata ʻo ʻAnatoti+ ʻoku nau kumi ke toʻo ʻa ʻeku moʻuí pea ʻoku nau pehē: “Kuo pau ke ʻoua naʻá ke kikite ʻi he huafa ʻo Sihová,+ telia naʻá ke mate ʻi homau nimá”; 22 ko ia ai, ko e folofola eni ʻa Sihova ʻo e ngaahi kau tau: “Ko eni te u ui kinautolu ke nau fai ha fakamatala. ʻE mate ʻa e kau talavoú ʻi he heletā,+ pea ko honau ngaahi fohá mo honau ngaahi ʻofefiné te nau mate ʻi he honge.+ 23 ʻE ʻikai ke toe naʻa mo hanau toenga, koeʻuhí te u ʻomi ʻa e faingataʻa ki he kau tangata ʻo ʻAnatotí+ ʻi he taʻu ʻe ui ai kinautolu ke nau fai ha fakamatalá.”
12 ʻE Sihova,+ ʻokú ke māʻoniʻoni, ʻi he taimi ʻoku ou fai ai ha lāunga kiate koé,
ʻI he taimi ʻoku ou lea atu ai kiate koe fekauʻaki mo e ngaahi meʻa fakaefakamaau totonú.
Ka ko e hā ʻoku lakalakaimonū ai ʻa e ʻalunga ʻo e kau fulikivanú,+
Pea ko e hā ʻoku ʻikai ke hohaʻa ai ʻa e kau kākaá?
2 Naʻá ke tō kinautolu, pea kuo nau faiaka.
Kuo nau tupu pea kuo nau laku fua.
ʻOku nau faʻa lea lelei fekauʻaki mo koe, ka ʻoku mamaʻo meiate koe ʻa ʻenau ngaahi fakakaukau lolotó.*+
3 Ka ʻokú ke ʻiloʻi lelei au, ʻe Sihova,+ ʻokú ke ʻafio mai kiate au;
Kuó ke sivisiviʻi ʻa hoku lotó ʻo ʻilo ʻoku fāʻūtaha ia mo koe.+
Fakamavaheʻi mai kinautolu ʻo hangē ha sipi ke tāmateʻí,
Pea vaheʻi kinautolu ki he ʻaho ʻo hono tāmateʻí.
4 Ko e hā hono fuoloa ʻa e mae ʻa e fonuá
Mo e mōmoa ʻa e ʻakau ʻi he ngoue kotoa pē?+
Koeʻuhí ko e faikovi ʻa e faʻahinga ʻoku nofo ʻi aí,
Kuo mole atu ʻa e fanga manú mo e fanga manupuná.
He kuo nau pehē: “ʻOku ʻikai te ne ʻafioʻi ʻa e meʻa ʻe hoko kiate kitautolú.”
5 Kapau ʻokú ke helaʻia ʻi he lele mo e kau tangata ʻalu laló,
ʻE lava fēfē ke ke lova mo e fanga hōsí?+
Naʻa mo haʻo maʻu ha falala pau ʻi he fonua ʻoku melinó,
ʻE anga-fēfē haʻo fāinga ʻi he vao ʻakau fihi ʻi he veʻe Sioataní?
6 He naʻa mo ho fanga tokouá tonu, ʻa e fale tonu ʻa hoʻo tamaí,
Kuo nau faikākā kiate koe.+
Kuo nau kailangakiʻi kovi koe.
ʻOua naʻá ke falala kiate kinautolu,
Naʻa mo haʻanau leaʻaki ha meʻa lelei kiate koe.
7 “Kuó u liʻaki ʻa hoku falé;+ kuó u tuku ange ʻa hoku tofiʻá.+
Kuó u tuku atu ʻa siʻoku ʻofaʻangá ki he nima ʻo hono ngaahi filí.+
8 Ko hoku tofiʻá kuó ne hangē kiate au ko ha laione ʻi he vaotaá.
Kuó ne ngungulu mai kiate au.
Ko ia kuó u fakaliliʻa ʻiate ia.
9 Ko hoku tofiʻá ʻoku hangē ia kiate au ha manupuna fekai lanu kehekehé;*
Ko e fanga manupuna fekai kehé ʻoku nau ʻātakaiʻi ia ʻo ʻohofi.+
Haʻu, fakatahataha mai, ʻa kimoutolu kotoa fanga manu ʻo e vaó,
Mou omi ʻo kai.+
10 Kuo fakaʻauha ʻe he kau tauhi-sipi tokolahi ʻa ʻeku ngoue kālepí;+
Kuo nau tāmalaki ʻa hoku tofiʻá.+
Kuo nau liliu ʻa hoku tofiʻa leleí ko ha toafa maomaonganoa.
11 Kuo hoko ia ko ha feituʻu lala.
Kuo ngaohi ʻa e fonuá kotoa ʻo maomaonganoa,
Ka ʻoku ʻikai ke tokanga ki ai ha tangata.+
12 Kuo haʻu ʻa e kau fakaʻauhá ʻi he ngaahi hala ʻaluʻi kotoa ʻi he toafá,
He ʻoku keina ʻe he heletā ʻa Sihová mei he ngataʻanga ʻe taha ʻo e fonuá ki he ngataʻanga ʻe tahá.+
ʻOku ʻikai ke maʻu ʻe ha taha* ha melino.
13 Kuo nau tūtuuʻi ʻa e uite, ka kuo nau utu ʻa e ʻakau talatala.+
Kuo nau fakaongosiaʻi kinautolu, ka ʻoku ʻikai hano ʻaonga.
Te nau mā ʻi he fua ʻo ʻenau ngoué
Koeʻuhi ko e houhau kakaha ʻa Sihová.”
14 Ko e meʻa eni ʻoku folofolaʻaki ʻe Sihova ki he kotoa ʻo hoku ngaahi kaungāʻapi fulikivanú, ʻa ia ʻoku nau ala ki he tofiʻa kuó u tuku ke maʻu ʻe hoku kakai ko ʻIsilelí:+ “Ko eni ʻoku ou taʻaki kinautolu mei honau fonuá,+ pea te u taʻaki ʻa e fale ʻo Siutá mei honau lotolotongá. 15 Ka ʻi he hili ʻeku taʻaki kinautolú, te u toe meesi kiate kinautolu pea fakafoki kinautolu taki taha ki hono tofiʻa pea ki hono fonua.”
16 “Pea kapau te nau fakapapauʻi ke ako ʻa e ngaahi founga ʻo hoku kakaí mo fai ha fuakava ʻi hoku hingoá, ‘ʻOku ou fuakava ʻia Sihova ko e ʻOtua moʻuí,’ hangē ko ʻenau akoʻi hoku kakaí ke nau fai ha fuakava ʻia Pēalí, pea ʻe toki langa hake kinautolu ʻi he lotolotonga ʻo hoku kakaí. 17 Ka ʻo kapau te nau fakafisi ke talangofua, te u toe taʻaki ʻa e puleʻanga ko iá, ʻo taʻaki mo fakaʻauha ia,” ko e fakahaaʻi ia ʻe Sihová.+
13 Ko e meʻa eni naʻe folofola mai ʻaki ʻe Sihova kiate aú: “ʻAlu ʻo fakatau mai hao noʻo līneni peá ke haʻi ia ʻi ho kongalotó, kae ʻoua naʻá ke unu ia ʻi ha vai.” 2 Ko ia naʻá ku fakatau mai ʻa e noʻó ʻo fakatatau ki he folofola ʻa Sihová peá u haʻi ia ʻi hoku kongalotó. 3 Pea naʻe toe hoko mai ʻa e folofola ʻa Sihová kiate au ko hono tuʻo uá ia: 4 “Toʻo ʻa e noʻo naʻá ke fakatau mai ʻa ia ʻokú ke tuí peá ke tuʻu hake ʻo ʻalu ki ʻIufaletesi, ʻo ke fufū ia ʻi ai ʻi ha avaʻi maka.” 5 Ko ia naʻá ku ʻalu ʻo fufū ia ʻi he veʻe ʻIufaletesí, ʻo hangē tofu pē ko hono fekauʻi au ʻe Sihová.
6 Ka ʻi he hili mei ai ha ngaahi ʻaho lahi naʻe folofola mai ʻa Sihova kiate au: “Tuʻu hake ʻo ʻalu ki ʻIufaletesi, ʻo toʻo mei ai ʻa e noʻo naʻá ku fekauʻi koe ke ke fufū aí.” 7 Ko ia naʻá ku ʻalu ki ʻIufaletesi ʻo keli hake ʻa e noʻó peá u toʻo ia mei he feituʻu naʻá ku fufū aí, pea naʻá ku vakai tā kuo maumau ʻa e noʻó; naʻe taʻeʻaonga ʻosi ia.
8 Pea naʻe hoko mai kiate au ʻa e folofola ʻa Sihová: 9 “Ko e folofola eni ʻa Sihová, ‘Ko e pōlepole ʻa Siutá pea mo e pōlepole lahi ʻa Selusalemá+ ʻe hoko ʻo hangē pē ko e noʻo ko ení. 10 Ko e kakai kovi ko eni ʻoku nau fakafisi ke talangofua ki heʻeku ngaahi leá,+ ʻa ia ʻoku nau anga-fefeka ʻo muimui ʻi honau loto ʻonautolú,+ pea ʻoku nau muimui ʻi he ngaahi ʻotua kehé, ʻo tauhi mo punou kiate kinautolú, te nau hangē tofu pē ko e noʻo ko eni ʻoku taʻeʻaonga ʻosí.’ 11 ‘He hangē tofu pē ko e pipiki ʻa ha noʻo ʻi he kongaloto ʻo ha tangatá, naʻe pehē ʻa ʻeku ʻai ʻa e fale kotoa ʻo ʻIsilelí pea mo e fale kotoa ʻo Siutá ke nau pipiki kiate aú,’ ko e fakahaaʻi ia ʻe Sihová, ‘ke nau hoko ko hoku kakai,+ ko hoku lāngilangi, mo hoku fakahīkihiki+ pea mo ha meʻa fakaʻofoʻofa. Ka naʻe ʻikai te nau talangofua.’+
12 “Pea kuo pau foki ke ke ʻoange kiate kinautolu ʻa e pōpoaki ko ení, ‘Ko e folofola eni ʻa Sihova ko e ʻOtua ʻo ʻIsilelí: “Ko e fuʻu siā kotoa pē ʻe fakafonu ʻaki ʻa e uaine.”’ Pea te nau tali kiate koe, ‘ʻIkai ʻoku mau ʻosi ʻilo ʻe fakafonu uaine ʻa e fuʻu siā kotoa pē?’ 13 Pea te ke pehē kiate kinautolu, ‘Ko e folofola eni ʻa Sihová: “Ko eni ʻoku ou fakafonu ʻaki ʻa e uaine ʻa e kotoa ʻo e kakai ʻo e fonuá ni,+ ʻa e ngaahi tuʻi ʻoku nofo ʻi he taloni ʻo Tēvitá, ʻa e kau taulaʻeiki mo e kau palōfita, pea mo e kakai kotoa ʻo Selusalemá kae ʻoua ke nau konā. 14 Pea te u ʻai kinautolu ke nau fefakaʻauhaʻaki, naʻa mo e ngaahi tamaí mo e ngaahi fohá te nau fefakaʻauhaʻaki,” ko e fakahaaʻi ia ʻe Sihová.+ “ʻE ʻikai te u fakahaaʻi ha manavaʻofa pe ongoʻi fakaʻiseʻisa pe meesi kiate kinautolu; ʻe ʻikai ha meʻa te ne taʻofi au mei hono fakaʻauha kinautolú.”’+
15 Mou fanongo pea tokanga.
ʻOua ʻe hīkisia, he kuo folofola ʻa Sihova.
16 ʻOatu ʻa e lāngilangi kia Sihova ko homou ʻOtuá
Ki muʻa ke ne ʻomi ʻa e fakapoʻulí
Pea ki muʻa ke humu homou vaʻé ʻi he ngaahi moʻungá ʻi he mamalu ʻa e poʻulí.
17 Pea kapau te mou fakafisi ke fanongo,
Te u tangi ʻi he lilo koeʻuhí ko hoʻomou pōlepolé.
Te u tangi lahi, pea ʻe lele noa pē ʻa hoku loʻimatá,+
Koeʻuhí kuo ʻave pōpula ʻa e tākanga ʻa Sihová.+
18 Tala ki he tuʻí mo e kuini fehuhú,+ ‘Nofo ki ha nofoʻanga māʻulalo,
He ko homo kalauni fakaʻofoʻofá ʻe tō mei homo ʻulú.’
19 Ko e ngaahi kolo ʻo e tongá ʻoku tāpuni,* pea ʻe ʻikai ke fakaava ʻe ha taha.
Kuo ʻave fakamālohi ʻa Siuta kātoa, ʻo ʻave fakamālohi ʻa e tokotaha kotoa.+
20 Hanga hake ho matá ʻo sio ki he faʻahinga ʻoku haʻu mei he tokelaú.+
Ko fē ʻa e tākanga naʻe tuku atu kiate koé, ʻa hoʻo fanga sipi fakaʻofoʻofá?+
21 Ko e hā te ke leaʻakí ʻi he hoko mai ho tauteá
Mei he faʻahinga naʻá ke ʻai maʻu pē ko ho ngaahi kaungāmeʻa ofí?+
ʻIkai ʻe maʻu koe ʻe he mamahí, ʻo hangē ko e langā ʻa ha fefine fāʻelé?+
22 Pea ʻi he taimi te ke pehē ai ʻi ho lotó, ‘Ko e hā kuo tō mai ai ʻa e ngaahi meʻá ni kiate aú?’+
Ko e meʻa ʻi he lahi ʻa hoʻo faihalá kuo toʻo ai ʻa e konga ki lalo ʻo ho kofú+
Pea kuo ʻai ai ke mamahiʻia ho muivaʻé.
23 ʻE lava ʻe ha tokotaha Kusa* ʻo liliu ʻa hono kilí, pe ko ha lēpati ʻa ʻene lanu pulepulé?+
Kapau ʻe pehē, tā ʻe lava ke mou failelei,
ʻA kimoutolu kuo akoʻi ke fai ʻa e meʻa ʻoku koví.
24 Ko ia te u fakamovete kinautolu ʻo hangē ha mohuku ʻoku puhiʻi atu ʻe ha matangi mei he toafá.+
25 Ko e meʻa eni ʻe hoko kiate koé. Ko e ʻinasi eni kuó u ʻoatu kiate koé,” ko e fakahaaʻi ia ʻe Sihová,
“Koeʻuhí kuó ke fakangaloʻi au+ pea ʻokú ke falala ki he loí.+
26 Ko ia ai, te u huke hake ʻa e konga ki lalo ʻo ho kofú ʻo fakalaka ʻi ho matá
Pea ʻe ʻasi mai ʻa ho māʻangá,+
27 ʻA hoʻo tonó+ mo hoʻo tangi ʻi he holi koví,
Pea mo hoʻo feʻauaki anga-mousaʻá.*
ʻI he ngaahi foʻi māʻolungá, pea ʻi he ngoué,
Kuó u mamata ai ki hoʻo tōʻonga fakalieliá.+
ʻOiauē ʻa koe, ʻe Selusalema!
Ko e hā hono fuoloa ʻa hoʻo kei nofo taʻemaʻá?”+
14 Ko e folofola eni ʻa Sihova naʻe hoko mai kia Selemaia ʻo fekauʻaki mo e ngaahi laʻalaʻaá:+
2 ʻOku mamahi ʻa Siuta,+ pea kuo maumau ʻa hono ngaahi matapaá.
ʻOku nau tō hifo ki he kelekelé mo e loto-mafasia,
Pea ʻoku ʻalu hake ha tangi mei Selusalema.
3 Pea ʻoku fekau atu ʻe honau ngaahi ʻeikí ʻa ʻenau kau sevānití* ke nau kumi ki ha vai.
ʻOku nau ʻalu atu ki he ngaahi luo vaí* pea ʻoku ʻikai maʻu ai ha vai.
ʻOku nau foki mai pē mo ʻenau ngaahi ngeʻesi siaá.
ʻOku nau mā mo siva ʻenau ʻamanakí,
Pea ʻoku nau fakapūlouʻi honau ʻulú.
4 Koeʻuhi ʻoku mafahifahi ʻa e kelekelé,
He ʻoku ʻikai ha ʻuha ʻi he fonuá,+
ʻOku siva ʻa e ʻamanaki ʻa e kau ngoué ʻo nau fakapūlouʻi honau ʻulú.
5 Naʻa mo e tia fefine ʻi he vaó ʻokú ne liʻaki ʻa hono ʻuhiki ne toki fanauʻí
Koeʻuhí ʻoku ʻikai ha mohuku.
6 ʻOku tuʻu ʻa e fanga ʻasi kaivaó ʻi he ngaahi foʻi māʻolunga tekeleí.
ʻOku nau fakatau ʻenau mānavá ʻo hangē ko e fanga siakalí;
ʻOku vaivai honau matá koeʻuhi ko e ʻikai ha mohukú.+
7 Neongo ʻoku talatalaakiʻi pē kimautolu ʻe heʻemau ngaahi faihalá,
ʻE Sihova, fai ha meʻa koeʻuhi ko ho huafá.+
He ʻoku lahi ʻa ʻemau ngaahi tōʻonga taʻeangatonú,+
Pea kuo mau faiangahala kiate koe.
8 ʻE ʻamanakiʻanga ʻo ʻIsileli, ʻa hono Fakamoʻui+ ʻi he ngaahi taimi ʻo e mamahí,
Ko e hā ʻokú ke hangē ai ha sola ʻi he fonuá,
Hangē ha tokotaha fononga ʻoku afe mai pē ke nofo ʻi ha pō pē ʻe tahá?
9 Ko e hā ʻokú ke hangē ai ha tangata ʻoku moʻutāfuʻuá,
Hangē ha tangata toʻa ʻoku ʻikai lava ke ne fai ha fakahaofí?
ʻOua muʻa te ke liʻaki kimautolú.
10 Ko e meʻa eni ʻoku folofolaʻaki ʻe Sihova ʻo fekauʻaki mo e kakaí ni: “ʻOku nau manako ke ʻalu fano holo pē;+ kuo ʻikai te nau taʻotaʻofi honau vaʻé.+ Ko ia ʻoku ʻikai leleiʻia ʻa Sihova ʻiate kinautolu.+ Ko ia te ne manatuʻi ʻa ʻenau faihalá ʻo ne kounaʻi kinautolu ke nau fai ha fakamatala ki heʻenau ngaahi angahalá.”+
11 Naʻe folofola mai leva ʻa Sihova kiate au: “ʻOua naʻá ke fai ha lotu ki ha lelei ke hoko hifo ki he kakaí ni.+ 12 ʻI he taimi ʻoku nau ʻaukai aí, heʻikai te u fanongo ki heʻenau ngaahi kōlengá,+ pea ʻi heʻenau ʻohake ha ngaahi feilaulau tutu kakato mo ha ngaahi feilaulau meʻakaí,* heʻikai te u leleiʻia ai,+ he te u fakaʻauha kinautolu ʻaki ʻa e heletā mo e honge pea mo e mahaki fakaʻauha.”*+
13 ʻI he meʻá ni naʻá ku pehē ai: “ʻOiauē ʻe ʻEiki Hau Sihova! Ko eni ʻoku pehē ʻe he kau palōfitá kiate kinautolu, ‘ʻE ʻikai te mou sio ʻi he heletaá, pea ʻe ʻikai ke hoko mai ʻa e hongé kiate kimoutolu, ka te u ʻoatu kiate kimoutolu ʻa e melino moʻoni ʻi he feituʻú ni.’”+
14 Naʻe folofola mai leva ʻa Sihova kiate au: “ʻOku kikite ʻaki ʻa e loi ʻe he kau palōfitá ʻi hoku hingoá.+ Kuo ʻikai te u fekauʻi atu kinautolu pe tuʻutuʻuni kiate kinautolu pe lea kiate kinautolu.+ Ko ha vīsone loi mo ha vavalo taʻeʻaonga pea mo e kākā ʻi honau lotó ʻa e meʻa ʻoku nau kikite ʻaki kiate kimoutolú.+ 15 Ko ia ai, ko e meʻa eni ʻoku folofolaʻaki ʻe Sihova ʻo fekauʻaki mo e kau palōfita ʻoku nau kikite ʻi hoku hingoá, neongo naʻe ʻikai te u fekauʻi atu kinautolu, pea ʻoku nau pehē ʻe ʻikai ke hoko mai ha heletā pe ko ha honge ki he fonuá ni: ‘Ko e kau palōfita ko iá te nau ʻauha+ ʻi he heletā pea ʻi he honge. 16 Pea ko e kakai ʻoku nau fai ki ai ʻa e kikité ʻe laku kinautolu ʻi he ngaahi hala ʻo Selusalemá koeʻuhi ko e hongé mo e heletaá, ʻo ʻikai ha taha ke ne tanu kinautolu+—ʻa kinautolu, ko honau ngaahi uaifí, ko honau ngaahi fohá, pe ko honau ngaahi ʻofefiné—he te u huaʻi atu kiate kinautolu ʻa e mamahi ʻoku nau tuha mo iá.’+
17 “Kuo pau ke ke lea ʻaki ʻa e lea ko ení kiate kinautolu,
‘Tuku ke lele noa pē ʻa e loʻimatá ʻi hoku matá he pō mo e ʻaho, ke ʻoua naʻa tuʻu,+
He ko e ʻofefine kei nofo anga-maʻa ʻo hoku kakaí kuo laiki mo haveki fakaʻaufuli,+
ʻAki ha kafo mātuʻaki lahi.
18 Kapau te u ʻalu atu ki he ngoué ke vakai,
ʻOku ou sio ki he faʻahinga kuo tāmateʻi ʻe he heletaá!+
Pea kapau te u haʻu ki he koló,
ʻOku ou sio ai ki he ngaahi mahaki ko e tupu mei he hongé!+
He kuo ʻalu takai holo ʻa e kau palōfitá mo e kau taulaʻeikí fakatouʻosi ʻi ha fonua ʻoku ʻikai te nau ʻiloʻi.’”+
19 Kuó ke siʻaki fakaʻaufuli koā ʻa Siuta, pe kuó ke fakaliliʻa koā ʻi Saione?+
Ko e hā kuó ke taaʻi ai kimautolu, ʻo ʻikai ai ha fakamoʻui kiate kimautolú?+
Naʻe ʻi ai ha ʻamanaki ki ha melino, ka naʻe ʻikai ha meʻa lelei ʻe hoko,
Ki ha taimi ʻo e fakamoʻui, ka ko e manavahē pē!+
20 ʻOku mau lāuʻilo ki heʻemau fulikivanú, ʻe Sihova,
Pea mo e faihala ʻa ʻemau fanga kuí,
He kuo mau faiangahala kiate koe.+
21 Koeʻuhi ko ho huafá, ʻoua naʻá ke siʻaki kimautolu;+
ʻOua naʻá ke fakaliliʻa ki ho taloni lāngilangiʻiá.
Manatuʻi muʻa, pea ʻoua naʻá ke maumauʻi ʻa hoʻo fuakava mo kimautolú.+
22 ʻE lava koā ʻe ha taha ʻo e ngaahi ʻaitoli taʻeʻaonga ʻo e ngaahi puleʻangá ʻo ʻomai ha ʻuha,
Pe ʻe aʻu koā ʻo lava ʻe he ngaahi langí ke tuku mai ha ʻuha ʻiate ia pē?
ʻIkai ko koe Tokotaha pē ia, ʻe Sihova ko homau ʻOtua?+
Pea ko ʻemau ʻamanakí ʻoku ʻiate koe,
He ko koe pē kuó ke fai ʻa e ngaahi meʻa kotoa ko ení.
15 Naʻe folofola mai leva ʻa Sihova kiate au: “Neongo kapau naʻe tuʻu ʻa Mōsese mo Sāmiuela ʻi hoku ʻaó,+ ʻe ʻikai te u fakahaaʻi ha leleiʻia ʻi he kakaí ni. Kapusi kinautolu mei hoku ʻaó. Tuku ke nau ʻalu. 2 Pea kapau te nau pehē atu kiate koe, ‘Te mau ō ki fē?’ Kuo pau ke ke pehē kiate kinautolu, ‘Ko e folofola eni ʻa Sihová:
“ʻIlonga ʻa ia ʻoku tuha mo ha mahaki fakatupu mate, tuku ke ne ʻalu ʻo mate ʻi he mahakí!
ʻIlonga ʻa ia ʻoku tuha ke mate ʻi he heletaá, tuku ke ne mate ʻi he heletaá!+
ʻIlonga ʻa ia ʻoku tuha mo e mate fiekaiá, tuku ke ne mate fiekaia!
Pea ʻilonga ʻa ia ʻoku tuha ke taki pōpulá, tuku ke taki pōpula ia!”’+
3 “‘Pea te u tuku kiate kinautolu ha faingataʻa ʻe fā,’*+ ko e fakahaaʻi ia ʻe Sihová, ‘ko e heletā ke tāmateʻi kinautolu, ko e fanga kulī ke nau toho honau ʻangaʻangá, mo e fanga manupuna ʻo e langí mo e fanga manu ʻo e māmaní ke nau keina mo fakaʻauha kinautolu.+ 4 Pea te u ʻai kinautolu ke nau hoko ko ha meʻa ke fakalilifuʻia ai ʻa e ngaahi puleʻanga kotoa ʻo e māmaní+ koeʻuhí ko e meʻa naʻe fai ʻi Selusalema+ ʻe Manase ko e foha ʻo Hesekaia ko e tuʻi ʻo Siutá.
5 Ko hai te ne fakahaaʻi ha manavaʻofa kiate koé, ʻe Selusalema,
Ko hai ʻe kaungāmamahi mo koé,
Pea ko hai ia ʻe tuʻu ke ʻeke pe ʻokú ke fēfē?’
6 ‘Kuó ke liʻaki au,’ ko e fakahaaʻi ia ʻe Sihová.+
‘ʻOkú ke hanganaki sītuʻa meiate au.*+
Ko ia te u mafao atu ʻa hoku nimá kiate koe ʻo fakaʻauha koe.+
ʻOku ou foʻi he ongoʻi fakaʻofaʻia ʻiate koé.*
7 Pea te u ʻauʻau kinautolu hangē ko hono ʻauʻau ʻa e uité ʻi he ngaahi matapā ʻo e fonuá.
Te u ʻave meiate kinautolu ʻenau fānaú.+
Te u fakaʻauha ʻa hoku kakaí,
Koeʻuhí ʻoku nau fakafisi ke tafoki mei honau ngaahi ʻalungá.+
8 ʻE hoko ʻo tokolahi ange ʻi he ʻoneʻone ʻo e tahí ʻa ʻenau kau uitoú ʻi hoku ʻaó.
Te u ʻomi ha faifakaʻauha kiate kinautolu ʻi he hoʻatā mālié, ki he ngaahi faʻeé mo e kau talavoú.
Te u ʻomai fakafokifā kiate kinautolu ʻa e hohaʻa mo e manavahē.
9 Ko e fefine naʻá ne fanauʻi ha toko fitu kuó ne hoko ʻo vaivai;
ʻOkú ne fāinga ke mānava.
Kuo tō ʻa ʻene laʻaá lolotonga ʻoku kei ʻahó,
ʻO tupu ai ʻa e mā mo e ongoʻi matahoa.’*
‘Pea ko e faʻahinga tokosiʻi ʻoku toe ʻiate kinautolú
Te u tuku atu ki he heletā ʻi he ʻao ʻo honau ngaahi filí,’ ko e fakahaaʻi ia ʻe Sihová.”+
10 ʻA ʻeku faʻē, ʻoiauē ka ko au, koeʻuhí ko hoʻo fāʻeleʻi aú,+
Ko ha tangata ʻoku kē mo fekeʻikeʻi mo e fonuá kotoa.
Kuo ʻikai te u tali ha nō pe fai ha nō;
Ka ko kinautolu kotoa ʻoku nau talatukiʻi au.
11 Naʻe folofola ʻa Sihova: “Ko e moʻoni te u ngāue maʻau ki haʻo lelei;
Ko e moʻoni te u fakalaloaʻi koe ʻi he taimi ʻo e faingataʻá,
ʻI he taimi ʻo e mamahí ʻi hoʻo fehangahangai mo ho filí.
12 ʻE lava ke laiki ʻe ha taha ke kongokonga ʻa e ukameá,
ʻA e ukamea mei he tokelaú, pea mo e kopá?
13 Ko hoʻo koloá mo hoʻo ngaahi meʻa mahuʻingá te u foaki ia ko e koloa vete,*+
ʻO ʻikai ki ha totongi, ka koeʻuhí ko e kotoa ʻo hoʻo angahalá ʻi ho ngaahi feituʻu kotoa pē.
14 Te u foaki ia ki ho ngaahi filí
Ke nau ʻave ki ha fonua ʻoku ʻikai te ke ʻiloʻi.+
He kuo tupu ha afi ʻi heʻeku ʻitá,
Pea ʻoku puho atu ia kiate kimoutolu.”+
15 ʻOkú ke ʻafioʻi ʻa hoku tuʻungá, ʻe Sihova,
Manatuʻi muʻa au pea fakahanga mai hoʻo tokangá kiate au.
Ke ke faisāuni ki hoku kau fakatangá maʻaku.+
ʻOua naʻa tuku ke u ʻauha* koeʻuhi ko hoʻo tuai ki he houhaú.
Ke ke ʻafioʻi ʻoku ou kātekina ʻa e manukí ni koeʻuhí ko koe.+
16 Naʻá ku maʻu ʻa hoʻo folofolá, pea naʻá ku kai ia;+
Pea naʻe hoko ʻa hoʻo folofolá ko e fiefiaʻanga kiate au mo e nēkenekaʻanga ʻo hoku lotó,
He kuo uiʻaki au ho huafá, ʻe Sihova ko e ʻOtua ʻo e ngaahi kau tau.
17 ʻOku ʻikai te u nofo ʻo feohi mo e kau fakakatá mo fiefia.+
Koeʻuhi ko e ʻiate au ho nimá, ʻoku ou tangutu toko taha,
18 Ko e hā ʻoku hokohoko ai ʻa ʻeku mamahí pea ʻikai ala faitoʻo ʻa hoku kafó?
ʻOku ʻikai ke fie moʻui ia.
Te ke hoko koā kiate au ko ha maʻuʻanga vai ʻoku ʻikai ke maʻu ai ha vai
ʻA ia ʻe ʻikai lava ke fai ha falala ki ai?
19 Ko ia ko e folofola eni ʻa Sihová:
“Kapau te ke tafoki, pea te u fakafoki mai koe,
Pea te ke tuʻu ʻi hoku ʻaó.
Kapau te ke fakamavaheʻi ʻa e meʻa ʻoku mahuʻingá mei he meʻa ʻoku taʻeʻaongá,
Te ke hoko ai ʻo hangē ko hoku ngutú tonu.*
ʻE pau ke nau tafoki mai kiate koe,
Ka heʻikai te ke tafoki koe kiate kinautolu.”
20 “ʻOku ou ngaohi koe ko ha ʻā kopa fakakolotau ki he kakaí ni.+
Ko e moʻoni te nau faitau mo koe,
Ka heʻikai te nau ikunaʻi koe,*+
He ʻoku ou ʻiate koe, ke fakamoʻui koe pea ke fakahaofi koe,” ko e fakahaaʻi ia ʻe Sihová.
21 “Pea te u fakahaofi koe mei he nima ʻo e kau fulikivanú
Pea huhuʻi koe mei he ʻaofinima ʻo e kau fakamamahí.”
16 Naʻe toe hoko mai kiate au ʻa e folofola ʻa Sihová, ʻo pehē: 2 “Kuo pau ke ʻoua naʻá ke maʻu ha uaifi moʻou, pea kuo pau ke ʻoua naʻá ke maʻu ha ngaahi foha mo e ngaahi ʻofefine ʻi he feituʻú ni. 3 He ko e meʻa eni ʻoku folofolaʻaki ʻe Sihova ʻo fekauʻaki mo e ngaahi foha mo e ngaahi ʻofefine ʻoku fanauʻi ʻi hení pea fekauʻaki mo ʻenau ngaahi faʻē ʻoku nau fanauʻi kinautolú pea fekauʻaki mo ʻenau ngaahi tamai ʻoku nau tupu mei ai ʻi he fonuá ni: 4 ‘Te nau mate ʻi ha ngaahi mahaki fakatupu mate,+ ka ʻe ʻikai ha taha te ne tengihia kinautolu pe tanu kinautolu; te nau hoko ʻo hangē ko e kinohaʻa ʻi he funga kelekelé.+ Te nau ʻauha ʻi he heletā mo e honge,+ pea ko honau ngaahi ʻangaʻangá ʻe hoko ko e meʻakai ʻa e fanga manupuna ʻo e langí mo e fanga manu ʻo e māmaní.’
5 He ko e meʻa eni ʻoku folofolaʻaki ʻe Sihová,
‘ʻOua naʻá ke hū ki ha fale ʻoku fai ai ha kātoanga kai ʻa e kau tengihiá,+
Pea ʻoua naʻá ke ʻalu ke fai ha tengihia pe fai ha kaungāmamahi.’
‘He kuó u ʻave ʻa ʻeku melinó mei he kakaí ni,’ ko e fakahaaʻi ia ʻe Sihová,
‘Pea pehē foki ki heʻeku ʻofa mateakí mo e mēsí.+
6 ʻE mate fakatouʻosi ʻa e māʻolungá mo e māʻulaló ʻi he fonuá ni.
ʻE ʻikai ke tanu kinautolu,
ʻE ʻikai ha taha te ne tengihia kinautolu,
Pea ʻe ʻikai ha taha te ne tafatafaʻi hono sinó pe tele hono ʻulú koeʻuhi ko kinautolu.*
7 Pea ʻe ʻikai ha taha te ne tokonaki ha meʻakai ki he kau tengihiá,
Ke fakafiemālieʻi kinautolu koeʻuhi ko ʻenau kau maté;
Pea ʻe ʻikai ha taha te ne ʻoange kiate kinautolu ʻa e ipu uaine ʻo e fakafiemālié
Ke nau inu koeʻuhi ko e mole ʻa ʻenau tamaí pe faʻeé.
8 Pea ʻoua naʻá ke hū ki ha fale kātoanga kai
Ke tangutu hifo ʻo kai mo inu mo kinautolu.’
9 “He ko e folofola eni ʻa Sihova ʻo e ngaahi kau tau, ʻa e ʻOtua ʻo ʻIsilelí, ‘ʻI heni ʻi he feituʻú ni, ʻi homou ngaahi ʻahó pea ʻi homou ʻaó tonu, te u fakangata ai ʻa e leʻo ʻo e fiefia mo e mavava, ʻa e leʻo ʻo e tangata malí mo e leʻo ʻo e taʻahine malí.’+
10 “ʻI he taimi te ke tala ai ki he kakaí ni ʻa e kotoa ʻo e ngaahi leá ni, te nau ʻeke atu kiate koe, ‘Ko e hā kuo folofolaʻaki ai ʻe Sihova ʻa e fuʻu faingataʻa kotoa ko ení kiate kimautolú? Ko e hā ʻa e fehālaaki pea ko e hā ʻa e angahala kuo mau fai kia Sihova ko homau ʻOtuá?’+ 11 Kuo pau ke ke tali kiate kinautolu, ‘“Koeʻuhí naʻe liʻaki au ʻe hoʻomou fanga kuí,”+ ko e fakahaaʻi ia ʻe Sihová, “pea naʻe hokohoko atu ʻenau muimui ki he ngaahi ʻotua kehé mo tauhi kinautolu pea punou kiate kinautolu.+ Ka naʻa nau liʻaki au, pea ko ʻeku laó naʻe ʻikai te nau tauhi.+ 12 Pea kuo mou tōʻonga kovi ʻaupito ange ʻi hoʻomou fanga kuí,+ pea ʻoku muimui ʻa e tokotaha taki taha ʻo kimoutolu ki he anga-fefeka ʻo hono loto fulikivanú kae ʻikai ke talangofua kiate au.+ 13 Ko ia te u kapusi kimoutolu mei he fonuá ni ki ha fonua ʻoku ʻikai te mou ʻilo ki ai pea pehē ki hoʻomou fanga kuí,+ pea te mou tauhi ai ki he ngaahi ʻotua kehe ʻi he ʻaho mo e pō,+ koeʻuhí heʻikai te u fakahā ha leleiʻia ʻiate kimoutolu.”’
14 “‘Ka neongo ia, ʻoku haʻu ʻa e ngaahi ʻaho,’ ko e fakahaaʻi ia ʻe Sihová, ‘ʻa ia heʻikai te nau toe pehē ai: “ʻOku ou fuakava ʻia Sihova ko e ʻOtua moʻuí, ʻa ia naʻá ne ʻomai ʻa e kakai ʻIsilelí mei he fonua ko ʻIsipité!”+ 15 Ka te nau pehē: “ʻOku ou fuakava ʻia Sihova ko e ʻOtua moʻuí, ʻa ia naʻá ne ʻomai ʻa e kakai ʻIsilelí mei he fonua ʻo e tokelaú pea mei he ngaahi fonua kotoa naʻá ne fakamovete ai kinautolú!” Pea te u fakafoki kinautolu ki honau fonuá, ʻa ia naʻá ku foaki ki heʻenau fanga kuí.’+
16 ‘Ko eni ʻoku ou fekau ke ʻomai ha kau tangata toutai tokolahi,’ ko e fakahaaʻi ia ʻe Sihová,
‘Pea te nau toutaiʻi kinautolu.
ʻI he hili iá, te u fekau ke ʻomai ha kau tulimanu tokolahi,
Pea te nau kumi kiate kinautolu ʻi he moʻunga kotoa pē mo e foʻi māʻolunga kotoa pē
Pea ʻi he ngaahi avaʻi maká.
17 He ko hoku matá ʻoku ʻi he meʻa kotoa pē ʻoku nau faí.*
ʻOku ʻikai te nau puli mei hoku ʻaó,
Pea kuo ʻikai ke puli ʻenau faihalá mei hoku matá.
18 ʻUluakí, te u totongi kiate kinautolu ʻa honau moʻua kotoa ki heʻenau faihalá mo ʻenau angahalá,+
He kuo nau ʻuliʻi hoku fonuá ʻaki ʻenau ngaahi ʻaitoli fakalielia ʻoku ʻikai moʻui
Pea fakafonu hoku tofiʻá ʻaki ʻenau ngaahi meʻa fakalieliá.’”+
19 ʻE Sihova, ko hoku mālohingá mo hoku hūfangaʻangá,
Ko e feituʻu ke u hola ki ai ʻi he ʻaho ʻo e faingataʻá,+
Ko koe ʻe haʻu ki ai ʻa e ngaahi puleʻangá mei he ngaahi ngataʻanga ʻo e māmaní,
Pea te nau pehē: “Ko ʻemau fanga kuí naʻa nau tofiʻa ʻaki ʻa e koto loi,
Mo e muna mo e ngaahi meʻa taʻeʻaonga.”+
20 ʻE lava ʻe ha tangata ʻo ngaohi ha ngaahi ʻotua maʻana
Lolotonga ia ʻoku ʻikai moʻoni ko ha ngaahi ʻotua kinautolu?+
21 “Ko ia te u ʻai ke nau ʻilo,
ʻI he taimi ko ení te u ʻai ke nau ʻilo hoku mafaí mo hoku mālohí,
Pea kuo pau ke nau ʻilo ai ko hoku hingoá ko Sihova.”
17 “Kuo tohi ʻa e angahala ʻa Siutá ʻaki ha meʻa-tohi ukamea.
Kuo tongi ʻaki ha mataʻi taiamoni ʻi he lauʻimaka ko honau lotó
Pea ʻi he ngaahi meʻatui ʻo honau ngaahi ʻōlitá,
2 Lolotonga ia ko honau ngaahi fohá ʻoku nau manatu ki heʻenau ngaahi ʻōlitá mo ʻenau ngaahi pou ʻakau toputapú*+
ʻI ha veʻe fuʻu ʻakau tupu ʻāfaʻafa, ʻi he ngaahi foʻi tafungofunga māʻolungá,+
3 ʻI he ngaahi moʻunga ʻi he ngaahi feituʻu ʻuta ʻatāloá.
Ko hoʻo koloá, mo hoʻo ngaahi meʻa mahuʻingá kotoa, te u foaki ia ko ha koloa vete+
—ʻIo, ʻa ho ngaahi potu māʻolungá koeʻuhí ko e angahala ʻi he kotoa ʻo ho ngaahi feituʻú.+
4 Te ke tuku ange loto-lelei atu ʻa ho tofiʻa naʻá ku foaki kiate koé.+
Pea te u ʻai koe ke ke ngāue ki ho ngaahi filí ʻi ha fonua ʻoku ʻikai te ke ʻiloʻi,+
ʻE vela ia ʻo taʻengata.”
5 Ko e folofola eni ʻa Sihová:
“Malaʻia ē ka ko e tangata* ʻoku tuku ʻene falalá ki ha tangata,+
ʻA ia ʻokú ne falala ki he mālohi ʻo e tangatá,+
Pea ʻoku hiki ʻa hono lotó meia Sihova.
6 Te ne hoko ʻo hangē ha fuʻu ʻakau ʻoku tuʻu taha ʻi he toafá.
ʻE ʻikai te ne hokosia ʻa e taimi ʻe hoko mai ai ha lelei,
Ka te ne nofo ʻi ha ngaahi feituʻu pakukā ʻi he toafá,
ʻI ha kelekele māsima ʻa ia ʻoku ʻikai lava ke nofo ai ha taha.
7 Fiefia ē ko e tangata* ʻoku tuʻu ʻene falalá ʻia Sihová,
ʻA ia ko ʻene falala paú ʻoku ʻia Sihova.+
8 Te ne hoko ʻo hangē ha fuʻu ʻakau ʻoku tō ʻi he veʻe vaí,
ʻA ia ʻoku mafola atu ʻa hono ngaahi aká ki he vaitafé.
ʻE ʻikai te ne ongoʻi ʻa e haʻu ʻa e velá,
Ka ʻe maʻuiʻui maʻu pē ʻa hono ngaahi laú.+
Pea ʻi he taʻu ʻo e laʻalaʻaá ʻe ʻikai te ne hohaʻa,
Pea ʻe ʻikai tuku ʻene laku fuá.
9 Ko e lotó ʻoku kākā ange ia ʻi ha toe meʻa pea ʻoku holiholivale.*+
Ko hai ʻe lava ke ne ʻiloʻi ia?
10 Ko au, Sihova, ʻoku ou hakule ʻa e lotó,+
ʻO sivi ʻa e ngaahi fakakaukau lolotó,*
Ke ʻoange ki he tokotaha taki taha ʻo fakatatau ki hono ʻalunga,
ʻO fakatatau ki he fua ʻo ʻene ngaahi ngāué.+
11 ʻI he hangē ha patelisi ʻokú ne fakatahatahaʻi mai ʻa e fua naʻe ʻikai te ne fakatoó,
ʻOku pehē ʻa e tokotaha ʻokú ne maʻu mai ʻa e ngaahi koloa ʻi he taʻefaitotonú.+
ʻE mavahe ʻa e koloá meiate ia ʻi he vaeua ʻa ʻene moʻuí,
Pea ʻi he ikuʻangá te ne hoko ko e vale.”
12 Ko ha taloni lāngilangiʻia, kuo hakeakiʻi mei he kamataʻangá,
Ko ia ʻa homau feituʻu toputapú.+
13 ʻE Sihova, ʻa e ʻamanakiʻanga ʻo ʻIsilelí,
Ko e faʻahinga kotoa ʻoku nau liʻaki koé ʻe fakamaaʻi.
Ko e faʻahinga kuo nau tafoki ʻo fakafepaki kiate koé* ʻe hiki honau hingoá ʻi he kelekelé,+
Koeʻuhí kuo nau liʻaki ʻa Sihova ko e matavai ʻo e vai moʻuí.+
14 Faitoʻo au ʻe Sihova, pea te u moʻui.
Fakahaofi au, pea te u hao,+
He ko koe ʻoku ou fakahīkihikiʻí.
15 Vakai! ʻOku ʻi ai ʻa e faʻahinga ʻoku nau pehē mai kiate au:
“Ko fē ʻa e folofola ʻa Sihová?+
Tuku muʻa ke hoko mai ia!”
16 Ka ko au, naʻe ʻikai te u hola mei he muimui kiate koe ko ha tauhi-sipí,
Pea naʻe ʻikai te u fakaʻamu ke hoko mai ʻa e ʻaho ʻo e fakatamakí.
ʻOkú ke ʻiloʻi lelei ʻa e meʻa kotoa pē naʻe leaʻaki ʻe hoku loungutú;
Naʻe fakahoko kotoa ia ʻi ho ʻaó!
17 ʻOua naʻá ke ʻai ke u hoko ʻo manavahē.
Ko koe ʻa hoku hūfangaʻangá ʻi he ʻaho ʻo e faingataʻá.
18 Tuku ke hoko ʻo mā ʻa hoku kau fakatangá,+
Kae ʻoua naʻá ke tuku au ke u mā.
Tuku ke taaʻi kinautolu ʻe he manavaheé,
Kae ʻoua naʻa tuku ke taaʻi au ʻe he manavaheé,
ʻOmi kiate kinautolu ʻa e ʻaho ʻo e faingataʻá,+
Pea laiki mo fakaʻauha ʻosiʻosingamālie kinautolu.*
19 Ko e folofola eni ʻa Sihova kiate aú: “ʻAlu ʻo tuʻu ʻi he matapā ʻo e ngaahi foha ʻo e kakaí ʻa ia ʻoku hū atu mo hū mai ai ʻa e ngaahi tuʻi ʻo Siutá, pea ʻi he ngaahi matapā kotoa ʻo Selusalemá.+ 20 Kuo pau ke ke pehē kiate kinautolu, ‘Fanongo ki he folofola ʻa Sihová, ʻa kimoutolu ngaahi tuʻi ʻo Siutá, mo e kakai kotoa ʻo Siutá, pea mo e kau nofo kotoa ʻi Selusalema, ʻa ia ʻoku nau hū ʻi he ngaahi matapaá ni. 21 Ko e folofola eni ʻa Sihová: “Mou tokanga kiate kimoutolu, pea ʻoua naʻa mou fua ha kavenga ʻi he ʻaho Sāpaté* pe fakahū mai ia ʻi he ngaahi matapā ʻo Selusalemá.+ 22 Kuo pau ke ʻoua naʻa mou ʻave ha kavenga ki tuʻa mei homou ngaahi falé ʻi he ʻaho Sāpaté; pea kuo pau ke ʻoua naʻa mou fai ai ha ngāue ʻe taha.+ Tauhi ʻa e ʻaho Sāpaté ke toputapu, ʻo hangē tofu pē ko ia naʻá ku tuʻutuʻuni ki hoʻomou fanga kuí.+ 23 Ka naʻe ʻikai te nau fanongo pe fokotuʻu telinga mai, pea naʻa nau fakafisi loto-fefeka* ke talangofua pe tali ʻa e akonakí.”’+
24 “‘“Kae kehe, kapau te mou mātuʻaki talangofua kiate au,” ko e fakahaaʻi ia ʻe Sihová, “pea ʻikai te mou fakahū mai ha kavenga ʻi he ngaahi matapā ʻo e koló ni ʻi he ʻaho Sāpaté, pea mou tauhi ʻa e ʻaho Sāpaté ke toputapu ʻaki ʻa e ʻikai te mou fai ai ha ngāue ʻe taha,+ 25 pea ko e ngaahi tuʻi leva mo e houʻeiki ʻoku nofo ʻi he taloni ʻo Tēvitá+ te nau hū mai foki ʻi he ngaahi matapā ʻo e koló ni, ʻoku nau heka ʻi he saliote pea ʻi he fanga hoosi, ʻa kinautolu mo ʻenau kau houʻeikí, mo e kau tangata ʻo Siutá mo e kau nofo ʻi Selusalemá;+ pea ʻe nofoʻi ʻa e koló ni ʻo taʻengata. 26 Pea ʻe haʻu ʻa e kakaí mei he ngaahi kolo ʻo Siutá, mei he ngaahi feituʻu takatakai ʻi Selusalemá, mei he fonua ʻo Penisimaní,+ mei he talaló,+ mei he feituʻu moʻungá, pea mei he feituʻu Nīkepí,* ʻo nau ʻomi ʻa e ngaahi feilaulau tutu kakato,+ ngaahi feilaulau,+ ngaahi feilaulau meʻakai,+ ʻinisēnisi hinehina, pea mo e ngaahi feilaulau fakafetaʻi ki he fale ʻo Sihová.+
27 “‘“Ka ʻo kapau te mou talangataʻa kiate au ʻaki ʻa e ʻikai ke tauhi ʻa e ʻaho Sāpaté ke toputapu pea mou fua ha kavenga ʻo fakahū mai ʻi he ngaahi matapā ʻo Selusalemá ʻi he ʻaho Sāpaté, te u tutu ʻa hono ngaahi matapaá ʻaki ʻa e afi, pea ko e moʻoni te ne keina ʻa e ngaahi taua fakakolotau ʻo Selusalemá+ pea ʻe ʻikai ke tāmateʻi ia.”’”+
18 Ko e folofola eni naʻe hoko mai kia Selemaia meia Sihová: 2 “Tuʻu hake ʻo ʻalu hifo ki he fale ʻo e tufunga-ʻumeá,+ pea te u ʻai ke ke fanongo ai ki heʻeku ngaahi leá.”
3 Ko ia naʻá ku ʻalu hifo ki he fale ʻo e tufunga-ʻumeá, pea naʻá ne ngaohi ha meʻa ʻi he ngaohiʻanga meʻa ʻumeá. 4 Ka ko e ipu naʻe ngaohi ʻe he tufunga-ʻumeá ʻaki ʻa e ʻumeá naʻe maumau ia ʻi hono nimá. Ko ia naʻe toe ngaohiʻaki ia ʻe he tufunga-ʻumeá ha ipu ʻe taha, ʻo fakatatau pē ki he meʻa naʻá ne loto ki aí.*
5 Naʻe hoko mai leva ʻa e folofola ʻa Sihová kiate au, ʻo pehē: 6 “‘ʻIkai ʻe lava ke u fai kiate kimoutolu ʻo hangē ko e meʻa naʻe fai ʻe he tufunga-ʻumea ko ení, ʻe fale ʻo ʻIsileli?’ ko e fakahaaʻi ia ʻe Sihová. ‘Vakai! Hangē ko e ʻumea ʻi he nima ʻo e tufunga-ʻumeá, ʻoku pehē pē mo kimoutolu ʻi hoku nimá, ʻe fale ʻo ʻIsileli.+ 7 ʻI ha taimi pē te u lea ai ʻo fekauʻaki mo hano taʻaki mo holoki mo fakaʻauha ha kakai pe ko ha puleʻanga,+ 8 pea liʻaki ʻe he kakai ko iá ʻa ʻenau anga-fulikivanu naʻá ku lea ai kiate kinautolú, te u liliu foki ʻeku fakakaukaú* ʻi he fekauʻaki mo e faingataʻa naʻá ku fakataumuʻa ke ʻomi ki aí.+ 9 Ka ʻi ha taimi pē te u lea ai ʻo fekauʻaki mo hano langa hake mo fokotuʻu ha kakai pe ko ha puleʻanga, 10 peá ne fai ʻa e meʻa ʻoku kovi ʻi heʻeku vakaí pea ʻikai ke ne talangofua ki hoku leʻó, te u liliu ʻeku fakakaukaú* ʻi he fekauʻaki mo e lelei naʻá ku fakataumuʻa ke fai ki aí.’
