Tohi Tohi Tapu Fika 61—2 Pita
Tokotaha-Tohí: Pita
Feituʻu Naʻe Tohi Aí: Pāpilone (?)
Kakato Hono Tohí: 64 T.S. nai
ʻI HONO faʻu ʻe Pita ʻa ʻene tohi hono uá, naʻá ne ʻiloʻi ai kuo vave ke ne fehangahangai mo e maté. Naʻá ne holi lahi ke fakamanatu ki hono kaungā Kalisitiané ʻa e mahuʻinga ʻo e ʻilo totonú ke tokoniʻi kinautolu ke tauhi maʻu ai ʻenau tuʻumaʻu ʻi heʻenau ngāue fakafaifekaú. ʻE ʻi ai nai ha ʻuhinga ke veiveiua ai ko e ʻapositolo ko Pitá ʻa e tokotaha-tohi ʻo e tohi hono ua ʻoku uiʻaki hono hingoá? Ko e tohí tonu ʻokú ne toʻo atu ʻe ia ha veiveiua pē ʻe malanga hake nai fekauʻaki mo e tuʻunga ʻo e tokotaha-tohí. ʻOku pehē ʻe he tokotaha-tohí ko iá ko “Simione Pita, ko e tamaioʻeiki mo aposetolo ʻa Sisu Kalaisi.” (2 Pita 1:1) ʻOkú ne lave ki heni ko e ‘tohi eni hono ua ʻoku ou fai kiate kimoutolú.’ (3:1, PM) ʻOkú ne lau fekauʻaki mo ia ko ha fakamoʻoni sio tonu ki he fakasinokehe ʻa Sīsū Kalaisí, ko ha monū naʻe kau fakataha ai ʻa Pita, mo Sēmisi mo Sione, pea ʻokú ne tohi fekauʻaki mo eni fakataha mo e ongoʻi ʻa ha fakamoʻoni sio tonu. (1:16-21) ʻOkú ne lave ai ʻo pehē naʻe tomuʻa tala ʻe Sīsū ʻa ʻene maté.—2 Pita 1:14; Sione 21:18, 19.
2 Kae kehe, kuo fakahaaʻi ʻe he kau fakaanga ʻe niʻihi ʻa e faikehekehe ʻi he sīpinga faʻu ʻo e ongo tohí ko ha ʻuhinga ia ke ʻikai lau ai ʻa e tohi hono uá ko e tohi ia ʻa Pita. Ka ʻoku ʻikai totonu ke ʻomai ʻe he meʻá ni ha palopalema moʻoni, he ko e kaveingá mo e taumuʻa ʻi he tohí naʻe kehekehe. Tānaki atu ki ai, naʻe fai ʻe Pita ʻene ʻuluaki tohí “ʻia Siliveinusi, ko e kainga [pe tokoua] tonunga,” pea kapau naʻe ʻoange kia Silivēnusi ha tauʻatāina ki hono faʻu ʻo e ngaahi sētesí, naʻe mei lava ke fakamatalaʻi ʻe he meʻá ni ʻa e faikehekehe ʻo e sīpinga ʻi he ongo tohí, koeʻuhi ʻoku hā mahino naʻe ʻikai ha kaunga ʻo Silivēnusi ʻi hono fai ʻo e tohi hono uá. (1 Pita 5:12) Ko ʻene kaú kuo toe fakakikihiʻi ia ʻo makatuʻunga ʻi he “ʻikai fakamoʻoni lelei ki ai ʻa e Ngaahi Tamaí.” Kae kehe, hangē nai ko ia kuo vakai ki ai mei he saati “Muʻaki Ngaahi Katiloka Tuʻu-Ki-Muʻa ʻo e Ngaahi Konga Tohi Tapu Faka-Kalisi Kalisitiané,” naʻe fai e vakai ki he Ua Pitá ko e konga ia ʻo e katiloka Tohi Tapú ʻe ha kau maʻu mafai tokolahi ki muʻa ʻi he Kōsilio Hono Tolu ʻo Carthage.
3 Naʻe fai ʻanefē ʻa e tohi hono ua ʻa Pitá? ʻOku ngalingali pē naʻe hiki ia ʻi he 64 T.S. nai mei Pāpilone pe ofi ki ai, taimi nounou pē mei he ʻuluaki tohí, ka ʻoku ʻikai ha fakamoʻoni hangatonu, tautefito ki he feituʻú. ʻI he taimi ʻo hono hikí, ko e lahi taha ʻo e ʻū tohi ʻa Paulá naʻe tufaki takai ia ʻi he lotolotonga ʻo e ngaahi fakatahaʻangá pea naʻe ʻiloʻi ko e tohi ia ʻe Pita, ʻa ia naʻá ne vakai ki ai ko e fakamānavaʻi ʻe he ʻOtuá pea fakakalasi kinautolu mo e “ngaahi konga kehe ʻo e Tohitapu.” Ko e tohi hono ua ʻa Pitá ʻoku fai ia ‘kiate kinautolu kuo taʻimalie ha tui ʻoku maʻongoʻonga tatau mo haʻamautolú,’ pea ʻoku kau ai ʻa e faʻahinga ʻa ia ne fai ki ai ʻa e ʻuluaki tohí mo e niʻihi kehe ʻa ia naʻe malanga ki ai ʻa Pita. Hangē ko e tufaki takai ʻo e ʻuluaki tohí ʻi he ngaahi feituʻu lahi, ʻoku pehē pē ʻa e tufaki lahi ʻo e tohi hono uá.—2 Pita 3:15, 16; 1:1; 3:1; 1 Pita 1:1.
