ʻE Lava Fēfē ke Ke Maluʻi Hoʻo Fānaú?

HILI ʻa e kau ʻi ha ngaahi taʻu he ako ʻi ha feituʻu ofi, naʻe kamata ha ako fakalahi ʻa Uonaa fakataha mo e toʻutupu kehe ʻe toko 3,000 nai ʻi São Paulo, Pelēsila. ʻI he ʻuluaki taimí, naʻá ne fakatokangaʻi ai ʻa hono fakatau atu mo hono ngāueʻaki ʻe he kaungāakó ʻa e ngaahi faitoʻo kona tapú. ʻI heʻene sino siʻí, naʻe ʻikai fuoloa kuó ne hoko ko ha tokotaha maʻukovia ʻi hono fakamāʻulaloʻi pea ʻi he tuʻunga fakatuʻutāmaki ʻi hono ʻuluaki ngaohikoviʻi ʻe he fānau ako taʻumotuʻa angé.

Naʻe toe ʻi ai foki ʻa e ngaahi palopalema ʻa e tuofefine ʻo Uoná ko ʻEva. ʻI heʻene fie fai ʻa ʻene lelei tahá, naʻá ne ako ʻo mātuʻaki fuʻu lahi ʻo ne aʻusia ai ʻa e tāvaivaia mo e puputuʻu fakaeʻatamai. ʻI he tatau mo e toʻutupu kehé, naʻe fiemaʻu fakatouʻosi ʻe Uona mo ʻEva ha maluʻi fakaesino mo fakaeongo. Ko e hā ʻa e faʻahinga tokoni ʻoku fiemaʻu ʻe hoʻo fānaú? ʻE lava fēfē ke ke teuʻi kinautolu ki he moʻui ko e tokotaha lahí? Ko e moʻoni, ko e hā ʻa e kahaʻu ʻokú ke fiemaʻu ki hoʻo fānaú?

ʻOku Nau Fiemaʻu ʻa e Meʻa Lahi Ange ʻi he Meʻakaí

Fakakaukau angé ʻi ha mōmeniti fekauʻaki mo e pole ʻoku fehangahangai mo e ngaahi mātuʻá ʻi hono maluʻi ʻo ʻenau fānaú ʻi he ʻaho ní. Koeʻuhi ko e tōlalo ʻi he anga ʻo e moʻui fakafāmilí pea mo e tupulaki ʻa e masivá, ʻi he ngaahi fonua lahi ko e tokolahi ʻo e fānau ʻoku nofo ʻi he ngaahi halá ʻoku fakautuutu. Ko e ngāue leipa ʻa ha kiʻi tama ko e nunuʻa ia ʻo e taʻemalava ke maluʻi ʻa e fānau īkí mei hono hekasí. ʻOku toe ʻauha foki ʻa e fānau iiki tokolahi ʻi hono ngāuehalaʻaki ʻa e faitoʻo kona tapú. Ko e fakatātaá, ʻi he taimi pē kuo hoko moʻoni ai ha tokotaha taʻu hongofulu tupu Pelēsila ʻo maʻunimā ʻe he faitoʻo kona tapú, kuo mole leva ʻa e melinó mei hono ʻapí. Tuku kehe ʻa e mafasia fakaeongo kuo hokosia ʻe heʻene ongo mātuʻá, kuo ʻi ai mo e fāinga ke fakapaʻangaʻaki haʻane fakaakeake, mo e haʻu ki hona ʻapí ha kau tila faitoʻo kona tapu taʻemeesi ʻo fekau tuʻu mai ke ʻoange ʻa e totongi.

Kae kehe, neongo ʻa e ngaahi tenge ʻo e moʻuí, ʻoku hokohoko atu ʻa e ngaahi mātuʻa tokolahi ʻi he fāinga ʻi hono tokonaki ki heʻenau fānaú ʻo ʻikai ko e meʻakai, vala, mo e nofoʻanga pē, kae toe pehē foki ki ha maluʻanga mei he fakamālohí, ngāuehalaʻaki ʻa e faitoʻo kona tapú, mo e ngaahi palopalema kehe. Ko ha feinga māʻolunga ʻeni, ka ʻoku feʻunga nai ia? Fēfē ʻa e maluʻi mei he maumau fakaeongó mo e fakalaumālié? ʻOku ʻiloʻi ʻe he tokolahi ko e lavameʻa fakaemātuʻá ʻoku kau ki ai ʻa e fetakai mo e ngaahi pole ʻoku kau ki he ngaahi fili ʻa ʻenau fānaú ki he ngaahi kaungāmeʻá mo e sipotí. Ka, ʻe lava fēfē ke fakaʻehiʻehi ʻa e ngaahi mātuʻá mei he fuʻu tōtuʻa ʻa e maluʻí pe fuʻu fakangofua tavalé? ʻOku fakaafeʻi atu koe ke ke vakai ki he ngaahi tali ʻoku maʻu ʻi he kupu hono hokó.

[Fakamatala ʻi lalo]