11 “Ko eni, lea muʻa ki he kau tangata ʻo Siutá pea ki he kau nofo ʻi Selusalemá, ‘Ko e folofola eni ʻa Sihová: “Ko eni ʻoku ou teuteu* ha faingataʻa mo faʻufaʻu ha kovi kiate kimoutolu. Tafoki muʻa mei homou ngaahi ʻalunga koví, pea liliu hoʻomou ngaahi foungá mo hoʻomou ngaahi tōʻongá.”’”+
12 Ka naʻa nau pehē: “ʻOku ʻikai hano ʻaonga!+ He te mau ʻaʻeva ʻi heʻemau fakakaukau pē ʻamautolú, pea ko e tokotaha taki taha ʻo kimautolú te mau ngāue ʻo fakatatau ki he anga-fefeka ʻo hono loto fulikivanú.”+
13 Ko ia ko e folofola eni ʻa Sihová:
“Mou ʻeke muʻa ki he ngaahi puleʻangá.
Ko hai kuó ne fanongo ʻi ha meʻa hangē ko ení?
Ko e fefine kei nofo anga-maʻa ko ʻIsilelí kuó ne fai ha meʻa mātuʻaki fakalilifu.+
14 ʻOku vaia koā ʻa e sinou ʻo Lepanoní mei he ngaahi maka ʻi hono ngaahi tahifó?
Pe ʻe mātuʻu koā ʻa e vai mokomoko ʻoku tafe mai mei he mamaʻó?
15 Ka kuo fakangaloʻi au ʻe hoku kakaí.+
He ʻoku nau fai ʻa e ngaahi feilaulaú* ki he meʻa taʻeʻaonga,+
Pea ʻoku nau ʻai ke humu ʻa e kau tangatá ʻi honau halá, ʻa e ngaahi hala motuʻá,+
Ke nau ʻalu ʻi he ngaahi hala kehe ʻoku ʻikai ke tokalelei mo tanu,
16 Koeʻuhí ke ʻai honau fonuá ko ha meʻa ke fai ai ʻa e fakalilifuʻia+
Ko e tokotaha kotoa pē ʻoku fou mai aí te ne sio fakamamaʻu ki ai ʻi he fakalilifuʻia mo kalokalo ʻa hono ʻulú.+
17 Te u fakamovete kinautolu ʻi he ʻao ʻo honau filí, ʻo hangē ko e matangi hahaké.
Te u sītuʻa kiate kinautolu, ʻo ʻikai hanga atu kiate kinautolu, ʻi he ʻaho ʻo ʻenau faingataʻaʻiá.”+
18 Pea naʻa nau pehē: “Haʻu, tau faʻufaʻu ha kovi kia Selemaia,+ he ko e laó* ʻe ʻikai mole ia mei heʻetau kau taulaʻeikí pe ko e faleʻí mei he kau tangata potó pe ko e folofolá mei he kau palōfitá. Haʻu pea ke tau lea fakafepaki kiate ia* pea ʻoua ʻe tokanga ki he meʻa ʻokú ne leaʻakí.”
19 Ke ke tokanga mai kiate au, ʻe Sihova,
Pea fanongo mai ki he meʻa ʻoku leaʻaki ʻe hoku kau fakafepakí.
20 ʻE totongi koā ʻa e leleí ʻaki ʻa e kovi?
He kuo nau keli ha luo ki heʻeku moʻuí.+
Manatuʻi ʻa ʻeku tuʻu ʻi ho ʻaó ʻo leaʻaki ʻa e meʻa lelei fekauʻaki mo kinautolu,
Ke toʻo ʻa hoʻo houhaú meiate kinautolu.
21 Ko ia tuku atu honau ngaahi fohá ki he hongé,
Pea tuku atu kinautolu ki he mālohi ʻo e heletaá.+
ʻOfa ke toʻo mei honau ngaahi uaifí ʻa ʻenau fānaú pea nau hoko ko e kau uitou.+
ʻOfa ke mate ʻa ʻenau kau tangatá ʻi ha mahaki fakatupu mate,
Pea taaʻi ʻa ʻenau kau talavoú ʻaki ʻa e heletā ʻi he taú.+
22 Tuku ke ongona ha tangi mei honau ngaahi falé
ʻI hoʻo ʻomi fakafokifā ha kau kaihaʻa fakamālohi kiate kinautolu.
He kuo nau keli ha luo ke maʻu ai au
Pea tau ha ngaahi tauhele ki hoku vaʻé.+
23 Ka ko koe, ʻe Sihova,
ʻOkú ke ʻiloʻi lelei ʻa ʻenau ngaahi faʻufaʻu kotoa ke tāmateʻi aú.+
ʻOua naʻá ke ʻufiʻufi ʻa ʻenau faihalá,
Pea ʻoua naʻá ke tāmateʻi ʻa ʻenau angahalá mei ho ʻaó.
19 Ko e folofola eni ʻa Sihová: “ʻAlu ʻo fakatau mai ha hina ʻumea mei ha tokotaha tufunga-ʻumea.+ ʻAve ha niʻihi ʻo e kau taukei ʻi he kakaí mo ha niʻihi ʻo e kau taukei ʻi he kau taulaʻeikí, 2 peá ke ʻalu atu ki he Teleʻa ʻo e Foha ʻo Hīnomí,+ ʻi he hūʻanga ʻo e Matapā Mapakipakiʻi ʻUmeá. Peá ke fanongonongo ai ʻa e ngaahi lea ʻoku ou leaʻaki kiate koé. 3 Te ke pehē, ‘Fanongo ki he folofola ʻa Sihová, ʻa kimoutolu ngaahi tuʻi ʻo Siuta mo e kakai ʻo Selusalemá. Ko e folofola eni ʻa Sihova ʻo e ngaahi kau tau, ko e ʻOtua ʻo ʻIsilelí:
“‘“Te u ʻomi ha fakatamaki ki he feituʻú ni, pea ʻilonga ha taha ʻe fanongo ki ai ʻe makini ʻa hono telingá. 4 Koeʻuhí naʻa nau liʻaki au+ pea nau ʻai ʻa e feituʻú ni ke maliu ʻo kehe.+ ʻOku nau faifeilaulau ai ki he ngaahi ʻotua kehe naʻe ʻikai te nau ʻiloʻi mo ʻenau fanga kuí mo e ngaahi tuʻi ʻo Siutá, pea kuo nau fakafonu ʻa e feituʻú ni ʻaki ʻa e toto ʻo e faʻahinga taʻehalaiá.+ 5 Naʻa nau langa ʻa e ngaahi potu māʻolunga ʻo Pēalí koeʻuhí ke tutu ai honau ngaahi fohá ʻi he afi ko ha ngaahi feilaulau tutu kakato kia Pēali,+ ko e meʻa naʻe ʻikai te u tuʻutuʻuni pe leaʻaki pea naʻe ʻikai ʻaupito ke teitei ake ia ʻi hoku lotó.”’*+
6 “‘“Ko ia ai, vakai, ʻoku hoko mai ʻa e ngaahi ʻaho,” ko e fakahaaʻi ia ʻe Sihová, “ʻa ia ʻe ʻikai ke kei ui ʻa e feituʻú ni ko Tōfeti pe ko e Teleʻa ʻo e Foha ʻo Hīnomí ka ko e Teleʻa ʻo e Tāmate.+ 7 Te u fakafehālaakiʻi ʻa e ngaahi palani ʻa Siuta mo Selusalema ʻi he feituʻú ni, pea te u ʻai ke nau tō ʻi he heletā ʻi he ʻao ʻo honau ngaahi filí pea ʻi he nima ʻo e faʻahinga ʻoku nau kumi ke toʻo ʻenau moʻuí. Pea te u ʻoatu honau ngaahi ʻangaʻangá ko e meʻakai ki he fanga manupuna ʻo e langí pea ki he fanga manu ʻo e māmaní.+ 8 Pea te u ʻai ʻa e koló ni ko e meʻa ke fai ai ʻa e fakalilifuʻia mo ha meʻa ke fai ha manuki* ki ai. Ko e tokotaha kotoa pē ʻe fou mai aí te ne sio fakamamaʻu ki ai ʻi he fakalilifuʻia peá ne mapumapu manuki ʻi heʻene sio ki he kotoa ʻo hono ngaahi tauteá.+ 9 Pea te u ʻai ke nau kai ʻa e kakano ʻo honau ngaahi fohá mo honau ngaahi ʻofefiné, pea ko e tokotaha taki taha te ne kai ʻa e kakano ʻo e tokotaha ʻe tahá, koeʻuhí ko honau ʻākoloʻí pea mo ʻenau faingataʻaʻia lahi ʻi hono kāpui kinautolu ʻe honau ngaahi filí pea mo e faʻahinga ʻoku nau kumi ke toʻo ʻenau moʻuí.”’+
10 “Pea te ke fahiʻi ʻa e hiná ʻi he ʻao ʻo e kau tangata ʻe ō mo koé, 11 peá ke pehē kiate kinautolu, ‘Ko e folofola eni ʻa Sihova ʻo e ngaahi kau taú: “ʻE peheni pē ʻa ʻeku maumauʻi ʻa e kakaí ni mo e koló ni, ʻo hangē ko hano fahiʻi ʻe ha tokotaha ʻa e hina ʻa ha tokotaha tufunga-ʻumea ʻa ia ʻe ʻikai ʻaupito lava ke toe fakaleleiʻi; pea te nau tanu ʻa e kau maté ʻi Tōfeti kae ʻoua kuo ʻikai ke toe ʻi ai ha feituʻu ke tanu ai kinautolu.”’+
12 “‘Ko e meʻa ia te u fai ki he feituʻú ni,’ ko e fakahaaʻi ia ʻe Sihová, ‘pea ki hono kakaí, ke ʻai ʻa e koló ni ke hangē ko Tōfetí. 13 Pea ko e ngaahi fale ʻo Selusalemá mo e ngaahi fale ʻo e ngaahi tuʻi ʻo Siutá ʻe hoko ia ʻo taʻemaʻa ʻo hangē ko e feituʻú ni, ʻa Tōfeti,+ ʻio, ʻa e ngaahi fale kotoa ʻa ia ko honau funga falé ē naʻa nau faifeilaulau ai ki he kongakau kotoa ʻo e langí+ pea naʻa nau lilingi atu ai ʻa e ngaahi feilaulau inu ki he ngaahi ʻotua kehé.’”+
14 ʻI he foki ʻa Selemaia mei Tōfeti ʻa e feituʻu naʻe fekauʻi ia ki ai ʻe Sihova ke ne fai ai ʻa e kikité, naʻá ne tuʻu ʻi he lotoʻā ʻo e fale ʻo Sihová peá ne pehē ki he kotoa ʻo e kakaí: 15 “Ko e folofola eni ʻa Sihova ʻo e ngaahi kau tau, ko e ʻOtua ʻo ʻIsilelí, ‘Ko eni ʻoku ou ʻomi ki he koló ni mo hono ngaahi kolo takatakaí ʻa e fakatamaki kotoa naʻá ku lea ʻo fekauʻaki mo iá, koeʻuhí naʻa nau fakafisi loto-fefeka ke* talangofua ki heʻeku ngaahi leá.’”+
20 Pea ko Pasua ko e foha ʻo ʻĪmeli ko e taulaʻeikí, ʻa ia ko e taki foki ia ʻo e kau talafekau ʻo e fale ʻo Sihová, naʻá ne fanongo ʻi hono kikiteʻi ʻe Selemaia ʻa e ngaahi meʻá ni. 2 Naʻe taaʻi leva ʻe Pasua ʻa e palōfita ko Selemaiá pea kiiʻi ia ʻi he ʻakau-kiiʻi+ naʻe ʻi he Matapā ʻOlunga ʻo Penisimaní, ʻa ia naʻe ʻi he fale ʻo Sihová. 3 Ka ʻi he ʻaho hono hokó ʻi he taimi naʻe tuku ange ai ʻe Pasua ʻa Selemaia mei he ʻakau-kīʻí, naʻe pehē ange ʻe Selemaia kiate ia:
“Kuo fakahingoa koe ʻe Sihova, ʻo ʻikai ko Pasua, ka ko Kāpui ʻe Manavahē.+ 4 He ko e meʻa eni ʻoku folofolaʻaki ʻe Sihová, ‘Te u ʻai koe ko ha meʻa fakamanavahē kiate koe pea mo e kotoa ho ngaahi kaungāmeʻá, pea te nau tō ʻi he heletā ʻa honau ngaahi filí lolotonga ia ʻokú ke siosio atu pē;+ pea te u foaki ʻa Siuta kātoa ki he nima ʻo e tuʻi ʻo Pāpiloné, pea te ne ʻave fakamālohi kinautolu ki Pāpilone pea tāmateʻi ʻaki kinautolu ʻa e heletā.+ 5 Pea te u foaki ʻa e kotoa ʻo e tuʻumālie ʻo e koló ni, mo e kotoa ʻene ngaahi koloá, mo e kotoa ʻo ʻene ngaahi meʻa mahuʻingá, pea mo e kotoa ʻo e ngaahi koloa ʻa e ngaahi tuʻi ʻo Siutá ki he nima ʻo honau ngaahi filí.+ Pea te nau faʻao fakamālohi ʻenau koloá pea puke kinautolu ʻo ʻave ki Pāpilone.+ 6 Pea ko koe, Pasua, mo ia kotoa ʻoku nofo ʻi ho falé, te mou ʻalu atu ko e kau pōpula. Te ke ʻalu ki Pāpilone ʻo mate ai, pea ʻe tanu ai koe mo e kotoa ho ngaahi kaungāmeʻá, koeʻuhí kuó ke fai ʻa e ngaahi kikite loi kiate kinautolu.’”+
7 Kuó ke fakaʻohovaleʻi au, ʻe Sihova, pea kuó u ʻohovale.
Naʻá ke ngāueʻaki ho mālohí kiate au, pea kuó ke ikuna.+
Kuó u hoko ko e meʻa ke fakakataʻaki he ʻahó kotoa;
ʻOku manukiʻi au ʻe he tokotaha kotoa.+
8 He ʻi haʻaku fai pē ha lea, kuo pau ke u kaila pea fakahā,
“Ko e fakamālohi mo e fakaʻauha!”
Ko e folofola ʻa Sihová kuo hoko ia ko e meʻa ke taʻetokaʻi mo taukaeʻi ai au ʻi he ʻahó kotoa.+
9 Ko ia naʻá ku pehē: “Heʻikai te u toe lea ʻo fekauʻaki mo ia,
Pea heʻikai te u toe lea ʻi hono huafá.”+
Ka ʻi hoku lotó naʻe hangē ʻene folofolá ha afi vela ʻoku nofo ʻi hoku ngaahi huí;
Pea naʻá ku ongosia he feinga ke taʻofi ia ʻi lotó;
Naʻe ʻikai te u kei lava ʻo fakalongolongo ai pē.+
10 He naʻá ku fanongo ʻi he ngaahi talanoa kovi lahi;
Naʻe takatakaiʻi au ʻe he manavaheé.+
“Fakahalaiaʻi ia; tau fakahalaiaʻi ia!”
Ko e tangata kotoa pē naʻa nau talamonū mai kiate aú naʻa nau siofi pē haʻaku tō:+
“Pehē ange mai te ne fai ha fehālaaki fakavalevale,
Pea ʻe lava ke tau ikuna pea tau fai ha sāuni kiate ia.”
11 Ka naʻe ʻiate au ʻa Sihova ʻo hangē ha toʻa fakamanavaheé.+
Ko e ʻuhinga ia ʻe humu pea ʻe ʻikai ke ikuna ai ʻa e faʻahinga ʻoku nau fakatangaʻi aú.+
ʻE fakamaaʻi lahi kinautolu, koeʻuhí heʻikai te nau lavameʻa.
Ko honau fakahāeaʻi tuʻuloá ʻe ʻikai ke toe ngalo.+
12 Ka ko koe, ʻe Sihova ʻo e ngaahi kau tau, ʻokú ke sivi ʻa e tokotaha māʻoniʻoní;
ʻOkú ke ʻafioʻi ʻa e ngaahi fakakaukau lolotó* pea mo e lotó.+
Tuku ke u sio ki hoʻo faisāuni kiate kinautolú,+
He kuó u tuku atu ʻeku meʻá kiate koe ke ke fakamāuʻi.+
13 Hiva kia Sihova! Fakahīkihikiʻi ʻa Sihova!
He kuó ne fakahaofi ʻa e tokotaha masivá mei he nima ʻo e kau faikoví.
14 Malaʻia ē ko e ʻaho naʻe fanauʻi ai aú!
ʻOfa ke ʻoua naʻa faitāpuekina ʻa e ʻaho naʻe fāʻeleʻi ai au ʻe heʻeku faʻeé!+
15 Malaʻia ē ko e tangata naʻá ne ʻomai ʻa e ongoongo lelei ki heʻeku tamaí, ʻo pehē:
“Kuo fanauʻi ha foha kiate koe, ko ha tamasiʻi!”
Peá ne fiefia lahi ai.
16 ʻOfa ke hoko ʻa e tangata ko iá ʻo hangē ko e ngaahi kolo naʻe liua ʻe Sihova ʻo ʻikai haʻane fakaʻiseʻisá.
ʻOfa ke ne fanongoa ha tangi ʻi he pongipongí mo ha leʻo ʻo e fakatokanga ʻi he hoʻatā mālié.
17 Ko e hā naʻe ʻikai ke ne tāmateʻi ai au ʻi manavá,
Ko ia naʻe mei hoko ai ʻa ʻeku faʻeé ko hoku tanuʻanga
Pea naʻe mei ʻikai ʻaupito ke ne fāʻele?+
18 Ko e hā naʻe pau ai ke u haʻu mei manava
ʻO sio ʻi he faingataʻá mo e mamahí,
Ke fakaʻosi hoku ngaahi ʻahó ʻi he fakamā?+
21 Naʻe hoko hifo ʻa e folofola ʻa Sihová kia Selemaia ʻi he taimi naʻe fekauʻi atu ai ʻe Tuʻi Setekaia+ kiate ia ʻa Pasua+ ko e foha ʻo Malakaia mo e taulaʻeiki ko Sēfanaiá,+ ʻa e foha ʻo Māseiá, ʻo fai ʻa e kole ʻo pehē: 2 “Kumi muʻa ki he tataki ʻa Sihová maʻatautolu, koeʻuhí he ʻoku faitau kiate kitautolu ʻa Tuʻi Nepukanesa* ʻo Pāpiloné.+ ʻE fai nai ai ʻe Sihova ha taha ʻo ʻene ngaahi ngāue fakaofó maʻatautolu, koeʻuhí ke ne mavahe meiate kitautolu.”+
3 Naʻe pehē ange ʻe Selemaia kiate kinaua: “Ko e meʻa eni te mo leaʻaki kia Setekaiá, 4 ‘Ko e folofola eni ʻa Sihova ko e ʻOtua ʻo ʻIsilelí: “Ko eni ʻoku ou fakahanga atu kiate kimoutolu* ʻa e ngaahi meʻatau ʻoku ʻi homou nimá ʻa ia ʻoku mou faitau ʻaki ki he tuʻi ʻo Pāpiloné+ pea ki he kau Kalitia ʻoku nau ʻi tuʻa ʻi he ʻaá ʻo ʻākoloʻi kimoutolú. Pea te u tānaki ʻa e ngaahi meʻa ko iá* ki he loto koló ni. 5 Pea te u faitau kiate kimoutolu+ ʻaki ha nima kuo mafao atu mo ha nima mālohi, ʻaki ʻa e ʻita mo e tuputāmaki mo e houhau lahi.+ 6 Te u taaʻi ʻa e kakai ʻo e koló ni, fakatouʻosi ʻa e tangata mo e manu. Te nau mate ʻi ha fuʻu mahaki fakaʻauha.”’*+
7 “‘“Pea ʻi he hili iá,” ko e fakahaaʻi ia ʻe Sihová, “te u tuku atu ʻa Tuʻi Setekaia ʻo Siutá mo ʻene kau sevānití pea mo e kakai ʻo e koló ni—ʻa e faʻahinga ʻe hao ʻi he mahaki fakaʻauhá, mo e heletaá, mo e hongé—ki he nima ʻo Tuʻi Nepukanesa* ʻo Pāpiloné, ki he nima ʻo honau ngaahi filí, pea ki he nima ʻo e faʻahinga ʻoku nau kumi ke toʻo ʻa ʻenau moʻuí.+ Te ne taaʻi kinautolu ʻaki ʻa e heletā. ʻE ʻikai te ne ongoʻi fakaʻofaʻia ʻiate kinautolu, pe te ne fakahaaʻi ha manavaʻofa pe ha meesi ʻe taha.”’+
8 “Pea te ke lea ki he kakaí ni, ‘Ko e folofola eni ʻa Sihová: “Ko eni ʻoku ou tuku ʻi homou ʻaó ʻa e hala ki he moʻuí mo e hala ki he maté. 9 Ko e faʻahinga ʻe nofo ʻi he koló ni te nau mate ʻi he heletā, ʻi he honge, pea ʻi he mahaki fakaʻauha. Kae ʻilonga ʻa ia ʻe hū ki tuʻa ʻo tukulolo ki he kau Kalitia ʻoku nau ʻākoloʻi kimoutolú ʻe moʻui ai pē, pea te ne maʻu ʻa ʻene moʻuí ko ha koloa vete.”’*+
10 “‘“He kuó u siʻaki ʻa e koló ni pea ʻe hoko ki ai ʻa e fakatamaki mo e kovi,”+ ko e fakahaaʻi ia ʻe Sihová. “ʻE tuku atu ia ki he nima ʻo e tuʻi ʻo Pāpiloné,+ pea te ne tutu ia ʻaki ʻa e afi.”+
11 “‘Ki he fale ʻo e tuʻi ʻo Siutá: Mou fanongo mai ki he folofola ʻa Sihová. 12 Ko e folofola eni ʻa Sihová, ʻe fale ʻo Tēvita:
“Pouaki ʻa e fakamaau totonú ʻi he pongipongi kotoa pē,
Pea fakahaofi mei he nima ʻo e tokotaha kākaá ʻa e tokotaha naʻe kaihaʻasi ʻene koloá,+
Ke ʻoua naʻa puho atu ʻa ʻeku ʻitá ʻo hangē ha afí+
Pea vela ʻo ʻikai ha taha ke ne tāmateʻi ia
Koeʻuhí ko hoʻomou ngaahi ngāue koví.”’+
13 ‘Ko eni te u tauteaʻi koe, ʻa koe ʻoku nofo ʻi he teleʻá,*
ʻA koe ko e maka ʻo e fonua tokaleleí,’ ko e fakahaaʻi ia ʻe Sihova.
‘Ka ko kimoutolu ʻoku mou pehē: “Ko hai ia ʻe ʻalu hifo kiate kitautolú?
Pea ko hai ia ʻe fakatūʻuta ʻi hotau ngaahi nofoʻangá?”
14 Te u tauteaʻi kimoutolu
ʻO hangē ko ia ʻoku tuha mo hoʻomou ngaahi ngāué,’+ ko e fakahaaʻi ia ʻe Sihová.
‘Pea te u tutu ʻa ho vaotaá,
Pea te ne keina ʻa e meʻa kotoa pē ʻoku takatakai ʻiate koé.’”+
22 Ko e folofola eni ʻa Sihová: “ʻAlu hifo ki he palasi ʻo e tuʻi ʻo Siutá, ʻo fakahoko ki ai ʻa e pōpoakí ni. 2 Kuo pau ke ke pehē, ‘Fanongo ki he folofola ʻa Sihová, ʻa e tuʻi ʻo Siuta ʻoku nofo ʻi he taloni ʻo Tēvitá, ʻa koe mo hoʻo kau sevānití pea mo ho kakaí, ʻa e faʻahinga ʻoku nau hū atu ʻi he ngaahi matapaá ni. 3 Ko e folofola eni ʻa Sihová: “Pouaki ʻa e fakamaau totonú mo e māʻoniʻoní. Fakahaofi ʻa e tokotaha kuo kaihaʻasi ʻene koloá mei he nima ʻo e tokotaha kākaá. ʻOua ʻe ngaohikoviʻi ha muli pē ʻoku ʻāunofo mai, pea ʻoua ʻe fai ha maumau ki ha kiʻi tama tamai-mate* pe uitou.+ Pea ʻoua naʻa lilingi ha toto taʻehalaia ʻi he feituʻú ni.+ 4 He kapau te mou tokanga ke fakahoko ʻa e leá ni, ko e ngaahi tuʻi leva ʻoku nofo ʻi he taloni ʻo Tēvitá+ te nau hū ʻi he ngaahi matapā ʻo e palasí ni ʻoku nau heka ʻi he ngaahi saliote mo e fanga hoosi, ʻa kinautolu mo ʻenau kau sevānití pea mo honau kakaí.”’+
5 “‘Ka ʻo kapau heʻikai te mou talangofua ki he ngaahi leá ni, ʻoku ou fai ha fuakava ʻiate au pē,’ ko e fakahaaʻi ia ʻe Sihová, ‘ʻe hoko ʻa e palasí ni ko ha feituʻu maomaonganoa.’+
6 “He ko e folofola eni ʻa Sihova ʻo fekauʻaki mo e palasi ʻo e tuʻi ʻo Siutá,
‘ʻOkú ke hangē ko Kiliatí kiate au,
ʻO hangē ko e tumutumu ʻo Lepanoní.
Ka te u ʻai koe ko ha toafa;
Heʻikai ha taha ʻi ho ngaahi koló ʻe nofoʻi.+
Te nau tuʻusi hifo ʻa ho ʻulu sita lelei tahá
ʻO laku kinautolu ki he afí.+
8 “‘Pea ko e ngaahi puleʻanga lahi te nau fou atu ʻi he koló ni ʻo nau fepehēʻaki: “Ko e hā naʻe fai ai ʻe Sihova ʻa e meʻá ni ki he fuʻu koló ni?”+ 9 Pea te nau tali ʻo pehē: “Koeʻuhi naʻa nau siʻaki ʻa e fuakava ʻa Sihova ko honau ʻOtuá pea nau punou ki he ngaahi ʻotua kehé ʻo tauhi kinautolu.”’+
10 ʻOua te mou tengihia ʻa e tokotaha ʻoku maté,
Pea ʻoua te mou mamahi koeʻuhi ko ia.
Ka mou mātuʻaki tengihia ʻa e tokotaha ʻoku ʻave fakamālohí,
Koeʻuhi heʻikai te ne toe foki mai ke sio ki he fonua naʻe fanauʻi aí.
11 “He ko e folofola eni ʻa Sihova ʻo fekauʻaki mo Salumi*+ ko e foha ʻo Siosaia ko e tuʻi ʻo Siutá, ʻa ia ʻokú ne lolotonga pule ʻo fetongi ʻa ʻene tamai ko Siosaiá+ pea kuó ne ʻalu atu mei he feituʻú ni: ‘Heʻikai te ne toe foki mai ki ai. 12 He te ne mate ʻi he feituʻu ʻa ia kuo nau ʻave fakamālohi ia ki aí, pea heʻikai te ne toe sio ʻi he fonuá ni.’+
13 ʻOiauē ka ko e tokotaha ʻokú ne langa ʻa hono falé ʻo ʻikai ʻi he māʻoniʻoní
Pea mo hono ngaahi loki ʻi ʻolungá ʻo ʻikai ʻi he fakamaau totonú,
ʻOkú ne ʻai ha tangata ke ngāue taʻetotongi ange kiate ia,
Pea ʻokú ne fakafisi ke ʻoange ʻene totongí;+
14 ʻOku pehē ʻe he tokotahá ni, ‘Te u langa moʻoku ha fale ʻoku ʻatāloa
Fakataha mo ha ngaahi loki lalahi ʻi ʻolunga.
Te u fokotuʻu ki ai ha ngaahi matapā-teke
Pea ʻaofi ia ʻaki ʻa e sita pea vali lanu kulokula ia.’
15 ʻE hokohoko atu koā hoʻo pulé koeʻuhi ʻokú ke lakasi ʻa e niʻihi kehé ʻi hoʻo ngāueʻaki ʻa e sitá?
Ko hoʻo tamaí foki naʻe kai mo inu,
Ka naʻá ne pouaki ʻa e fakamaau totonú mo e māʻoniʻoní,+
Pea naʻe lelei ia kiate ia.
16 Naʻá ne taukapoʻi ʻa e fakamāuʻi ʻo e tokotaha kuo ngaohikoviá pea mo e tokotaha masivá,
Ko ia naʻe lelei ia.
‘ʻIkai ko e meʻa ia ʻoku ʻuhinga ki ai ʻa hono ʻiloʻi aú?’ Ko e fakahaaʻi ia ʻe Sihová.
17 ‘Ka ko ho matá mo ho lotó ʻokú na tokangataha pē ki he meʻa ʻokú ke maʻu ʻi he taʻefaitotonú,
Ki he lilingi ʻo e toto taʻehalaiá,
Pea ki hono fai ʻo e kākā mo e faʻao fakamālohí.’
18 “Ko ia ai, ko e meʻa eni ʻoku folofolaʻaki ʻe Sihova ʻo fekauʻaki mo Sihoiakimi+ ko e foha ʻo Siosaia ko e tuʻi ʻo Siutá,
‘Heʻikai te nau tengihia ia ʻo pehē:
“ʻOiauē, siʻoku tokoua! ʻOiauē, siʻoku tuofefine!”
Heʻikai te nau tengihia ia ʻo pehē:
“ʻOiauē, ʻa koe ko e pulé! ʻOiauē, ʻa ʻene ʻafió!”
19 ʻE tanu ia ʻo hangē ko e tanu ʻo ha ʻasi,+
ʻO toho atu pea lī,
Ki tuʻa ʻi he ngaahi matapā ʻo Selusalemá.’+
20 ʻAlu hake* ki Lepanoni ʻo tangi leʻo-lahi,
Hiki hake ho leʻó ʻi Pēsani,
Pea tangi leʻo-lahi mei ʻApalemi,+
He ko ho ngaahi ʻofaʻanga mamaé kotoa kuo nau ʻauha.+
21 Naʻá ku lea kiate koe ʻi he taimi naʻá ke ongoʻi malu aí.
Ka naʻá ke pehē, ‘Heʻikai te u talangofua.’+
Ko ho ʻalungá pē eni talu mei hoʻo kei talavoú,
He kuo ʻikai te ke talangofua ki hoku leʻó.+
22 ʻE puhiʻi atu ʻe ha matangi ʻa e kotoa ʻo hoʻo kau tauhi-sipí,+
Pea ko ho ngaahi ʻofaʻanga mamaé ʻe taki pōpula.
Pea te ke hoko ʻo mā mo ngalivale koeʻuhi ko e fakatamaki kotoa ʻe tō mai kiate koé.
23 ʻA koe ʻokú ke nofo ʻi Lepanoní,+
ʻO faʻu ho nofoʻangá ʻi he ngaahi sitá,+
He toʻe ē ka ko koe ʻi he hoko mai kiate koe ʻa e ngaahi langa mamahí,
ʻA e mamahi* hangē ko ia ʻoku maʻu ʻe ha fefine ʻoku fāʻelé!”+
24 “‘ʻOku ou fuakava ʻiate au,’* ko e fakahaaʻi ia ʻe Sihová, ‘ka ne ko koe Konaia*+ ko e foha ʻo Sihoiakimi,+ ko e tuʻi Siutá, ʻa e mama sila naʻe ʻi hoku nima toʻomataʻú, te u toʻo koe mei ai! 25 Te u tuku koe ki he nima ʻo e faʻahinga ʻoku nau kumi ke toʻo ʻa hoʻo moʻuí, ki he nima ʻo e faʻahinga ʻokú ke manavahē ki aí, ki he nima ʻo Tuʻi Nepukanesa* ʻo Pāpiloné, pea ki he nima ʻo e kau Kalitiá.+ 26 Pea te u kapusi koe mo hoʻo faʻeé ʻa ia naʻá ne fāʻeleʻi koé ki ha fonua ʻe taha ʻa ia naʻe ʻikai ke fāʻeleʻi ai kimoutolu, pea te mou mate ai. 27 Pea heʻikai ʻaupito te nau toe foki ki he fonua ʻoku nau fakaʻamu ki aí.+
28 Ko e tangata ko eni ko Konaiá ko ha ipu maumau pē kuo liʻaki,
Ko ha ipu ʻoku ʻikai fiemaʻu ʻe ha taha?
Ko e hā ʻoku kapusi ai ia mo hono hakó
Pea lī ki ha fonua ʻoku ʻikai ke nau ʻiló?’+
29 ʻE māmani,* ʻe māmani, ʻe māmani ē, fanongo ki he folofola ʻa Sihová.
30 Ko e folofola eni ʻa Sihová:
‘Tohi ʻa e tangatá ni ko ha tangata ʻoku ʻikai haʻane fānau,
Ko ha tangata ʻe ʻikai haʻane lavameʻa ʻe taha ʻi he lolotonga ʻene moʻuí,*
Koeʻuhi heʻikai ha taha ʻi hono ngaahi hakó ʻe hoko hake
ʻO nofo ʻi he taloni ʻo Tēvitá ʻo toe pule ʻi Siuta.’”+
23 “ʻOiauē ʻa e kau tauhi-sipi ʻoku nau fakaʻauha mo fakamovetevete ʻa e fanga sipi ʻo ʻeku kaikaiʻangá!” Ko e fakahaaʻi ia ʻe Sihová.+
2 Ko ia ai, ko e meʻa eni ʻoku folofolaʻaki ʻe Sihova ko e ʻOtua ʻo ʻIsilelí ki he kau tauhi-sipi ʻoku nau tauhi ʻa hoku kakaí: “Kuo mou fakamovetevete ʻa ʻeku fanga sipí; kuo mou hanganaki ʻai kinautolu ke nau movete, pea kuo ʻikai ke mou tokanga kiate kinautolu.”+
“Ko ia te u fai ha tokanga kiate kimoutolu koeʻuhi ko hoʻomou ngaahi ngāue koví,” ko e fakahaaʻi ia ʻe Sihová.
3 “Te u fakatahatahaʻi leva ʻa e toenga ʻo ʻeku fanga sipí mei he ngaahi fonua kotoa naʻá ku fakamovetevete ai kinautolú,+ pea te u fakafoki kinautolu ki honau kaikaiʻangá,+ pea te nau fanafanau pea hoko ʻo tokolahi.+ 4 Pea te u fokotuʻu ke pule kiate kinautolu ha kau tauhi-sipi ʻa ia te nau tauhi moʻoni kinautolu.+ Heʻikai te nau toe hoko ʻo ilifia pe manavahē, pea ʻe ʻikai ha taha ʻe mole,” ko e fakahaaʻi ia ʻe Sihová.
5 “Vakai! ʻOku haʻu ʻa e ngaahi ʻaho,” ko e fakahaaʻi ia ʻe Sihová, “ʻa ia te u fokotuʻu hake ai ha huli*+ māʻoniʻoni mei he laine ʻo Tēvitá. Pea te ne pule ko ha tuʻi+ pea te ne fakahaaʻi ʻa e vavanga fakaefakakaukau mo pouaki ʻa e fakamaau totonú mo e māʻoniʻoní ʻi he fonuá.+ 6 ʻI hono ngaahi ʻahó, ʻe fakahaofi ai ʻa Siuta,+ pea ʻe nofo malu ʻa ʻIsileli.+ Pea ko e hingoa eni ʻe uiʻaki iá: Ko Sihova ʻa Hotau Māʻoniʻoniʻangá.”+
7 “Ka neongo ia, ʻoku haʻu ʻa e ngaahi ʻaho,” ko e fakahaaʻi ia ʻe Sihová, “ʻa ia heʻikai te nau toe pehē ai: ‘ʻOku ou fuakava ʻia Sihova ko e ʻOtua moʻuí, ʻa ia naʻá ne ʻomai ʻa e kakai ʻIsilelí mei he fonua ko ʻIsipité!’+ 8 Ka te nau pehē: ‘ʻOku ou fuakava ʻia Sihova ko e ʻOtua moʻuí, ʻa ia naʻá ne fakahū ki tuʻa mo fakafoki mai ʻa e hako ʻo e fale ʻo ʻIsilelí mei he fonua ʻo e tokelaú pea mei he ngaahi fonua kotoa naʻá ku fakamovete ai kinautolú,’ pea te nau nofo ʻi honau fonua totonú.”+
9 ʻI he fekauʻaki mo e kau palōfitá:
ʻOku fasi hoku lotó ʻi loto ʻiate au.
ʻOku tete hoku ngaahi huí kotoa.
ʻOku ou hangē ha tangata ʻoku konaá
Pea hangē ha tangata ʻoku ikuʻi ʻe he uainé,
Koeʻuhí ko Sihova pea koeʻuhí ko ʻene ngaahi lea māʻoniʻoní.
10 He ʻoku fonu ʻa e fonuá ʻi he kau tono;+
ʻOku fakamamahi ʻa e fonuá koeʻuhi kuo tō ki ai ha mala+
Pea ko e ngaahi kaikaiʻanga ʻi he toafá kuo pakukā.+
ʻOku kovi honau ʻalungá, pea ʻoku nau ngāuekoviʻaki honau mafaí.
11 “Kuo ʻuliʻi*+ fakatouʻosi ʻa e kau palōfitá mo e kau taulaʻeikí.
Naʻa mo e ʻi hoku falé tonu kuó u ʻilo ai ʻa ʻenau fulikivanú,”+ ko e fakahaaʻi ia ʻe Sihová.
12 “Ko ia ko honau halá ʻe hoko ʻo hekeheke mo fakapoʻuli;+
ʻE tekeʻi kinautolu pea te nau tō.
He te u ʻomi ha fakatamaki kiate kinautolu
ʻI he taʻu ʻo honau tauteá,” ko e fakahaaʻi ia ʻe Sihová.
13 “Pea kuó u sio ʻi ha meʻa fakalielia ʻi he kau palōfita ʻo Samēliá.+
Ko ʻenau ngaahi kikité ʻoku fai ia ʻia Pēali,
Pea ʻoku nau takiheeʻi ʻa hoku kakai ko ʻIsilelí.
14 Pea kuó u sio ʻi ha ngaahi meʻa fakalilifu ʻi he kau palōfita ʻo Selusalemá.
ʻOku nau fai ʻa e tono+ mo ʻaʻeva ʻi he loí;+
ʻOku nau fakaʻaiʻai ʻa e* kau faikoví,
Pea ʻoku ʻikai te nau tafoki mei heʻenau tōʻonga fulikivanú.
ʻOku nau hangē kotoa kiate au ko Sōtomá,+
Pea ko e kau nofo ko eni ʻi Selusalemá ʻoku nau hangē ko Komolá.”+
15 Ko ia ai, ko e folofola eni ʻa Sihova ʻo e ngaahi kau tau ki he kau palōfitá:
“Ko eni ʻoku ou ʻai kinautolu ke nau kai ʻa e ʻakau ifo kona
Peá u ʻoange kiate kinautolu ʻa e vai kona ke nau inu.+
He kuo mafola atu ki he fonuá kotoa mei he kau palōfita ʻo Selusalemá ʻa e tafoki ʻo fakafepaki ki he moʻoní.”
16 Ko e folofola eni ʻa Sihova ʻo e ngaahi kau tau:
“ʻOua ʻe fanongo ki he lea ʻa e kau palōfita ʻoku nau kikite atu kiate kimoutolú.+
ʻOku nau takihalaʻi kimoutolu.*
17 ʻOku nau toutou lea ki he faʻahinga ʻoku nau taʻefakaʻapaʻapa kiate aú,
‘Kuo folofola ʻa Sihova: “Te mou maʻu ʻa e melino.”’+
Pea ʻoku nau pehē ki he tokotaha kotoa ʻoku muimui ʻi hono loto-fefeka pē ʻoʻoná,
‘ʻE ʻikai ke hoko mai ha fakatamaki kiate kimoutolu.’+
18 He ko hai ia kuó ne tuʻu ʻi he lotolotonga ʻo e kakai ʻoku ofi kia Sihová
Ke sio mo fanongo ki heʻene folofolá?
Ko hai kuó ne tokanga ki heʻene folofolá koeʻuhi ke ne fanongo ki aí?
19 Vakai! Ko e matangi mālohi ʻa Sihová ʻe haʻaki atu ʻi heʻene houhaú;
ʻI he hangē ha matangi ʻahiohió ʻe vilo hifo ia ki he ʻulu ʻo e kau fulikivanú.+
20 Ko e houhau ʻa Sihová ʻe ʻikai ke foki
Kae ʻoua kuó ne fakahoko mo lavaʻi ʻa e ngaahi taumuʻa ʻo hono lotó.
ʻI he ngaahi ʻaho fakaʻosí te mou mahinoʻi lelei ai eni.
21 Naʻe ʻikai te u fekauʻi ʻa e kau palōfitá, ka naʻa nau lele,
Naʻe ʻikai te u lea kiate kinautolu, ka naʻa nau kikite.+
22 Ka ʻo kapau naʻa nau tuʻu ʻi he lotolotonga ʻo e kakai ʻoku ofi kiate aú,
Naʻa nau mei ʻai hoku kakaí ke nau fanongo ki heʻeku leá
Pea naʻa nau mei ʻai kinautolu ke nau tafoki mei honau ʻalunga koví pea mei heʻenau ngaahi ngāue koví.”+
23 “Ko ha ʻOtua pē koā au ʻoku ofi mai,” ko e fakahaaʻi ia ʻe Sihová, “ʻo ʻikai foki ko ha ʻOtua mei he mamaʻó?”
24 “ʻE lava ke toitoi ha tangata ʻi ha feituʻu fakapulipuli ʻa ia ʻe ʻikai lava ke u sio ai kiate ia?”+ Ko e fakahaaʻi ia ʻe Sihová.
“ʻIkai ʻoku ou kātoi ʻa e langí mo e māmaní?”+ Ko e fakahaaʻi ia ʻe Sihová.
25 “Kuó u fanongo ʻi he kau palōfita ʻoku nau kikite loi ʻi hoku hingoá ʻo pehē, ‘Kuó u misi! Kuó u misi!’+ 26 Ko e hā hono fuoloa ʻa e hokohoko atu ʻa e meʻá ni ʻi he loto ʻo e kau palōfitá, ke nau kikite loí? Ko e kau palōfita kinautolu ʻoku nau leaʻaki ʻa e kākā mei honau lotó.+ 27 ʻOku nau taumuʻa ke ʻai ke ngalo ʻi hoku kakaí ʻa hoku hingoá ʻi he ngaahi misi ʻoku nau fakamatala ʻiate kinautolú, ʻo hangē pē ko e ngalo ʻi heʻenau ngaahi tamaí ʻa hoku hingoá koeʻuhi ko Pēalí.+ 28 Tuku ki he palōfita ʻoku ʻi ai haʻane misí ke ne fakamatalaʻi ʻa e misí, ka ko e tokotaha ʻokú ne maʻu ʻa ʻeku leá ʻoku totonu ke ne lea moʻoni ʻaki ʻa ʻeku leá.”
“Ko e hā ha vāvātatau ʻa e kauʻi uité mo e uité?” Ko e fakahaaʻi ia ʻe Sihová.
29 “ʻIkai ko ʻeku leá ʻoku hangē tofu pē ha afí,”+ ko e fakahaaʻi ia ʻe Sihová, “pea hangē ha hāmala ʻokú ne laiki ha fuʻu maká?”+
30 “Ko ia ko au eni te u tautea ʻa e kau palōfitá,” ko e fakahaaʻi ia ʻe Sihová, “ʻa kinautolu ʻoku nau mioʻi ʻa ʻeku leá, koeʻuhí ke nau tala ki he kakaí ʻa e meʻa ʻoku nau loto ki aí.”+
31 “Ko eni te u tautea ʻa e kau palōfitá,” ko e fakahaaʻi ia ʻe Sihová, “ʻa kinautolu ʻoku nau ngāueʻaki honau ʻeleló ke pehē, ‘Ko ha folofola eni meiate ia!’”+
32 “Ko eni te u tautea ʻa e kau palōfita ʻoku nau misi loí,” ko e fakahaaʻi ia ʻe Sihová, “ʻa ia ʻoku nau fakamatalaʻi ia pea takiheeʻi ʻa hoku kakaí koeʻuhí ko ʻenau ngaahi loí mo ʻenau pōlepolé.”+
“Ka naʻe ʻikai ke u tuku atu kinautolu pe fekauʻi kinautolu. Ko ia ʻe ʻikai hanau ʻaonga ʻe taha ki he kakaí ni,”+ ko e fakahaaʻi ia ʻe Sihová.
33 “Pea ʻi he taimi ʻe ʻeke atu ai kiate koe ʻe he kakaí ni pe ko ha palōfita pe ko ha taulaʻeiki, ‘Ko e hā ʻa e kavenga* ʻa Sihová?’ te ke tali kiate kinautolu, ‘“Ko e kakai ko kimoutolú ʻa e kavengá! Pea te u siʻaki kimoutolu,”+ ko e fakahaaʻi ia ʻe Sihová.’ 34 Ko e meʻa ki he palōfita pe ko e taulaʻeiki pe ko e kakai ʻoku nau pehē, ‘Ko eni ʻa e kavenga* ʻa Sihová!’ Te u fai ha tokanga ki he tangata ko iá pea ki hono falé. 35 Ko e meʻa eni ʻoku mou leaʻaki taki taha ki hono kaungāʻapi pea ki hono tokouá, ‘Ko e hā ʻa e tali kuo fai mai ʻe Sihová? Pea ko e hā kuo folofolaʻaki ʻe Sihová?’ 36 Ka ko e kavenga* ʻa Sihová ke ʻoua naʻa mou toe leaʻaki ia, he ko e kavengá* ʻa e lea pē ʻa e tokotaha taki taha, pea kuo mou liliu ʻa e folofola ʻa e ʻOtua moʻuí, ʻa Sihova ʻo e ngaahi kau tau, ʻa hotau ʻOtuá.
37 “Ko e meʻa eni te ke leaʻaki ki he palōfitá, ‘Ko e hā ʻa e tali kuo fai mai ʻe Sihova kiate koé? Pea ko e hā kuo folofolaʻaki ʻe Sihová? 38 Pea kapau te mou hanganaki pehē, “Ko e kavenga* ʻa Sihova!” Ko e folofola eni ʻa Sihová: “Koeʻuhi ko hoʻomou pehē, ‘Ko e lea ko ení ko e kavenga* ʻa Sihova,’ hili ia ʻeku tala atu, ‘Kuo pau ke ʻoua naʻa mou pehē: “Ko e kavenga* ʻa Sihova!”’ 39 Vakai! Te u hiki kimoutolu ʻo tolongi mei hoku ʻaó, ʻa kimoutolu mo e kolo naʻá ku foaki kiate kimoutolu mo hoʻomou fanga kuí. 40 Pea te u ʻomi kiate kimoutolu ʻa e ongoʻi mā taʻengata mo e matahoa taʻengata, ʻa ia ʻe ʻikai ke toe ngalo.”’”+
24 Naʻe fakahaaʻi mai leva ʻe Sihova kiate au ʻa e ongo kato fiki ʻe ua naʻe fokotuʻu ʻi muʻa ʻi he temipale ʻo Sihová, ʻi he hili hono ʻave fakamālohi ʻe Tuʻi Nepukanesa* ʻo Pāpiloné ʻa Sēkonaia*+ ko e foha ʻo Sihoiakimi,+ ko e tuʻi ʻo Siutá, fakataha mo e houʻeiki ʻo Siutá, ko e kau nima-meaʻá, mo e kau tuki ukameá;* naʻá ne ʻave kinautolu mei Selusalema ki Pāpilone.+ 2 Ko e kato ʻe taha naʻe ʻi ai ʻa e fiki lelei ʻaupito, hangē ko e fiki tokamuʻá, ka ko e kato ʻe tahá naʻe ʻi ai ʻa e fiki kovi ʻaupito, ʻo mātuʻaki kovi ʻo ʻikai lava ke kai.
3 Naʻe ʻeke mai leva ʻe Sihova kiate au: “Ko e hā ʻa e meʻa ʻokú ke sio ki aí, Selemaia?” Ko ia naʻá ku pehē ange: “Ko e fiki, ko e fiki leleí ʻoku lelei ʻaupito, ka ko e fiki koví ʻoku kovi ʻaupito, ʻo mātuʻaki kovi ʻo ʻikai lava ke kai.”+
4 Pea naʻe hoko mai ʻa e folofola ʻa Sihová kiate au, ʻo pehē: 5 “Ko e folofola eni ʻa Sihova ko e ʻOtua ʻo ʻIsilelí, ‘ʻI he hangē ko e fiki lelei ko ení, ʻe pehē ʻa ʻeku leleiʻia ʻi he kakai ʻo Siuta kuo ʻave fakamālohí, ʻa ia kuó u tuku ke ʻave mei he feituʻú ni ki he fonua ʻo e kau Kalitiá. 6 ʻE hanganaki tokanga ʻa hoku matá kiate kinautolu ki haʻanau lelei, pea te u ʻai kinautolu ke nau toe foki mai ki he fonuá ni.+ Te u langa hake kinautolu, pea ʻe ʻikai te u holoki; te u tō kinautolu, pea ʻe ʻikai te u taʻaki.+ 7 Pea te u ʻoange kiate kinautolu ha loto ʻoku vēkeveke ke ʻiloʻi au, ko aú ko Sihova.+ Te nau hoko ko hoku kakai, pea te u hoko ko honau ʻOtua,+ he te nau foki mai kiate au ʻaki honau lotó kotoa.+
8 “‘Ka ʻi he fekauʻaki mo e fiki kovi ʻoku mātuʻaki kovi ʻo ʻikai lava ke kaí,+ ko e folofola eni ʻa Sihová: “ʻE pehē ʻa ʻeku vakai kia Tuʻi Setekaia+ ʻo Siutá, mo hono kau houʻeikí, mo e toenga ʻo Selusalema ʻoku toe ʻi he fonuá ni, pea mo kinautolu ʻoku nau nofo ʻi he fonua ko ʻIsipité.+ 9 Te u ʻai ʻa e kakai ʻi he ngaahi puleʻanga kotoa ʻo e māmaní+ ke nau ilifia ʻi heʻenau sio ki he fakatamaki ʻoku ou ʻomi kiate kinautolú. ʻE lumaʻi kinautolu ʻe he kakaí; te nau ngāueʻaki kinautolu ko ha fakatātā ʻo e fakatamaki; ʻe manukiʻi kinautolu ʻe he kakaí pea talatukiʻi+ kinautolu ʻi he feituʻu kotoa pē ʻoku ou fakamovete kinautolu ki aí.+ 10 Pea te u tuku atu kinautolu ki he heletā,+ ki he honge, pea ki he mahaki fakaʻauha,*+ kae ʻoua kuo nau ʻauha mei he fonua naʻá ku foaki kiate kinautolu pea ki heʻenau fanga kuí.”’”
