Vahe 14

Ko Hai ʻOku Ō ki Hēvaní, pea Ko e Hā Hono ʻUhingá?

1. ʻE anga-fēfē hono tali ʻe he niʻihi tokolahi ʻa e fehuʻí ni, Ko hai ʻoku ō ki hēvaní, pea ko e hā hono ʻuhingá?

ʻOKU PEHĒ ʻe he tokolahi, ‘ʻOku ō ʻa e kakai lelei kotoa pē ki hēvani.’ Kaekehe, ʻi hono ʻeke ʻa e ʻuhinga ʻoku nau ō ai ki hēvaní, ʻoku nau pehē nai: ‘Ke nau ʻi ai mo e ʻOtuá,’ pe ‘Ko e pale ia ʻo e fai leleí.’ Ko e hā ʻoku akoʻi ʻe he Tohitapú ʻo fekauʻaki mo e meʻá ni?

2, 3. (a) Ko e hā ʻoku tau ʻilo pau ai ʻe ō ki hēvani ʻa e niʻihi ʻi he faʻahinga ʻo e tangatá? (e) Ko e hā ʻa e fehuʻi ʻoku fiemaʻu ke talí?

² ʻOku fakahā mahino ʻe he Tohitapú naʻe fokotuʻu hake ʻa Sīsū mei he pekiá peá ne toki ʻalu ki hēvani. ʻIkai ngata ai, ʻokú ne pehē ʻe toe ʻohake ki ai ʻa e niʻihi kehe ʻi he faʻahinga ʻo e tangatá. ʻI he pō ki muʻa peá ne pekiá, naʻe fakahā ʻe Sīsū ki heʻene kau ʻapositolo angatonú: “ʻI he ʻapi o ʻeku Tamai ʻoku lahi ʻa e ngaahi nofoʻanga: ka ne ʻikai, pehē kuo u tala kiate kimoutolu, he ko ʻeku ʻalu ʻeni ke teuteu ha potu moʻomoutolu. Pea neongo te u ʻalu ʻo teuteu ha potu moʻomoutolu, ka ʻoku ou toe haʻu pe, pea te u maʻu kimoutolu kiate au; koeʻuhi ko e potu ʻoku ou ʻi ai, ke mou ʻi ai foki.”​—Sione 14:​1-3.

³ ʻOku hā mahino, naʻe fakahā ʻe Sīsū ki heʻene kau ʻapositoló ʻe ʻohake kinautolu ki hēvani ke nau ʻi ai mo ia. Naʻe faʻa leaʻaki ʻe he ʻapositolo ko Paulá ki he muʻaki kau Kalisitiané ʻo fekauʻaki mo e ʻamanaki fakaofo ko iá. Ko e fakatātā, naʻá ne tohi: “He ko hoʻotautolu kolo ʻoku tuʻu ʻi langi, ʻa ia ko e potu ʻoku tau nofoʻaki tali ʻa e haʻu mei ai ha fakamoʻui, ko e ʻEiki ko Sisu Kalaisi.” (Filipai 3:​20, 21; Loma 6:5; 2 Kolinitō 5:​1, 2) Fakatuʻunga ʻi he ngaahi talaʻofa peheé, kuo laui miliona ʻa e faʻahinga kuo nau fokotuʻu ʻa e moʻui fakahēvaní ʻi honau lotó. Ka ʻe ō ʻa e kakai lelei kotoa pē ki hēvani?

ʻOKU Ō KI HĒVANI ʻA E KAKAI LELEI KOTOA PĒ?

4, 5. Ko e hā ʻa e fakamoʻoni ʻoku ʻi ai naʻe ʻikai ʻalu ki hēvani ʻa Tēvita mo Siope?

⁴ Taimi siʻi pē mei he fokotuʻu hake ʻo Sīsū mei he pekiá, naʻe fakahā ʻe he ʻapositolo ko Pitá ki ha fuʻu kakai Siu tokolahi: “ʻI he pēteliake ko Tēvita; kuo pekia ia pea telio foki, kaeʻumaʻā ʻoku ʻiate kitautolu hono fonualoto ʻo aʻu ki he ʻaho ni. He talaʻehai ne ʻalu hake ʻa Tēvita ki he langi.” (Ngāue 2:​29, 34) Ko ia naʻe ʻikai ʻalu ʻa e tangata lelei ko Tēvitá ki hēvani. Fēfē ʻa e tangata māʻoniʻoni ko Siopé?