ʻUHINGA ʻOKU ʻAONGA AÍ
8 He fiemaʻu moʻoni ē ko e ʻilo totonú! Ko Pita tonu ʻokú ne fatu ki heʻene ngaahi fakaʻuhingá ʻa e ʻilo totonu kuó ne maʻu mei he Ngaahi Konga Tohi Tapu Faka-Hepeluú. ʻOkú ne fakamoʻoni naʻe fakamānavaʻi kinautolu ʻe he laumālie māʻoniʻoní: “He kuo teʻeki siʻi ke ʻomeia ha palofisai ʻi he tuʻutuʻuni ʻa e tangata: ka naʻe lea mei he ʻOtua ha kau tangata ʻi he takina kinautolu ʻe he Laumalie Maʻoniʻoni.” ʻOkú ne toe fakahaaʻi foki ko e poto ʻo Paulá naʻe “foaki kiate ia.” (1:21; 3:15) ʻOku tau maʻu ʻaonga lahi ʻi he fakakaukau ki he ngaahi konga Tohi Tapu fakamānavaʻi kotoa ko ení pea ʻi he piki maʻu ki he ʻilo totonú. Heʻikai leva ai ke tau hoko ʻo fakataʻetaʻehohaʻa, hangē ko e faʻahinga ʻoku fakamatalaʻi ʻe Pita ʻenau pehē: “[ʻOku kei] pehe ni pe ʻa e meʻa kotoa pe, ʻio, ʻa ia ai pe talu mei he kamataʻanga ʻo mamani.” (3:4) Pea heʻikai ke tau tō ki he ngaahi tauhele ʻa e kau faiako loi hangē ko ia ʻoku fakamatalaʻi ʻe Pita ʻi he vahe 2 ʻo ʻene tohí. ʻI hono kehé, ʻoku totonu ke tau fakakaukau tuʻumaʻu ki he ngaahi fakamanatu naʻe ʻomai ʻe Pita mo e kau hiki Tohi Tapu kehé. ʻOku tokoniʻi kitautolu ʻe he faʻahingá ni ke tau “tuu mau i he mooni” pea ʻi he kātaki mo e tuʻumaʻu ʻo “tubulekina i he ofa, bea moe ilo ki ho tau Eiki moe Fakamoui ko Jisu Kalaisi.”—1:12, PM; 3:18, PM.
9 Ke hoko ko ha tokoni ki he tupulaki ʻi he “ʻilo kanokano ki he ʻOtua, mo Sisu Kalaisi ko hotau ʻEiki,” ʻoku fakaongoongoleleiʻi ʻe Pita ʻa e feinga tōtōivi ke langa hake ʻa e ngaahi ʻulungāanga faka-Kalisitiane ko ia ʻoku fakahokohoko ʻi he vahe 1, veesi 5 ki he 7. Pea ʻi he vahe 1, veesi 8, ʻokú ne tānaki mai ai: “He kapau ʻoku ʻiate kimoutolu ʻa e ngaahi meʻa ni, ʻo tupulekina, ʻe ʻikai ai te mou fakapikopiko pe taʻefua, ʻi he lavaʻi ʻo e ʻilo kanokano ki hotau ʻEiki ko Sisu Kalaisi.” Ko e moʻoni ko e fakalototoʻa lelei moʻoni eni ki he ngāue ʻi he tuʻunga ko e kau faifekau ʻa e ʻOtuá ʻi he ngaahi ʻaho faingataʻa ko ení!—1:2.
10 He mahuʻinga ē ke feinga ʻaki ʻete lelei tahá koeʻuhi ke fakapapauʻi ai ʻa e kau ʻi he “ngaahi talaʻofa fungani mo mahuʻinga” ʻa Sihova ko e ʻOtuá! Ko ia ʻoku ekinaki ai ʻa Pita ki he kau Kalisitiane paní ke nau sio fakamamaʻu ki he taumuʻa ʻo e Puleʻangá, ʻi heʻene pehē: “Ke ʻasili hoʻomou feinga ke ʻai ke pau homou ui mo homou fili: he ko ia ʻoku ne fai ʻa e ngaahi meʻa ko ia, ʻe ʻikai ʻaupito te ne humu ʻi ha taimi: ʻio, ʻi he fai pehe ʻe faifai pea ʻatu ke mou matuʻaki haoʻuli hoʻomou hu ki he puleʻanga taʻengata ʻo hotau ʻEiki mo Fakamoʻui ko Sisu Kalaisi.” ʻOku fakahanga leva ʻe Pita ʻa e tokangá ki he tuʻunga fisifisimuʻa ʻo e lāngilangi ʻo e Puleʻanga ʻo Sīsuú, ʻa ia naʻá ne sio tonu ai fakafou he vīsone fakasinokehé, peá ne tānaki mai: “Kaeʻumaʻā ʻoku tau maʻu ʻa e folofola palofisai, ʻa ia ko e meʻa ʻoku pau ange.” Ko e moʻoni, ko e palōfisai kotoa fekauʻaki mo e Puleʻanga fisifisimuʻa ʻo Sihová ʻe fakahoko moʻoni. Ko ia ai, ʻoku tau fakaongo atu ʻi he falala pau ʻa e ngaahi lea ʻa Pita naʻe hiki mei he palōfisai ʻa ʻAiseá: “ʻI he funga ʻo e talaʻofa ʻa ʻEne ʻAfio ʻoku tau ʻamanaki ki ha ngaahi langi foʻou mo ha fonua foʻou, ʻa ia ʻoku nofoʻanga ai ʻa maʻoniʻoni.”—2 Pita 1:4, 10, 11, 19; 3:13; Ai. 65:17, 18.