25 Ko e folofola naʻe hoko mai kia Selemaia ʻo fekauʻaki mo e kakai kotoa ʻo Siutá ʻi he taʻu hono fā ʻo e pule ʻa Sihoiakimi+ ko e foha ʻo Siosaiá, ko e tuʻi ʻo Siutá, ʻa ia ko e ʻuluaki taʻu ia ʻo e pule ʻa Tuʻi Nepukanesa* ʻo Pāpiloné. 2 Ko e meʻa eni naʻe leaʻaki ʻe Selemaia ko e palōfitá ʻo fekauʻaki mo e* kakai kotoa ʻo Siutá pea mo e kakai kotoa ʻo Selusalemá:
3 “Mei he taʻu hono 13 ʻo e pule ʻa Siosaia+ ko e foha ʻo ʻĀmone, ko e tuʻi ʻo Siutá, ʻo aʻu mai ki he ʻaho ko ení, ko e taʻu eni ʻe 23, naʻe hoko mai ʻa e folofola ʻa Sihová kiate au, pea naʻá ku toutou lea* atu kiate kimoutolu, ka naʻe ʻikai te mou fanongo.+ 4 Pea naʻe fekau atu ʻe Sihova ʻa e kotoa ʻo ʻene kau sevāniti ko e kau palōfitá kiate kimoutolu, ʻo ne toutou fekauʻi* atu kinautolu, ka naʻe ʻikai te mou fanongo pe fokotuʻu telinga mai ʻo fanongo.+ 5 Naʻa nau pehē atu, ‘Mou tafoki muʻa, ʻa e tokotaha taki taha ʻo kimoutolu mei homou ngaahi ʻalunga koví mo hoʻomou ngaahi ngāue koví;+ pea ʻe hokohoko atu ʻa hoʻomou nofo ʻi ha taimi lōloa ʻi he fonua naʻe fuoloa hono foaki atu ʻe Sihova kiate kimoutolu mo hoʻomou fanga kuí. 6 ʻOua te mou muimui ki he ngaahi ʻotua kehé ʻo tauhi kiate kinautolu mo punou kiate kinautolu, ʻo mou fakalotomamahiʻi ai au ʻaki ʻa e ngāue ʻo homou nimá; telia naʻá ku ʻomi ha fakatamaki kiate kimoutolu.’
7 “‘Ka naʻe ʻikai te mou fanongo kiate au,’ ko e fakahaaʻi ia ʻe Sihová. ‘ʻI hono kehé, naʻa mou fakalotomamahiʻi au ʻaki ʻa e ngāue ʻo homou nimá, ʻo hoko ai ha kovi kiate kimoutolu pē.’+
8 “Ko ia ko e folofola eni ʻa Sihova ʻo e ngaahi kau tau, ‘“Koeʻuhí ko e ʻikai te mou talangofua ki heʻeku ngaahi leá, 9 ʻoku ou fai atu ai ha fekau ki he ngaahi fāmili kotoa ʻo e tokelaú,”+ ko e fakahaaʻi ia ʻe Sihová, “ʻo u ʻoatu ha pōpoaki kia Tuʻi Nepukanesa* ʻo Pāpiloné, ʻa ʻeku sevānití,+ pea te u ʻomi kinautolu ki he fonuá ni+ pea ki hono kakaí pea ki he ngaahi puleʻanga kotoa ko eni ʻoku takatakai ki aí.+ Te u tuku atu kinautolu ki he fakaʻauha pea ʻai kinautolu ke nau hoko ko ha meʻa ke fai ai ʻa e fakalilifuʻia mo ha meʻa ke fai ha manuki* ki ai pea ke hoko ko ha fokotuʻunga maumau tuʻuloa. 10 Te u fakangata meiate kinautolu ʻa e leʻo ʻo e fiefia mo e leʻo ʻo e mavava,+ ʻa e leʻo ʻo e tangata malí mo e leʻo ʻo e taʻahine malí,+ ʻa e leʻo ʻo e maka momosi-nimá pea mo e ulo ʻa e māmá. 11 Pea ʻe hoko ʻa e fonuá ni kotoa ko e fokotuʻunga maumau pea ʻe hoko ko ha meʻa ke fai ai ha fakalilifuʻia, pea ko e ngaahi kakaí ni te nau ngāue ki he tuʻi ʻo Pāpiloné ʻi he taʻu ʻe 70.”’+
12 “‘Ka ʻi he taimi ʻe kakato ai ʻa e taʻu ʻe 70,+ te u ʻeke ki he* tuʻi ʻo Pāpiloné pea ki he puleʻanga ko iá ʻa ʻenau faihalá,’+ ko e fakahaaʻi ia ʻe Sihová, ‘pea te u ʻai ʻa e fonua ʻo e kau Kalitiá ke hoko ko ha potu lala mo maomaonganoa ʻo taʻengata.+ 13 Te u fakahoko ki he fonua ko iá ʻa ʻeku ngaahi lea kotoa naʻá ku fai ʻo kau ki aí, ʻa e meʻa kotoa kuo hiki ʻi he tohí ni ʻa ia naʻe kikite ʻaki ʻe Selemaia ki he kotoa ʻo e ngaahi puleʻangá. 14 He ko e ngaahi puleʻanga lahi mo e ngaahi tuʻi lalahi+ te nau ʻai kinautolu ko ʻenau kau sevāniti,+ pea te u totongi kiate kinautolu ʻo fakatatau ki heʻenau ngaahi ngāué mo e ngāue ʻa honau nimá.’”+
15 He ko e meʻa eni naʻe folofola mai ʻaki ʻe Sihova ko e ʻOtua ʻo ʻIsilelí kiate aú: “Toʻo ʻa e ipu uaine ʻo e houhau ko ení mei hoku nimá, pea ʻai ʻa e ngaahi puleʻanga kotoa ʻoku ou fekauʻi atu koe ki aí ke nau inu ia. 16 Pea te nau inu ʻo tāsipa pea ʻe hangē ʻenau tōʻongá ha kau seselé koeʻuhi ko e heletā ʻoku ou fekauʻi atu ki honau lotolotongá.”+
17 Ko ia naʻá ku toʻo ʻa e ipú mei he nima ʻo Sihová peá u fakainu ʻaki ia ʻa e ngaahi puleʻanga kotoa naʻe fekauʻi atu au ʻe Sihova ki aí:+ 18 ʻO kamata ʻi Selusalema pea mo e ngaahi kolo ʻo Siutá,+ ʻa hono ngaahi tuʻí mo hono kau houʻeikí, ke ʻai kinautolu ko ha fokotuʻunga maumau, ko ha meʻa ke fai ai ha fakalilifuʻia, ko ha meʻa ke fai ha manuki ki ai pea ke hoko ko ha mala,+ ʻo hangē ko ia ʻoku hoko ʻi he ʻaho ní; 19 pea hoko atu ai kia Felo ko e tuʻi ʻo ʻIsipité mo ʻene kau sevānití, ko ʻene kau houʻeikí, pea mo e kotoa ʻo hono kakaí,+ 20 mo e kakai kehekehe kotoa pē; mo e ngaahi tuʻi kotoa ʻo e fonua ko ʻUsá; mo e ngaahi tuʻi kotoa ʻo e fonua ʻo e kau Filisitiá,+ ʻa ʻAsikeloni,+ Kesa, ʻEkiloni, pea mo e faʻahinga ʻoku toe ʻi ʻAsitotí; 21 mo ʻĪtomi,+ Mōape,+ pea mo e kau ʻĀmoní;+ 22 ko e ngaahi tuʻi kotoa ʻo Tāiá, mo e ngaahi tuʻi kotoa ʻo Saitoní,+ pea mo e ngaahi tuʻi ʻo e motu ʻi he tahí; 23 mo Titani,+ Teima, Pusa, pea mo e faʻahinga kotoa naʻe tele ʻa e fulufulu ʻi honau manifí;+ 24 ko e ngaahi tuʻi kotoa ʻo e kau ʻAlepeá+ mo e ngaahi tuʻi kotoa ʻo e kakai kehekehe kotoa pē ʻoku nofo ʻi he toafá; 25 mo e ngaahi tuʻi kotoa ʻo Similaí, ko e ngaahi tuʻi kotoa ʻo ʻĪlamí,+ mo e ngaahi tuʻi kotoa ʻo e kau Mītiá;+ 26 pea mo e ngaahi tuʻi kotoa ʻo e tokelaú ʻa e ofi mo e mamaʻo, ʻo hokohoko, mo e ngaahi puleʻanga kehe kotoa pē ʻo e māmaní; pea ʻi he hili kinautolú ʻe inu ʻa e tuʻi ʻo Sesakí.*+
27 “Pea kuo pau ke ke lea kiate kinautolu, ‘Ko e folofola eni ʻa Sihova ʻo e ngaahi kau tau, ko e ʻOtua ʻo ʻIsilelí, ʻo pehē: “Mou inu pea konā ʻo lua pea mou tō ki lalo ke ʻoua te mou lava ʻo toe tuʻu hake+ koeʻuhí ko e heletā ʻoku ou fekauʻi atu ki homou lotolotongá.”’ 28 Pea kapau te nau fakafisi ke toʻo ʻa e ipú mei ho nimá ʻo inu, te ke pehē kiate kinautolu, ‘Ko e folofola eni ʻa Sihova ʻo e ngaahi kau tau: “Kuo pau ke mou inu ia! 29 He vakai! Kapau ʻoku ou ʻuluaki ʻomi ha fakatamaki ki he kolo ʻoku uiʻaki hoku hingoá,+ te mou ʻalu taʻetautea koā?”’+
“‘Heʻikai te mou ʻalu taʻetautea, he ʻoku ou ui ha heletā ki he kakai kotoa ʻi he māmaní,’ ko e fakahaaʻi ia ʻe Sihova ʻo e ngaahi kau tau.
30 “Pea te ke kikite ʻaki ʻa e ngaahi leá ni kotoa kiate kinautolu peá ke pehē kiate kinautolu,
‘ʻE ngungulu ʻa Sihova mei ʻolunga,
Pea te ne ʻai mei hono ʻafioʻanga māʻoniʻoní ke ongona ʻa hono leʻó.
Te ne ngungulu leʻo-lahi ki hono ʻafioʻanga ʻi he māmaní.
ʻO ne kaila ʻo hangē ha faʻahinga ʻoku nau malamalaki ʻa e tataʻoʻanga uainé,
Te ne hiva ʻi he ikuna ki he kotoa ʻo e kakai ʻi he māmaní.’
31 ‘ʻE ongona ha longoaʻa ʻo aʻu ki he ngaahi ngataʻanga ʻo e māmaní,
He ʻoku fai ʻe Sihova ha fakakikihi mo e ngaahi puleʻangá.
Te ne fakamāuʻi ʻe ia tonu ʻa e faʻahinga kotoa ʻo e tangatá.*+
Pea te ne tuku atu ʻa e kau fulikivanú ki he heletā,’ ko e fakahaaʻi ia ʻe Sihová.
32 Ko e folofola eni ʻa Sihova ʻo e ngaahi kau tau:
‘Vakai! ʻOku mafola atu ha fakatamaki mei he puleʻanga ki he puleʻanga,+
Pea ʻe ʻalu atu ha fuʻu taufa mei he ngaahi feituʻu mamaʻo taha ʻo e māmaní.+
33 “‘Pea ko e faʻahinga ʻe tāmateʻi ʻe Sihova ʻi he ʻaho ko iá ʻe faai mei he ngataʻanga ʻe taha ʻo e māmaní ʻo aʻu ki he ngataʻanga ʻe taha ʻo e māmaní. ʻE ʻikai ke tengihia kinautolu, pea ʻe ʻikai ke tānaki pe tanu kinautolu. Te nau hoko ʻo hangē ko e kinohaʻa ʻi he funga kelekelé.’
34 Mou tangilāulau, ʻa kimoutolu kau tauhi-sipi, pea mou tangi leʻo-lahi!
Mou teka takai holo, ʻa kimoutolu ʻa e faʻahinga lāngilangiʻia ʻo e tākangá,
Koeʻuhí kuo hoko mai ʻa e taimi ʻo homou tāmateʻí mo homou fakamoveteʻí,
Pea te mou tō ʻo hangē ha siā mahuʻingá!
35 Ko e kau tauhi-sipí ʻoku ʻikai ha feituʻu ke nau hola ki ai,
Pea ʻoku ʻikai ha haoʻanga ki he faʻahinga lāngilangiʻia ʻo e tākangá.
36 Fanongo! Ko e tangi ena ʻa e kau tauhi-sipí
Pea mo e tangilāulau ʻa e faʻahinga lāngilangiʻia ʻo e tākangá,
He ʻoku fakaʻauha ʻe Sihova ʻa ʻenau kaikaiʻangá.
37 Pea ko e ngaahi nofoʻanga nongá kuo ʻai ke ʻikai ke toe ʻi ai ha moʻui
Koeʻuhí ko e houhau kakaha ʻa Sihová.
38 Kuó ne liʻaki ʻa hono nofoʻangá ʻo hangē ha laione muí,+
He ko honau fonuá kuo hoko ko ha meʻa ke fai ai ha fakalilifuʻia
Koeʻuhí ko e heletā fakamamahí
Pea koeʻuhí ko ʻene houhau kakahá.”
26 ʻI he kamataʻanga ʻo e pule ʻa Sihoiakimi+ ko e foha ʻo Siosaia, ko e tuʻi ʻo Siutá, naʻe hoko mai ai ʻa e folofola ko ení meia Sihova: 2 “Ko e folofola eni ʻa Sihová, ‘Tuʻu ʻi he lotoʻā ʻo e fale ʻo Sihová pea lea ʻo fekauʻaki mo e* kakai kotoa ʻo e ngaahi kolo ʻo Siuta ʻa ia ʻoku nau haʻu ke lotu* ʻi he fale ʻo Sihová. Tala kiate kinautolu ʻa e meʻa kotoa ʻoku ou tuʻutuʻuni atu kiate koé; ʻoua naʻa liʻaki ha foʻi lea ʻe taha. 3 Mahalo pē te nau fanongo pea tafoki ʻa e tokotaha taki taha mei hono ʻalunga koví, pea te u liliu ai ʻeku fakakaukaú ʻo fekauʻaki mo e* fakatamaki ʻoku ou fakataumuʻa ke ʻomi kiate kinautolu koeʻuhi ko ʻenau ngaahi ngāue koví.+ 4 Lea kiate kinautolu: “Ko e folofola eni ʻa Sihová, ‘Kapau heʻikai te mou fanongo kiate au ʻaki hoʻomou muimui ki heʻeku laó* ʻa ia kuó u tuku atu ʻi homou ʻaó, 5 ʻaki hoʻomou fanongo ki he ngaahi lea ʻa ʻeku kau sevāniti ko e kau palōfitá, ʻa ia ʻoku ou toutou fekauʻi* atu kiate kimoutolú, ʻa ē kuo ʻikai te mou fanongo ki aí,+ 6 te u ʻai leva ʻa e falé ni ke hangē ko Sailó,+ pea te u ʻai ʻa e koló ni ko ha meʻa ke fai ʻa e talatuki ki ai ʻa e ngaahi puleʻanga kotoa ʻo e māmaní.’”’”+
7 Pea ko e kau taulaʻeikí mo e kau palōfitá pea mo e kakaí kotoa naʻa nau fanongo ki he leaʻaki ʻe Selemaia ʻa e ngaahi leá ni ʻi he fale ʻo Sihová.+ 8 Ko ia ʻi he ʻosi hono leaʻaki ʻe Selemaia ʻa e meʻa kotoa naʻe fekauʻi ʻe Sihova kiate ia ke ne leaʻaki ki he kotoa ʻo e kakaí, naʻe puke leva ia ʻe he kau taulaʻeikí mo e kau palōfitá mo e kakaí kotoa ʻo nau pehē: “Kuo pau moʻoni ke ke mate. 9 Ko e hā kuó ke kikite ai ʻi he huafa ʻo Sihová, ʻo pehē, ‘Ko e falé ni ʻe hoko ʻo hangē ko Sailó, pea ko e koló ni ʻe ʻauha pea liʻaki ʻo ʻikai ha taha ʻe nofo ai’?” Pea naʻe fakatahataha takatakai ʻa e kakaí kotoa kia Selemaia ʻi he fale ʻo Sihová.
10 ʻI he fanongo ʻa e kau houʻeiki ʻo Siutá ki he ngaahi leá ni, naʻa nau ʻalu hake mei he fale* ʻo e tuʻí ki he fale ʻo Sihová ʻo nau tangutu ʻi he hūʻanga ʻo e matapā foʻou ʻo e fale ʻo Sihová.+ 11 Naʻe pehē ange ʻe he kau taulaʻeikí mo e kau palōfitá ki he kau houʻeikí pea ki he kakaí kotoa: “ʻOku tuha ʻa e tangatá ni mo e tautea mate,+ koeʻuhí kuó ne kikiteʻi ha kovi ki he koló ni ʻo hangē tofu pē ko ia kuo fanongo ki ai homou telingá.”+
12 Naʻe pehē ange leva ʻe Selemaia ki he kau houʻeikí kotoa pea ki he kakaí kotoa: “Ko Sihova naʻá ne fekauʻi au ke u kikiteʻi ha kovi ki he falé ni pea ki he koló ni ʻaki ʻa e ngaahi lea kotoa kuo mou fanongo ki aí.+ 13 Ko ia ʻi he taimí ni, fakaleleiʻi homou ngaahi ʻalungá mo hoʻomou ngaahi tōʻongá pea talangofua ki he leʻo ʻo Sihova ko homou ʻOtuá, pea ʻe liliu ʻe Sihova ʻa ʻene fakakaukau ʻo fekauʻaki mo e* fakatamaki kuó ne folofola ʻe hoko kiate kimoutolú.+ 14 Ka ko e meʻa kiate aú, ʻoku ou ʻi homou nimá. Fai mai kiate au ha meʻa pē ʻoku hā lelei mo totonu ʻi hoʻomou vakaí. 15 Ko e meʻa pē kuo pau ke mou ʻiloʻí kapau te mou tāmateʻi au, te mou hilifaki ai ha toto taʻehalaia kiate kimoutolu tonu pea ki he koló ni pea ki hono kakaí, he ko hono moʻoní naʻe fekauʻi mai au ʻe Sihova ke u leaʻaki kiate kimoutolu ʻa e ngaahi leá ni kotoa ke mou fanongo ki ai.”
16 Naʻe pehē ange leva ʻe he kau houʻeikí pea mo e kakaí kotoa ki he kau taulaʻeikí pea mo e kau palōfitá: “ʻOku ʻikai tuha ʻa e tangatá ni mo e tautea maté, he naʻá ne lea kiate kitautolu ʻi he huafa ʻo Sihova ko hotau ʻOtuá.”
17 ʻIkai ngata aí, ko e niʻihi ʻo e kau mātuʻa ʻo e fonuá naʻa nau mālanga hake ʻo kamata lea ki he fakatahaʻanga fakakātoa ʻo e kakaí: 18 “Ko Maika+ ʻo Molesé naʻá ne kikite ʻi he ngaahi ʻaho ʻo Tuʻi Hesekaia+ ʻo Siutá, pea naʻá ne pehē ki he kakai kotoa ʻo Siutá, ‘Ko e folofola eni ʻa Sihova ʻo e ngaahi kau tau:
“ʻE palauʻi ʻa Saione ʻo hangē ha konga vaó,
ʻE hoko ʻa Selusalema ko ha fokotuʻunga maumau,+
Pea ko e moʻunga ʻoku tuʻu ai ʻa e Falé* ʻe hoko ʻo hangē ha ngaahi potu māʻolunga ʻi ha vaotaá.”’*+
19 “Naʻe hanga ʻe Tuʻi Hesekaia ʻo Siutá mo Siuta kātoa ʻo tāmateʻi ia? ʻIkai naʻá ne manavahē kia Sihova pea kōlenga ki he hōifua ʻa Sihová,* koeʻuhi ke liliu ʻe Sihova ʻene fakakaukaú ʻo fekauʻaki mo e fakatamaki naʻá ne folofolaʻaki kiate kinautolú?+ Ko ia ko ʻetau teu eni ke ʻomi ha fakatamaki lahi kiate kitautolu pē.
20 “Pea naʻe toe ʻi ai ha tangata naʻe kikite ʻi he huafa ʻo Sihová, ko ʻUlisa ko e foha ʻo Semaia mei Kiliate-sialimí,+ ʻa ia naʻá ne kikiteʻi ha kovi ki he koló ni pea ki he fonuá ni ʻaki ʻa e ngaahi lea hangē ko e ngaahi lea ʻa Selemaiá. 21 Naʻe fanongo ʻa Tuʻi Sihoiakimi+ mo ʻene kau tangata toʻá kotoa mo e kau houʻeikí kotoa ki heʻene ngaahi leá, pea naʻe feinga ʻa e tuʻí ke tāmateʻi ia.+ ʻI he fanongo ai ʻa ʻUlisá, naʻá ne hoko ʻi he taimi pē ko iá ʻo ilifia peá ne hola ki ʻIsipite. 22 Pea naʻe fekauʻi atu leva ʻe Tuʻi Sihoiakimi ʻa ʻElinatani+ ko e foha ʻo ʻAkepoá pea mo ha kau tangata kehe ke nau ō ki ʻIsipite. 23 Naʻa nau ʻomi ʻa ʻUlisa mei ʻIsipite pea ʻave ia kia Tuʻi Sihoiakimi, ʻa ia naʻá ne tāmateʻi leva ia ʻaki ha heletā+ pea lī hono ʻangaʻangá ki he faʻitoka ʻo e kakai lāuvalé.”
24 Ka ko ʻAhikami+ ko e foha ʻo Sāfaní+ naʻá ne poupou kia Selemaia, ko ia naʻe ʻikai ke tuku atu ai ia ki he kakaí ke tāmateʻi.+
27 ʻI he kamataʻanga ʻo e pule ʻa Sihoiakimi* ko e foha ʻo Siosaia, ko e tuʻi ʻo Siutá, naʻe hoko mai ʻa e folofola ko ení kia Selemaia meia Sihova: 2 “Ko e meʻa eni naʻe tala mai ʻe Sihova kiate aú, ‘Ngaohi maʻau ha ngaahi meʻa-haʻi mo ha ngaahi ʻakau haʻamo, pea ʻai kinautolu ki ho kiá. 3 Peá ke ʻoatu kinautolu ki he tuʻi ʻo ʻĪtomí,+ mo e tuʻi ʻo Mōapé,+ mo e tuʻi ʻo e kau ʻĀmoní,+ mo e tuʻi ʻo Tāiá,+ pea mo e tuʻi ʻo Saitoní+ ʻo fakafou ʻi he kau talafekau kuo nau omi ki Selusalema kia Tuʻi Setekaia ʻo Siutá. 4 ʻOatu kiate kinautolu ʻa e fekau ko eni ki honau kau pulé:
“‘“Ko e folofola eni ʻa Sihova ʻo e ngaahi kau tau, ko e ʻOtua ʻo ʻIsilelí; ko e meʻa eni te mou leaʻaki ki homou kau pulé, 5 ‘Ko au naʻá ku ngaohi ʻa e māmaní, mo e faʻahinga ʻo e tangatá, mo e fanga manu ʻoku ʻi he funga ʻo māmaní ʻaki hoku fuʻu iví pea mo hoku nima kuo mafao atú; pea kuó u foaki ia ki ha taha pē ʻoku ou loto ki ai.*+ 6 Pea ko eni kuó u tuku ʻa e ngaahi fonuá ni kotoa ki he nima ʻo ʻeku sevāniti ko Tuʻi Nepukanesa+ ʻo Pāpiloné; naʻa mo e fanga manu kaivaó kuó u fakamoʻulaloaʻi ia kiate ia. 7 Ko e kotoa ʻo e ngaahi puleʻangá te nau tauhi kiate ia pea mo hono fohá pea mo hono mokopuna tangatá kae ʻoua ke hoko mai ʻa e taimi ki hono fonuá,+ ʻa e taimi ʻe ʻai ai ia ʻe he ngaahi puleʻanga lahi mo ha ngaahi tuʻi lalahi ke ne hoko ko ʻenau tamaioʻeiki.’+
8 “‘“‘ʻIlonga ha kakai pe ha puleʻanga ʻe fakafisi ke tauhi kia Tuʻi Nepukanesa ʻo Pāpiloné pea fakafisi ke ʻai hono kiá ki he ʻioke ʻa e tuʻi ʻo Pāpiloné, te u tautea ʻa e kakai ko iá ʻaki ʻa e heletā,+ mo e honge, pea mo e mahaki fakaʻauha,’* ko e fakahaaʻi ia ʻe Sihová, ‘kae ʻoua kuó u fakaʻosi kinautolu ʻaki hono nimá.’
9 “‘“‘Ko ia ai, ʻoua te mou fanongo ki hoʻomou kau palōfitá, mo hoʻomou kau vavaló, mo hoʻomou kau misí, mo hoʻomou kau faimaná, pea mo hoʻomou kau faifakalouʻakaú, ʻa ia ʻoku nau pehē atu kiate kimoutolu: “ʻE ʻikai te mou tauhi ki he tuʻi ʻo Pāpiloné.” 10 He ʻoku nau kikite ʻaki ha ngaahi loi kiate kimoutolu, koeʻuhi ke ʻave ai kimoutolu ʻo mamaʻo mei homou fonuá pea te u fakamovete atu ai kimoutolu pea te mou ʻauha.
11 “‘“‘Ka ko e kakai ʻoku nau ʻai honau kiá ki he ʻioke ʻa e tuʻi ʻo Pāpiloné pea tauhi kiate iá, te u fakaʻatā kinautolu ke nau nofo* ʻi honau fonuá,’ ko e fakahaaʻi ia ʻe Sihová, ‘ke nau ngoueʻi ia pea ke nau nofo ai.’”’”
12 Naʻá ku lea foki kia Tuʻi Setekaia+ ʻo Siutá ʻi he founga tatau pē, ʻo pehē: “ʻAi homou kiá ki he ʻioke ʻa e tuʻi ʻo Pāpiloné pea tauhi kiate ia mo hono kakaí, pea te mou moʻui ai pē.+ 13 Ko e hā ke ke mate ai mo ho kakaí ʻi he heletaá,+ mo e hongé,+ mo e mahaki fakaʻauhá,+ ʻo hangē ko ia kuo folofolaʻaki ʻe Sihova ʻo fekauʻaki mo e kakai ʻe ʻikai te nau tauhi ki he tuʻi ʻo Pāpiloné? 14 ʻOua te mou fanongo ki he ngaahi lea ʻa e kau palōfita ko ia ʻoku nau pehē atu kiate kimoutolu, ‘ʻE ʻikai te mou tauhi ki he tuʻi ʻo Pāpiloné,’+ koeʻuhi ʻoku nau kikite ʻaki ha ngaahi loi kiate kimoutolu.+
15 “‘He kuo ʻikai te u fekauʻi atu kinautolu,’ ko e fakahaaʻi ia ʻe Sihová, ‘ka ʻoku nau kikite ʻaki ha ngaahi loi ʻi hoku hingoá, ʻa ia ʻe iku ai ki heʻeku fakamovete atu kimoutolu pea te mou ʻauha, ʻa kimoutolu mo e kau palōfita ʻoku nau kikite atu kiate kimoutolú.’”+
16 Pea naʻá ku pehē ki he kau taulaʻeikí pea ki he kakaí ni kotoa: “Ko e folofola eni ʻa Sihová, ‘ʻOua te mou fanongo ki he ngaahi lea ʻa hoʻomou kau palōfitá ʻa ia ʻoku nau kikite atu kiate kimoutolu ʻo pehē: “Vakai! Ko e ngaahi naunau ʻo e fale ʻo Sihová ʻoku vavé ni ʻaupito ke fakafoki mai mei Pāpilone!”+ He ʻoku nau kikite ʻaki ha ngaahi loi kiate kimoutolu.+ 17 ʻOua te mou fanongo kiate kinautolu. Mou tauhi ki he tuʻi ʻo Pāpiloné pea te mou moʻui ai.+ Ko e hā ke hoko ai ʻa e koló ni ko ha fokotuʻunga maumaú? 18 Ka ʻo kapau ko ha kau palōfita kinautolu pea kapau ʻoku ʻiate kinautolu ʻa e folofola ʻa Sihová, tuku muʻa ke nau kōlenga kia Sihova ʻo e ngaahi kau taú ke ʻoua naʻa ʻave ki Pāpilone ʻa e toenga ʻo e ngaahi naunau ʻi he fale ʻo Sihová, pea ʻi he fale* ʻo e tuʻi ʻo Siutá, pea ʻi Selusalemá.’
19 “He ko e folofola eni ʻa Sihova ʻo e ngaahi kau taú ʻo fekauʻaki mo e ongo fuʻu poú,+ mo e fuʻu ʻaiʻanga vaí,*+ mo e ngaahi salioté,+ pea mo e toenga ʻo e ngaahi naunau ʻoku toe ʻi he koló ni, 20 ʻa ia naʻe ʻikai ke ʻave ʻe Tuʻi Nepukanesa ʻo Pāpiloné ʻi he taimi naʻá ne ʻave fakamālohi ai ʻa Sēkonaia ko e foha ʻo Sihoiakimi ko e tuʻi ʻo Siutá, mei Selusalema ki Pāpilone, fakataha mo e houʻeiki kotoa ʻo Siuta mo Selusalemá;+ 21 ʻio, ko e folofola eni ʻa Sihova ʻo e ngaahi kau tau, ko e ʻOtua ʻo ʻIsilelí, ʻo fekauʻaki mo e ngaahi naunau ʻoku toe ʻi he fale ʻo Sihová, pea ʻi he fale* ʻo e tuʻi ʻo Siutá pea ʻi Selusalemá: 22 ‘“ʻE ʻave kinautolu ki Pāpilone,+ pea te nau ʻi ai ai pē ʻo aʻu ki he ʻaho te u fai ai ha tokanga kiate kinautolú,” ko e fakahaaʻi ia ʻe Sihová. “Pea te u fakafoki mai leva ia ʻo tuku ki he feituʻú ni.”’”+
28 ʻI he taʻu tatau pē ko iá, ʻi he kamata ʻa e pule ʻa Tuʻi Setekaia+ ʻo Siutá, ʻi he taʻu hono fā, ʻi he māhina hono nimá, naʻe pehē ange ʻe he palōfita ko Henania ko e foha ʻo ʻĒsuli mei Kipioné+ kia Selemaia ʻi he fale ʻo Sihová, ʻi he ʻao ʻo e kau taulaʻeikí mo e kotoa ʻo e kakaí: 2 “Ko e meʻa eni ʻoku folofolaʻaki ʻe Sihova ʻo e ngaahi kau tau, ko e ʻOtua ʻo ʻIsilelí, ‘Te u fesiʻi ʻa e ʻioke ʻa e tuʻi ʻo Pāpiloné.+ 3 Ki muʻa ke ʻosi ʻa e taʻu ʻe ua, te u fakafoki mai ki he feituʻú ni ʻa e naunau kotoa ʻo e fale ʻo Sihová ʻa ia naʻe toʻo ʻe Tuʻi Nepukanesa ʻo Pāpiloné mei he feituʻú ni ʻo ne ʻave ki Pāpiloné.’”+ 4 “‘Pea te u fakafoki mai ki he feituʻú ni ʻa Sēkonaia+ ko e foha ʻo Sihoiakimi+ ko e tuʻi ʻo Siutá, pea mo e kau ʻave fakamālohi kotoa ʻo Siuta kuo nau ō ki Pāpiloné,’+ ko e fakahaaʻi ia ʻe Sihová, ‘he te u fesiʻi ʻa e ʻioke ʻa e tuʻi ʻo Pāpiloné.’”
5 Naʻe lea leva ʻa e palōfita ko Selemaiá ki he palōfita ko Henaniá ʻi he ʻao ʻo e kau taulaʻeikí mo e kakai kotoa naʻe tuʻu ʻi he fale ʻo Sihová. 6 Naʻe pehē ʻe he palōfita ko Selemaiá: “ʻĒmeni!* ʻOfa ke fai eni ʻe Sihova! ʻOfa ke fakahoko ʻe Sihova ʻa hoʻo ngaahi lea kuó ke kikite ʻakí ʻi hono fakafoki mai mei Pāpilone ki he feituʻú ni ʻa e ngaahi naunau ʻo e fale ʻo Sihová mo e kotoa ʻo e kakai naʻe ʻave fakamālohí! 7 Kae kehe, fanongo mai muʻa ki he pōpoaki ko eni ʻoku ou leaʻaki ki ho telingá pea ki he telinga ʻo e kakaí kotoa. 8 ʻI he kuohilí ko e kau palōfita ki muʻa ʻiate aú pea ki muʻa ʻiate koé, naʻa nau faʻa kikite ʻo fekauʻaki mo ha ngaahi fonua lahi mo e ngaahi puleʻanga mālohi ʻo fekauʻaki mo e tau, fakatamaki, mo e mahaki fakaʻauha.* 9 Kapau ʻe fai ʻe ha palōfita ha kikite ʻo fekauʻaki mo e melinó pea hoko ʻo moʻoni ʻa e lea ʻa e palōfita ko iá, ʻe ʻilo leva ai ko Sihova naʻá ne fekauʻi moʻoni mai ʻa e palōfita ko iá.”
10 ʻI he meʻá ni, naʻe toʻo leva ʻe he palōfita ko Henaniá ʻa e ʻakau haʻamó mei he kia ʻo e palōfita ko Selemaiá peá ne fesiʻi ia.+ 11 Naʻe pehē leva ʻe Henania ʻi he ʻao ʻo e kakaí kotoa: “Ko e folofola eni ʻa Sihová, ‘ʻE pehē pē ʻa ʻeku fesiʻi ʻa e ʻioke ʻa Tuʻi Nepukanesa ʻo Pāpiloné mei he kia ʻo e ngaahi puleʻangá kotoa ʻi he teʻeki ke ʻosi ha taʻu ʻe ua.’”+ Pea naʻe ʻalu atu leva ʻa e palōfita ko Selemaiá.
12 ʻI he hili hono fesiʻi ʻe he palōfita ko Henaniá ʻa e ʻakau haʻamo mei he kia ʻo e palōfita ko Selemaiá, naʻe hoko mai leva ʻa e pōpoaki ko eni ʻa Sihová kia Selemaia: 13 “ʻAlu ʻo lea kia Henania, ‘Ko e meʻa eni ʻoku folofolaʻaki ʻe Sihová: “Kuó ke fesiʻi ʻa e ngaahi ʻioke naʻe ngaohi mei he ʻakaú,+ ka te ke ngaohi ha ngaahi ʻioke ukamea ʻo fetongiʻaki ia.” 14 He ko e meʻa eni ʻoku folofolaʻaki ʻe Sihova ʻo e ngaahi kau tau, ko e ʻOtua ʻo ʻIsilelí: “Te u ʻai ha ʻioke ukamea ki he kia ʻo e ngaahi puleʻangá ni kotoa, ke nau tauhi kia Tuʻi Nepukanesa ʻo Pāpiloné, pea kuo pau ke nau tauhi kiate ia.+ Naʻa mo e fanga manu kaivaó te u foaki kiate ia.”’”+
15 Naʻe pehē leva ʻe he palōfita ko Selemaiá ki he palōfita ko Henaniá:+ “Fanongo mai muʻa, ʻe Henania! Kuo ʻikai ke fekauʻi mai koe ʻe Sihova, ka kuó ke ʻai ʻa e kakaí ni ke nau falala ki ha loi.+ 16 Ko ia ai, ko e folofola eni ʻa Sihová, ‘Vakai! Te u toʻo hoʻo moʻuí mei he funga kelekelé. Ko e taʻú ni te ke mate, he kuó ke fakaʻaiʻai ha angatuʻu kia Sihova.’”+
17 Ko ia naʻe mate ʻa e palōfita ko Henaniá ʻi he taʻu pē ko iá, ʻi he māhina hono fitú.
29 Ko e ngaahi lea eni ʻo e tohi naʻe ʻoatu ʻe Selemaia ko e palōfitá mei Selusalema ki he toenga ʻo e kau mātuʻa ʻi he lotolotonga ʻo e kakai naʻe ʻave fakamālohí, pea ki he kau taulaʻeikí, mo e kau palōfitá, pea mo e kakai kotoa naʻe ʻave fakamālohi ʻe Nepukanesa mei Selusalema ki Pāpiloné, 2 hili ia ʻa e ʻalu atu mei Selusalema ʻa Tuʻi Sēkonaia,+ mo e kuini fehuhú,+ mo e kau ʻōfisa ʻi he lotoʻaá, mo e kau houʻeiki ʻo Siuta mo Selusalemá, mo e kau tangata nima-meaʻá pea mo e kau tuki ukameá.*+ 3 Naʻá ne ʻoatu ʻa e tohí ʻia ʻElasa ko e foha ʻo Sāfaní+ mo Kemalaia ko e foha ʻo Hilikaiá, ʻa ia naʻe fekauʻi atu ʻe Tuʻi Setekaia+ ʻo Siutá ki Pāpilone kia Tuʻi Nepukanesa ʻo Pāpiloné. Naʻe pehē ai:
4 “Ko e folofola eni ʻa Sihova ʻo e ngaahi kau tau, ko e ʻOtua ʻo ʻIsilelí, ki he kakai kotoa kuo ʻave fakamālohí, ʻa ia naʻá ku ʻai ke ʻave fakamālohi mei Selusalema ki Pāpiloné, 5 ‘Mou langa fale pea nofo ai. Tō ha ngaahi ngoue pea kai hono fuá. 6 Mou maʻu uaifi pea maʻu mo ha ngaahi foha mo ha ngaahi ʻofefine; ʻomi ha ngaahi uaifi maʻa homou ngaahi fohá pea foaki atu homou ngaahi ʻofefiné ʻi he mali, koeʻuhí ke nau maʻu foki mo ha ngaahi foha mo ha ngaahi ʻofefine. Mou hoko ʻo tokolahi ai, pea ʻoua ʻe tokosiʻi. 7 Pea mou kumi ki he melino ʻa e kolo ʻa ia kuó u ʻave fakamālohi kimoutolu ki aí, pea fai ha lotu kia Sihova maʻanautolu, he ʻi heʻenau melinó te mou melino ai.+ 8 He ko e folofola eni ʻa Sihova ʻo e ngaahi kau tau, ko e ʻOtua ʻo ʻIsilelí: “ʻOua naʻa tuku ʻa hoʻomou kau palōfita mo hoʻomou kau vavalo ʻoku ʻi homou lotolotongá ke nau kākaaʻi kimoutolu,+ pea ʻoua naʻa fanongo ki heʻenau ngaahi misí. 9 He ‘ʻoku nau kikiteʻaki ʻa e ngaahi loi kiate kimoutolu ʻi hoku hingoá. Kuo ʻikai te u fekauʻi atu kinautolu,’+ ko e fakahaaʻi ia ʻe Sihová.”’”
10 “He ko e folofola eni ʻa Sihová, ‘ʻI he kakato ʻa e taʻu ʻe 70 ʻi Pāpiloné, te u fai ha tokanga kiate kimoutolu,+ pea te u fakahoko ʻa ʻeku talaʻofá ʻaki ʻeku fakafoki mai kimoutolu ki he feituʻú ni.’+
11 “‘He ʻoku ou ʻiloʻi lelei ʻa e ngaahi fakakaukau ʻoku ou fakakaukau ʻaki kiate kimoutolú,’ ko e fakahaaʻi ia ʻe Sihová, ‘ko e ngaahi fakakaukau ʻo e melino, ʻo ʻikai ko ha kovi,+ ke ʻoatu kiate kimoutolu ha kahaʻu pea mo ha ʻamanaki.+ 12 Pea te mou ui kiate au mo mou omi ʻo lotu kiate au, pea te u fanongo kiate kimoutolu.’+
13 “‘Te mou kumi kiate au ʻo ʻilo au,+ he te mou kumi kiate au ʻaki homou lotó kotoa.+ 14 Pea te u tuku ke mou ʻiloʻi au,’+ ko e fakahaaʻi ia ʻe Sihová. ‘Pea te u fakatahatahaʻi ʻa hoʻomou kau nofo pōpulá pea tānaki fakataha mai kimoutolu mei he ngaahi puleʻanga mo e ngaahi feituʻu kotoa ʻa ia naʻá ku fakamovete kimoutolu ki aí,’+ ko e fakahaaʻi ia ʻe Sihová. ‘Pea te u fakafoki mai kimoutolu ki he feituʻu naʻá ku ʻai ke ʻave fakamālohi kimoutolu mei aí.’+
15 “Ka kuo mou pehē, ‘Kuo fokotuʻu ʻe Sihova ia haʻamau kau palōfita ʻi Pāpilone.’
16 “He ko e folofola eni ʻa Sihova ki he tuʻi ʻoku nofo ʻi he taloni ʻo Tēvitá+ pea ki he kakai kotoa ʻoku nofo ʻi he koló ni, ʻa homou fanga tokoua kuo ʻikai ke ʻave fakamālohi fakataha mo kimoutolú, 17 ‘Ko e folofola eni ʻa Sihova ʻo e ngaahi kau tau: “Ko eni ʻoku ou tuku atu kiate kinautolu ʻa e heletā, honge, pea mo e mahaki fakaʻauha,*+ pea te u ʻai kinautolu ke nau hangē ha ngaahi foʻi fiki pala* ʻa ia ʻoku kovi ʻaupito ʻo ʻikai lava ke kaí.”’+
18 “‘Pea te u tuli kiate kinautolu mo e heletā,+ honge, pea mo e mahaki fakaʻauha, pea te u ʻai kinautolu ke nau hoko ko ha meʻa ke fakalilifuʻia ai ʻa e ngaahi puleʻanga kotoa ʻo e māmaní,+ ko ha fakatātā ʻe ngāueʻaki ʻi ha talatuki, pea ko ha meʻa ke fai ai ha ofo, ko ha meʻa ke fai ha manuki* ki ai,+ pea mo ha lumaʻanga ʻi he lotolotonga ʻo e ngaahi puleʻanga kotoa ʻoku ou fakamovete kinautolu ki aí,+ 19 koeʻuhí kuo ʻikai te nau fanongo ki heʻeku ngaahi lea naʻá ku tuku atu kiate kinautolu ʻi heʻeku kau sevāniti ko e kau palōfitá,’ ko e fakahaaʻi ia ʻe Sihová, ‘ʻo u toutou fekauʻi* atu kinautolu.’+
“‘Ka kuo ʻikai te mou fanongo,’+ ko e fakahaaʻi ia ʻe Sihová.
20 “Ko ia ai, fanongo ki he folofola ʻa Sihová, ʻa kimoutolu ʻa e kakai kotoa naʻe ʻave fakamālohí, ʻa ia naʻá ku tuku atu mei Selusalema ki Pāpiloné. 21 Ko e folofola eni ʻa Sihova ʻo e ngaahi kau tau, ko e ʻOtua ʻo ʻIsilelí, ʻo fekauʻaki mo ʻĒhapi ko e foha ʻo Kolaiá, pea fekauʻaki mo Setekaia ko e foha ʻo Māseiá, ʻa ia ʻokú na fai ʻa e ngaahi kikite loi kiate kimoutolu ʻi hoku hingoá,+ ‘Ko eni ʻoku ou tuku atu kinaua ki he nima ʻo Tuʻi Nepukanesa* ʻo Pāpiloné, pea te ne taaʻi kinaua ʻi homou ʻaó. 22 Pea ko e meʻa ʻe hoko kiate kinauá ʻe hoko ia ko ha mala ʻe leaʻaki ʻe he kau ʻave fakamālohi kotoa ʻo Siuta ʻi Pāpiloné: “Fakatauange ke ʻai koe ʻe Sihova ke ke hangē ko Setekaiá pea hangē ko ʻĒhapí, ʻa ia naʻe tunu ʻe he tuʻi ʻo Pāpiloné ʻi he afí!” 23 He kuó na fai ha tōʻonga fakamā ʻi ʻIsileli,+ ʻi hono fai ʻa e tono mo e ngaahi uaifi ʻo hona ngaahi kaungāʻapí pea fai ʻa e ngaahi lea loi ʻi hoku hingoá ʻa ia naʻe ʻikai te u tuʻutuʻuni kiate kinaua.+
“‘“Ko au ʻa e Tokotaha ʻoku ou ʻiloʻí, pea ko au ʻa e fakamoʻoní,”+ ko e fakahaaʻi ia ʻe Sihová.’”
24 “Pea te ke lea kia Semaia+ ʻo Nehelamí ʻo pehē, 25 ‘Ko e folofola eni ʻa Sihova ʻo e ngaahi kau tau, ko e ʻOtua ʻo ʻIsilelí: “Koeʻuhí ko hoʻo ʻoatu ʻa e ngaahi tohi ʻi ho hingoá ki he kakai kotoa ʻi Selusalemá, kia Sēfanaia+ ko e taulaʻeikí ko e foha ʻo Māseiá, mo e kotoa ʻo e kau taulaʻeikí, ʻo pehē, 26 ‘Kuo ʻai koe ʻe Sihova ke ke taulaʻeiki ʻo fetongi ʻa Sihoiata ko e taulaʻeikí ʻo ke hoko ko e pule ʻo e fale ʻo Sihová, ke ke puleʻi ha tangata vale pē ʻokú ne ʻai ʻene tōʻongá ke hangē ha palōfitá peá ke tuku ia ki he ʻakau-kīʻí pea ki he papa tauteaʻangá;*+ 27 ko e hā leva kuo ʻikai te ke valokiʻi ai ʻa Selemaia ʻo ʻAnatotí,+ ʻa ia ʻokú ne ʻai ʻene tōʻongá ke hangē ha palōfitá kiate kimoutolú?+ 28 He naʻe aʻu ʻo ne fai mai ha fekau kiate kimautolu ki Pāpilone, ʻo pehē: “ʻE fuoloa ia! Mou langa ha ngaahi fale pea nofo ai. Tō ha ngaahi ngoue pea kai ʻa hono fuá,+—”’”’”
29 ʻI hono lau ʻe Sēfanaia+ ko e taulaʻeikí ʻa e tohí ni ʻo fanongo ki ai ʻa Selemaia ko e palōfitá, 30 naʻe hoko mai ʻa e folofola ʻa Sihová kia Selemaia, ʻo pehē: 31 “Fai ha fekau ki he kakai kotoa kuo ʻave fakamālohí, ʻo pehē, ‘Ko e folofola eni ʻa Sihova ʻo fekauʻaki mo Semaia ʻo Nehelamí: “Koeʻuhi ko e kikite ʻa Semaia kiate kimoutolu neongo naʻe ʻikai te u fekauʻi atu iá, peá ne feinga ke ʻai kimoutolu ke mou falala ki he ngaahi loí,+ 32 ko ia ai, ko e folofola eni ʻa Sihová, ‘Ko eni ʻoku ou fai ha tokanga kia Semaia ʻo Nehelamí pea ki hono hakó. ʻE ʻikai ke hao haʻane tangata ʻe taha ʻi he lotolotonga ʻo e kakaí ni, pea heʻikai te ne sio ki he lelei te u fai maʻa hoku kakaí,’ ko e fakahaaʻi ia ʻe Sihová, ‘he kuó ne fakaʻaiʻai ha angatuʻu kia Sihova.’”’”
30 Naʻe hoko mai kia Selemaia ʻa e folofola meia Sihova, ʻo pehē: 2 “Ko e folofola eni ʻa Sihova ko e ʻOtua ʻo ʻIsilelí, ‘Hiki ʻi ha tohi ʻa e ngaahi lea kotoa pē ʻoku ou leaʻaki kiate koé. 3 He “vakai, ʻoku hoko mai ʻa e ngaahi ʻaho,” ko e fakahaaʻi ia ʻe Sihová, “ʻa ia te u tānaki fakataha mai ai ʻa e kau pōpula ʻi hoku kakaí, ʻa ʻIsileli mo Siuta,”+ ko e folofola ia ʻa Sihová, “pea te u fakafoki mai kinautolu ki he fonua naʻá ku foaki ki heʻenau fanga kuí, pea te nau toe maʻu ia.”’”+
4 Ko e ngaahi lea eni naʻe folofolaʻaki ʻe Sihova ki ʻIsileli mo Siutá.
5 Ko e folofola eni ʻa Sihová:
“Kuo mou fanongo ki he ongo mai ʻa e tetetete;
ʻOku ʻi ai ʻa e manavahē, pea ʻoku ʻikai ha melino.
6 ʻEke muʻa, pe ʻe lava ke fāʻele ha tangata.
Ko e hā leva ʻoku ou sio ai ki he tangata mālohi kotoa pē ʻoku ala hono nimá ki hono keté
ʻO hangē ha fefine ʻoku fāʻelé?+
Ko e hā kuo tea ai ʻa e mata kotoa pē?
7 ʻOiauē! He ko e ʻaho ko iá ko ha ʻaho fakalilifu.*+
ʻOku ʻikai ha ʻaho ʻe hangē ko iá,
Ko ha taimi ʻo e mamahi kia Sēkope.
Ka ʻe fakahaofi ia mei ai.”