⁵ ʻI heʻene faingataʻaʻiá, naʻe lotu ʻa Siope ki he ʻOtuá: “Taumaiā ke ke faʻo au ʻi Hetesi [ko e faʻitoka]! ʻO ke fufū au kaeʻoua ke lolou hoʻo houhau na! ʻO ke tuʻutuʻuni haku taimi, pea toki manatu mai!” Naʻe fakakaukau atu ʻa Siope ʻi he taimi te ne mate aí heʻikai te ne toe ʻilo pea ongoʻi ha meʻa ʻi he faʻitoká. Naʻá ne ʻilo heʻikai te ne ʻalu ki hēvani. Ka naʻá ne maʻu ha ʻamanaki, ʻo hangē ko ia naʻá ne fakamatala: “Ka pekia ha tangata, te ne toe moʻui koa? ʻA, te u lava noa ke tatali ke ʻosi hoku fatongia tau [ko e taimi kotofa ʻi he faʻitoka]; Kaeʻoua ke aʻu mai hoku liliu; Te ke toki ui, pea te u tali atu ʻe au.”​—Siope 14:​13-15.

6, 7. (a) Ko e hā ʻokú ne fakahaaʻi naʻe ʻikai ʻalu ki hēvani ha taha naʻe mate ki muʻa ʻia Kalaisi? (e) Ko e hā ʻe hoko ki he faʻahinga angatonu kotoa naʻe mate ki muʻa ʻia Kalaisí?

⁶ Ko Sione, ʻa ia naʻá ne papitaiso ʻa Sīsū, ko ha tangata lelei mo ia foki. Ka naʻe pehē ʻe Sīsū: “Ko ia oku jii taha be i he buleaga oe lagi oku lahi ia iate ia.” (Mātiu 11:​11, PM) ʻOku peheé koeʻuhi ʻe ʻikai ʻalu ʻa Sione Papitaiso ki hēvani. ʻI he ʻi māmani ʻa Sīsuú, ʻa ia ko e hili ia ʻa e taʻu lahi hake he 4,000 mei he angatuʻu ʻa ʻĀtama mo ʻIví, naʻá ne pehē: “Pea kuo teʻeki ke ʻalu hake ha toko taha ʻo hu ki langi, ngata pe ʻiate ia naʻe ʻalu hifo mei he langi, ko e Fanautama ʻa tangata.”​—Sione 3:13.

⁷ Ko ia ai, fakatatau ki he fakamatala tonu pē ʻa Sīsū, naʻe teʻeki ai ʻalu hake ki hēvani ha tangata he taʻu kotoa ko ia ʻe 4,000 ʻo e hisitōlia ʻo e tangatá ʻo aʻu mai ki hono taimí. Ko Tēvita, Siope mo Sione Papitaiso te nau maʻu ha toetuʻu ki he moʻui ʻi he māmaní. Ko hono moʻoní, ko e kātoa ʻo e kau tangata mo e kau fefine angatonu naʻa nau mate ki muʻa ʻi he pekia ʻa Sīsuú naʻa nau maʻu ʻa e ʻamanaki ke toe moʻui ʻi he māmaní, ʻikai ʻi hēvani. Te nau toetuʻu mai ke hoko ko e niʻihi ʻo e faʻahinga fakaemāmani ʻi he malumalu ʻo e puleʻanga ʻo e ʻOtuá.​—Sāme 72:​7, 8; Ngāue 17:31.

ʻUHINGA ʻOKU Ō AI ʻA E FAʻAHINGA ANGATONU ʻE NIʻIHI KI HĒVANÍ

8. ʻOku mahuʻinga ʻa e ngaahi tali ki he ngaahi fehuʻi fē, pea ko e hā hono ʻuhingá?

