ʻUhinga Naʻá Ku Mavahe Ai mei he Sēkasí

Fakamatala fai ʻe Marcelo Neím

NAʻE fāʻeleʻi au ʻi Montevideo, ʻUlukuei. Neongo naʻe manavahē-ʻOtua ʻeku ongo mātuʻá, naʻe ʻikai te na kau ki ha lotu. Naʻe mālōlō ʻa ʻeku faʻeé ʻi ha fakatuʻutāmaki ʻi heʻeku taʻu faá nai, pea naʻe tauhi au ʻe he ngaahi kāinga ʻa ia naʻa nau feinga ke fakahūhū ha ngaahi tefitoʻi moʻoni lelei kiate au. ʻI heʻeku taʻu 20, naʻá ku fili ai ke u folau ke u ʻilo ʻa e ngaahi fonuá mo e ngaahi anga-fakafonua kehekehé.

ʻI Kolomupia, naʻá ku kamata ngāue ai ʻi he sēkasí ko ha tokotaha-tokoni. Naʻá ku sio ki he mata fiefia ʻa e kau fakaʻaliʻalí ʻi he taimi naʻe pasipasi ai ʻa e kakaí, pea naʻá ku loto ke u hoko ko ha taha ʻo kinautolu. Ko ia naʻá ku ako ai ke u fai ha fakaʻaliʻali ʻaki ʻa e pasikalá, ʻo ʻalu pē taimí mo ʻeku ngāueʻaki ʻa e ngaahi pasikala naʻe toe iiki ange ʻo aʻu ki heʻeku fakaʻaliʻali ʻi ha pasikala naʻe senitimita pē ʻe 12 hono lōloá—ko e taha ʻi he fanga kiʻi pasikala iiki taha ʻi he māmaní. Naʻe hao pē ʻi hoku ʻaofinimá. Naʻe kamata ke u manakoa ʻi he ngaahi feituʻu lahi ʻi ʻAmelika Tonga. ʻI heʻeku taʻu 25, naʻá ku tūʻuta ai ʻi Mekisikou peá u ngāue ʻi ha ngaahi sēkasi.

Liliu Lahi ʻEku Moʻuí

Naʻá ku manako ʻaupito ʻi he moʻui ʻo e sēkasí. Naʻe lahi ʻa e folaú, nofo ʻi he ngaahi hōtele lelei tahá pea kai ʻi he ngaahi falekai maʻá e kau māʻolungá. ʻI he taimi tatau, naʻá ku ongoʻi naʻe ʻikai ha taumuʻa ʻeku moʻuí pea naʻe ʻikai haʻaku ʻamanaki ki he kahaʻú. ʻI he efiafi ʻe taha naʻe liliu ʻeku moʻuí. Naʻe ʻomai ʻe he tokotaha faipolokalama ʻi he sēkasí ha tohi naʻá ne maʻu ʻa ia ko hono kaveingá ko e Revelation​—Its Grand Climax At Hand!a ʻI he hili ʻa e fakaʻaliʻalí naʻá ku lau ia ʻo aʻu ki he pongipongi ʻe tahá. Neongo naʻe ʻikai faingofua ke u mahinoʻi ʻa e tohí, naʻe tohoakiʻi ʻa ʻeku tokangá ʻi he fakamatala ko ia ʻo fekauʻaki mo e manu fekai kula ʻahoʻahó pea mo e fefine feʻauaki ʻi he tohi Fakahaá. (Fakahā 17:3–​18:8) Pea ʻi he lolotonga ʻeku fakamaʻa ha taulani naʻá ku fakatau, naʻá ku maʻu ai ha tohi ʻe taha mei he kau faipulusi tatau pē, ʻa ia ko e Te Ke Malava ʻo Moʻui Taʻengata he Palataisi ʻi he Māmaní.* Naʻe faingofua ange eni ke u mahinoʻi, pea naʻá ku fakatokangaʻi ʻi he taimi pē ko iá, kuo pau ke u malanga. Ko ia naʻá ku kamata vahevahe leva ʻa e meʻa naʻá ku akó ki he tokotaha kotoa pē naʻá ku fetaulaki mo ia.

ʻI he ʻalu ʻa e taimí, naʻá ku ongoʻi naʻe fiemaʻu ke u fetuʻutaki ki he Kau Fakamoʻoni ʻa Sihová. Ko e fika telefoni ʻa e taʻahine Fakamoʻoni ʻa ia naʻá ne tuku ʻa e tohí ʻi hoku kaungāmeʻá naʻe hiki ia ʻi he tohí. Ko ia naʻá ku tā leva ki ai, pea naʻe fakaafeʻi au ʻe heʻene tamaí ki ha fakataha-lahi ʻa e Kau Fakamoʻoni ʻa Sihová ʻi Tijuana, Mekisikou. Naʻe maongo kiate au ʻa e ʻofa naʻe fakahāhā aí pea naʻá ku fakapapauʻi ko e lotu moʻoní eni. ʻI he feituʻu kotoa pē naʻe ʻalu ai ʻa e sēkasí, naʻá ku ʻalu ki he Fale Fakatahaʻanga ʻi he feituʻu ko iá peá u maʻu ai ʻa e ngaahi tohi ke u tufa ʻi he founga ʻikai anga-mahení.