8 “Pea ʻi he ʻaho ko iá,” ko e fakahaaʻi ia ʻe Sihova ʻo e ngaahi kau tau, “te u fesiʻi ʻa e ʻioké mei ho kiá, pea te u motuhi ho haʻí; pea ʻe ʻikai ke toe ʻai ia* ʻe ha kau sola* ke ne hoko ko ʻenau tamaioʻeiki. 9 Te nau tauhi kia Sihova ko honau ʻOtuá mo Tēvita ko honau tuʻí, ʻa ia te u fokotuʻu kiate kinautolú.”+
10 “Pea ko koe, ʻa ʻeku sevāniti ko Sēkopé, ʻoua te ke ilifia,” ko e fakahaaʻi ia ʻe Sihová,
“Pea ʻoua te ke manavahē, ʻe ʻIsileli.+
He te u fakahaofi koe mei he feituʻu mamaʻó
Pea mo hoʻo fānaú mei he fonua ʻoku nau ngāue pōpula aí.+
ʻE foki mai ʻa Sēkope pea te ne nonga ʻo ʻikai fakahohaʻasi,
ʻO ʻikai ha taha te ne ʻai kinautolu ke nau ilifia.”+
11 “He ʻoku ou ʻiate koe,” ko e fakahaaʻi ia ʻe Sihová, “ke fakahaofi koe.
Ka te u fakaʻauha ʻa e ngaahi puleʻanga kotoa naʻá ku fakamovetevete koe ki aí;+
Ka heʻikai te u fakaʻauha koe.+
12 He ko e folofola eni ʻa Sihová:
“ʻOku ʻikai ha faitoʻo ki ho kafó.+
ʻOku ʻikai malava ke faitoʻo ho laveá.
13 ʻOku ʻikai ha taha ke ne taukapoʻi koe,
ʻOku ʻikai ha meʻa ke faitoʻo ʻaki ho palá.
ʻOku ʻikai ha faitoʻo kiate koe.
14 Ko e kotoa ho ngaahi ʻofaʻanga mamaé kuo nau fakangaloʻi koe.+
ʻOku ʻikai te nau kei kumi atu kiate koe.
He kuó u taaʻi koe ʻo hangē ko hano taaʻi ʻe ha fili,+
Pea ʻaki ʻa e tautea ʻa ha tokotaha anga-fakamamahi,
Koeʻuhi ko e lahi hoʻo hiá mo e lahi ʻo hoʻo ngaahi angahalá.+
15 Ko e hā ʻokú ke tangi ai koeʻuhi ko ho kafó?
ʻOku ʻikai malava ke faitoʻo ho mamahí!
Koeʻuhi ko e lahi ʻo hoʻo hiá mo e lahi ʻo hoʻo ngaahi angahalá+
Kuó u fai ai ʻa e meʻá ni kiate koé.
16 Ko ia ai, ko kinautolu kotoa ʻoku nau keina koé ʻe keina kinautolu,+
Pea ko ho ngaahi filí kotoa ʻe taki pōpula atu mo kinautolu.+
Ko e faʻahinga ʻoku nau fai ha faʻao fakamālohi meiate koé ʻe fai ha faʻao fakamālohi meiate kinautolu,
Pea te u tuku atu ʻa e faʻahinga kotoa ʻoku nau kaihaʻa fakamālohi meiate koé ki he kaihaʻa fakamālohi.”+
17 “Ka te u ʻai koe ke ke toe foki ʻo moʻui lelei mo faitoʻo ho ngaahi laveá,”+ ko e fakahaaʻi ia ʻe Sihová,
“Neongo naʻa nau ui koe ko e liʻekina:
‘Ko Saione, ʻa ia ʻoku ʻikai kumi ki ai ha taha.’”+
18 Ko e folofola eni ʻa Sihová:
“Ko eni te u tānaki fakataha mai ʻa e kau pōpula ʻo e ngaahi tēniti ʻo Sēkopé,+
Pea te u fakahaaʻi ʻa e manavaʻofa ki hono ngaahi nofoʻangá.
ʻE toe langa ʻa e koló ʻi hono tafungá,+
Pea ko e taua fakakolotaú ʻe tuʻu ʻi hono tuʻuʻanga totonú.
19 Pea ʻe ʻalu atu meiate kinautolu ʻa e fakafetaʻi mo e ngaahi leʻo ʻo e kakata.+
Te u fakatokolahi kinautolu, pea ʻe ʻikai te nau tokosiʻi;+
Te u ʻai kinautolu ke nau tokolahi fau,*
Pea ʻe ʻikai ke nau hoko ʻo taʻemahuʻinga.+
20 Ko hono ngaahi fohá te nau hoko ʻo hangē pē ko ia ʻi he kuohilí,
Pea ko ʻene fuʻu fakatahá ʻe fokotuʻu maʻu ʻi hoku ʻaó.+
Te u fai ha meʻa ki hono kau fakamamahí kotoa.+
21 Ko ʻene tokotaha lāngilangiʻiá ko ha taha pē meiate ia,
ʻE ʻalu hake mei hono lotolotongá ʻa ʻene tokotaha pulé.
Te u ʻai ia ke ne ofi mai, pea te ne fakaofiofi mai kiate au.”
“He ka ʻikai, ko hai ia ʻe fakatoʻotoʻa* ke fakaofiofi mai kiate aú?” Ko e fakahaaʻi ia ʻe Sihová.
22 “Pea te mou hoko ko hoku kakai,+ pea te u hoko ko homou ʻOtua.”+
23 Vakai! Ko ha matangi mālohi ʻa Sihova ʻe haʻaki atu ʻi heʻene houhaú,+
Ko ha matangi ʻahiohio ʻoku vilo hifo ki he ʻulu ʻo e kau fulikivanú.
24 Ko e houhau kakaha ʻa Sihová ʻe ʻikai ke foki
Kae ʻoua kuó ne fakahoko mo lavaʻi ʻa e ngaahi taumuʻa ʻo hono lotó.+
ʻI he ngaahi ʻaho fakaʻosí te mou mahinoʻi ai eni.+
31 “ʻI he taimi ko iá,” ko e fakahaaʻi ia ʻe Sihová, “te u hoko ko e ʻOtua ki he ngaahi fāmili kotoa ʻo ʻIsilelí, pea te nau hoko ko hoku kakai.”+
2 Ko e folofola eni ʻa Sihová:
“Ko e kakai naʻe hao mei he heletaá naʻa nau maʻu ʻa e hōifua ʻa e ʻOtuá ʻi he toafá
ʻI he taimi naʻe laka atu ai ʻa ʻIsileli ki hono mālōlōʻangá.”
3 Naʻe hā mai ʻa Sihova kiate au ʻi he mamaʻó ʻo ne folofola:
“Kuó u ʻofaʻi koe ʻaki ha ʻofa taʻengata.
Ko e ʻuhinga ia kuó u tohoakiʻi mai ai koe kiate au ʻaki ʻa e ʻofa mateakí.*+
4 Ka te u toe langa hake koe pea ʻe langa hake koe.+
ʻE taʻahine kei nofo anga-maʻa ko ʻIsileli, te ke toe toʻo ʻa hoʻo ngaahi nafá
5 Te ke toe tō ʻa e ngaahi ngoue kālepi ʻi he ngaahi moʻunga ʻo Samēliá;+
ʻE tō ʻe he kau toó pea te nau fiefia ʻi hono fuá.+
6 He ʻe hoko mai ʻa e ʻaho ʻa ia ʻe kaila atu ai ʻa e kau tangata leʻo ʻi he ngaahi moʻunga ʻo ʻIfalemí:
‘Tuʻu hake ke tau ʻalu hake ki Saione, kia Sihova ko hotau ʻOtuá.’”+
7 He ko e folofola eni ʻa Sihová:
“Kalanga kia Sēkope ʻi he fiefia.
Kaila ʻi he mavava koeʻuhí ʻoku mou māʻolunga ʻi he ngaahi puleʻangá.+
Fanongonongo ia; fai ʻa e fakahīkihiki pea pehē,
‘ʻE Sihova, ke ke fakahaofi ho kakaí, ʻa e toenga ʻo ʻIsilelí.’+
8 ʻOku ou fakafoki mai kinautolu mei he fonua ʻo e tokelaú.+
Te u tānaki fakataha mai kinautolu mei he ngaahi feituʻu mamaʻo taha ʻo e māmaní.+
ʻE ʻi honau lotolotongá ʻa e kui pea mo e heke,+
ʻA e fefine feitama fakataha mo e tokotaha ʻoku teu fāʻelé.
Te nau foki mai ki heni ko ha fuʻu fakatahaʻanga.+
9 Te nau haʻu pē mo tangi.+
Te u taki atu kinautolu lolotonga ia ʻenau kōlenga ki ha hōifuá.
He ko ha Tamai au ki ʻIsileli, pea ko ʻIfalemi ʻa hoku ʻuluaki fohá.”+
10 Fanongo ki he folofola ʻa Sihová, ʻa kimoutolu ngaahi puleʻanga,
Pea fanongonongo ia ʻi he lotolotonga ʻo e ngaahi motu mamaʻó:+
“Ko e Tokotaha naʻá ne fakamovetevete ʻa ʻIsilelí te ne tānaki fakataha mai ia.
Te ne leʻohi ia ʻo hangē ko ia ʻoku fai ʻe ha tauhi-sipi ki heʻene tākangá.+
11 He ʻe huhuʻi ʻe Sihova ʻa Sēkope+
Pea fakahaofi* ia mei he nima ʻo e tokotaha ʻoku mālohi ange ʻiate iá.+
12 Te nau haʻu ʻo kaila fiefia ʻi he māʻolunga ʻo Saioné+
Pea te nau fiefia ʻi he lelei ʻa* Sihová,
ʻI he uité mo e uaine foʻoú+ pea mo e loló,
Pea ʻi he ʻuhiki ʻo e fanga sipí mo e fanga pulú.+
13 “ʻI he taimi ko iá, ʻe meʻe fiefia ʻa e taʻahine kei nofo anga-maʻá,
Pehē foki ki he kau talavoú fakataha mo e kau tangata taʻumotuʻá.+
Te u liliu ʻenau tengihiá ki he fiefia.+
Te u fakafiemālieʻi kinautolu pea ʻoange kiate kinautolu ʻa e fiefia ke fetongiʻaki ʻenau mamahí.+
14 Te u fakafiemālieʻi ʻa e kau taulaʻeikí ʻaki ʻa e meʻakai lahi,*
Pea ʻe fiemālie ʻa hoku kakaí ʻi he ngaahi meʻa lelei te u ʻoange kiate kinautolú,”+ ko e fakahaaʻi ia ʻe Sihová.
15 “Ko e folofola eni ʻa Sihová:
‘ʻOku ongona ha leʻo ʻi Lama,+ ko e tangilāulau mo e fuʻu fākafoa:
ʻOku tangi ʻa Lesieli koeʻuhi ko ʻene fānau tangatá.*+
Kuo ʻikai te ne fie tali ha fakafiemālie koeʻuhi ko ʻene fānau tangatá,
Koeʻuhí ko ʻenau puli atú.’”+
16 Ko e folofola eni ʻa Sihová:
“‘Taʻofi ho leʻó mei he tangí pea mo ho loʻimatá mei ho matá,
He ʻoku ʻi ai ha pale ki hoʻo ngāué,’ ko e fakahaaʻi ia ʻe Sihová.
‘Te nau foki mai mei he fonua ʻo e filí.’+
17 ‘Pea ʻoku ʻi ai ha ʻamanaki ki ho kahaʻú,’+ ko e fakahaaʻi ia ʻe Sihová.
‘ʻE foki mai ho ngaahi fohá ki honau feituʻú.’”+
18 “Kuó u fanongo moʻoni ki he toʻe ʻa ʻIfalemí,
‘Kuó ke fakatonutonuʻi au, pea kuo fakatonutonu au,
ʻO hangē ha ʻuhikiʻi pulu kuo teʻeki ai ke akoʻí.
Fakafoki mai au, pea te u loto-lelei ʻo tafoki,
He ko koe ʻe Sihova ʻa hoku ʻOtuá.
19 He ʻi he hili ʻeku tafokí naʻá ku ongoʻi fakatomala;+
ʻI he hili hono ʻai au ke u maʻu ʻa e mahinó naʻá ku tā hoku alangá ʻi he mamahi.
Naʻá ku mā mo ongoʻi matahoa,+
He naʻá ku fua ʻa hoku māʻanga mei heʻeku kei talavoú.’”
20 “ʻIkai ko ʻIfalemí ko ha foha mahuʻinga ia kiate au, ko ha kiʻi tama ʻofeina?+
He ʻi heʻeku toutou leaʻi iá, ʻoku ou kei manatuʻi ai ia.
Ko e ʻuhinga ia ʻoku ou ongoʻi ai iá.+
Pea ko e moʻoni te u faimanavaʻofa kiate ia,” ko e fakahaaʻi ia ʻe Sihová.+
21 “Fokotuʻu ha ngaahi fakaʻilonga ʻi he halá maʻau,
Pea fokotuʻu hake ha ngaahi pou fakaʻilonga.+
Tokanga ki he hala lahí, ʻa e hala te ke ʻalu aí.+
Foki, ʻe taʻahine kei nofo anga-maʻa ko ʻIsilelí, foki ki he ngaahi kolo ko eni ʻoʻoú.
22 Ko e hā hono fuoloa ʻa hoʻo toumouá, ʻe ʻofefine taʻefaitōnunga?
He kuo ʻai ʻe Sihova ke hoko ha meʻa foʻou ʻi he māmaní:
ʻE tuli vēkeveke ha fefine ki ha tangata.”
23 Ko e folofola eni ʻa Sihova ʻo e ngaahi kau tau, ko e ʻOtua ʻo ʻIsilelí: “Te nau toe leaʻaki ʻa e ngaahi leá ni ʻi he fonua ko Siutá pea ʻi hono ngaahi koló ʻi heʻeku tānaki fakataha mai ʻa ʻenau kau pōpulá: ‘ʻE nofoʻanga māʻoniʻoni,+ ʻe moʻunga tapu,+ ʻofa ke faitāpuekina koe ʻe Sihova.’ 24 Pea ʻe nofo fakataha ai ʻa Siuta mo e kotoa ʻo hono ngaahi koló, ʻa e kau ngoué mo kinautolu ʻoku nau taki ʻa e ngaahi tākangá.+ 25 He te u fakafiemālieʻi ʻa e tokotaha ongosiá pea fakamākona ʻa e tokotaha taki taha ʻoku tāvaivaiá.”+
26 ʻI he meʻá ni naʻá ku ʻā hake ʻo u sio takai holo, pea ko ʻeku mohé naʻe ifo.
27 “Vakai! ʻOku hoko mai ʻa e ngaahi ʻaho,” ko e fakahaaʻi ia ʻe Sihová, “ʻa ia te u tūtuuʻi ai ʻi he fale ʻo ʻIsilelí mo e fale ʻo Siutá ʻa e hako ʻo e* tangatá pea mo e hako ʻo e fanga manú.”+
28 “Pea hangē pē ko ʻeku siofi kinautolu ke taʻaki, mo holoki, mo hae hifo, mo fakaʻauha, mo fai ki ai ha maumaú,+ ʻe pehē ʻeku siofi kinautolu ke langa hake pea ke tō,”+ ko e fakahaaʻi ia ʻe Sihová. 29 “ʻI he ngaahi ʻaho ko iá, ʻe ʻikai te nau kei pehē ai, ‘Naʻe kai kālepi mahi ʻa e ngaahi tamaí, kae maninia ai ʻa e nifo ʻo e ngaahi fohá.’+ 30 Ka ko e tokotaha taki taha te ne mate ʻi heʻene faihala pē ʻaʻaná. Ko ha tangata pē ʻoku kai kālepi mahi ko hono nifo pē ʻoʻoná ʻe maniniá.”
31 “Vakai! ʻOku hoko mai ʻa e ngaahi ʻaho,” ko e fakahaaʻi ia ʻe Sihová, “ʻa ia te u fai ai ha fuakava foʻou+ mo e fale ʻo ʻIsilelí pea mo e fale ʻo Siutá. 32 ʻE ʻikai ke hangē ia ko e fuakava naʻá ku fai mo ʻenau fanga kuí ʻi he ʻaho naʻá ku puke ai honau nimá ʻo taki mai kinautolu mei he fonua ko ʻIsipité,+ ‘ʻa ʻeku fuakava ko ia naʻa nau maumauʻí,+ neongo ko au ʻa honau pule moʻoní,’* ko e fakahaaʻi ia ʻe Sihová.”
33 “He ko e fuakava eni te u fai mo e fale ʻo ʻIsilelí hili ʻa e ngaahi ʻaho ko iá,” ko e fakahaaʻi ia ʻe Sihová. “Te u ʻai ʻeku laó ki loto ʻiate kinautolu,+ pea te u tohi ia ʻi honau lotó.+ Pea te u hoko ko honau ʻOtua, pea te nau hoko ko hoku kakai.”+
34 “Pea ʻe ʻikai te nau kei taki taha akoʻi ʻa hono kaungāʻapi mo taki taha akoʻi ʻa hono tokoua, ʻo pehē, ‘Mou ʻiloʻi ʻa Sihova!’+ He te nau ʻiloʻi kotoa au, mei he siʻi taha ki he lahi taha ʻo kinautolú,”+ ko e fakahaaʻi ia ʻe Sihová. “He te u fakamolemoleʻi ʻenau faihalá, pea ʻe ʻikai te u kei manatua ʻa ʻenau angahalá.”+
35 Ko e folofola eni ʻa Sihová,
ʻA ia ʻokú ne ʻomai ʻa e laʻaá ke hoko ko ha maama ʻi he ʻahó,
Mo e ngaahi lao* ki he māhiná mo e ngaahi fetuʻú ke hoko ko ha maama ʻi he poʻulí,
ʻA ia ʻokú ne ueʻi ʻa e tahí pea ʻai ke ʻuʻulu ʻa hono ngaahi peaú,
ʻA ia ko hono huafá ko Sihova ʻo e ngaahi kau tau:+
36 “‘Kapau ʻe faifai ange pea ʻikai fakahoko ʻa e ngaahi tuʻutuʻuni ko ení,’ ko e fakahaaʻi ia ʻe Sihová,
‘Ko e toki taimi pē ia ʻe ngata ai ʻa e hoko ʻa e fānau ʻa ʻIsilelí ko ha puleʻanga ʻi hoku ʻaó maʻu ai pē.’”+
37 Ko e folofola eni ʻa Sihová: “‘Kapau ʻe lava ʻo fua ʻa e ngaahi langí ʻi ʻolunga pea lava ke fakatotoloa ʻa e ngaahi makatuʻunga ʻo e māmaní ʻi lalo, ko e toki taimi pē ia ʻe lava ke u siʻaki ai ʻa e fānau kotoa ʻa ʻIsilelí koeʻuhí ko e meʻa kotoa kuo nau faí,’ ko e fakahaaʻi ia ʻe Sihová.”+
38 “Vakai! ʻOku hoko mai ʻa e ngaahi ʻaho,” ko e fakahaaʻi ia ʻe Sihová, “ʻa ia ʻe langa ai ʻa e koló+ kia Sihova mei he Taua ʻo Henanelí+ ki he Matapā Tulikí.+ 39 Pea ʻe lele hangatonu ʻa e afo fuá+ ki he foʻi māʻolunga ko Kālepí, pea ʻe afe ai ki Koa. 40 Pea ko e teleʻa* kotoa ʻo e ngaahi ʻangaʻangá pea mo e ngaahi efuefú* pea mo e kotoa ʻo e ngaahi ngoué ʻo aʻu ki he Teleʻa Kitiloné,+ ʻo hangatonu atu ki he tuliki ʻo e Matapā Hōsí+ ki he hahaké, ʻe hoko ia ko ha meʻa toputapu kia Sihova.+ ʻE ʻikai ʻaupito ke toe taʻaki ia pe holoki.”
32 Naʻe hoko kia Selemaia ʻa e folofola meia Sihova ʻi he taʻu hono 10 ʻo e pule ʻa Tuʻi Setekaia ʻo Siutá, ʻa ia, ko e taʻu ia hono 18 ʻo e pule ʻa Nepukanesá.*+ 2 ʻI he taimi ko iá naʻe ʻākoloʻi ai ʻa Selusalema ʻe he kau tau ʻa e tuʻi ʻo Pāpiloné, pea ko Selemaia ko e palōfitá naʻe tauhi pōpula ʻi he Lotoʻā Kaʻaté+ ʻi he fale* ʻo e tuʻi ʻo Siutá. 3 He kuo tauhi pōpula ia ʻe Tuʻi Setekaia ʻo Siutá,+ ʻo ne pehē, “Ko e hā ʻokú ke kikite peheni aí? ʻOkú ke pehē, ‘Ko e meʻa eni ʻoku folofolaʻaki ʻe Sihová: “Te u tuku ʻa e koló ni ki he nima ʻo e tuʻi ʻo Pāpiloné, pea te ne hamu ia,+ 4 pea ʻe ʻikai ke hao ʻa Tuʻi Setekaia ʻo Siutá mei he kau Kalitiá, he kuo pau ke tuku ia ki he nima ʻo e tuʻi ʻo Pāpiloné, pea te ne lea kiate ia mo sio kiate ia mata ki he mata.”’+ 5 ‘Te ne ʻave ʻa Setekaia ki Pāpilone, pea te ne nofo ai pē kae ʻoua kuó u fai ha tokanga kiate ia,’ ko e fakahaaʻi ia ʻe Sihová. ‘Neongo hoʻomou hanganaki tau mo e kau Kalitiá, heʻikai te mou lavameʻa.’”+
6 Naʻe pehē ʻe Selemaia: “Kuo hoko mai ʻa e folofola ʻa Sihová kiate au, ʻo pehē, 7 ‘Ko eni ʻe haʻu ʻa Henamili ko e foha ʻo Salumi ko e tokoua ʻo hoʻo tamaí kiate koe ʻo ne pehē: “Fakatau maʻau ʻa hoku konga kelekele ʻi ʻAnatotí,+ koeʻuhí ko koe ʻokú ke maʻu ʻa e ʻuluaki totonu ke fakatau iá.”’”+
8 Naʻe haʻu kiate au ʻa Henamili ko e foha ʻo e tokoua ʻo ʻeku tamaí, ʻo hangē tofu pē ko e meʻa naʻe folofolaʻaki ʻe Sihová, ki he Lotoʻā Kaʻaté, ʻo ne pehē mai kiate au: “Kātaki muʻa ʻo fakatau ʻa hoku konga kelekele ʻi ʻAnatotí, ʻi he fonua ʻo Penisimaní, he ko koe ʻokú ke maʻu ʻa e totonu ke maʻu ia pea ke fakatau iá. Fakatau ia maʻau.” ʻI he meʻá ni naʻá ku ʻiloʻi ai ko e folofola ia ʻa Sihova.
9 Ko ia naʻá ku fakatau ʻa e konga kelekele ʻi ʻAnatotí meia Henamili ko e foha ʻo e tokoua ʻo ʻeku tamaí. Naʻá ku fua ʻa e paʻangá+ ʻo ʻoange kiate ia, ko e sikeli* siliva ʻe 17.* 10 Naʻá ku hiki leva ia ʻi ha tohi aleapau,+ pea ʻai ʻa e silá ki ai, mo ui mai ʻa e kau fakamoʻoní,+ pea fua ʻa e paʻangá ʻi he meʻafuá. 11 Naʻá ku toʻo ʻa e tohi aleapau ʻo e fakataú, ʻa e tohi naʻe silaʻí ʻo fakatatau ki he tuʻutuʻuni mo e ngaahi fiemaʻu fakalaó, pea pehē ki he tohi naʻe tuku fakaava peé, 12 pea naʻá ku ʻoange ʻa e tohi aleapau ʻo e fakataú kia Paluki+ ko e foha ʻo Nelaia+ ko e foha ʻo Maʻaseiá ʻi he ʻao ʻo Henamili ko e foha ʻo e tokoua ʻo ʻeku tamaí, mo e kau fakamoʻoni naʻa nau fakamoʻoni ʻi he tohi aleapau ʻo e fakataú, pea mo e kotoa ʻo e kau Siu naʻa nau tangutu ʻi he Lotoʻā Kaʻaté.+
13 Naʻá ku fai leva ha fekau kia Paluki ʻi honau ʻaó, ʻo pehē: 14 “Ko e folofola eni ʻa Sihova ʻo e ngaahi kau tau, ko e ʻOtua ʻo ʻIsilelí, ʻo pehē, ‘Toʻo ʻa e ongo tohi aleapau ko ení, ʻa e tohi aleapau ko eni ʻo e fakataú, ʻa e tohi naʻe silaʻí mo e tohi aleapau ʻe taha naʻe tuku fakaavá, pea faʻo ia ki ha ʻaiʻanga meʻa ʻumea, koeʻuhí ke tauhi ia ai ʻi ha taimi fuoloa.’ 15 He ko e folofola eni ʻa Sihova ʻo e ngaahi kau tau, ko e ʻOtua ʻo ʻIsilelí, ‘Ko e ngaahi falé mo e ngaahi konga kelekelé mo e ngaahi ngoue kālepí ʻe toe fakatau mai ia ʻi he fonuá ni.’”+
16 Pea naʻá ku lotu kia Sihova ʻi he hili hono ʻoatu ʻa e tohi aleapau ʻo e fakataú kia Paluki ko e foha ʻo Nelaiá, ʻo pehē: 17 “ʻOiauē, ʻe ʻEiki Hau Sihova! Vakai! Naʻá ke ngaohi ʻa e langí mo e māmaní ʻaki ho fuʻu iví pea ʻaki ho nima kuo mafao atú.+ ʻOku ʻikai ha meʻa ʻe fuʻu faingataʻa kiate koe, 18 ʻa koe ko e Tokotaha ʻokú ke fakahā ʻa e ʻofa mateaki ki he ngaahi toko afe, ka ʻokú ke totongi ʻa e faihala ʻa e ngaahi tamaí ki* honau ngaahi foha ʻamuí,+ ʻa e ʻOtua moʻoní, ko e Tokotaha lahi mo māfimafi, ʻa ia ko ho huafá ko Sihova ʻo e ngaahi kau tau. 19 Ko e fungani koe ʻi he akonaki* pea māfimafi ʻi he ngāue,+ ʻa koe ko ho fofongá ʻoku ʻi he ngaahi ʻalunga kotoa ʻo e tangatá,+ ke ʻoatu ki he tokotaha taki taha ʻo fakatatau ki hono ngaahi ʻalungá pea fakatatau ki he meʻa ʻokú ne faí.+ 20 Kuó ke fakahoko ha ngaahi fakaʻilonga mo e ngaahi mana ʻi he fonua ko ʻIsipité, ʻa ia ʻoku ʻiloa ia ʻo aʻu mai ki he ʻahó ni, pea kuó ke ʻai ai ke ongoongoa ho hingoá ʻi ʻIsileli pea ʻi he lotolotonga ʻo e faʻahinga ʻo e tangatá,+ ʻo hangē ko ia ʻi he ʻaho ní. 21 Pea naʻá ke ʻomai ʻa ho kakai ko ʻIsilelí mei he fonua ko ʻIsipité, ʻaki ʻa e ngaahi fakaʻilonga, mo e ngaahi mana, mo ha nima mālohi, mo ha nima kuo mafao atu, pea mo e ngaahi ngāue fakamanavahē.+
22 “ʻI he faai mai ʻa e taimí naʻá ke foaki kiate kinautolu ʻa e fonua ko eni naʻá ke fuakava ke ʻoange maʻa ʻenau fanga kuí,+ ko ha fonua ʻoku mahutafea ʻi he huʻakau mo e hone.+ 23 Pea naʻa nau hū ki ai ʻo maʻu ia, ka naʻe ʻikai te nau talangofua ki ho leʻó pe ʻaʻeva ʻi hoʻo laó. Naʻe ʻikai te nau fai ha meʻa ʻe taha naʻá ke tuʻutuʻuni ange ke nau fai, ko ia naʻá ke ʻai ai ke tō ʻa e kovi kotoa ko ení kiate kinautolu.+ 24 Vakai! Kuo haʻu ʻa e kau tangatá ʻo fokotuʻu ha fakatafunga kelekele ke hamu ʻa e koló,+ pea koeʻuhi ko e heletaá,+ ko e hongé, mo e mahaki fakaʻauhá,*+ kuo pau ke tō ʻa e koló ki he nima ʻo e kau Kalitia ʻoku nau tauʻi iá; ko e meʻa naʻá ke folofolaʻakí kuo hoko kotoa ia, ʻo hangē pē ko ia ʻokú ke vakai ki ai he taimi ní. 25 Ka kuó ke folofola mai kiate au, ʻe ʻEiki Hau Sihova, ‘Fakatau ʻaki ha paʻanga ʻa e konga kelekelé maʻau pea ui mai ha kau fakamoʻoni,’ neongo kuo pau ke tuku ʻa e koló ki he nima ʻo e kau Kalitiá.”
26 ʻI he meʻa ko iá naʻe hoko mai ʻa e folofola ʻa Sihová kia Selemaia, ʻo pehē: 27 “Ko eni, ko Sihova au, ko e ʻOtua ʻo e faʻahinga kotoa ʻo e tangatá.* ʻOku ʻi ai ha meʻa ʻe fuʻu faingataʻa kiate au? 28 Ko ia ko e meʻa eni ʻoku folofolaʻaki ʻe Sihová, ‘Ko eni ʻoku ou tuku atu ʻa e koló ni ki he kau Kalitiá pea ki he nima ʻo Tuʻi Nepukanesa* ʻo Pāpiloné, pea te ne hamu ia.+ 29 Pea ko e kau Kalitia ʻoku nau tauʻi ʻa e koló ni te nau hū atu ʻo tutu ʻa e koló ni+ pea tutu ia fakataha mo e ngaahi fale ʻa ia ko honau funga falé ē naʻe faifeilaulau ai ʻa e kakaí kia Pēalí pea lilingi atu ai ʻa e ngaahi feilaulau inu ki he ngaahi ʻotua kehé ke fakaʻitaʻi ai au.’+
30 “‘He ko e kakai ʻo ʻIsileli mo Siutá kuo nau fai pē ʻa e meʻa naʻe kovi ʻi heʻeku vakaí, talu mei heʻenau kei talavoú;+ ko e kakai ʻo ʻIsilelí ʻoku nau hanganaki fakaʻitaʻi au ʻaki ʻa e ngāue ʻa honau nimá,’ ko e fakahaaʻi ia ʻe Sihová. 31 ‘He ko e koló ni, talu mei he ʻaho naʻa nau langa ai iá ʻo aʻu mai ki he ʻahó ni, kuo ʻikai haʻanau meʻa ʻe fai ka ko e fakatupu ʻita pē mo e fakatupu tuputāmaki pē kiate au,+ ko ia kuo pau ke toʻo atu ia mei hoku ʻaó,+ 32 koeʻuhi ko e kovi kotoa kuo fai ʻe he kakai ʻo ʻIsileli mo Siutá ke fakaʻitaʻi aú—ʻa kinautolu, mo honau ngaahi tuʻí,+ mo ʻenau kau houʻeikí,+ ko ʻenau kau taulaʻeikí, ko ʻenau kau palōfitá,+ mo e kau tangata ʻo Siutá mo e kakai ʻo Selusalemá. 33 Naʻa nau hanganaki sītuʻa kiate au, ʻo ʻikai ke hanga mai;+ neongo ʻa ʻeku toutou feinga ke akoʻi* kinautolú, naʻe ʻikai ha taha ʻiate kinautolu ʻe fanongo ke maʻu akonaki.+ 34 Pea naʻa nau tuku ʻenau ngaahi ʻaitoli fakalieliá ʻi he fale ʻoku uiʻaki hoku hingoá, koeʻuhí ke ʻuliʻi ia.+ 35 ʻIkai ngata aí, naʻa nau langa ʻa e ngaahi potu māʻolunga ʻo Pēalí ʻi he Teleʻa ʻo e Foha ʻo Hīnomí,*+ koeʻuhí ke nau ʻai honau ngaahi fohá mo honau ngaahi ʻofefiné ke nau fou atu ʻi he afí* kia Moloke,+ ko e meʻa naʻe ʻikai te u tuʻutuʻuni kiate kinautolu+ pea naʻe ʻikai ʻaupito ke ake ʻi hoku lotó* ke fai ha meʻa fakalielia pehē, ʻo fakatupunga ai ʻa Siuta ke faiangahala.’
36 “Ko ia ai, ko e meʻa eni ʻoku folofolaʻaki ʻe Sihova ko e ʻOtua ʻo ʻIsilelí ʻo fekauʻaki mo e kolo ko eni ʻoku mou pehē ʻe tuku ki he nima ʻo e tuʻi ʻo Pāpiloné ʻi he heletā, ko e honge, pea mo e mahaki fakaʻauhá, 37 ‘Ko eni te u tānaki fakataha mai kinautolu mei he ngaahi fonua kotoa naʻá ku fakamovetevete ai kinautolu ʻi heʻeku ʻitá mo ʻeku tuputāmakí+ mo ʻeku tōlilí, pea te u fakafoki mai kinautolu ki he feituʻú ni pea tuku kinautolu ke nau nofo malu ai.+ 38 Pea te nau hoko ko hoku kakai, pea te u hoko ko honau ʻOtua.+ 39 Pea te u ʻoange kiate kinautolu ha loto pē taha+ mo ha hala pē taha koeʻuhí ke nau manavahē maʻu ai pē kiate au, koeʻuhi ke nau lelei ai pea mo lelei ai ʻa ʻenau fānau ʻamuí.+ 40 Pea te u fai ha fuakava taʻengata mo kinautolu,+ ʻa ia heʻikai te u tafoki mei hono fai ha lelei kiate kinautolu;+ pea te u ʻai ʻa e manavahē kiate aú ke ʻi honau lotó, koeʻuhí ke ʻoua naʻa nau tafoki meiate au.+ 41 Te u fiefia ʻiate kinautolu ʻo fai ha lelei kiate kinautolu,+ pea te u hunuki kinautolu ʻi he fonuá ni,+ ʻaki hoku lotó kotoa mo ʻeku moʻuí kotoa.’”
42 “He ko e folofola eni ʻa Sihová, ‘Hangē ko ʻeku ʻomi ki he kakaí ni ʻa e kotoa ʻo e fuʻu faingataʻá ni, ko ia te u ʻomi kiate kinautolu ʻa e lelei* kotoa ʻoku ou talaʻofa kiate kinautolú.+ 43 Pea ʻe toe fakatau mai ʻa e ngaahi konga kelekelé ʻi he fonuá ni,+ neongo ʻoku mou pehē: “Ko ha feituʻu lala ia ʻoku ʻikai ʻi ai ha tangata mo ha manu, pea kuo tuku atu ia ki he kau Kalitiá.”’
44 “‘ʻE fakatau mai ʻa e ngaahi konga kelekelé ʻaki ʻa e paʻanga, pea ʻe hiki ʻa e ngaahi tohi aleapau fakataú ʻo silaʻi, pea ʻe ui mai ʻa e kau fakamoʻoní ʻi he fonua ʻo Penisimaní,+ ʻi he ngaahi feituʻu takatakai ʻi Selusalemá, ʻi he ngaahi kolo ʻo Siutá,+ ʻi he ngaahi kolo ʻo e feituʻu moʻungaʻiá, ʻi he ngaahi kolo ʻi he talaló,+ pea ʻi he ngaahi kolo ʻo e tongá, koeʻuhi te u fakafoki mai ʻa ʻenau kau pōpulá,’+ ko e fakahaaʻi ia ʻe Sihová.”
33 Naʻe hoko mai ʻa e folofola ʻa Sihová kia Selemaia ko hono tuʻo uá ia, lolotonga hono kei tauhi pōpula ia ʻi he Lotoʻā Kaʻaté,+ ʻo pehē: 2 “Ko e folofola eni ʻa Sihova ko e Tokotaha-Ngaohi ʻo e māmaní, ʻa Sihova naʻá ne faʻu ia mo fokotuʻu maʻu iá; ko Sihova ʻa hono hingoá, 3 ‘Ui kiate au, pea te u fai ha tali kiate koe pea te u loto-lelei ke fakahā kiate koe ha ngaahi meʻa lalahi mo mahinongataʻa ʻa ia kuo ʻikai te ke ʻiloʻi.’”+
4 “He ko e folofola eni ʻa Sihova ko e ʻOtua ʻo ʻIsilelí ʻo fekauʻaki mo e ngaahi fale ʻo e koló ni pea mo e ngaahi fale ʻo e ngaahi tuʻi ʻo Siutá ʻa ia kuo holoki koeʻuhí ko e ngaahi fakatafunga kelekelé pea mo e heletaá,+ 5 pea fekauʻaki mo e faʻahinga ʻoku nau ʻalu atu ke tauʻi ʻa e kau Kalitiá, ʻo fakafonu ai ʻa e ngaahi feituʻú ni ʻaki ʻa e ngaahi ʻangaʻanga ʻo e faʻahinga naʻá ku taaʻi ʻi heʻeku ʻitá mo ʻeku tuputāmakí, ʻa e faʻahinga ʻa ia ko ʻenau koví kuó ne ʻai au ke u fufū ʻa hoku matá mei he koló ni: 6 ‘Ko eni te u toe fakaake mo ʻai ia ke ne moʻui lelei,+ pea te u faitoʻo kinautolu mo fakahaaʻi kiate kinautolu ha melino lahi pea mo e moʻoni.+ 7 Pea te u fakafoki mai ʻa e kau pōpula ʻo Siutá mo e kau pōpula ʻo ʻIsilelí,+ pea te u langa hake kinautolu ʻo hangē ko ia naʻá ku fai ʻi he kamatá.+ 8 Pea te u fakamaʻa kinautolu mei he hia kotoa ʻi heʻenau faiangahala kiate aú,+ pea te u fakamolemoleʻi ʻa e hia kotoa ʻi heʻenau faiangahala mo ʻenau laka hala kiate aú.+ 9 Pea te ne hoko ko ha hingoa fakatupu fiefia, mo ha tupuʻanga ʻo e fakahīkihiki, mo ha lāngilangiʻanga ʻoʻoku ʻi he ʻao ʻo e ngaahi puleʻanga kotoa ʻo e māmaní ʻa ia te nau fanongo ʻi he lelei kotoa ʻoku ou foaki kiate kinautolú.+ Pea te nau tailiili pea tetetete+ koeʻuhí ko e lelei kotoa mo e melino te u foaki kiate iá.’”+
10 “Ko e folofola eni ʻa Sihová: ‘ʻI he feituʻu ko eni ʻa ia te mou pehē ko ha feituʻu lala ia, ʻo ʻikai ʻi ai ha tangata pe ko ha manú, ʻi he ngaahi kolo ʻo Siuta pea ʻi he ngaahi hala ʻo Selusalema ʻa ia ʻoku maomaonganoa ʻo ʻikai ʻi ai ha tangata pe ha taha ʻe nofo ai pe ko ha manú, ʻe toe fanongoa ai 11 ʻa e leʻo ʻo e fiefia mo e leʻo ʻo e mavava,+ ʻa e leʻo ʻo e tangata malí mo e leʻo ʻo e taʻahine malí, pea mo e leʻo ʻo e faʻahinga ʻoku nau pehē: “Fakamālō kia Sihova ʻo e ngaahi kau tau, he ko Sihová ʻoku lelei ia;+ ko ʻene ʻofa mateakí ʻoku tolonga ʻo taʻengata!”’+
“‘Te nau ʻomi ha ngaahi feilaulau fakafetaʻi ki he fale ʻo Sihová,+ he te u fakafoki mai ʻa e kau pōpula ʻo e fonuá, ʻo hangē ko ia ʻi he kamatá,’ ko e folofola ia ʻa Sihová.”
12 “Ko e folofola eni ʻa Sihova ʻo e ngaahi kau tau: ‘ʻI he feituʻu lala ko eni, ʻoku ʻikai ʻi ai ha tangata pe ko ha manú, mo e kotoa ʻo hono ngaahi koló, ʻe toe ʻi ai ʻa e ngaahi kaikaiʻanga ki he kau tauhi-sipí ke mālōlō ai ʻenau ngaahi tākangá.’+
13 “‘ʻI he ngaahi kolo ʻo e feituʻu moʻungaʻiá, ʻi he ngaahi kolo ʻo e talaló, ʻi he ngaahi kolo ʻo e tongá, ʻi he fonua ʻo Penisimaní, ʻi he ngaahi feituʻu takatakai ʻo Selusalemá,+ pea ʻi he ngaahi kolo ʻo Siutá,+ ʻe toe ʻalu atu ai ʻa e ngaahi tākangá ʻi he lalo nima ʻo e tokotaha ʻokú ne lau kinautolú,’ ko e folofola ia ʻa Sihová.”
14 “‘Vakai! ʻOku haʻu ʻa e ngaahi ʻaho,’ ko e fakahaaʻi ia ʻe Sihová, ‘ʻa ia te u fakahoko ai ʻa e talaʻofa lelei naʻá ku leaʻaki ʻo fekauʻaki mo e fale ʻo ʻIsileli mo e fale ʻo Siutá.+ 15 ʻI he ngaahi ʻaho ko iá pea ʻi he taimi ko iá te u ʻai ai ke tupu hake moʻo Tēvita ha huli*+ māʻoniʻoni, pea te ne fakahoko ʻa e fakamaau totonú mo e māʻoniʻoní ʻi he fonuá.+ 16 ʻI he ngaahi ʻaho ko iá ʻe fakahaofi ai ʻa Siuta+ pea ʻe nofo malu+ ʻa Selusalema. Pea ko e hingoa eni ʻe uiʻaki iá: Ko Sihova ʻa Hotau Māʻoniʻoniʻangá.’”+
17 “He ko e folofola eni ʻa Sihová: ‘ʻE ʻikai ʻaupito ke taʻehoko hake ha tangata mei he laine ʻo Tēvitá ki he taloni ʻo e fale ʻo ʻIsilelí,+ 18 pea ʻe ʻikai ʻaupito ke taʻeʻiai ha tangata ʻi he kau taulaʻeiki Līvaí ʻe tuʻu ʻi hoku ʻaó ke ʻohake ʻa e ngaahi feilaulau tutu kakató, pea ke tutu ʻa e ngaahi feilaulau meʻakaí, pea mo ʻohake ʻa e ngaahi feilaulaú.’”
19 Pea naʻe toe hoko mai ʻa e folofola ʻa Sihová kia Selemaia, ʻo pehē: 20 “Ko e folofola eni ʻa Sihová, ‘Kapau ʻe lava ke mou maumauʻi ʻeku fuakava ʻo fekauʻaki mo e ʻahó pea mo ʻeku fuakava ʻo fekauʻaki mo e poʻulí, ke taʻofi ʻa e ʻahó mo e poʻulí mei heʻena hoko mai ʻi hona taimi totonú,+ 21 ko e toki taimi pē ia ʻe lava ke maumauʻi ai ʻa ʻeku fuakava mo ʻeku sevāniti ko Tēvitá,+ ke ʻikai hano foha ʻe pule ko ha tuʻi ʻi hono taloní,+ pea pehē pē ki heʻeku fuakava mo e kau taulaʻeiki Līvaí, ʻa ʻeku kau sevānití.+ 22 Hangē pē ko e ʻikai lava ke lau ʻa e ngaahi kongakau ʻo e langí mo ʻikai lava ke fua ʻa e ʻoneʻone ʻo e tahí, ʻe pehē ʻa ʻeku fakatokolahi ʻa e hako ʻo ʻeku sevāniti ko Tēvitá pea mo e kau Līvai ʻoku nau tauhi kiate aú.’”
23 Pea naʻe toe hoko mai ʻa e folofola ʻa Sihová kia Selemaia, ʻo pehē: 24 “ʻOku ʻikai koā te ke fakatokangaʻi ʻa e meʻa ʻoku leaʻaki ʻe he kakaí ni, ‘ʻE siʻaki ʻe Sihova ʻa e ongo fāmili naʻá ne filí’? Pea ʻoku nau taʻetokaʻi ʻa hoku kakaí, pea ʻoku ʻikai te nau kei lau kinautolu ko ha puleʻanga.
25 “Ko e folofola eni ʻa Sihová: ‘Hangē pē ko ʻeku fokotuʻu maʻu ʻa ʻeku fuakava ʻo fekauʻaki mo e ʻahó pea mo e poʻulí,+ mo e ngaahi lao* ʻo e langí mo e māmaní,+ 26 ʻe pehē pē ʻa e ʻikai ʻaupito te u siʻaki ʻa e hako ʻo Sēkopé mo e hako ʻo ʻeku sevāniti ko Tēvitá, pea te u toʻo mei hono hakó ha faʻahinga ke pule ki he ngaahi hako ʻo ʻĒpalahame, ʻAisake, mo Sēkopé. He te u tānaki fakataha mai ʻa ʻenau kau pōpulá+ pea te u manavaʻofa kiate kinautolu.’”+
34 Ko e folofola eni naʻe hoko mai kia Selemaia meia Sihova, ʻi he taimi naʻe hanga ai ʻe Tuʻi Nepukanesa* ʻo Pāpiloné mo ʻene kau taú kotoa mo e puleʻanga kotoa ʻo e māmaní ʻa ia naʻe ʻi he malumalu ʻo ʻene pulé pea mo e ngaahi kakaí kotoa ʻo tauʻi ʻa Selusalema mo e kotoa ʻo hono ngaahi koló:+
2 “Ko e folofola eni ʻa Sihova ko e ʻOtua ʻo ʻIsilelí, ‘ʻAlu ʻo lea kia Tuʻi Setekaia+ ʻo Siutá ʻo tala ange ki ai: “Ko e folofola eni ʻa Sihová, ‘Ko eni ʻoku ou tuku atu ʻa e koló ni ki he nima ʻo e tuʻi ʻo Pāpiloné, pea te ne tutu ia ʻaki ʻa e afi.+ 3 Pea ʻe ʻikai te ke hao mei hono nimá, he ko e moʻoni ʻe puke koe ʻo ʻave kiate ia.+ Pea te ke sio mata ki he mata ki he tuʻi ʻo Pāpiloné pea te ke lea hangatonu kiate ia, pea te ke ʻalu ki Pāpilone.’+ 4 Kae kehe, fanongo ki he folofola ʻa Sihová, ʻe Tuʻi Setekaia ʻo Siutá, ‘Ko e folofola eni ʻa Sihova ʻo fekauʻaki mo koé: “ʻE ʻikai te ke mate ʻi he heletaá. 5 Te ke mate fiemālie,+ pea te nau fai ha ouau tutu ʻinisēnisi kiate koe ʻo hangē ko ia naʻa nau fai ki hoʻo ngaahi tamaí, ʻa e ngaahi tuʻi ki muʻa ʻiate koé, pea te nau tengihia koe ʻo pehē, ‘ʻOiauē, ʻa homau tuʻi!’ He ‘kuó u leaʻaki ʻa e leá ni,’ ko e fakahaaʻi ia ʻe Sihová.”’”’”
6 Naʻe leaʻaki leva ʻe he palōfita ko Selemaiá ʻa e ngaahi leá ni kotoa kia Tuʻi Setekaia ʻo Siutá ʻi Selusalema, 7 ʻi he taimi naʻe tauʻi ai ʻe he kau tau ʻa e tuʻi ʻo Pāpiloné ʻa Selusalema pea mo e kotoa ʻo e ngaahi kolo ʻo Siuta naʻe kei toé,+ ʻa Lākisi+ mo ʻĀseka;+ he ko e ongo kolo fakakolotau pē ia naʻe kei toe ʻi he ngaahi kolo ʻo Siutá.
8 Naʻe hoko mai ʻa e folofola meia Sihova kia Selemaia ʻi he hili hono fai ʻe Tuʻi Setekaia ha fuakava mo e kakai kotoa pē ʻi Selusalemá ke fanongonongo ha tauʻatāina kiate kinautolu,+ 9 ʻo pehē ko e tokotaha kotoa te ne fakatauʻatāinaʻi ʻene kau tamaioʻeiki Hepeluú, ʻa e tangata mo e fefine, koeʻuhi ke ʻoua naʻa kei tauhi ʻe ha taha ʻa hono kaungā-Siú ko haʻane tamaioʻeiki. 10 Ko ia naʻe talangofua ʻa e kotoa ʻo e kau houʻeikí pea mo e kotoa ʻo e kakaí. Naʻa nau kau ki he fuakava ke fakatauʻatāinaʻi ʻe he tokotaha kotoa ʻa ʻene tamaioʻeiki mo ʻene kaunanga ʻo ʻoua ʻe kei tauhi kinautolu ko ʻenau kau tamaioʻeiki. Naʻa nau talangofua ʻo tuku ange kinautolu ke nau ō. 11 Kae kehe, naʻa nau toe fakafoki mai ki mui ʻa e kau tamaioʻeiki mo e kau kaunanga ko ia naʻa nau fakatauʻatāinaʻí, pea naʻa nau toe fakamālohiʻi kinautolu ke fai ʻa e ngāue fakatamaioʻeikí. 12 Ko ia naʻe hoko mai ʻa e folofola ʻa Sihová kia Selemaia meia Sihova tonu, ʻo pehē:
13 “Ko e folofola eni ʻa Sihova ko e ʻOtua ʻo ʻIsilelí, ‘Naʻá ku fai ha fuakava mo hoʻomou fanga kuí+ ʻi he ʻaho naʻá ku ʻomi ai kinautolu mei he fonua ko ʻIsipité, mei he fale fakapōpulá,+ ʻo pehē: 14 “ʻI he ngataʻanga ʻo ha taʻu ʻe fitu, ʻe fakatauʻatāinaʻi ʻe he tokotaha taki taha ʻo kimoutolu ʻa hono tokoua Hepelū ʻa ia naʻe fakatau atu kiate koé pea kuó ne ngāue kiate koe ʻi he taʻu ʻe ono; kuo pau ke ke fakatauʻatāinaʻi ia.”+ Ka naʻe ʻikai ke fanongo pe fokotuʻu telinga mai ʻa hoʻomou fanga kuí kiate au. 15 Pea ki muí ni mai* naʻa mou tafoki ʻo fai ʻa e meʻa naʻe totonu ʻi heʻeku vakaí ʻi hono fanongonongo ʻa e tauʻatāina ki homou faʻahingá, pea naʻa mou fai ha fuakava ʻi hoku ʻaó ʻi he fale ʻoku uiʻaki ʻa hoku hingoá. 16 Ka naʻa mou toe tafoki ʻo taʻefakamāʻoniʻoniʻi ʻa hoku hingoá+ ʻaki hono fakafoki mai hoʻomou kau tamaioʻeiki mo hoʻomou kau kaunanga ʻa ē naʻa mou fakatauʻatāinaʻi ʻo fakatatau ki heʻenau fiemaʻú, pea naʻa mou toe fakamālohiʻi kinautolu ke fai ʻa e ngāue fakatamaioʻeikí.’