⁸ Ko e hā ʻa e ʻuhinga naʻe ʻalu ai ʻa Sīsū ki hēvaní? Ko e hā ʻa e ngāue ke ne fai aí? ʻOku mahuʻinga ʻa e ngaahi tali ki he ngaahi fehuʻí ni. ʻOku mahuʻingá koeʻuhi ko e faʻahinga ʻoku ō ki hēvaní te nau kau fakataha mo Sīsū ʻi heʻene ngāué. ʻOku nau ō ki hēvaní ki he taumuʻa pē ko iá.

9, 10. Fakatatau kia Tāniela, ko hai tukukehe ʻa Kalaisi ʻe pule ʻi he founga-pule ʻa e ʻOtuá?

⁹ Kuo tau ako ʻi he ngaahi vahe ki muʻá ʻe pule mai ʻa Sīsū ko e tuʻi ʻo e founga-pule fakahēvani ʻa e ʻOtuá ki he māmani foʻou palataisí. Ki muʻa fuoloa pea haʻu ki māmani ʻa Sīsuú naʻe kikiteʻi ʻe he tohi Tānielá ʻi he Tohitapú ko e “foha oe tagata” ʻe “foaki kiate ia ae bule.” Ko Sīsū Kalaisi ʻa e “Foha oe tagata.” (Maʻake 14:​41, 62, PM) Pea ʻoku hoko atu ʻa e lea ʻa Tānielá: “Koe bule taegata a ene bule, aia e ikai mole, bea ko hono buleaga e ikai fakaauha.”​—Tāniela 7:​13, 14, PM.

¹⁰ Kaekehe, ʻoku mahuʻinga ke fakatokangaʻi heni ʻi he tohi ʻa Tānielá ʻoku ʻikai ke pule tokotaha pē ʻa e “foha oe tagata.” ʻOku pehē ʻe he Tohitapú: “Koe buleaga moe bule, . . . e tuku ki he kakai koe kau maonioni ae Fugani Maoluga, bea ko hono [honau, NW] buleaga koe buleaga taegata.” (Tāniela 7:​27, PM) Ko e ongo kupuʻi lea “he kakai” mo e “honau puleʻanga” ʻokú na ʻai kitautolu ke tau ʻilo ʻe ʻi ai ʻa e niʻihi kehe ʻe pule fakataha mo Kalaisi ʻi he founga-pule ʻa e ʻOtuá.

11. Ko e hā ʻokú ne fakahā ko e muʻaki kau muimui ʻo Kalaisí te nau kaungāpule fakataha mo ia?

¹¹ ʻI he pō fakamuimui naʻe nofo ai ʻa Sīsū mo ʻene kau ʻapositolo angatonu ʻe toko 11 naʻá ne fakahā te nau hoko ko e kau pule fakataha mo ia ʻi he puleʻanga ʻo e ʻOtuá. Naʻá ne fakahā kiate kinautolu: “Ko kimoutolu ʻa e faʻahinga kuo nōfoʻi fakataha mo au ʻi hoku ngaahi ʻahiʻahí; pea ʻoku ou fuakava mo kimoutolu, ʻo hangē ko e fuakava ʻa ʻeku Tamai kiate au, ki ha puleʻanga.” (Luke 22:​28, 29, NW) Ki mui, naʻe kau ʻa e ʻapositolo ko Paula mo Tīmoté ʻi he fuakava pe fakapapau ko eni ki ha puleʻangá. ʻI he ʻuhinga ko iá naʻe tohi ʻa Paula kia Tīmote: “Kapau ʻoku tau kataki, te tau kaungā-tuʻi foki mo ia.” (2 Tīmote 2:11 [12, PM]) ʻIkai ngata ai, naʻe tohi ʻa e ʻapositolo ko Sioné ʻo fekauʻaki mo e faʻahinga te nau “pule ko e ngaahi tuʻi ki he māmani” fakataha mo Sīsū Kalaisi.​—Fakahā 5:​9, 10, NW; Fakahā 20:6.

12. Ko e hā ʻa e moʻoniʻi meʻa ʻo fekauʻaki mo e “hako” ʻo ʻĒpalahamé ʻokú ne fakahaaʻi ʻe ʻi ai ʻa e kau kaungāpule mo Kalaisi?