Naʻe ʻi ai ʻa e meʻa naʻe hoko naʻá ne toe fakapapauʻi mai kiate au naʻá ku ʻi he hala totonú. Naʻe fakaafeʻi au ʻe he Kau Fakamoʻoní ki he Fakamanatu ʻo e pekia ʻa Kalaisí pea nau fakamatala ki he mahuʻinga ko ia ke maʻu ia ʻe he kau Kalisitiané. Ka ko e pō ko iá ne fakaava ai ʻa e sēkasí, pea naʻá ku fakakaukau ʻe ʻikai malava ke u ʻalu ki ai. Naʻá ku lotu lahi kia Sihova ʻo fekauʻaki mo ia, pea naʻe ʻi ai ha meʻa fakaʻohovale naʻe hoko. ʻI he houa ʻe ua ki muʻa pea fai ʻa e fakaʻaliʻalí, naʻe mate ʻa e ʻuhilá! Ko ia, naʻe malava ai ke u ʻalu ki he Fakamanatú peá u toki foki ki he fakaʻaliʻalí. Naʻe hā ngali naʻe tali ʻe Sihova ʻa ʻeku lotú.

ʻI he taimi ʻe taha, naʻá ku tufa ha ngaahi tuleki lolotonga ʻeku talitali he lainé ʻi ha pangikē. Naʻe sio mai kiate au ha mātuʻa Kalisitiane peá ne fakaongoongoleleiʻi ʻa ʻeku faivelengá. Naʻá ne fakalototoʻaʻi au ke u malanga ʻi ha founga fokotuʻutuʻu maau, ʻi he malumalu ʻo e tataki ʻa e fakatahaʻangá. Naʻá ne fakamatalaʻi anga-ʻofa mai naʻe fiemaʻu ke u fai ha ngaahi liliu ʻi heʻeku moʻuí ke u lava ai ʻo fai ia. ʻI he taimi naʻá ku fakakaukau ai ki he ngaahi liliu ko ení, naʻe tuʻuaki mai kiate au ha ngāue totongi lahi ʻi ha sēkasi ʻi he ʻIunaite Seteté. Naʻá ku veiveiua. Naʻá ku loto ke u ʻalu ki he ʻIunaite Seteté, ka ʻo kapau te u tali ia, naʻe ʻikai te u ʻilo pe ko e hā ʻe hoko ki he ʻalunga ko eni naʻá ku toki kamata aí. Ko e ʻuluaki ʻahiʻahi eni kiate aú, pea naʻe ʻikai te u loto ke fakalotomamahiʻi ʻa Sihova. Naʻá ku tukuange ʻa e sēkasí neongo ʻa e taʻetui ki ai ʻa hoku ngaahi kaungā fakaʻaliʻalí, peá u hoko ʻo kau ki ha fakatahaʻanga, kosi ʻa hoku ʻulú peá u fai mo e ngaahi liliu kehe ʻi heʻeku founga moʻuí kae malava ke u tauhi kia Sihova.

Ko ha Moʻui Fakafiemālie ʻo ʻIkai ha Fakaʻiseʻisa

ʻI he 1997, ki muʻa siʻi peá u papitaiso ko e taha ʻo e Kau Fakamoʻoni ʻa Sihová, naʻe hoko mai ʻa e ʻahiʻahi hono uá—ko ha toe faingamālie ke u ʻalu ki he ʻIunaite Seteté, ka ke u fakaʻaliʻali ʻi he taimi ko ení ʻi ha polokalama televīsone ʻiloa ʻi Miami pea ʻe totongi kotoa ʻa ʻeku ngaahi fakamolé. Ka naʻá ku loto ke u papitaiso pea fakahoko ʻa ʻeku fakatapui kia Sihová. Ko ia naʻe ʻikai te u tali ʻa e tuʻuakí ʻo ʻohovale lahi ai ʻa e kau fakafofonga ʻo e polokalamá.

Kuo ʻeke mai ʻe he niʻihi pe ʻoku ou fakaʻiseʻisa ʻi heʻeku tukuange ʻa e moʻui ʻo e sēkasí. Ko ʻeku talí, heʻikai ʻaupito te u fetongi ʻa e kaumeʻa mo e ʻofa ʻa Sihová ʻaki ʻa e moʻui naʻá ku maʻu ki muʻá. Neongo ko e ngāue foʻou ko eni ko ha faifekau Kalisitiane taimi-kakató ʻoku ʻikai ke pasipasiʻi ai au, pe te u ongoongoa pe maʻu ai haʻaku paʻanga lahi ʻi he māmani ko ení, ka ʻoku ʻikai ke u kei ongoʻi ʻoku taʻehataumuʻa ʻeku moʻuí. ʻOku ou maʻu ʻa e ʻamanaki mahuʻinga ʻo e moʻui ʻi ha māmani palataisi pea mo hono talitali mai ʻa ʻeku faʻeé ʻi he toetuʻú.—Sione 5:​28, 29.

[Fakamatala ʻi lalo]