17 “Ko ia ai, ko e folofola eni ʻa Sihová: ‘Kuo ʻikai te mou talangofua kiate au ʻi hono fanongonongo ʻa e tauʻatāiná, ʻe he tokotaha taki taha ki hono tokoua pea ki hono kaungāʻapi.+ Ko ia ko e tauʻatāina leva eni te u fanongonongo atu kiate kimoutolú,’ ko e fakahaaʻi ia ʻe Sihová, ‘te mou mate ʻi he heletā, ʻi he mahaki fakaʻauha,* pea ʻi he honge,+ pea te u ʻai kimoutolu ke mou hoko ko ha meʻa ke fakalilifuʻia ai ʻa e ngaahi puleʻanga kotoa ʻo e māmaní.+ 18 Pea ko e meʻa leva eni ʻe hoko ki he kau tangata naʻa nau maumauʻi ʻeku fuakavá ʻaki ʻa e ʻikai te nau fakahoko ʻa e ngaahi lea ʻo e fuakava naʻa nau fai ʻi hoku ʻaó ʻi he taimi naʻa nau fahi ua ai ʻa e ʻuhikiʻi pulú pea nau fou atu ʻi he vahaʻa ʻo hono ongo kongá,+ 19 ʻa ia, ko e houʻeiki ʻo Siutá, mo e houʻeiki ʻo Selusalemá, mo e kau ʻōfisa ʻo e lotoʻaá, mo e kau taulaʻeikí, pea mo e kakai kotoa ʻo e fonuá ʻa ia naʻa nau fou atu ʻi he vahaʻa ʻo e ongo konga ʻo e ʻuhikiʻi pulú: 20 Te u tuku atu kinautolu ki honau ngaahi filí pea ki he faʻahinga ʻoku nau kumi ke toʻo ʻenau moʻuí, pea ko honau ngaahi ʻangaʻangá ʻe hoko ko e meʻakai ʻa e fanga manupuna ʻo e langí pea mo e fanga manu ʻo e māmaní.+ 21 Pea te u tuku atu ʻa Tuʻi Setekaia ʻo Siutá pea mo ʻene kau houʻeikí ki he nima ʻo honau ngaahi filí pea ki he nima ʻo e faʻahinga ʻoku nau kumi ke toʻo ʻenau moʻuí pea ki he nima ʻo e kau tau ʻa e tuʻi ʻo Pāpiloné,+ ʻa ia ʻoku nau holomui meiate kimoutolú.’+
22 “‘Ko eni te u fai ʻa e tuʻutuʻuni,’ ko e fakahaaʻi ia ʻe Sihová, ‘pea te u fakafoki mai kinautolu ki he koló ni pea te nau tauʻi ia ʻo hamu pea tutu ʻaki ʻa e afi;+ pea te u ʻai ʻa e ngaahi kolo ʻo Siutá ke hoko ko ha potu lala ʻo ʻikai nofo ai ha taha.’”+
35 Naʻe hoko mai ʻa e folofola meia Sihova kia Selemaia ʻi he ngaahi ʻaho ʻo Sihoiakimi+ ko e foha ʻo Siosaia, ko e tuʻi ʻo Siutá, ʻo pehē: 2 “ʻAlu ki he fale ʻo e kau Lēkapí+ ʻo lea kiate kinautolu pea ʻomi kinautolu ki he fale ʻo Sihová, ki he taha ʻo e ngaahi loki kaí;* pea ʻoange kiate kinautolu ha uaine ke nau inu.”
3 Ko ia naʻá ku ʻave ʻa Siasanaia ko e foha ʻo Selemaia ko e foha ʻo Hapasiniá, mo hono fanga tokouá, mo e kotoa ʻo hono ngaahi fohá, pea mo e fale kotoa ʻo e kau Lēkapí 4 ki he fale ʻo Sihová. Naʻá ku ʻomi kinautolu ki he loki kai ʻo e ngaahi foha ʻo Hānani ko e foha ʻo ʻIketalaia, ko ha tangata ʻa e ʻOtua moʻoní, ʻa ia naʻe tuʻu ʻo hoko atu ki he loki kai ʻo e kau houʻeikí ʻa ia naʻe ʻi ʻolunga ʻi he loki kai ʻo Māseia ko e foha ʻo Salumi ko e tokotaha leʻo matapaá. 5 Pea naʻá ku tuku ha ngaahi ipu mo ha ngaahi ipu lalahi ʻoku fonu ʻi he uainé ʻi he ʻao ʻo e kau tangata ʻo e fale ʻo e kau Lēkapí peá u pehē kiate kinautolu: “Mou inu uaine.”
6 Ka naʻa nau pehē mai: “Heʻikai te mau inu uaine, koeʻuhi ko Sionatapi*+ ko e foha ʻo Lēkapi, ko ʻemau kuí, naʻá ne ʻomi kiate kimautolu ʻa e tuʻutuʻuni ko ení, ‘Ko kimoutolu mo homou ngaahi fohá kuo pau ke ʻoua ʻaupito naʻa mou inu uaine. 7 Pea kuo pau ke ʻoua naʻa mou langa ha fale, tūtuuʻi ha tenga, pe tō pe ko hono maʻu ha ngoue kālepi. ʻI hono kehé, kuo pau ke mou nofo tēniti maʻu pē, koeʻuhí ke mou nofo ʻo fuoloa ʻi he fonua ʻoku mou nofo muli aí.’ 8 Ko ia te mau hokohoko atu ke talangofua ki he leʻo ʻo Sionatapi ko e foha ʻo ʻemau kui ko Lēkapí ʻi he kotoa ʻo e meʻa naʻá ne tuʻutuʻuni kiate kimautolú, ʻaki ʻa e ʻikai ʻaupito ke mau inu ha uaine—ʻa kimautolu, mo homau ngaahi uaifí, mo homau ngaahi fohá, pea mo homau ngaahi ʻofefiné. 9 Pea ʻoku ʻikai te mau langa ha ngaahi fale ke mau nofo ai, pea ʻoku ʻikai te mau maʻu ha ngaahi ngoue kālepi pe ko ha ngaahi konga kelekele pe ko ha tengaʻi ʻakau. 10 ʻOku mau hanganaki nofo tēniti pē mo talangofua ki he meʻa kotoa naʻe tuʻutuʻuni mai kiate kimautolu ʻe Sionatapi* ko ʻemau kuí. 11 Ka ʻi he taimi naʻe haʻu ai ʻa Tuʻi Nepukanesa* ʻo Pāpiloné ke tauʻi ʻa e fonuá,+ naʻa mau pehē, ‘Mou haʻu ke tau ʻalu ki Selusalema ke tau hao mei he kau tau ʻa e kau Kalitiá mo e kau Sīliá,’ pea ʻi he taimi ní ʻoku mau nofo ʻi Selusalema.”
12 Pea naʻe hoko mai ʻa e folofola ʻa Sihová kia Selemaia, ʻo pehē: 13 “Ko e folofola eni ʻa Sihova ʻo e ngaahi kau tau, ko e ʻOtua ʻo ʻIsilelí, ‘ʻAlu ʻo lea ki he kau tangata ʻo Siutá pea ki he kakai ʻo Selusalemá: “ʻIkai naʻe toutou enginaki atu kiate kimoutolu ke mou talangofua ki heʻeku ngaahi leá?”+ Ko e fakahaaʻi ia ʻe Sihová. 14 “Ko Sionatapi ko e foha ʻo Lēkapí naʻá ne tuʻutuʻuni ki hono hakó ke ʻoua te nau inu uaine, pea kuo nau fakahoko ʻene ngaahi leá ʻaki ʻa e ʻikai ke nau inu uaine ʻo aʻu mai ki he ʻahó ni, ʻo nau talangofua ai ki he tuʻutuʻuni ʻa ʻenau kuí.+ Kae kehe, kuó u toutou lea* kiate kimoutolu, ka kuo ʻikai ke mou talangofua kiate au.+ 15 Pea naʻá ku hanganaki fekauʻi atu ʻa e kotoa ʻo ʻeku kau sevāniti ko e kau palōfitá kiate kimoutolu, ʻo toutou fekauʻi*+ atu, ʻo pehē, ‘Mou tafoki mai muʻa, ʻa e tokotaha taki taha ʻo kimoutolu mei homou ngaahi ʻalunga koví,+ ʻo fai ʻa e meʻa ʻoku totonú! ʻOua te mou muimui ki he ngaahi ʻotua kehé ʻo tauhi kiate kinautolu. Pea te mou nofo ai pē ʻi he fonua naʻá ku foaki kiate kimoutolu pea ki hoʻomou fanga kuí.’+ Ka naʻe ʻikai te mou fokotuʻu telinga mai pe fanongo mai kiate au. 16 Ko e hako ʻo Sionatapi ko e foha ʻo Lēkapí kuo nau fakahoko ʻa e tuʻutuʻuni naʻe ʻoange kiate kinautolu ʻe heʻenau kuí,+ ka ko e kakaí ni kuo ʻikai te nau fanongo mai kiate au.”’”
17 “Ko ia ai, ko e folofola eni ʻa Sihova, ko e ʻOtua ʻo e ngaahi kau tau, ko e ʻOtua ʻo ʻIsilelí: ‘Ko eni ʻoku ou ʻomi ki Siuta pea ki he kakai kotoa ʻo Selusalemá ʻa e faingataʻa kotoa naʻá ku fakatokanga ʻo fekauʻaki mo ia kiate kinautolú,+ he kuó u lea kiate kinautolu, ka naʻe ʻikai te nau fanongo, pea naʻá ku hanganaki ui kiate kinautolu, ka naʻe ʻikai te nau fai mai ha tali.’”+
18 Pea naʻe pehē ʻe Selemaia ki he fale ʻo e kau Lēkapí: “Ko e folofola eni ʻa Sihova ʻo e ngaahi kau tau, ko e ʻOtua ʻo ʻIsilelí, ‘Koeʻuhi kuo mou talangofua ki he tuʻutuʻuni ʻa hoʻomou kui ko Sionatapí pea ʻoku mou hokohoko atu hono tauhi ʻa e kotoa ʻo ʻene ngaahi tuʻutuʻuní, ʻo fai ʻa e meʻa tofu pē ko ia naʻá ne tuʻutuʻuni atu kiate kimoutolú, 19 ko e folofola eni ʻa Sihova ʻo e ngaahi kau tau, ko e ʻOtua ʻo ʻIsilelí: “ʻE ʻikai ʻaupito ke taʻeʻiai ha hako ʻo Sionatapi* ko e foha ʻo Lēkapí ʻe ngāue ʻi hoku ʻaó.”’”
36 Pea ko eni ʻi he taʻu hono fā ʻo e pule ʻa Sihoiakimi+ ko e foha ʻo Siosaia, ko e tuʻi ʻo Siutá, naʻe hoko mai ai kia Selemaia ʻa e folofola ʻa Sihova, ʻo pehē: 2 “Toʻo ha takainga tohi* pea hiki ai ʻa e ngaahi lea kotoa kuó u leaʻaki kiate koe ʻo fekauʻaki mo ʻIsileli mo Siuta+ pea mo e kotoa ʻo e ngaahi puleʻangá,+ mei he ʻuluaki ʻaho naʻá ku lea ai kiate koe ʻi he ngaahi ʻaho ʻo Siosaiá ʻo aʻu mai ki he ʻahó ni.+ 3 Mahalo pē ʻi he taimi ʻe fanongo ai ʻa e faʻahinga ʻo e fale ʻo Siutá ki he faingataʻa kotoa ʻoku ou fakakaukau ke ʻomi kiate kinautolú, te nau tafoki nai ai mei honau ngaahi ʻalunga koví, ko ia ʻe lava ke u fakamolemoleʻi ʻenau faihalá pea mo ʻenau angahalá.”+
4 Naʻe ui leva ʻe Selemaia ʻa Paluki+ ko e foha ʻo Nelaiá, pea naʻe lau ange ʻe Selemaia ka ne tohi ʻa e ngaahi lea kotoa naʻe folofolaʻaki ʻe Sihova kiate iá, pea naʻe hiki ia ʻe Paluki ʻi ha takainga tohi.*+ 5 Pea naʻe tuʻutuʻuni leva ʻa Selemaia kia Paluki: “ʻOku tauhi pōpula au pea ʻoku ʻikai te u lava ʻo hū ki he fale ʻo Sihová. 6 Ko ia ko koe ʻa e tokotaha kuo pau ke ke hū ʻo lau leʻo-lahi ʻa e folofola ʻa Sihová mei he takainga tohi naʻá ku lau atu ʻo ke hikí. Lau ia ke fanongo ki ai ʻa e kakaí ʻi he fale ʻo Sihová ʻi he ʻaho ʻo ha ʻaukai; ko ia te ke lau ia ki he kakai kotoa ʻo Siuta naʻa nau haʻu mei honau ngaahi koló. 7 ʻE aʻu nai ai kia Sihova ʻa ʻenau kole ki ha hōifuá, pea te nau foki mai, ʻa e tokotaha taki taha mei hono ngaahi ʻalunga kovi, he ʻoku lahi ʻa e tuputāmaki mo e houhau kuo fakahaaʻi ʻe Sihova ʻe hoko ki he kakaí ni.”
8 Ko ia naʻe fai ʻe Paluki ko e foha ʻo Nelaiá ʻa e meʻa kotoa naʻe tuʻutuʻuni ange ʻe he palōfita ko Selemaiá kiate iá; naʻá ne lau leʻo-lahi mei he takainga tohí* ʻa e folofola ʻa Sihová ʻi he fale ʻo Sihová.+
9 Ko eni ʻi he taʻu hono nima ʻo e pule ʻa Sihoiakimi+ ko e foha ʻo Siosaiá, ʻa e tuʻi ʻo Siutá, ʻi he māhina hono hivá, ko e kakai kotoa ʻi Selusalemá mo e kakai kotoa naʻa nau haʻu ki Selusalema mei he ngaahi kolo ʻo Siutá naʻa nau fanongonongo ha ʻaukai ʻi he ʻao ʻo Sihová.+ 10 Naʻe lau leʻo-lahi leva ʻe Paluki mei he takainga tohí* ʻa e ngaahi lea ʻa Selemaiá ʻi he fale ʻo Sihová, ʻi he loki* ʻo Kemalaia+ ko e foha ʻo Sāfani+ ko e tokotaha hiki-tataú,* ʻi he lotoʻā ʻi ʻolungá, ʻi he hūʻanga ʻo e matapā foʻou ʻo e fale ʻo Sihová,+ ʻo fanongo ki ai ʻa e kakaí kotoa.
11 ʻI he fanongo ʻa Maikaia ko e foha ʻo Kemalaia ko e foha ʻo Sāfaní ki he kotoa ʻo e folofola ʻa Sihová mei he takainga tohí,* 12 naʻá ne ʻalu hifo ki he fale* ʻo e tuʻí, ki he loki ʻo e sekelitalí. Naʻe tangutu kotoa ai ʻa e kau houʻeikí:* Ko ʻElisama+ ko e sekelitalí, Telaia ko e foha ʻo Semaiá, ʻElinatani+ ko e foha ʻo ʻAkepoá,+ Kemalaia ko e foha ʻo Sāfaní, Setekaia ko e foha ʻo Henaniá, pea mo e kotoa ʻo e kau houʻeiki kehé. 13 Naʻe tala ange ʻe Maikaia kiate kinautolu ʻa e lea kotoa naʻá ne fanongo ki aí ʻi he taimi naʻe lau ai ʻe Paluki mei he takainga tohí* ʻo fanongo ki ai ʻa e kakaí.
14 Naʻe fekauʻi atu leva ʻe he kotoa ʻo e kau houʻeikí ʻa Sehuti ko e foha ʻo Nētanaia ko e foha ʻo Selemia ko e foha ʻo Kasí kia Paluki, ʻo pehē: “Haʻu peá ke toʻo mai ʻa e takainga tohi ʻa ia naʻá ke lau ʻo fanongo ki ai ʻa e kakaí.” Naʻe toʻo ʻe Paluki ko e foha ʻo Nelaiá ʻa e takainga tohí ʻi hono nimá peá ne hū atu kiate kinautolu. 15 Naʻa nau pehē ange kiate ia: “Kātaki ʻo tangutu hifo, peá ke lau leʻo-lahi mai ia kiate kimautolu.” Ko ia naʻe lau ia ʻe Paluki kiate kinautolu.
16 ʻI he hili pē ko ia ʻenau fanongo ki he kotoa ʻo e ngaahi leá ni, naʻa nau fesiofaki ʻi he ilifia, pea naʻa nau pehē kia Paluki: “Kuo pau moʻoni ke mau fakahā ki he tuʻí ʻa e kotoa ʻo e ngaahi leá ni.” 17 Pea naʻa nau ʻeke ange kia Paluki: “Tala mai muʻa kiate kimautolu, pe naʻe anga-fēfē ʻa hoʻo hiki ʻa e kotoa ʻo e ngaahi leá ni. Naʻá ne lau atu ia ka ke hiki?” 18 Naʻe tali ange ʻe Paluki kiate kinautolu: “Naʻá ne lau mai ʻa e ngaahi leá ni kotoa kiate au, pea naʻá ku hiki ia ʻaki ʻa e vaitohi ʻi he takainga tohi* ko ení.” 19 Naʻe pehē ange ʻe he kau houʻeikí kia Paluki: “Mo ō ʻo toi, ʻa koe mo Selemaia, pea ʻoua naʻa tuku ke ʻilo ʻe ha taha ʻa e feituʻu ʻokú mo ʻi aí.”+
20 Naʻa nau hū atu leva ki he tuʻí, ki he lotoʻaá, ʻo tuku ʻa e takainga tohí ʻi he loki ʻo ʻElisama ko e sekelitalí, pea naʻa nau fakahā ki he tuʻí ʻa e meʻa kotoa naʻa nau fanongo ki aí.
21 Ko ia naʻe fekauʻi atu ʻe he tuʻí ʻa Sehuti+ ke ʻomi ʻa e takainga tohí, pea naʻá ne ʻomi ia mei he loki ʻo ʻElisama ko e sekelitalí. Naʻe kamata ke lau ia ʻe Sehuti ʻo fanongo ki ai ʻa e tuʻí mo e kau houʻeiki kotoa naʻa nau tuʻu ʻi he tafaʻaki ʻo e tuʻí. 22 Naʻe ʻafio ʻa e tuʻí ʻi hono fale ki he faʻahitaʻu momokó, ʻi he māhina hono hivá,* pea naʻe ʻi hono ʻaó ha afi ʻoku ulo ʻi hono tuʻuʻangá. 23 ʻI he hili hono lau ʻe Sehuti ha ʻotu ʻe tolu pe fā, naʻe tuʻusi ʻe he tuʻí ʻa e konga ko iá ʻaki ʻa e hele ʻa e sekelitalí pea lī ia ki he afi naʻe ulo ʻi hono tuʻuʻangá, kae ʻoua kuo ʻosi kotoa ʻa e takainga tohí ki he tuʻuʻanga afí. 24 Pea naʻe ʻikai haʻanau ongoʻi ilifia; ʻo aʻu ki he tuʻí mo ʻene kau sevāniti kotoa naʻa nau fanongo ki he ngaahi leá ni, naʻe ʻikai te nau hae honau kofú. 25 Neongo ʻa e kōlenga ʻa ʻElinatani,+ Telaia,+ mo Kemalaia+ ki he tuʻí ke ʻoua te ne tutu ʻa e takainga tohí, naʻe ʻikai te ne fanongo kiate kinautolu. 26 ʻIkai ko ia pē, naʻe tuʻutuʻuni ʻe he tuʻí kia Selamili ko e foha ʻo e tuʻí, Sēlaia ko e foha ʻo ʻAsililí, mo Selemia ko e foha ʻo ʻApitilí ke nau puke ʻa e sekelitali ko Palukí mo e palōfita ko Selemaiá, ka naʻe tauhi ʻo fufū kinaua ʻe Sihova.+
27 Pea naʻe toe hoko mai kia Selemaia ʻa e folofola ʻa Sihová ʻi he hili hono tutu ʻe he tuʻí ʻa e takainga tohi naʻe ʻi ai ʻa e ngaahi lea naʻe hiki ʻe Paluki ʻi hono lau ange ʻe Selemaiá,+ ʻo pehē: 28 “Toʻo ha takainga tohi ʻe taha ʻo hiki ai hono kotoa ʻa e ngaahi lea tatau tofu pē mo ia naʻe ʻi he ʻuluaki takainga tohí, ʻa ia naʻe tutu ʻe tuʻi Sihoiakimi ʻo Siutá.+ 29 Pea te ke lea kia Tuʻi Sihoiakimi ʻo Siutá, ‘Ko e meʻa eni ʻoku folofolaʻaki ʻe Sihová: “Kuó ke tutu ʻa e takainga tohí ni peá ke pehē, ‘Ko e hā kuó ke tohi ai ʻi ai: “Ko e tuʻi ʻo Pāpiloné ʻe haʻu moʻoni ʻo fakaʻauha ʻa e fonuá ni pea fakakaʻanga mei ai ʻa e tangatá mo e manú”?’+ 30 Ko ia ai, ko e meʻa eni ʻoku folofolaʻaki ʻe Sihova kia Tuʻi Sihoiakimi ʻo Siutá, ‘ʻE ʻikai ha taha meiate ia ʻe nofo ʻi he taloni ʻo Tēvitá,+ pea ʻe liʻaki hono ʻangaʻangá ʻi he vela ʻa e ʻahó mo e momoko ʻi he poʻulí.+ 31 Te u ui ia mo hono hakó mo ʻene kau sevānití ke nau fai ha fakamatala ʻo fekauʻaki mo ʻenau faihalá, pea te u ʻomi kiate kinautolu pea ki he kakai ʻo Selusalemá pea ki he kau tangata ʻo Siutá ʻa e faingataʻa kotoa kuó u leaʻaki kiate kinautolú,+ ka naʻe ʻikai te nau fanongo.’”’”+
32 Naʻe toʻo leva ʻe Selemaia ha takainga tohi ʻe taha ʻo ʻoange kia Paluki ko e foha ʻo Nelaiá, ʻa e sekelitalí,+ pea ko e lea naʻe lau ange ʻe Selemaiá naʻá ne hiki ai ʻa e ngaahi lea kotoa ʻo e takainga tohi* ʻa ia naʻe tutu ʻe Tuʻi Sihoiakimi ʻo Siutá ʻi he afí.+ Pea naʻe tānaki atu ki ai mo e ngaahi lea lahi ange hangē pē ko iá.
37 Pea ko Tuʻi Setekaia+ ko e foha ʻo Siosaiá naʻe kamata ke ne pule ʻo fetongi ʻa Konaia*+ ko e foha ʻo Sihoiakimí, he naʻe fakanofo ia ʻe Tuʻi Nepukanesa* ʻo Pāpiloné ke ne tuʻi ʻi he fonua ko Siutá.+ 2 Ka ko ia mo ʻene kau sevānití mo e kakai ʻo e fonuá naʻe ʻikai te nau fanongo ki he folofola ʻa Sihova naʻá ne folofolaʻaki ʻo fakafou ʻi he palōfita ko Selemaiá.
3 Pea naʻe fekauʻi atu ʻe Tuʻi Setekaia ʻa Sihukali+ ko e foha ʻo Selemiá mo Sēfanaia+ ko e foha ʻo Māseia ko e taulaʻeikí kia Selemaia ko e palōfitá, ʻo pehē: “Fai muʻa ha lotu kia Sihova ko hotau ʻOtuá maʻatautolu.” 4 Naʻe ʻalu tauʻatāina holo ʻa Selemaia ʻi he lotolotonga ʻo e kakaí, he naʻe teʻeki ai ke nau tuku ia ki he pilīsoné.+ 5 Pea naʻe ʻalu atu ʻa e kau tau ʻa Feló mei ʻIsipite,+ pea ko e kau Kalitiá ʻa ia naʻa nau ʻākoloʻi ʻa Selusalemá naʻa nau fanongo ʻi he fakamatala fekauʻaki mo kinautolú. Ko ia naʻa nau holomui ai mei Selusalema.+ 6 Naʻe hoko mai leva ʻa e folofola ʻa Sihová kia Selemaia ko e palōfitá, ʻo pehē: 7 “Ko e folofola eni ʻa Sihova ko e ʻOtua ʻo ʻIsilelí, ‘Ko e meʻa eni te mou leaʻaki ki he tuʻi ʻo Siutá, ʻa ia naʻá ne fekauʻi mai kimoutolu ke mou kumi faleʻi meiate aú: “Vakai! Ko e kau tau ʻa Felo ʻoku nau haʻu ke tokoniʻi kimoutolú kuo pau ke nau foki ki honau fonuá, ki ʻIsipite.+ 8 Pea ko e kau Kalitiá te nau foki mai ʻo tauʻi ʻa e koló ni pea hamu ia mo tutuʻaki ʻa e afi.”+ 9 Ko e folofola eni ʻa Sihová, “ʻOua te mou kākaaʻi kimoutolu ʻaki ʻa e pehē, ‘Kuo pau ke ʻalu ʻa e kau Kalitiá meiate kitautolu,’ koeʻuhí heʻikai te nau ʻalu. 10 Neongo kapau te mou taaʻi ʻa e kau tau fakakātoa ʻa e kau Kalitiá ʻa ia ʻoku nau tauʻi kimoutolú pea ko ʻenau kau tangata kafó pē ʻe toé, te nau kei tuʻu hake pē mei honau ngaahi tēnití ʻo tutu ʻa e koló ni ʻaki ʻa e afi.”’”+
11 ʻI he holomui ʻa e kau tau Kalitiá mei hono tauʻi ʻo Selusalema koeʻuhi ko e kau tau ʻa Feló,+ 12 naʻe ʻalu atu ʻa Selemaia mei Selusalema ki he fonua ʻo Penisimaní+ ke maʻu hono ʻinasi ʻi ai ʻi he lotolotonga ʻo hono kakaí. 13 Ka ʻi heʻene aʻu ki he Matapā ʻo Penisimaní, ko e ʻōfisa pule ʻo e kaʻaté, ʻa ia ko hono hingoá ko ʻIlaia ko e foha ʻo Selemia ko e foha ʻo Henaniá, naʻá ne puke ʻa Selemaia ko e palōfitá ʻo ne pehē ange: “ʻOkú ke hola ki he kau Kalitiá!” 14 Ka naʻe pehē ange ʻe Selemaia: “ʻOku ʻikai ke moʻoni ia! ʻOku ʻikai te u hola ki he kau Kalitiá.” Ka naʻe ʻikai te ne fanongo kiate ia. Ko ia naʻe puke ai ʻe ʻIlaia ʻa Selemaia ʻo ne ʻomi ia ki he kau houʻeikí. 15 Naʻe ʻita lahi ʻa e kau houʻeikí ʻia Selemaia,+ ʻo nau haha ia pea tuku pilīsone*+ ʻi he fale ʻo Sihonatani ko e sekelitalí, ʻa ia naʻe ngaohi ko ha pilīsone. 16 Naʻe tuku ʻa Selemaia ki he pilīsone ʻi lolofonua,* ki he ngaahi loki pōpulá, pea naʻá ne nofo ai pē ʻi he ngaahi ʻaho lahi.
17 Naʻe fai atu leva ʻe Tuʻi Setekaia ha fekau ke ʻomi ia, pea naʻe fakafehuʻi fakapulipuli ia ʻe he tuʻí ʻi hono falé.*+ Naʻá ne ʻeke ange, “ʻOku ʻi ai ha folofola meia Sihova?” Naʻe pehē ange ʻe Selemaia, “ʻOku ʻi ai,” pea naʻá ne hoko atu, “ʻE tuku atu koe ki he nima ʻo e tuʻi ʻo Pāpiloné!”+
18 Naʻe toe pehē ange ʻe Selemaia kia Tuʻi Setekaia: “Ko e hā ha angahala kuó u fai kiate koe pea ki hoʻo kau sevānití pea ki he kakaí ni, kuo mou tuku ai au ki he pilīsoné? 19 Ko fē leva ʻa hoʻomou kau palōfita ʻa ia naʻa nau kikite atu kiate kimoutolu ʻo pehē, ‘Heʻikai haʻu ʻa e tuʻi ʻo Pāpiloné ʻo tauʻi kimoutolu pea mo e fonuá ni’?+ 20 Ko eni fanongo mai muʻa, ʻe hoku ʻeiki ko e tuʻí. ʻOfa ke ke tali muʻa ʻa ʻeku kole ki ha hōifuá. ʻOua te ke fakafoki au ki he fale ʻo Sihonatani+ ko e sekelitalí, telia naʻá ku mate ai.”+ 21 Ko ia naʻe fai ʻe Tuʻi Setekaia ha tuʻutuʻuni ke tauhi pōpula ʻa Selemaia ʻi he Lotoʻā Kaʻaté,+ pea naʻe ʻoange fakaʻaho kiate ia ha foʻi mā mei he hala ʻo e kau taʻo maá+ kae ʻoua kuo ʻosi kotoa ʻa e mā ʻi he koló.+ Pea naʻe nofo ai pē ʻa Selemaia ʻi he Lotoʻā Kaʻaté.
38 Pea ko Sefataia ko e foha ʻo Mātaní, Ketalaia ko e foha ʻo Pasuá, Sukali+ ko e foha ʻo Selemiá, mo Pasua+ ko e foha ʻo Malakaiá naʻa nau fanongo ki he ngaahi lea naʻe fai ʻe Selemaia ki he kakaí kotoa, ʻo pehē: 2 “Ko e folofola eni ʻa Sihová, ‘Ko e tokotaha ʻoku toe ʻi he koló ni te ne mate ʻi he heletā, ʻi he honge, pea ʻi he mahaki fakaʻauha.*+ Ka ko e tokotaha ʻoku tukulolo* ki he kau Kalitiá ʻe hokohoko atu ʻene moʻuí pea te ne maʻu ʻa ʻene moʻuí ko ha koloa vete* ʻo ne moʻui.’+ 3 Ko e folofola eni ʻa Sihová, ‘Ko e moʻoni ʻe tuku atu ʻa e koló ni ki he kau tau ʻa e tuʻi ʻo Pāpiloné, pea te ne hamu ia.’”+
4 Naʻe pehē ange ʻe he houʻeikí ki he tuʻí: “Tāmateʻi muʻa ʻa e tangatá ni,+ he ko e anga eni ʻo ʻene fakavaivaiʻi ʻa e loto* ʻo e kau sōtia ʻoku toe ʻi he koló ni pea pehē ki he loto ʻo e kakaí kotoa, ʻaki ʻene fai ʻa e ngaahi lea ko iá kiate kinautolu. He ʻoku kumi ʻa e tangatá ni, ʻo ʻikai ki he melino ʻa e kakaí ni, ka ki haʻanau kovi.” 5 Naʻe tali ange ʻe Tuʻi Setekaia: “Vakai! ʻOkú ne ʻi homou ʻaofinimá, he ʻoku ʻikai lava ke fai ʻe he tuʻí ha meʻa ʻe taha ke taʻofi kimoutolu.”
6 Ko ia naʻa nau ʻave ʻa Selemaia ʻo lī ia ki he lepa ʻo Malakaia ko e foha ʻo e tuʻí, ʻa ia naʻe ʻi he Lotoʻā Kaʻaté.+ Naʻa nau tukutuku hifo ʻa Selemaia ʻaki ha maea. Pea naʻe ʻikai ha vai ʻi he lepá, ko e pelepela pē, pea naʻe kamata ke ngoto hifo ʻa Selemaia ʻi he pelepelá.
7 Ko ʻĒpeti-meleki+ ko e ʻItiopeá, ko ha ʻiunoke* ʻi he fale* ʻo e tuʻí, naʻá ne fanongo kuo nau tuku ʻa Selemaia ki he lepá. Pea ko e tuʻí naʻe ʻafio ʻi he Matapā ʻo Penisimaní,+ 8 ko ia naʻe ʻalu atu ʻa ʻĒpeti-meleki mei he fale* ʻo e tuʻí ʻo ne lea ki he tuʻí, ʻo pehē: 9 “ʻE hoku ʻeiki ko e tuʻí, ko e meʻa kuo fai ʻe he kau tangatá ni kia Selemaia ko e palōfitá ʻoku kovi! Kuo nau lī ia ki he lepá, pea te ne mate ai koeʻuhi ko e hongé, he ʻoku ʻikai ke toe ha mā ʻi he koló.”+
10 Naʻe tuʻutuʻuni leva ʻa e tuʻí kia ʻĒpeti-meleki ko e ʻItiopeá: “ʻAlu mo koe ha kau tangata ʻe toko 30 mei heni ʻo fusi hake ʻa Selemaia ko e palōfitá mei he lepá ʻi he teʻeki ai ke ne maté.” 11 Ko ia naʻe ʻalu ʻa ʻĒpeti-meleki mo e kau tangatá ʻo nau hū ki he fale* ʻo e tuʻí ki ha feituʻu ʻi lalo ʻi he tukuʻanga koloá,+ ʻo nau toʻo mei ai ha ngaahi konga tupenu liʻaki mo ha ngaahi konga tupenu motuʻa pea tukutuku hifo ia ʻaki ha maea kia Selemaia ki he lepá. 12 Pea naʻe pehē ange ʻe ʻĒpeti-meleki ko e ʻItiopeá kia Selemaia: “ʻAi muʻa ʻa e ngaahi konga tupenu liʻakí mo e ngaahi konga tupenu motuʻá ki he vahaʻa ho faʻifiné mo e maeá.” Pea naʻe fai ia ʻe Selemaia, 13 pea naʻa nau ʻohake ʻa Selemaia ʻaki ʻa e maeá ʻo fusi hake ia mei he lepá. Pea naʻe nofo ai pē ʻa Selemaia ʻi he Lotoʻā Kaʻaté.+
14 Naʻe fekauʻi atu ʻe Tuʻi Setekaia kia Selemaia ko e palōfitá ke ne haʻu kiate ia ki he hūʻanga hono tolú, ʻa ia ʻoku ʻi he fale ʻo Sihová, pea naʻe pehē ange ʻe he tuʻí kia Selemaia: “ʻOku ʻi ai ha meʻa ʻoku ou fie ʻeke atu kiate koe. ʻOua naʻá ke fufū ha meʻa ʻe taha meiate au.” 15 Naʻe pehē ange leva ʻe Selemaia kia Setekaia: “Kapau te u tala atu, ko e moʻoni te ke tāmateʻi au. Pea kapau te u fai atu ha faleʻi kiate koe, ʻe ʻikai te ke fanongo mai kiate au.” 16 Ko ia naʻe fai ʻe Tuʻi Setekaia ha fuakava fakapulipuli kia Selemaia, ʻo pehē: “ʻOku ou fuakava ʻia Sihova ko e ʻOtua moʻuí, ʻa ia kuó ne foaki mai kiate kitaua ʻa e moʻuí ni, heʻikai te u tāmateʻi koe pea heʻikai te u tuku atu koe ki he kau tangata ko eni ʻoku nau kumi ke toʻo ʻa hoʻo moʻuí.”
17 Naʻe pehē ange leva ʻe Selemaia kia Setekaia: “Ko e folofola eni ʻa Sihova, ko e ʻOtua ʻo e ngaahi kau tau, ko e ʻOtua ʻo ʻIsilelí, ‘Kapau te ke tukulolo* ki he kau houʻeiki ʻa e tuʻi ʻo Pāpiloné, ʻe fakahaofi ʻa hoʻo moʻuí, pea heʻikai ke tutu ʻa e koló ni ʻaki ʻa e afi, pea ko koe mo ho falé ʻe fakahaofi.+ 18 Ka ʻo kapau heʻikai te ke tukulolo* ki he kau houʻeiki ʻa e tuʻi ʻo Pāpiloné, ʻe tuku atu ʻa e koló ni ki he kau Kalitiá pea te nau tutu ia ʻaki ʻa e afi,+ pea heʻikai te ke hao mei honau nimá.’”+
19 Naʻe pehē ange leva ʻe Tuʻi Setekaia kia Selemaia: “ʻOku ou ilifia ki he kau Siu kuo nau hola ki he kau Kalitiá, he kapau ʻe tuku atu au kiate kinautolu, te nau fakamamahiʻi au.” 20 Ka naʻe pehē ange ʻe Selemaia: “ʻE ʻikai ke tuku atu koe kiate kinautolu. Talangofua muʻa ki he leʻo ʻo Sihová ʻi he meʻa ʻoku ou tala atu kiate koé, pea ʻe lelei ia kiate koe, pea ʻe hokohoko atu ai ʻa hoʻo moʻuí. 21 Ka ʻo kapau te ke fakafisi ke tukulolo,* ko e meʻa eni kuo fakahaaʻi mai ʻe Sihova kiate aú: 22 Vakai! Ko e kakai fefine kotoa ʻoku toe ʻi he fale* ʻo e tuʻi ʻo Siutá ʻoku ʻoatu kinautolu ki he kau houʻeiki ʻa e tuʻi ʻo Pāpiloné,+ pea ʻoku nau pehē,
‘Ko e kau tangata naʻá ke falala ki aí* kuo nau kākaaʻi koe pea ikuʻi koe.+
Kuo nau ʻai ho vaʻé ke ngoto hifo ʻi he pelepelá.
Pea ko eni kuo nau holomui.’
23 Pea ʻoku nau ʻave ho ngaahi uaifí kotoa mo ho ngaahi fohá ki he kau Kalitiá, pea heʻikai te ke hao mei honau nimá, ka ʻe puke koe ʻe he tuʻi ʻo Pāpiloné,+ pea koeʻuhí ko koe ʻe tutu ʻa e koló ni ʻaki ʻa e afi.”+
24 Naʻe pehē ange leva ʻe Setekaia kia Selemaia: “ʻOua naʻá ke tuku ke ʻilo ha taha ʻo fekauʻaki mo e ngaahi meʻá ni, koeʻuhí ke ʻoua naʻá ke mate. 25 Pea kapau ʻe fanongo ʻa e kau houʻeikí kuó u talanoa mo koe pea nau omi ʻo pehē atu kiate koe, ‘Tala mai muʻa kiate kimautolu ʻa e meʻa naʻá ke leaʻaki ki he tuʻí. ʻOua naʻá ke fufū ha meʻa ʻe taha meiate kimautolu, pea heʻikai te mau tāmateʻi koe.+ Ko e hā naʻe tala atu ʻe he tuʻí kiate koé?’ 26 Kuo pau ke ke tali kiate kinautolu, ‘Naʻá ku fai ha kole ki he tuʻí ke ʻoua naʻá ne fakafoki au ki he fale ʻo Sihonataní ke u mate ai.’”+
27 Naʻe faifai pē pea haʻu ʻa e houʻeikí kotoa kia Selemaia ʻo nau fakafehuʻi ia. Naʻá ne tala ange kiate kinautolu ʻa e meʻa kotoa pē naʻe fekauʻi ange ʻe he tuʻí ke ne leaʻakí. Ko ia naʻe ʻikai te nau toe lea kiate ia, he naʻe ʻikai ke fanongo ha taha ki he fetalanoaʻakí. 28 Naʻe nofo ai pē ʻa Selemaia ʻi he Lotoʻā Kaʻaté,+ ʻo aʻu ki he ʻaho naʻe hamu ai ʻa Selusalemá; naʻá ne kei ʻi ai pē ʻi he taimi naʻe hamu ai ʻa Selusalemá.+
39 ʻI he taʻu hono hiva ʻo e pule ʻa Tuʻi Setekaia ʻo Siutá, ʻi he māhina hono hongofulú, naʻe haʻu ai ʻa Tuʻi Nepukanesa* ʻo Pāpiloné mo ʻene kau taú kotoa ki Selusalema, ʻo nau ʻākoloʻi ia.+
2 ʻI he taʻu hono 11 ʻo e pule ʻa Setekaiá, ʻi he māhina hono faá, ʻi he ʻaho hono hiva ʻo e māhiná, naʻa nau avangi ai ʻa e ʻā ʻo e koló.+ 3 Pea naʻe hū atu ʻa e kau houʻeiki kotoa ʻa e tuʻi ʻo Pāpiloné ʻo tangutu ʻi he Matapā ʻi Lotó,+ ʻa ia, ko Nelikala-salesa ko e Samiká, Nipo-sasekimi ko e Lapisalisí,* Nelikala-salesa ko e Lapimakí,* pea mo e toenga kotoa ʻo e kau houʻeiki ʻa e tuʻi ʻo Pāpiloné.
4 ʻI he sio atu ʻa Tuʻi Setekaia ʻo Siutá mo e kau sōtiá kotoa kiate kinautolú, naʻa nau hola,+ ʻo nau hū ki tuʻa mei he koló ʻi he poʻulí ʻi he veʻe ngoue ʻa e tuʻí, ʻo fou atu ʻi he matapā ʻi he vahaʻa ʻo e ongo ʻaá, pea nau hoko atu ai ʻi he hala ʻo e ʻAlapá.+ 5 Ka naʻe tulimui atu ʻiate kinautolu ʻa e kau tau Kalitiá, ʻo nau maʻu ʻa Setekaia ʻi he toafa ʻo Sielikoó.+ Naʻa nau puke ia ʻo ʻave kia Tuʻi Nepukanesa* ʻo Pāpiloné ki Līpila+ ʻi he fonua ko Hēmatí,+ ʻa ia naʻá ne hilifaki ai ha tautea kiate ia. 6 Naʻe fekauʻi ʻe he tuʻi ʻo Pāpiloné ke tāmateʻi ʻa e ngaahi foha ʻo Setekaiá ʻi hono ʻaó ʻi ai ʻi Līpila, pea naʻe fekauʻi ʻe he tuʻi ʻo Pāpiloné ke tāmateʻi ʻa e kau houʻeiki kotoa ʻo Siutá.+ 7 Pea naʻá ne fakakuihi ʻa e mata ʻo Setekaiá, ʻi he hili iá naʻá ne haʻi ia ʻaki ʻa e meʻa-haʻi kopa ke ʻave ia ki Pāpilone.+
8 Naʻe tutu leva ʻe he kau Kalitiá ʻa e fale* ʻo e tuʻí mo e ngaahi fale ʻo e kakaí,+ pea naʻa nau holoki ʻa e ngaahi ʻā ʻo Selusalemá.+ 9 Naʻe ʻave fakamālohi ʻe Nepusaletani+ ko e pule ʻo e kau kaʻaté ki Pāpilone ʻa e toenga ʻo e kakai naʻe toe ʻi he koló, mo e faʻahinga naʻe mavahe kiate iá, pea mo ha taha pē naʻe toe.
10 Ka ko Nepusaletani ko e pule ʻo e kau kaʻaté naʻá ne tuku ʻi he fonua ko Siutá ʻa e niʻihi ʻo e kakai masiva tahá, ʻa kinautolu naʻe halaʻatā haʻanau meʻá. ʻI he ʻaho ko iá naʻá ne ʻoange foki kiate kinautolu ha ngaahi ngoue kālepi mo ha ngaahi ngoue ke nau ngāue ai.*+
11 Pea ko Tuʻi Nepukanesa* ʻo Pāpiloné naʻá ne ʻoange kia Nepusaletani ko e pule ʻo e kau kaʻaté ʻa e ngaahi tuʻutuʻuni ko ení ʻo fekauʻaki mo Selemaia: 12 “ʻAve ia pea tokangaʻi ia; ʻoua naʻa fai ha kovi kiate ia, pea ʻoange ha meʻa pē ʻokú ne kole atu kiate koe.”+
13 Ko ia naʻe fekauʻi atu ʻe Nepusaletani ko e pule ʻo e kau kaʻaté, Nepusasepani ko e Lapisalisí,* Nelikala-salesa ko e Lapimakí,* mo e kau tangata tuʻu-ki-muʻa kotoa pē ʻa e tuʻi ʻo Pāpiloné 14 ke ʻomi ki tuʻa ʻa Selemaia mei he Lotoʻā Kaʻaté+ pea tuku atu ia kia Ketalaia+ ko e foha ʻo ʻAhikami+ ko e foha ʻo Sāfaní+ ke ʻave ki hono falé. Ko ia naʻá ne nofo ʻi he lotolotonga ʻo e kakaí.
15 Lolotonga hono tauhi pōpula ʻa Selemaia ʻi he Lotoʻā Kaʻaté,+ naʻe hoko mai kiate ia ʻa e folofola ʻa Sihová, ʻo pehē: 16 “ʻAlu ʻo tala kia ʻĒpeti-meleki+ ko e ʻItiopeá, ‘Ko e folofola eni ʻa Sihova ʻo e ngaahi kau tau, ko e ʻOtua ʻo ʻIsilelí: “Ko eni ʻoku ou fakahoko ʻeku ngaahi lea ki he koló ni ki ha kovi ʻo ʻikai ki ha lelei, pea ʻi he ʻaho ko iá te ke sio ʻi heʻene hokó.”’
17 “‘Ka te u fakahaofi koe ʻi he ʻaho ko iá,’ ko e fakahaaʻi ia ʻe Sihová, ‘pea ʻe ʻikai ke tuku atu koe ki he kau tangata ʻokú ke manavahē ki aí.’
18 “‘He ko e moʻoni te u tokonaki atu kiate koe ha haoʻanga, pea heʻikai te ke tō ʻi he heletaá. Te ke maʻu ʻa hoʻo moʻuí ko ha koloa vete,*+ koeʻuhí naʻá ke falala kiate au,’+ ko e fakahaaʻi ia ʻe Sihová.”
40 Naʻe hoko mai kia Selemaia ʻa e folofola meia Sihova ʻi he hili hono fakatauʻatāinaʻi ia mei Lama+ ʻe Nepusaletani+ ko e pule ʻo e kau kaʻaté. Naʻá ne ʻave ia ki ai kuo kiiʻi hono nimá, pea naʻá ne ʻi he lotolotonga ʻo e kotoa ʻo e kau ʻave fakamālohi ʻo Selusalema mo Siuta ʻa ia naʻe kapusi ki Pāpiloné. 2 Naʻe ʻave leva ʻe he pule ʻo e kau kaʻaté ʻa Selemaia peá ne pehē ange kiate ia: “Ko Sihova ko ho ʻOtuá naʻá ne tomuʻa tala ʻa e kovi ko ení ki he feituʻú ni, 3 pea kuo fakahoko ia ʻe Sihova ʻo hangē tofu pē ko ia naʻá ne folofolaʻakí, koeʻuhí ko e kakai ko kimoutolú kuo mou faiangahala kia Sihova pea ʻikai te mou talangofua ki hono leʻó. Ko e ʻuhinga ia kuo hoko ai ʻa e meʻá ni kiate kimoutolú.+ 4 Ko eni ʻoku ou tuku ange koe ʻi he ʻahó ni mei hono kiiʻi ho nimá. Kapau ʻe hā lelei kiate koe ke ta ō ki Pāpilone, haʻu, pea te u tokangaʻi koe. Ka ʻo kapau heʻikai te ke fie ʻalu mo au ki Pāpilone pea ʻoua te ke haʻu. Sio atu! Ko e fonuá kotoa ena. ʻAlu atu ki ha feituʻu pē te ke fili ki aí.”+
5 Lolotonga ʻoku teʻeki ke tafoki ʻa Selemaiá, naʻe pehē ange ʻe Nepusaletani: “Foki kia Ketalaia+ ko e foha ʻo ʻAhikami+ ko e foha ʻo Sāfaní,+ ʻa ia kuo fakanofo ʻe he tuʻi ʻo Pāpiloné ke pule ki he ngaahi kolo ʻo Siutá, peá ke nofo mo ia ʻi he lotolotonga ʻo e kakaí; pe ko hoʻo ʻalu ki ha feituʻu pē te ke fili ki ai.”
Naʻe ʻoange leva ʻe he pule ʻo e kau kaʻaté kiate ia ha meʻakai mo ha meʻaʻofa pea tuku ange ia ke ne ʻalu. 6 Ko ia naʻe ʻalu ʻa Selemaia kia Ketalaia ko e foha ʻo ʻAhikamí ki Misipā+ peá ne nofo mo ia ʻi he lotolotonga ʻo e kakai naʻe toe ʻi he fonuá.
7 ʻI he faai atu ʻa e taimí naʻe fanongo ʻa e kau ʻeikitau kotoa naʻa nau ʻi he fonuá mo ʻenau kau tangatá kuo fakanofo ʻe he tuʻi ʻo Pāpiloné ʻa Ketalaia ko e foha ʻo ʻAhikamí ke pule ʻi he fonuá pea kuó ne fakanofo ia ke pule ki he kau tangata, mo e kau fefine, pea mo e fānau mei he kakai masiva ʻo e fonuá ʻa ia naʻe ʻikai ke kapusi ki Pāpiloné.+ 8 Ko ia naʻa nau haʻu kia Ketalaia ki Misipā.+ Ko ʻIsimeʻeli+ ko e foha ʻo Nētanaiá, ko Siohānani+ mo Sionatane ko e ongo foha ʻo Kaleá, ko Sēlaia ko e foha ʻo Tanumetí, ko e ngaahi foha ʻo ʻĒfai ko e tangata Netofá, mo Sīsanaia+ ko e foha ʻo e tangata Māká, fakataha mo ʻenau kau tangatá. 9 Naʻe fai ʻe Ketalaia ko e foha ʻo ʻAhikami ko e foha ʻo Sāfaní ha fuakava kiate kinautolu mo ʻenau kau tangatá, ʻo pehē: “ʻOua naʻa mou ilifia ʻi he tauhi ki he kau Kalitiá. Mou nofo ʻi he fonuá pea tauhi ki he tuʻi ʻo Pāpiloné, pea te mou lelei.+ 10 Ka kiate au, te u nofo pē ʻi Misipā ke fakafofongaʻi kimoutolu ki he* kau Kalitia te nau haʻu kiate kitautolú. Ka ʻoku totonu ke mou tānaki ha uaine, mo e fuaʻiʻakau ʻo e faʻahitaʻu māfaná, mo e lolo pea tuku ia ki hoʻomou ngaahi siaá pea nofo ʻi he ngaahi kolo kuo mou maʻú.”+
11 Pea ko e kau Siu kotoa naʻe ʻi Mōape, ʻĀmoni, pea mo ʻĪtomí, pea pehē ki he faʻahinga naʻa nau ʻi he kotoa ʻo e ngaahi fonua kehé, naʻa nau fanongo foki ʻi hono tuku ʻe he tuʻi ʻo Pāpiloné ha toenga ke nau nofo ʻi Siutá pea mo ʻene fakanofo ke pule kiate kinautolu ʻa Ketalaia ko e foha ʻo ʻAhikami ko e foha ʻo Sāfaní. 12 Ko ia naʻe kamata ke foki ʻa e kotoa ʻo e kau Siú mei he ngaahi feituʻu kotoa naʻe fakamovetevete atu ai kinautolú, ʻo nau haʻu ki he fonua ʻo Siutá kia Ketalaia ki Misipā. Pea naʻa nau tānaki ʻa e uainé mo e fuaʻiʻakau ʻo e faʻahitaʻu māfaná ʻo lahi ʻaupito.