¹² Ko ia ko e faʻahinga ʻoku ō ki hēvaní ʻoku nau ō ki ai ke hoko ko e kau kaungāpule fakataha mo Kalaisi ʻi he founga-pule fakahēvani ʻa e ʻOtuá. Neongo ko e “hako” tefito ʻo e talaʻofá ʻa Sīsū, ʻoku fili ʻe he ʻOtuá ʻa e niʻihi kehe mei he faʻahinga ʻo e tangatá ke pule fakataha mo Sīsū ʻi he puleʻangá. Ko ia, ʻoku nau hoko ko e konga ʻo e “hako” ni, ʻo hangē ko ia ʻoku pehē ʻe he Tohitapú: “Kapau ko e konga ʻo Kalaisi ʻakimoutolu, pea ta ko e hako ʻo Epalahame ʻa kimoutolu, ko e ngaahi ʻea ʻo fakatatau ki he talaʻofa.”​—Kalētia 3:​16, 29; Sēmisi 2:5.

KO E TOKO FIHA ʻOKU Ō KI HĒVANÍ?

13. (a) Ko e hā heʻikai ō ai ʻa e ngaahi kiʻi pēpeé ki hēvaní? (e) Naʻe anga-fēfē hono fakamatalaʻi ʻe Sīsū ʻa e fika ʻo e faʻahinga ʻoku nau maʻu ʻa e Puleʻangá?

¹³ Koeʻuhi te nau pule ki he māmaní, ʻoku hā mahino ko e faʻahinga ʻoku ō ki hēvaní ko e kau muimui ʻosi ʻahiʻahiʻi mo sivisiviʻi ʻo Kalaisi. ʻOku ʻuhinga ení ʻe ʻikai ʻave ki hēvani ʻa e ngaahi kiʻi pēpeé pe fānau iikí, ʻa ia kuo ʻikai ʻahiʻahiʻi kakato he lolotonga ʻo e ngaahi taʻu ʻo e ngāue faka-Kalisitiané. (Mātiu 16:24) Kaekehe, ko e faʻahinga taʻu siʻi pehē ʻa ia kuo maté ʻoku nau maʻu ʻa e ʻamanaki ko e fokotuʻu mai ke moʻui ʻi māmani. (Sione 5:​28, 29) Ko ia ko e fika fakakātoa ʻo e faʻahinga ʻoku ō ki hēvaní ʻe tokosiʻi pē ʻi hono fakahoa ki he tokolahi ʻa ia te nau maʻu ʻa e moʻui ʻi he māmaní he malumalu ʻo e Puleʻangá. Naʻe fakahā ʻe Sīsū ki heʻene kau ākongá: “Fanga sipi toko siʻi, ʻoua ʻe manavahe; he kuo finangalo ʻe hoʻomou Tamai ke ʻatu kiate kimoutolu ʻa e puleʻanga.”​—Luke 12:32.

14. Ko e toko fiha ʻoku ʻi he “fanga sipi toko siʻi” ʻa ia ʻoku ō ki hēvaní?

¹⁴ Ko e fika tokosiʻi fēfē ʻe ʻi he kalasi ʻo e kau pule ʻo e Puleʻangá? Ko e kau ʻapositoló pē mo e muʻaki kau muimui kehe ʻo Sīsuú ʻe kau ki aí? ʻIkai, ʻoku fakahaaʻi ʻe he Tohitapú ʻe tokolahi ange ai ʻa e kau ki he “fanga sipi toko siʻi.” ʻIa Fakahā 14:​1, 3 ʻoku pehē ai ʻe he Tohitapú: “Pea u vakai, pea ta naʻe tuʻu ʻa e Lami [Sīsū Kalaisi] ʻi he funga moʻunga ko Saione [fakahēvani], pea naʻe ʻiate ia ha toko taha kilu ma toko fa mano ma toko fa afe, . . . ʻa ia ne fakatau [pe ʻohake] mei mamani.” Fakatokangaʻi ko e kakai pē ʻe toko 144,000 ʻoku hā mo e Lamí, ko Sīsū Kalaisi, ʻi he Moʻunga Saione fakahēvaní. (Hepelū 12:22) Ko ia ʻi he ʻikai ke ō ki hēvani ʻa e kakai lelei kotoa pē, ʻoku fakahā ʻe he Tohitapú ko e faʻahinga ʻosi ʻahiʻahiʻi mo angatonu ʻe toko 144,000 pē ʻe ʻave ki ai ke pule fakataha mo Kalaisí.