13 Ko Siohānani ko e foha ʻo Kaleá mo e kotoa ʻo e kau ʻeikitau naʻe ʻi he fonuá naʻa nau haʻu kia Ketalaia ki Misipā. 14 Naʻa nau pehē kiate ia: “ʻOku ʻikai koā te ke ʻilo kuo fekauʻi ʻe Pealisi ko e tuʻi ʻo e kau ʻĀmoní,+ ʻa ʻIsimeʻeli ko e foha ʻo Nētanaiá ke ne tāmateʻi koe?”+ Ka naʻe ʻikai ke tui ʻa Ketalaia ko e foha ʻo ʻAhikamí kiate kinautolu.
15 Naʻe tala ange fakapulipuli leva ʻe Siohānani ko e foha ʻo Kaleá kia Ketalaia ʻi Misipā: “ʻOku ou loto ke u ʻalu atu ʻo taaʻi ʻa ʻIsimeʻeli ko e foha ʻo Nētanaiá, pea ʻe ʻikai ke ʻilo ki ai ha taha. Ko e hā ke ne tāmateʻi ai koé, pea ko e hā ke movetevete ai ʻa e kakai kotoa ʻo Siuta kuo nau fakatahataha mai kiate koé mo ʻauha ai ʻa e toenga ʻo Siutá?” 16 Ka naʻe tala ange ʻe Ketalaia+ ko e foha ʻo ʻAhikamí kia Siohānani ko e foha ʻo Kaleá: “ʻOua naʻá ke fai ʻa e meʻá ni, he ko e meʻa ʻokú ke leaʻaki ʻo fekauʻaki mo ʻIsimeʻelí ko ha loi ia.”
41 ʻI he māhina hono fitú, naʻe haʻu ai ʻa ʻIsimeʻeli+ ko e foha ʻo Nētanaia ko e foha ʻo ʻElisamá, ʻa ia naʻe haʻu mei he laine fakatuʻí* pea ko e taha ia ʻo e kau tangata tuʻu-ki-muʻa ʻa e tuʻí, mo e kau tangata kehe ʻe toko hongofulu kia Ketalaia ko e foha ʻo ʻAhikamí ki Misipā.+ Lolotonga ʻenau kai fakataha ʻi Misipaá, 2 naʻe tuʻu hake ʻa ʻIsimeʻeli ko e foha ʻo Nētanaiá mo e kau tangata ʻe toko hongofulu naʻe ʻiate iá ʻo nau taaʻi ʻa Ketalaia ko e foha ʻo ʻAhikami ko e foha ʻo Sāfaní ʻaki ʻa e heletā. Ko ia naʻá ne tāmateʻi ai ʻa e tokotaha naʻe fakanofo ʻe he tuʻi ʻo Pāpiloné ke pule ki he fonuá. 3 Naʻe taaʻi foki ʻe ʻIsimeʻeli ʻa e kau Siu kotoa naʻe ʻia Ketalaia ʻi Misipaá, pea pehē ki he kau sōtia Kalitia naʻe ʻi aí.
4 ʻI he ʻaho hono ua ʻi he hili hono tāmateʻi ʻa Ketalaiá ki muʻa ke ʻilo ki ai ha tahá, 5 naʻe omi ai ha kau tangata ʻe toko 80 mei Sīkemi,+ mei Sailo,+ pea mei Samēlia.+ Naʻe tele honau kavá, pea hae mo honau ngaahi kofú, pea naʻa nau tafatafaʻi kinautolu,+ pea naʻa nau toʻo mai ha ngaahi feilaulau meʻakai mo ha ʻinisēnisi hinehina+ ke ʻomi ki he fale ʻo Sihová. 6 Ko ia naʻe ʻalu atu ʻa ʻIsimeʻeli ko e foha ʻo Nētanaiá mei Misipā ke fakafetaulaki kiate kinautolu mo ne tangi pē ʻi heʻene ʻalu atú. ʻI heʻene fetaulaki mo kinautolú, naʻá ne pehē ange: “Mou omi kia Ketalaia ko e foha ʻo ʻAhikamí.” 7 Ka ʻi heʻenau hū ki he koló, naʻe tāmateʻi ai kinautolu ʻe ʻIsimeʻeli ko e foha ʻo Nētanaiá mo ʻene kau tangatá pea laku kinautolu ki he lepá.
8 Ka naʻe ʻi ai ha kau tangata ʻe toko hongofulu ʻiate kinautolu naʻa nau pehē kia ʻIsimeʻeli: “ʻOua te ke tāmateʻi kimautolu, he ʻoku ʻi ai haʻamau tukuʻanga meʻakai fufū ʻi he vaó ʻoku ʻi ai ʻa e uite, paʻale, lolo, pea mo e hone.” Ko ia naʻe ʻikai te ne tāmateʻi kinautolu fakataha mo honau fanga tokouá. 9 Pea naʻe laku ʻe ʻIsimeʻeli ʻa e ʻangaʻanga kotoa ʻo e kau tangata naʻá ne tāmateʻí ki ha fuʻu lepa, ko e lepa naʻe ngaohi ʻe Tuʻi ʻAsa koeʻuhí ko Tuʻi Paasa ʻo ʻIsilelí.+ Ko e lepa eni naʻe fakafonu ai ʻe ʻIsimeʻeli ko e foha ʻo Nētanaiá ʻa e kau tangata naʻe tāmateʻí.
10 Naʻe taki pōpula ʻe ʻIsimeʻeli ʻa e toenga kotoa ʻo e kakai ʻi Misipaá,+ ʻo kau ai ʻa e ngaahi ʻofefine ʻo e tuʻí mo e kakai kotoa naʻe toe ʻi Misipā ʻa ia naʻe tuku ʻe Nepusaletani ko e pule ʻo e kau kaʻaté ke tokangaʻi ʻe Ketalaia+ ko e foha ʻo ʻAhikamí. Naʻe taki pōpula kinautolu ʻe ʻIsimeʻeli ko e foha ʻo Nētanaiá ʻo ne ʻalu atu ke kolosi ki he kau ʻĀmoní.+
11 ʻI he fanongo ʻa Siohānani+ ko e foha ʻo Kaleá mo e kau ʻeikitau kotoa naʻe ʻiate iá ʻo fekauʻaki mo e kovi kotoa naʻe fai ʻe ʻIsimeʻeli ko e foha ʻo Nētanaiá, 12 naʻa nau ʻave ʻa e kau tangatá kotoa pea nau ʻalu atu ke faitau mo ʻIsimeʻeli ko e foha ʻo Nētanaiá, pea naʻa nau ʻilo ia ʻi he veʻe vai lahi* ʻi Kipioné.
13 Naʻe fiefia ʻa e kakai kotoa naʻe ʻia ʻIsimeʻelí ʻi heʻenau sio kia Siohānani ko e foha ʻo Kaleá pea mo e kau ʻeikitau kotoa naʻe ʻiate iá. 14 Pea ko e kakai kotoa naʻe taki pōpula ʻe ʻIsimeʻeli mei Misipaá+ naʻa nau tafoki ʻo ʻalu pea mo Siohānani ko e foha ʻo Kaleá. 15 Ka ko ʻIsimeʻeli ko e foha ʻo Nētanaiá pea mo e toko valu ʻo ʻene kau tangatá naʻa nau hola meia Siohānani ʻo nau ʻalu ki he kau ʻĀmoní.
16 Naʻe ʻave ʻe Siohānani ko e foha ʻo Kaleá mo e kau ʻeikitau kotoa naʻe ʻiate iá ʻa e toenga ʻo e kakai mei Misipaá, ʻa e faʻahinga naʻa nau fakahaofi meia ʻIsimeʻeli ko e foha ʻo Nētanaiá hili ʻene taaʻi ʻa Ketalaia+ ko e foha ʻo ʻAhikamí. Naʻa nau fakafoki mai ʻa e kau tangata, kau sōtia, kau fefine, mo e fānau, pea mo e kau ʻōfisa ʻo e lotoʻaá mei Kipione. 17 Ko ia naʻa nau ʻalu atu ʻo nofo ʻi he fale tali fononga ʻo Kīmamí ʻa ia ʻoku ofi ki Pētelihema,+ ko e taumuʻá ke nau ʻalu ki ʻIsipite+ 18 koeʻuhi ko e kau Kalitiá. He naʻa nau ilifia ʻiate kinautolu koeʻuhí kuo taaʻi ʻe ʻIsimeʻeli ko e foha ʻo Nētanaiá ʻa Ketalaia ko e foha ʻo ʻAhikamí, ʻa ia naʻe fakanofo ʻe he tuʻi ʻo Pāpiloné ke pule ki he fonuá.+
42 Pea ko e kau ʻeikitaú kotoa, mo Siohānani+ ko e foha ʻo Kaleá, Sīsanaia ko e foha ʻo Hōsaiá, pea mo e kotoa ʻo e kakaí, mei he siʻi taha ki he lahi taha, naʻa nau fakaofiofi atu 2 ʻo nau pehē kia Selemaia ko e palōfitá: “Fanongo mai muʻa, peá ke tali ʻa ʻemau kolé, peá ke fai ha lotu maʻamautolu kia Sihova ko ho ʻOtuá, maʻá e kotoa ʻo e toenga ko ení, he ko ha tokosiʻi pē mei he tokolahi ʻoku kei toé,+ ʻo hangē ko ia ʻokú ke sio ki aí. 3 ʻOfa ke tala mai ʻe Sihova ko ho ʻOtuá ʻa e hala ʻoku totonu ke mau fou aí pea mo e meʻa ʻoku totonu ke mau faí.”
4 Naʻe tali ange ʻe Selemaia ko e palōfitá kiate kinautolu: “Kuó u fanongo kiate kimoutolu, pea te u lotu kia Sihova ko homou ʻOtuá ʻo fakatatau ki hoʻomou kolé; pea ko e lea kotoa pē ʻe tali mai ʻaki ʻe Sihova kiate kimoutolú, te u tala atu kiate kimoutolu. Heʻikai te u taʻofi ha foʻi lea ʻe taha meiate kimoutolu.”
5 Naʻa nau tali ange kia Selemaia: “ʻOfa ke hoko ʻa Sihova ko ha fakamoʻoni totonu mo faitōnunga kiate kimautolu ʻo kapau heʻikai te mau fai ʻa e meʻa tofu pē ko ia ʻe fakahinohino mai ʻe Sihova ko ho ʻOtuá kiate kimautolu fakafou ʻiate koé. 6 Pe ʻe lelei pe kovi, te mau talangofua ki he leʻo ʻo Sihova ko hotau ʻOtuá, ʻa ia ʻoku mau fekauʻi koe ki aí, ke lelei kiate kimautolu koeʻuhi ko ʻemau talangofua ki he leʻo ʻo Sihova ko hotau ʻOtuá.”
7 Pea ʻi he ʻaho ʻe hongofulu mei ai naʻe hoko mai ʻa e folofola ʻa Sihová kia Selemaia. 8 Ko ia naʻá ne ui mai ʻa Siohānani ko e foha ʻo Kaleá pea mo e kau ʻeikitau kotoa naʻe ʻiate iá pea mo e kotoa ʻo e kakaí, mei he siʻi taha ki he lahi taha.+ 9 Naʻá ne pehē ange kiate kinautolu: “Ko e meʻa eni ʻoku folofolaʻaki ʻe Sihova ko e ʻOtua ʻo ʻIsilelí, ʻa ia naʻa mou fekau au ki ai ke fakahoko hoʻomou kole ki ha hōifua ʻi hono ʻaó: 10 ‘Kapau te mou nofo ai pē ʻi he fonuá ni, te u langa hake leva kimoutolu ʻo ʻikai holoki hifo, pea te u tō kimoutolu ʻo ʻikai taʻaki, he te u ongoʻi fakaʻiseʻisa* ʻi he fakatamaki kuó u ʻai ke hoko kiate kimoutolú.+ 11 ʻOua te mou ilifia koeʻuhi ko e tuʻi ʻo Pāpiloné, ʻa ia ʻoku mou manavahē ki aí.’+
“‘ʻOua te mou ilifia koeʻuhi ko ia,’ ko e fakahaaʻi ia ʻe Sihová, ‘he ʻoku ou ʻiate kimoutolu, ke fakamoʻui kimoutolu pea ke fakahaofi kimoutolu mei hono nimá. 12 Pea te u fakahaaʻi ʻa e meesi+ kiate kimoutolu, pea te ne meesi kiate kimoutolu ʻo fakafoki kimoutolu ki homou fonuá tonu.
13 “‘Ka ʻo kapau te mou pehē, “ʻIkai, ʻe ʻikai te mau nofo kimautolu ʻi he fonuá ni,” pea mou talangataʻa ki he leʻo ʻo Sihova ko homou ʻOtuá 14 ʻaki hoʻomou pehē, “ʻIkai, ka te mau ʻalu kimautolu ki he fonua ko ʻIsipité,+ ʻa ia heʻikai te mau mamata ai ki ha tau pe fanongo ki he leʻo ʻo e meʻaifí pe fiekaia ai ki ha mā; ko e feituʻu ia te mau nofo aí,” 15 fanongo mai leva ki he folofola ʻa Sihová, ʻe toenga ʻo Siutá. Ko e meʻa eni ʻoku folofolaʻaki ʻe Sihova ʻo e ngaahi kau tau, ko e ʻOtua ʻo ʻIsilelí: “Kapau ʻoku mou mātuʻaki fakapapauʻi ke mou ō ki ʻIsipite pea mou ō ke nofo ai,* 16 pea ko e heletā tofu pē ko ia ʻoku mou ilifia ki aí te ne maʻu kimoutolu ʻi ai ʻi he fonua ko ʻIsipité, pea ko e honge tofu pē ko ia ʻoku mou ilifia ki aí ʻe muimui atu ʻiate kimoutolu ki ʻIsipite, pea te mou mate ʻi ai.+ 17 Pea ko e kotoa ʻo e kau tangata ʻoku nau fakapapauʻi ke ō ki ʻIsipite ʻo nofo aí te nau mate ʻi he heletā, ʻi he honge, pea ʻi he mahaki fakaʻauha.* Heʻikai ha taha ʻo kinautolu ʻe hao pe hola mei he fakatamaki te u ʻomi kiate kinautolú.”’
18 “He ko e meʻa eni ʻoku folofolaʻaki ʻe Sihova ʻo e ngaahi kau tau, ko e ʻOtua ʻo ʻIsilelí: ‘Hangē tofu pē ko hono huaʻi hifo ʻo ʻeku ʻitá mo ʻeku tuputāmakí ki he kakai ʻo Selusalemá,+ ʻe pehē ʻa hono huaʻi hifo kiate kimoutolu ʻa ʻeku ʻitá ʻo kapau te mou ō ki ʻIsipite, pea te mou hoko ko ha meʻa ke fai ʻa e talatuki ki ai, ko ha meʻa ke fai ai ha fakalilifuʻia, ko ha mala, pea mo ha lumaʻanga,+ pea heʻikai ʻaupito te mou toe sio ʻi he feituʻú ni.’
19 “Kuo folofola ʻa Sihova kiate kimoutolu, ʻe toenga ʻo Siuta. ʻOua te mou ō ki ʻIsipite. ʻOku totonu ke mou ʻiloʻi papau kuó u fakatokanga kiate kimoutolu he ʻahó ni 20 ko hoʻomou faihalá ʻe mole ai hoʻomou moʻuí. He naʻa mou fekauʻi au kia Sihova ko homou ʻOtuá, ʻo pehē, ‘Fai ha lotu maʻamautolu kia Sihova ko hotau ʻOtuá, pea tala mai kiate kimautolu ʻa e meʻa kotoa pē ʻoku folofolaʻaki ʻe Sihova ko hotau ʻOtuá, pea te mau fai ia.’+ 21 Pea naʻá ku tala atu kiate kimoutolu he ʻahó ni, ka ʻe ʻikai te mou talangofua ki he leʻo ʻo Sihova ko homou ʻOtuá pe fai ha meʻa pē naʻá ne fekau mai kiate au ke tala atu kiate kimoutolu.+ 22 Ko ia ai, ke mou ʻiloʻi papau te mou mate ʻi he heletā, ʻi he honge, pea ʻi he mahaki fakaʻauha ʻi he feituʻu ʻoku mou holi ke mou ō ʻo nofo aí.”+
43 ʻI he ʻosi hono leaʻaki ʻe Selemaia ki he kakaí kotoa ʻa e ngaahi folofola kotoa ko eni meia Sihova ko honau ʻOtuá, ʻa e foʻi folofola kotoa naʻe fekauʻi ia ʻe Sihova ko honau ʻOtuá ke ne tala kiate kinautolú, 2 naʻe pehē ange ʻe ʻAsalaia ko e foha ʻo Hōsaiá, Siohānani+ ko e foha ʻo Kaleá, mo e kau tangata ʻafungi kotoa pē kia Selemaia: “Ko e meʻa ʻokú ke leaʻakí ko ha loi! Kuo ʻikai ke fekauʻi mai koe ʻe Sihova ko hotau ʻOtuá ke ke pehē, ‘ʻOua te mou ō ki ʻIsipite ʻo nofo ai.’ 3 Ka ko Paluki+ ko e foha ʻo Nelaiá ʻokú ne fakaʻaiʻai koe ke ke lea peheni kiate kimautolú, ke tuku atu kimautolu ki he kau Kalitiá, ke tāmateʻi kimautolu pe ke ʻave fakamālohi kimautolu ki Pāpilone.”+
4 Ko ia ko Siohānani ko e foha ʻo Kaleá mo e kau ʻeikitaú kotoa mo e kakaí kotoa naʻa nau talangataʻa ki he leʻo ʻo Sihová ke nau nofo pē ʻi he fonua ko Siutá. 5 Ka ko Siohānani ko e foha ʻo Kaleá mo e kau ʻeikitaú kotoa naʻa nau ō pea naʻa nau ʻave mo e toenga kotoa ʻo Siuta ʻa ia naʻa nau foki mai ke nofo ʻi he fonua ko Siutá mei he ngaahi puleʻanga kotoa naʻe fakamovetevete+ kinautolu ki aí. 6 Naʻa nau ʻave ʻa e kau tangata, ʻa e kau fefine, ʻa e fānau, ʻa e ngaahi ʻofefine ʻo e tuʻí, mo e tokotaha kotoa pē naʻe tuku ʻe Nepusaletani+ ko e pule ʻo e kau kaʻaté ʻia Ketalaia+ ko e foha ʻo ʻAhikami+ ko e foha ʻo Sāfaní,+ pea pehē kia Selemaia ko e palōfitá mo Paluki ko e foha ʻo Nelaiá. 7 Pea naʻa nau ō ki he fonua ko ʻIsipité, he naʻe ʻikai te nau talangofua ki he leʻo ʻo Sihová, pea naʻa nau ʻalu ʻo aʻu ki Tapanesa.+
8 Pea naʻe hoko mai ʻa e folofola ʻa Sihová kia Selemaia ʻi Tapanesa, ʻo pehē: 9 “Toʻo ʻi ho nimá ha ngaahi fuʻu maka, pea fūfuuʻi ia ʻi he faliki piliki ʻi he hūʻanga ki he fale ʻo Feló ʻi Tapanesá pea valiʻaki ia ʻa e sima ʻumea, ʻo sio ki ai ʻa e kau tangata Siú. 10 Peá ke pehē kiate kinautolu, ‘Ko e folofola eni ʻa Sihova ʻo e ngaahi kau tau, ko e ʻOtua ʻo ʻIsilelí: “Ko eni ʻoku ou fai ha fekau kia Nepukanesa* ko e tuʻi ʻo Pāpiloné, ʻa ʻeku sevānití,+ pea te u fokotuʻu ʻa hono taloní ʻi ʻolunga tonu ʻi he ngaahi maka ko eni kuó u fufuú, pea te ne falō hifo ki ai ʻa hono tēniti fakatuʻí.+ 11 Pea te ne haʻu ʻo taaʻi ʻa e fonua ko ʻIsipité.+ ʻIlonga ʻa ia ʻoku tuha mo ha mahaki fakatupu mate te ne mate ʻi he mahaki fakatupu maté, pea ʻilonga ʻa ia ʻoku tuha ke taki pōpulá ʻe taki pōpula, pea ʻilonga ʻa ia ʻoku tuha ke mate ʻi he heletaá ʻe mate ʻi he heletaá.+ 12 Pea te u tutu ʻa e ngaahi fale* ʻo e ngaahi ʻotua ʻo ʻIsipité ʻaki ʻa e afi,+ pea te ne tutu kinautolu pea taki pōpula kinautolu. Te ne takatakaiʻi ʻa e fonua ko ʻIsipité ʻiate ia ʻo hangē tofu pē ko hono takatakaiʻi ʻe ha tauhi-sipi ʻa hono kofú ʻiate iá, pea te ne mavahe mei ai ʻi he melino.* 13 Pea te ne haveki ʻa e ngaahi pou* ʻo Pete-semesi* ʻi he fonua ko ʻIsipité, pea te ne tutu ʻa e ngaahi fale* ʻo e ngaahi ʻotua ʻo ʻIsipité ʻaki ʻa e afi.”’”
44 Ko e folofola eni naʻe hoko kia Selemaia ʻo fekauʻaki mo e kotoa ʻo e kau Siu ʻoku nofo ʻi he fonua ko ʻIsipité,+ ʻa kinautolu ʻoku nofo ʻi Mikitoli,+ Tapanesa,+ Nofi*+ mo e fonua ko Patalosí,+ ʻo pehē: 2 “Ko e meʻa eni ʻoku folofolaʻaki ʻe Sihova ʻo e ngaahi kau tau, ko e ʻOtua ʻo ʻIsilelí, ‘Kuo mou vakai ki he faingataʻa kotoa naʻá ku ʻomi ki Selusalema+ mo e kotoa ʻo e ngaahi kolo ʻo Siutá, pea ʻi he ʻahó ni kuo nau ʻauha ʻo ʻikai ke nofo ai ha taha.+ 3 Ko hono ʻuhingá ko e ngaahi meʻa kovi naʻa nau fai ke fakaʻitaʻi aú ʻaki ʻenau ʻalu ʻo fai ʻa e ngaahi feilaulau+ mo tauhi ʻa e ngaahi ʻotua kehe naʻe ʻikai te nau ʻiloʻi, pehē kiate kimoutolu pe ko hoʻomou fanga kuí.+ 4 Naʻá ku hanganaki fekau atu kiate kimoutolu ʻa e kotoa ʻo ʻeku kau sevāniti ko e kau palōfitá, ʻo toutou fekauʻi* atu kinautolu, ʻo pehē: “ʻOua muʻa te mou fai ʻa e meʻa fakalielia ko eni ʻa ia ʻoku ou fehiʻa ki aí.”+ 5 Ka naʻe ʻikai te nau fanongo pe fokotuʻu telinga mai ʻo tafoki mei heʻenau faikoví ʻo tuku ʻa e faifeilaulau ki he ngaahi ʻotua kehé.+ 6 Ko ia naʻe lilingi atu ʻeku houhaú mo ʻeku tuputāmakí ʻo kakaha ʻi he ngaahi kolo ʻo Siutá mo e ngaahi hala ʻo Selusalemá, ʻo nau hoko ko e fokotuʻunga maumau mo lala, ʻo hangē ko ia ʻoku ʻi ai ʻi he ʻaho ní.’+
7 “Pea ko eni ʻa e meʻa ʻoku folofolaʻaki ʻe Sihova, ko e ʻOtua ʻo e ngaahi kau tau, ko e ʻOtua ʻo ʻIsilelí, ‘Ko e hā ʻoku mou fakatupunga ai ha fuʻu faingataʻa kiate kimoutolú, ʻa ia ʻe hoko ai ʻa e tangata mo e fefine kotoa, fānau mo e valevale, ʻo ʻauha mei Siuta, pea ʻikai hamou toengá? 8 Ko e hā ʻoku mou fakaʻitaʻi ai au ʻaki ʻa e ngaahi ngāue ʻa homou nimá ʻi hoʻomou faifeilaulau ki he ngaahi ʻotua kehe ʻi he fonua ko ʻIsipité ʻa ia kuo mou ʻalu atu ke nofo aí? Te mou ʻauha pea mou hoko ko ha meʻa ke fai ʻa e talatuki ki ai mo ha lumaʻanga ʻi he lotolotonga ʻo e ngaahi puleʻanga kotoa ʻo e māmaní.+ 9 Kuo ngalo koā ʻiate kimoutolu ʻa e ngaahi ngāue kovi ʻa hoʻomou fanga kuí mo e ngaahi ngāue kovi ʻa e ngaahi tuʻi ʻo Siutá+ mo e ngaahi ngāue kovi ʻa honau ngaahi uaifí,+ pea pehē ki hoʻomou ngaahi ngāue koví tonu mo e ngaahi ngāue kovi ʻa homou ngaahi uaifí,+ ʻa ia naʻe fai ʻi he fonua ko Siutá mo e ngaahi hala ʻo Selusalemá? 10 Kuo teʻeki ke nau fakatōkilaloʻi kinautolu* ʻo aʻu mai ki he ʻahó ni, kuo ʻikai te nau fakahaaʻi ha ilifia,+ pea kuo ʻikai te nau ʻaʻeva ʻi heʻeku laó mo ʻeku ngaahi tuʻutuʻuni naʻá ku fokotuʻu ʻi homou ʻaó mo hoʻomou fanga kuí.’+
11 “Ko ia ai, ko e folofola eni ʻa Sihova ʻo e ngaahi kau tau, ko e ʻOtua ʻo ʻIsilelí, ‘Ko au eni ʻoku ou fakapapauʻi ke ʻomi ha faingataʻa kiate kimoutolu, ke fakaʻauha ʻa e kotoa ʻo Siutá. 12 Pea te u ala atu ki he toenga ʻo Siutá, ʻa kinautolu naʻa nau fakapapauʻi ke ʻalu ʻo nofo ʻi he fonua ko ʻIsipité, pea te nau ʻauha kotoa ʻi he fonua ko ʻIsipité.+ Te nau tō ʻi he heletā pea ʻauha ʻi he honge; mei he siʻi taha ki he lahi taha, te nau mate ʻi he heletā mo e honge. Pea te nau hoko ko e meʻa ke fai ʻa e talatuki ki ai, ko ha meʻa ke fai ha fakalilifuʻia ai, mo ha mala, pea mo ha lumaʻanga.+ 13 Te u tautea ʻa kinautolu ʻoku nofo ʻi he fonua ko ʻIsipité ʻo hangē pē ko ʻeku tautea ʻa Selusalemá, ʻaki ʻa e heletā, mo e honge, pea mo e mahaki fakaʻauha.*+ 14 Pea ko e toenga ʻo Siuta ʻa ia kuo nau ō ʻo nofo ʻi he fonua ko ʻIsipité ʻe ʻikai te nau hao pe moʻui ke nau toe foki ki he fonua ʻo Siutá. Te nau holi ke nau toe foki ʻo nofo ai, ka ʻe ʻikai te nau foki, tuku kehe ha tokosiʻi pē ʻe hao.’”
15 Ko e kau tangata kotoa naʻa nau ʻilo kuo fai ʻe honau ngaahi uaifí ha ngaahi feilaulau ki he ngaahi ʻotua kehé, pea mo e ngaahi uaifi kotoa naʻa nau tuʻu ʻi aí, ʻa ia ko ha fuʻu kulupu tokolahi, pea mo e kotoa ʻo e kakai naʻa nau nofo ʻi he fonua ko ʻIsipité,+ ʻi Patalosí,+ naʻa nau tali kia Selemaia ʻo pehē: 16 “Heʻikai te mau fanongo ki he lea kuó ke leaʻaki kiate kimautolu ʻi he huafa ʻo Sihová. 17 ʻI hono kehé, ko e moʻoni te mau fai ki he lea kotoa pē kuo leaʻaki ʻe homau ngutú, ke fai ha ngaahi feilaulau ki he Kuini ʻo Hēvaní* pea lilingi ha ngaahi feilaulau inu kiate ia,+ ʻo hangē ko ia naʻa mau fai, mo ʻemau fanga kuí, mo homau ngaahi tuʻí, mo homau kau houʻeikí ʻi he ngaahi kolo ʻo Siutá pea ʻi he ngaahi hala ʻo Selusalemá ʻi he taimi naʻa mau mākona ai ʻi he mā pea mau tuʻumālié, pea ʻi he taimi naʻe ʻikai ke mau sio ai ʻi ha faingataʻa ʻe taha. 18 Kae talu ʻemau taʻofi ʻemau fai ʻa e ngaahi feilaulau ki he Kuini ʻo Hēvaní* mo lilingi ha ngaahi feilaulau inu kiate iá, kuo mau masiva ʻi he meʻa kotoa pea kuo mau ʻauha ʻi he heletā mo e honge.”
19 Naʻe toe pehē atu ʻe he kau fefiné: “Pea ʻi he taimi naʻa mau fai ai ʻa e ngaahi feilaulau ki he Kuini ʻo Hēvaní* mo lilingi ha ngaahi feilaulau inu kiate iá, ʻikai naʻe loto ki ai homau ngaahi husepānití ke mau ngaohi ha ngaahi mā feilaulau ʻo fakafuo ki hono ʻīmisí pea lilingi ha ngaahi feilaulau inu kiate ia?”
20 Naʻe pehē ange leva ʻe Selemaia ki he kotoa ʻo e kakaí, ki he kau tangatá mo honau ngaahi uaifí, mo e kotoa ʻo e kakai naʻa nau lea kiate iá: 21 “Ko e ngaahi feilaulau naʻa mou fai, mo hoʻomou fanga kuí, mo homou ngaahi tuʻí, mo homou kau houʻeikí, pea mo e kakai ʻo e fonuá ʻi he ngaahi kolo ʻo Siutá pea ʻi he ngaahi hala ʻo Selusalemá+—naʻe manatua ia ʻe Sihova pea naʻe toe ake hake ia ʻi hono lotó! 22 Faifai atu pē naʻe ʻikai ke kei kātakiʻi ʻe Sihova hoʻomou ngaahi tōʻonga koví mo e ngaahi meʻa fakalielia naʻa mou faí, pea naʻe hoko homou fonuá ko ha feituʻu maomaonganoa, mo ha meʻa ke fai ha fakalilifuʻia ai mo fai ha talatuki ki ai, ʻo ʻikai ha taha ʻe nofo ai, ʻo hangē ko ia ʻi he ʻaho ní.+ 23 Koeʻuhí kuo mou fai ʻa e ngaahi feilaulau ko ení pea koeʻuhi kuo mou faiangahala kia Sihova ʻi he ʻikai te mou talangofua ki he leʻo ʻo Sihová mo muimui ʻi heʻene laó, mo ʻene ngaahi tuʻutuʻuní, pea mo ʻene ngaahi fakamanatú ko ia kuo hoko ai kiate kimoutolu ʻa e faingataʻá ni, ʻo hangē ko ia ʻoku hoko ʻi he ʻaho ní.”+
24 Naʻe hoko atu ʻa e lea ʻa Selemaiá ki he kotoa ʻo e kakaí mo e kotoa ʻo e kau fefiné: “Fanongo ki he folofola ʻa Sihová, ʻa kimoutolu kotoa ʻo Siuta ʻoku ʻi he fonua ko ʻIsipité. 25 Ko e folofola eni ʻa Sihova ʻo e ngaahi kau tau, ko e ʻOtua ʻo ʻIsilelí, ‘Ko e meʻa kuo leaʻaki ʻe homou ngutú mo homou ngaahi uaifí, kuo mou fakahoko ia ʻaki homou nimá, he naʻa mou pehē: “Ko e moʻoni te mau fakahoko ʻemau ngaahi fuakava ke fai ha ngaahi feilaulau ki he Kuini ʻo Hēvaní* pea mo lilingi kiate ia ha ngaahi feilaulau inu.”+ Ko kimoutolu ʻa e kau fefiné ko e moʻoni te mou fakahoko ʻa hoʻomou ngaahi fuakavá mo fakaai ʻa hoʻomou ngaahi fuakavá.’
26 “Ko ia ai, fanongo ki he folofola ʻa Sihová, ʻa kimoutolu kotoa ʻo Siuta ʻoku nofo ʻi he fonua ko ʻIsipité: ‘“Ko eni ʻoku ou fuakava ʻi hoku hingoa lahí,” ko e folofola ia ʻa Sihová, “ʻe ʻikai ke kei fai ha ui ki hoku hingoá ʻi ha fuakava ʻa ha tangata pē ʻi Siuta+ ʻi he fonua kotoa ʻo ʻIsipité ʻo pehē, ‘ʻOku ou fuakava ʻi he ʻEiki Hau ko Sihová ʻa ia ʻoku moʻuí!’+ 27 Ko eni ʻoku ou siofi kinautolu ke ʻomi ki ai ha faingataʻa kae ʻikai ko ha lelei;+ ko e kau tangata kotoa ʻo Siuta ʻi he fonua ko ʻIsipité te nau ʻauha ʻi he heletā mo e honge, kae ʻoua kuo nau ʻosiʻosingamālie.+ 28 Ko ha tokosiʻi pē ʻe hao ʻi he heletaá pea foki mei he fonua ko ʻIsipité ki he fonua ko Siutá.+ Pea ko e toenga kotoa ʻo Siuta naʻe haʻu ki he fonua ko ʻIsipité ke nofo aí te nau ʻilo pe ko e lea ʻa hai kuo hoko moʻoní, ʻaʻakú pe ko ʻanautolú!”’”
29 “‘Pea ko e fakaʻilonga eni kiate kimoutolú,’ ko e fakahaaʻi ia ʻe Sihová, ‘te u tautea kimoutolu ʻi he feituʻú ni, koeʻuhi ke mou ʻilo ko ʻeku ngaahi lea ko ia naʻá ku fakapapau atu ʻo fekauʻaki mo e faingataʻa ʻe hoko kiate kimoutolú kuo pau ke hoko moʻoni ia. 30 Ko e meʻa eni ʻoku folofolaʻaki ʻe Sihová: “Ko au eni ʻoku ou tuku atu ʻa Felo Hōfila, ko e tuʻi ʻo ʻIsipité, ki he nima ʻo hono ngaahi filí mo kinautolu ʻoku nau kumi ke toʻo ʻa ʻene moʻuí, ʻo hangē pē ko ʻeku tuku atu ʻa Tuʻi Setekaia ʻo Siutá ki he nima ʻo Tuʻi Nepukanesa* ʻo Pāpiloné, ʻa ia ko hono filí pea ko ia naʻá ne kumi ke toʻo ʻa ʻene moʻuí.”’”+
45 Ko e lea eni naʻe fai ʻe Selemaia ko e palōfitá kia Paluki+ ko e foha ʻo Nelaiá ʻi he taimi naʻá ne hiki ai ʻi ha tohi ʻa e ngaahi lea ko eni naʻe lau atu ʻe Selemaia+ ʻi he taʻu hono fā ʻo e pule ʻa Sihoiakimi+ ko e foha ʻo Siosaia, ko e tuʻi ʻo Siutá:
2 “Ko e folofola eni ʻa Sihova ko e ʻOtua ʻo ʻIsilelí ʻo fekauʻaki mo koé, ʻe Paluki, 3 ‘Kuó ke pehē: “ʻOiauē ka ko kita, he kuo fakalahi mai ʻe Sihova ʻa e mamahi ki heʻeku mamahí! ʻOku ou fiu ʻi he toʻé, pea kuo ʻikai te u maʻu ha mālōlōʻanga.”’
4 “Te ke lea kiate ia, ‘Ko e folofola eni ʻa Sihová: “Vakai! Ko e meʻa kuó u langa haké ʻoku ou holoki, pea ko e meʻa kuó u toó ʻoku ou taʻaki—ʻa e fonuá kotoa.+ 5 Ka ʻokú ke kumi ki ha* ngaahi meʻa lalahi maʻau. Tuku ʻa e kumi ki he ngaahi meʻa ko iá.”’
“‘He ʻoku teu ke u ʻomi ha fakatamaki ki he kakano*+ kotoa pē,’ ko e fakahaaʻi ia ʻe Sihová, ‘pea ʻilonga ha feituʻu te ke ʻalu ki ai, te u foaki atu kiate koe ʻa hoʻo moʻuí ko ha koloa vete.’”*+
46 Ko e folofola eni ʻa Sihova kia Selemaia ko e palōfitá ʻo fekauʻaki mo e ngaahi puleʻangá:+ 2 Ki ʻIsipite,+ ʻi he fekauʻaki mo e kau tau ʻa Felo Neko+ ko e tuʻi ʻo ʻIsipité, ʻa ia naʻe ʻi he veʻe Vaitafe ʻIufaletesí pea naʻe ikunaʻi ʻi Kalikimisi ʻe Tuʻi Nepukanesa* ʻo Pāpiloné ʻi he taʻu hono fā ʻo e pule ʻa Sihoiakimi+ ko e foha ʻo Siosaia, ko e tuʻi ʻo Siutá:
3 “Mou teuteu hoʻomou fanga kiʻi paá* mo e ngaahi pā lalahí,
Pea ʻalu atu ki he taú.
4 Teuteu ʻa e fanga hōsí pea heka ki ai ʻa kimoutolu kau tangata heka hōsí.
Mou tuʻu ki homou tuʻuʻangá pea ʻai homou ngaahi tataá.
Fakangingila ʻa e ngaahi taó pea tui homou ngaahi kofu-taú.
5 ‘Ko e hā ʻoku ou vakai atu ai ʻoku nau manavaheé?
ʻOku nau holomui, ʻoku laiki ʻa ʻenau kau pāteʻi taú.
Kuo nau hola ʻi he ilifia, kuo ʻikai tafoki mai ʻenau kau pāteʻi taú.
ʻOku ʻi ai ha manavahē takatakai,’ ko e fakahaaʻi ia ʻe Sihová.
6 ‘Heʻikai lava ke hola ʻa e veʻe-vavé, pea heʻikai lava ke hao ʻa e kau pāteʻi taú.
ʻI he tokelaú, ʻi he veʻe vai ʻo e Vaitafe ʻIufaletesí,
Kuo nau humu pea kuo nau tō ai.’+
7 Ko hai eni ʻoku haʻu ʻo hangē ko e Vaitafe Nailá,
Hangē ko e ngaahi vaitafe ʻoku tafe mālohí?
8 ʻOku haʻu ʻa ʻIsipite ʻo hangē tofu pē ko e Vaitafe Nailá,+
Hangē ko e ngaahi vaitafe ʻoku tafe mālohí,
Pea ʻokú ne pehē, ‘Te u ʻalu hake ʻo ʻufiʻufi ʻa e māmaní.
Te u fakaʻauha ʻa e koló mo e faʻahinga ʻoku nofo aí.’
9 ʻAlu hake, ʻa kimoutolu fanga hoosi!
Lele mate, ʻa kimoutolu ngaahi saliote!
Tuku ke ʻalu atu ʻa e kau pāteʻi taú,
ʻA Kusa mo Puti, ʻa ia ʻokú na toʻo ʻa e paá,+
Pea mo e haʻa Lutí,+ ʻa ia ʻoku nau toʻo mo fusi* ʻa e kaufaná.+
10 “Ko e ʻaho ko iá ʻoku ʻa e ʻEiki Haú, ʻa Sihova ʻo e ngaahi kau tau, ko e ʻaho ʻo e sāuni ke faisāuni ai ki hono ngaahi filí. Pea ʻe keina ʻe he heletaá ʻo ne mākona mo fonu ʻi honau totó, he ko e ʻEiki Haú, ʻa Sihova ʻo e ngaahi kau tau, ʻoku ʻi ai haʻane feilaulau* ʻi he fonua ʻo e tokelaú ʻi he veʻe Vaitafe ʻIufaletesí.+
Ko e kulanoa ʻa hoʻo fakalahi ʻa hoʻo ngaahi faitoʻó,
He ʻoku ʻikai ha faitoʻo kiate koe.+
12 Kuo fanongo ʻa e ngaahi puleʻangá ki he ʻikai hao lāngilangí,+
Pea kuo ongona ʻi he fonuá ʻa hoʻo tangí.
He ʻoku humu ʻa e tokotaha pāteʻi tau ʻi he tokotaha pāteʻi tau,
Pea ʻokú na fakatou tō fakataha.”
13 Ko e folofola eni naʻe folofolaʻaki ʻe Sihova kia Selemaia ko e palōfitá ʻo fekauʻaki mo e haʻu ʻa Tuʻi Nepukanesa* ʻo Pāpiloné ke taaʻi ʻa e fonua ko ʻIsipité:+
14 “Talaki ia ʻi ʻIsipite, fanongonongo ia ʻi Mikitoli.+
Fanongonongo ia ʻi Nofi* pea ʻi Tapanesa.+
Lea ʻo pehē, ‘Tuʻu ki ho tuʻuʻangá pea ʻai ke mou mateuteu,
He ʻe keina takatakai ha heletā ʻiate koe.
15 Ko e hā kuo mole atu ai ʻa hoʻo kau tangata mālohí?
Naʻe ʻikai te nau tuʻu maʻu,
He kuo tekeʻi hifo kinautolu ʻe Sihova.
16 ʻOku nau humu tokolahi ʻaupito mo tō.
ʻOku nau fepehēʻaki:
“Tuʻu hake! Ke tau foki ki hotau kakaí mo hotau fonuá
Koeʻuhi ko e fakamamahi ʻa e heletaá.”’
17 Kuo nau talaki ʻi he potu ko iá,
‘Ko Felo ko e tuʻi ʻo ʻIsipité ʻoku longoaʻa noaʻia pē
18 ‘ʻOku ou fuakava ʻiate au,’* ko e fakahaaʻi ia ʻe he Tuʻí, ʻa ia ko hono huafá ko Sihova ʻo e ngaahi kau tau,
‘Te ne* haʻu ʻo hangē ko Tēpoá+ ʻi he lotolotonga ʻo e ngaahi moʻungá
Pea hangē ko Kāmelí+ ʻi he tahí.
19 Teuteu hoʻo ngaʻotoʻotá ki he ʻave fakamālohi,
Siʻi ʻofefine ʻoku nofo ʻi ʻIsipite.
He ko Nofí* ʻe hoko ko ha meʻa ke fai ai ha fakalilifuʻia;
20 Ko ʻIsipité ʻoku hangē ha kiʻi pulu fefine fakaʻofoʻofá,
Ka ʻe haʻu ha pupunga lango mei he tokelaú ʻo uʻu ia.
21 Naʻa mo ʻene kau sōtia ʻi hono lotolotongá ʻa ia naʻe totongiʻi maí ʻoku nau hangē ha fanga kiʻi ʻuhikiʻi pulu ngeʻengeʻé,
Ka kuo nau tafoki mo kinautolu ʻo hola fakataha.
Naʻe ʻikai malava ke nau tuʻu maʻu,+
He ko e ʻaho ʻo ʻenau tuʻutāmakí kuo hoko mai kiate kinautolu,
ʻA e taimi ʻo honau tauteá.’
22 ‘Ko hono leʻó ʻoku hangē ko ha ngata ʻoku ngaoló,
He ʻoku muimui mai ʻiate ia ʻa e kau tau ʻa e filí, fakataha mo e ngaahi toki,
ʻO hangē ha kau tangata tā ʻakaú.*
23 Te nau tā hifo ʻa hono vaotaá,’ ko e fakahaaʻi ia ʻe Sihová, ‘neongo ʻene hā ngali fihituʻu ke hū ki aí.
He ʻoku nau tokolahi ange ʻi he fanga heʻé, ʻo ʻikai lava hano lau.
24 ʻE fakamaaʻi ʻa e ʻofefine ko ʻIsipité.
ʻE tuku atu ia ki he kakai ʻo e tokelaú.’+
25 “Ko Sihova ʻo e ngaahi kau tau, ko e ʻOtua ʻo ʻIsilelí, ʻokú ne folofola ʻo pehē: ‘Ko eni te u fai ha tokanga ki ʻĀmone+ mei Nō,*+ kia Felo, ki ʻIsipite, ki hono ngaahi ʻotuá,+ pea ki hono ngaahi tuʻí—ʻio, kia Felo mo e kotoa ʻo e faʻahinga ʻoku falala kiate iá.’+
26 “‘Pea te u tuku atu kinautolu ki he faʻahinga ʻoku nau kumi ke toʻo ʻenau moʻuí, kia Tuʻi Nepukanesa* ʻo Pāpiloné+ mo ʻene kau sevānití. Ka ʻi he hili iá ʻe toe nofoʻi ia ʻo hangē ko e ngaahi taimi ʻi he kuohilí,’ ko e fakahaaʻi ia ʻe Sihová.+
27 ‘Ka ko koe, ʻa ʻeku sevāniti ko Sēkopé, ʻoua te ke ilifia,
Pea ʻoua te ke manavahē, ʻe ʻIsileli.+
He te u fakahaofi koe mei he mamaʻó
Pea mo ho hakó mei he fonua ʻoku nau nofo pōpula aí.+
ʻE toe foki ʻa Sēkope pea te ne hoko ʻo nonga mo ʻikai fakahohaʻasi,
ʻO ʻikai ha taha te ne ʻai kinautolu ke nau ilifia.+
28 Ko ia ʻoua te ke ilifia, ʻa ʻeku sevāniti ko Sēkopé,’ ko e fakahaaʻi ia ʻe Sihová, ‘he ʻoku ou ʻiate koe.
Te u fakaʻauha ʻa e ngaahi puleʻanga kotoa naʻá ku fakamovetevete koe ki aí,+
Ka heʻikai te u fakaʻauha koe.+
47 Ko e folofola eni ʻa Sihova kia Selemaia ko e palōfitá ʻo fekauʻaki mo e kau Filisitiá,+ ki muʻa ke taaʻi ʻe Felo ʻa Kesá. 2 Ko e folofola eni ʻa Sihová:
“Vakai! ʻOku haʻu ʻa e ngaahi vai mei he tokelaú.
ʻE hoko ia ko ha vai-fā.
Pea ʻe tāfea ai ʻa e fonuá mo e meʻa kotoa pē ʻoku ʻi aí,
ʻA e koló mo kinautolu ʻoku nofo aí.
ʻE kalanga ʻa e kau tangatá,
Pea ʻe tangilāulau ʻa e tokotaha kotoa pē ʻoku nofo ʻi he fonuá.
3 ʻI he ongona ʻa e patupatū ʻa e topuvaʻe ʻo ʻene fanga hōsí,
ʻI he ngahaha ʻa ʻene ngaahi saliote taú
Pea mo e ʻuʻulu ʻa ʻene ngaahi veʻeteká,
Ko e ngaahi tamaí ʻe aʻu ʻo ʻikai ke nau tafoki hake ke fakahaofi ʻa honau ngaahi fohá,
He ʻe vaivai ʻa honau nimá,
4 Koeʻuhí ʻoku hoko mai ʻa e ʻaho ʻa ia ʻe fakaʻauha ai ʻa e kau Filisitiá+ kotoa;
ʻE tuʻusi ai mei Tāia+ mo Saitoni+ ʻa ʻena faʻahi kotoa ʻoku toé.
He ʻe fakaʻauha ʻe Sihova ʻa e kau Filisitiá,
5 ʻE hoko ʻo tula* ʻa Kesa.
Kuo fakasīlongoʻi ʻa ʻAsikeloni.+
6 ʻOiau! Ko e heletā ʻa Sihová!+
Ko e hā hono fuoloa ʻa e ʻikai te ke fakalongolongó?
Foki ki ho ʻaiʻangá.
Ke ke mālōlō pea sīlongo.
7 ʻE lava fēfē ke ne fakalongolongo
Lolotonga ia kuo fai ʻe Sihova ha fekau ki ai?
Ke tauʻi ʻa ʻAsikeloni pea mo e matāfangá,+
Ko e feituʻu ia kuó ne vaheʻi ia ki aí.”
48 Ko e folofola eni ʻa Sihova ʻo e ngaahi kau tau, ko e ʻOtua ʻo ʻIsilelí, ʻo fekauʻaki mo Mōapé:+
“ʻOiauē ʻa Nipo,+ he kuo fakaʻauha ia!
Ko Kiliataimi+ kuo fakamaaʻi mo hamu ia.
Ko e hūfangaʻanga malú* kuo fakamaaʻi mo haveki.+
2 ʻOku ʻikai te nau kei fakahīkihikiʻi ʻa Mōape.
ʻI Hesiponi+ kuo nau faʻufaʻu ke ʻai ia ke ne tō:
‘Mou haʻu, ke tau fakangata ia ʻi hono tuʻunga ko ha puleʻangá.’
Ko koe foki, ʻe Matameni, ke ke hanganaki fakalongolongo,
He ʻoku muimui atu ʻa e heletaá ʻiate koe.
3 Ko e ongo ē ʻo e kalanga mei Holonaimi,+
ʻO e fakaʻauha mo e fuʻu holofa lahi.
4 Kuo maumauʻi ʻa Mōape.
ʻOku tangi ʻa hono kau valevalé.
5 ʻI he tahake ki Lūhití ʻoku nau tangi ai pē mo kaka hake.
Pea ʻi he hala ʻoku hifo mei Holonaimí ʻoku nau fanongo ai ki he fetāngihi mamahi koeʻuhi ko e fakatamakí.+
6 Mou hola, koeʻuhí ko hoʻomou moʻuí!
Kuo pau ke mou hoko ʻo hangē ko ha fuʻu siunipa ʻi he toafá.
7 Koeʻuhí ko hoʻo falala ki hoʻo ngaahi ngāué mo hoʻo ngaahi koloá,
ʻE hamu foki mo koe.
Pea ʻe ʻave fakamālohi ʻa Kīmosi,+
Fakataha mo ʻene kau taulaʻeikí mo ʻene kau houʻeikí.
8 ʻE hū atu ʻa e tokotaha fakaʻauhá ki he kolo kotoa,
Pea ʻe ʻikai ha kolo ʻe hao.+
ʻE ʻauha ʻa e teleʻá,*
Pea ʻe fakaʻauha ʻosi ʻa e fonua tokaleleí,* ʻo hangē pē ko ia kuo folofolaʻaki ʻe Sihová.
9 Fokotuʻu ha fakaʻilonga hala moʻo Mōape,
He te ne hola ʻi heʻene tō ki he fakaʻauhá,
Pea ko hono ngaahi koló ʻe hoko ko ha meʻa ke fai ai ha fakalilifuʻia,
ʻO ʻikai ha taha ʻe nofo ai.+
10 Malaʻia ē ko e tokotaha ʻokú ne fakaliʻeliʻaki hono fakahoko ʻa e ngāue ʻa Sihová!
Malaʻia ē ko e tokotaha ʻokú ne taʻofi ʻene heletaá mei he lingitotó!
11 Kuo ʻikai ke fakahohaʻasi ʻa e kau Mōapé talu mei heʻenau kei talavoú,
Hangē ha uaine ʻoku toka ʻi he takelé.