KO E ʻUHINGA ʻOKU FILI AI MEI MĀMANÍ

15. Ko e hā ʻoku fili ai ʻe he ʻOtuá ʻa e kau pule ki he Puleʻangá mei he lotolotonga ʻo e faʻahinga ʻo e tangatá?

¹⁵ Ka ko e hā ʻoku fili ai ʻe he ʻOtuá ʻa e kau pulé ni mei he lotolotonga ʻo e faʻahinga ʻo e tangatá? Ko e hā kuo ʻikai ʻai ai ʻa e kau ʻāngeló ke nau pule fakataha mo Kalaisí? Sai, naʻe poleʻi ʻi heni ʻi māmani ʻa e totonu ʻa Sihova ke pulé. Naʻe malava ke ʻahiʻahiʻi ʻi heni ʻi he malumalu ʻo e fakafepaki mei he Tēvoló ʻa e angatonu ʻa e tangatá ki he ʻOtuá. Naʻe fakamoʻoniʻi ʻi heni ʻe Sīsū ʻa ʻene mateaki kakato ki he ʻOtuá ʻi hono ʻahiʻahiʻi pea mo hono foaki ʻo ʻene moʻuí ko ha feilaulau maʻá e faʻahinga ʻo e tangatá. Ko ia ai, naʻe fokotuʻutuʻu ʻe Sihova ke ʻave mei he māmaní ha “fanga sipi toko siʻi” ko e faʻahinga ke kaungā-fakataha mo hono ʻAló ʻi he puleʻanga fakahēvaní. Ko kinautolu ʻa e faʻahinga naʻa nau fakamoʻoniʻiʻaki ʻa ʻenau angatonu ki he ʻOtuá ʻoku loi ʻa e taukaveʻi ʻe Sētane ʻo pehē ʻoku tauhi ʻe he tangatá ʻa e ʻOtuá ʻi he ngaahi ʻuhinga siokita pē. Ko ia ai, ʻoku feʻungamālie ʻa hono ngāueʻaki ʻe Sihova ʻa e faʻahinga ʻo e tangatá ni ki hono lāngilangí.​—ʻEfesō 1:​9-12.

16. Ko e hā ke tau fakamālō loto-hounga ai naʻe moʻui ʻi māmani ʻa e kau pule ʻi he Puleʻangá?

¹⁶ Pehē foki, fakakaukau ki he lelei ʻe ʻi ai ʻi he hoko ko e kau pule ʻa e faʻahinga naʻa nau fakamoʻoniʻi ʻa ʻenau angatonu ki he ʻOtuá ʻi he māmaní, pea ko e tokolahi ʻo kinautolu kuo aʻu ʻo nau feilaulauʻi ʻa ʻenau moʻuí maʻá e Puleʻangá. (Fakahā 12:​10, 11; 20:4) Kuo ʻikai fehangahangai ʻa e kau ʻāngeló mo ha faʻahinga ʻahiʻahi pehē. Pea kuo ʻikai te nau aʻusia ʻa e ngaahi palopalema ʻoku faʻa hoko ki he faʻahinga ʻo e tangatá. Ko ia ai, heʻikai ke mahino kakato kiate kinautolu ʻa e tuʻunga angahalaʻia ʻoku ʻi ai ʻa e faʻahinga ʻo e tangatá pea mo e ngaahi palopalema ʻoku tau tofanga ai ʻa kitautolu ko e faʻahinga ʻo e tangatá. Ka ʻe mahino ia ki he toko 144,000 koeʻuhi kuo nau aʻusia ʻa e ngaahi palopalema pehē. Niʻihi ʻo kinautolu naʻe pau ke nau ikuʻi ʻa e ngaahi tōʻonga angahala mamafa ʻaupito, pea ʻoku nau ʻilo ʻa hono faingataʻa ke ikuʻi iá. (1 Kolinitō 6:​9-11) Ko ia ai, te nau feangai ʻi ha founga fakaʻatuʻi mo e faʻahinga fakaemāmani ʻe ʻi honau malumalú.​—Hepelū 2:​17, 18.