Kuo ʻikai ke lilingi mei ha ʻaiʻanga meʻa ʻe taha ki ha ʻaiʻanga meʻa ʻe taha,
Pea kuo ʻikai ʻaupito ke ʻave fakamālohi kinautolu.
Ko e ʻuhinga ia ʻoku tatau ai pē ʻa hono ifó,
Pea ʻikai ha liliu ʻi hono nanamú.
12 “‘Ko ia ai, vakai, ʻoku hoko mai ha ngaahi ʻaho,’ ko e fakahaaʻi ia ʻe Sihová, ‘ʻa ia te u fekauʻi atu ai ha kau tangata ke nau fulihi kinautolu. Te nau fakafoʻohifoʻi kinautolu pea fakamaha ʻa ʻenau ngaahi ʻaiʻanga meʻá, pea te nau fahi ke moefe ʻa ʻenau ngaahi siā lalahí. 13 Pea ʻe maaʻi ʻe he kau Mōapé ʻa Kīmosi, ʻo hangē pē ko hono maaʻi ʻe he fale ʻo ʻIsilelí ʻa Pēteli, ʻa ia naʻa nau falala ki aí.+
14 ʻOku anga-fēfē hoʻomou pehē: “Ko e kau toʻa kimautolu, ʻoku mau mateuteu atu ki he tau”?’+
15 ‘Kuo fakaʻauha ʻa Mōape,
Kuo kapa hono ngaahi koló,+
Pea ko ʻenau kau talavou lelei tahá kuo tāmateʻi,’+
Ko e fakahaaʻi ia ʻe he Tuʻí, ʻa ia ko hono huafá ko Sihova ʻo e ngaahi kau tau.+
16 Ko e fakatamaki ki he kau Mōapé ʻoku vavé ni ke hoko mai,
Pea ko ʻenau toó ʻoku ngaʻunu vave mai.+
17 Ko e faʻahinga kotoa ʻoku takatakai kiate kinautolú te nau kaungāmamahi kiate kinautolu,
ʻA e faʻahinga kotoa ʻoku nau ʻilo honau hingoá.
Tala kiate kinautolu: ‘ʻOiauē kuo fesiʻi ʻa e vaʻakau mālohí, ʻa e tokotoko fakaʻofoʻofá!’
18 ʻAlu hifo ā mei ho lāngilangí,
Peá ke tangutu hifo ʻi he fieinua,* ʻe ʻofefine ʻoku nofo ʻi Tīponí,+
He ko e tokotaha fakaʻauha ʻo Mōapé kuó ne ʻalu atu kiate koe,
Pea te ne fakaʻauha ho ngaahi feituʻu fakakolotaú.+
19 Tuʻu ʻi he veʻehalá ʻo mamata, ʻa e nofo ʻi ʻAloelí.+
ʻEke ki he tangata ʻoku lelé mo e fefine ʻoku holá, ‘Ko e hā kuo hokó?’
20 Kuo fakamaaʻi ʻa Mōape pea kuo taaʻi ʻaki ʻa e manavahē.
Fākafoa pea kalanga.
Talaki ʻi ʻAlanoni+ kuo fakaʻauha ʻa Mōape.
21 “Kuo hoko mai ʻa e fakamaau ki he fonua tokaleleí*+ ki Holoni, Siahasa,+ mo Mefati;+ 22 ki Tīponi,+ Nipo,+ mo Pete-tipilataimi; 23 ki Kiliataimi,+ Pete-kamuli, mo Pete-meoni;+ 24 ki Kilioti+ mo Pōsila; pea ki he kotoa ʻo e ngaahi kolo ʻi he fonua ko Mōapé, ʻa e mamaʻo mo e ofi.
25 ‘Kuo motuhi ʻa e mālohi* ʻo Mōapé;
Kuo fasi hono nimá,’ ko e fakahaaʻi ia ʻe Sihová.
26 ‘Mou ʻai ia ke konā,+ he kuó ne fakafuofuolahi kia Sihova.+
ʻOku teka holo ʻa Mōape ʻi heʻene luá,
Pea ʻokú ne hoko ko ha lumaʻanga.
27 ʻIkai naʻe hoko ʻa ʻIsileli ko ha lumaʻanga kiate koe?+
Naʻe maʻu atu ia ʻi he lotolotonga ʻo e kau kaihaʻá,
ʻOkú ke kalokalo ai ho ʻulú mo lau kiate iá?
28 Liʻaki ʻa e ngaahi koló pea mou nofo ʻi he makatuʻú, ʻa kimoutolu ʻoku nofo ʻi Mōapé,
Pea mou hoko ʻo hangē ko ha lupe ʻoku ʻai pununga ʻi he ngaahi tafatafaʻaki teleʻa fāsiʻí.’”
29 “Kuo mau fanongo ʻo fekauʻaki mo e pōlepole ʻa Mōapé—ʻokú ne hīkisia ʻaupito—
ʻI heʻene ʻafungí, mo ʻene pōlepolé, mo ʻene hīkisiá, pea mo e fakamafutofuta ʻa hono lotó.”+
30 “‘ʻOku ou ʻilo ʻene tōlilí,’ ko e fakahaaʻi ia ʻe Sihová,
‘Ka ko ʻene lea maumau taimí ʻe hoko ko e koto ngeʻesi.
ʻE ʻikai te nau lavaʻi ha meʻa.
31 Ko e ʻuhinga ia te u tangilāulau ai koeʻuhi ko Mōapé,
Te u tangi koeʻuhi ko e kotoa ʻo Mōapé
Pea toʻe koeʻuhi ko e kau tangata ʻo Kili-helesí.+
32 ʻE lahi ange ʻa ʻeku tangi koeʻuhi ko koé, siʻi kālepi ʻo Sipimá,+
ʻI heʻeku tangi koeʻuhi ko Siaseá.+
Ko ho ngaahi huli tupu ʻāfaʻafá, kuo kolosi ʻi he tahí.
Ki he tahí, ki Siasea, kuo nau aʻu atu ki ai.
Ko hoʻo fuaʻiʻakau ʻo e faʻahitaʻu māfaná mo hoʻo toʻu kālepí
Kuo ʻalu hifo ki ai ʻa e tokotaha fakaʻauhá.+
33 Kuo mole ʻa e fiefiá mo e mavavá mei he ngoue fuaʻiʻakaú
Pea mei he fonua ko Mōapé.+
Kuó u ʻai ke tuʻu ʻa e tafe ʻa e uainé mei he tataʻoʻanga uainé,
ʻE ʻikai ha tokotaha te ne malamalaki ia mo kaila fiefia.
ʻE kehe ʻa e kaikailá ia.’”+
34 “‘ʻOku ʻi ai ha kalanga mei Hesiponi+ ʻo aʻu atu ki ʻEleale.+
Naʻa mo e ngaahi vai ʻo Nimilimí ʻe hoko ʻo pakukā.+
35 Te u ʻai ke ʻikai ke toe ʻi Mōape,’ ko e fakahaaʻi ia ʻe Sihová,
‘ʻA e tokotaha ʻokú ne ʻohake ha feilaulau ʻi he potu māʻolungá
Pea mo e tokotaha ʻokú ne fai ha feilaulau ki hono ʻotuá.
36 Ko e ʻuhinga ia ʻe toʻe* ai ʻa hoku lotó koeʻuhi ko Mōapé ʻo hangē ha fulutá,*+
Pea ʻe toʻe* ʻa hoku lotó koeʻuhi ko e kau tangata ʻo Kili-helesí ʻo hangē ha fulutá.*
He ko e koloa kuó ne ngaohí ʻe ʻauha.
37 He ʻoku poko ʻa e ʻulu kotoa pē,+
Pea ʻoku tele ʻa e kava kotoa pē.
38 “‘ʻI he kotoa ʻo e ngaahi funga fale ʻo Mōapé
Pea ʻi he kotoa ʻo hono ngaahi malaʻe fakakoló,*
ʻOku ʻikai ha meʻa ka ko e tangilāulau pē.
He kuó u maumauʻi ʻa Mōape
Hangē ha siā kuo liʻakí,’ ko e fakahaaʻi ia ʻe Sihová.
39 ‘He mate manavahē ē ka ko ia! Mou tangilāulau!
He sītuʻa ē ko Mōape ʻi heʻene maá!
Kuo hoko ʻa Mōape ko ha lumaʻanga,
Ko ha meʻa fakamanavahē ki he faʻahinga kotoa ʻoku takatakai ʻiate iá.’”
40 “He ko e meʻa eni ʻoku folofolaʻaki ʻe Sihová:
‘Vakai! Hangē tofu pē ko ha ʻīkale ʻoku tūʻulu hifó,+
Te ne folahi atu ʻa hono ongo kapakaú ki Mōape.+
41 ʻE hamu ʻa e ngaahi koló,
Pea ʻe puke ʻa hono ngaahi hūfangaʻangá.
ʻI he ʻaho ko iá ko e loto ʻo e kau pāteʻi tau ʻo Mōapé
ʻE hangē ko e loto ʻo ha fefine ʻoku fāʻelé.’”
42 “‘Pea ko Mōape ʻe fakaʻauha ʻosi mei heʻene hoko ko ha kakaí,+
He ko Sihova kuó ne fakamafutofuta ki aí.+
43 Ko e manavahē mo e luo mo e tauhele ʻoku ʻi ho ʻaó,
ʻA koe ʻoku nofo ʻi Mōapé,’ ko e fakahaaʻi ia ʻe Sihová.
44 ‘Ko ha taha pē ʻe hola mei he meʻa fakamanavaheé ʻe tō ia ki he luó,
Pea ko ha taha pē ʻe ʻalu hake mei he luó ʻe fihia ia ʻi he tauhelé.’
‘He te u ʻomi ki Mōape ʻa e taʻu ʻo honau tauteá,’ ko e fakahaaʻi ia ʻe Sihová.
45 ‘ʻOku tuʻu ʻi he malumalu ʻo Hesiponí ʻa e faʻahinga ʻoku holá ʻo ʻikai hanau ivi.
He ʻe haʻu ha afi mei Hesiponi
Mo ha uloʻi afi mei loto Sīhoni.+
Te ne keina ʻa e laʻe ʻo Mōapé
Mo e ngeʻesi-ʻulu ʻo e ngaahi foha faifakaʻauhá.’+
46 ‘ʻOiauē ʻa koe, siʻi Mōape!
Ko e kakai ʻo Kīmosí+ kuo nau ʻauha.
He ko ho ngaahi fohá kuo taki pōpula,
Pea ko ho ngaahi ʻofefiné kuo ʻave fakamālohi.+
47 Ka te u tānaki fakataha mai ʻa e kau pōpula ʻo Mōapé ʻi he ngaahi ʻaho fakaʻosí,’ ko e fakahaaʻi ia ʻe Sihová.
‘Ko e ngataʻanga ia ʻo e pōpoaki ʻo e fakamaau ki Mōapé.’”+
49 Ko e folofola eni ʻa Sihova ki he kau ʻĀmoní:+
“ʻOku ʻikai ha ngaahi foha ia ʻo ʻIsileli?
ʻOku ʻikai ʻi ai hano ʻea?
Ko e hā kuo maʻu ai ʻe Malekami+ ʻa Katá?+
Pea ko e hā ʻoku nofo ai ʻa hono kakaí ʻi he ngaahi kolo ʻo ʻIsilelí?”
2 “‘Ko ia ai, vakai, ʻoku haʻu ʻa e ngaahi ʻaho,’ ko e fakahaaʻi ia ʻe Sihová,
‘ʻA ia te u ʻai ha fakatokanga ʻo e tau* ke ongo atu ki Lapa+ ʻo e kau ʻĀmoní.+
Te ne hoko ko ha foʻi tafunga kuo liʻaki,
Pea ʻe tutu ʻa hono ngaahi kolo takatakaí.’*
‘Pea ʻe maʻu ʻe ʻIsileli ʻa e fonua ʻo e faʻahinga naʻa nau ʻave hono fonuá,’+ ko e folofola ia ʻa Sihová.
3 ‘Tangilāulau, ʻe Hesiponi, he kuo fakaʻauha ʻa ʻAi!
Kalanga, ʻa e ngaahi kolo takatakai ʻo Lapá.
Mou ʻai tauangaʻa.
Mou tangilāulau mo lele holo ʻi he ngaahi ʻā maká,*
He ʻe ʻave fakamālohi ʻa Malekami,
Fakataha mo ʻene kau taulaʻeikí mo ʻene kau houʻeikí.+
4 Ko e hā ʻokú ke pōlepole ʻaki ai ʻa e ngaahi teleʻá,*
ʻA hoʻo teleʻa mohu vaí, siʻi ʻofefine taʻefaitōnunga,
ʻA ia ʻokú ne falala ki heʻene ngaahi koloá
Pea ʻokú ne pehē: “Ko hai ia ʻe haʻu kiate aú?”’”
5 “‘Ko eni ʻoku ou ʻomi ha meʻa fakailifia kiate koe,’ ko e fakahaaʻi ia ʻe he ʻEiki Haú, ʻe Sihova ʻo e ngaahi kau tau,
‘Mei he faʻahinga kotoa ʻoku takatakai kiate koé.
ʻE fakamovetevete atu kimoutolu ki he tapa kotoa pē,
Pea ʻe ʻikai ha taha te ne tānaki fakataha mai ʻa e faʻahinga ʻoku holá.’”
6 “‘Ka ʻi he hili iá te u tānaki fakataha mai ʻa e kau pōpula ʻa e kau ʻĀmoní,’ ko e fakahaaʻi ia ʻe Sihová.”
7 Ko e folofola eni ʻa Sihova ʻo e ngaahi kau tau ki ʻĪtomí:
“ʻOku ʻikai ke toe ʻi ai ha poto ia ʻi Tīmani?+
Kuo mole ʻa e faleʻi leleí ia mei he faʻahinga ʻoku nau maʻu ʻa e mahinó?
Kuo ʻosi atu honau potó?
8 Mou hola, tafoki mai!
Mou ʻalu ʻo nofo ʻi he ngaahi feituʻu māʻulaló, siʻi kakai ʻo Titaní!+
He te u ʻomi ha fakatamaki kia ʻĪsoa
ʻI he hoko mai ʻa e taimi ke u tautea ai iá.
9 Kapau naʻe haʻu kiate koe ha kau toli kālepi,
ʻIkai te nau fakatoe ha meʻa ke tufi?
Kapau naʻe haʻu ha kau kaihaʻa ʻi he poʻulí,
Te nau fai pē ʻa e maumau lahi taha te nau fiemaʻu ke faí.+
10 Ka ko au te u fakatekelei ʻa ʻĪsoa.
Te u fakaeʻa ʻa hono ngaahi feituʻu toitoiʻangá,
Koeʻuhi ke ʻoua naʻa lava ke ne toi.
Ko ʻene fānaú mo hono fanga tokouá mo hono ngaahi kaungāʻapí ʻe fakaʻauha kotoa,+
Pea ʻe ʻikai te ne toe ʻi ai.+
11 Liʻaki ʻa hoʻo fānau tamai-maté,
Pea te u tauhi kinautolu ke nau moʻui,
Pea ko hoʻo kau uitoú te nau falala kiate au.”
12 He ko e folofola eni ʻa Sihová: “Vakai! Kapau ko e faʻahinga ē naʻe ʻikai tuʻutuʻuni pau ke nau inu ʻi he ipú kuo pau ke nau inu iá, ʻe mātuʻaki tuku taʻetautea koā koe? ʻE ʻikai tuku taʻetautea koe, he kuo pau ke ke inu ia.”+
13 “He kuó u fai ha fuakava ʻiate au,” ko e fakahaaʻi ia ʻe Sihová, “ʻe hoko ʻa Pōsila ko ha meʻa ke fai ai ha fakalilifuʻia,+ mo ha lumaʻanga, ko ha feituʻu liʻaki, mo ha mala; pea ko e kotoa ʻo hono ngaahi koló ʻe hoko ko ha fokotuʻunga maumau ʻo taʻengata.”+
14 Kuó u fanongo ʻi ha ongoongo meia Sihova,
Kuo fekauʻi mai ha talafekau ki he lotolotonga ʻo e ngaahi puleʻangá, ʻo pehē:
“Mou fakatahataha ʻo ʻalu atu kiate ia;
Teuteu ki he tau.”+
15 “He vakai, kuó u ʻai koe ko e siʻi ʻi he lotolotonga ʻo e ngaahi puleʻangá,
Pea taʻetokaʻi ʻi he lotolotonga ʻo e faʻahinga ʻo e tangatá.+
16 Ko e manavahē kuó ke fakatupungá kuó ne kākaaʻi koe,
Pea pehē ki he ʻafungi ʻo ho lotó,
ʻA koe ʻokú ke nofo ʻi he ngaahi avaʻi maká,
ʻI he funga moʻungá.
Neongo hoʻo faʻu ho punungá ʻi he taukakapá ʻo hangē ha ʻīkalé,
Te u ʻohifo koe mei ai,” ko e fakahaaʻi ia ʻe Sihová.
17 “Pea ko ʻĪtomi kuo pau ke ne hoko ko ha meʻa ke fai ai ha fakalilifuʻia.+ Ko e tokotaha kotoa pē ʻe fou mai aí te ne sio fakamamaʻu ki ai ʻi he fakalilifuʻia peá ne fai ha manuki* ki ai koeʻuhi ko e kotoa ʻo hono ngaahi tauteá. 18 Hangē pē ko ia naʻe hoko ʻi hono fakaʻauha ʻo Sōtoma mo Komola mo hona ngaahi kolo kaungāʻapí,”+ ko e folofola ia ʻa Sihová, “ʻe ʻikai ke nofo ai taha, pea ʻe ʻikai ha tangata ʻe nofo ai.+
19 “Vakai! ʻE ʻalu atu ha taha ki he ngaahi kaikaiʻanga malú ʻo hangē ha laione+ ʻoku haʻu mei he ngaahi vao ʻakau fihi ʻi he veʻe Sioataní, ka ʻi ha mōmeniti siʻi pē mei ai te u ʻai ia ke ne hola meiate ia. Pea te u fakanofo ʻa e tokotaha kuo filí ke pule kiate ia. He ko hai ia ʻoku hangē ko aú, pea ko hai ia te ne poleʻi aú? Ko hai ha tauhi-sipi ʻe lava ke tuʻu ʻi hoku ʻaó?+ 20 Ko ia ai, mou fanongo mai, kau tangata, ki he tuʻutuʻuni kuo fai ʻe* Sihova ki ʻĪtomí pea mo e meʻa kuó ne fakakaukauʻi ke fai ki he kakai ʻoku nofo ʻi Tīmaní:+
Ko e moʻoni ʻe toho atu ʻa e fanga kiʻi sipi ʻo e tākangá.
Te ne ʻai ʻa honau nofoʻangá ke hoko ʻo lala koeʻuhi ko kinautolu.+
21 Kuo ngalulu ʻa e māmaní ʻi he ongo mai ʻa ʻenau toó.
ʻOku ʻi ai ha fuʻu kalanga!
Kuo ongo atu ia ʻo aʻu ki he Tahi Kulokulá.+
22 Vakai! ʻI he hangē ha ʻīkalé te ne ʻalu hake peá ne tūʻulu hifo,+
Pea ʻe mafola atu ʻa hono ongo kapakaú ki Pōsila.+
ʻI he ʻaho ko iá ko e loto ʻo e kau pāteʻi tau ʻo ʻĪtomí
ʻE hangē ko e loto ʻo ha fefine ʻoku fāʻelé.”
23 Ki Tāmasikusi:+
“Kuo fakamaaʻi ʻa Hēmati+ mo ʻĀpati,
He kuó na fanongo ʻi ha ongoongo kovi.
Naʻe vaivai hona lotó ʻi he manavahē.
ʻOku houtuʻu ʻa e tahí ʻo ʻikai lava ke nonga.
24 Kuo mole ʻa e loto-toʻa ʻa Tāmasikusí.
Kuó ne tafoki hake ke hola, ka kuo maʻu ia ʻe he tailiilí.
Kuo maʻu ia ʻe he mamahí mo e langá,
ʻO hangē ha fefine ʻoku fāʻelé.
25 ʻOku anga-fēfē ʻa e ʻikai ke liʻaki ʻa e kolo lāngilangiʻiá,
ʻA e kolo ʻo e mavavá?
26 He ko ʻene kau talavoú te nau tō ʻi hono ngaahi malaʻe fakakoló,*
Pea ko e kotoa ʻo e kau sōtiá te nau ʻauha ʻi he ʻaho ko iá,” ko e fakahaaʻi ia ʻe Sihova ʻo e ngaahi kau tau.
27 “Te u tutu ʻa e ʻā ʻo Tāmasikusí,
Pea ʻe keina ai ʻa e ngaahi taua fakakolotau ʻo Peni-hētatí.”+
28 Ki Keta+ pea mo e ngaahi puleʻanga ʻo Hāsoá, ʻa ia naʻe taaʻi ʻe Tuʻi Nepukanesa* ʻo Pāpiloné, ko e folofola eni ʻa Sihová:
“Tuʻu hake ʻo ʻalu atu ki Keta,
Pea fakaʻauha ʻa e ngaahi foha ʻi he Hahaké.
29 ʻE ʻave ʻa honau ngaahi tēnití mo ʻenau ngaahi tākangá,
ʻEnau ngaahi tupenu tēnití mo ʻenau koloá kotoa.
ʻE ʻave ʻenau fanga kāmelí,
Pea te nau kaila atu kiate kinautolu, ‘ʻOku ʻi ai ha manavahē ʻi he feituʻu kotoa pē!’”
30 “Mou hola, mou ʻalu ʻaupito ki he mamaʻó!
Mou ʻalu ʻo nofo ʻi he ngaahi feituʻu māʻulaló, siʻi kakai ʻo Hāsoá,” ko e fakahaaʻi ia ʻe Sihová.
“He ko Tuʻi Nepukanesa* ʻo Pāpiloné kuó ne fai ha faʻufaʻu kiate kimoutolu,
Pea kuó ne fakakaukauʻi ha kovi kiate kimoutolu.”
31 “Tuʻu hake ʻo ʻalu atu ki he puleʻanga ʻoku nongá,
ʻA ia ʻoku malu ʻenau nofó,” ko e fakahaaʻi ia ʻe Sihová.
“ʻOku ʻikai ʻi ai hano matapā pe meʻa fakamaʻu; ʻoku nau nofo mavahe pē.
32 ʻE ʻave fakamālohi ʻa ʻenau fanga kāmelí,
Pea ʻe hoko ko e koloa vete ʻa ʻenau fanga manu tokolahí.
Te u fakamovete kinautolu ʻi he matangi kotoa pē,*
ʻA e faʻahinga ʻoku nau tele ʻa e fulufulu ʻi honau manifí,+
Pea te u ʻomi ha fakatamaki kiate kinautolu mei he tapa kotoa pē,” ko e fakahaaʻi ia ʻe Sihová.
33 “Pea ʻe hoko ʻa Hāsoa ko e nofoʻanga ʻo e fanga siakalí,
Ko ha potu lala ʻo taʻengata.
ʻE ʻikai ke nofo ai ha taha,
Pea ʻe ʻikai ha tangata ʻe nofo ai.”
34 Ko e folofola eni ʻa Sihova naʻe hoko mai kia Selemaia ko e palōfitá ʻo fekauʻaki mo ʻĪlami+ ʻi he kamataʻanga ʻo e pule ʻa Tuʻi Setekaia+ ʻo Siutá: 35 “Ko e folofola eni ʻa Sihova ʻo e ngaahi kau tau, ‘Ko eni ʻoku ou fesiʻi ʻa e kaufana ʻa ʻĪlamí,+ ʻa e matavai* ʻo honau mālohí. 36 Te u ʻomi ki ʻĪlami ʻa e matangi ʻe fā mei he ngaahi ngataʻanga ʻe fā ʻo e langí, pea te u fakamovetevete kinautolu ki he ngaahi matangi kotoa ko ení. ʻE ʻikai ha puleʻanga ʻe taʻeʻalu ki ai ʻa e faʻahinga ʻo ʻĪlami kuo fakamoveteveté.’”
37 “Te u haveki ʻa e kau ʻĪlamí ʻi he ʻao ʻo honau ngaahi filí pea ʻi he ʻao ʻo e faʻahinga ʻoku nau kumi ke toʻo ʻenau moʻuí; pea te u ʻomi ha fakatamaki kiate kinautolu, ʻa ʻeku ʻita kakahá,” ko e fakahaaʻi ia ʻe Sihová. “Pea te u fekauʻi atu ʻa e heletaá ke tulimui kiate kinautolu kae ʻoua kuó u fakaʻauha ʻosi kinautolu.”
38 “Pea te u fokotuʻu hoku taloní ʻi ʻĪlami,+ pea te u fakaʻauha mei ai ʻa e tuʻí mo e kau houʻeikí,” ko e fakahaaʻi ia ʻe Sihová.
39 “Ka ʻi he ngaahi ʻaho fakaʻosí, te u tānaki fakataha mai ʻa e kau pōpula ʻo ʻĪlamí,” ko e fakahaaʻi ia ʻe Sihová.
50 Ko e folofola naʻe folofolaʻaki ʻe Sihova ʻo fekauʻaki mo Pāpilone,+ ʻo fekauʻaki mo e fonua ʻo e kau Kalitiá, fakafou ʻia Selemaia ko e palōfitá:
2 “Talaki ia ʻi he lotolotonga ʻo e ngaahi puleʻangá pea fanongonongo ia.
Fokotuʻu ha fakaʻilonga* pea fanongonongo ia.
ʻOua ʻe fufū ha meʻa ʻe taha!
Lea ʻo pehē, ‘Kuo hamu ʻa Pāpilone.+
Kuo fakamaaʻi ʻa Pēlī.+
Kuo manavahē ʻa Melotaki.
Ko hono ngaahi ʻīmisí kuo fakamaaʻi.
Kuo manavahē ʻa ʻene ngaahi ʻaitoli fakalieliá.’*
3 He kuo haʻu kiate ia ha puleʻanga mei he tokelaú.+
ʻOkú ne ʻai ʻa hono fonuá ko ha meʻa ke fai ai ha fakalilifuʻia;
ʻOku ʻikai ha taha ʻe nofo ai.
Fakatouʻosi ʻa e tangata mo e manu kuo nau hola;
Kuo nau ʻalu.”
4 “ʻI he ngaahi ʻaho ko iá pea ʻi he taimi ko iá,” ko e fakahaaʻi ia ʻe Sihová, “ko e kakai ʻo ʻIsilelí mo e kakai ʻo Siutá te nau fakatahataha.+ Te nau tangi pē mo ʻalu,+ pea te nau fakatahataha ʻo kumi kia Sihova ko honau ʻOtuá.+ 5 Te nau ʻeke ʻa e hala ki Saioné mo hanga honau matá ki he feituʻu ko iá,+ pea nau pehē, ‘Haʻu ke tau kau mo Sihova ʻi ha fuakava taʻengata ʻa ia ʻe ʻikai ke ngalo.’+ 6 Kuo hoko hoku kakaí ko ha tākanga ʻo e fanga sipi mole.+ Ko honau kau tauhi-sipí naʻa nau ʻai kinautolu ke nau hē.+ Naʻa nau taki kinautolu ki he ngaahi moʻungá, ʻo nau ʻalu holo mei he moʻunga ki he foʻi māʻolunga. Kuo ngalo ʻiate kinautolu honau mālōlōʻangá. 7 Ko e faʻahinga kotoa ʻoku nau maʻu kinautolú kuo nau keina kinautolu,+ pea kuo pehē ʻe honau ngaahi filí, ‘ʻOku ʻikai ke tau halaia, koeʻuhí naʻa nau faiangahala kia Sihova, ki he nofoʻanga ʻo e māʻoniʻoní pea mo e ʻamanakiʻanga ʻo ʻenau fanga kuí, ʻa Sihova.’”
8 “Mou hola mei he lotolotonga ʻo Pāpiloné,
Hū ki tuʻa mei he fonua ʻo e kau Kalitiá,+
Pea mou hoko ʻo hangē ko e fanga manu ʻoku nau ʻalu muʻomuʻa ʻi he tākangá.
9 He ko eni te u fokotuʻu mo ʻomai ki Pāpilone
Ha fuʻu fakataha ʻo e ngaahi puleʻanga lalahi mei he fonua ʻo e tokelaú.+
Te nau haʻu ʻo fakatē tau kiate ia;
ʻE hamu ia mei he feituʻu ko iá.
Ko ʻenau ngaahi ngahaú ʻoku hangē ko e ngaahi ngahau ʻa ha tokotaha pāteʻi tau
ʻO ne ʻave ʻa e fānaú mei he mātuʻá;+
ʻOku ʻikai te nau foki taʻeʻiai hano ola.
10 ʻE hoko ʻa Kalitia ko ha koloa vete.+
ʻE mātuʻaki fiemālie ʻa e faʻahinga kotoa ʻoku nau toʻo ha koloa vete mei aí,”+ ko e fakahaaʻi ia ʻe Sihová.
11 “He naʻa mou hanganaki fiefia,+ naʻa mou hanganaki mavava
ʻI he taimi naʻa mou faʻao fakamālohi ai ʻa hoku tofiʻá.+
He naʻa mou hanganaki topuna hangē ha kiʻi pulu fefiné ʻi he musié,
Pea naʻa mou hanganaki tangi hangē ha fanga hōsí.
12 Kuo fakamaaʻi ʻa hoʻomou faʻeé.+
Ko ia naʻá ne fāʻeleʻi kimoutolú kuo siva ʻene ʻamanakí.
Vakai! Ko e siʻi taha ia ʻi he ngaahi puleʻangá,
Ko ha potu lala taʻeʻiai ha vai pea ko ha toafa.+
13 Koeʻuhi ko e houhau ʻa Sihová ʻe ʻikai nofoʻi ai ia;+
Te ne mātuʻaki hoko ko ha feituʻu maomaonganoa.+
ʻIlonga ha taha te ne fou atu ʻi Pāpilone te ne sio fakamamaʻu ki ai ʻi he fakalilifuʻia
Pea fai ha manuki* ki ai koeʻuhi ko e kotoa ʻo hono ngaahi tauteá.+
14 Mou fakatē tau ki Pāpilone mei he tafaʻaki kotoa,
ʻA kimoutolu kotoa ʻoku mou fusiʻi* ʻa e kaufaná.
15 Kailaʻaki ha kaila ʻo e tau kiate ia mei he tafaʻaki kotoa.
Kuó ne tukulolo.*
Mou faisāuni kiate ia.
Fai kiate ia ʻa e meʻa tofu pē kuó ne faí.+
16 Tuʻusi mei Pāpilone ʻa e tokotaha tūtūʻí
Pea mo e tokotaha ʻokú ne toʻo ʻa e hele tuʻusí ʻi he utu-taʻú.+
Koeʻuhi ko e fakamamahi ʻa e heletaá, ʻe foki ʻa e tokotaha taki taha ki hono kakai,
ʻE hola ʻa e tokotaha taki taha ki hono fonua tonu.+
17 “Ko e kakai ʻo ʻIsilelí ko ha fanga sipi movetevete.+ Kuo fakamovetevete kinautolu ʻe ha fanga laione.+ Naʻe ʻuluaki keina kinautolu ʻe he tuʻi ʻo ʻAsīliá;+ pea toki ngau ʻe Tuʻi Nepukanesa* ʻo Pāpiloné honau ngaahi huí.+ 18 Ko ia ai, ko e folofola eni ʻa Sihova ʻo e ngaahi kau tau, ko e ʻOtua ʻo ʻIsilelí: ‘Ko eni te u fai ha meʻa ki he tuʻi ʻo Pāpiloné pea ki hono fonuá ʻo hangē pē ko ia naʻá ku fai ki he tuʻi ʻo ʻAsīliá.+ 19 Pea te u fakafoki mai ʻa ʻIsileli ki hono kaikaiʻangá,+ pea te ne kaikai ʻi Kāmeli mo Pēsani,+ pea te ne mākona ʻi he ngaahi moʻunga ʻo ʻIfalemi+ mo Kiliatí.’”+
20 “ʻI he ngaahi ʻaho ko iá pea ʻi he taimi ko iá,” ko e fakahaaʻi ia ʻe Sihová,
“ʻE fai ha kumi ki he hia ʻa ʻIsilelí,
Ka ʻe halaʻatā ha hia,
Pea ʻe ʻikai ke maʻu ha ngaahi angahala ʻi Siuta,
He te u fakamolemoleʻi ʻa e faʻahinga ko ia kuó u tuku ke nau kei moʻuí.”+
21 “ʻAlu hake ki he fonua ʻo Melataimí mo e kakai ʻo Pēkotí.+
Tāmateʻi tavale kinautolu pea fakaʻauha ʻosi,”* ko e fakahaaʻi ia ʻe Sihová.
“Fai ʻa e meʻa kotoa kuó u tuʻutuʻuni atu kiate koé.
22 ʻOku ongo mai ha tau ʻi he fonuá,
Ko ha tuʻutāmaki lahi.
23 Ko e hāmala ē ʻa māmani kātoá kuo fesiʻi pea maumauʻi!+
Ko Pāpilone ē kuo hoko ko ha meʻa ke fai ai ha fakalilifuʻia ʻi he lotolotonga ʻo e ngaahi puleʻangá!+
24 Kuó u fakatoka ha tauhele kiate koe, pea kuó ke fihia ai, ʻe Pāpilone,
Pea naʻe ʻikai te ke ʻiloʻi ia.
Naʻe maʻu koe pea hamu,+
He ko Sihova ia naʻá ke fakafepaki ki aí.
25 Kuo fakaava ʻe Sihova hono fale tukuʻanga meʻataú,
Pea ʻokú ne toʻo mai ʻa e ngaahi meʻatau ʻo ʻene houhaú.+
He ko e ʻEiki Haú, ʻa Sihova ʻo e ngaahi kau tau, ʻoku ʻi ai haʻane ngāue
ʻI he fonua ʻo e kau Kalitiá.
26 Mou haʻu kiate ia mei he ngaahi feituʻu mamaʻó.+
Fakaava hono ngaahi feleokó.+
Fokotuʻu ia ʻo hangē ha fokotuʻunga uité.
ʻOfa ke ʻoua naʻa ʻi ai haʻane tokotaha ʻe toe.
27 Tāmateʻi tavale ʻa ʻene fanga pulu muí kotoa;+
Tuku ke nau ʻalu hifo ki honau tāmateʻí.
ʻOiauē ka ko kinautolu, he kuo hoko mai honau ʻahó,
ʻA e taimi ʻo honau tauteá!
28 ʻOku ongo mai ʻa e leʻo ʻo e faʻahinga ʻoku holá,
ʻA e faʻahinga ʻoku hola mei he fonua ko Pāpiloné,
Ke talaki ʻi Saione ʻa e faisāuni ʻa Sihova ko hotau ʻOtuá,
ʻA e faisāuni koeʻuhi ko hono temipalé.+
29 Ui ʻa e kau fana ngahaú ke nau ʻalu atu ki Pāpilone,
ʻApitanga takatakai kiate ia; ʻoua naʻa tuku ha taha ke hao.
Totongi fakafoki kiate ia ʻo fakatatau ki heʻene ngāué.+
Fai kiate ia ʻa e meʻa tofu pē kuó ne faí.+
He ko Sihova kuó ne ʻafungi ki aí,
ʻA e Tokotaha Māʻoniʻoni ʻo ʻIsilelí.+
30 Ko ia ʻe tō ʻa ʻene kau talavoú ʻi hono ngaahi malaʻe fakakoló,*+
Pea ʻe ʻauha* ʻa ʻene kau sōtiá kotoa ʻi he ʻaho ko iá,” ko e fakahaaʻi ia ʻe Sihová.
31 “Vakai! Ko hoku fili koe,+ ʻa koe tokotaha fakafetau,”+ ko e fakahaaʻi ia ʻe he ʻEiki Hau, ko Sihova ʻo e ngaahi kau tau,
“He kuo pau ke hoko mai ho ʻahó, ʻa e taimi ke ke fai mai ai ha fakamatala kiate au.
32 Ko koe, ʻa e tokotaha fakafetaú, te ke humu ʻo tō,
Pea heʻikai ha taha te ne fokotuʻu hake koe.+
Pea te u tutu ho ngaahi koló ʻaki ʻa e afi,
Pea te ne keina ʻa e meʻa kotoa pē ʻoku takatakai kiate koé.”
33 Ko e folofola eni ʻa Sihova ʻo e ngaahi kau tau:
“Ko e kakai ʻo ʻIsileli mo Siutá kuo ngaohikovia,
Pea ko e faʻahinga kotoa ʻoku nau taki pōpula kinautolú kuo nau puketuʻu kinautolu.+
Kuo nau fakafisi ke tuku ange kinautolu ke nau ō.+
34 Ka ʻoku mālohi ʻa honau Tokotaha-Huhuʻí.+
Ko Sihova ʻo e ngaahi kau tau ʻa hono huafá.+
Te ne mātuʻaki taukapoʻi kinautolu,+
Koeʻuhi ke ʻoange ha mālōlō ki he fonuá+
Pea ke ʻomi ʻa e hohaʻatuʻu ki he kakai ʻo Pāpiloné.”+
35 “ʻOku tuʻu atu ha heletā ki he kau Kalitiá,” ko e fakahaaʻi ia ʻe Sihová,
“Ki he kakai ʻo Pāpiloné pea ki hono kau houʻeikí pea ki hono kau potó.+
36 ʻOku tuʻu atu ha heletā ki he kau talanoa launoá,* pea ko ʻenau tōʻongá ʻe hangē ha valé.
ʻOku tuʻu atu ha heletā ki heʻene kau pāteʻi taú, pea te nau hoko ʻo manavahē.+
37 ʻOku tuʻu atu ha heletā ki heʻenau fanga hōsí mo ʻenau ngaahi saliote taú,
Pea ki he kotoa ʻo e ngaahi kakai kehekehe ʻi hono lotolotongá,
Pea te nau hoko ʻo hangē ha kakai fefiné.+
ʻOku tuʻu atu ha heletā ki heʻene ngaahi koloá, pea ʻe faʻao fakamālohi ia.+
38 ʻOku hoko ha fakaʻauha ki hono ngaahi vaí, pea ʻe mōmoa ia.+
He ko e fonua ia ʻo e ngaahi ʻīmisi kuo tongi,+
Pea koeʻuhi ko ʻenau ngaahi vīsone fakamanavaheé ʻoku hanganaki hoko ai ʻenau tōʻongá ʻo hangē ha seselé.
39 Ko ia ai, ʻe nofo fakataha ʻa e ngaahi meʻamoʻui ʻo e toafá pea mo e fanga manu ʻoku kāloú,
ʻE nofo ʻiate ia ʻa e fanga ʻositalesí.+
ʻE ʻikai ʻaupito ke toe nofoʻi ia,
Pea ʻe ʻikai te ne hoko ko ha feituʻu nofoʻanga ʻi he ngaahi toʻutangatá kotoa.”+
40 “Hangē pē ko ia naʻe hoko ʻi hono fakaʻauha ʻe he ʻOtuá ʻa Sōtoma mo Komola+ mo hona ngaahi kolo kaungāʻapí,”+ ko e fakahaaʻi ia ʻe Sihová, “ʻe ʻikai ke nofo ai ha taha, pea ʻe ʻikai ha tangata ʻe nofo ai.+
41 Vakai! ʻOku haʻu ha kakai mei he tokelaú;
Pea ʻe ueʻi hake ha puleʻanga lahi mo ha ngaahi tuʻi lalahi+ ke nau fai ha meʻa
Mei he ngaahi feituʻu taupotu taha ʻo e māmaní.+
42 ʻOku nau toʻo ʻa e kaufana mo e tao.+
ʻOku nau anga-fakamamahi pea ʻe ʻikai te nau fakahāhā ha meesi.+
ʻOku ongo mai ʻenau haʻú ʻo hangē ko e tahi ʻoku ʻuʻulú,+
ʻI heʻenau heka ʻi heʻenau fanga hōsí.
ʻOku nau tuʻu laine ʻo fakatē tau atu kiate koe ʻo hangē ha tangata pē ʻe tahá, siʻi ʻofefine ʻo Pāpilone.+
43 Kuo fanongo ʻa e tuʻi ʻo Pāpiloné ki he ongoongo ʻo fekauʻaki mo kinautolú,+
Pea ʻoku tāupe hifo ʻa hono ongo nimá.+
ʻOku maʻunimā ia ʻe he mamahí,
ʻO langa hangē ko ha fefine ʻoku fāʻelé.
44 “Vakai! ʻE ʻalu atu ha taha ki he ngaahi kaikaiʻanga malú ʻo hangē ha laione ʻoku haʻu mei he ngaahi vao ʻakau fihi ʻi he veʻe Sioataní, ka ʻi ha mōmeniti siʻi pē mei ai te u ʻai kinautolu ke nau hola meiate ia. Pea te u fakanofo ʻa e tokotaha kuo filí ke pule kiate ia.+ He ko hai ia ʻoku hangē ko aú, pea ko hai ia te ne poleʻi aú? Ko hai ha tauhi-sipi ʻe lava ke tuʻu ʻi hoku ʻaó?+ 45 Ko ia ai, mou fanongo mai, kau tangata, ki he tuʻutuʻuni kuo fai ʻe* Sihova ki Pāpiloné+ pea mo e meʻa kuó ne fakakaukauʻi ke fai ki he fonua ʻo e kau Kalitiá.
Ko e moʻoni ʻe toho atu ʻa e fanga kiʻi sipi ʻo e tākangá.
Te ne ʻai ʻa honau nofoʻangá ke hoko ʻo lala koeʻuhi ko kinautolu.+
46 ʻI he ongo mai ʻa hono hamu ʻo Pāpiloné, ʻe ngalulu ʻa e māmaní,
Pea ʻe ongona ha kalanga ʻi he lotolotonga ʻo e ngaahi puleʻangá.”+
51 Ko e folofola eni ʻa Sihová:
2 Te u fekauʻi atu ha kau ʻauʻau uite ki Pāpilone,
Pea te nau ʻauʻau ia pea ʻai ke kaʻanga ʻa hono fonuá;
Te nau ʻalu atu kiate ia mei hono ngaahi tafaʻakí kotoa ʻi he ʻaho ʻo e faingataʻá.+
3 Ke ʻoua naʻa fusi* ʻe he tokotaha fana ngahaú ʻa ʻene kaufaná.
Pea ke ʻoua naʻa tuʻu ha taha ʻokú ne tui ʻa hono kofu-taú.
ʻOua naʻa fakahaaʻi ha manavaʻofa ki heʻene kau talavoú.+
Tuku atu ʻa ʻene kau taú kotoa ki he fakaʻauha.
4 Pea te nau tō kuo tāmateʻi kinautolu ʻi he fonua ʻo e kau Kalitiá,
Kuo nau kafo lahi ʻi hono ngaahi halá.+
5 He kuo ʻikai ke liʻaki ʻe Sihova ʻo e ngaahi kau tau ʻa ʻIsileli mo Siuta.+ Kuo ʻikai te na hoko ʻo hangē ko ha ongo uitoú.
Ka ko honau fonuá* ʻoku fonu ʻi he halaiá mei he vakai ʻa e Tokotaha Māʻoniʻoni ʻo ʻIsilelí.
ʻOua naʻá ke ʻauha koeʻuhi ko ʻene faihalá.
He kuo hoko ʻa e taimi faisāuni ʻa Sihová.
ʻOkú ne totongi fakafoki kiate ia ʻa e meʻa kuó ne faí.+
7 Kuo hoko ʻa Pāpilone ko ha ipu koula ʻi he toʻukupu ʻo Sihová;
Naʻá ne ʻai ke konā ʻa e kotoa ʻo māmaní;
Kuo inu ʻa e ngaahi puleʻangá mei heʻene uainé;+
Ko e ʻuhinga ia kuo fakasesele ai ʻa e ngaahi puleʻangá.+
8 Kuo fakafokifā ʻa e tō ʻa Pāpiloné pea kuo ʻauha.+
Tangilāulau koeʻuhí ko ia!+
ʻOmi ha paʻame* koeʻuhi ko ʻene mamahí; heiʻilo naʻa faitoʻo ai ia.”
9 “Naʻa mau feinga ke faitoʻo ʻa Pāpilone, ka naʻe ʻikai malava ke ne moʻui.
Liʻaki ia pea ke tau ʻalu, ʻa e tokotaha taki taha ki hono fonua.+
He ko hono fakamāú kuo aʻu hake ki he langí;
ʻOku māʻolunga ia ʻo hangē ko e ngaahi ʻaó.+
10 Kuo fakahoko ʻe Sihova ʻa e fakamaau totonu maʻatautolu.+
Mou haʻu ke tau fai ha fakamatala ʻi Saione ki he ngāue ʻa Sihova ko hotau ʻOtuá.”+
11 “Fakangingila ʻa e ngaahi ngahaú;+ toʻo ʻa e ngaahi pā fuopotopotó.*
Kuo ueʻi ʻe Sihova ʻa e laumālie ʻo e ngaahi tuʻi ʻo e kau Mītiá,+
Koeʻuhí he ʻokú ne fakataumuʻa ke fakaʻauha ʻa Pāpilone.
He ko e faisāuni eni ʻa Sihová, ko ʻene faisāuni koeʻuhí ko hono temipalé.
12 Hiki hake ha fakaʻilonga*+ kae ʻohofi ʻa e ngaahi ʻā ʻo Pāpiloné.
ʻAi ke mālohi ʻa e kau kaʻaté, fokotuʻu ʻa e kau tangata leʻó.
ʻAi ke mateuteu ʻa e faʻahinga ki he malumú.
He kuo fokotuʻutuʻu ʻe Sihova ha palani,
Pea te ne fakahoko ʻa e meʻa kuó ne fakapapau atu te ne fai ki he kakai ʻo Pāpiloné.”+
13 “Siʻi fefine ʻoku nofo ʻi he ngaahi vai lahí,+
Mo ʻene fuʻu fokotuʻunga koloá,+
Kuo hoko mai ho ngataʻangá, ʻa e ngataʻanga* ʻo hoʻo fakatupu koloá.+
14 Kuo fuakava ʻa Sihova ʻo e ngaahi kau tau ʻiate ia pē,
‘Te u fakafonu koe ʻaki ʻa e kau tangata, ʻe hangē honau tokolahí ko e fanga heʻé,
Pea te nau kaila ʻi heʻenau ikunaʻi koé.’+
15 Ko e Tokotaha-Ngaohi ia ʻo e māmaní ʻaki hono mālohí,
Ko e Tokotaha ia naʻá ne fokotuʻu ʻa e fonua mahú ʻaki hono potó+
Pea naʻá ne falō atu ʻa e ngaahi langí ʻaki ʻene mahinó.+
16 ʻI heʻene ʻai ke ongona ʻa hono leʻó,
ʻOku ʻuʻulu ai ʻa e ngaahi vai ʻi he langí,
Pea ʻokú ne ʻai ʻa e ngaahi ʻaó* ke ʻalu hake mei he ngaahi ngataʻanga ʻo e māmaní.
17 ʻOku ngāue ʻa e tangata kotoa pē ʻo ʻikai ʻi he fakapotopoto pea ʻikai ʻi he ʻilo.
ʻE mā ʻa e tokotaha tuki ukamea kotoa pē koeʻuhi ko e ʻīmisi kuó ne tongí;+
He ko ʻene ʻīmisi mētalé* ko e koto loi,
18 Ko ha ʻataʻi meʻa*+ pē kinautolu, ko ha ngāue ke manukia.
ʻI he hoko mai ʻa e ʻaho ʻo honau fakamāuʻí, te nau ʻauha ai.
19 Ko e ʻInasi ʻo Sēkopé ʻoku ʻikai ke hangē ia ko e ngaahi ʻaitolí ni,
He ko ia ʻa e Tokotaha naʻá ne faʻu ʻa e meʻa kotoa pē,
Naʻa mo e konga mahuʻinga taha ʻo hono tofiʻá.+
Ko Sihova ʻo e ngaahi kau tau ʻa hono huafá.”+
20 “Ko ha pōvai koe kiate au, ko ha meʻatau ki he taú,
He fakafou ʻiate koe te u haveki ʻa e ngaahi kakaí.
Fakafou ʻiate koe te u fakaʻauha ʻa e ngaahi puleʻangá.
21 Fakafou ʻiate koe te u haveki ʻa e hōsí mo e tokotaha ʻoku heka aí.
Fakafou ʻiate koe te u haveki ʻa e saliote taú mo e tokotaha ʻoku heka aí.
22 Fakafou ʻiate koe te u haveki ʻa e tangatá mo e fefiné.
Fakafou ʻiate koe te u haveki ʻa e motuʻá mo e tamasiʻí.
Fakafou ʻiate koe te u haveki ʻa e talavoú mo e finemuí.
23 Fakafou ʻiate koe te u haveki ʻa e tauhi-sipí mo ʻene tākangá.
Fakafou ʻiate koe te u haveki ʻa e tokotaha ngoué mo ʻene fanga manu toho palaú.
Fakafou ʻiate koe te u haveki ʻa e kau kōvaná mo e kau tokoni pulé.
24 Pea te u totongi fakafoki ki Pāpilone mo e kakai kotoa ʻo Kalitiá
Ki he kovi kotoa kuo nau fai ʻi Saione ʻi homou ʻaó,”+ ko e fakahaaʻi ia ʻe Sihová.
25 “Ko eni ʻoku ou fakafepakiʻi koe,+ ʻe moʻunga faifakaʻauha,” ko e fakahaaʻi ia ʻe Sihová,
“ʻA koe ko e faifakaʻauha ʻo e māmaní kotoa.+
Te u mafao atu hoku nimá kiate koe ʻo tekaʻi hifo koe mei he ngaahi makatuʻú
Pea ʻai koe ko ha moʻunga kuo vela ʻosiʻosi.”
26 “ʻE ʻikai ke toʻo ʻe he kakaí meiate koe ha maka-tuliki pe ko ha maka fakavaʻe,
Koeʻuhí he te ke hoko ʻo maomaonganoa taʻengata,”+ ko e fakahaaʻi ia ʻe Sihová.
27 “Hiki hake ha fakaʻilonga* ʻi he fonuá.+
Ifi ha meʻaifi ʻi he lotolotonga ʻo e ngaahi puleʻangá.
Fakanofo* ʻa e ngaahi puleʻangá ke nau tauʻi ia.
Ui mai ʻa e ngaahi puleʻanga ʻo ʻAlalate,+ Mini, mo ʻAsikinasá+ ke nau tauʻi ia.
Fekauʻi atu kiate ia ha ʻōfisa fakakautau.
ʻAi ke ʻalu hake ʻa e fanga hōsí ʻo hangē ha pupunga heʻe kei totoló.