KO E FAKATAHAʻANGA ʻA E ʻOTUÁ

17. ʻOku ʻuhinga ki he hā ʻa e foʻi lea ko e “fakatahaʻanga”?

¹⁷ ʻOku fakahā mai ʻe he Tohitapú kiate kitautolu ko Kalaisí ko e ʻulu ia ʻo e fakatahaʻanga ʻa e ʻOtuá, pea ko hono kau mēmipá ʻoku nau anganofo kia Sīsū. (ʻEfesō 5:​23, 24) Ko ia ko e foʻi lea “siasi,” pe “fakatahaʻanga ʻa e ʻOtua,” ʻoku ʻikai ʻuhinga ia ki ha fuʻu fale. Kaekehe, ʻoku ʻuhinga ia ki ha falukunga kakai Kalisitiane. (1 Kolinitō 15:9) ʻOku malava ke tau lea he ʻahó ni ʻo fekauʻaki mo e fakatahaʻanga ʻa e kau Kalisitiané ʻa ia ʻoku tau fakataha mo iá. ʻI he ʻuhinga tatau, ʻoku tau lau ʻi he Tohitapú ʻo fekauʻaki mo e “fakatahaʻanga ʻa e kau Leotisia,” pea ʻi he tohi ʻa e ʻapositolo ko Paulá kia Filimone ʻo fekauʻaki mo e “fakatahaʻanga [naʻe ʻi hono] ʻapi.”​—Kolose 4:​16, NW; Filimone 2, NW.

18. (a) Ko hai ʻoku hoko ko e “fakatahaʻanga ʻa e ʻOtua moʻui”? (e) Ko e hā ʻa e ngaahi kupuʻi lea ʻoku uiʻaki ʻi he Tohitapú ʻa e fakatahaʻangá ni?

¹⁸ Kaekehe, ʻi he taimi ʻoku lave ai ʻa e Tohitapú ʻo fekauʻaki mo e “fakatahaʻanga ʻa e ʻOtua moʻui,” ʻoku ʻuhinga leva ia ki ha falukunga kakai ʻe taha ʻo e kau muimui ʻo Kalaisí. (1 Tīmote 3:​15, NW) ʻOku toe ui foki kinautolu “ko e fakatahaʻanga ʻo e ʻuluaki fānau ʻa ia kuo tohi kinautolu ʻi langi.” (Hepelū 12:​23, NW) Ko ia ko e “fakatahaʻanga ʻa e ʻOtua” ʻoku faʻuʻaki ʻa e kau Kalisitiane kotoa ʻi māmani ʻa ia ʻoku nau maʻu ʻa e ʻamanaki ki he moʻui fakahēvaní. Ko hono fakakātoá, ko e toko 144,000 pē ʻa e faʻahinga ʻoku faʻuʻaki ʻa e “fakatahaʻanga ʻa e ʻOtua.” ʻI he ʻahó ni ko ha tokosiʻi pē ʻo kinautolú ni, ko ha toenga pē, ʻoku kei ʻi he māmaní. Ko e kau Kalisitiane ʻoku nau ʻamanaki ke moʻui taʻengata ʻi he māmaní ʻoku nau hanga ki he kau mēmipa ko eni ʻo e “fakatahaʻanga ʻa e ʻOtua moʻui” ki ha tataki fakalaumālie. ʻOku toe ui foki ʻi he Tohitapú ʻa e fakatahaʻanga ko eni ʻo e kau mēmipa ʻe toko 144,000 ʻaki ʻa e ngaahi kupuʻi lea ʻo hangē ko e “taʻahine ko e uaifi ʻo e Lami,” ko e “sino ʻo Kalaisi,” ko e “temipale ʻo e ʻOtua,” ko e “Isileli oe Otua,” pea mo e “Selusalema Foʻou.”​—Fakahā 21:9; ʻEfesō 4:12; 1 Kolinitō 3:17; Kalētia 6:​16, PM; Fakahā 21:2.

KO E MEʻA FOʻOU ʻI HE TAUMUʻA ʻA E ʻOTUÁ

19. Ko e hā ʻa e meʻa foʻou naʻe fokotuʻu ʻe he ʻOtuá ke fakahokoʻaki ʻene fuofua taumuʻa ki he māmaní?

¹⁹ Naʻe ʻikai liliu ʻe he ʻOtua ko Sihová ʻa ʻene taumuʻa ki he māmaní mo e faʻahinga ʻo e tangatá ʻi he hili hono kamata taki ʻe ʻĀtama ʻa e faʻahinga ʻo e tangatá ʻi he hala ʻo e angahalá mo e maté. Kapau naʻe fai pehē ʻe he ʻOtuá, ʻe mei ʻuhinga leva ia ʻo pehē kuo ʻikai malava ʻe he ʻOtuá ke fakahoko ʻa ʻene fuofua taumuʻá. Ko ʻene taumuʻa mei he kamataʻangá ke ʻai ha palataisi ʻi māmani lahi pea fakafonu ʻaki ʻa e kakai fiefia mo moʻui lelei, pea ʻoku kei tuʻulāhoko pē ʻa e taumuʻa ko iá. Ko e meʻa foʻou pē naʻe fokotuʻu mai ʻe he ʻOtuá ko ʻene fokotuʻutuʻu ki ha founga-pule foʻou ke fakahokoʻaki ʻene taumuʻá. Hangē ko ia kuo tau vakai ki aí, ko hono ʻAló, ʻa Sīsū Kalaisi, ko e pule tefito ia ʻi he founga-pule ko ení, pea ʻe ʻohake mei he lotolotonga ʻo e faʻahinga ʻo e tangatá ʻa e toko 144,000 ke pule fakataha mo ia ʻi hēvani.​—Fakahā 7:4.

20. (a) Ko hai ʻoku hoko ko e “ngaahi langi foʻou” pea mo e “fonua foʻou”? (e) Ko e hā kuo pau ke ke fai ka ke hoko ko ha taha ʻo e “fonua foʻou”?

²⁰ Ko e kau pule ko eni ʻi hēvaní ʻe hoko ko e “ngaahi langi foʻou” ʻo e fokotuʻutuʻu foʻou ʻa e ʻOtuá. Ka ʻoku hā mahino kapau ʻe ʻi ai ha kau pule māʻoniʻoni pehē ki he māmaní, tā kuo pau ke ʻi ai ʻa e faʻahinga ke nau pule mai ki ai. ʻOku lave ʻa e Tohitapú ki he faʻahinga ko ení ko e “fonua foʻou.” (2 Pita 3:13; Fakahā 21:​1-4) ʻE kau ʻiate kinautolu ʻa Siope, Tēvita mo Sione Papitaiso​—ʻio, ʻa e faʻahinga angatonu kotoa naʻa nau moʻui ki muʻa pea toki haʻu ʻa Sīsū ki he māmaní. Ka ʻe tokolahi ange ʻa e faʻahinga ʻe hoko ko e “fonua foʻou,” ʻo kau ai ʻa e faʻahinga te nau hao moʻui atu ʻi he ngataʻanga ʻo e ngaahi meʻa ʻo e tuʻu angakoví ni. Te ke hoko ko ha tokotaha ʻo e kau hao moʻui atu ko ení? ʻOkú ke fie hoko ko ha tokotaha ʻi he malumalu ʻo e founga-pule ʻa e ʻOtuá? Kapau ko ia, ʻoku ʻi ai ʻa e ngaahi fiemaʻu kuo pau ke ke aʻusia.

[Fakatātā ʻi he peesi 121]

Naʻe ō ki hēvani ʻa e kau tangata leleí ni?

Tuʻi ko Tēvita

Siope

Sione Papitaiso

[Fakatātā ʻi he peesi 122]

ʻI hono pō fakamuimui mo e kau ʻapositoló, naʻe pehē ai ʻe Sīsū te nau hoko ko e kau pule fakataha mo ia ʻi he puleʻanga ʻo ʻene Tamaí