28 Fakanofo* ʻa e ngaahi puleʻangá ke nau tauʻi ia,
ʻA e ngaahi tuʻi ʻo Mītiá,+ ko hono kau kōvaná mo ʻene kau tokoni pulé kotoa
Mo e ngaahi fonua kotoa ʻoku nau pule ki aí.
29 Pea ʻe ngalulu mo tetetete ʻa e māmaní,
He ko e ngaahi fakakaukau ʻa Sihova ki Pāpiloné ʻe fakahoko
Ke ʻai ʻa e fonua ko Pāpiloné ko ha meʻa ke fai ai ha fakalilifuʻia, ʻo ʻikai ha taha ʻe nofo ai.+
30 Ko e kau pāteʻi tau ʻo Pāpiloné kuo tuku ʻenau faitaú.
ʻOku nau tangutu ʻi honau ngaahi hūfangaʻangá.
Kuo mole ʻa honau mālohí.+
Kuo nau hangē ha kau fefiné.+
Kuo tutu ʻa hono ngaahi ʻapí.
Kuo motuhi ʻa hono ngaahi meʻa fakamaʻú.+
31 ʻOku lele ʻa e tokotaha lele ʻe taha ke fetaulaki mo e tokotaha lele ʻe taha,
Pea mo e talafekau ʻe taha ke fetaulaki mo e talafekau ʻe taha,
Ke fakahaaʻi ki he tuʻi ʻo Pāpiloné kuo hamu ʻa hono koló ʻi he tafaʻaki kotoa pē,+
32 ʻA ia ko e ngaahi ʻāhangá kuo puke,+
Ko e ngaahi vaka pepailó kuo tutuʻaki ʻa e afi,
Pea ko e kau sōtiá ʻoku nau manavahē.”
33 He ko e folofola eni ʻa Sihova ʻo e ngaahi kau tau, ko e ʻOtua ʻo ʻIsilelí:
“Ko e ʻofefine ʻo Pāpiloné ʻoku hangē ha ʻauʻauʻanga uité.
Ko e taimi eni ke tāmalaki mālohi aí.
Kuo vavé ni ke hoko mai ʻa e taimi ʻo e utu-taʻú kiate ia.”
Kuó ne ʻai au ke u tatau mo ha ngeʻesi ipu.
ʻI he hangē ha fuʻu ngatá kuó ne folofua au;+
Kuó ne fakafonu hono keté ʻaki ʻa ʻeku ngaahi meʻa leleí.
Kuó ne fufulu au.
35 ‘Fakatauange ke fai ki Pāpilone ʻa e fakamālohi naʻe fai kiate au mo hoku sinó,’ ko e lea ia ʻa e kakai ʻo Saioné.+
‘Pea tuku ke ʻeke ʻa hoku totó ki he kakai ʻo Kalitiá,’ ko e lea ia ʻa Selusalemá.”
36 Ko ia ai, ko e folofola eni ʻa Sihová:
Te u ʻai ʻa hono tahí ke mātuʻu mo hono ngaahi vaikelí ke maha.+
37 Pea ʻe hoko ʻa Pāpilone ko ha ngaahi fokotuʻunga maka,+
Ko ha nofoʻanga ʻo e fanga siakalí,+
Ko ha meʻa ke fai ai ha fakalilifuʻia mo ha meʻa ke fai ha manuki* ki ai,
Pea ʻe ʻikai ha taha ʻe nofo ai.+
38 Te nau ngungulu fakataha kotoa ʻo hangē tofu pē ko e fanga laione muí.
Te nau ngungulu ʻo hangē ha fanga kiʻi ʻuhikiʻi laioné.”
39 “ʻI heʻenau loto-māfaná, te u teuteu ha kātoanga kai maʻanautolu pea ʻai kinautolu ke nau konā,
Koeʻuhí ke nau fiefia ai;+
Pea te nau mohe leva ʻi ha mohe taʻengata,
ʻA ia ʻe ʻikai te nau toe ʻā hake mei ai,”+ ko e fakahaaʻi ia ʻe Sihová.
40 “Te u ʻohifo kinautolu ʻo hangē ha fanga lami ke tāmateʻí,
Hangē ha fanga sipi tangata fakataha mo e fanga kosí.”
He kuo hoko ʻa Pāpilone ko ha meʻa ke fai ai ha fakalilifuʻia ʻi he lotolotonga ʻo e ngaahi puleʻangá!
42 Kuo hake mai ʻa e tahí ki Pāpilone.
ʻI he lahi ʻa hono ngaahi peaú kuo ʻufiʻufi ai ia.
43 Kuo hoko ʻa hono ngaahi koló ko ha meʻa ke fai ai ha fakalilifuʻia, ko ha fonua ʻoku ʻikai ha vai pea ko ha toafa.
Ko ha fonua ʻa ia ʻe ʻikai ke nofo ai ha taha pea ʻe ʻikai ke fou atu ai ha tangata.+
44 Te u fai ha tokanga kia Pēlī+ ʻi Pāpiloné,
Pea te u toʻo mei hono ngutú ʻa e meʻa kuó ne folofuá.+
ʻE ʻikai ke toe tafe kiate ia ʻa e ngaahi puleʻangá,
Pea ko e ʻā ʻo Pāpiloné ʻe holo.+
45 Hū ki tuʻa mei hono lotolotongá, ʻe hoku kakai!+
Hola mei he houhau kakaha ʻa Sihová+ telia hoʻomou moʻuí!+
46 ʻOua ʻe loto-siʻi pe ilifia ʻo fekauʻaki mo e fakamatala ʻe ongona ʻi he fonuá.
ʻI ha taʻu ʻe taha ʻe hoko mai ai ha fakamatala,
Pea ʻi he taʻu hoko maí ko ha toe fakamatala ʻe taha,
ʻO fekauʻaki mo e fakamālohi ʻi he fonuá pea mo e tuʻu ʻa e pule ki he pule.
47 Ko ia ai, vakai, ʻoku hoko mai ʻa e ngaahi ʻaho
ʻA ia te u fai ai ha tokanga ki he ngaahi ʻīmisi kuo tongi ʻo Pāpiloné.
ʻE fakamaaʻi ʻa hono fonuá kotoa,
Pea ko ʻene faʻahinga kotoa kuo tāmateʻí te nau tō ʻi hono lotolotongá.+
48 Ko e langí mo e māmaní pea mo e meʻa kotoa ʻoku ʻi aí
Te nau kaila fiefia koeʻuhí ko Pāpilone,+
He ʻe hoko mai ʻa e kau faifakaʻauhá kiate ia mei he tokelaú,”+ ko e fakahaaʻi ia ʻe Sihová.
49 “Naʻe ʻikai ngata pē ʻi hono ʻai ʻe Pāpilone ʻa e faʻahinga ʻo ʻIsileli kuo tāmateʻí ke nau toó+
Ka kuo tō foki ʻi Pāpilone ʻa e faʻahinga kuo tāmateʻi ʻi he kotoa ʻo e māmaní.
50 Ko kimoutolu ʻoku hola mei he heletaá, hokohoko atu, ʻoua ʻe tuʻu!+
Manatu kia Sihova mei he mamaʻó,
ʻOfa ke mou fakakaukau ki Selusalema.”+
51 “Kuo fakamaaʻi kimautolu, he kuo mau fanongo ki ha ngaahi luma.
Kuo ʻufiʻufi homau matá ʻe he maá,
He kuo haʻu ha kau muli* ki he ngaahi feituʻu toputapu ʻo e fale ʻo Sihová.”+
52 “Ko ia ai, vakai, ʻoku hoko mai ʻa e ngaahi ʻaho,” ko e fakahaaʻi ia ʻe Sihová,
“ʻA ia te u fai ai ha tokanga ki heʻene ngaahi ʻīmisi kuo tongí,
Pea ʻe toʻe ʻi hono fonuá kotoa ʻa e tokotaha ʻoku kafó.”+
53 “Neongo kapau ʻe ʻalu hake ʻa Pāpilone ki he langí,+
Neongo kapau te ne ʻai ke mālohi ʻa hono ngaahi hūfangaʻanga māʻolungá,
ʻE ʻalu atu meiate au ʻa hono kau faifakaʻauhá,”+ ko e fakahaaʻi ia ʻe Sihová.
54 “Fanongo! ʻOku ʻi ai ha kalanga mei Pāpilone,+
Ko e ongo mai ʻo ha fuʻu fakatamaki mei he fonua ʻo e kau Kalitiá,+
55 He ʻoku fakaʻauha ʻe Sihova ʻa Pāpilone,
Te ne fakasīlongoʻi ʻa hono fuʻu leʻó,
Pea ʻe ʻuʻulu ʻa ʻenau ngaahi peaú ʻo hangē ha ngaahi vai lahí.
ʻE fanongoa ʻa e ongo mai ʻa honau leʻó.
56 He ʻe hoko mai ʻa e faifakaʻauhá ki Pāpilone;+
ʻE puke ʻa ʻene kau pāteʻi taú,+
ʻE haveki ʻa ʻenau ngaahi kaufaná,
He ko Sihová ko ha ʻOtua ʻo e faitautea.+
Ko e moʻoni te ne totongi fakafoki.+
57 Te u ʻai ʻene kau houʻeikí mo ʻene kau tangata potó ke nau konā,+
ʻA ʻene kau kōvaná mo ʻene kau tokoni pulé mo ʻene kau pāteʻi taú,
Pea te nau mohe ʻi ha mohe taʻengata,
ʻA ia ʻe ʻikai te nau toe ʻā hake mei ai,”+ ko e fakahaaʻi ia ʻe he Tuʻí, ʻa ia ko hono huafá ko Sihova ʻo e ngaahi kau tau.
58 Ko e folofola eni ʻa Sihova ʻo e ngaahi kau tau:
“Ko e ʻā ʻo Pāpiloné, neongo ʻene matolú, ʻe fakaʻauha fakaʻaufuli,+
Pea ko hono ngaahi matapaá, neongo ʻene māʻolungá, ʻe tutuʻaki ia ʻa e afi.
ʻE fakaongosia noa ʻa e ngaahi kakaí;
ʻE fakaongosiaʻi ʻe he ngaahi puleʻangá kinautolu koeʻuhí pē ke tafunaki ʻa e afí.”+
59 Ko e lea eni naʻe fai ʻe Selemaia ko e palōfitá ko ha tuʻutuʻuni kia Sēlaia ko e foha ʻo Nelaia+ ko e foha ʻo Maʻaseiá ʻi heʻene ʻalu mo Tuʻi Setekaia ʻo Siutá ki Pāpilone ʻi he taʻu hono fā ʻo ʻene pulé; ko Sēlaia naʻe pule ki he ngaahi meʻa ʻa e tuʻí. 60 Naʻe hiki ʻe Selemaia ʻi ha tohi ʻe taha ʻa e faingataʻa kotoa ʻe hoko mai ki Pāpiloné, ʻa e ngaahi lea kotoa ko eni naʻe hiki ʻo fekauʻaki mo Pāpiloné. 61 ʻIkai ko ia pē, naʻe pehē ange ʻe Selemaia kia Sēlaia: “ʻI hoʻo aʻu ki Pāpilone pea sio ki aí, kuo pau ke ke lau leʻo-lahi ʻa e ngaahi lea kotoa ko ení. 62 Pea te ke pehē, ‘ʻE Sihova, kuó ke folofola ʻo fekauʻaki mo e feituʻú ni ʻe fakaʻauha ia pea liʻaki ʻo ʻikai ha taha ʻe nofo ai, ha tangata pe ko ha manu, pea ʻe hoko ia ʻo maomaonganoa taʻengata.’+ 63 Pea ʻi he ʻosi hoʻo lau ʻa e tohí ni, haʻihaʻi ki ai ha maka pea tolongi ia ki he loto ʻIufaletesí. 64 Peá ke pehē, ‘ʻE peheni ʻa e ngoto hifo ʻa Pāpiloné pea ʻe ʻikai ʻaupito ke toe ʻalu hake+ koeʻuhí ko e faingataʻa ʻoku ou ʻomi kiate iá; pea te nau hoko ʻo ongosia.’”+
Ko e ngataʻanga eni ʻo e ngaahi lea ʻa Selemaiá.
52 Naʻe taʻu 21 ʻa Setekaia+ ʻi heʻene hoko ko e tuʻí, pea naʻá ne pule ʻi he taʻu ʻe 11 ʻi Selusalema. Ko e hingoa ʻo ʻene faʻeé ko Hamutali+ ko e ʻofefine ʻo Selemaia ʻo Līpiná. 2 Naʻe hokohoko atu ʻene fai ʻa e meʻa naʻe kovi ʻi he vakai mai ʻa Sihová, ʻo hangē pē ko e meʻa kotoa naʻe fai ʻe Sihoiakimí.+ 3 Koeʻuhi ko e houhau ʻa Sihová naʻe hoko ai ʻa e ngaahi meʻá ni ʻi Selusalema pea mo Siuta, kae ʻoua kuó ne kapusi kinautolu mei hono ʻaó.+ Pea naʻe angatuʻu ʻa Setekaia ki he tuʻi ʻo Pāpiloné.+ 4 ʻI he taʻu hono hiva ʻo e pule ʻa Setekaiá, ʻi he māhina hono hongofulú, ʻi he ʻaho hono hongofulu ʻo e māhiná, naʻe haʻu ai ʻa Tuʻi Nepukanesa* ʻo Pāpiloné mo ʻene kau taú kotoa ke tauʻi ʻa Selusalema. Naʻa nau ʻapitanga ke tauʻi ia pea langa ha ʻā ʻo ʻākoloʻi takatakai ia.+ 5 Pea naʻe ʻākoloʻi ʻa e koló ʻo aʻu ki he taʻu hono 11 ʻo e pule ʻa Tuʻi Setekaiá.
6 ʻI he māhina hono faá, ʻi he ʻaho hono hiva ʻo e māhiná,+ naʻe mafatukituki ʻa e hongé ʻi he koló, pea naʻe ʻikai ha meʻakai maʻá e kakai ʻo e fonuá.+ 7 Faifai atu pē naʻe avangi ʻa e ʻā ʻo e koló, pea naʻe hola poʻuli ʻa e kau sōtiá kotoa mei he koló ʻi he matapā ʻi he vahaʻa ʻo e ongo ʻā naʻe ofi ki he ngoue ʻa e tuʻí, lolotonga ia naʻe takatakaiʻi ʻe he kau Kalitiá ʻa e koló; pea nau hoko atu ai ʻi he hala ʻo e ʻAlapá.+ 8 Ka naʻe tulimui ʻa e kau tau Kalitiá ʻi he tuʻí, pea naʻa nau maʻu ʻa Setekaia+ ʻi he toafa ʻo Sielikoó, pea naʻe movete mei hono tafaʻakí ʻa ʻene kau taú kotoa. 9 Naʻa nau puke leva ʻa e tuʻí pea ʻohake ia ki he tuʻi ʻo Pāpiloné ki Līpila, ʻi he fonua ko Hēmatí, pea naʻá ne hilifaki kiate ia ha tautea. 10 Pea naʻe tāmateʻi ʻe he tuʻi ʻo Pāpiloné ʻa e ngaahi foha ʻo Setekaiá ʻi hono ʻaó, pea naʻá ne tāmateʻi foki ʻa e kau houʻeiki kotoa ʻo Siutá ʻi ai ʻi Līpila. 11 Naʻe fakakuihi leva ʻe he tuʻi ʻo Pāpiloné ʻa e mata ʻo Setekaiá,+ ʻo haʻi ia ʻaki ʻa e meʻa-haʻi kopa, pea ʻave ia ki Pāpilone, pea tuku pilīsone ia ʻo aʻu ki he ʻaho ʻo ʻene maté.
12 ʻI he māhina hono nimá, ʻi he ʻaho hono hongofulu ʻo e māhiná, ʻa ia, ʻi he taʻu hono 19 ʻo e pule ʻa Tuʻi Nepukanesa* ko e tuʻi ʻo Pāpiloné, naʻe haʻu ai ʻa Nepusaletani ko e pule ʻo e kau kaʻaté, ʻa ia ko e tauhi ʻo e tuʻi ʻo Pāpiloné, ki Selusalema.+ 13 Naʻá ne tutu ʻa e fale ʻo Sihová,+ ko e fale* ʻo e tuʻí, pea mo e ngaahi fale kotoa pē ʻi Selusalemá; naʻá ne tutu foki mo e fale lalahi kotoa pē. 14 Pea ko e ngaahi ʻā takatakai ʻi Selusalemá naʻe holoki ia ʻe he kau tau Kalitia kotoa ʻa ia naʻe ō mo e pule ʻo e kau kaʻaté.+
15 Naʻe ʻave fakamālohi ʻe Nepusaletani ko e pule ʻo e kau kaʻaté ʻa e niʻihi ʻo e kakai māʻulaló mo e toenga ʻo e kakai naʻe toe ʻi he koló. Naʻá ne ʻave foki mo e faʻahinga naʻe mavahe mai ki he tuʻi ʻo Pāpiloné, pea pehē ki he toenga ʻo e kau tangata tufunga pōtoʻí.+ 16 Ka naʻe tuku ʻe Nepusaletani ko e pule ʻo e kau kaʻaté ʻa e niʻihi ʻo e kakai masiva taha ʻo e fonuá ke nau ngāue ʻi he ngoue kālepí pea hoko ko e kau ngāue fakatamaioʻeiki taʻetotongi.+
17 Pea naʻe haveki ʻe he kau Kalitiá ʻa e ongo fuʻu pou+ kopa ʻo e fale ʻo Sihová mo e ngaahi salioté+ pea mo e fuʻu ʻaiʻanga vai kopa+ naʻe ʻi he fale ʻo Sihová, pea naʻa nau ʻave kotoa ʻa e kopá ki Pāpilone.+ 18 Naʻa nau ʻave foki ʻa e ngaahi kané, ko e ngaahi sāvoló, ko e ngaahi helekosí, ko e ngaahi poulú,+ ko e ngaahi ipú,+ pea mo e naunau kopa kotoa pē naʻe ngāueʻaki ʻi he ngāue he temipalé. 19 Naʻe ʻave ʻe he pule ʻo e kau kaʻaté ʻa e ngaahi pēsoní,+ ko e ngaahi ʻaiʻanga malalá, ko e ngaahi poulú, ko e ngaahi kané, ko e ngaahi tuʻunga-māmá,+ ko e ngaahi ipú, pea mo e ngaahi poulu ʻa ia naʻe ngaohi mei he koula mo e siliva moʻoní.+ 20 Ko e meʻa ki he ongo fuʻu poú, ko e fuʻu ʻaiʻanga vaí, ko e fanga pulu kopa ʻe 12+ ʻi lalo ʻi he fuʻu ʻaiʻanga vaí, pea mo e ngaahi saliote naʻe ngaohi ʻe Tuʻi Solomone ki he fale ʻo Sihová, ko e kopa ʻo e ngaahi koloa kotoa ko ení naʻe ʻikai lava ke fua ʻa hono mamafá.
21 Ko e meʻa ki he ongo fuʻu poú, ko e fuʻu pou taki taha naʻe kiupite* ʻe 18 ʻa hono māʻolungá, ko ha afo fua kiupite ʻe 12 naʻe lava ke takatakaiʻi aí;+ ko hono matolú ko e fālahi ʻo e foʻi tuhu* ʻe fā, pea naʻe ava ʻi loto. 22 Pea ko e ʻuluʻi-pou ʻi aí naʻe ngaohi mei he kopá; pea ko e māʻolunga ʻo e ʻuluʻi-pou ʻe tahá ko e kiupite ʻe nima,+ pea ko e meʻa vangavangá mo e ngaahi foʻi pomikānite takatakai ʻi he ʻuluʻi-poú naʻe ngaohi kotoa ia mei he kopá. Ko e fuʻu pou hono uá naʻe hangē tofu pē ko iá, pea pehē ki he ngaahi foʻi pomikānité. 23 Naʻe ʻi ai ʻa e ngaahi foʻi pomikānite ʻe 96 ʻi hono ngaahi tafaʻakí; ʻi hono fakakātoá, naʻe ʻi ai ʻa e foʻi pomikānite ʻe 100 naʻe takatakai ʻi he meʻa vangavangá.+
24 Naʻe ʻave foki ʻe he pule ʻo e kau kaʻaté ʻa Sēlaia+ ko e taulaʻeiki lahí, ko Sēfanaia+ ko e taulaʻeiki hono uá, pea mo e kau leʻo matapā ʻe toko tolu.+ 25 Pea naʻá ne ʻave mei he koló ʻa e ʻōfisa ʻe taha ʻo e lotoʻaá ʻa ia naʻe pule ki he kau sōtiá, mo e kaungāmeʻa ofi ʻe toko fitu ʻo e tuʻí ʻa ia naʻe maʻu ʻi he koló, pea pehē ki he sekelitali ʻa e ʻeikitaú, ʻa e tokotaha naʻá ne fakatahatahaʻi ʻa e kakai ʻo e fonuá ki he ngāue fakakautaú, pea mo e kau tangata ʻe toko 60 mei he kakai lāuvale ʻo e fonuá ʻa ia naʻe maʻu ʻi he koló. 26 Naʻe ʻave kinautolu ʻe Nepusaletani ko e pule ʻo e kau kaʻaté ʻo ne ʻomi kinautolu ki he tuʻi ʻo Pāpiloné ki Līpila. 27 Naʻe taaʻi kinautolu ʻe he tuʻi ʻo Pāpiloné pea tāmateʻi kinautolu ʻi Līpila+ ʻi he fonua ko Hēmatí. Ko ia naʻe ʻave fakamālohi ai ʻa Siuta mei hono fonuá.+
28 Ko e kakai eni naʻe ʻave fakamālohi ʻe Nepukanesá:* ʻI he taʻu hono fitu ʻo ʻene pulé, ko e kau Siu+ ʻe toko 3,023.
29 ʻI he taʻu hono 18 ʻo e pule ʻa Nepukanesá,*+ naʻe ʻave ai ʻa e kakai ʻe toko 832 mei Selusalema.
30 ʻI he taʻu hono 23 ʻo e pule ʻa Nepukanesá,* naʻe ʻave fakamālohi ai ʻa e kau Siu ʻe Nepusaletani ko e pule ʻo e kau kaʻaté, ko e kakai ʻe toko 745.+
ʻI hono fakakātoá, ko e kakai ʻe toko 4,600 naʻe ʻave fakamālohí.
31 Pea ʻi he taʻu hono 37 ʻo e ʻave fakamālohi ʻo Tuʻi Sihoiakini+ ʻo Siutá, ʻi he māhina hono 12, ʻi he ʻaho hono 25 ʻo e māhiná, ko Tuʻi ʻIvili-melotaki ʻo Pāpiloné, ʻi he taʻu naʻá ne hoko ai ko e tuʻí, naʻá ne tuku ange ʻa* Tuʻi Sihoiakini ʻo Siutá pea ʻomi ia ki tuʻa mei he pilīsoné.+ 32 Naʻá ne lea anga-ʻofa kiate ia pea ʻai ʻa hono taloní ke māʻolunga ange ia ʻi he ngaahi taloni ʻo e ngaahi tuʻi kehe naʻe ʻiate ia ʻi Pāpiloné. 33 Ko ia naʻe vete ʻe Sihoiakini ʻa hono ngaahi kofu fakapōpulá, pea naʻá ne kai maʻu pē ʻi he ʻao ʻo e tuʻí ʻi he ngaahi ʻaho kotoa ʻo ʻene moʻuí. 34 Naʻe ʻoange kiate ia ha ʻinasi tuʻumaʻu ʻo e meʻakaí mei he tuʻi ʻo Pāpiloné, ʻi he ʻaho ki he ʻaho, ʻo aʻu ki he ʻaho ʻo ʻene maté, ʻi he ngaahi ʻaho kotoa ʻo ʻene moʻuí.
Ngalingali ʻoku ʻuhingá “ʻOku Hakeakiʻi ʻe Sihova.”
Pe “fili.”
Fakafoʻilea, “ki muʻa ke ke haʻu mei manavá.”
Pe “fakamavaheʻi.”
Pe “tokotaha kei siʻi.”
Fakafoʻilea, “taha ʻoku ʻā.”
Pe “kulo feimeʻakai ʻoku fakamanga lahi ʻa hono ngutú.”
Fakafoʻilea, “puhi,” ʻo fakahaaʻi ha afi ʻoku tapili hake mei lalo.
Fakafoʻilea, “noʻo ho kongalotó.”
Pe “ikunaʻi koe.”
Pe “ʻofa mateaki.”
Pe “ngaahi motu.”
Pe “foa,” ngalingali mei he maká.
Pe “Memifisi.”
ʻA ia, ko ha mangaʻivai ʻo e Vaitafe Nailá.
ʻA ia, ko e Vaitafe ʻIufaletesí.
Pe “ʻalakalai.”
Fakafoʻilea, “ʻi hono māhiná.”
Pe “ngaahi ʻotua mulí.”
Pe “noʻo ʻi he malí?”
Fakafoʻilea, “ha ʻAlepea.”
Fakafoʻilea, “laʻe.”
Fakafoʻilea, “ʻai ke mafuli hoku matá.”
Pe “fehokotaki fakasino.”
Pe “ngaahi ʻotua mulí.”
Pe ngalingali, “ko homou husepāniti.”
Fakafoʻilea, “ʻo e ngaahi kau tau ʻa e ngaahi puleʻangá.”
Fakafoʻilea, “kaumeʻá.”
Pe “ʻotua fakamaá.”
Pe “fuʻu pou fakaʻilonga.”
Pe “Tuki homou fatafatá.”
Pe “loto-toʻa ʻa e.”
Pe “loto-toʻa ʻa e.”
Ko hono fakalea fakaemaau ʻi he tuʻunga ko ha tokotahá, ʻoku fakahaaʻi nai ai ʻa e fakaʻofaʻia pe kaungāongoʻi.
Fakafoʻilea, “kau asiasi,” ʻa ia, ko e faʻahinga ʻoku nau siofi ʻa e koló ke fakapapauʻi ʻa e taimi ke ʻohofi aí.
Pe “hoku fatú.”
Fakafoʻilea, “ʻi he holisi ʻo hoku mafú.”
Pe ngalingali, “ʻo e ongo mai ʻa e kaila ʻo e tau.”
Pe “fuʻu pou fakaʻilongá.”
Pe “potó.”
Pe “ʻikai ke u ongoʻi fakaʻiseʻisa.”
Pe “meʻa-vali-mata.”
ʻA ia, ko ha feituʻu faiʻanga meʻa tefito ia ʻo e koló ki he kakaí.
Fakafoʻilea, “naʻe ʻikai te nau hoko ʻo vaivai.”
Fakafoʻilea, “ngaahi haʻí.”
Pe ngalingali, “ʻOku ʻikai te ne moʻui.”
ʻA ia, ko e folofola ʻa e ʻOtuá.
Fakafoʻilea, “ʻa kimoutolu kakai vale ʻoku ʻikai hamou loto.”
Fakafoʻilea, “Fakatoputapuʻi ʻa e.”
Pe “foʻou.”
Pe “foʻou.”
Fakafoʻilea, “ʻOku taʻekamu ʻa honau telingá.”
Fakafoʻilea, “faʻahinga ʻoku lahi ʻa honau ngaahi ʻahó.”
Pe “fasi.”
Pe “fakatamulu.”
Pe “fakahinohinó.”
Fakafoʻilea, “langā.”
ʻA ia, ko Selemaia.
Fakafoʻilea, “Ko kinautolu,” ʻo ʻuhingá ki he ngaahi fale kotoa ʻo e temipalé.
Pe “fānau tamai-maté.”
Pe “mei ʻitāniti ki ʻitāniti.”
Pe “feilaulau fakakohu.”
Fakafoʻilea, “tuʻu hengihengi hake ʻo lea.”
Ko e hingoa fakalakanga ʻo ha ʻotua fefine naʻe lotu ki ai ʻa e kau ʻIsileli tafoki ʻo fakafepaki ki he moʻoní; ngalingali ko ha ʻotua fefine ʻo e fakafanaú.
Pe “fakaʻitaʻí.”
Pe “faleʻi.”
Fakafoʻilea, “ʻo u tuʻu hengihengi hake ʻi he ʻaho ki he ʻaho ʻo fekauʻi atu kinautolu.”
Fakafoʻilea, “naʻa nau fakakekeva honau kiá.”
Fakafoʻilea, “ʻoku tuʻusi ia mei honau ngutú.”
Pe “fakatapuí.”
Pe “hiva ʻo e tengihia.”
Sio ki he Lea mo Hono ʻUhinga, “Kihena.”
Pe “naʻe ʻikai ʻaupito teitei haʻu ki heʻeku fakakaukaú.”
Sio ki he Lea mo Hono ʻUhinga, “Kihena.”
Pe “taimi kotofá.”
Pe “hiki fononga aí.”
Pe “fakahinohino.”
Pe “kau sekelitalí.”
Pe “fasi.”
Pe “fakatamulu.”
Pe “paʻame fakafiemālie.” Sio ki he Lea mo Hono ʻUhinga.
Pe “toketā.”
Pe “hiva ʻo e tengihia.”
Pe “fakahinohinó.”
Pe “ngaahi hiva ʻo e tengihiá.”
Pe “hiva ʻo e tengihiá ni.”
ʻA ia, ko ha feituʻu faiʻanga meʻa tefito ia ʻo e koló ki he kakaí.
Pe “ko ha muna.”
Pe “hele ʻauhaní.”
Pe “ko ha muna.”
Ko e veesi 11 naʻe ʻuluaki hiki ia ʻi he lea faka-Alameá.
Pe “maó.”
Pe ngalingali, “ngaohi ʻa e ngaahi matapā.”
Pe “ʻīmisi mētale kuo haká.”
Pe “mānava.”
Pe “Ko ha muna.”
Pe “makataaʻi.”
Pe “fasí.”
Hangehangē ko e lea kia Selemaia.
Pe “Ke hoko ʻo pehē.”
Fakafoʻilea, “tuʻu hengihengi hake ʻo enginaki.”
Pe “fai ha feilaulau fakakohu.”
Pe “ʻotua fakamaá.”
ʻA ia, ko Selemaia.
ʻA ia, ko e ngaahi feilaulau naʻe fai ʻi he temipalé.
Pe “ngaahi ongoʻi lolotó.” Fakafoʻilea, “ʻa e kofuuá.”
Pe “ngaahi ongoʻi lolotó.” Fakafoʻilea, “honau kofuuá.”
Pe “pulepulé.”
Pe ngalingali, “ʻOkú ne fakamamahi.”
Fakafoʻilea, “kakano.”
Pe “ʻākoloʻi.”
Pe “tokotaha ʻItiopea.”
Pe “fakamaá.”
Pe “ʻa ʻenau faʻahinga māʻulaló.”
Pe “ngaahi fakatafenga vaí; ngaahi lepá.”
Pe “feilaulau uité.” Sio ki he fakamatala ʻi lalo ʻi he Liv 2:1.
Pe “mahaki.”
Pe ngalingali, “faʻahinga fakamaau ʻe fā.” Fakafoʻilea, “fāmili ʻe fā.”
Pe ngalingali, “hanganaki ʻalu fakaholomui.”
Pe “ongoʻi fakaʻiseʻisá.”
Pe ngalingali, “Kuó ne hoko ʻo mā mo ongoʻi ngalivale.”
Sio ki he Lea mo Hono ʻUhinga.
Fakafoʻilea, “ʻOua naʻa toʻo atu au.”
Pe “ha pōpoaki fakahalaia.”
Pe “hoko ko ʻeku tangata-lea.”
Pe “mālohi ʻiate koe.”
Ko e tōʻonga fakapangani ʻo e tengihiá ʻoku hangehangē naʻe fai ʻi ʻIsileli tafoki ʻo fakafepaki ki he moʻoní.
Fakafoʻilea, “ʻi he kotoa ʻo honau ngaahi ʻalungá.”
Sio ki he Lea mo Hono ʻUhinga.
Pe ngalingali, “He kuo tutu kimoutolu ʻo hangē ha afí ʻi heʻeku ʻitá.”
Pe “tangata mālohi.”
Pe “tangata mālohi.”
Pe ngalingali, “ʻoku ʻikai lava ke faitoʻo.”
Pe “ngaahi ongoʻi lolotó.” Fakafoʻilea, “ʻa e kofuuá.”
Fakafoʻilea, “kiate aú,” hangehangē ko e ʻuhingá kia Sihova.
Pe “fakaʻauha kinautolu ʻo liunga ua.”
Sio ki he Lea mo Hono ʻUhinga.
Fakafoʻilea, “fakakekeva honau kiá.”
Pe “tongá.”
Fakafoʻilea, “ʻo hangē ko e meʻa naʻe hā lelei ki he tufunga-ʻumeá ke ne ngaohí.”
Pe “te u ongoʻi fakaʻiseʻisa.”
Pe “te u ongoʻi fakameʻapangoʻia.”
Fakafoʻilea, “fakakaukauʻi.”
Pe “feilaulau fakakohu.”
Fakafoʻilea, “mapumapu.”
Pe “fakahinohinó.”
Fakafoʻilea, “taaʻi ia ʻaki ʻa e ʻeleló.”
Pe “naʻe ʻikai ʻaupito teitei haʻu ki heʻeku fakakaukaú.”
Fakafoʻilea, “mapumapu.”
Fakafoʻilea, “fakakekeva honau kiá ke ʻoua te nau.”
Pe “ngaahi ongoʻi lolotó.” Fakafoʻilea, “ʻa e kofuuá.”
Fakafoʻilea, “Nepukalesa,” ko hano sipela ia ʻe taha.
Pe “fakatafoki atu.”
Pe “kakai ko iá.”
Pe “mahaki.”
Fakafoʻilea, “Nepukalesa,” ko hano sipela ia ʻe taha.
Pe “te ne hao.”
Pe “talaló.”
Pe “paea.”
Fakafoʻilea, “fakatoputapuʻi.”
ʻOku toe ui foki ko Sihoaasi.
Ko e tuʻutuʻuni ko ení ʻoku ngalingali naʻe fai ki Selusalema.
Fakafoʻilea, “langā.”
Fakafoʻilea, “Hangē pē ko ʻeku moʻuí.”
ʻOku toe ui foki ko Sihoiakini mo Sēkonaia.
Fakafoʻilea, “Nepukalesa,” ko hano sipela ia ʻe taha.
Pe “fonua.”
Fakafoʻilea, “hono ngaahi ʻahó.”
Pe “ʻea.”
Pe “tafoki ʻo fakafepaki ki he moʻoní.”
Fakafoʻilea, “fakaivimālohiʻi ʻa e nima ʻo e.”
Pe “ʻOku nau fakafonu kimoutolu ʻaki ʻa e ngaahi ʻamanaki ko e koto ngeʻesi.”
Pe “pōpoaki fakakavenga.” Ko e foʻi lea faka-Hepeluú ʻoku ʻuhinga ua: “Ko ha pōpoaki fakaʻotua mafatukituki” pe “ko ha meʻa ʻoku fakakavenga.”
Pe “pōpoaki fakakavenga.”
Pe “pōpoaki fakakavenga.”
Pe “pōpoaki fakakavengá.”
Pe “pōpoaki fakakavenga.”
Pe “pōpoaki fakakavenga.”
Pe “pōpoaki fakakavenga.”
Fakafoʻilea, “Nepukalesa,” ko hano sipela ia ʻe taha.
ʻOku toe ui foki ko Sihoiakini mo Konaia.
Pe ngalingali, “mo e kau langa ʻo e ngaahi ʻaá.”
Pe “mahaki.”
Fakafoʻilea, “Nepukalesa,” ko hano sipela ia ʻe taha.
Pe “ki he.”
Fakafoʻilea, “tuʻu hengihengi hake ʻo lea.”
Fakafoʻilea, “tuʻu hengihengi hake ʻo fekauʻi.”
Fakafoʻilea, “Nepukalesa,” ko hano sipela ia ʻe taha.
Fakafoʻilea, “mapumapu.”
Pe “tauteaʻi ʻa e.”
ʻOku hā ngali ko ha hingoa eni ʻe taha ki Pēpeli (Pāpilone).
Fakafoʻilea, “ʻa e kakano kotoa.”
Pe “ki he.”
Pe “punou hifo.”
Pe “ongoʻi fakaʻiseʻisa ai ʻi he.”
Pe “fakahinohinó.”
Fakafoʻilea, “tuʻu hengihengi hake ʻo fekauʻi.”
Pe “palasi.”
Pe “te ne ongoʻi fakaʻiseʻisa ʻi he.”
Pe “tuʻuʻanga ʻo e temipalé.”
Pe “ha konga fonua māʻolunga ʻuluʻakauʻiá.”
Pe “feinga ke fakamokomoko ʻa e fofonga ʻo Sihová.”
Pe “Setekaia,” ʻo fakatatau ki he liliu ʻi he lea faka-Sīliá mo e faka-ʻAlepeá pea mo e ngaahi tatau tohinima faka-Hepelū ʻe tolu.
Fakafoʻilea, “ki ha taha pē ʻoku taau ʻi heʻeku vakaí.”
Pe “mahaki.”
Fakafoʻilea, “maʻu ha mālōlō.”
Pe “palasi.”
ʻA ia, ko e fuʻu ʻaiʻanga vai kopa ʻo e temipalé.
Pe “palasi.”
Pe “Ke hoko ʻo pehē!”
Pe “mahaki.”
Pe ngalingali, “kau langa ʻo e ngaahi ʻaá.”
Pe “mahaki.”
Pe ngalingali, “mafahifahi.”
Fakafoʻilea, “mapumapu.”
Fakafoʻilea, “tuʻu hengihengi hake ʻo fekauʻi.”
Fakafoʻilea, “Nepukalesa,” ko hano sipela ia ʻe taha.
Pe “ukamea ki he kiá.”
Fakafoʻilea, “lahi.”
Pe “kinautolu.”
Pe “kau muli.”
Pe “fakatonutonu.”
Pe ngalingali, “ke nau lāngilangiʻia.”
Fakafoʻilea, “ʻe tukupā ʻi hono lotó.”
Pe “kuo hokohoko atu ai ʻeku fakahaaʻi ʻa e ʻofa mateaki kiate koé.”
Pe “ʻalu atu ʻi he meʻe ʻa e faʻahinga ʻoku nau kakatá.”
Pe “ngaahi teleʻa.” Sio ki he Lea mo Hono ʻUhinga.
Pe “toe fakafoki mai.”
Pe “ʻi he ngaahi meʻa lelei meia.”
Fakafoʻilea, “ngako.”
Pe “ʻene fānaú.”
Pe “fānau ʻa e.”
Pe ngalingali, “honau husepānití.”
Pe “ngaahi tuʻutuʻuni.”
Pe “talalo.”
Pe “efuefu ngakongakoá,” ʻa ia, ko e efuefu kuo fonu he ngako ʻo e ngaahi feilaulaú.
Fakafoʻilea, “Nepukalesa,” ko hano sipela ia ʻe taha.
Pe “palasi.”
Ko ha sikeli naʻe tatau ia mo e kalami ʻe 11.4 (ʻaunise ʻe 0.367). Sio ki he Fakamatala Fakalahi E14.
Fakafoʻilea, “sikeli ʻe fitu mo e konga siliva ʻe hongofulu.”
Fakafoʻilea, “ki he fatafata ʻo.”
Pe “fungani koe ʻi he fekauʻaki mo hoʻo ngaahi taumuʻá.”
Pe “mahakí.”
Fakafoʻilea, “kakano kotoa.”
Fakafoʻilea, “Nepukalesa,” ko hano sipela ia ʻe taha.
Fakafoʻilea, “tuʻu hengihengi hake ʻo akoʻi.”
Sio ki he Lea mo Hono ʻUhinga, “Kihena.”
Pe “ke tutu ʻi he afí.”
Pe “naʻe ʻikai ʻaupito teitei haʻu ki heʻeku fakakaukaú.”
Pe “ngaahi meʻa lelei.”
Pe “ʻea.”
Pe “ngaahi tuʻutuʻuni.”
Fakafoʻilea, “Nepukalesa,” ko hano sipela ia ʻe taha.
Fakafoʻilea, “ʻi he ʻahó ni.”
Pe “mahaki.”
Pe “ngaahi lokí.”
Fakafoʻilea, “Sonatapi,” ko e fakanounou ia ʻo e Sionatapí.
Fakafoʻilea, “Sonatapi,” ko e fakanounou ia ʻo e Sionatapí.
Fakafoʻilea, “Nepukalesa,” ko hano sipela ia ʻe taha.
Fakafoʻilea, “tuʻu hengihengi hake ʻo lea.”
Fakafoʻilea, “tuʻu hengihengi hake ʻo fekauʻi.”
Fakafoʻilea, “Sonatapi,” ko e fakanounou ia ʻo e Sionatapí.
Fakafoʻilea, “takainga ʻo ha tohi.”
Fakafoʻilea, “takainga ʻo e tohi.”
Pe “tohí.”
Pe “tohí.”
Pe “loki kai.”
Pe “sikalaipé.”
Pe “tohí.”
Pe “palasi.”
Pe “kau ʻōfisa ʻo e lotoʻaá.”
Pe “tohí.”
Pe “tohi.”
Ko e konga ki mui ʻo Nōvemá mo e konga ki muʻa ʻo Tīsemá. Sio ki he Fakamatala Fakalahi E15.
Pe “tohi.”
ʻOku toe ui foki ko Sihoiakini mo Sēkonaia.
Fakafoʻilea, “Nepukalesa,” ko hano sipela ia ʻe taha.
Fakafoʻilea, “tuku ia ʻi he fale ʻo e ngaahi meʻa kīʻí.”
Fakafoʻilea, “ki he fale ʻo e lepá.”
Pe “palasí.”
Pe “mahaki.”
Fakafoʻilea, “ʻalu atu.”
Pe “te ne hao.”
Fakafoʻilea, “nima.”
Pe “ʻōfisa ʻo e lotoʻā.”
Pe “palasi.”
Pe “palasi.”
Pe “palasi.”
Fakafoʻilea, “ʻalu atu.”
Fakafoʻilea, “ʻalu atu.”
Fakafoʻilea, “ʻalu atu.”
Pe “palasi.”
Pe “Ko e kau tangata ʻoku melino mo koé.”
Fakafoʻilea, “Nepukalesa,” ko hano sipela ia ʻe taha.
Pe fakatatau ki ha vahevahe kehe ʻo e leá ʻi he konga tohi faka-Hepeluú, ko e “Nelikala-salesa, Samika-nipo, Sasekimi, mo e Lapisalisi.”
Pe “pule faimaná (tokotaha vavalo fakaʻasitalolosia).”
Fakafoʻilea, “Nepukalesa,” ko hano sipela ia ʻe taha.
Pe “palasi.”
Pe ngalingali, “ngaahi ngāue fakapōpula.”
Fakafoʻilea, “Nepukalesa,” ko hano sipela ia ʻe taha.
Pe “ko e ʻōfisa pule ʻi he lotoʻaá.”
Pe “ko e pule faimaná (tokotaha vavalo fakaʻasitalolosia).”
Pe “Te ke hao.”
Fakafoʻilea, “ke tuʻu ʻi he ʻao ʻo e.”
Fakafoʻilea, “ʻa ia naʻe mei he hako ʻo e puleʻangá.”
Pe ngalingali, “anovai lahi.”
Pe “ongoʻi mamahi.”
Pe “ke nofo ai ʻi ha kiʻi taimi.”
Pe “mahaki.”
Fakafoʻilea, “Nepukalesa,” ko hano sipela ia ʻe taha.
Pe “ngaahi temipale.”
Pe “ʻo ʻikai hoko ki ai ha kovi.”
Pe “ngaahi maka fakamanatu māʻolunga mo tumuʻaki-tōtao.”
Pe “ʻo e Fale (Temipale) ʻo e Laʻaá,” ʻa ia, ko e Heliopolisi.
Pe “ngaahi temipale.”
Pe “Memifisi.”
Fakafoʻilea, “tuʻu hengihengi hake ʻo fekauʻi.”
Pe “ongoʻi loto-lavea.”
Pe “mahaki.”
Ko e hingoa fakalakanga ʻo ha ʻotua fefine naʻe lotu ki ai ʻa e kau ʻIsileli tafoki ʻo fakafepaki ki he moʻoní; ngalingali ko ha ʻotua fefine ʻo e fakafanaú.
Ko e hingoa fakalakanga ʻo ha ʻotua fefine naʻe lotu ki ai ʻa e kau ʻIsileli tafoki ʻo fakafepaki ki he moʻoní; ngalingali ko ha ʻotua fefine ʻo e fakafanaú.
Ko e hingoa fakalakanga ʻo ha ʻotua fefine naʻe lotu ki ai ʻa e kau ʻIsileli tafoki ʻo fakafepaki ki he moʻoní; ngalingali ko ha ʻotua fefine ʻo e fakafanaú.
Ko e hingoa fakalakanga ʻo ha ʻotua fefine naʻe lotu ki ai ʻa e kau ʻIsileli tafoki ʻo fakafepaki ki he moʻoní; ngalingali ko ha ʻotua fefine ʻo e fakafanaú.
Fakafoʻilea, “Nepukalesa,” ko hano sipela ia ʻe taha.
Pe “ʻamanekina ha.”
Pe “kakai.”
Pe “te u tuku koe ke ke hao.”
Fakafoʻilea, “Nepukalesa,” ko hano sipela ia ʻe taha.
Ko ha kiʻi pā, naʻe faʻa toʻo ʻe he kau fana ngahaú.
Fakafoʻilea, “malaki.”
Pe “tāmate.”
Sio ki he Lea mo Hono ʻUhinga.
Fakafoʻilea, “Nepukalesa,” ko hano sipela ia ʻe taha.
Pe “Memifisi.”
Fakafoʻilea, “taimi kotofá.”
Fakafoʻilea, “Hangē pē ko ʻeku moʻuí.”
ʻA ia, ko e tokotaha ikunaʻi ʻo ʻIsipité.
Pe “Memifisí.”
Pe ngalingali, “ʻE hoko ia ko ha potu lala.”
Pe “tā fefié.”
ʻA ia, ko Tēpesi.
Fakafoʻilea, “Nepukalesa,” ko hano sipela ia ʻe taha.
Pe “fakatonutonu.”
ʻA ia, ko Kēliti.
ʻA ia, te nau tele honau ʻulú ʻi he tengihia mo e mā.
Pe “talaló.”
Pe “feituʻu malu māʻolungá.”
Pe “talaló.”
Pe “fonua tokalelei mo māʻolungá; tumuʻaki-lafalafá.”
Pe ngalingali, “ʻi he kelekele mōmoá.”
Pe “fonua tokalelei mo māʻolungá; tumuʻaki-lafalafá.”
Fakafoʻilea, “meʻatui.”
Pe “hohaʻa.”
ʻA ia, ko ha fuluta ʻoku ifi ʻi he tangilāulau ʻi ha putu.
Pe “hohaʻa.”
ʻA ia, ko ha fuluta ʻoku ifi ʻi he tangilāulau ʻi ha putu.
ʻA ia, ko ha feituʻu faiʻanga meʻa tefito ia ʻo e koló ki he kakaí.
Pe ngalingali, “ʻa e ongo ʻo e kaila ʻo e tau.”
Pe “ngaahi kolo fakaongó.”
Pe “ngaahi ʻā sipí.”
Pe “ngaahi talaló.”
Fakafoʻilea, “mapumapu.”
Pe “ki he taumuʻa ʻa.”
ʻA ia, ko ha feituʻu faiʻanga meʻa tefito ia ʻo e koló ki he kakaí.
Fakafoʻilea, “Nepukalesa,” ko hano sipela ia ʻe taha.
Fakafoʻilea, “Nepukalesa,” ko hano sipela ia ʻe taha.
Pe “ʻi he tapa kotoa pē.”
Fakafoʻilea, “tupuʻanga.”
Pe “fuʻu pou fakaʻilonga.”
Ko e foʻi lea faka-Hepeluú naʻe felāveʻi nai ia mo ha foʻi lea ki he “kinohaʻá” pea ʻoku ngāueʻaki ia ko ha fakahaaʻi ʻo e taʻetokaʻi.
Fakafoʻilea, “mapumapu.”
Fakafoʻilea, “malaki.”
Fakafoʻilea, “tuku atu hono nimá.”
Fakafoʻilea, “Nepukalesa,” ko hano sipela ia ʻe taha.
Pe “pea tuku atu kinautolu ki he fakaʻauha.”
Pe “Tuku atu ia ki he fakaʻauha.”
Fakafoʻilea, “malaki.”
ʻA ia, ko ha feituʻu faiʻanga meʻa tefito ia ʻo e koló ki he kakaí.
Fakafoʻilea, “sīlongo.”
Pe “kau palōfita loí.”
Pe “ki he taumuʻa ʻa.”
ʻOku hā ngali ko ha hingoa eni ʻe taha ki Kalitia.
Fakafoʻilea, “malaki.”
ʻA ia, ko e fonua ʻo e kau Kalitiá.
Sio ki he Lea mo Hono ʻUhinga.
Pe ngalingali, “fakafonu ʻa e ngaahi faʻoʻanga ngahaú.”
Pe “fuʻu pou fakaʻilonga.”
Fakafoʻilea, “fua.”
Pe “maó.”
Pe ngalingali, “ngaohi ʻa e ngaahi matapā.”
Pe “ʻīmisi mētale kuo haká.”
Pe “mānava.”
Pe “muna.”
Pe “fuʻu pou fakaʻilonga.”
Fakafoʻilea, “Fakatoputapuʻi.”
Fakafoʻilea, “Fakatoputapuʻi.”
Fakafoʻilea, “Nepukalesa,” ko hano sipela ia ʻe taha.
Fakafoʻilea, “mapumapu.”
ʻOku hā ngali ko ha hingoa eni ʻe taha ki Pēpeli (Pāpilone).
Pe “kau sola.”
Fakafoʻilea, “Nepukalesa,” ko hano sipela ia ʻe taha.
Fakafoʻilea, “Nepukalesa,” ko hano sipela ia ʻe taha.
Pe “palasi.”
Ko ha kiupite naʻe tatau ia mo e senitimita ʻe 44.5 (ʻinisi ʻe 17.5). Sio ki he Fakamatala Fakalahi E14.
Ko e fālahi ʻo e foʻi tuhu ʻe tahá naʻe tatau ia mo e senitimita ʻe 1.85 (ʻinisi ʻe 0.73). Sio ki he Fakamatala Fakalahi E14.
Fakafoʻilea, “Nepukalesá,” ko hano sipela ia ʻe taha.
Fakafoʻilea, “Nepukalesá,” ko hano sipela ia ʻe taha.
Fakafoʻilea, “Nepukalesá,” ko hano sipela ia ʻe taha.
Fakafoʻilea, “hiki hake ʻa e ʻulu ʻo.”